Upe tratádo rupive avei ojedesidi oñeformataha peteĩ organisasión hérava Sociedad de Naciones. Péva ojejapo oñemokyreʼỹ hag̃ua umi tetãme ombaʼapo hag̃ua oñondive, ha oĩ hag̃ua “paz ha segurida” ko múndope. Heta rrelihión heʼíva ijehe kristianoha oapoja ko organisasiónpe. Pe Concejo Federal de las Iglesias de Cristo en América, heʼi voi ko organisasión polítika “orrepresentaha Ñandejára Rréinope ko yvy ape ári”. Upe Consejo Federal oapoja pe Sociedad de Naciónespe omondóvo unos kuánto irrepresentánte pe Conferencia de Paz de Paríspe. Peteĩ rrepresentánte heʼi voi upe konferénsia “omoñepyrũ hague peteĩ époka pyahu ko múndope”.

Ha añetehápe oñepyrũ peteĩ époka pyahu. Péro la omoñepyrũva upéva ndahaʼéi umi persóna oĩ vaʼekue pe Conferencia de Pázpe. Áño 1919-pe pe predikasiónpe oñepyrũ peteĩ époka pyahu, pórke Jehová omombarete ipuévlope opredika hag̃ua arakaʼeve ojepredikaʼỹ haguéicha. Péro upéva oiko mboyve, umi Estudiánte de la Biblia situasión tekotevẽ kuri tuichaiterei okambia.

Pe rreunión anuál ojejapóva ojeelehi hag̃ua umi miémbro de la Sociedad Watch Tower Bible and Tract, oñeprograma ojejapo hag̃ua el 4 de enero de 1919. Upérõ, Joseph Rutherford, pe odirihíva Jehová siervokuéra rembiapo, ojegueraha reiete kuri préso Atlántape (Georgia, Estados Unidos), ha hendive oĩ avei préso 7 ermáno oipytyvõva chupe. La ndojekuaáiva kuri ojeelehi jey vaʼerãpa umi ermáno oĩvape préso térãpa oñekambiáta.

Ermáno Rutherford ojepyʼapy kuri Jehová organisasión rehe. Haʼe oikuaa oĩha ermáno opensáva iporãveha oñemoĩ ótrope de presidénte. Upévare, oskrivi peteĩ kárta pe kársel guive umi ermáno oñerreunítavape, ha orrekomenda ojeelehi hag̃ua Evander Cówardpe. Haʼe heʼi ko ermáno oñemeʼẽmbaiteha ñande Ruvichápe, ipyʼaguapyha ha haʼeha de konfiánsa. Péro heta ermáno oipota oñehaʼarõ 6 mése ojejapo hag̃ua upe eleksión, ha umi avogádo odefendéva umi ermáno ojeapresa vaʼekuépe opensa avei upéicha. Oñeanalisa aja ko téma, oĩ vaʼekue ermáno oñepyrũva ipochy.

 Tiémpo rire, Richard Barber omombeʼu oiko hague peteĩ mbaʼe omohenda porã jeýva pe situasión. Peteĩ ermáno oĩva pe rreuniónpe osẽ heʼi: “Che ndahaʼéi avogádo ha ndaikuaái mbaʼépa la léi ojerure koʼã kásope. Péro si aikuaa Ñandejára ojerureha ñandefiél hag̃ua. Upévare chéverõ g̃uarã jajapo vaʼerã la eleksión ha jaelehi jey de presidénte ermáno Rútherfordpe, ndaipóri ótra fórma iporãvéva jahechauka hag̃ua ñakonfiaha Ñandejárare” (Sal. 18:25).

Alexander Macmillan oĩ vaʼekue avei préso upérõ, ha omombeʼu mbaʼépa oiko kuri al día sigiénte. Ermáno Rutherford ombota chupe pe ipare ha heʼi: “Eguenohẽ nde po”, ha ombohasa chupe peteĩ telegráma. Upe telegráma rupive umi ermáno omombeʼu chupe mbaʼépa odesidi hikuái pe eleksiónpe. Macmillan ohecha pe telegráma mbykymíva ha ensegída ontende mbaʼépa la oiko vaʼekue. Pe telegráma heʼi: “RUTHERFORD WISE VAN BARBER ANDERSON BULLY HA SPILL PRESIDÉNTE UMI TRES PRIMERO OFISIÁL EHEKUTÍVO MBORAYHU OPAVAVÉPE”. Upéva heʼise ojeelehi jey hague umi oĩma vaʼekue voi ha ojeelehi hague kómo ofisiál ehekutívo ermáno Joseph Rutherford ha William Van Ámburghpe. Péicha ermáno Rutherford osegi kómo presidénte.

Umi 8 ermáno oĩ aja kárselpe, umi Estudiánte de la Biblia ojapo peteĩ kampáña ojerure hag̃ua tojepoi chuguikuéra. Koʼã ermáno ha ermána ipyʼaguasúva ombyaty mas de 700.000 fírma. Pe miércoles 26 de marzo de 1919, oñentrega mboyve pe solisitu, ojepoi ermáno Rútherfordgui ha avei umi 7 ermánogui.

Peteĩ grúpo de ermáno orresivi ermáno Rútherfordpe, upérõ haʼe heʼi chupekuéra: “Aikuaa porã ko situasión jahasa vaʼekue oikoha ñandeprepara hag̃uánte, ikatu hag̃uáicha ñaaguanta umi tiémpo ijetuʼuvéva. [...] Pe esfuérso pejapo vaʼekue ndahaʼéi voi kuri penohẽ hag̃ua pene ermanokuérape kárselgui, upéva ndahaʼéi la iñimportantevéva. [...] Peẽ peñorairõ peikuaauka hag̃ua pe añetegua, ha umi ojapo vaʼekue upéva orresivi peteĩ vendisión ijojahaʼỹva”.

Umi mbaʼe oiko vaʼekue ojehusgárõ guare umi ermánope ohechauka posívlemente Jehová voi odirihi hague umi mbaʼe oikóva. Pe 14 de mayo de 1919, pe trivunál de apelasión omombeʼu la senténsia: “Umi ojeakusáva ko kásope [...] oreko kuri derécho ojehusgávo kon hustísia, péro ndojejapói upéicha, upévare oñeanula pe senténsia”. Umi ermánope ojeakusa kuri okomete hague umi delíto ivaietereíva. Upévare oñeperdonánterire chupekuéra térã oñemboguejyvénterire la senténsia, opytátama kuri umi antesedénte ikontrapekuéra. Upe guive avave ndoakusavéi chupekuéra mbaʼevére. Upévare pe Hués Rutherford omantene pe derécho legál orekóva, ha ikatu kuri osegi odefende Jehová siervokuérape pe Trivunál Suprémo de Estados Unidos renondépe, ha upéva ojapo heta vése osẽ rire pe kárselgui.

Ermáno Macmillan heʼi: “Ndaikatúi ningo ropyta rojekuʼako ha rohaʼarõntema ñande Ruvicha oregueraha yvágape. Roñemeʼẽ enkuénta tekotevẽ hague rojapo álgo roikuaa hag̃ua mbaʼépa hína ñande Ruvicha volunta”.

Péro umi ermáno oĩva pe sentrál mundiálpe, ndaikatúi osegi ojapo pe traváho ojapóma vaʼekue voi heta áñore. ¿Mbaʼérepa? Pórke oĩ aja kárselpe, oĩ vaʼekue ohundíva chuguikuéra umi pláka ojepurúva oñeimprimi hag̃ua umi puvlikasión. Upéva odesanima chupekuéra ha oĩ voi oñeporandúva oiménepa opáma pe predikasión.

¿Oĩ gueteri piko ohenduséva pe mensáhe oñeʼẽva Ñandejára Rréinore opredikáva umi Estudiánte de la Biblia? Oñerresponde hag̃ua upéva, ermáno Rutherford odesidi ojapo peteĩ diskúrso, ha upearã oñeinvita enterove umi héntepe. Ermáno Macmillan heʼi: “Ndohóiramo avave, upéva heʼise ja opamaha la predikasión”.

Ermáno Rutherford hasyete hína kuri, upéicharõ jepe, pe domingo 4 de mayo de 1919 ojapo pe diskúrso hérava: “Mbaʼe esperánsapa oĩ umi hénte osufrívape g̃uarã”. Upe rreunión ojejapo kuri Los Ángeles, Califórniape, ha ohendu amo 3.500 persónarupi, ha hetaiterei hénte ndaikatúi oike. Upéi pe ótro díape oho jey 1.500 persóna. Péicha umi ermáno orekóma la rrespuésta: umi hénte ohenduse pe mensáhe.

Umi ermáno ojapo vaʼekue upe rire, omopyenda pe predikasión ojapóva umi testígo de Jehová koʼag̃aite peve.

Rrevísta Ñemañaha osẽ vaʼekue ingléspe el 1 de agosto de 1919 oanunsia ojejapotaha peteĩ aty guasu Cedar Point Ohíope, oñepyrũre septiembre. Peteĩ mitãrusu Misurigua haʼéva Estudiánte de la Biblia ha hérava Clarence Beaty omombeʼu: “Enterovénte ropensa roĩmante vaʼerãha  upe asambléape”. Ha oho mas de 6.000 ermáno, upéva hetaitereive la oñehaʼarõ vaʼekuégui. Upe asambléape oiko peteĩ mbaʼe iporãitereíva, ojevautisa mas de 200 persóna pe lágo Ériepe.

El 5 de septiembre de 1919, pe quinto día de asambléape, ermáno Rutherford ojapo pe diskúrso hérava “Umi oipytyvõvape g̃uarã”. Upe diskúrsope oanunsia osẽtaha peteĩ rrevísta pyahu hérava: The Golden Age. * Haʼe heʼi ko rrevístape osẽtaha jepi heta téma ointeresátava la héntepe, ha omyesakãtaha la Biblia rupive mbaʼéicha rupípa oiko heta mbaʼe.

Oñemokyreʼỹ enterove umi Estudiánte de la Bíbliape opredika hag̃ua pyʼaguasúpe ko rrevísta pyahu reheve. Peteĩ kárta rupive ojeexplika mbaʼéichapa oñeorganisa vaʼerã pe predikasión, upe kártape heʼi: “Enterove umi ojevautisámava imanduʼa vaʼerã orekoha peteĩ priviléhio tuichaitereíva oservívo Ñandejárape, ha oaprovecha vaʼerã koʼág̃a opa oportunida orekóva opredika hag̃ua”. Hetaiterei persóna oasepta ko invitasión opredika hag̃ua. Diciémbrepe g̃uarã okonsegíma hikuái mas de 50.000 suskripsión ko rrevísta pyahúpe g̃uarã.

Opa potávo áño 1919, Jehová puévlo oĩma organisádo ha imbarete jeýma. Ha oñekumplíma avei heta profesía oñeʼẽva koʼã ára paháre. Por ehémplo Malaquías 3:1-4-pe heʼi ojeprova ha oñerrefinataha Jehová puévlope. Ha upe tiémpope, upéva ja oñekumplipáma. Avei Jehová siervokuéra osẽma Babilonia Guasu poguýgui, ha Jesús ja onombráma pe “esklávo de konfiánsa ha iñarandúva” * (Apoc. 18:2, 4; Mat. 24:45). Upe moméntope umi Estudiánte de la Biblia oĩma preparádo ojapo hag̃ua pe traváho Jehová omeʼẽva chupekuéra.