1. ¿Mbaʼépa ñande jaikuaa porã, ha mbaʼéguipa ñaimekuaa segúro?

 ÑANDE ningo jaikuaa oĩtaha umi oñemoĩva ñane kóntrape japredika haguére, ha amo gotyove ikatu hína hetave oĩ ojapóva upéva (Dan. 11:44; 2 Tim. 3:12; Apoc. 16:21). Upéicharõ jepe ñaimekuaa segúro Jehová katuete ñanepytyvõtaha ñaikotevẽ jave. ¿Mbaʼérepa? Jehová ningo siémpre oipytyvõ vaʼekue isiervokuérape okumpli hag̃ua iñasignasión, tahaʼe haʼéva umi situasión ijetuʼúva ombohováiva hína hikuái. Jahecha hag̃ua peteĩ ehémplo ñaanalisami umi mbaʼe oiko vaʼekue proféta Ezequiel rehe, haʼe opredika vaʼekue umi judío ojegueraha vaʼekuépe Babilóniape.

2. a) ¿Mbaʼeichagua héntepepa Ezequiel opredika vaʼerã kuri? (Ezequiel 2:3-6). b) ¿Mbaʼépa jahecháta ko artíkulope?

² ¿Mbaʼeichagua persónapepa Ezequiel opredika vaʼerã kuri? Jehová heʼi hesekuéra “hovaʼatã”, ‘ikaprichóso’, ha ‘oñemoĩha hikuái ikóntrape’. Haʼekuéra oporokutu rasy voi umi ñuatĩcha ha ipeligróso umi alakráncha. Ndareíri ningo Jehová heʼi vaʼekue Ezequiélpe heta vése: “Ani rekyhyje” (elee Ezequiel 2:3-6). Ezequiel ikatu vaʼekue okumpli pe asignasión oñemeʼẽ vaʼekue chupe opredika hag̃ua pórke Jehová omondo chupe, omombarete chupe Ñandejára espíritu, ha Ñandejára ñeʼẽ omombarete chupe ijerovia. ¿Mbaʼéichapa koʼã mbohapy mbaʼe oipytyvõ vaʼekue Ezequiélpe, ha mbaʼéichapa umíva ikatu ñanepytyvõ koʼág̃arupi?

3. ¿Mbaʼéichapa Jehová omombarete vaʼekue Ezequiélpe?

³ Jehová heʼi vaʼekue Ezequiélpe: “Che romondo” (Ezeq. 2:3, 4). Upéva ningo katuete omombareténe raʼe chupe, pórke haʼe oiméne imanduʼa Jehová heʼi hague avei la mísma kósa Moisés ha Isaíaspe (Éx. 3:10; Is. 6:8). Ezequiel oikuaa avei Jehová oipytyvõ hague umi mokõi profétape okumpli hag̃ua umi asignasión ijetuʼúva. Upévare Jehová heʼírõ guare Ezequiélpe dos vése: “Che romondo”, haʼe oĩ kuri segúro Jehová katuete oĩtaha ijykére okumpli porã hag̃ua la iñasignasión. Ha heta vése haʼe oskrivi vaʼekue: “Jehová oñeʼẽ chéve”, ha “Jehová oñeʼẽ jey chéve” (Ezeq. 3:16; 6:1). Katuete ningo Ezequiel oĩ vaʼekue segúro Jehová omondo hague chupe. Avei Ezequiel túa haʼe vaʼekue peteĩ saserdóte, ha oiméne omboʼe rakaʼe chupe Jehová siémpre heʼiha iprofetakuérape oipytyvõtaha chupekuéra. Por ehémplo, Jehová heʼi vaʼekue Isaac, Jacob ha Jeremíaspe: “Che aime nendive” (Gén. 26:24; 28:15; Jer. 1:8).

4. ¿Mbaʼépa oiméne ombopyʼaguapy ha omombarete rakaʼe Ezequiélpe?

⁴ ¿Mbaʼépa la majoría umi israelita ojapo vaʼekue Ezequiel opredikárõ guare chupekuéra? Jehová heʼi: “Umi Israel rogaygua nanerendusemoʼãi, pórke haʼekuéra nacherenduséi chéve” (Ezeq. 3:7). Umi hénte orrechasávo Ezequiélpe, orrechasa hína hikuái Jehovaitépe voi. Upéva oasegura Ezequiélpe umi hénte ndorrechasái hague chupe haʼe ojapo vai haguére hembiapo kómo proféta. Jehová oasegura vaʼekue avei Ezequiélpe ág̃a oñekumpli vove pe huísio haʼe oanunsiáva, umi hénte oikuaataha “peteĩ proféta oĩ hague ijapytepekuéra” (Ezeq. 2:5; 33:33). ¡Mbaʼeichaitépa oiméne ombopyʼaguapy rakaʼe koʼã mbaʼe  Ezequiélpe ha omombarete chupe osegi hag̃ua opredika!

5. Ohechaukaháicha Isaías 44:8, ¿mávapa hína pe ñanemombaretéva?

⁵ Ñandéve avei ñanemombarete jaikuaávo Jehová ñanemondo hague japredika hag̃ua. Haʼe ñanemombaʼe heʼívo ñanderehe haʼeha Itestígo (Is. 43:10). ¡Ajépa tuichaite priviléhio upéva! Jehová heʼi hagueichaite Ezequiélpe: “Ani rekyhyje”, koʼág̃arupi heʼi avei ñandéve: “Ani pekyhyje”. ¿Mbaʼérepa ñande ndajakyhyjéi vaʼerã umi oñemoĩvagui ñane kóntrape? Pórke Ezequiel rehe oiko haguéicha, ñandéve ñanemondo hína Jehová ha haʼe ñandeapoja (elee Isaías 44:8).

6. a) ¿Mbaʼéichapa Jehová opromete ñandéve ñanepytyvõtaha? b) ¿Mbaʼépa hína pe ñanemokyreʼỹ ha ñanemombaretéva?

⁶ Jehová opromete ñandéve ñanepytyvõtaha. Por ehémplo, Jehová heʼi mboyvemínte: “Peẽ hína che testígo”, heʼi: “Nde rehasa vove oĩhárupi y, che aĩta nendive. Ha rehasa vove umi rríore, nderejahogamoʼãi. Rehasa vove tata mbytérupi, nde nderekaimoʼãi, pe tata nanderapymoʼãi ni michĩmi” (Is. 43:2). Ñande japredika jave sapyʼánte jahasa heta mbaʼe ijetuʼúva, ha ikatu voi ñambojoja umíva peteĩ inundasiónre, ha umi pruéva ijetuʼuetereíva ikatu ñakompara tata rehe. Upéicharõ jepe Jehová ñanepytyvõ rupi jasegi japredika (Is. 41:13). Ezequiel tiémpope guaréicha, koʼág̃arupi avei hetaiterei hénte orrechasa pe mensáhe. Ñanemanduʼa vaʼerã haʼekuéra ñanderrechasávo ndeʼiseiha ndajapredikaporãiha. Jehová ningo ñandeguerohory ñande japredika jave fiélmente, ha upéva ñanemokyreʼỹ ha ñanemombarete. Apóstol Pablo heʼi vaʼekue: “Káda únope ojepagáta hembiapokuére” (1 Cor. 3:8; 4:1, 2). Peteĩ ermána heta áñorema ojapóva iprekursorádo heʼi: “Avyʼa ningo aikuaávo Jehová ovendesiha umi esfuérso jajapóva”.

7. ¿Mbaʼéichapa Ezequiel oñeñandu vaʼekue imanduʼávo pe visión ohecha vaʼekuére? (Ehecha pe taʼanga oĩva ko rrevísta apére).

⁷ Ezequiel ohecha vaʼekue mbaʼeichaitépa ipoderóso Ñandejára espíritu. Haʼe ohecha vaʼekue voi peteĩ visión ohechaukáva pe espíritu sánto oipytyvõha hína umi ánhel ipoderosoitévape ha omonguʼeha hína pe kárro selestiál (Ezeq. 1:20, 21). ¿Mbaʼépa ojapo raʼe upérõ Ezequiel? Haʼe heʼi: “Ahechárõ guare upéva, añesũ ha amboja che rova yvýre”. Ezequiel oñesorprendeterei ha upévare oñesũete pe yvýpe (Ezeq. 1:28). Upéi Ezequiel opensávo pe visión ijojahaʼỹva ohecha vaʼekuére, oiméne oasegura chupe Ñandejára espíritu rupive ikatutaha okumpli la iñasignasión.

8, 9. a) ¿Mbaʼépa Jehová heʼi vaʼekue Ezequiélpe? b) ¿Mbaʼéichapa Jehová omombareteve vaʼekue Ezequiélpe opredika hag̃ua pe território ijetuʼuetévape?

⁸ Jehová heʼi vaʼekue Ezequiélpe: “Yvypóra raʼy, eñemboʼy añeʼẽ hag̃ua nendive”. Upéva ningo omokyreʼỹ vaʼekue Ezequiélpe ha pe espíritu sánto omeʼẽ chupe pe fuérsa haʼe oikotevẽva opuʼã hag̃ua pe yvýgui. Ezequiel oskrivi vaʼekue: “Ñandejára espíritu oike che pype, ha chemoñemboʼy” (Ezeq. 2:1, 2). Upéi Ezequiel opredika aja entéro, ogia chupe Ñandejára espíritu sánto (Ezeq. 3:22; 8:1; 33:22; 37:1; 40:1). Ñandejára espíritu omombarete vaʼekue Ezequiélpe okumpli hag̃ua pe traváho oñemeʼẽ vaʼekue chupe. Upévare haʼe ikatu vaʼekue opredika umi hénte oĩvape iterritóriope, jepe haʼekuéra “ikaprichóso ha ndojaposéi la ojeʼéva chupekuéra” (Ezeq. 3:7). Jehová heʼi vaʼekue Ezequiélpe: “Che romombaretéta ikatu hag̃uáicha ndedesidído haʼekuéra ikaprichosoháicha, ha rombohovaʼatãta haʼekuéra  hovaʼatãháicha. Rombohovaʼatãta peteĩ diamánteicha, nderovaʼatãvéta itágui. Ani rekyhyje ni reñemondýi chuguikuéra” (Ezeq. 3:8, 9). Haʼete voi Jehová heʼi vaʼekue Ezequiélpe: “Ani reheja umi hénte kaprichóso nedesanima. Che romombaretéta”.

⁹ Upéi Ñandejára espíritu ogueraha Ezequiélpe pe território opredikátavape. Haʼe oskrivi vaʼekue: “Añandu Jehová podér ombaʼapo pohyiha cherehe”. Una semána haguépe haʼe ontende porã pe mensáhe ikatu hag̃uáicha oĩ segúro la opredikátavare (Ezeq. 3:14, 15). Upéi Jehová heʼi chupe oho hag̃ua peteĩ ñu guasúpe ha upépe ‘Ñandejára espíritu oike ipype’ (Ezeq. 3:23, 24). Upérõ Ezequiel oĩma kuri preparádo oñepyrũ hag̃ua opredika.

10. ¿Mbaʼeichagua ajúdapa ñande ñaikotevẽ japredika hag̃ua, ha mbaʼérepa?

¹⁰ ¿Mbaʼeichagua ajúdapa ñande ñaikotevẽ japredika hag̃ua? Ñakontesta hag̃ua, ñapensamína la oiko vaʼekue Ezequiel rehe. Haʼe oñepyrũ mboyve opredika, Ñandejára espíritu omombarete chupe oikotevẽhápe. Koʼág̃arupi Satanás oñorairõ hína ñane kóntrape ñandejokoségui ani hag̃ua japredika, upévare ikatu jaʼe ñande avei ikatuha japredika Ñandejára espíritu ñanepytyvõ rupi añoite (Apoc. 12:17). Satanás ningo ipoderosoiterei, upévare haʼetévaicha ñande ndaikatumoʼãiva ñandepuʼaka hese, péro pe predikasión rupive en rrealida ñande ñagana hína chupe (Apoc. 12:9-11). ¿Mbaʼérepa ikatu jaʼe upéva? Pórke Satanás ñaneamenasáramo jepe, japredika jave jahechauka hína ndajakyhyjeiha chugui. Ñande ñasẽ jave japredika, Satanás operde hína pe ñorairõ. Upéicharõ, ¿mbaʼépa hína la ñanepytyvõva jasegi hag̃ua japredika oĩramo jepe ñane enemigokuéra oñemoĩva ñane kóntrape? Hesakã porãiterei ñandéve Jehová ñanemombareteha ijespíritu sánto rupive ha haʼe ñandeguerohoryha (Mat. 5:10-12; 1 Ped. 4:14).

11. ¿Mbaʼépa Ñandejára espíritu ojapóta ñanderehehápe, ha mbaʼéichapa ikatu jasegi jarresivi upéva?

 ¹¹ ¿Mbaʼépa avei ojasegura ñandéve ñapensávo mbaʼéichapa Jehová omombarete vaʼekue Ezequiélpe ikatu hag̃uáicha opredika? Ñandejára espíritu ningo ikatu omeʼẽ ñandéve pe fuérsa ñaikotevẽva ñambohovái hag̃ua oimehaichagua provléma jatopáva predikasiónpe (2 Cor. 4:7-9). Upéicharõ, ¿mbaʼépa ikatu jajapo jajasegura hag̃ua jasegitaha jarresivi Ñandejára espíritu? Tekotevẽ ñañemboʼe kontinuadoite ha jajerovia Jehová ohendutaha ñane ñemboʼe. Jesús heʼi vaʼekue idisipulokuérape: “Pesegi pejerure”, “pesegi peheka” ha “pesegi pembota”. Ha Jehová okontestáta omeʼẽvo “espíritu sánto umi ojerurévape chupe” (Luc. 11:9, 13; Hech. 1:14; 2:4).

12. Heʼiháicha Ezequiel 2:9–3:3, ¿moõguipa osẽ pe kuatiañeʼẽ ha mbaʼépa heʼi hese?

¹² Ezequiélpe ombopyʼaguasu vaʼekue Ñandejára espíritu, péro avei omombarete chupe Ñandejára ñeʼẽ. Peteĩ visiónpe Ezequiel ohecha vaʼekue álgien ojokoha hína peteĩ kuatiañeʼẽ (elee Ezequiel 2:9–3:3). ¿Moõguipa osẽ raʼe upéva? ¿Mbaʼépa heʼi hese? ¿Ha mbaʼéichapa upéva omombarete Ezequiélpe? Jahechamína. Pe kuatiañeʼẽ ningo osẽ Ñandejára trónogui. Amalisia Jehová ojevale peteĩva umi ánhel Ezequiel ohecha vaʼekuére omeʼẽ hag̃ua chupe pe kuatiañeʼẽ (Ezeq. 1:8; 10:7, 20). Pe kuatiañeʼẽ rehe ningo oĩ Ñandejára ñeʼẽ, upéva hína pe mensáhe de huísio ipukúva Ezequiel omombeʼu vaʼerã umi ojegueraha vaʼekuépe prisionéro (Ezeq. 2:7). Upe mensáhe ojeskrivi vaʼekue mokõive ládo pe kuatiañeʼẽ rehe.

13. ¿Mbaʼépa Jehová heʼi vaʼekue Ezequiélpe ojapo hag̃ua pe kuatiañeʼẽgui, ha mbaʼérepa upéva heʼẽ asy rakaʼe?

¹³ Jehová heʼi vaʼekue iprofétape hoʼu hag̃ua pe kuatiañeʼẽ ha ‘hyg̃uatã hag̃ua pype’. Ezequiel iñeʼẽrendu ha hoʼupaite pe kuatiañeʼẽ. ¿Mbaʼépa heʼise rakaʼe ko párte oĩva ko visiónpe? Tekotevẽ hague Ezequiel ontende porã pe mensáhe haʼe oanunsiátava. Haʼe oguerovia vaʼerã pe mensáhe ikatu hag̃uáicha omomýi chupe opredika hag̃ua. Upéi oiko peteĩ mbaʼe osorprendetereíva chupe. Ezequiel ohechakuaa pe kuatiañeʼẽ ‘eiretéicha heʼẽ asyha’ (Ezeq. 3:3). ¿Mbaʼérepa? Pórke Ezequiélpe g̃uarã tuichaiterei mbaʼe orrepresenta Jehovápe. Chupe g̃uarã haʼetévaicha voi álgo heʼẽ asýva pórke ombopyʼarory ha ombovyʼa chupe (Sal. 19:8-11). Haʼe oagradeseterei Jehovápe oiporavo haguére chupe haʼe hag̃ua iproféta.

14. ¿Mbaʼépa oipytyvõ vaʼekue Ezequiélpe oĩ hag̃ua preparádo okumpli hag̃ua iñasignasión?

¹⁴ Upéi Jehová heʼi Ezequiélpe: “Eñatende porã ha ehendu entéro mbaʼe haʼéva hína ndéve” (Ezeq. 3:10). Péicha Jehová heʼi vaʼekue Ezequiélpe oñehaʼã hag̃ua imanduʼa umi mbaʼe ojeskrivívare pe kuatiañeʼẽme ha ojepyʼamongeta hag̃ua hese. Péicha Ezequiel omombareteve hína kuri ijerovia, ha oikuaáma pe mensáhe iñimportantetéva omeʼẽ vaʼerã umi héntepe (Ezeq. 3:11). Ezequiel ontende porã ha oguerovia rire Ñandejára mensáhe, haʼe oĩma preparádo oñepyrũ hag̃ua opredika ha osegi hag̃ua okumplipa peve pe iñasignasión (ekompara Salmo 19:14 heʼívare).

15. ¿Mbaʼépa tekotevẽ ñaaguanta hag̃ua?

¹⁵ Jasegi hag̃ua japredika ha ñaaguanta tekotevẽ jasegi ñamombarete ñande jerovia Ñandejára ñeʼẽ rupive. Ezequiel ojapo haguéicha, ñande avei tekotevẽ ñañatende porã entéro mbaʼe Jehová heʼívare ñandéve. Koʼág̃arupi Jehová oñeʼẽ hína ñandéve la Biblia rupive. ¿Mbaʼéichapa ikatu jajasegura Ñandejára Ñeʼẽ  osegiha hína ñanepytyvõ umi mbaʼe ñapensáva, ñañandúva ha jajaposévape?

16. ¿Mbaʼépa jajapo vaʼerã Ñandejára Ñeʼẽgui, ha mbaʼéichapa ikatu ñamog̃uahẽ upéva ñane korasõme?

¹⁶ Ñande jaʼu jave peteĩ tembiʼu ha upéi oguapy la ñane rembiʼu, upéi la ñande rete imbareteve. Ha jastudia jave Ñandejára Ñeʼẽ ha ñapensa hese, ñande jerovia imbareteve avei. Upéva hína la Jehová ñanemboʼeséva oñeñeʼẽvo pe kuatiañeʼẽre. Jehová ningo oipota voi ñande ñaneryg̃uatã umi mbaʼe haʼe heʼívape, térã ñantende porã Iñeʼẽ. Upéva jajapo hína ñañemboʼévo, jaleévo ha jajepyʼamongetávo. Primero ñañemboʼe vaʼerã japrepara hag̃ua ñane korasõ, ikatu hag̃uáicha og̃uahẽ ñane korasõme umi mbaʼe haʼe opensáva. Upéi jalee peteĩ rreláto oĩva la Bíbliape, ha ñañemotiémpo jajepyʼamongeta ha ñapensa hag̃ua umi mbaʼe jalee vaʼekuére. ¿Mbaʼépa oikóta jajapóramo upéicha? Amáske jajepyʼamongeta, Ñandejára Ñeʼẽ og̃uahẽvéta ñane korasõme ha ñande jerovia imbaretevéta.

17. ¿Mbaʼérepa iñimportantete jajepyʼamongeta umi mbaʼe jaleévare la Bíbliape?

¹⁷ ¿Mbaʼérepa iñimportantete jalee la Biblia ha jajepyʼamongeta hese? Jajapóramo upéicha ñanemombaretéta ikatu hag̃uáicha japredika umi notísia porã koʼág̃a, ha jaikuaauka hag̃ua pe mensáhe ipohyietéva ikatúva otoka ñandéve koʼẽrõite ñamog̃uahẽ umi héntepe. Avei jajepyʼamongetáramo umi kualida porãite Jehová orekóvare, ñane amista hendive imbaretevéta ha ñañemoag̃uivéta hese. Upéva ñanembovyʼáta ha ñanepytyvõta jaiko hag̃ua trankílo porã (Sal. 119:103).

18. ¿Mbaʼépa orrekonoséta umi hénte oĩva ñande territóriope, ha mbaʼérepa?

¹⁸ Ezequiel ningo peteĩ proféta vaʼekue, péro ñande nahániri. Upéicharõ jepe ñande jajedesidíma jasegitaha japredika Jehová oipotaha peve. Og̃uahẽ vove pe tiémpo ojehusgatahápe la héntepe, umi oĩva ñande territóriope ndaikatumoʼãi heʼi ndojeavisái hague chupekuéra térã Ñandejára nopenái hague hesekuéra (Ezeq. 3:19; 18:23). Upéva rangue haʼekuéra orrekonoséta pe mensáhe ñande japredika vaʼekue ou hague Ñandejáragui.

19. ¿Mbaʼépa ñanemombaretéta japredika hag̃ua?

¹⁹ ¿Mbaʼépa ñanemombaretéta jasegi hag̃ua japredika? Ñandéve avei ñanemombaretéta umi mbohapy mbaʼe omombarete vaʼekue Ezequiélpe. Ñande ningo jasegi japredika pórke jaikuaa Jehová ñanemondoha jajapo hag̃ua upéva. Ñanembopyʼaguasu ijespíritu sánto ha ñanemombarete Ñandejára Ñeʼẽ. Jehová ñanepytyvõ rupi, ñande ñaĩma desidído jasegitaha japredika ha ñaaguantataha og̃uahẽ meve “pe fin” (Mat. 24:13).