1. ¿Mbaʼérepa heta hénte oñekonfundipa?

KOʼÁG̃ARUPI oĩ hetaiterei rrelihión heʼíva ijehe kristianoha ha oadoraha Ñandejárape haʼe oipotaháicha. ¡Ajeve voi ningo la hénte oñekonfundipa! Ha oñeporandu hikuái: “¿Oĩne piko peteĩ rrelihión verdadérante, térãpa Ñandejára oasepta enterove rrelihión?”. ¿Ha mbaʼépa ikatu jaʼe ñandejehe? ¿Ñandépa ñaime segúro ñamboʼeha la verda? ¿Jagueroviápa ñande pyʼaite guive ñande testígo de Jehová jaadoraha hína Jehovápe haʼe oipotaháicha? Jahecháta unas kuánta pruéva ñanepytyvõtava ñaime hag̃ua segúro kóva haʼeha la verda.

2. ¿Mbaʼérepa apóstol Pablo oĩ vaʼekue segúro umi mbaʼe ogueroviáva haʼeha la verda? (1 Tesalonicenses 1:5).

² Apóstol Pablo oĩ vaʼekue segúro umi mbaʼe ogueroviáva haʼeha la verda (elee 1 Tesalonicenses 1:5). Haʼe ningo oĩ vaʼekue segúro, ndahaʼéi ogustáguinte chupe umi mbaʼe ogueroviáva, síno ostudia porã rupi Ñandejára Ñeʼẽ. Haʼe oguerovia vaʼekue ‘entéro mbaʼe oĩva Ñandejára Ñeʼẽme ouha Ñandejáragui’ (2 Tim. 3:16). ¿Mbaʼépa Pablo oaprende ostudiávo Ñandejára Ñeʼẽ? Upépe haʼe otopa umi pruéva ohechauka porãitereíva Jesús haʼeha pe Mesías oñepromete vaʼekue. Umi líder rrelihióso judío katu odesidi nopenamoʼãiha koʼã pruévare. Haʼekuéra hovamokõi ha ojapo umi mbaʼe Jehovápe ndogustáiva, heʼíramo jepe hikuái orrepresentaha Ñandejárape (Tito 1:16). Péro Pablo ndojoguaiete voi koʼã kuimbaʼépe. Haʼe ndoikói oiporavo mbaʼe pártepa ogueroviáta Ñandejára Ñeʼẽgui ha mbaʼe pártepa nahániri. Haʼe oĩ vaʼekue dispuésto omboʼe ha ojapóvo enteroite mbaʼe oĩva Ñandejára Ñeʼẽme (Hech. 20:27).

3. ¿Oñembohovái vaʼerãpa ñandéve entéro umi pregúnta jarekóva ñaime hag̃ua segúro kóva haʼeha la verda? (Ehecha avei pe rrekuádro “ Núnka ndaikatumoʼãi jaikuaapa Jehová rembiapokue ni umi mbaʼe haʼe opensáva”).

³ Oĩ umi opensáva pe rrelihión verdadéra ombohovái vaʼerãha ñandéve entéro umi pregúnta jarekóva, umíva apytépe umi  mbaʼe ndajatopáiva la Bíbliape jepe. ¿Péro iporãpa ñapensa upéicha? Jahechamína Pablo ehémplo. Haʼe heʼi vaʼekue umi kristiánope: “Pehechákena siértopa hína entéro mbaʼe”, péro orrekonose avei oĩha heta mbaʼe haʼe nontendéiva (1 Tes. 5:21). Haʼe oskrivi vaʼekue: “Ñande ningo ndajaikuaái entéro mbaʼe”. Ha heʼive: “Jahecha vai vaínte, ku ñamañarõguáicha peteĩ espého de metálpe” (1 Cor. 13:9, 12). Ñandéicha avei, Pablo nontendéi vaʼekue opaite mbaʼe. Péro si ontende vaʼekue umi mbaʼe iñimportantevéva Jehovágui, ha upéva ovaléma chupe g̃uarã oĩ hag̃ua segúro umi mbaʼe ogueroviáva haʼeha la verda.

4. a) ¿Mbaʼéichapa ikatu ñaime segúro kóva haʼeha la verda? b) ¿Mbaʼépa jahecháta ko artíkulope?

⁴ ¿Mbaʼépa ikatu jajapo ñaime hag̃ua segúro kóva haʼeha la verda? Upearã ikatu ñakompara mbaʼéichapa Jesús oadora vaʼekue Jehovápe ha mbaʼéichapa ñande testígo de Jehová jaadora hína chupe koʼág̃arupi. Ko artíkulope jahecháta umi kristiáno tee 1) ndoadorái vaʼerãha umi taʼanga, 2) orrespeta vaʼerãha Jehová réra, 3) ohayhu vaʼerãha umi enseñánsa verdadéra, ha 4) ojoayhu vaʼerãha ipyʼaite guive.

5. ¿Mbaʼéichapa Jesús oadora vaʼekue Jehovápe, ha mbaʼéichapa ikatu jasegi iñehémplo?

⁵ Jesús ningo ohayhueterei Jehovápe. Upévare oadora vaʼekue chupe añoiténte, tahaʼe yvágape térã oĩrõ guare ko yvy ape ári (Luc. 4:8). Jesús omboʼe vaʼekue idisipulokuérape ojapo hag̃ua avei upéicha. Upévare, Jesús ni idisipulokuéra ifiélva ndoipurúi vaʼekue umi taʼanga oadora hag̃ua Jehovápe. Ñandejára ningo peteĩ espíritu ha ni peteĩ yvypóra ndaikatúi ohecha chupe. Upévare umi taʼanga ojejapóva ni núnka ndaikatumoʼãi oñekompara Ñandejára Todopoderóso Jehováre  (Is. 46:5). ¿Péro ikatu piko jajapo umi sánto raʼanga ha ñañemboʼe chupekuéra? Jehová omeʼẽrõ guare umi Diez Mandamiénto, pe segúndope heʼi vaʼekue: “Nderejapói vaʼerã mbaʼeveichagua dios raʼanga ni mbaʼeve raʼanga ojoguáva peteĩ mbaʼe oĩvape yvágape, yvy ape ári térã ýpe. Nereñesũi vaʼerã umíva renondépe” (Éx. 20:4, 5). Ko mandamiénto ningo hesakã porãiterei umi ombovyʼasévape g̃uarã Jehovápe.

6. ¿Máva ehémplopa ñande testígo de Jehová jasegi jaadora hag̃ua Jehovápe?

⁶ Umi istoriadór heʼi pe síglo primérope umi kristiáno oadora hague Ñandejárape añoiténte. Por ehémplo, peteĩ lívro de istória heʼi koʼã kristiánope katuete “ombojeguarúta hague” ojeʼéramo chupekuéra ojepurutaha umi taʼanga umi lugár oadorahápe hikuái Ñandejárape (History of the Christian Church). Koʼág̃arupi avei ñande testígo de Jehová jasegi umi kristiáno ypykue ehémplo. Ñande ndajaipurúi umi taʼanga ha nañañemboʼéi umi “sántope”, umi ánhelpe ni Jesúspe jepe. Avei ndajapurahéiri pe ímno nasionál ni ndajajapói mbaʼeve ontendekátava jaadoraha ñane retã. Toiko la oikóva ñaiméma desidído jajapotaha la Jesús heʼi vaʼekue: “Ñandejára Jehovápe readora vaʼerã” (Mat. 4:10).

7. ¿Mbaʼe mbaʼépepa ñanediferénte ñande testígo de Jehová umi ótra rrelihióngui?

⁷ Koʼág̃arupi umi hénte itarovapa umi líder rrelihióso oñeʼẽkuaáva ha ifamósovare. Haʼekuéra ombotuichaiterei koʼã líder rrelihiósope ha haimetéma voi oadora chupekuéra. Umi hénte omyenyhẽ umi ijiglesiakuéra, ojogua umi ilívro ha omeʼẽ heta heta pláta oapoja hag̃ua chupekuéra. Oĩ umi ogueroviáva káda palávra heʼíva hikuái. ¡Ni Jesucristo voi ojaparesérõ chupekuéra noñeemosionaichéne la peichaite peve! Péro ñande jaadoráva Jehovápe haʼe oipotaháicha ndajasegíri umi yvypórape ni nañambotuichái chupekuéra. Jarrespetáramo jepe umi ñandegiávape, siémpre ñanemanduʼa ko Jesús heʼi vaʼekuére: “Peẽ enterovéva oñoermáno” (Mat. 23:8-10). Ñande nañamombaʼeguasúi umi yvypórape, tahaʼe umi líder rrelihióso térã governánte polítikope, ha ndajaapojái avei chupekuéra. Ñande ningo ndajaikéi polítikape ha ndajajeheʼái ko múndore. Entéro koʼã mbaʼépe ñande tuicha ñanediferénte umi rrelihión heʼívagui ijehe kristianoha (Juan 18:36).

8. ¿Mbaʼéichapa ñande jaikuaa Jehová oipotaha ñambotuicha héra ha jaikuaauka ótrope?

⁸ Peteĩ vuéltape Jesús oñemboʼe vaʼekue Jehovápe, ha heʼi chupe: “Che Ru, embotuichána nde réra”. Jehová voi okontesta vaʼekue upe ñemboʼe ha hatã heʼi yvága guive ombotuichataha héra (Juan 12:28). Jesús opredikárõ guare ko yvy ape ári siémpre ombotuicha vaʼekue Itúa réra (Juan 17:26). Upévare ikatu jaʼe umi kristiáno verdadérope g̃uarã haʼeha peteĩ priviléhio oipuru Jehová réra ha oikuaauka upéva ótrope.

9. ¿Mbaʼéichapa umi kristiáno ypykue ohechauka vaʼekue orrespetaha Ñandejára réra?

⁹ Síglo primérope, oñepyrũ riremínte pe kongregasión kristiána, Jehová ‘imanduʼa umi hénte ótro tetãyguáre, ha ijapyteguikuéra haʼe oñepyrũ oiporavo peteĩ puévlo ogueraha vaʼerã héra’ (Hech. 15:14). Koʼã kristiáno ovyʼaiterei vaʼekue oipuru haguére Ñandejára réra, ha oikuaauka haguére upéva ótrope. Haʼekuéra ningo pyʼỹinte voi oipuru vaʼekue Ñandejára réra, tahaʼe opredika jave térã oskrivi jave umi lívro oĩva la Bíbliape. * Péicha ohechauka hikuái haʼekuéra añoite haʼeha pe puévlo oikuaaukáva Jehová réra (Hech. 2:14, 21).

10. ¿Mbaʼe pruévapa oĩ ñande testígo de Jehová haʼeha pe puévlo ogueraháva Jehová réra?

 ¹⁰ ¿Ohechaukápa umi testígo de Jehová haʼeha pe puévlo ogueraháva Jehová réra? Jahechamína umi pruéva. Ñane tiémpope, heta líder rrelihióso ojapo ikatúva guive ani hag̃ua umi hénte oikuaa Ñandejára réra. Por ehémplo, haʼekuéra oipeʼa Jehová réra umi Bíbliagui ha oproivi voi ojepuru upe téra umi ijiglesiakuérape. * Ojekuaa porãiterei ningo ñande testígo de Jehová añoite jarrespeta ha ñambotuichaha Jehová réra haʼe omereseháicha. ¡Ndaipóri ningo ótra rrelihión oikuaaukáva peichaite peve Jehová réra ñande jajapoháicha! Ñande ñañehenói testígo de Jehová, upévare jajapo ikatúva guive jaikuaauka ha ñambotuicha hag̃ua Jehová réra (Is. 43:10-12). Ñande ñaguenohẽma mas de 240 millones de Biblia Traducción del Nuevo Mundo de las Santas Escrituras, oipurúva Jehová réra umi lugár umi ótra traduksión nomoĩri haguépe. Avei ñaguenohẽ mas de 1.000 idiómape umi puvlikasión bíblica oipurúva Jehová réra.

11. ¿Mbaʼéichapa ohechauka vaʼekue umi kristiáno ypykue ohayhuetereiha umi enseñánsa verdadéra?

¹¹ Jesús ningo ohayhu vaʼekue umi enseñánsa verdadéra, umíva hína umi enseñánsa ohechaukáva mbaʼeichaguápa Ñandejára ha mbaʼépa ojapóta. Umi mbaʼe Jesús ojapóvare, ohechauka vaʼekue haʼe ogueroviaha koʼã enseñánsa ha upévare omboʼe umíva umi héntepe  (Juan 18:37). Jesús segidorkuéra teete ohayhueterei vaʼekue avei umi enseñánsa verdadéra (Juan 4:23, 24). Apóstol Pedro heʼi vaʼekue voi pe rrelihión kristiána haʼeha ‘Ñandejára rape’, pórke ojegia umi enseñánsa verdadérare oadora hag̃ua chupe (2 Ped. 2:2). Umi kristiáno ypykue ningo ohayhu vaʼekue umi enseñánsa verdadéra. Upéicha rupi orrechasa hikuái umi idéa personál, umi kreénsia rrelihiósa ha umi kostúmbre oñemoĩva umi enseñánsa verdadérare (Col. 2:8). Upéicha avei, koʼág̃arupi umi kristiáno verdadéro oñehaʼãmbaite “oiko pe añetegua rapére”. Upévare ojasegura hikuái oñemopyendaha hína Jehová Ñeʼẽme pe oiko lája ha umi mbaʼe ogueroviáva (3 Juan 3, 4).

12. ¿Mbaʼépa oiko pe Kuérpo Governánte ohechakuaa jave tekotevẽha ojejapo peteĩ kámbio, ha mbaʼépa ogia chupekuéra?

¹² Ñande testígo de Jehová ndajaʼéi ñandejehe jaikuaaha enteroite mbaʼe oĩva Ñandejára Ñeʼẽme. Sapyʼánte jajavy avei mbaʼéichapa ñantende peteĩ enseñánsa oĩva la Bíbliape térã mbaʼéichapa oñeorganisa pe kongregasión. Péro upéva nañanesorprendéi vaʼerã, pórke la Biblia ohechauka porã Ñandejára puévlo mbeguekatúpente voi ontendetaha ohóvo umi enseñánsa verdadéra (Col. 1:9, 10). Jehová ningo omyesakã la verda saʼi saʼípe, ha ñande ñanepasiénsia vaʼerã ñahaʼãrõ aja haʼe omyesakã porã (Prov. 4:18). Umi ermáno oĩva pe Kuérpo Governántepe pyaʼe porã ojapo umi kámbio, ohechakuaáramo tekotevẽha ñakambia ñantende lája peteĩ enseñánsa oĩva la Bíbliape, térã jajapo lája peteĩ mbaʼe. Heta rrelihión heʼíva ijehe kristianoha ojapo umi kámbio opyta porãséguinte umi héntendi, térã omeʼẽségui gústo ko múndope. Ñande testígo de Jehová katu jajapo umi kámbio ñañemoag̃uive hag̃ua Jehováre, ha jaadora hag̃ua chupe Jesús ojapo haguéicha (Sant. 4:4). Ñande ndajajapói umi kámbio jajegia rupi umi hénte ko mundopegua heʼívare, síno ñantende porãve rupi Ñandejára Ñeʼẽ. ¡Ajéiko jahayhuete umi enseñánsa verdadéra! (1 Tes. 2:3, 4).

13. a) ¿Mbaʼépa pe kualida iñimportantevéva ohechauka vaʼerã umi kristiáno tee? b) ¿Mbaʼéichapa ñande testígo de Jehová jahechauka hína koʼág̃arupi upe kualida?

¹³ Umi kristiáno ypykue oreko vaʼekue heta kualida iporãitereíva, péro umíva apytégui pe iñimportantevéva haʼe vaʼekue pe mborayhu. Jesús heʼi vaʼekue: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35). Koʼág̃arupi testígo de Jehová ñaiméva ko múndo tuichakuére jajoayhu ha ñaime en unida. Ñande ningo ñanediferénte entéro umi ótro rrelihióngui, pórke ñaime hína peteĩ família tuichaitereívape jarekóramo jepe diferénte kultúra térã nasionalida. Umi rreunión ha asambleahápe ojekuaa porã voi mbaʼeichaitépa jajoayhu. Upéva ñanepytyvõ koʼytevéntema ñaime hag̃ua segúro jaadoraha Jehovápe haʼe oipotaháicha.

14. Heʼiháicha Colosenses 3:12-14, ¿mbaʼéichapa ikatu jahechauka jajoayhuha ñande pyʼaite guive?

¹⁴ La Biblia ningo heʼi ñandéve: “Pejoayhu vaʼerã pende pyʼaite guive” (1 Ped. 4:8). Ñande jahechauka jajoayhuha ñañoperdona jave, ha ñaaguanta jave ñane ermanokuéra imperfeksión. Avei jaaprovecha umi oportunida jarekóva ñandepojera ha jarresivi porã hag̃ua ñane ermanokuérape, umi ñanembopochy vaʼekuépe jepe (elee Colosenses 3:12-14). Péicha jajoayhu rupi jahechauka hína ñande haʼeha kristiáno tee.

15. ¿Mbaʼe mbaʼépepa avei ñande jasegi umi kristiáno ypykue ehémplo?

¹⁵ Ñande jasegi avei umi kristiáno ypykue  ehémplo hetave hendáicha. Por ehémplo, ñañeorganisa haʼekuéraicha, upévare jareko avei superintendénte de sirkuíto, ansiáno ha siérvo ministeriál (Filip. 1:1; Tito 1:5). Ha haʼekuéraicha avei, jasegi Jehová heʼíva ñanderekoporã hag̃ua, ha jarrespeta la haʼe heʼíva pe matrimónio ha tuguýre. Avei ñande japrotehe pe kongregasión umi pekadór noñarrepentírivagui (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Mbaʼépa ñanemboʼe Efesios 4:4-6 heʼíva?

¹⁶ Jesús oprofetisa vaʼekue oĩtaha heta heʼíva ijehe haʼeha idisípulo, péro naentéroi haʼetaha idisípulo tee (Mat. 7:21-23). Avei Ñandejára Ñeʼẽ ñandeavisa umi ára pahápe oĩtaha heta oservi guaʼúnteva Ñandejárape (2 Tim. 3:1, 5). Péro la Biblia omyesakã porã ‘peteĩnteha ñande jerovia’, térã peteĩnteha pe rrelihión Ñandejára oguerohorýva (elee Efesios 4:4-6).

17. ¿Mávapa hína pe rrelihión verdadéra ñane tiémpope?

¹⁷ Upéicharõ, ¿mávapa hína pe rrelihión verdadéra ñane tiémpope? Ñande ningo ñaanalisáma umi pruéva oĩva. Jahecháma mbaʼéichapa Jesús ñanemboʼe vaʼekue jaadora hag̃ua Ñandejárape, ha pe ehémplo oheja vaʼekue umi kristiáno ypykue. Upévare ikatu jaʼe, ñande testígo de Jehová añoite haʼeha pe rrelihión verdadéra. Ñandéve g̃uarã ningo tuichaiterei priviléhio ñaime Jehová puévlope, jaikuaa porã chupe, ha entéro umi mbaʼe haʼe ojapótava. Upévare, jasegíkena jajapo opa ikatúva ñaime hag̃ua segúro kóva haʼeha la verda.