1, 2. a) ¿Mbaʼépa jahecháta ko artíkulope? b) ¿Mbaʼépa ohechauka Jehová ñanepytyvõsetereiha?

 JEHOVÁ ikatu ñanepytyvõ ñaaguanta hag̃ua ñane provlemakuéra ha jaservi hag̃ua chupe vyʼápe. Ko artíkulope jahecháta mbaʼéichapa Jehová ojapo upéva, ha mbaʼéichapa ñande ikatu jaaprovechapaite pe ajúda Jehová omeʼẽva ñandéve. Péro primerorã iporãta ñarresponde ko porandu: “¿Añetehápe piko Jehová ñanepytyvõse?”.

² Jatopa hag̃ua la rrespuésta, ñapensami umi mbaʼe heʼi vaʼekue apóstol Pablo pe kárta oskrivi vaʼekuépe umi hebréope. Haʼe oskrivi: “Jehová chepytyvõ hína, ndakyhyjemoʼãi asy, ¿mbaʼe piko ojapóta cherehe peteĩ persóna cheichagua?” (Heb. 13:6). Algúno diksionário bíblico heʼi pe palávra “chepytyvõ” ojepurúva ko versíkulope heʼiseha peteĩ persóna odiparáva oho oipytyvõ hag̃ua peteĩ ojerurévape hína ajúda. Koʼág̃a epensami Jehová odiparaha oho oipytyvõ hag̃ua peteĩ persóna ohasávape hína peteĩ situasión ijetuʼúva. Añetehápe kóva ohechauka porã ñandéve Jehová ipyʼaite guive ñanepytyvõseha. Upéicha jareko rupi Jehovápe ñande ykére, ikatúta ñaaguanta vyʼápe umi ñane provlemakuéra.

3. ¿Mbaʼéichapa Jehová ñanepytyvõ mbohapy hendáicha vyʼápe ñaaguanta hag̃ua?

³ ¿Mbaʼéichapa Jehová ñanepytyvõ ñaaguanta hag̃ua vyʼápe? Lívro de Isaíaspe jatopa la rrespuésta. ¿Mbaʼérepa jaʼe upéva? Pórke heta umi profesía Isaías oskrivi vaʼekue Jehová espíritu rupive, ideprovechoiterei avei ñandéve koʼág̃arupi. Avei heta vése Isaías oipuru umi palávra ndahasýiva ñantende hag̃ua oñeʼẽ hag̃ua Jehová rehe. Por ehémplo pe kapítulo 30-pe oipuru umi ehémplo iporãitereíva oñeʼẽ hag̃ua mbaʼéichapa Jehová  oipytyvõ isiervokuérape. Upépe heʼi: 1) Jehová ohendu ha ombohovaiha umi ñemboʼe jajapóva chupe, 2) ñandegiaha, ha 3) ñanevendesitaha koʼág̃a ha amo gotyove. Ñaanalisamína koʼág̃a peteĩteĩ koʼã mbaʼe.

4. a) ¿Mbaʼépa heʼi vaʼekue Jehová umi judío oiko vaʼekuére Isaías tiémpope, ha mbaʼépa oheja oiko hesekuéra? b) ¿Mbaʼe esperánsapa Jehová omeʼẽ umi judío ifiélvape? (Isaías 30:18, 19).

⁴ Oñepyrũvo pe kapítulo 30 de Isaías Jehová heʼi umi judíore ‘che família hovaʼatãitéva’, ha heʼi voi haʼekuéra ‘opeka hetavéntema hague’. Upe rire heʼive: ‘Ko puévlo ningo irrevélde, nohenduseiete voi che léi’ (Is. 30:1, 9). Haʼekuéra naiñeʼẽrendúi rupi, Isaías oprofetisa vaʼekue Jehová opermititaha oiko hesekuéra peteĩ mbaʼe ivaietereíva (Is. 30:5, 17; Jer. 25:8-11). Ha upeichaite oiko kuri, umi babilonio ojagarra ha ogueraha chupekuéra Babilóniape. Péro ijapytepekuéra oĩ kuri avei umi judío iñeʼẽrendúva, ha proféta Isaías oguereko kuri peteĩ mensáhe de esperánsa chupekuéra g̃uarã. Haʼe heʼi chupekuéra peteĩ díape Jehová ohechauka jeytaha imbaʼeporãha hendivekuéra (elee Isaías 30:18, 19). Ha upéva ningo oñekumpli Jehová onohẽ jeýrõ guare chupekuéra Babilonia poguýgui. Péro upéva ndoikói kuri ensegidaite. Pe fráse “Jehová ningo ipasiénsia, haʼe ohaʼarõ hína ohechauka hag̃ua imbaʼeporãha” ohechauka ohasa vaʼerãha peteĩ tiémpo ikatu hag̃uáicha umi judío iñeʼẽrendúva osẽ Babilóniagui. Ha upéva upeichaite kuri. Ohasa 70 áño ikatu hag̃uáicha umi judío iñeʼẽrendúva oho jey Jerusalénpe (Is. 10:21; Jer. 29:10). Haʼekuéra og̃uahẽ jey rire Jerusalénpe hasẽ, péro ndahaʼéi ohasa asy haguére umi babilonio poguýpe, síno ovyʼaitereígui hikuái.

5. ¿Mbaʼépa oasegura ñandéve Isaías 30:19?

⁵ Tuichaiterei ningo ñanemokyreʼỹ la heʼíva Isaías 30:19: “Nde Jára katuete ohendúta rejerure asy jave chupe nepytyvõmi hag̃ua”. Pórke upéva ohechauka Jehová ojapysaka porãha umi orasión jajapóvare chupe ha pyaʼe voi okontestaha umíva. Isaías heʼi: “Haʼe okontestáta ndéve ohendumírente voi la eréva”. Koʼã ñeʼẽ iporãitéva ñanemomanduʼa ñande Túa Jehová ndahaʼeiha oipytyvõtanteva umi ojerurévape chupe ajúda, síno ke haʼe ojaposetereiha voi upéva. ¡Ajépa katuete vyʼápe ñaaguantáta oimeraẽ mbaʼe jaikuaa rupi upéva!

6. ¿Mbaʼéichapa Isaías ohechauka porã Jehová ohenduha káda uno umi isiervokuéra ñemboʼe?

⁶ Ko versíkulo avei oasegura ñandéve Jehová ohenduha umi orasión káda uno jajapóva chupe. ¿Mbaʼérepa jaʼe upéva? Pe primera párte pe kapítulo 30 de Isaíaspe Jehová oipuru pe palávra “peẽ” pórke oñeʼẽ pe ipuévlo kompletoitére, péro pe versíkulo 19-pe oipuru pe palávra “nde” pórke oñeʼẽ hína peteĩteĩ umi isiervokuérape. Isaías heʼi: “Nde nanerasẽmoʼãvéima. Nde Jára katuete ohendúta rejerure asy jave chupe nepytyvõmi hag̃ua. Haʼe okontestáta ndéve”. Jehová ningo ñanderayhueterei devísio, upévare jahasa asy jave ndeʼimoʼãi ñandéve: “Nde nembarete vaʼerã ne ermánoicha”. Upéva rangue haʼe ojepyʼapy káda uno ñanderehe ha haʼete voi oñenkarga ohendu hag̃ua umi ñemboʼe jajapóva chupe (Sal. 116:1; Is. 57:15).

7. ¿Mbaʼéichapa Isaías ha Jesús ohechauka iñimportanteha ñañemboʼe jey jey?

⁷ Ñande ñañemboʼe jave Ñandejárape peteĩ mbaʼe ñandepyʼapýva rehe, haʼe primeroite voi ikatu ñanemombarete ikatu hag̃uáicha jagueropuʼaka upe provléma. Ha oiméramo upe provléma ndopái sapyʼaitépe ñande ñapensa haguéicha, upéicha jave iporãta jajerure jey jey Jehovápe ñanepytyvõmi hag̃ua ikatu hag̃uáicha ñaaguanta. Ha upéva voi hína la Jehová oipotáva jajapo. Upéicha rupi heʼi ñandéve: “Ani penekaneʼõ, pesegi peñemboʼe Ñandejárape”  (Is. 62:7). ¿Mbaʼépa heʼise upéva? Heʼise ñañemboʼe jey jey vaʼerãha Jehovápe ha ani voi ñanekaneʼõ upe hague. Kóva ñanemomanduʼaiterei la Jesús heʼi vaʼekuére Lucas 11:8-10, 13-pe. Upépe haʼe oipuru heta ehémplo ñaneanimáva ikatu hag̃uáicha ñañemboʼe jey jey ha ñainsisti voi jajerurévo Jehovápe ijespíritu sánto. Ikatu avei jajerure chupe ñandegiami hag̃ua ikatu hag̃uáicha jadesidi porã.

8. ¿Mbaʼéicha oñekumpli raʼe pe heʼíva Isaías 30:20, 21?

⁸ (Elee Isaías 30:20, 21). Umi babilonio ehersitokuéra omongora vaʼekue Jerusalén un áño imédiore. Upe tiémpope umi judío ohasa asyeterei vaʼekue. Umi isufrimientokuéra ningo normálma chupekuéra g̃uarã pe tembiʼu ha ýicha. Péro ohechaukaháicha umi versíkulo 20 ha 21, Jehová opromete kuri osalvataha chupekuéra haʼekuéra oñarrepenti ha okambiáramo. Isaías heʼi voi vaʼekue Jehová haʼeha pe “Mboʼehára Ijojahaʼỹva” ipuévlope g̃uarã, ha opromete voi Jehová omboʼetaha chupekuéra oadora hag̃ua chupe haʼe oipotahaichaite. Upéva oñekumpli kuri umi judiokuéra osẽrõ guare Babilóniagui. Upérõ Jehová ohechauka kuri haʼeha pe Mboʼehára Ijojahaʼỹva. Jehová ogia rupi chupekuéra, haʼekuéra ikatu kuri oadora jey chupe haʼe oipotahaichaite. Koʼág̃a avei Jehová haʼe hína pe ñane Mboʼehára Ijojahaʼỹva ha jaikuaávo upéva ningo ñanembovyʼaiterei.

9. ¿Mbaʼéichapa Jehová ñanemboʼe koʼág̃arupi?

⁹ Peteĩ priviléhio ningo la Jehová ikatu haguére ñanemboʼe. Koʼã versíkulope Isaías ñanekompara unos kuánto estudiánte Jehová omboʼévape mokõi hendáicha. Primero, Isaías heʼi: “Haʼetéta voi rehechátava upe Mboʼehára Ijojahaʼỹvape”. Ko komparasiónpe pe mboʼehára oĩ umi estudiantekuéra renondépe. ¿Mbaʼéichapa Jehová ojapo upéva koʼág̃arupi? Iñorganisasión rupive. Por ehémplo oipuru umi rreunionkuéra, asambléa, umi puvlikasión jaguerekóva, umi vidéo ha hetaiteve mbaʼe ñanemboʼe hag̃ua. Entéro koʼã mbaʼe Jehová omeʼẽva ñandéve ñanepytyvõ ikatu hag̃uáicha vyʼápe ñaaguanta umi situasión ijetuʼúva jahasáva.

10. ¿Mbaʼéichapa koʼág̃arupi ñande ñahendu Ñandejára ñeʼẽ ñande kupépe?

¹⁰ Isaías ohechauka ñandéve pe segunda fórma mbaʼéichapa Jehová ñanemboʼe heʼívo: “Rehendúta peteĩ ñeʼẽ nde kupépe”. Koʼápe Isaías heʼi Jehová ojoguaha peteĩ mboʼehára oguatáva ohóvo iñestudiantekuéra rapykuéri, oñatende ha ogiáva chupekuéra moõrupipa oho vaʼerã. ¿Mbaʼéichapa ñande koʼág̃arupi ñahendu Ñandejára ñeʼẽ ñande kupépe? Jaleévo  la Biblia. Upépe ningo jatopáta Jehová ñeʼẽ ojeskrivi vaʼekue ymaitereíma ijespíritu rupive. Upéicharõ jalee jave la Biblia haʼete ku Jehová oñeʼẽva hína ñandéve ñande kupéguio ládo (Is. 51:4).

11. ¿Mbaʼépa jajapo vaʼerã ikatu hag̃uáicha vyʼápe ñaaguanta, ha mbaʼérepa upéva?

¹¹ ¿Mbaʼépa ikatu jajapo ikatu hag̃uáicha jaaprovechapaite pe gía Jehová omeʼẽva ñandéve Iñeʼẽ ha iñorganisasión rupive? Jareko vaʼerã enkuénta mokõi mbaʼe Isaías heʼi vaʼekue. Primero haʼe heʼi: “Kóva hína pe tape iporãva”, ha upéi heʼi: “Eho koʼárupi” (Is. 30:21). Upéicharõ ndeʼiséi hína sólamente jaikuaa vaʼerãha pe tape iporãva, síno jaha vaʼerã avei upérupi. La Biblia ha iñorganisasión rupive ñande ikatu jaikuaa umi mbaʼe Jehová ojeruréva ñandehegui, ha mbaʼéichapa umíva ikatu ñamoĩ en práktika ñande rekovépe. Ñande jajapo vaʼerã katuete koʼã mokõi mbaʼe ikatu hag̃uáicha vyʼápe ñaaguanta jaservívo Jehovápe. Upéicharõ añoite jaguereko la segurida Jehová katuete ñanevendesitaha.

12. Heʼiháicha Isaías 30:23-26, ¿mbaʼéichapa Jehová ovendesíta raʼe ipuévlope?

¹² (Elee Isaías 30:23-26). ¿Mbaʼéichapa oñekumpli raʼe ko profesía? Umi judío oho jey vaʼekue hetãme oĩ rire hikuái prisionéro Babilóniape ohupyty kuri hetaiterei vendisión Jehovágui. Por ehémplo Jehová omeʼẽ rasapa kuri chupekuéra hoʼu vaʼerã, péro oĩ kuri peteĩ mbaʼe iñimportantevéva upévagui. Amedída ke haʼekuéra oadora jey Jehovápe haʼe oipotahaichaite, haʼe osegi kuri omeʼẽ chupekuéra opa mbaʼe oikotevẽva ikatu hag̃uáicha oservi porã chupe hikuái. Ñandejára puévlo upe tiémpope guare núnka ndorresivíriva peichaite peve hetaite mbaʼe porã Jehovágui. Ohechaukaháicha pe versíkulo 26, Jehová oheja pe iñenseñánsa omimbi pe kuarahýicha (Is. 60:2). Ohupyty rupi koʼã vendisión, ipuévlo ikatu kuri oguereko pe fuérsa oservi hag̃ua chupe vyʼápe, ha ‘oñeñandu porãiterei’ kuri hikuái (Is. 65:14).

13. ¿Mbaʼéicha oñekumpli ko ñane tiémpope pe profesía heʼíva ojeadora jeytaha Jehovápe haʼe oipotahaichaite?

¹³ ¿Oñekumplípa ko ñane tiémpope pe profesía heʼíva ojeadora jeytaha Jehovápe haʼe oipotahaichaite? Si. Áño 1919 guive hetaiterei persóna ikatúma osẽ Babilonia Guasúgui, orrepresentáva entéro rrelihión fálsa oĩva ko yvy ape ári. Entéro koʼã persónape ojegueraha hína peteĩ lugár iporãvéva pe Tiérra Prometídagui, ha upéva hína pe paraíso espirituál (Is. 51:3; 66:8). ¿Mbaʼépa hína upe paraíso espirituál?

14. ¿Mbaʼépa hína pe paraíso espirituál, ha máva mávapa odisfruta ko paraísogui? (Ehecha pe nóta).

 ¹⁴ Áño 1919 guive umi unhído odisfrutáma hína ko paraíso espirituálgui. b Ha ohasávo ohóvo pe tiémpo, umi oguerekóva la esperánsa oikóvo ko yvy ape ári, umi “ótro ovechakuéra”, ikatúma avei odisfruta ko paraíso espirituálgui. Ha upevakuére ohupytýma hetaiterei vendisión Jehovágui (Juan 10:16; Is. 25:6; 65:13).

15. ¿Moõpa oĩ pe paraíso espirituál?

¹⁵ ¿Moõpa oĩ koʼág̃a pe paraíso espirituál? Oparupiete ko yvy ape ári, pórke pe paraíso espirituál oĩ oikohápe guive umi oadoráva Jehovápe. Upéicharõ, noimportái moõpa ñande jaiko, ikatu hína jadisfruta ko paraíso espirituálgui ñande jaapojáma guive ñande pyʼaite guive pe adorasión verdadéra.

16. ¿Mbaʼépa jasegi vaʼerã jajapo ikatu hag̃uáicha jahecha mbaʼeichaitépa iporã pe paraíso espirituál?

¹⁶ Peteĩ mbaʼe ñanepytyvõtava ikatu hag̃uáicha siémpre ñaime pe paraíso espirituálpe, haʼe jasegi ñamombaʼe pe unida jarekóva ñane ermanokuérandi ko múndo tuichakuére. ¿Mbaʼéichapa ikatu jajapo upéva? Ñamañávo umi mbaʼe porã orekóva ñane ermanokuéra oĩva kongregasiónpe, ha ndahaʼéi moõpa ojavy hikuái (Juan 17:20, 21). ¿Mbaʼérepa iñimportantete jajapo upéva? Ñapensamína ko ehémplo. Peteĩ kaʼaguýpe ningo oĩ hetaiterei yvyramáta, ha káda yvyramáta idiferénte ojuehegui. Upéicha avei pe paraíso espirituál ñande ñaimehápe oĩ opaichagua ermáno, ha káda ermáno idiferénte ojuehegui (Is. 44:4; 61:3). Ñande ningo jaikuaa porã peteĩ kaʼaguýpe oĩtanteha voi umi yvyramáta orekóva defékto, péro ndahaʼéi upe haguére jaʼétamava pe kaʼaguy naiporãiha. Upéicha avei ndajahejái vaʼerã pe ñane imperfeksión térã ñane ermanokuéra imperfeksión oguapy ñanderehe, ha upéva káusare ndajahechavéima mbaʼeichaitépa iporã Jehová organisasión.

17. ¿Mbaʼépa ikatu jajapo káda uno ñamombarete hag̃ua pe unida oĩva kongregasiónpe?

 ¹⁷ ¿Mbaʼépa ikatu jajapo ikatu hag̃uáicha ñamombarete pe unida oĩva kongregasiónpe? Ñañehaʼãmbaitékena ikatu hag̃uáicha jaiko pyʼaguapýpe ñane ermanokuérandi (Mat. 5:9; Rom. 12:18). Káda ke ñande ñañehaʼã jajapo ñande párte jajogueraha porã hag̃ua ñane ermanokuérandi, ñaipytyvõ hína ikatu hag̃uáicha pe paraíso espirituál iporãve amás día. Aníkena ñanderesarái Jehová haʼe hague upe ñandeguerúva ko paraíso espirituálpe (Juan 6:44). Ha epensamíntena mbaʼeichaitépa oiméne Jehová ovyʼa ohechávo ñande ñañehaʼãmbaiteha jaiko hag̃ua pyʼaguapýpe ha en unida (Is. 26:3; Ageo 2:7).

18. ¿Mbaʼe mbaʼérepa iporãta jajepyʼamongeta, ha mbaʼérepa?

¹⁸ ¿Mbaʼépa ikatu jajapo ikatu hag̃uáicha jaaprovechapaite umi vendisión Jehová omeʼẽva isiervokuérape? Iporãitereíta ningo jajepyʼamongetáramo umi mbaʼe jaleévare la Bíbliape ha ñane puvlikasionkuérape. Jastudia ha jajepyʼamongetáramo ikatúta jaguereko umi kualida iporãva ñanemomýitava ikatu hag̃uáicha jajoayhu ñande pyʼaite guive “oñoermáno teéicha” (Rom. 12:10). Jajepyʼamongetáramo umi vendisión jahupytýva Jehovágui koʼág̃ama voi, pe amista jaguerekóva hendive imbaretevéta. Ha ñapensáramo umi vendisión Jehová omeʼẽtava ñandéve amo gotyove, ñanepytyvõta jaservise hag̃ua chupe pára siémpre. Entéro koʼã mbaʼe ñanepytyvõta ikatu hag̃uáicha vyʼápe jaservi Jehovápe.

19. a) Ohechaukaháicha Isaías 30:18, ¿mbaʼéguipa ikatu ñaime segúro? b) ¿Mbaʼépa ñanepytyvõta vyʼápe ñaaguanta hag̃ua?

¹⁹ Jehová ningo “opuʼãta” ha ñanedefendéta ág̃a ohundi vove umi hénte añáme (Is. 30:18). Haʼe ningo peteĩ Dios ihustoitereíva, upévare ikatu jajerovia haʼe ohunditaha itiempoitépe Satanás múndo (Is. 25:9). Ñande ningo Jehováicha avei ñahaʼarõ pasiéntemente og̃uahẽ peve pe día Ñandejára ñandesalva hag̃ua ñane enemigokuéragui. Og̃uahẽ aja upe tiémpo, ñande ñaiméma desidído javalorataha pe priviléhio jaguerekóva ñañemboʼévo chupe, jastudia Iñeʼẽ, ñamoĩ en práktika umi mbaʼe ñaaprendéva, ha jajepyʼamongeta umi vendisión jahupytývare. Jasegíramo jajapo koʼã mbaʼe, Jehová ñanepytyvõta jasegi hag̃ua vyʼápe ñaaguanta.