1, 2. a) ¿Mbaʼépa koʼẽrõite oanunsiáta umi nasión? b) ¿Mbaʼe porandúpa tekotevẽ ñambohovái?

EÑEIMAHINAMÍNA umi nasión ojapomaha ko anúnsio: “¡Jaikóma pyʼaguapýpe ha segúro porã!”. Ikatu voi oñemombaʼeguasu hikuái ha heʼi primera ves en la vída peichaite peve jaikoha segúro. Ha oipotáta voi jaguerovia haʼekuéra ikatuha osolusiona opaichagua provléma oĩva ko múndope. Péro añetehápe ikatu jaʼe haʼekuéra ndaikatumoʼãiha ojoko umi mbaʼe oikótava hína upe rire. ¿Mbaʼérepa? Pórke la Biblia heʼi: “Oñeimoʼãʼỹve jave oñehundíta hikuái. Upéva oúta hiʼarikuéra derrepentete, [...] ha ni mbaʼevéicharõ ndojesalvamoʼãi” (1 Tes. 5:3).

² Jahechávo koʼã mbaʼe oikótava, tekotevẽ ñambohovái koʼã porandu: “¿Mbaʼépa oikóta pe ‘jehasa asy guasu’ aja? ¿Mbaʼépa Jehová oipota jajapo oiko vove upéva? ¿Ha mbaʼéichapa koʼág̃a ikatu jajeprepara ñandefiél hag̃ua pe jehasa asy guasu aja?” (Mat. 24:21).

3. Ohechaukaháicha Apocalipsis 17:5, 15-18, ¿mbaʼéichapa Ñandejára ohundíta ‘Babilonia Guasúpe’?

³ (Elee Apocalipsis 17:5, 15-18). ¡“Babilonia Guasu” oñehundíta! Jaʼéma haguéicha, umi nasión ndaikatumoʼãi ojoko umi mbaʼe oikótava upe tiémpope. ¿Mbaʼérepa? “Pórke Ñandejára  omoĩta iñakãmekuéra peteĩ plan ojapo hag̃ua haʼe oipotáva”. ¿Mbaʼépa hína upe plan? Oñehundipa enteroite umi rrelihión japu, umíva apytépe umi rrelihión heʼíva ijehe kristianoha, péro nomboʼéiva umi héntepe oadora hag̃ua Jehovápe haʼe oipotaháicha. Pe “animál salváhe pytãitéva” ningo oreko “10 hatĩ”, ha Ñandejára omoĩta umíva korasõme upe iplán. Umi 10 hatĩ orrepresenta enteroite umi goviérno polítikope oapojáva “pe animál salváhepe”. Ha pe “animál salváhe” katu haʼe hína pe Naciones Unidas (Apoc. 17:3, 11-13; 18:8). Umi goviérno oñepyrũvo oataka umi rrelihión japúpe, haʼéta pe señál oñepyrũmaha pe jehasa asy guasu. Upéva oikóta degolpete ha omondýita enterovépe ko múndo tuichakuére.

4. a) ¿Mbaʼe rrasónpa ikatu omoĩ umi nasión oataka hag̃ua umi rrelihión japúpe? b) ¿Mbaʼépa ikatu ojapo umi hénte oĩ vaʼekue umi rrelihión japúpe?

⁴ Ndajaikuaái mbaʼe rrasónpa omoĩta umi nasión oataka hag̃ua Babilonia Guasúpe. Ikatu voi heʼi hikuái umi rrelihión káusare ndaiporiha pyʼaguapy ko yvy ape ári, ha avei manterei oñentremeteha hikuái polítikape. Térã ikatu heʼi umi rrelihión ombyatymaha hetaiterei rrikésa ha propieda (Apoc. 18:3, 7). Ág̃a ojeataka vove umi rrelihión japúpe, upéva ndeʼiséi katuete upe moméntope ojejukataha enterove umi hénte oĩvape umi rrelihiónpe. Upéva rangue, ikatu ñapensa oñehundipataha umi organisasión rrelihiósa. Oiko vove upéva, umi hénte oĩ vaʼekue koʼã rrelihiónpe oñemeʼẽta enkuénta ndovaleiha mbaʼeverã umi líder oreko vaʼekue, ha upévare haʼekuéra voi ikatu oñemomombyry umi rrelihióngui.

5. ¿Mbaʼépa Jehová opromete ojapotaha pe jehasa asy guasúpe, ha maʼerãpa?

⁵ La Biblia ndeʼíri mboy tiémpopa ogueraháta oñehundi hag̃ua Babilonia Guasúpe, péro si heʼi pyaʼe oikotaha upéva (Apoc. 18:10, 21). Jehová opromete avei ‘omombykytaha pe tiémpo’ pe jehasa asy guasúpe, ikatu hag̃uáicha ojesalva umi “ojeporavo vaʼekue” ha pe rrelihión verdadéra (Mar. 13:19, 20). Péro, ¿mbaʼépa Jehová oipota jajapo pe jehasa asy guasu oñepyrũ rire ha ou peve pe gérra de Armagedón?

6. ¿Mbaʼépa ñande Jehová siervokuéra jajapo vaʼerã avei?

⁶ Jahecha haguéicha pe ótro artíkulope, Jehová oipota isiervokuéra jajeiete Babilonia Guasúgui. Péro tekotevẽ avei jajapo ótra kósa: jajedesidi vaʼerã jasegitaha jaservi Ñandejárape. Oĩ mokõi mbaʼe tekotevẽva jajapo, jahechamína umíva.

7. a) ¿Mbaʼéichapa jahechaukáta ñakumpli porãha umi mbaʼe Ñandejára omandáva ñandéve? b) Heʼiháicha Hebreos 10:24, 25, ¿mbaʼérepa iñimportánte ñañerreuni, koʼýte koʼág̃a?

⁷ Primero, ñakumpli porã vaʼerã umi mbaʼe Ñandejára omandáva ñandéve. Ni mbaʼevéicharõ ndajaikói vaʼerã umi hénte ko mundopegua oikoháicha. Por ehémplo, ndaikatúi jaasepta mbaʼeveichagua tekovai, umíva apytépe kuimbaʼe omendáva kuimbaʼéndi, térã kuña kuñándi, ni mbaʼeveichagua práktika sexuál orekóva umichagua hénte térã oñekomporta lája hikuái (Mat. 19:4, 5; Rom. 1:26, 27). Segundo, jasegi vaʼerã jaadora Ñandejárape ñane ermanokuérandi. Upéva jajapo ikatuhápe, tahaʼe umi Salón del Réinope, umi ermáno rógape térã ñemiháme jepe. Toiko la oikóva, ñande ndaikatúi jaheja umi rreunión jajapóva jaadora hag̃ua Ñandejárape, ha “koʼýte koʼág̃a jahechávo Ñandejára día hiʼag̃uimbaitemaha” (elee Hebreos 10:24, 25).

8. ¿Mbaʼéichapa posívlemente okambiáta pe mensáhe japredikáva?

⁸ Pe jehasa asy guasu aja, posívlemente okambiáta hína la ñane mensáhe. Koʼág̃a ñande japredika notísia porã oñeʼẽva Ñandejára Réinore ha ñañehaʼã jajapo disípulo. Péro pe jehasa asy guasu aja ikatu hína ñameʼẽ peteĩ mensáhe ipohýiva, upéva la Biblia okompara “amandáu guasu” rehe (Apoc. 16:21). Ikatu hína ñaanunsia Satanás múndo oñehundi potaitemaha. Kon el tiémpo jaikuaa porãta mbaʼépa pe mensáhe ha mbaʼéichapa ñameʼẽta. ¿Jasegítapa jaipuru umi método jaipurúmava por mas de 100 áño, térãpa ñakambiáta? Ñahaʼarõmante vaʼerã jaikuaa hag̃ua upéva. Péro tahaʼe haʼeháicha, posívlemente jarekóta pe priviléhio japredikávo kyhyjeʼỹme peteĩ mensáhe ohechaukáva Jehová okondenamaha ko múndope (Ezeq. 2:3-5).

9. ¿Mbaʼépa ikatu ojapo umi nasión ohendúvo ñane mensáhe, péro mbaʼéguipa ñande ñaime segúro?

⁹ Pe mensáhe japredikáva ikatu hína omomýi umi nasiónpe oñehaʼã hag̃ua ñanemokirirĩete voi. Koʼág̃a ñande ñakonfia Jehováre japredika hag̃ua, ha upéicha avei jajapóta upe moméntope. Ikatu ñaime segúro Ñandejára Jehová omeʼẽtaha ñandéve pe fuérsa ñaikotevẽva jajapo hag̃ua ivolunta (Miq. 3:8).

10. Ojeprofetisa haguéicha Lucas 21:25-28-pe, ¿mbaʼéichapa orreaksionáta umi hénte ohechávo la oikóva pe jehasa asy guasúpe?

¹⁰ (Elee Lucas 21:25-28). Pe jehasa asy guasúpe umi hénte oñemondýita ohechávo ofallaha opa mbaʼe haʼekuéra ojerovia hague. Upe tiémpope ivaietereíta la situasión, arakaʼeve oikoʼỹ haguéicha, ha umi hénte “oñelamentáta” ha okyhyjetereíta voi omanórõ g̃uarã (Sof. 1:14, 15). Upe moméntope Jehová siervokuérape jepe ikatu hína ijetuʼu. Ñande ningo ndajajeheʼái ko múndore, upévare koʼýte umi hénte ikatu ñanembohasa asy. Ha ikatu voi ndajarekopái umi mbaʼe ñaikotevẽva jaiko hag̃ua.

11. a) ¿Mbaʼérepa ko múndo kompletoite omañáta ñanderehe? b) ¿Mbaʼérepa natekotevẽi jakyhyje pe jehasa asy guasúgui?

¹¹ Og̃uahẽta peteĩ moménto umi hénte ipochyetereitaha pórke ohecháta irrelihión oñehundi  hague péro ñanembaʼéva katu nahániri. Katuete péva haʼéta peteĩ notísia tuichaitereíva, ojagarrapátava umi rred sosiál jepe. Umi nasión, igovernantekuéra ha Satanás ndaijaʼemoʼãi ñanderehe, pórke umi testígo de Jehová añoite la noñehundíriva. Ohechakuaáta hikuái ndaikatúi hague ohundipa umi rrelihión ko yvy ape árigui. Upévare ko múndo kompletoite omañáta ñanderehe. Upe moméntope umi nasióngui oikóta Gog de Magog. * Oñembyatýta hikuái oataka vaipaite hag̃ua Jehová puévlope (Ezeq. 38:2, 14-16). Ñande ningo ndajaikuaapái mbaʼépa oikóta pe jehasa asy guasu aja, upévare ikatu ñañepyrũ jajepyʼapy. Péro oĩ peteĩ mbaʼe isegúrova: ndajakyhyjéi vaʼerã pe jehasa asy guasúgui, pórke Jehová heʼíta ñandéve mbaʼépa jajapo vaʼerã jajesalva hag̃ua (Sal. 34:19). Ñande ñañemboʼýta ha ñañakãrapuʼãta, pórke pe tiémpo Ñandejára ñandesalva hag̃ua “hiʼag̃uimbaitéma”. *

12. ¿Mbaʼéichapa “pe esklávo de konfiánsa ha iñarandúva” ñandeprepara ñambohovái hag̃ua umi mbaʼe oikótava hína amo gotyove?

¹² “Pe esklávo de konfiánsa ha iñarandúva” ñandepreparáma oikóvo ñandefiél hag̃ua pe jehasa asy guasúpe (Mat. 24:45). Ojapo upéva de diferénte fórma, péro ñapensamína peteĩva umíva apytégui: umi aty guasu tres diagua ojejapo vaʼekue áño 2016, 2017 ha 2018-pe. Umíva ohechauka kuri ñandéve umi kualida tekotevẽva ñamombarete amáske hiʼag̃ui Jehová ára. Ñanemanduʼami jeýna mbaʼe mbaʼépa hína umíva.

13. ¿Mbaʼépa ñanepytyvõta ñandefiél hag̃ua Jehovápe, ha mbaʼérepa jajapo vaʼerã upéva koʼág̃a?

¹³ Ñandefiél. Pe aty guasu 2016-pe guare héra: “Aníkena arakaʼeve jaheja Jehovápe”. Ha ñanemboʼe kuri tekotevẽha ñamombarete ñane amista Jehová ndive ñandefiél hag̃ua chupe. Ohechauka ñandéve ñañemoag̃uiha Jehováre ñañemboʼéramo ñande pyʼaite guive ha jastudia meméramo la Biblia. Péva ñanemombaretéta jasupera hag̃ua umi mbaʼe ijetuʼuvéva jepe. Amáske opa pota Satanás múndo jahasáta hetave mbaʼe ijetuʼúva, ha upépe ojehecháta ñandefiélpa Ñandejára ha Irréinope. Posívlemente umi hénte osegíta oñembohory ñanderehe (2 Ped. 3:3, 4). ¿Mbaʼérepa upéva? Pórke ñande ndajajeheʼái Satanás múndore. Koʼág̃a ñandefiélramo ikatúta avei ñandefiél pe jehasa asy guasúpe.

14. a) ¿Mbaʼe kámbiopa oĩta Jehová odirihi lájape ipuévlope ko yvy ape ári? b) ¿Mbaʼérepa tekotevẽta ñandefiél upe moméntope?

¹⁴ Pe jehasa asy guasu aja oĩta peteĩ kámbio Jehová odirihi lájape ipuévlope ko yvy ape ári. Og̃uahẽta peteĩ moménto umi unhído oĩva gueteri ko yvy ape ári ohopaitetaha yvágape, ikatu hag̃uáicha oñorairõ pe Armagedónpe (Mat. 24:31; Apoc. 2:26, 27). Péva heʼise pe Kuérpo Governánte noĩmoʼãveimaha ñanendive ko yvy ape ári. Upéicharõ jepe, pe “aty guasu” osegíta oĩ organisádo. Umi ermáno ikatupyrýva oĩva umi ótro ovechakuéra apytépe ogiáta Jehová siervokuérape ko yvýpe. Tekotevẽta jahechauka ñandefielha jaapojávo chupekuéra ha jasegívo umi instruksión omeʼẽva chupekuéra Ñandejára. Upévagui odependéta hína ñane salvasión.

15. ¿Mbaʼéichapa ikatúta ñanembarete ñaaguanta hag̃ua, ha mbaʼérepa iñimportánte ñaaguanta koʼág̃a?

 ¹⁵ Ñaaguanta. Pe aty guasu 2017-pe guare héra: “¡Aníkena eñentrega!”. Ha ñanepytyvõ kuri ñanembarete hag̃ua ha péicha ñaaguanta hag̃ua umi mbaʼe ijetuʼúva. Ñaaprende kuri pe aguánte jareko vaʼerãha ndahaʼéi oho porã ajánte ñandéve. Avei ñaaprende ikatuha ñamombarete ñane aguánte ñakonfiáramo Jehováre (Rom. 12:12). Aníkena arakaʼeve ñanderesarái ko promésa ojapo vaʼekuégui Jesús: “Pe oaguantáva pe fin peve, upéva ojesalváta” (Mat. 24:13). Ko promésa ohechauka ñandéve tekotevẽha ñandefiél ñambohováivo opaichagua provléma. Ñaaguantáramo koʼág̃a, ñanembaretevéta ñaaguanta hag̃ua ág̃a og̃uahẽ vove pe jehasa asy guasu.

16. ¿Mbaʼérepa odepende ñandepyʼaguasu hag̃ua, ha mbaʼépa ikatu jajapo koʼág̃a ñandepyʼaguasuve hag̃ua?

¹⁶ Ñandepyʼaguasu. Pe aty guasu 2018-pe guare héra: “¡Ndepyʼaguasúkena!”. Ha ohechauka kuri ñandéve ndahaʼéi ñandekatupyry haguére la ñandepyʼaguasúva. Pe aguánteicha avei, ñandepyʼaguasu ñakonfia rupi Jehováre. ¿Mbaʼépa ikatu jajapo ñakonfiave hag̃ua hese? Jalee vaʼerã la Biblia káda día ha jajepyʼamongeta mbaʼéichapa Jehová osalva vaʼekue isiervokuérape ymave (Sal. 68:20; 2 Ped. 2:9). Umi nasión ñandeataka vove pe jehasa asy guasu aja, tekotevẽta ñandepyʼaguasu ha ñakonfia Jehováre mas ke núnka (Sal. 112:7, 8; Heb. 13:6). Ñakonfiárõ hese koʼág̃a, ñanepytyvõta ñandepyʼaguasu hag̃ua ág̃a Gog ñandeataka vove. *

17. ¿Mbaʼérepa natekotevẽi jakyhyje Armagedóngui? (Ehecha pe taʼanga oĩva ko rrevísta apére).

¹⁷ Jahecha haguéicha pe ótro artíkulope, enterove lénto ñande tóda la vída jaiko ko múndo ára pahápe. Péro jareko esperánsa jahasataha pe jehasa asy guasu. Pe gérra de Armagedón omohuʼãta umi ára paha. Upéicharõ jepe natekotevẽi jakyhyje, pórke péva haʼe hína Ñandejára gérra (Prov. 1:33; Ezeq. 38:18-20; Zac. 14:3). Jehová omeʼẽ vove la señál, Jesucristo oñepyrũta oataka. Ijykére oĩta umi unhído orresusita vaʼekue ha hetaiterei  ánhel avei. Haʼekuéra oñondivepa oñorairõta Satanás kóntrape, ha avei umi idemónio ha ijehérsito ko yvy arigua kóntrape (Dan. 12:1; Apoc. 6:2; 17:14).

18. a) ¿Mbaʼe garantíapa omeʼẽ ñandéve Jehová? b) ¿Mbaʼéichapa Apocalipsis 7:9, 13-17 ñanepytyvõ ñandepyʼaguapy hag̃ua?

¹⁸ Jehová omeʼẽ ñandéve ko garantía: “Tahaʼe haʼéva pe árma ojepurúva ne kóntrape, núnka nosẽporãmoʼãi” (Is. 54:17). “Peteĩ aty guasu” iñeʼẽrendúva Jehovápe ojesalváta ha ohasáta pe jehasa asy guasu, haʼekuéra osegíta oservi Ñandejárape (elee Apocalipsis 7:9, 13-17). Umi mbaʼe heʼíva la Biblia tuicha ñanembopyʼaguapy pórke ñakonfia ikatutaha jajesalva. Ñandejára Ñeʼẽ heʼi voi: “Jehová oprotehe umi iñeʼẽrendúvape” (Sal. 31:23). Enterovete ñande jahayhúva ha ñambotuicháva Jehovápe javyʼaitereíta haʼe omopotĩ vove héra (Ezeq. 38:23).

19. ¿Mbaʼe esperánsa iporãitévapa oñekumplíta koʼẽrõite?

¹⁹ Ñapensamína mbaʼépa heʼíne 2 Timoteo 3:2-5 oñeʼẽrire umi hénte oñekomporta lájare pe múndo pyahúpe, ndaiporimoʼãveimahápe Satanás (ehecha pe rrekuádro “ Mbaʼéichapa umi hénte oñekomportáta pe múndo pyahúpe”). Ermáno George Gangas, * oĩ vaʼekue Kuérpo Governántepe, heʼi: “¡Ajépa iporãitéta ko múndo ág̃a enterove yvyporakuéra oiko vove oñoermáno ha oñoermánaicha! Koʼẽrõite peikóta pe múndo pyahúpe. Peikove pukúta Jehováicha. Jaikóta pára siémpre”. ¡Ajépa iporãite ko esperánsa jarekóva!