1. ¿Mbaʼépa Jehová ikatu ojapo okumpli hag̃ua ivolunta?

JEHOVÁGUI ikatu oiko oimeraẽ mbaʼe tekotevẽva oñekumpli hag̃ua ivolunta. Por ehémplo, chugui ikatu oiko peteĩ oporomboʼéva, peteĩ oporokonsoláva, térã peteĩ omeʼẽva notísia porã. Koʼã mbaʼe ohechauka Jehovágui ikatuha oiko hetaiterei mbaʼe oñekumpli hag̃ua ivolunta (Is. 48:17; 2 Cor. 7:6; Gál. 3:8). Upéicharõ jepe, haʼe pyʼỹinte oipuru yvyporakuérape ojapo hag̃ua haʼe oipotáva (Mat. 24:14; 28:19, 20; 2 Cor. 1:3, 4). Jehová ikatu avei oimeraẽvape ñanemoarandu ha ñanemombarete ikatu hag̃uáicha oiko ñandehegui haʼe oipotáva. Entéro koʼã mbaʼe ohechauka porã mbaʼépa heʼise Jehová réra, upéicha avei opensa heta expérto.

2. a) ¿Mbaʼérepa sapyʼánte oĩ odudáva oimépa Ñandejára oipuru chupe? b) ¿Mbaʼépa jahecháta ko artíkulope?

² Enterovetéva ningo ñandedeprovechose Jehovápe, péro ikatu oĩ odudáva oimépa Ñandejára oipuru chupe. ¿Mbaʼérepa? Pórke opensa jepi ndaikatuiha ojapo hetave mbaʼe ndaikatupyrýi haguére, ijedámagui, térã isituasión nopermitíri rupi chupe. Péro oĩ avei opensáva ovalemaha umi mbaʼe ojapóva ha natekotevẽiha oñehaʼã oprogresave hag̃ua. Ko artíkulope jahecháta mbaʼéichapa Jehová ñanembokatupyry okumpli hag̃ua ivolunta. Jahecháta avei heta Ñandejára siérvo yma guare ehémplo, tahaʼe kuimbaʼe térã kuña, ha mbaʼéichapa Jehová omeʼẽ chupekuéra pe deséo ha pe podér ombaʼapove hag̃ua chupe g̃uarã. Ha  jahecháta avei mbaʼépa ikatu jajapo Ñandejára ñandepuru hag̃ua.

3. Heʼiháicha Filipenses 2:13, ¿mbaʼéichapa Jehová ikatu omeʼẽ ñandéve pe deséo jajapo hag̃ua álgo?

³ (Elee Filipenses 2:13). * Jehová ikatu omeʼẽ ñandéve pe deséo jajapo hag̃ua álgo. ¿Mbaʼéichapa ojapo upéva? Por ehémplo ikatu jaikuaa ñane kongregasiónpe tekotevẽha ojejapo peteĩ mbaʼe, térã umi ansiáno olee peteĩ kárta oúva pe sukursálgui oñemombeʼuhápe peteĩ nesesida oĩva ótro lugárpe. Umícha jave ñañeporandu jepi mbaʼépa ñande ikatu jajapo ñaipytyvõ hag̃ua. Térã ikatu oime jarresivi peteĩ asignasión ijetuʼu léntova ha ñañeporandu ikatútapa ñakumpli porã upéva. Ikatu avei jalee rire peteĩ párte la Bíbliagui ñañeporandu mbaʼéichapa ikatu jajapo upe jaleéva ñaipytyvõ hag̃ua ótrope. Jehová nañandeovligái jajapo hag̃ua álgo, péro ohechávo ñande jajepyʼamongetaha koʼã mbaʼére, haʼe ikatu omeʼẽ ñandéve pe deséo jajapo hag̃ua.

4. ¿Mbaʼéichapa Jehová ikatu omeʼẽ ñandéve pe podér jajapo hag̃ua álgo?

⁴ Jehová ikatu avei omeʼẽ ñandéve pe podér jajapo hag̃ua álgo (Is. 40:29). Ijespíritu sánto rupive haʼe ikatu ñanembokatupyry jajapo porãve hag̃ua umi mbaʼe jajapokuaámava voi (Éx. 35:30-35). Avei Jehová ikatu oipuru iñorganisasión ñanemboʼe hag̃ua jajapo hag̃ua peteĩ traváho. Oiméramo ndajaikuaái mbaʼéichapa ñakumplíta ñane asignasión, jajerurékena ajúda. Ani ñanderesarái jajerure hag̃ua ñande Ru yvagapeguápe “pe podér umi ótra hénte ndorekóiva” (2 Cor. 4:7; Luc. 11:13). La Bíbliape oĩ heta ehémplo ohechaukáva mbaʼéichapa Jehová ombokatupyry isiervokuérape, tahaʼe kuimbaʼe térã kuña, omeʼẽvo chupekuéra pe deséo ha pe podér ojapo hag̃ua álgo. Jahechávo koʼã ehémplo, epensamína mbaʼéichapa Jehová ikatu ndepuru avei ndéve.

5. ¿Mbaʼépa ñaaprende Jehová oipuru lájagui Moiséspe omosãso hag̃ua ipuévlope?

⁵ Jehová ombokatupyry Moiséspe oiko hag̃ua chugui peteĩ livertadór, ha péicha Israel osẽ Egíptogui. ¿Péro arakaʼépa Jehová oipuru chupe? Moisés ningo opensa kuri oĩmaha preparádo, pórke chupe “oñemeʼẽ vaʼekue pe edukasión iporãvéva oĩva Egíptope” (Hech. 7:22-25). ¿Oipurúpa Jehová upérõ Moiséspe? Nahániri. Ñandejára oipuru Moiséspe omoldea rire chupe, oipytyvõ rire chupe iñumílde ha imánso hag̃ua (Hech. 7:30, 34-36). Jehová ombopyʼaguasu Moiséspe oñeʼẽ hag̃ua pe governánte ipoderosoitéva oĩvandi Egíptope (Éx. 9:13-19). Jahechaháicha Jehová oikuaa kuri mbaʼe moméntope ha mbaʼéichapa oipurúta kuri Moiséspe, ¿mbaʼépa ñaaprende upévagui? Jehová oipuru umi oñehaʼãvape okopia umi kualida haʼe orekóva ha umi ojeroviávape hese (Filip. 4:13).

6. ¿Mbaʼépa ñaaprende Jehová oipuru lájagui Barziláipe oipytyvõ hag̃ua rréi Davídpe?

⁶ Heta tiémpo rire, Jehová oipuru Barziláipe oipytyvõ hag̃ua rréi Davídpe. David ha iñirũnguéra okañy David raʼy Absalóngui, ha upévare “iñembyahýi, ijuhéi ha ikaneʼõ” hikuái. Barzilái upérõ ijedáma, upéicharõ jepe haʼe ha umi oĩva hendive oapeligra hekove oipytyvõ hag̃ua David ha iñirũnguérape. Barzilái nopensái ijedáma haguére ndaideprovechoveimaha Jehovápe. Upéva rangue haʼe ipojera ha oipuru umi mbaʼe orekóva oipytyvõ hag̃ua Ñandejára siérvo oikotevẽvape (2 Sam. 17:27-29). ¿Mbaʼépa ñaaprende ko ehémplogui? Oiméramo ñanemitã térã ñandeeda, Jehová ikatu ojevale ñanderehe ñameʼẽ hag̃ua  ñane ermanokuérape umi mbaʼe oikotevẽva, tahaʼe ñande jaikohárupi térã ótro paíspe (Prov. 3:27, 28; 19:17). Ha oiméramo jepe ndaikatúi ñandete ñaipytyvõ chupekuéra, ikatu ñameʼẽ ñane kontrivusión pe óvra mundiálpe ikatu hag̃uáicha oñepytyvõ umi ermánope, por ehémplo peteĩ desástre naturál rire (2 Cor. 8:14, 15; 9:11).

7. ¿Mbaʼéichapa Jehová oipuru vaʼekue Simeónpe, ha mbaʼéichapa upéva ñanemokyreʼỹ?

⁷ Jehová opromete vaʼekue isiérvo Simeónpe nomanomoʼãiha ohecha mboyve pe Mesíaspe. Simeón ningo oiko vaʼekue Jerusalénpe, haʼe ijedáma ha iñeʼẽrendu Ñandejárape. Oime vaʼerã upe promésa omokyreʼỹete raʼe chupe, pórke heta áñorema ohaʼarõ og̃uahẽ pe Mesías. Jehová ovendesi Simeónpe ojerovia ha oaguanta haguére. Peteĩ vuéltape, “pe espíritu sánto ogia Simeónpe oho hag̃ua pe témplo ryepýpe”, upépe ohecha pe mitãraʼy Jesúspe. Jehová oipuru Simeónpe heʼi hag̃ua peteĩ profesía ohechaukáva upe mitãgui oikotaha pe Cristo (Luc. 2:25-35). Posívlemente Simeón omano Jesús oñepyrũ mboyve hembiapo, upéicharõ jepe oagradese pe priviléhio Jehová omeʼẽ vaʼekue chupe. Ha iporãveha, ko kuimbaʼe ifiélva ohecháta hína mbaʼéichapa Jesús goviérno ovendesíta entéro família oikóvape ko yvy ape ári (Gén. 22:18). Ñande avei jaagradese vaʼerã oimeraẽ priviléhio Jehová omeʼẽvare ñandéve.

8. ¿Mbaʼéichapa Jehová ikatu ojevale ñanderehe ojevale haguéicha Bernabé rehe?

⁸ Síglo primérope, peteĩ kuimbaʼe ipojeráva hérava José oheja vaʼekue Jehová oipuru chupe. Umi apóstol ohenói chupe Bernabé, heʼiséva “konsuélo raʼy” pórke amalisia oporokonsolakuaa vaʼekue (Hech. 4:36, 37, nóta). Por ehémplo, Sáulogui oiko rire kristiáno heta ermáno okyhyje oñemoag̃ui hag̃ua hese pórke haʼe opersegi vaʼekue umi ojeroviávape Jesús rehe. Péro Bernabé okonsola ha oipytyvõ Sáulope, ha oime vaʼerã oagradese raʼe haʼe ipyʼaporã haguére hendive (Hech. 9:21, 26-28). Upe rire, umi ansiáno oĩva Jerusalénpe ohechakuaa tekotevẽ hague oñemokyreʼỹ umi ermáno oikóvape mombyry, Antioquía de Síriape. ¿Mávapepa omondo hikuái? Bernabépe. Ha oiporavo porã hikuái pórke la Biblia heʼi Bernabé ‘omokyreʼỹ hague enterovépe siémpre iñeʼẽrendu hag̃ua ñande Ruvichápe ipyʼaite guive’ (Hech. 11:22-24). Koʼág̃a avei Jehová ikatu ñanepytyvõ ñakonsola hag̃ua umi ermánope. Por ehémplo, ikatu ojevale ñanderehe ñakonsola hag̃ua umi ihénte manóvape. Ikatu avei ñanemomýi jaha hag̃ua javisita térã ñahenói peteĩ ermáno hasykatúva térã oñedeprimívape ñamokyreʼỹ hag̃ua chupe. ¿Rehejátapa Jehová ojevale nderehe ojevale haguéicha Bernabé rehe? (1 Tes. 5:14).

9. ¿Mbaʼépa ñaaprende Jehová oipytyvõ lájagui Vasílype oiko hag̃ua chugui peteĩ ansiáno ipyʼaporãva?

⁹ Jehová oipytyvõ vaʼekue peteĩ ermáno héravape Vasily oiko hag̃ua chugui peteĩ ansiáno ipyʼaporãva. Vasily oñenombrárõ guare ansiáno oreko vaʼekue 26 áño, péro haʼe opensa noĩriha preparádo oipytyvõ hag̃ua umi ermánope, koʼýte umi ohasávape peteĩ situasión ijetuʼúva. Péro pe Eskuéla del Ministério del Rréino ha umi ansiáno iñexperiénsiava tuicha ombokatupyry ko ermánope. Vasily oñehaʼãmbaite omehora hag̃ua. Por ehémplo haʼe ojapo peteĩ lísta ha oanota umi mbaʼe ikatúva ojapo. Ojapóvo ohóvo umi mbaʼe, Vasily ndokyhyjevéima. Haʼe heʼi: “Umi mbaʼe yma chemondýi vaʼekue, koʼág̃a chembovyʼa. Añeñandu porãiterei Jehová chepytyvõ jave aikuaa hag̃ua mbaʼe téxtopa ikatu alee amokyreʼỹ hag̃ua peteĩ ermáno térã ermánape”. Ermanokuéra, peẽ pesegíramo Vasily ehémplo ha peheja Jehová ojevale penderehe, haʼe ikatu penembokatupyry pereko hag̃ua hetave rresponsavilida kongregasiónpe.

10. ¿Mbaʼépa ojapo Abigaíl, ha mbaʼépa ikatu ñaaprende iñehémplogui?

¹⁰ David ha iñirũnguéra odipara aja oikóvo rréi Saúlgui, haʼekuéra oikotevẽ ajúda. Peteĩ vuéltape, David irũnguéra ojerure peteĩ kuimbaʼe israelita ipláta hetávape omeʼẽ hag̃ua chupekuéra hembiʼurã, oimeraẽ mbaʼe hembýva chupe. Ko kuimbaʼe héra Nabal, ha David irũnguéra oñanima ojerure chupe tembiʼu pórke oñangareko kuri oikóvo hikuái ijovechakuérare pe desiértope. Péro Nabal ijorgullóso ha nomeʼẽi chupekuéra mbaʼevete. Upémarõ David ipochyeterei ha ojukase Nabálpe ha entéro isiervokuérape (1 Sam. 25:3-13, 22). Péro Nabal rembireko hérava Abigaíl, imbaʼerechakuaa vaʼekue. Ko kuñakarai iporãitéva pyʼaguasúpe oñesũ David renondépe ha ojerure chupe ani hag̃ua oñevenga ha ojuka Nabal ha isiervokuérape. Haʼe iñarandu ha oakonseha Davídpe oheja hag̃ua Jehová pópe upe asúnto. Abigaíl heʼíva ha ojapóva opokoiterei David rehe, ha ohechakuaa Jehová voi omondo hague hendápe ko kuñakaraípe (1 Sam. 25:23-28, 32-34). Abigaíl ningo oñehaʼã vaʼekue oreko umi kualida oipytyvõtava chupe ideprovécho hag̃ua Jehovápe. Koʼág̃a avei umi ermána oñehaʼãva iñarandu ha imbaʼerechakuaa ideprovécho Jehovápe. Haʼe ikatu oipuru koʼã ermánape omombarete hag̃ua hogayguápe ha kongregasiónpe (Prov. 24:3; Tito 2:3-5).

11. ¿Mbaʼépa ojapo Salum rajykuéra, ha mávapa osegi iñehémplo koʼág̃arupi?

¹¹ Heta tiémpo upe rire, Salum rajykuéra oĩ vaʼekue umi Jehová oipurúva apytépe oñemyatyrõ hag̃ua Jerusalén murálla (Neh. 2:20; 3:12). Itúa ningo peteĩ prínsipe vaʼekue, péro haʼekuéra oĩ dispuésta ojapóvo umi traváho ipeligróso ha ijetuʼúva (Neh. 4:15-18). Salum rajykuéra idiferénte vaʼekue umi kuimbaʼe omanda guasúvagui oĩva umi tecoíta apytépe. Haʼekuéra ningo “noñemoĩri umi omoakãva poguýpe ombaʼapo hag̃ua” (Neh. 3:5). Pe murálla oñemyatyrõmba 52 díapente, epensamíntena mbaʼeichaitépa oiméne ovyʼa raʼe upérõ Salum rajykuéra (Neh. 6:15). Koʼág̃a avei oĩ ermána vyʼápe ojeofreséva omopuʼã ha omantene hag̃ua umi lugár ojepurúva ojeadora hag̃ua Jehovápe, ha koʼã traváho sagrádo hína. Koʼã ermána ikatupyry, ikyreʼỹ ha ifiél, ha añetehápe ñaikotevẽ hesekuéra osẽ porã hag̃ua koʼãichagua traváho.

12. ¿Mbaʼéichapa Jehová ikatu ojevale ñanderehe ojevale haguéicha Tabita rehe?

¹² Jehová omomýi vaʼekue Tabítape ‘ojapo hag̃ua heta mbaʼe porã ha omeʼẽ hag̃ua heta rregálo umi imboriahúvape’, koʼýte umi viúdape (Hech. 9:36). Tabita ipojera ha ivuenaiterei, upévare umi ermáno ombyasyeterei haʼe omanórõ guare. Péro apóstol Pedro omoingove jeýrõ guare chupe, umi ermáno ovyʼaiterei jey (Hech. 9:39-41). ¿Mbaʼépa ñaaprende Tabítagui? Oiméramo ñande kuña térã kuimbaʼe, ñanemitã térã ñandeeda, enterovete ikatu jajapo heta mbaʼe ñaipytyvõ hag̃ua ñane ermanokuérape (Heb. 13:16).

13. ¿Mbaʼéichapa Jehová ojevale peteĩ ermána hiʼotĩvare, ha mbaʼépa haʼe heʼi?

¹³ Peteĩ ermána hiʼotĩetereíva hérava Ruth oservise vaʼekue de misionéra. Imitãrõ guare haʼe apúrope orreparti umi tratádo ogahárupi. Haʼe heʼi: “Chegustaiterei vaʼekue pe predikasión”. Upéicharõ jepe, ijetuʼu vaʼekue chupe oñeʼẽ hag̃ua umi héntendi Ñandejára Rréinore. Haʼe orekórõ guare 18 áño, oñepyrũ iprekursorádo rregulár, ha áño 1946-pe oho Eskuéla Bíblica de Galaádpe. Upéi oñemondo chupe oservi hag̃ua Hawáipe ha avei Japónpe. Jehová oipuru chupe ogueraha hag̃ua pe mensáhe hetaiterei persónape  umi lugár rupi. Opredika rire haimete 80 áño, Ruth heʼi: “Jehová ningo siémpre chemombarete. Haʼe chepytyvõ ani hag̃ua cheotĩ. Aikuaa porãiterei haʼe ikatuha ojevale oimeraẽ ojeroviávare hese”.

14. Heʼiháicha Colosenses 1:29, ¿mbaʼépa tekotevẽ jajapo Jehová ojevale hag̃ua ñanderehe?

¹⁴ Ymaiterei guivéma Jehová ojevale isiervokuérare heta hendáicha. ¿Mbaʼéichapa haʼe ojevaléta nderehe? Upéva odepende avei nderehe, ¿mbaʼépa reĩ dispuésto rejapóvo Jehovápe g̃uarã? (Elee Colosenses 1:29). Rehejáramo haʼe ojevale nderehe, haʼe ikatu ndepuru repredika kyreʼỹ hag̃ua, reporomboʼe porã hag̃ua ha rekonsola hag̃ua ótrope. Haʼe ikatu avei nembokatupyry oiko hag̃ua ndehegui peteĩ travahadór ivaléva, peteĩ amígo ontendéva hapichápe térã oimeraẽ mbaʼe tekotevẽva okumpli hag̃ua ivolunta.

15. Heʼiháicha 1 Timoteo 4:12, 15, ¿mbaʼépa umi mitãrusu ojerure vaʼerã Jehovápe?

¹⁵ Oiméramo nde peteĩ mitãrusu, ¿mbaʼépa ikatu rejapove Jehová servísiope? Oñekotevẽ ningo umi ermáno imbaretévare ikatúva orresivi rresponsavilida oservi hag̃ua de siérvo ministeriál. Kongregasiónpe oĩ jepi heta ansiáno ha saʼi siérvo ministeriál. ¿Ikatúpa peẽ mitãrusu peñehaʼãmbaite pereko hag̃ua pe deséo pejapove hag̃ua kongregasiónpe? Sapyʼánte oĩ ermáno heʼíva: “Che ningo puvlikadór, ha avyʼáma péicha”. Oiméramo nde repensa upéicha, ejerurékena Jehovápe tanepytyvõ ereko hag̃ua pe deséo reprogresa hag̃ua ha oiko ndehegui peteĩ siérvo ministeriál, ha ejerure avei chupe tomeʼẽ ndéve pe podér ikatu hag̃uáicha rejapo opa mbaʼe ikatúva iservísiope (Ecl. 12:1). Pe kongregasión oikotevẽterei nderehe (elee 1 Timoteo 4:12, 15).

16. ¿Mbaʼépa jajerure vaʼerã Jehovápe, ha mbaʼérepa?

¹⁶ Jehová ikatu ojapo ndehegui oimeraẽ mbaʼe tekotevẽva okumpli hag̃ua ivolunta. Upévare, ejerurékena chupe tomeʼẽ ndéve pe deséo rejapo hag̃ua ivolunta, ha pe podér reikotevẽva. Oiméramo nemitã térã ndeeda, eipurúkena ne tiémpo, ne mbaretekue ha entéro mbaʼe rerekóva remombaʼeguasu hag̃ua Jehovápe koʼág̃a (Ecl. 9:10). Sapyʼánte ikatu rekyhyje térã repensa nandekatupyryiha rejapo hag̃ua álgo, péro aníkena upévare ndereaprovechái umi oportunida rerekóva rejapove hag̃ua Jehová servísiope. Enterovete ningo ikatu ñaipytyvõ oñemombaʼeguasu hag̃ua Jehová réra umi mbaʼe jajapóva rupive. ¡Ajépa tuichaite pe priviléhio jarekóva!