1. ¿Mbaʼe esperánsapa Jehová omeʼẽ ñandéve?

 JEHOVÁ omeʼẽ ñandéve pe esperánsa ijojahaʼỹva ikatuha jaiko pára siémpre. Algúno isiérvo oreko pe esperánsa oikóvo pára siémpre yvágape, ha oreko “peteĩ kuérpo oñembyaiʼỹva” (1 Cor. 15:50, 53). Péro la majoría jareko la esperánsa jaikotaha pára siémpre ko yvy ape ári vyʼápe ha tesãime (Apoc. 21:3, 4). Enterovéva javaloraiterei pe esperánsa jarekóva, tahaʼe jaiko pára siémpre yvágape térã ko yvy ape ári.

2. ¿Mávaguipa ou ñane esperánsa, ha mbaʼérepa jaʼe upéva?

² La Bíbliape ojepuru jave pe palávra “esperánsa” heʼise ñaimeha segúro katuete oikotaha heta mbaʼe iporãva. Ha ñande ikatu ñaime segúro pe ñane esperánsa katuete oñekumplitaha, pórke upéva ou hína Jehovágui (Rom. 15:13). Ñande jaikuaa porã entéro umi promésa Jehová ojapóva ñandéve, ha ñaime segúro haʼe katuete okumplitaha (Núm. 23:19). Ni michĩmi ndajadudái Jehová okumplisetereiha entéro mbaʼe heʼi vaʼekue ojapotaha. Upéicharõ ñane esperánsa ndahaʼéi peteĩ suéño reínte ñande jaipotáva oñekumpli térã álgo ñande jaipotáva oiko, síno oĩ heta pruéva ohechaukáva katuete oñekumplitaha.

3. ¿Mbaʼépa jahecháta ko artíkulope? (Salmo 27:14).

³ Ñande Ru yvagapegua ñanderayhueterei ha oipota jajerovia hese (elee Salmo 27:14). Ñane esperánsa Jehováre imbaretéramo ikatúta ñaaguanta umi pruéva, ñandepyʼaguasúta ha javyʼaitereíta, tahaʼe haʼéva umi situasión oñepresentáva ñandéve. Ko artíkulope jahecháta mbaʼéichapa ñane esperánsa ñandeprotehe. Primerorã jahecháta mbaʼérepa jaʼe ñane esperánsa ojoguaha peteĩ ánkla ha peteĩ káskope, ha upe rire jahecháta mbaʼéichapa ikatu ñamombarete ñane esperánsa Jehováre.

4. ¿Mbaʼérepa ikatu jaʼe ñane esperánsa haʼeha peteĩ ánkla? (Hebreos 6:19).

⁴ Pe kárta apóstol Pablo omondo vaʼekue umi kristiáno hebréope okompara vaʼekue ñane esperánsa peteĩ ánklare (elee Hebreos 6:19). Haʼe ningo pyʼỹi oviahámi vaʼekue pe mar rupi, upévare oikuaa porã umi ánkla oipytyvõha umi várkope ani hag̃ua oñehundi. Peteĩ vuéltape, haʼe oviaha aja peteĩ várkope, ou kuri peteĩ torménta hatãitereíva. Upérõ haʼe ohecha vaʼekue mbaʼéichapa umi marinéro opoi umi ánkla pe márpe ani hag̃ua pe várko ochoka umi itáre (Hech. 27:29, 39-41). Ñane esperánsa haʼe avei peteĩ ánkla, pórke ñanepytyvõ jasegi hag̃ua Jehová ykére oñepresentáramo jepe ñandéve umi pruéva ojoguáva umi torménta hatãitereívape. Upéicha jave katuete jajerovia mbarete vaʼerã omehorataha pe situasión jahasáva, ha upéva ñanepytyvõta ñambohovái porã hag̃ua upe torménta. Ñanemanduʼa vaʼerã Jesús ñandeavisa hague jajepersegitaha (Juan 15:20). Upévare jajepyʼamongetáramo Jehová promesakuérare, katuete ñanepytyvõta jasegi hag̃ua jaservi chupe.

5. ¿Mbaʼéichapa pe esperánsa oipytyvõ vaʼekue Jesúspe oikuaárõ jepe omanotaha?

⁵ Jahechamína mbaʼéichapa pe esperánsa oipytyvõ vaʼekue Jesúspe osegi hag̃ua ifiél oikuaáramo jepe omano asyetereitaha. Pe Pentekostés áño 33-pe, apóstol Pedro osita peteĩ profesía oĩ vaʼekue lívro de Sálmope, ohechaukáva mbaʼéichapa Jesús itrankílo: “Aikove aja arekóta esperánsa, pórke nde ndacherejamoʼãi pe Sepultúrape, ha nde nderehejamoʼãi pe iñeʼẽrendúva ipyʼaite guive retekue oñembyai. [...] Nde chemyenyhẽta vyʼágui ne renondépe” (Hech. 2:25-28; Sal. 16:8-11). Jesús oikuaáramo jepe omanotaha, haʼe ojeroviaiterei Ñandejára omoingove jeytaha chupe ha ikatutaha oĩ jey Itúandi yvágape (Heb. 12:2, 3).

6. ¿Mbaʼépa heʼi vaʼekue peteĩ ermáno pe esperánsare?

⁶ Heta ermáno ha ermána oaguanta umi pruéva ijetuʼuetereíva oreko rupi esperánsa Jehováre. Jahechamína Leonard Chinn ehémplo. Haʼe ningo peteĩ ermáno ifiélva ha oiko vaʼekue Inglatérrape. Pe primera gérra mundiál aja ojegueraha chupe kárselpe ndoikeséi rupi pe ehérsitope. Dos mése aja noñepermitíri chupe oñeʼẽ avavéndi ha ojeovliga chupe ojapo hag̃ua umi traváho ipohyietereíva. Tiémpo rire haʼe oskrivi vaʼekue: “Umi mbaʼe ahasa vaʼekue chepytyvõ ahechakuaa hag̃ua iñimportantetereiha jareko esperánsa Jehováre ikatu hag̃uáicha ñaaguanta. Pe ehémplo oheja vaʼekue Jesús, umi apóstol, umi proféta ha avei umi promésa porãite oĩva la Bíbliape ñanepytyvõ ñamombaʼeve hag̃ua ñane esperánsa ha ñanemombarete ñaaguanta hag̃ua”. Pe esperánsa ningo peteĩ ánkla vaʼekue Léonardpe g̃uarã, ha ñande kásope ikatu avei upéicha.

7. ¿Mbaʼéichapa ñane esperánsa Jehováre imbareteve ñambohovái jave umi pruéva? (Romanos 5:3-5; Santiago 1:12).

⁷ Ñaaguanta jave umi pruéva ha jahecha jave mbaʼéichapa Jehová oĩ ñande ykére, ñanepytyvõ ñaime hag̃ua segúro haʼe ñandeguerohoryha (elee Romanos 5:3-5; Santiago 1:12). Jaikuaa ypýrõ guare la verda ñane esperánsa Jehováre imbarete, péro koʼág̃a ikatu jaʼe imbareteventemaha. Satanás oipota umi provléma ñanedesanima ha ñanemokangy, péro Jehová ñanepytyvõ rupi ikatúta ñambohovái porã umíva.

8. ¿Mbaʼérepa ikatu jaʼe pe esperánsa ojoguaha peteĩ káskope? (1 Tesalonicenses 5:8).

⁸ La Biblia heʼi ñane esperánsa ojoguaha peteĩ káskope (elee 1 Tesalonicenses 5:8). Peteĩ soldádo ningo omoĩ iñakãre pe kásko ani hag̃ua iñenemígo ogolpea chupe. Ñande avei ñañorairõ Satanásndi, ha japrotehe vaʼerã ñane akã  umi atáke opoívagui ñane kóntrape. Haʼe oipuru diferénte mbaʼe ñanemoñuhã hag̃ua, ojevale umi tentasiónre térã idéa naiporãivare ombyai hag̃ua umi ñane pensamiénto. Pe kásko oproteheháicha peteĩ soldádo akã, ñane esperánsa avei oprotehe umi ñane pensamiénto jasegi hag̃ua ñandefiél Jehovápe.

9. ¿Mbaʼépa oiko peteĩ persónare operdéramo la esperánsa?

⁹ Pe esperánsa jarekóva jaikotaha pára siémpre ikatu ñanepytyvõ jadesidi porã hag̃ua. Péro jajúramo ñapensa ñameʼẽvo gústo ñandejupénte, ñane esperánsa ikatu ou ikangy. Ñapensamíntena unos kuánto kristiáno oiko vaʼekuére siuda de Coríntope. Haʼekuéra ou vaʼekue ndojeroviavéi pe esperánsa de la rresurreksiónre, haʼéva peteĩ promésa iporãitereíva Ñandejára omeʼẽva (1 Cor. 15:12). Pablo heʼi vaʼekue entéro umi ndogueroviáiva oikotaha pe rresurreksión oikoha omeʼẽ hag̃ua gústo ijupénte (1 Cor. 15:32). Koʼág̃arupi avei oĩ heta ndojeroviáiva Ñandejára promesakuérare, upévare ojapo chupekuéra ogustávante ha ojapo la ojaposéva. Péro ñande ñanediferénte, pórke jajerovia Ñandejára promesakuérare oñekumplítava amo gotyove. Ñane esperánsa Jehováre oprotehe ñane akã peteĩ káskoicha ha ñanepytyvõ ani hag̃ua ñapensa ñandejehénte, pórke upéva ikatu ombyai ñane amista Jehovándi (1 Cor. 15:33, 34).

10. ¿Mbaʼéichapa pe esperánsa ñanepytyvõ ani hag̃ua jaguerovia umi japu ojeʼéva?

¹⁰ Pe ñane esperánsa ojoguáva peteĩ káskope ñandeprotehe avei ani hag̃ua ñapensa ijetuʼuetereiha Jehová ñandeguerohory hag̃ua. Por ehémplo, ikatu oĩ álgien opensáva: “Che ningo núnka ndaikomoʼãi pára siémpre, pórke ndahaʼéi la chevuenoitereíva. Che núnka ndaikatumoʼãi akumplipa la Ñandejára ohaʼarõva chehegui”. Ñanemanduʼamína Elifaz rehe. Haʼe ningo haʼe vaʼekue Job amígo guaʼu, ha heʼi vaʼekue avei Jóbpe upéicha lénto: “¿Ikatu piko peteĩ persóna ipotĩ Ñandejára renondépe?”. Upéi heʼive: “Ñandejára ningo ndojeroviái ni hiʼanhelkuérare, ha pe yvága jepe naipotĩri chupe g̃uarã” (Job 15:14, 15). Péro upéva peteĩ japu hína. Ñanemanduʼa vaʼerã Satanás oipotaha ñapensa upéicha. Haʼe oikuaa porã jajúramo kontinuádo ñapensa upéicha, ikatuha japerde la esperánsa. Upévare ñañehaʼãmbaitékena ñamboyke pe japu ha ñañekonsentra Jehová promesakuérare. Aníkena núnka jaduda Jehová oipotaha ñande jaiko pára siémpre, ha haʼe ñanepytyvõtaha jahupyty hag̃ua upéva (1 Tim. 2:3, 4).

11. ¿Mbaʼérepa ñanepasiénsia vaʼerã ñahaʼarõ aja oñekumpli Ñandejára promesakuéra?

¹¹ Heta vése ningo ijetuʼu siémpre imbarete hag̃ua ñane esperánsa Jehováre. Sapyʼánte ikatu jaju nañanepasiensiavéi ñahaʼarõ aja Ñandejára okumpli ipromesakuéra. Péro Jehová ningo etérno, ha haʼe ndohechái pe tiémpo ñande jahechaháicha (2 Ped. 3:8, 9). Haʼe katuete okumplíta iporãveháicha umi ipromesakuéra, péro ikatu ndojapói upéva ñande ñahaʼarõháicha. ¿Mbaʼépa ñanepytyvõta ñamombarete hag̃ua ñane esperánsa ha jasegi hag̃ua ñahaʼarõ vyʼápe Ñandejára okumpli peve ipromesakuéra? (Sant. 5:7, 8).

12. Heʼiháicha Hebreos 11:1, 6, ¿mbaʼérepa tekotevẽ jajerovia jareko hag̃ua esperánsa?

¹² Ñane esperánsa imbaretéta jasegíramo Jehová ykére, pórke haʼe hína upe ogarantisáva oñekumplitaha katuete. La Biblia heʼi voi jareko hag̃ua esperánsa tekotevẽha jajerovia Jehová “oexistiha ha omyengovia porãha umi oñehaʼãvape ipyʼaite guive oadora chupe” (elee Hebreos 11:1, 6). Ñande pyʼaite guive jagueroviáramo Jehová oexistiha, ñaimevéta segúro haʼe katuete okumplitaha ipromesakuéra. Jahechamína  koʼág̃a mbaʼépa ikatu jajapo ñamombarete hag̃ua ñane amista Jehovándi, ha péicha osegi hag̃ua imbarete ñane esperánsa.

13. ¿Mbaʼépa jajapo vaʼerã oiko hag̃ua ñandehegui Ñandejára amígo?

¹³ Ñañemboʼe Jehovápe ha jalee Iñeʼẽ. Añetehápe ningo ñande ndaikatúi jahecha Jehovápe, péro si ikatu oiko ñandehegui iñamígo. Ikatu ñañeʼẽ chupe ñañemboʼe jave, ha ñaime segúro haʼe katuete ñanerendutaha (Jer. 29:11, 12). Jalee jave la Biblia ha jajepyʼamongeta jave hese, ñahendu hína Jehovápe. Jalee jave mbaʼéichapa Jehová okuida vaʼekue isiervokuéra ifieletéva yma guarére, ñane esperánsa imbareteve ohóvo. “Entéro mbaʼe ojeskrivi vaʼekue yma Ñandejára Ñeʼẽme, ojeskrivi ñanerekomboʼe hag̃ua. Ñandejára Ñeʼẽ ñanekonsola ha ñanepytyvõ ñaaguanta hag̃ua, ha upéva omeʼẽ ñandéve esperánsa” (Rom. 15:4).

14. ¿Mbaʼérepa iporã jajepyʼamongeta Jehová ojapómavare ótro rehehápe?

¹⁴ Jajepyʼamongeta mbaʼéichapa Jehová okumplíma ipromesakuéra. Ñanemanduʼamína mbaʼépa Ñandejára ojapo vaʼekue Abrahán ha Sara kásope. Haʼekuéra ijedaiterei rupi ndaikatuvéima vaʼekue ifamília, péro Ñandejára opromete chupekuéra oguerekotaha peteĩ mitã (Gén. 18:10). ¿Mbaʼéichapa orreaksiona vaʼekue Abrahán? La Biblia heʼi: “Abrahán ohaʼarõkuaa ha ojerovia hetaiterei nasión outaha chugui” (Rom. 4:18). Peteĩ persónape g̃uarã haʼetévaicha ndaiporivéimava esperánsa, péro Abrahán ni michĩmi ndodudái Jehová katuete okumplitaha upe promésa ojapo vaʼekue. Ha ndojeroviareíri kuri Ñandejárare, pórke tiémpo rire haʼe ha hembireko oguereko peteĩ mitãʼi (Rom. 4:19-21). Jalee jave koʼãichagua rreláto ñanepytyvõ jajerovia hag̃ua Jehová katuete okumplitaha umi mbaʼe oprometéva, jepe ñandéve g̃uarã haʼetévaicha imposívle oiko hag̃ua upéva.

15. ¿Mbaʼérepa iporã ñapensa umi mbaʼe Jehová ojapóma vaʼekuére ñanderehehápe?

 ¹⁵ Ñapensa umi mbaʼe Jehová ojapómavare ñanderehehápe. Ñapensamína mbaʼéichapa ñande kásope oñekumplíma heta promésa oĩva la Bíbliape. Por ehémplo Jesús opromete vaʼekue Itúa omeʼẽtaha ñandéve entéro mbaʼe ñaikotevẽva jaikove hag̃ua (Mat. 6:32, 33). Jesús heʼi vaʼekue avei Jehová omeʼẽtaha ñandéve espíritu sánto jajeruréramo chupe (Luc. 11:13). Jehová okumplíma koʼã promésa, ha oiméne ou avei ndéve ne akãme ótra promésa oñekumpli vaʼekue nde kásope. Por ehémplo Jehová neperdonataha, nekonsolataha ha omeʼẽtaha ndéve reikotevẽva esegi hag̃ua ndejerovia mbarete (Mat. 6:14; 24:45; 2 Cor. 1:3). Jajepyʼamongetáramo entéro mbaʼe Ñandejára ojapóma vaʼekuére ñanderehehápe, katuete ñaiméta segúro haʼe okumplitaha entéro mbaʼe oprometéva amo gotyove g̃uarã.

16. ¿Mbaʼérepa pe esperánsa haʼe peteĩ rregálo ijojahaʼỹva?

¹⁶ Pe esperánsa jaikotaha pára siémpre ningo peteĩ rregálo ijojahaʼỹva Ñandejára ojapóva ñandéve. Ñande ningo ñahaʼarõitereíma og̃uahẽ upe moménto, ha ni michĩmi ndajadudái oikotaha upéva. Pe esperánsa ningo peteĩ ánkla pórke ñanepytyvõ ñambohovái hag̃ua umi pruéva, pe persekusión ha pe ñemano jepe. Avei ojogua peteĩ káskope pórke oprotehe umi mbaʼe ñapensáva, ha ñanepytyvõ ñamboyke hag̃ua pe ivaíva ha jajapo hag̃ua iporãva. Pe esperánsa porãite jatopáva la Bíbliape ñanemoag̃ui Ñandejárare, ñanepytyvõ jaikuaa porãve hag̃ua chupe, ha ohechauka ñandéve mbaʼeichaitépa haʼe ñanderayhu. Añetehápe hetaiterei mbaʼe iporãva ikatu jahupyty imbaretéramo ñane esperánsa Jehováre.

17. ¿Mbaʼérepa ñanembovyʼaiterei pe esperánsa jarekóva?

¹⁷ Pe kárta apóstol Pablo oskrivi vaʼekuépe umi kristiáno rrománope, heʼi: “Pevyʼáke pe esperánsa perekóvare” (Rom. 12:12). Pablo ikatu kuri ovyʼa oĩ rupi segúro osegíramo ifiél oikotaha pára siémpre yvágape. Ñande avei ikatu javyʼa pe esperánsa jarekóvare, pórke ni michĩmi ndajadudái Jehová okumplitaha katuete ipromesakuéra. Pe salmísta oskrivi vaʼekue: ‘Ovyʼa pe persóna orekóva esperánsa Jehováre. Siémpre ikatu ñakonfia hese’ (Sal. 146:5, 6).