PETEĨ meteorólogo orrevisa heta vése umi imáhen osẽva pe rradárpe. Ohechakuaa ouha hína peteĩ torménta ipeligrósova, ha pe torménta ojagarráta peteĩ sóna oĩháme hetaiterei hénte. Haʼe ojepyʼapy umi héntere ha ndoipotái ojehu chupekuéra mbaʼeve, upévare oavisa jey jey chupekuéra tardeterei mboyve.

Upéicha avei ojapo hína Jehová, haʼe oavisa enterove yvypórape ouha peteĩ “torménta” ivaietereíva, péva ivaieteve oimeraẽ torménta ikatúvagui oanunsia peteĩ meteorólogo. ¿Mbaʼéichapa Jehová omeʼẽ ko avíso? ¿Ha mbaʼéichapa jaikuaa omeʼẽha pe tiémpo oikotevẽva umi hénte ojeprotehe hag̃ua? Jaikuaa hag̃ua upéva, jahechamíta mbaʼéichapa Jehová oporoavisa vaʼekue ymave.

Ymave Ñandejára oavisa vaʼekue heta vése okastigataha umi hénte nokumpliséivape haʼe omandáva (Prov. 10:25; Jer. 30:23). Ha káda ke ojapo upéva omeʼẽ pe avíso heta tiémpo og̃uahẽ mboyve pe “torménta”, ha heʼi umi héntepe mbaʼe kámbiopa ojapo vaʼerã haʼe oguerohory hag̃ua chupekuéra (2 Rey. 17:12-15; Neh. 9:29, 30). Ha omokyreʼỹ hag̃ua umi héntepe ojapo hag̃ua pe iporãva, heta vése ojevale isiervokuéra iñeʼẽrendúvare oanunsia hag̃ua pe kastígo omboútava, ha heʼi hag̃ua chupekuéra tekotevẽha pyaʼe okuʼe hikuái (Amós 3:7).

Ñandejára ojevale vaʼekue peteĩ isiérvo iñeʼẽrendúvare hérava Noé oporoavisa hag̃ua. Heta áñore pyʼaguasúpe oavisa umi hénte hekovai ha ivioléntovape outaha peteĩ Dilúvio ojahoʼipátava ko yvy (Gén. 6:9-13, 17). Heʼi avei chupekuéra mbaʼépa ojapo vaʼerã ojesalva hag̃ua. Noé oñehaʼãmbaite vaʼekue omeʼẽ hag̃ua ko avíso umi héntepe, upévare la Biblia heʼi hese ‘opredika hague umi mbaʼe ihústova’ (2 Ped. 2:5).

Noé oñehaʼãmbaitéramo jepe, umi hénte oikóva upe tiémpope ni michĩmi ndogueroviái ha nopenái pe avíso oúvare Ñandejáragui. Upéicha rupi “ou pe dilúvio ha oñehundipaite hikuái” (Mat. 24:39; Heb. 11:7). Péro umi hénte ndaikatúi heʼi Ñandejára ndoavisái hague chupekuéra.

Oĩ avei vése Jehová oavisa hague umi héntepe og̃uahẽ mboyvemi pe “torménta” oguerúva ikastígo. Upéicharõ jepe siémpre omeʼẽ tiémpo umi héntepe ojapo hag̃ua álgo ikatu hag̃uáicha ojesalva. Upéicha ojapo vaʼekue omboúrõ guare umi 10 plága Egíptope. Jahechamína por ehémplo pe oiko vaʼekue og̃uahẽ mboyve pe séptima plága, pe amandáu ohundírõ guare heta héntepe. Jehová omondo Moisés a Aarónpe oavisa hag̃ua Faraón ha isiervokuérape. Upe avíso oñemombeʼu chupekuéra un día hoʼa mboyve pe amandáu. ¿Orekópa raʼe hikuái tiémpo otopa hag̃ua peteĩ rrefúhio? La Biblia ombohovái: “Faraón siervokuéra ogueroviáva guive Jehová heʼíva, pyaʼe oho oguerupa técho guýpe umi ijesklávo ha hymbakuéra. Péro umi ndogueroviáiva Jehová heʼíva, ohejánte ijesklavokuéra ha hymbakuéra okápe” (Éx. 9:18-21). Péicha jahecha Ñandejára omeʼẽ hague chupekuéra pe tiémpo oikotevẽva ojesalva hag̃ua, ha umi hénte pyaʼe okuʼe vaʼekue ojesalva upe plága tuichaitévagui.

Ñandejára oavisa vaʼekue avei Faraón ha isiervokuérape ombou mboyve pe décima plága. Péro haʼekuéra oñembotavy ha nopenái hese (Éx. 4:22, 23). Upéicha rupi ohecha omanórõ guare itaʼyrakuéra ypykue. ¡Ajépa itríste la oikóva hesekuéra! (Éx. 11:4-10; 12:29). ¿Orekópa raʼe hikuái tiémpo ojapo hag̃ua álgo? Si, Moisés oavisa kuri umi israelítape og̃uahẽtaha upe plága, ha heʼi chupekuéra mbaʼépa ojapo vaʼerã osalva hag̃ua ifamiliakuérape (Éx. 12:21-28). ¿Mboýpa  oĩ opena vaʼekue hese? Ojekalkula ojesalva ha osẽ hague Egíptogui 3 millón persónarupi, umíva apytépe heta israelita ha hendivekuéra “heta extranhéro”, umíva apytépe unos kuánto egipcio (Éx. 12:38, nóta).

Koʼã ehémplo ohechauka porã Jehová siémpre omeʼẽ hague umi héntepe pe tiémpo oñekotevẽva ikatu hag̃uáicha ojesalva (Deut. 32:4). ¿Mbaʼérepa ojapo upéicha? Apóstol Pedro omombeʼu: “Jehová [...] ndoipotái avave oñehundi, síno oipota enterove oñarrepenti” (2 Ped. 3:9). Péicha jahecha Ñandejára ojepyʼapyha umi héntere. Oipota oñarrepenti ha ohendu ikonsého og̃uahẽ mboyve pe kastígo (Is. 48:17, 18; Rom. 2:4).

Ñane tiémpope avei enterove tekotevẽ ohendu peteĩ mensáhe iñimportantetereíva oñemosarambíva hína oparupiete. Jesús oĩrõ guare ko yvy ape ári omombeʼúma kuri ko múndo aña oñehunditaha pe ‘jehasa asy guasúpe’ (Mat. 24:21). Peteĩ profesía rupive omombeʼupaite mbaʼe mbaʼépa idisipulokuéra ohecháta ha ohasáta og̃uahẽ vove upe tiémpo. Haʼe omombeʼu kuri oikotaha heta mbaʼe ijetuʼúva ko múndo tuichakuére, ha koʼág̃a ñande jahecha hína umi mbaʼe (Mat. 24:3-12; Luc. 21:10-13).

Koʼág̃a oñekumpli hína upe profesía, ha Jehová omokyreʼỹ opaichagua persónape iñeʼẽrendu ha oservi hag̃ua chupe. Haʼe oipota enterove umi iñeʼẽrendúva oiko porãve koʼág̃ama voi, ha upéi katu tohupyty hetaiteve vendisión pe múndo pyahúpe (2 Ped. 3:13). Ikatu hag̃uáicha umi hénte ojerovia ipromesakuérare, Jehová omeʼẽ ‘umi notísia porã oñeʼẽva Irréinore’, upe mensáhe ikatu hína osalva ñande rekove ha Jesús heʼi ‘oñemombeʼutaha oparupiete ko yvy ape ári, ojekuaa hag̃ua entéro tetãrupi’ (Mat. 24:14). Ñandejára oorganisa isiervokuérape opredika hag̃ua ko mensáhe 240 país ha territóriorupi. Haʼe oipota ñamog̃uahẽ ko mensáhe ikatúvape guive, ojesalva hag̃ua hikuái haʼe ogueru vove pe kastígo (Sof. 1:14, 15; 2:2, 3).

Upéicharõ la pregúnta iñimportantevéva ndahaʼéi voi omeʼẽpa tiémpo Jehová umi héntepe ohendu hag̃ua pe avíso, pórke jahecha porã haʼe ojapoha upéva. Síno pe pregúnta iñimportantevéva haʼe hína: ¿Openátapa hese umi hénte oĩ aja gueteri tiémpo? Ñande ñamosarambíva pe mensáhe oúva Ñandejáragui, jasegíkena ñaipytyvõ ikatúvape guive ojesalva hag̃ua ág̃a oñehundi vove ko múndo aña.