1. ¿Mbaʼépa osegi vaʼerã ojapo peteĩ kristiáno ojevautisámava?

¿NDÉPA rejevautisáma? Oiméramo upéicha, rejevautisárõ guare nde rehechauka opavave renondépe rejeroviaha Jehováre, ha reserviseha chupe iñorganisasión ndive. * Jaikuaa ningo ñande jerovia Jehováre osegi vaʼerãha imbareteve. Ha avei tekotevẽ amás día ñakonfiave Jehová oipuruha hína iñorganisasión koʼág̃arupi.

2, 3. ¿Mbaʼe kualida Jehová orekóvapa ojekuaa odirihi lájare iñorganisasión?

² Koʼág̃arupi Jehová odirihi hína iñorganisasión ha pe odirihi lája ohechauka mbaʼeichagua persónapa haʼe, mbaʼépa ojapose ha mbaʼépa ohaʼarõ ñandehegui. Jahechamína mbohapy kualida Jehová ohechaukáva iñorganisasión rupive.

³ Primero, ‘Ñandejára otrata enterovépe peteĩchante’ (Hech. 10:34). Jehová oporohayhu rupi omeʼẽ vaʼekue Itaʼýra “orreskata hag̃ua enterovépe” (1 Tim. 2:6; Juan 3:16). Jehová oipuru ipuévlope opredika hag̃ua umi notísia porã enterove ohendusévape, péicha haʼe oipytyvõ enterove ikatúvape oñevenefisia hag̃ua pe rreskátegui ha ojesalva. Segundo, Ñandejára Jehová ‘omoĩ pyʼaguapy ha ndojapói mbaʼevete sarambikuépe’ (1 Cor. 14:33, 40). Upévare ikatu ñahaʼarõ isiervokuéra oadorataha chupe pyʼaguapýpe ha ndojapomoʼãiha upéva sarambikuépe. Tercero, Jehová haʼe hína pe “Mboʼehára Ijojahaʼỹva” (Is. 30:20, 21). Upévare iñorganisasión ombaʼapo jejopy omboʼe hag̃ua ótrope Ñandejára Ñeʼẽ heʼíva, tahaʼe kongregasiónpe térã predikasiónpe. ¿Mbaʼéichapa pe kongregasión kristiána ypykue ohechauka vaʼekue koʼã mbohapy kualida Jehová orekóva? ¿Mbaʼéichapa Jehová puévlo ohechauka avei koʼã kualida ñane tiémpope? ¿Ha mbaʼéichapa pe espíritu sánto ñanepytyvõ jaservívo Jehová organisasión ndive ko tiémpope?

4. a) Heʼiháicha Hechos 1:8, ¿mbaʼépa Jesús omanda vaʼekue isegidorkuérape ojapo hag̃ua? b) ¿Mbaʼe ajúdapa oñemeʼẽ chupekuéra?

⁴ Umi kristiáno ypykue tiémpope. Pe notísia Jesús opredika vaʼekue omeʼẽ esperánsa enterove persónape (Luc. 4:43). Haʼe omanda vaʼekue isegidorkuérape ojapo hag̃ua pe traváho haʼe omoñepyrũ vaʼekue: Opredika hag̃ua “umi lugár mombyryvehápe jepe ko yvy ape ári” (elee Hechos 1:8). Péro haʼekuéra ndaikatumoʼãi kuri ojapo upéva ijehegui reínte, oikotevẽta kuri pe espíritu sánto, haʼéva “pe ajudánte” Jesús opromete vaʼekue (Juan 14:26; Zac. 4:6).

5, 6. ¿Mbaʼe mbaʼépa ikatu vaʼekue ojapo Jesús disipulokuéra oipytyvõ rupi chupekuéra pe espíritu sánto?

⁵ Jesús segidorkuérape oñemeʼẽ vaʼekue pe espíritu sánto Pentekostés áño 33-pe. Ha pe espíritu sánto oipytyvõgui chupekuéra, ensegidaiténtema voi oñepyrũ opredika, ha sapyʼaitérõ g̃uarã hetaiterei persónama oguerovia umi notísia porã (Hech. 2:41; 4:4). Ha oĩrõ guare opersegíva chupekuéra, umi disípulo ndahaʼéi ku okyhyjéva ha ndopredikavéimava, síno ojerure Ñandejárape oipytyvõ hag̃ua chupekuéra. Haʼekuéra oñemboʼévo heʼi: “Eipytyvõmína nde esklavokuérape osegi hag̃ua omombeʼu ne ñeʼẽ pyʼaguasúpe”. Upéi henyhẽ hikuái espíritu sántogui ha osegi “opredika pyʼaguasúpe Ñandejára ñeʼẽ” (Hech. 4:18-20, 29, 31).

⁶ Jesús disipulokuéra ombohovái vaʼekue avei hetave mbaʼe ijetuʼúva. Por ehémplo, upérõ ndojeguerekói vaʼekue heta kópia ojejapóva Ñandejára Ñeʼẽgui. Haʼekuéra ndorekói vaʼekue umi puvlikasión omyesakãva la Biblia heʼíva, ñande jarekoháicha koʼág̃arupi. Avei opredika vaʼerã hikuái umi hénte oñeʼẽvape diferénte idióma. Upéicharõ jepe, koʼã disípulo ikyreʼỹetéva ojapo peteĩ mbaʼe avave noimoʼãiva ikatutaha ojejapo: Amo 30 áño haguépente opredikáma hikuái umi notísia porã “ko múndo tuichakuére” (Col. 1:6, 23).

7. ¿Mbaʼéichapa Jehová siervokuéra oikuaa vaʼekue mbaʼépa haʼe ohaʼarõ chuguikuéra ojapóma mas de 100 áño, ha mbaʼépa ojapo hikuái?

⁷ Ñane tiémpope. Jehová osegi odirihi ha omombarete ipuévlope ojapo hag̃ua ivolunta. Haʼe prinsipálmente ojevale la Bíbliare ogia hag̃ua ipuévlope, upéva haʼe oskrivika vaʼekue ijespíritu rupive. Upépe ñande ikatu jalee Jesús rembiasakue predikasiónpe, ha haʼe omanda hague isegidorkuérape osegi hag̃ua ojapo pe traváho haʼe voi omoñepyrũ vaʼekue (Mat. 28:19, 20). Yma julio de 1881-pe, ko rrevísta heʼi vaʼekue: “Jehová nañandeporavói umi yvypóra ñanemombaʼeguasu hag̃ua térã ñandepláta heta hag̃ua, síno jaipuru hag̃ua entéro mbaʼe jarekóva japredika hag̃ua umi notísia porã”. Áño 1919-pe osẽ vaʼekue ingléspe pe folléto ¿Mávapepa oñemeʼẽ ko tembiapo?, upépe heʼi vaʼekue: “Hetaiterei traváho oĩ jajapo vaʼerã, péro kóva hína ñande Ruvicha traváho, ha haʼe ñanemombaretéta jajapo hag̃ua”. Umi kristiáno ypykuéicha koʼã ermáno ipyʼaguasu ha ombaʼapo jejopy vaʼekue, ojeroviágui pe espíritu sánto oipytyvõtaha chupekuéra opredika hag̃ua opaichagua héntepe. Ñande avei jajerovia pe espíritu sánto ñanepytyvõtaha ko tiémpope.

8, 9. ¿Mbaʼépa ojapo Jehová organisasión omog̃uahẽ hag̃ua hetavépe umi notísia porã?

⁸ Jehová organisasión oipurúma oikóvo umi erramiénta iporãvéva oikuaauka hag̃ua umi notísia porã opárupi. Umíva apytépe oĩ umi puvlikasión oñeimprimíva, pe “Foto-Drama de la Creación”, gramófono térã vitróla, áuto iparlánteva, prográma de rrádio, ha ramoite guive umi komputadóra ha Internet. Ñandejára organisasión otradusi avei puvlikasión hetaiterei idiómape ha peichaite peve ndojejapóiva gueteri koʼág̃a peve. ¿Mbaʼérepa ojejapo upéicha? Opaichagua hénte ohendu hag̃ua umi notísia porã iñidiomaitépe. Jehová ningo otrata  enterovépe peteĩchante, ha haʼe heʼi vaʼekue umi notísia porã oñemombeʼutaha “entéro tetã, trívu, puévlo ha umi oñeʼẽvape diferénte idióma” (Apoc. 14:6, 7). Haʼe oipota voi enterove ohendu umi notísia porã oñeʼẽva pe Rréinore.

⁹ ¿Ha mbaʼépa ikatu jaʼe umi hénte ndaikatúivare japredika, por ehémplo oikógui umi departaménto ndaikatuihápe jaike pórke oreko guárdia, térã oñemboty rupi pe entráda? Ojepredika hag̃ua koʼã héntepe, Jehová oipytyvõ iñorganisasiónpe oñepyrũ hag̃ua ojapo pe predikasión púvlika heta hendáicha. Por ehémplo, áño 2001-pe pe Kuérpo Governánte omeʼẽ permíso ñane ermanokuéra Franciapeguápe oipuru hag̃ua karríto ha exividór ohechauka hag̃ua ñane puvlikasionkuéra. Upéi umi ermáno oĩva ótro lugárpe oñepyrũ avei opredika péicha. Ha iporãiterei la rresultádo. Áño 2011-pe, oñeñepyrũ peteĩ prográma pyahu Estados Unídospe, peteĩva umi lugár hetavehápe hénte pe siuda de Nueva Yórkpe. Pe primer áñope oñentrega 102.129 lívro ha 68.911 rrevísta. Avei 4.701 persóna ojerure estúdio bíblico. ¡Ojekuaa porãiterei Jehová oipuru hague ijespíritu sánto oapoja hag̃ua ko traváho! Upévare pe Kuérpo Governánte omeʼẽ permíso enterove ermáno oĩvape ko múndo tuichakuére oipuru hag̃ua avei umi karríto ha exividór.

10. ¿Mbaʼépa ikatu jajapo japredika ha ñaporomboʼe porãve hag̃ua?

¹⁰ ¿Mbaʼépa ikatu jajapo? Umi rreunión rupive Jehová ñanemboʼe japredika hag̃ua. Jaipurúkena umi mbaʼe ñaaprende vaʼekue upépe. Kontinuadoitékena japredika ñande grúpo de predikasión ndive. Umi ermáno ha ermána ñande grupopegua ikatu ñanepytyvõ japredika ha ñaporomboʼe porãve hag̃ua. Avei ñanemokyreʼỹta hikuái iñehémplo porã rupive. Jasegíkena japredika ñambohováiramo jepe heta mbaʼe ijetuʼúva. Heʼiháicha pe téxto omopyendáva ko artíkulo, ñande ikatu jajapo Ñandejára volunta ndahaʼéi ñanembarete rupi, síno pe espíritu sánto rupive añoite (Zac. 4:6). Amo ipahápe, jajapo hína pe traváho Ñandejára omeʼẽ vaʼekue ñandéve.

11. ¿Mbaʼéichapa pe Kuérpo Governánte ombaʼapo vaʼekue oñondive oĩ hag̃ua pyʼaguapy ha unida umi kristiáno ypykue tiémpope?

¹¹ Umi kristiáno ypykue tiémpope. Pe Kuérpo Governánte oĩva Jerusalénpe ombaʼapo vaʼekue  en unida omoĩ hag̃ua pyʼaguapy, ha ani hag̃ua mbaʼeve ojejapo sarambikuépe Ñandejára puévlope (Hech. 2:42). Por ehémplo, áño 49 rupi oĩrõ guare pe provléma sirkunsisión rehegua, pe Kuérpo Governánte osegi pe gía omeʼẽva pe espíritu sánto oñeʼẽ hag̃ua ko témare. Noñesolusionáirire ko provléma, pe kongregasiónpe ndaiporimoʼãi unida ha ndaikatumoʼãi opredika porã hikuái. Umi apóstol ha ansianokuéra haʼéramo jepe judío, ndojesegíri vaʼekue hikuái umi kostúmbre judíare ni umi omboʼévare koʼã mbaʼe. Upéva rangue, ohecha hikuái mbaʼépa heʼi Ñandejára Ñeʼẽ ha ojerure espíritu sánto oipytyvõ hag̃ua chupekuéra odesidi porã hag̃ua (Hech. 15:1, 2, 5-20, 28). ¿Ha mbaʼépa oiko raʼe? Jehová ovendesi upe odesidi vaʼekue hikuái, pe kongregasiónpe osegi oĩ pyʼaguapy ha unida, ha ojesegi ojepredika umi notísia porã (Hech. 15:30, 31; 16:4, 5).

12. ¿Mbaʼéichapa koʼág̃arupi ojekuaa Jehová organisasión orekoha pyʼaguapy ha ndojapoiha mbaʼeve sarambikuépe?

¹² Ñane tiémpope. Jehová organisasión ñanepytyvõ jareko hag̃ua pyʼaguapy ha ani hag̃ua mbaʼeve ojejapo sarambikuépe Ñandejára puévlope. Áño 1895-pema voi, pe 15 de noviembre, ko rrevístape osẽ pe artíkulo: “Entéro mbaʼe ojejapo porã vaʼerã ha ani sarambikuépe”, oñemopyendáva 1 Corintios 14:40-pe. Upépe heʼi vaʼekue: “Umi apóstol oskrivi vaʼekue heta mbaʼe pe kongregasión ypykuépe ani hag̃ua mbaʼeve ojejapo sarambikuépe [...]. Iñimportanteterei jasegi ñaneñeʼẽrendu umi ‘mbaʼe ojeskrivi vaʼekuépe yma Ñandejára Ñeʼẽme ñanerekomboʼe hag̃ua’” (Rom. 15:4). Koʼág̃arupi Jehová organisasión ombaʼapo jejopy avei pe kongregasión oreko hag̃ua pyʼaguapy ha ani hag̃ua mbaʼeve ojejapo sarambikuépe, yma umi kristiáno ypykue tiémpope guaréicha. Por ehémplo, jaháramo rreunionhápe ótro kongregasiónpe térã ótro paíspe, jaikuaátama mbaʼéichapa ojejapo pe Ñemañaha Ñehesaʼỹijo ha mbaʼe artíkulopa ojestudia hína. ¡Ensegída voi ñañeñandútama ñanderogapeguáicha! Ñandejára espíritu rupive añoite ikatu jareko peichagua unida iporãitéva (Sof. 3:9).

13. ¿Mbaʼépa iporãta ñañeporandu, jarekóvo enkuénta Santiago 3:17 heʼíva?

¹³ ¿Mbaʼépa ikatu jajapo? Jehová oipota ñañehaʼãmbaite ‘ñaime hag̃ua siémpre peteĩ ñeʼẽme, upéva ningo jahupyty pe espíritu sánto rupive’ (Efes. 4:1-3). Upévare iporã ñañeporandu:  “¿Añehaʼãpa hína oĩ hag̃ua pyʼaguapy ha unida kongregasiónpe? ¿Cheñeʼẽrendúpa umi ogiávape pe kongregasión? ¿Ikatúpa umi ermáno okonfia cherehe, koʼýte oiméramo areko hína rresponsavilida kongregasiónpe? ¿Chépa chepuntuál ha chekyreʼỹ aipytyvõ hag̃ua ótrope?” (elee Santiago 3:17). Jahechakuaáramo ikatuha ñamehora, ñañemboʼe vaʼerã Jehovápe ha jajerure chupe tomeʼẽ ñandéve espíritu sánto. Jahejáramo pe espíritu sánto ñanekambia ha ogia umi mbaʼe jajapóva, koʼytevéntema umi ermáno ñanderayhu ha ñandevaloravéta.

14. Heʼiháicha Colosenses 1:9, 10, ¿mbaʼépa oikotevẽ vaʼekue umi kristiáno ypykue, ha mbaʼéichapa Jehová omeʼẽ chupekuéra upéva?

¹⁴ Umi kristiáno ypykue tiémpope. Jehová ningo ovyʼaiterei voi omboʼévo ipuévlope (Sal. 32:8). Jehová oipota jaikuaa chupe, jahayhu chupe ha jaikove pára siémpre. Entéro koʼã mbaʼe ndajahupytymoʼãi kuri haʼe nañanemboʼéirire (Juan 17:3). Jehová ojevale vaʼekue pe kongregasión kristiána ypykuére omboʼe hag̃ua ipuévlope (elee Colosenses 1:9, 10). Pe espíritu sánto, haʼéva “pe ajudánte” Jesús opromete vaʼekue tuichaiterei oipytyvõ umi disípulope (Juan 14:16). Pe espíritu sánto rupive umi disípulo ontende Ñandejára Ñeʼẽ ha imanduʼa entéro mbaʼe Jesús heʼi ha ojapo vaʼekuére, heta koʼã mbaʼe upe rire ojeskrivi vaʼekue umi lívro de Mateo, Marcos, Lucas ha Juánpe. Koʼã mbaʼe oikuaáva omombarete umi kristiáno ypykue jerovia ha oipytyvõ chupekuéra ohayhuve hag̃ua Ñandejárape, Itaʼýrape ha ojoayhuve hag̃ua hikuái.

15. ¿Mbaʼéichapa nde rehecha oñekumpliha Jehová oprofetisa vaʼekue Isaías 2:2, 3-pe?

¹⁵ Ñane tiémpope. Jehová oprofetisa vaʼekue “umi ára pahápe” umi hénte opa tetãygua ohotaha imontáñape haʼe oikuaauka hag̃ua chupekuéra hape (elee Isaías 2:2, 3). Ñande jahecha hína mbaʼéichapa oñekumpli upe profesía. Pe adorasión oñemeʼẽva Jehovápe iporãiteve opaichagua adorasión fálsa ikyʼávagui. Ha Jehová omeʼẽ hína ñandéve hetaiterei informasión  oñeʼẽva la Bíbliare (Is. 25:6). Haʼe ojevale “pe esklávo de konfiánsa ha iñarandúva” rehe omeʼẽ hag̃ua ñandéve entéro koʼã informasión og̃uahẽva heta hendáicha. Por ehémplo ikatu jalee umi artíkulo, ñahendu umi diskúrso ha jahecha umi vidéo, ha divúho animádo (Mat. 24:45). Elihú haʼéva Job amígo, heʼi vaʼekue Ñandejárare: “Ndaiporichéne ótro mboʼehára ivalevéva chugui” (Job 36:22). Ha ñande ñañeñandu haʼeichaite avei.

16. ¿Mbaʼépa ikatu jajapo ideprovécho hag̃ua ñandéve umi mbaʼe Jehová omboʼéva?

¹⁶ ¿Mbaʼépa ikatu jajapo? Ñandejára espíritu sánto ñanepytyvõta jajapo hag̃ua umi mbaʼe jalee ha jastudiáva Ñandejára Ñeʼẽme. Pe salmístaicha avei ikatu ñañemboʼe ha jajerure: “Jehová, chemboʼemína aguata hag̃ua nde rapére ha che asegíta pe añetegua rapére. Ñandejára, chepytyvõna ani hag̃ua chepyʼamokõi, ikatu hag̃uáicha arrespeta nde réra” (Sal. 86:11). Upévare jasegíkena jalee ha jastudia la Biblia ha umi puvlikasión omeʼẽva Jehová organisasión. Ñande ningo ndajajapói upéva jaikuaaséguinte heta mbaʼe. Upéva rangue jaipota pe añetegua og̃uahẽ ñane korasõme ha ñamoĩ en práktika umi mbaʼe ñaaprendéva. Ha Jehová espíritu ikatu ñanepytyvõ upearã. Ñande ningo ñamokyreʼỹse avei ñane ermáno ha ermanakuérape (Heb. 10:24, 25). ¿Mbaʼérepa jajapose upéva? Pórke haʼekuéra hína ñane família. Upévare, ñañemboʼe vaʼerã Ñandejárape, ha jajerure chupe espíritu sánto ñakomenta hag̃ua ñande pyʼaite guive umi rreunionhápe, ha jajapo porã hag̃ua umi párte jarekóva jepi. Péicha jahechaukáta Jehová ha Jesúspe ñande jahayhuha ‘ijovechakuéra mimíme’ (Juan 21:15-17).

17. ¿Mbaʼéichapa ikatu jahechauka jaapojaha fiélmente Jehová organisasión?

¹⁷ Koʼẽrõite, pe organisasión Jehová ogiáva ijespíritu rupive añoiténtema opytáta ko yvy ape ári. Upévare ñambaʼapo kyreʼỹkena Jehová organisasión ndive. Jehová ojapoháicha, jahechaukákena japorohayhuha ha jatrataha enterovépe peteĩcha japredikávo opaichagua persóna jatopávape. Jasegi Jehová ehémplo ha ñaipytyvõ oĩ hag̃ua pyʼaguapy ha unida kongregasiónpe, ha ani hag̃ua mbaʼeve ojejapo sarambikuépe. Ha ñahendu pe Mboʼehára Ijojahaʼỹvape jaaprovechávo entéro umi informasión haʼe omeʼẽva. Péicha ág̃a oñehundi vove Satanás múndo, ñande ndajakyhyjemoʼãi. Upéva rangue ñandepyʼaguasúta ha ñaiméta umi oservívandi Jehovápe fiélmente iñorganisasión ndive.