1. ¿Mbaʼépa heʼise ‘jahechakuaaha ñaikotevẽha Ñandejárare’, ha mbaʼéichapa upéva ñanepytyvõ javyʼa hag̃ua?

 PETEĨ persóna ovyʼa añetéva ndahaʼéi ovyʼáva sapyʼaiténte ha upéi ndovyʼavéi jeýmava, síno tódo el tiémpo oñeñandu porã. ¿Mbaʼérepa ikatu jaʼe upéva? Jesús oexplika vaʼekue pe Sermón del Móntepe: “Ovyʼa umi ohechakuaáva oikotevẽha Ñandejárare” (Mat. 5:3). Jesús oikuaa vaʼekue yvyporakuérape ojejapo hague oreko hag̃ua pe deséo oikuaa ha oadora hag̃ua Ijapohare Jehovápe. Ha upéva hína la heʼiséva ‘jahechakuaa ñaikotevẽha Ñandejárare’. Jehová ningo haʼe ‘Ñandejára ovyʼáva’, upévare entéro umi oadoráva chupe ikatu avei ovyʼa (1 Tim. 1:11).

2, 3. a) ¿Mávapa ikatu ovyʼa avei heʼi haguéicha Jesús? b) ¿Mbaʼépa jahecháta ko artíkulope, ha mbaʼérepa tekotevẽ upéva?

² ¿Heʼisépa upéva javyʼa añete hag̃ua ndajarekói vaʼerãha provléma? Nahániri. Pe Sermón del Móntepe Jesús heʼi vaʼekue peteĩ mbaʼe ñanesorprendéva. Haʼe heʼi: “Ovyʼa umi oñembyasýva”, tahaʼe oñeñandu vaieterei rupi opeka haguére térã ohasa rupi umi situasión ombohasa asyetereíva chupekuéra. Jesús heʼi vaʼekue avei ‘ovyʼaha umi ojepersegíva’ ha ojeʼéramo japu hesekuéra omoirũ rupi Crístope (Mat. 5:4, 10, 11). ¿Péro mbaʼéichapa ikatu javyʼa añete jahasáramo umichagua situasiónre?

³ Jesús ñanemboʼe vaʼekue javyʼa hag̃ua nodependeiha umi mbaʼe jahasávare, síno jahechakuaa vaʼerãha ñaikotevẽha Ñandejárare ha ñañemoag̃ui hese (Sant. 4:8). ¿Mbaʼéichapa ikatu jajapo upéva? Ko artíkulope jahecháta mbohapy mbaʼe jajapo vaʼerã javyʼa añete hag̃ua.

4. ¿Mbaʼépa pe primer mbaʼe jajapo vaʼerã javyʼa añete hag̃ua? (Salmo 1:1-3).

⁴ PRIMERO: Javyʼa añete hag̃ua tekotevẽ jalee ha jastudia  Ñandejára Ñeʼẽ. Jesús okompara voi Ñandejára Ñeʼẽ pe aliméntore. Tahaʼe peteĩ persóna térã animál, tekotevẽ oñealimenta oikove hag̃ua. Péro yvyporakuéra añoite ikatu olee Ñandejára Ñeʼẽ ha tekotevẽ voi ojapo hikuái upéva. Upéicha rupi Jesús heʼi vaʼekue: “Yvypóra noikotevẽi pan añónte oikove hag̃ua, síno oikotevẽ opaite mbaʼe Jehová heʼíva” (Mat. 4:4). Upéicharõ ndajahejái vaʼerã ohasa ni peteĩ día jaaprovechaʼỹre pe aliménto espirituál térã jaleeʼỹre Ñandejára Ñeʼẽ la Biblia. Pe salmísta heʼi vaʼekue: ‘Ovyʼa pe persóna ohayhuetereíva voi Jehová léi, ára ha pyhare olee ha ojepyʼamongeta hese’ (elee Salmo 1:1-3).

5, 6. a) ¿Mbaʼépa ikatu ñaaprende la Bíbliagui? b) ¿Mbaʼéichapa jaleéramo la Biblia ikatu ñanepytyvõ?

⁵ Jehová ñanderayhu rupi oskrivika vaʼekue la Bíbliape hetaiterei informasión iñimportantetereíva ohechaukáva mbaʼépa jajapo vaʼerã ikatu hag̃uáicha javyʼa ñande rekovépe. Avei omombeʼu ñandéve maʼerãpa jaikove. Iñeʼẽ la Biblia ohechauka avei ñandéve mbaʼéichapa ikatu ñañemoag̃ui hese, ha mbaʼe mbaʼépa jajapo vaʼerã haʼe operdona hag̃ua umi ñande pekádo. Avei omombeʼu ñandéve oĩha peteĩ esperánsa iporãitereíva amo gotyove g̃uarã (Jer. 29:11). Entéro koʼã mbaʼe ñaaprende jastudia rupi la Biblia, ha añetehápe ñanembovyʼaiterei jaikuaávo koʼã mbaʼe.

⁶ Jaikuaaháicha, la Bíbliape jatopa avei hetaiterei konsého ikatúva ideprovécho ñandéve káda día g̃uarã, ha ñamoĩramo en práktika umi konsého katuete javyʼáta. Ñañedesanima jave jahasa rupi heta provléma tekotevẽ ñañemotiempove jalee ha jajepyʼamongeta hag̃ua la Biblia heʼívare. Jesús heʼi vaʼekue: “Umi ohendúva Ñandejára ñeʼẽ ha ojapóva la ovyʼáva” (Luc. 11:28).

7. ¿Mbaʼépa ikatu nepytyvõ reñevenefisia hag̃ua relee jave la Biblia?

 ⁷ Relee jave la Biblia eñemotiémpokena rentende ha redisfruta hag̃ua pe releéva. Ñamoĩmína peteĩ ehémplo. Ñamoĩ chupe álgien okosinaha ndéve g̃uarã peteĩ tembiʼu ndegustaitereíva, péro heʼupáma rupi nde óra térã rejedistrae rupi epensávo ótra kósare, pyaʼeterei ekaru, ha upévare nderedisfrutái. Heʼupa riréma ne rembiʼu reñemeʼẽ enkuénta pyaʼeterei ekaru hague, ha embyasy nderekarúi haguére mbeguemínte ikatu hag̃uáicha redisfruta pe tembiʼu ndegustaitéva. ¿Oikómapa nderehe avei upéva relee jave la Biblia? Relee rupi pyaʼe pyaʼénte ndaikatúi redisfruta umi mbaʼe Jehová nemboʼeséva. Upévare eñemotiémpokena relee hag̃ua Ñandejára Ñeʼẽ, eñeimahina umi mbaʼe eleéva rehendurõguáicha voi umi oñeʼẽvape ha eñehaʼãmbaite ejepyʼamongeta umi mbaʼe eleévare. Rejapóramo entéro koʼã mbaʼe katuete revyʼaitereíta.

8. ¿Mbaʼéichapa “pe esklávo de konfiánsa ha iñarandúva” okumpli porã pe rresponsavilida oñenkarga vaʼekue chupe? (Ehecha avei pe nóta).

⁸ Jesús onkarga vaʼekue ‘pe esklávo de konfiánsa ha iñarandúvape’ omeʼẽ hag̃ua ñandéve aliménto espirituál hiʼoraitépe. Upévare ikatu jaʼe oñeñangareko porãitereiha ñanderehe espirituálmente (Mat. 24:45). b La Biblia haʼe pe ingrediénte prinsipál oipurúva pe esklávo de konfiánsa oprepara hag̃ua umi informasión bíblica (1 Tes. 2:13). Koʼã informasión bíblica ñanepytyvõ jaikuaa hag̃ua Jehová opensa lája. Upearã tuichaiterei avei ñanepytyvõ pe rrevísta Ñemañaha ha ¡Pepáyke!, ha umi artíkulo osẽva jw.org-pe. Avei jajeprepara umi rreunión éntre semanagua ha fin de semanaguápe g̃uarã. Ha káda mes jahecha umi prográma osẽva JW Broadcástingpe oĩramo ñane idiómape. Jalee ha jastudiáramo la Biblia ikatúta jajapo pe segundo mbaʼe añetehápe ñanembovyʼaitereítava.

9. ¿Mbaʼépa pe segundo mbaʼe tekotevẽva jajapo javyʼa añete hag̃ua?

⁹ SEGUNDO: Javyʼa añete hag̃ua tekotevẽ jajapo Jehová omandáva ñandéve. Pe salmísta oskrivi vaʼekue: “Ovyʼa entéro persóna orrespetáva Jehovápe, umi siémpre oikóva hapére” (Sal. 128:1). Jarrespeta Jehovápe heʼise ndajajaposeiha umi mbaʼe haʼe ndoguerohorýiva (Prov. 16:6). Upévare ñañehaʼãmbaite ñamboyke umi mbaʼe vai ha jajapo entéro mbaʼe Jehová omandáva ñandéve, ha koʼã mbaʼe jatopa hína la Bíbliape (2 Cor. 7:1). Ñamboykéramo entéro mbaʼe Jehovápe ombojeguarúva ha jajapóramo iporãva, katuete javyʼáta (Sal. 37:27; 97:10; Rom. 12:9).

10. Ohechaukaháicha Romanos 12:2, ¿mbaʼe rresponsavilidápa ñande jaguereko?

¹⁰ (Elee Romanos 12:2). Ikatu oime peteĩ persóna oikuaa Jehová orekoha pe autorida odesidi hag̃ua mbaʼépa oĩ porã ha mbaʼépa oĩ vai, péro avei iñeʼẽrendu vaʼerã Ñandejára mandamientokuérape. Ñamoĩmína peteĩ ehémplo: Ikatu peteĩ persóna oikuaa pe goviérno orekoha derécho omoĩ hag̃ua umi límite de velosida rrútare, péro ikatu haʼe nokumpliséi koʼã léi, upévare haʼe oho hatãve ha nopenái umi límite de velosidáre. Ñande kásope avei umi mbaʼe jajapóvare ojekuaáta ñande jagueroviaha iporãveha ñakumpli umi mbaʼe Jehová omandáva (Prov. 12:28). David oguerovia vaʼekue upéva, upéicha rupi heʼi vaʼekue Jehovápe: “Nde reikuaauka chéve mbaʼe tapérupipa aguata vaʼerã ahupyty hag̃ua jeikove opaveʼỹva. Ne renondépe che aikóta vyʼápe opa  árare, nde cheguereko rupi nde ykére” (Sal. 16:11).

11, 12. a) ¿Mbaʼe rehepa ñañatende vaʼerã ñañekevranta térã ñañedesanima jave? b) ¿Mbaʼéichapa Filipenses 4:8 heʼíva ñanepytyvõ jadesidi porã hag̃ua mbaʼéichapa jajedivertíta?

¹¹ Ñañekevranta térã ñañedesanima jave ikatu jahekase algúna diversión ñanepytyvõtava ñanderesarái hag̃ua ñane provlemakuéragui. Ha upéva ningo ndaivaíri, péro ñañatende vaʼerã ani hag̃ua jajapo peteĩ mbaʼe Jehovápe ombojeguarúva (Efes. 5:10-12, 15-17).

¹² Pe kárta apóstol Pablo oskrivi vaʼekuépe umi kristiáno Filiposguápe omokyreʼỹ chupekuéra osegi hag̃ua ojepyʼamongeta entéro mbaʼe ‘ihústovare, ipotĩvare ha ñanemomýivare japorohayhu hag̃ua’ (elee Filipenses 4:8). Pablo noñeʼẽiramo jepe koʼápe umi diversiónre, umi mbaʼe heʼi vaʼekue ikatu ñanepytyvõ jadesidi porã hag̃ua mbaʼéichapa jajedivertíta. Etanteamíntena ko mbaʼe: Ehechápa pe versíkulope oĩha pe palávra “mbaʼe”. Koʼág̃a emoĩmi ivése “purahéi”, “pelíkula”, “lívro” térã “videohuégo”. Upéicha rejapóramo nepytyvõta rehechakuaa hag̃ua mbaʼépa ogustáta Ñandejárape ha mbaʼépa ndogustamoʼãi chupe. Añetehápe ñande ñakumpliseterei Jehová mandamientokuéra (Sal. 119:1-3). Péicha ñane konsiénsia ipotĩta ha jajapóta pe tercer mbaʼe ñanepytyvõtava javyʼa añete hag̃ua (Hech. 23:1).

13. ¿Mbaʼépa pe tercer mbaʼe jajapo vaʼerã javyʼa añete hag̃ua? (Juan 4:23, 24).

¹³ TERCERO: Jajasegura vaʼerã ñamotenondépa hína Jehová adorasión ñande rekovépe. Jehová haʼe rupi ñande Apohare omerese jaadora chupe (Apoc. 4:11; 14:6, 7). Upévare ñandéve g̃uarã la iñimportantevéva haʼe vaʼerã jaadora chupe haʼe ogustaháicha. Upéva heʼise jaheja vaʼerãha ‘pe espíritu sánto ñandegia ha jasegi vaʼerã umi enseñánsa verdadéra’ (elee Juan 4:23, 24). Ñande jaipota Ñandejára espíritu ñandegia jaadora hag̃ua chupe asegún umi enseñánsa verdadéra oĩva la Bíbliape. Pe adorasión ñameʼẽva chupe haʼe vaʼerã pe iñimportantevéva ñandéve g̃uarã, jaikóramo jepe peteĩ lugár ojejoko térã ojeproivihápe ñane rembiapo. Koʼág̃arupi mas de 100 ermáno ha ermána oĩ préso haʼe haguére testígo de Jehová. c Upéicharõ jepe, haʼekuéra ovyʼaiterei ha ojapo opa ikatúva oñemboʼe, ostudia ha oñeʼẽ hag̃ua hapichápe Ñandejárare ha pe Rréinore. Oĩramo jepe ñandejaʼóva térã ñandepersegíva, ñande javyʼaiterei jaikuaávo Jehová oĩha ñanendive ha katuete ñanevendesitaha (Sant. 1:12; 1 Ped. 4:14).

14. ¿Mbaʼépa ojehu vaʼekue peteĩ ermáno imitãvape oikóva Tayikistánpe, ha mbaʼérepa?

¹⁴ Heta ñane ermáno ha ermána ohasa umi situasión ijetuʼuetereíva. Upéicharõ jepe, haʼekuéra ovyʼa ojapógui umi mbohapy mbaʼe ñaanalisa vaʼekue. Jahechamína peteĩ ermáno orekóva 19 áño ehémplo. Haʼe héra Yovidón Boboyónov ha oiko Tayikistánpe. Ndojaposéi rupi pe servísio militár, pe 4 de octubre de 2019 ojegueraha chupe hógagui ha opyta préso heta mésere, ojetrata voi chupe peteĩ delinkuénteicha. Heta médio de komunikasión oĩva diferénte paíspe heʼi upéva haʼe hague peteĩ inhustísia. Avei omombeʼu hikuái upe ermánope oñenupã hague ojapo hag̃ua peteĩ huraménto militár ha omonde hag̃ua pe unifórme. Upe rire oñekondena  ha ojegueraha chupe peteĩ lugár oñembaʼapo pohyietereihápe. Upéi pe presidénte pe paispegua oanula la ikondéna ha omanda ojelivera hag̃ua upe ermánope. Ohasa aja ko pruéva ijetuʼuetéva Yovidón osegi ifiél Jehovápe ha ovyʼa. ¿Mbaʼéicha rupípa? Pórke haʼe orrekonose siémpre odependeha Ñandejárare.

15. ¿Mbaʼéichapa Yovidón osegi oñemoag̃ui Jehováre oĩrõ guare kárselpe?

¹⁵ Oĩ aja kárselpe Yovidón osegi oaprende Jehovágui, ndorekóiramo jepe la Biblia ha ni peteĩ puvlikasión. ¿Péro mbaʼéichapa haʼe ojapo raʼe upéva? Umi ermáno ogueraha jave chupe umi provistaʼimi, oskrivi pe téxto diário umi úlere. Upéicha Yovidón ikatu kuri olee la Biblia ha ojepyʼamongeta hese káda día. Haʼe osẽrõ guare kárselgui, omeʼẽ vaʼekue ko konsého entéro umi ndohasáivape gueteri umi pruéva ijetuʼuetereíva. Haʼe heʼi: “Peaprovechapaitékena pe liverta peguerekóva koʼág̃a peñemoag̃ui hag̃ua Jehováre, ha upearã iñimportanteterei pelee la Biblia ha ñane puvlikasionkuéra”.

16. ¿Mbaʼe rehepa oñekonsentra meme vaʼekue Yovidón?

¹⁶ Ñane ermáno Yovidón iñeʼẽrendu Jehovápe ha okumpli imandamientokuéra. Haʼe noñemoĩri kuri opensa umi deséo naiporãivare ha ndojapói mbaʼeve ivaíva. Upéva rangue oñekonsentra  Jehováre ha umi mbaʼe haʼe omombaʼévare. Avei oñemotiémpo ojepyʼamongeta hag̃ua Jehová kreasión porãitére. Káda pyhareve opáyvo ohendu umi guyraʼi opurahéi, ha pyharekue katu omaña pe jasy ha umi estréllare. Haʼe heʼi: “Entéro koʼã rregálo Jehová omeʼẽva ñandéve chembovyʼa ha chemoñeñandu porãiterei”. Javyʼaiterei ningo javaloráramo entéro mbaʼe Jehová omeʼẽva ñandéve ñañemoag̃ui hag̃ua hese ha umi mbaʼe ñaikotevẽva jaikove hag̃ua. Ha upe vyʼa ñañandúva ñanepytyvõ ñaaguanta hag̃ua.

17. ¿Mbaʼéichapa 1 Pedro 1:6, 7 ikatu oipytyvõ peteĩ ohasávape Yovidón ohasa vaʼekue?

¹⁷ Yovidón avei omotenonde Jehová adorasión hekovépe. Haʼe oikuaa iñimportantetereiha osegi ifiél Ñandejára teetépe. Jesús heʼi vaʼekue: “Ñandejára Jehovápe readora vaʼerã ha chupe añoite reservi vaʼerã” (Luc. 4:8). Umi komandánte militár ha soldadokuéra oipota kuri Yovidón omboyke ijerovia. Péro haʼe oñemboʼe Jehovápe ipyʼaite guive káda día ha káda pyhare, ha ojerure osegi hag̃ua ifiél chupe. Ojetratáramo jepe chupe inhústamente, Yovidón osegi ifiél Jehovápe. Ohasapa rire entéro koʼã mbaʼe, haʼe ovyʼaiterei ijerovia ojeprováma haguére, pórke haʼe ndorekóiti kuri peichagua jerovia ojegueraha mboyve chupe kárselpe ha oñenupã mboyve. Koʼág̃a la ijerovia imbaretevéntema (elee 1 Pedro 1:6, 7).

18. ¿Mbaʼépa jajapo vaʼerã jasegi hag̃ua javyʼa?

¹⁸ Jehová oikuaa mbaʼépa ñande ñaikotevẽ javyʼa añete hag̃ua. Jasegíramo jajapo umi mbohapy mbaʼe ñaanalisa vaʼekue ko artíkulope, jasegíta javyʼa ñaneprovléma hetáramo jepe. Ha avei ikatúta jaʼe: “¡Ovyʼa pe puévlo oadoráva Ñandejára Jehovápe!” (Sal. 144:15).