1. Heʼiháicha 2 Corintios 3:1-3, ¿mbaʼéichapa ñañeñandu oĩ jave peteĩ ojevautisáva? (Ehecha pe taʼanga oĩva ko rrevísta apére).

¿MBAʼÉICHAPA eñeñandu rehecha jave peteĩ estudiánte ne kongregasionpegua ojevautisaha? ¡Katuete ningo revyʼaiterei! (Mat. 28:19). Ha oiméramo nde voi rembostudia raʼe chupe, koʼytevéntema revyʼáta rehechávo chupe ojevautisaha (1 Tes. 2:19, 20). Pe disípulo ojevautisa ramóva haʼe hína peteĩ “kárta” oñeʼẽ porãva pe ombostudia vaʼekuére chupe la Biblia, ha avei pe kongregasión kompletoitére (elee 2 Corintios 3:1-3).

2. a) ¿Mbaʼe pregúnta iñimportántevarepa tekotevẽ jajepyʼamongeta, ha mbaʼérepa? b) ¿Mbaʼépa hína peteĩ estúdio bíblico? (Ehecha nóta).

² Javyʼaiterei ningo jahechávo umi 4 áño ohasa vaʼekuépe, ko múndo tuichakuére káda mes oñeinforma hague amo 10 millón de estúdio bíblicorupi. * Ha umi 4 áñope avei, mas de 280.000 persóna ojevautisa káda áño, ha oiko chuguikuéra testígo de Jehová ha Cristo disípulo pyahu. Péro jahechaháicha, oĩ gueteri hetaiterei estudiánte ikatúva ojevautisa. ¿Mbaʼéichapa ikatu ñaipytyvõ chupekuéra? Jehová ningo ipasiénsia ha omeʼẽ gueteri oportunida la héntepe oiko hag̃ua chuguikuéra Cristo disípulo. Upévare jajapose opa ikatúva ñaipytyvõ hag̃ua chupekuéra ensegidaiténtema voi ojevautisa hag̃ua. ¡Saʼipaitéma ningo la tiémpo hembýva! (1 Cor. 7:29a; 1 Ped. 4:7).

3. ¿Mbaʼépa jahecháta ko artíkulope ñanepytyvõtava jajapo hag̃ua estúdio bíblico?

 ³ Koʼág̃arupi iñimportanteterei ñaipytyvõ umi héntepe oiko hag̃ua chuguikuéra Jesús disípulo. Upévare pe Kuérpo Governánte oporandu umi sukursálpe mbaʼépa ikatu jajapo ñaipytyvõ hag̃ua hetave estudiántepe ojevautisa hag̃ua. Ko artíkulope ha pe ótro oúvape jahecháta mbaʼépa ikatu ñaaprende umi ermáno ikatupyrývagui oservíva diferénte paíspe, tahaʼe prekursór, misionéro ha superintendénte de sirkuíto * (Prov. 11:14; 15:22). Haʼekuéra omyesakã mbaʼépa ñande jajapo vaʼerã, ha mbaʼépa ojapo vaʼerã ñane estudiánte ikatu hag̃uáicha pe estúdio ideprovechove chupe. Ko artíkulope jahecháta 5 mbaʼe káda estudiánte tekotevẽva ojapo ojevautisa hag̃ua. Ha ñande ñamboʼéva chupekuéra la Biblia ñaipytyvõ vaʼerã umi estudiántepe ojapo hag̃ua umi 5 mbaʼe.

4. ¿Mbaʼépa jahechakuaa vaʼerã jastudiáramo peteĩ persónandi hóga entrádapente?

⁴ Heta ermáno ha ermána ojapo hína estúdio bíblico pe persóna róga entrádape. Iporã ningo añete ñañepyrũ ñañemongeta péicha la héntendi oñeinteresave hag̃ua la Biblia heʼívare. Péro koʼãicha jave ndaikatúi jepi ñañemongeta puku ni ñañeʼẽ hendive káda semána. Oipytyvõ hag̃ua pe persónape oñeinteresave hag̃ua, oĩ umi ermáno ojeruréva chupe iteléfono número. Upéi ohenói térã omensahea upe persónape okomparti hag̃ua hendive mbykymi la Biblia heʼíva oho mboyve ovisita jey chupe. Ha péicha oñemongeta jepi hikuái heta mésere ojapoʼỹre peteĩ estúdio bíblico oho porãva hese. Péro hasýta peteĩ estudiánte oñemeʼẽ hag̃ua Jehovápe ha ojevautisa, noñemotiémpoiramo ha noñehaʼãiramo ostudia hag̃ua la Biblia.

5. ¿Mbaʼépa Jesús heʼi vaʼekue Lucas 14:27-33-pe ikatúva jaipuru ñaipytyvõ hag̃ua ñane estudiántepe?

⁵ Jesús oipuru vaʼekue umi ehémplo ohechaukáva mbaʼépa ojapo vaʼerã peteĩ persóna oikoséva idisípuloramo. Haʼe oñeʼẽ vaʼekue peteĩ persóna omopuʼãsévare peteĩ óga, ha peteĩ rréi ohótavare gerrahápe. Jesús heʼi vaʼekue pe ojogaposéva ‘oguapy raẽ vaʼerãha okalkula mboýpa ogastáta ohecha hag̃ua ikatútapa ojapopa’, ha pe rréi katu ‘oguapy raẽ vaʼerã oñemongeta umi ikonsehérondi’, ohecha hag̃ua ikatútapa ijehérsito ogana upe ñorairõ (elee Lucas 14:27-33). Upéicha avei, Jesús oikuaa vaʼekue peteĩ persóna oikoséva idisípuloramo, tekotevẽha okalkula porã mbaʼépa ojapo vaʼerã oiko hag̃ua chugui isegidór. Upéicha rupi, ñande ñamokyreʼỹ vaʼerã ñane estudiántepe káda  semána ostudia hag̃ua ñanendive. ¿Mbaʼéichapa ikatu jajapo upéva?

6. ¿Mbaʼépa ñañehaʼã vaʼerã jajapo ikatu hag̃uáicha ñane estudiánte oprogresa porã?

⁶ Primeroite voi, ñañehaʼã vaʼerã ñañemongeta pukuve umi persóna jastudiávandi hóga entrádape. Por ehémplo, jahecha rangue peteĩ téxto bíbliconte káda visítape, ikatu ñañeʼẽ mokõire. Jahecháramo pe ogajára naiprovlemaiha oñemongeta areve hag̃ua ñanendive, ñaporandukuaa chupe oĩpa peteĩ lugár ikatuhápe jaguapy ha jasegi ñañemongeta. Pe ogajára okontesta lája ohechaukáta hína iñimportántepa chupe g̃uarã ostudia la Biblia. Tiémpo rire, ikatu hag̃uáicha ñaipytyvõ ñane estudiántepe oprogresa pyaʼeve hag̃ua ikatu voi ñaporandu chupe ndostudiaséipa 2 vése káda semána. Upéicharõ jepe, ¿mbaʼépa tekotevẽ ojapove pe estudiánte?

7. ¿Mbaʼéichapa pe instruktór ojeprepara vaʼerã káda estudiorã?

⁷ Ñande haʼe rupi pe instruktór, tekotevẽ jajeprepara porã káda estudiorã. Upearã ikatu jalee pe jastudiátava hína ha jaheka umi téxto bíblico. Ñantende porã vaʼerã umi idéa iñimportantevéva. Ñapensa vaʼerã mbaʼépa ñanemboʼe pe título, umi subtítulo, umi pregúnta, umi téxto heʼíva hese “elee”, umi taʼanga ha umi vidéo ikatúva omyesakã porãve upe téma. Upéi ñapensa vaʼerã ñane estudiántere, jajepyʼamongeta de antemáno pe informasiónre ha jahecha mbaʼéichapa ikatu jaexplika chupe upéva, isensíllo ha hesakã porã hag̃uáicha chupe. Péicha haʼe ikatúta ontende porã ha ojapo umi mbaʼe oaprendéva (Neh. 8:8; Prov. 15:28a).

8. Heʼi haguéicha apóstol Pablo Colosenses 1:9, 10-pe, ¿mbaʼépa jajapo vaʼerã ñane estudiánte rehehápe?

⁸ Jajeprepara hag̃ua iñimportánte avei ñañemboʼe Jehovápe ñane estudiántere ha umi mbaʼe oikotevẽvare. Jajerure Jehovápe tañanepytyvõ ñaporomboʼe jave jaipuru hag̃ua la Biblia ikatu hag̃uáicha ñag̃uahẽ ñane estudiánte korasõme (elee Colosenses 1:9, 10). Ñapensáma vaʼerã voi mbaʼépa ikatu hína ijetuʼu pe estudiántepe ontende térã oasepta hag̃ua. Ñanemanduʼa vaʼerã ñande ñaipytyvõseha chupe ojevautisa hag̃ua.

9. ¿Mbaʼéichapa ikatu ñaipytyvõ ñane estudiántepe ojepreparakuaa hag̃ua ijestudiorã?

⁹ Hiʼãite ningo ñandéve pe persóna ostudia meméva hína, omombaʼeve Jehová ha Jesús ojapo vaʼekue hesehápe ha oaprendeseve chuguikuéra (Mat. 5:3, 6). Pe estudiánte oñekonsentra porã vaʼerã umi mbaʼe oaprendévare, péicha ideprovechovéta chupe  umi mbaʼe ostudiáva. Upearã jaexplika vaʼerã chupe iñimportantetereiha ojeprepara káda estudiorã. Ikatu ojapo upéva oleévo de antemáno pe informasión ojestudiátava, ha ojepyʼamongeta mbaʼéichapa ikatu ojapo umi mbaʼe oaprendéva. ¿Mbaʼéichapa ikatu ñaipytyvõ ñane estudiántepe ojepreparakuaa hag̃ua? Ikatu jajeprepara hendive peteĩ leksión ohecha hag̃ua mbaʼéichapa ojejapo vaʼerã. * Jaexplika chupe mbaʼéichapa ikatu otopa umi rrespuésta ombohováiva umi porandu, ha jahechauka chupe omarkánte hag̃ua umi palávra térã fráse iñimportantevéva omomanduʼa pyaʼevétava chupe la rrespuéstare. Upéi jajerure chupe tombohovái pe porandu iñeʼẽtépe, péicha jahechakuaáta haʼépa ontende porã hína pe informasión. Péro oĩ avei ótra kósa ikatúva ñamokyreʼỹ ñane estudiántepe ojapo hag̃ua.

10. a) ¿Mbaʼérepa iñimportánte pe estudiánte olee la Biblia káda día? b) ¿Mbaʼépa haʼe ojapo vaʼerã ideprovechove hag̃ua chupe umi mbaʼe oleéva la Bíbliape?

¹⁰ Pe persóna ostudiáramo jepe iñinstruktórndi káda semána, tekotevẽ avei haʼe ojapo álgo ijeheguiete: Tekotevẽ ohendu ha oñeʼẽ Jehovápe. Haʼe ikatu ohendu Ñandejárape oleévo la Biblia káda día (Jos. 1:8; Sal. 1:1-3). Jahechauka chupe mbaʼéichapa ikatu oipuru pe “Prográma jalee hag̃ua la Biblia” ikatúva oñeimprimi ha oĩva jw.org-pe. * Péro ideprovechove hag̃ua chupe umi mbaʼe oleéva la Bíbliape, ñamokyreʼỹ vaʼerã chupe ojepyʼamongeta hag̃ua mbaʼépa la Biblia omboʼe hína chupe Jehovágui, ha mbaʼéichapa haʼe ikatu ojapo umi mbaʼe oaprendéva (Hech. 17:11; Sant. 1:25).

11. ¿Mbaʼéichapa ñane estudiánte ikatu oaprende oñemboʼekuaa hag̃ua, ha mbaʼérepa iñimportánte haʼe oñemboʼe pyʼỹi Jehovápe?

¹¹ Ñamokyreʼỹ ñane estudiántepe oñeʼẽ hag̃ua Jehovápe oñemboʼévo chupe káda día. Ñañemboʼe vaʼerã ñande pyʼaite guive oñepyrũvo ha opakuévo káda estúdio, ha ñanemanduʼa ñane estudiántere ñane ñemboʼépe. Haʼe ohendúvo ñane ñemboʼe oaprendéta mbaʼéichapa haʼe oñemboʼe vaʼerã ipyʼaite guive, ha ojapo vaʼerãha upéva Jesús rérape (Mat. 6:9; Juan 15:16). Ñapensamíntena mbaʼeichaitépa ñane estudiánte oñemoag̃uivéta Jehováre, káda día oleéramo la Biblia ha oñemboʼe chupe. Péicha haʼe ohendu ha oñeʼẽta hína Jehovápe (Sant. 4:8). Ñane estudiánte ojepokuaáramo ojapo koʼã mbaʼe káda día, upéva oipytyvõta chupe oñemeʼẽ hag̃ua Jehovápe  ha ojevautisa. ¿Péro mbaʼépa avei oipytyvõta chupe?

12. ¿Mbaʼéichapa ikatu ñaipytyvõ ñane estudiántepe oreko hag̃ua Jehovápe iñamigoitéramo?

¹² Pe estudiánte ndahaʼéi ontendénte vaʼerã umi mbaʼe oĩva la Bíbliape, síno og̃uahẽ vaʼerã ikorasõme. ¿Mbaʼérepa? Pórke upéva omomýita chupe ojapo hag̃ua umi mbaʼe oaprendéva. Umi mbaʼe Jesús omboʼéva ningo isentído vaʼekue ha omopensa la héntepe. Péro haʼekuéra osegi vaʼekue Jesúspe pórke oporomboʼe jave, haʼe og̃uahẽ ikorasõmekuéra (Luc. 24:15, 27, 32). Ñane estudiánte ohechakuaa vaʼerã haʼe ikatuha oreko Jehovápe iñamigoitéramo, ikatuha oñemoag̃ui hese, ha ohecha chupe Itúa ha Idiósramo (Sal. 25:4, 5). Jastudia aja hendive, ñaipytyvõ chupe ohechakuaa ha omombaʼe hag̃ua umi kualida porãite orekóva Jehová (Éx. 34:5, 6; 1 Ped. 5:6, 7). Tahaʼe haʼéva pe téma jastudiáva hína, siémpre ñaipytyvõ vaʼerã chupe oikuaa hag̃ua mbaʼeichagua persónapa Jehová. Ñaipytyvõ vaʼerã ñane estudiántepe ontende hag̃ua mbaʼeichaitépa Jehová oporohayhu, imbaʼeporã ha oporoporiahuvereko. Jesús heʼi vaʼekue “pe primer mandamiénto ha pe iñimportantevéva” haʼeha ‘jahayhu Ñandejára Jehovápe’ (Mat. 22:37, 38). Ñaipytyvõkena ñane estudiántepe ohayhu hag̃ua Ñandejárape ipyʼaite guive.

13. Emombeʼu mbaʼéichapa ikatu ñaipytyvõ peteĩ estudiántepe ohechakuaa hag̃ua umi kualida porãite orekóva Jehová.

¹³ Ñañemongeta jave ñane estudiántendi, ñamombeʼu chupe mbaʼérepa ñande jahayhueterei Jehovápe. Upéva ikatu oipytyvõ chupe ohechakuaa hag̃ua haʼe avei ohayhu vaʼerãha Jehovápe ha oreko chupe iñamigoitéramo (Sal. 73:28). Por ehémplo, ikatu hína opokoiterei ñanderehe peteĩ fráse pe puvlikasión jastudiávape térã peteĩ téxtope, ohechaukágui mbaʼéichapa Jehová oporohayhu, iñarandu, ihústo ha ipoderóso. Upéicharõ ñamombeʼúkena upéva ñane estudiántepe, ha jaʼe chupe upéva ñanemomyiha jahayhu hag̃ua ñande Ru yvagapeguápe. ¿Péro mbaʼépa avei tekotevẽ ojapo peteĩ estudiánte ikatu hag̃uáicha ojevautisa?

14. a) ¿Mbaʼéichapa umi rreunión oipytyvõta peteĩ estudiántepe oprogresa porã hag̃ua? b) ¿Mbaʼépa ñanemboʼe umi rreunióngui Hebreos 10:24, 25?

¹⁴ Ñande ningo jaipota ñane estudiánte oprogresa porã ha ojevautisa. Upearã iñimportánte hína ñamokyreʼỹ chupe oho hag̃ua umi rreuniónpe. Umi instruktór ikatupyrýva heʼi umi estudiánte ensegída ohóva  rreunionhápe, pyaʼetereive oprogresaha (Sal. 111:1). Oĩ umi instruktór heʼíva iñestudiántepe oĩha heta mbaʼe oaprendétava rreunionhápe, noaprendemoʼãiva haʼekuérante ostudia jave la Biblia, ha upévare tekotevẽtaha oho rreunionhápe. Jalee Hebreos 10:24, 25 ñane estudiántendi, ha ñamyesakã chupe mbaʼe iporãvapa ohupytýta ohóramo umi rreuniónpe. Jahechauka chupe pe vidéo “¿Mbaʼéichapa rojapo ore rreunionkuéra?”. * Ñaipytyvõkena ñane estudiántepe ojepokuaa hag̃ua oho rreunionhápe káda semána ha anítei ofalta.

15. ¿Mbaʼépa ikatu jajapo ñamokyreʼỹ hag̃ua ñane estudiántepe oho meme hag̃ua rreunionhápe?

¹⁵ ¿Mbaʼépa ikatu jajapo ñane estudiánte neʼĩraramo oho rreunionhápe térã sapyʼántente ohóramo? Jaʼénte rangue chupe oho hag̃ua umi rreuniónpe, vyʼápe ha kyreʼỹme ñamombeʼu vaʼerã chupe mbaʼépa ñaaprende kuri rreunionhápe, upéva omokyreʼỹvéta chupe oho hag̃ua. Ñameʼẽ chupe pe rrevísta Ñemañaha térã pe prográma Mbaʼéichapa Jaiko ha Japredika vaʼerã ojestudiáva hína. Jahechauka chupe mbaʼépa jastudiáta pe rreunión oúvape, ha ñaporandu mbaʼe pártepa ointeresave chupe. Umi mbaʼe ñane estudiánte ohecha ha ohendúva pe primer rreunión ohóvape, iporãitevéta umi mbaʼe ohecha ha ohendu vaʼekuégui umi ótra rrelihiónpe (1 Cor. 14:24, 25). Upépe haʼe ohecháta umi ehémplo porã oipytyvõtava chupe ikatu hag̃uáicha ojevautisa.

16. a) ¿Mbaʼépa jajapo vaʼerã ñaipytyvõ hag̃ua ñane estudiántepe ojevautisa hag̃ua? b) ¿Mbaʼépa jahecháta pe ótro artíkulope?

¹⁶ ¿Mbaʼéichapa ikatu ñaipytyvõ ñane estudiántepe ojevautisa hag̃ua? Ikatu ñaipytyvõ káda estudiántepe ohechakuaa hag̃ua iñimportanteha ostudia la Biblia, ñamokyreʼỹvo chupe ostudia hag̃ua káda semána ha ojeprepara hag̃ua káda estudiorã. Avei ñamokyreʼỹ vaʼerã chupe káda día ohendu ha oñeʼẽ hag̃ua Jehovápe, oreko hag̃ua chupe iñamigoitéramo, ha oho hag̃ua umi rreunionhápe (ehecha pe rrekuádro “ ¿Mbaʼépa ojapo vaʼerã pe estudiánte?”). Pe ótro artíkulope jahecháta 5 mbaʼe ojapo vaʼerã avei umi instruktór oipytyvõ hag̃ua iñestudiántepe ojevautisa hag̃ua.