1. ¿Mbaʼéichapa koʼág̃arupi la hénte ohecha umi konsého oúva la Bíbliagui? (Proverbios 1:20, 21).

 HETA paíspe jahecha mbaʼéichapa umi ñane ermanokuéra vyʼápe oñemoĩ umi lugár hetahápe hénte ha omeʼẽ umi puvlikasión bíblica umi ohasávape upérupi. ¿Ndépa repredikámava avei péicha? Oiméramo upéicha, oiméne repensámava pe heʼívare lívro de Proverbios, pe heʼihápe pe arandu hatã oñeʼẽha ikatu hag̃uáicha umi hénte ohendu ikonsého (elee Proverbios 1:20, 21). La Biblia ha ñane puvlikasionkuéra oreko pe arandu añeteguáva, pe arandu oúva Jehovágui. Koichagua arandu hína umi hénte oikotevẽva ohupyty hag̃ua vída etérna. Ñande ningo javyʼaiterei jepi oĩ jave umi ojagarráva ñane puvlikasionkuéra. Péro naentéroi ojapo upéicha. Oĩ heta umi noaprendeséiva umi mbaʼe omboʼéva la Biblia. Oĩ voi katu umi opukáva ñanderehe jajapo haguére upéicha, oimoʼãgui la Biblia ymaiterei guaremaha ha ndaideprovechoveimaha ñandéve koʼág̃arupi. Oĩ avei opensáva umi osegíva la Biblia heʼíva pe tekopotĩ rehe oñemboleietereíma ha oñemosantoha. Upéicharõ jepe, Jehová mborayhúpe omeʼẽ enterovépe pe arandu oúva chugui. ¿Mbaʼéichapa ojapo upéva?

2. ¿Moõpa koʼág̃arupi ikatu jatopa pe arandu añeteguáva, péro mbaʼépa umi hénte odesidi jepi ojapo?

² Jehová ningo oikuaauka ñandéve pe arandu añeteguáva Iñeʼẽ la Biblia rupive. Ko lívro oĩ disponívle haimete enterove persónape g̃uarã. ¿Ha mbaʼépa jaʼekuaa umi puvlikasionkuéra oñeguenohẽvare la Bíbliagui? Koʼã puvlikasionkuéra ningo oĩma mas de 1.000 idiómape. Umi olee ha omoĩva en práktika umi mbaʼe oĩva koʼã puvlikasiónpe tuichaiterei oñevenefisia. Upéicharõ jepe, oĩ heta persóna nohenduséiva pe arandu oúva Jehovágui. Upévare, odesidíta jave peteĩ mbaʼe, haʼekuéra ojerovia ijehénte térã ojerure konsého peteĩ hapichápe. Ikatu voi ñandeapoʼi hikuái ñande jajesegi haguére la Biblia heʼívare. Upévare ko artíkulope jahecháta mbaʼérepa umi hénte opensa jepi upéicha. Péro primeroite  jahecháta mbaʼéichapa ñande ikatu jahupyty pe arandu oúva Jehovágui.

3. ¿Mbaʼépa heʼise pe arandu añeteguáva?

³ Pe arandu heʼise hína jaipuruha umi mbaʼe jaikuaámava jadesidi porã hag̃ua. Upéicharõ jepe, pe arandu añeteguáva ndeʼiséi hína upévante. La Biblia heʼi: “Nearandu hag̃ua, primeroite rerrespeta vaʼerã Jehovápe, ha neentendído hag̃ua, reikuaa porã vaʼerã pe Dios Santísimope” (Prov. 9:10). Upéicharõ jadesidíta jave peteĩ mbaʼe iñimportánteva jareko vaʼerã enkuénta la Jehová opensáva, térã ‘jaikuaa porã vaʼerã pe Dios Santísimope’. Upéva ikatu jajapo jahecháramo mbaʼépa heʼi la Biblia ha umi ñane puvlikasionkuéra. Jajapóramo upéicha jahechauka hína jaguerekoha pe arandu añeteguáva (Prov. 2:5-7).

4. ¿Mbaʼérepa ikatu jaʼe Jehová añoite ikatuha omeʼẽ ñandéve pe arandu añeteguáva?

⁴ Jehová añoite ningo haʼe upe ikatúva omeʼẽ pe arandu añeteguáva (Rom. 16:27). ¿Mbaʼérepa ikatu jaʼe pe arandu añeteguáva ouha Jehovágui añoiténte? Primero, pórke Jehová okrea vaʼekue entéro mbaʼe ha haʼe oikuaa porã avei ikreasión (Sal. 104:24). Segundo, entéro mbaʼe Jehová ojapóva ohechauka haʼe iñaranduetereiha (Rom. 11:33). Tercero, umi konsého oúva Jehovágui siémpre ideprovechoiterei ñandéve ñamoĩramo en práktika (Prov. 2:10-12). Jaguerekoséramo pe arandu añeteguáva, jahechakuaa vaʼerã Jehová añoite ikatuha omeʼẽ ñandéve upéva, ha ikatuha ñandegia jadesidi térã jajapóta jave peteĩ mbaʼe.

5. ¿Mbaʼépa oiko umi hénte omboyke haguére pe arandu oúva Jehovágui?

⁵ Heta hénte jatopáva japredika jave omombaʼeterei pe kreasión ha heʼi voi ojejapo porãiterei hague. Péro haʼekuéra heʼi koʼã mbaʼe oikónte hague, ndoguerekoiha peteĩ kreadór. Oĩ avei heta persóna heʼíva ojeroviaha Ñandejárare, péro opensa la Biblia ndaideprovechoveimaha ñandéve g̃uarã pórke ymaiterei guaréma. Upévare oikóntema chupekuéra ogustaháicha. ¿Mbaʼépa oiko upe haguére? ¿Jahechápa omehoraha la situasión ko múndope umi hénte ojerovia haguére ijehénte ojerovia rangue Ñandejárare? ¿Jahechakuaápa hesekuéra ovyʼaha ha oguerekoha esperánsa? Umi mbaʼe jahecháva ñande jerére ohechauka siertoha la Biblia heʼíva: “Reñemoĩramo Jehová kóntrape ndaikatumoʼãi neentendído, ndaipóri konsého porã ni arandu ikatúva nepytyvõ” (Prov. 21:30). Jahechávo koʼã mbaʼe ñanemomýi jajerure hag̃ua pe arandu oúva chugui. Ñambyasýramo jepe, umi hénte ndojegiái pe Jehová arandúre. ¿Mbaʼérepa haʼekuéra ojapo upéicha?

6. Heʼiháicha Proverbios 1:22-25, ¿mávapa hína umi orrechasáva pe arandu oúva Jehovágui?

⁶ Heta oĩ orrechasáva pe arandu añeteguáva, nohenduséi hikuái ‘pe arandu oñeʼẽ jave pe kállere’. Heʼiháicha la Biblia oĩ tres grúpo de persóna orrechasáva pe arandu oúva Jehovágui: Umi “kuimbaʼe ndorekóiva experiénsia”, ‘umi oñembohorýva hapicháre’, ha ‘umi ivýrova’ (elee Proverbios 1:22-25). Jahechamína koʼág̃a mbaʼérepa koʼã persóna orrechasa pe arandu oúva Jehovágui ha mbaʼépa ikatu jajapo ani hag̃ua jajogua chupekuéra.

7. ¿Mbaʼérepa heta persóna odesidi oiko peteĩ ‘kuimbaʼe ndorekóivaicha experiénsia’?

⁷ Umi “ndorekóiva experiénsia” ningo oguerovia entéro mbaʼe ojeʼéva chupe ha ifásil voi oñembotavy hag̃ua chupekuéra (Prov. 14:15, nóta). Heta vése jatopa jepi umichagua persónare japredika jave. Ñapensamíntena umi persóna tuicha ombotavývare chupekuéra umi omoakãva irrelihión térã umi politikokuéra. Heta vése haʼekuéra tuicha oñemondýi oikuaa jave umi omoakãva chupekuéra ijapuha oikóvo.  Péro heʼiháicha Proverbios 1:22, umi kuimbaʼe ndorekóiva experiénsia osegise péicha ha nokambiaséi (Jer. 5:31). Umichagua ojapo la chupekuéra ogustávante ha orrechasa la Biblia heʼíva, pórke noĩséi hikuái rresponsávle umi mbaʼe ojapóvare. Heta persóna oñeñandu peteĩ kuña irrelihiósava oikóva Quebec, Canadápe oñeñanduháicha. Peteĩ ermáno opredika jave chupe, haʼe heʼi pe ermánope: “Oiméramo umi paʼi orembotavy hína, haʼekuéra la kulpávle ndahaʼéi ore”. Ajépa ndajajoguaseiete peichagua persónape, ndohechaukáiva ni michĩmi iñaranduha (Prov. 1:32; 27:12).

8. ¿Mbaʼépa ñanepytyvõta jareko hag̃ua pe arandu oúva Jehovágui?

⁸ La Biblia ningo ñanemokyreʼỹ ani hag̃ua jaiko umi ‘ndorekóivaicha experiénsia’, síno ñapensa hag̃ua peteĩ persóna okakuaapámava ojapoháicha (1 Cor. 14:20). Ñande jarekóta pe arandu oúva Jehovágui ñamoĩramo en práktika umi konsého bíblico. Mbeguekatúpe jahecháta mbaʼéichapa koʼã konsého ñanepytyvõ ani hag̃ua jaike provlémape ha jadesidi porã hag̃ua. Iporãitereíta voi ñapensáramo upévare jadesidi mboyve peteĩ mbaʼe. Oiméramo ñande jastudiáma la Biblia peteĩ tiémpore ha jaha meme rreunionhápe, iporãta ñañeporandu mbaʼérepa neʼĩra jajedesidi ñañemeʼẽ Jehovápe ha jajevautisa. Ha oiméramo jajevautisáma, ¿jasegípa hína japrogresa japredika ha ñaporomboʼe porãve hag̃ua? Umi mbaʼe jadesidívare jahechauka hína jahejápa umi konsého oĩva la Bíbliape ñandegia. ¿Jahechaukápa umi kualida porã jatrata lájare ñane ermanokuérape? Oiméramo jahechakuaa tekotevẽha ñamehora peteĩ púntope, jasegíkena umi Jehová konsého, pórke “umíva ningo omoarandu umi ndoikuaáivape mbaʼeve” (Sal. 19:7).

9. ¿Mbaʼéichapa umi oñembohorýva hapicháre ohechauka orrechasaha pe arandu oúva Jehovágui?

⁹ Pe segundo grúpo de persóna orrechasáva pe arandu oúva Jehovágui haʼe hína umi ‘oñembohorýva hapicháre’. Heta vése jatopa peichagua persónare japredika jave. Koʼãichagua ningo ovyʼa voi oñembohory jave hapicháre (Sal. 123:4). La Biblia heʼi vaʼekue voi umi ára pahápe hetataha umi oñembohorýva hapicháre (2 Ped. 3:3, 4). Ojapo haguéicha umi Lot jernokuéra, koʼág̃arupi oĩ avei heta hénte ndogueroviáiva umi mbaʼe Jehová ojapótava koʼẽrõite (Gén. 19:14). Umichagua persóna ningo oñembohory umi osegívare umi konsého oúva Jehovágui. Umi oñembohorýva hapicháre ‘ojapo umi mbaʼe vai chupekuéra ogustávante’ (Jud. 7, 17, 18). Ajépa oñembojoja porãite umi oñembohorývape hapicháre umi apóstatare ha entéro umi orrechasa vaʼekuére Jehovápe.

10. Heʼiháicha Salmo 1:1, ¿mbaʼépa ikatu jajapo ani hag̃ua oiko ñandehegui peteĩ oñembohorýva hapicháre?

¹⁰ ¿Mbaʼépa ikatu jajapo ani hag̃ua oiko ñandehegui peteĩ oñembohorýva hapicháre? Ani jajeheʼa umi ojekehávare opa mbaʼégui (elee Salmo 1:1). Upéva heʼise nañahendúi ni ndajaleéi vaʼerãha umi mbaʼe oúva umi apóstatagui. Jajedeskuidáramo ikatu ñaimoʼãʼỹre jakritikáma umi mbaʼe ojejapóva Jehová organisasiónpe. Ñañatende vaʼerã ani hag̃ua jaju mbeguekatúpe jajekeha opa mbaʼégui, ha upéicha jadudáma Jehovágui ha umi instruksión omeʼẽvagui ñandéve iñorganisasión rupive. Ani hag̃ua oiko ñanderehe upéva, iporãta ñañeporandu: “¿Chépa ajepokuaa ajekeha oĩ jave peteĩ entendimiénto pyahu, térã jarresivi jave peteĩ instruksión pyahu? ¿Ahekápa defékto umi ansianokuérare?”. Ñañehaʼãramo pyaʼemi jaipeʼa ñandejehegui koʼãichagua lája, Jehová ovyʼaitereíta ñandereheve (Prov. 3:34, 35).

11. ¿Mbaʼéichapa umi ivýrova ohecha umi léi Jehová omeʼẽva?

¹¹ Pe tercer grúpo orrechasáva pe arandu oúva Jehovágui haʼe hína ‘umi ivýrova’. Umichagua persóna ningo oñemohatã la haʼekuéra opensávapente, ndoikoséi umi Jehová léi  heʼiháicha. Upéva rangue, haʼekuéra oiko ojapo umi mbaʼe chupekuéra ogustávante (Prov. 12:15). Umichagua persóna orrechasa Jehovápe ha pe arandu oúva chugui (Sal. 53:1). Jatopa jave koʼãichagua persónare predikasiónpe, pyʼỹinte haʼekuéra okritika vai ñanderehe jaiko haguére la Biblia heʼiháicha. Koʼã persóna ningo upévante la ojapokuaáva. La Biblia heʼi voi: “Pe itavýva núnka ndaikatumoʼãi iñarandu, haʼe ndoikuaái mbaʼépa heʼíta umi hués renondépe” (Prov. 24:7). Umi ivýrova ningo ndaikatúi omeʼẽ peteĩ konsého iporãva. Upévare ndajahecharamói Jehová heʼi haguére: “Mombyry repyta vaʼerã umi itavývagui” (Prov. 14:7).

12. ¿Mbaʼépa ñanepytyvõta ani hag̃ua jaiko umi ivýrova oikoháicha?

¹² Ñande ningo ndajajoguaséi umi orrechasávape Jehová konsého. Upéva rangue ñaaprende javalora hag̃ua Jehová opensa lája ha umi ileikuéra. Ha ikatu ñamombaʼeve hína koʼã mbaʼe ñakomparávo umi mbaʼe jahupytýva ñaneñeʼẽrendúramo ha umi mbaʼe jahupytýva nañaneñeʼẽrendúiramo. Ikatu repensa por ehémplo mbaʼéichapa oiko koʼág̃arupi umi hénte nopenáiva umi konsého oúvare Jehovágui, haʼekueraite voi okausa provléma ijupe. Koʼág̃a ikatu epensami ndejehe mbaʼeichaitépa reiko porãve neñeʼẽrendu rupi Jehovápe (Sal. 32:8, 10).

13. ¿Ñandeovligápa Jehová jaasepta hag̃ua pe arandu oúva chugui?

¹³ Jehová oofrese pe arandu oúva chugui enterovépe, péro haʼe ndoovligái avavépe oasepta hag̃ua ko arandu. Upéva rangue haʼe omombeʼu ñandéve mbaʼépa oikóta umi persóna orrechasávagui pe arandu añetegua (Prov. 1:29-32). Umi odesidíva naiñeʼẽrendumoʼãiha Jehovápe, oaguantámante vaʼerã umi mbaʼe ohupytýva chupekuéra naiñeʼẽrendúi haguére Jehová konsehokuérape. Umichagua persóna ohasa asy, iprovléma heta ha amo ipahápe Jehová ohundíta chupekuéra. Péro umi iñeʼẽrendúva Jehovápe ha omoĩvape en práktika umi konsého oúva chugui, haʼe opromete voi chupekuéra: “Pe iñeʼẽrendúva chéve, oikóta pyʼaguapýpe, ndokyhyjemoʼãi ojehúramo g̃uarã chupe mbaʼeve ivaíva” (Prov. 1:33).

14, 15. ¿Mbaʼépa ñanemboʼe Proverbios 4:23 heʼíva?

¹⁴ Ñahendúramo pe arandu oúva Jehovágui, siémpre ou porãta ñandéve. Jahecháma haguéicha jajúvo ko artíkulope, Jehová oofrese iñarandu enterovéva ohupyty hag̃ua gratiete. Lívro de Provérbiospe jatopa hetaiterei konsého ñanepytyvõtava ñamehora hag̃ua ñande rekove. Jahechamína koʼág̃a 4 konsého iporãitereíva jatopáva lívro de Provérbiospe.

¹⁵ Eñatende ne korasõre. La Biblia heʼi: “Heta mbaʼére ningo reñatende vaʼerã, péro pe iñimportantevéva hína reñatende ne korasõre, pórke nde rekove odepende ne korasõre” (Prov. 4:23). Epensamína koʼág̃a mbaʼépa ñande jajapo jepi ombaʼapo porã hag̃ua ñane korasõ. Upearã iporãta jaʼu umi aliménto ideprovéchotava ñande retépe. Jajapo mimi ehersísio ha jakuida porã ñane alimentasiónre. Upéicha lénto avei ñande jajapo ñañangareko hag̃ua umi  mbaʼe jarekóvare ñane korasõme. Ñande ñañealimenta porã jaleévo káda día Ñandejára Ñeʼẽ, jastudia porãvo rreunionrã, jahávo rreunionhápe, japartisipa ñameʼẽvo ñane komentário ha ñañehaʼãvo jajapo opa ikatúva predikasiónpe. Upearã ñamboykete umi mbaʼe ikatúva ombyai umi mbaʼe ñapensáva, por ehémplo umi vyʼarã orekóva umi mbaʼe tieʼỹ ha umi júnta vai.

16. ¿Mbaʼérepa Proverbios 23:4, 5-pe heʼíva ideprovechoiterei koʼág̃arupi?

¹⁶ Eñekontenta umi mbaʼe erekomívare. La Biblia omeʼẽ ko konsého: “Ani rejopyeterei rekonsegi hag̃ua pláta ha repyta nekaneʼõiterei. Umi rrikésa ningo sapyʼaiterãnte, rejere remaña hese ha ja nderetopavéima, haʼete voi peteĩ ágila oveve ha ohóva yvágape” (Prov. 23:4, 5). Umi mbaʼerepy ningo ndaisegúroi, en kualkiér moménto ikatu japerdepa umíva. Upéicharamo jepe, umi iplátava ha imboriahúva ojepyʼapyeterei koʼág̃arupi okonsegi hag̃ua pláta. Péicha ojepyʼapy haguére hikuái, oĩ umi ojapóva peteĩ mbaʼe oheja vaíva chupekuéra ótro renondépe, ombyai pe amista orekóva ótra persónandi ha ou hasy (Prov. 28:20; 1 Tim. 6:9, 10). Péro pe arandu oúva Jehovágui ñanepytyvõ jahecha hag̃ua hendápe porã pe pláta. Upéva ñandeprotehe ani hag̃ua ñandetaryrýi ha ñanepytyvõ ñañekontenta hag̃ua umi mbaʼe jarekomívare (Ecl. 7:12).

17. ¿Mbaʼéichapa ikatu jahechauka ñanearanduha umi mbaʼe jaʼéva rupive heʼiháicha Proverbios 12:18-pe?

¹⁷ Epensa eñeʼẽ mboyve. Nañañatendéiramo umi mbaʼe jaʼévare ikatu japerhudika vai ñande rapichápe. La Biblia heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha, péro umi iñarandúva heʼíva haʼete peteĩ pohã ñanemongueráva” (Prov. 12:18). Ñande ningo siémpre jajogueraha porãta ñande rapichakuérandi ñañatendéramo ani hag̃ua ñamorasambi upérupi mbaʼépepa ojavy ñane ermanokuéra (Prov. 20:19). Ani hag̃ua operhudika ñande rapichápe umi mbaʼe jaʼéva, iporãitereíta jaleéramo la Biblia ha jajepyʼamongeta hese (Luc. 6:45). Ñande jajepyʼamongetáramo umi mbaʼe jaleévare la Bíbliape, ñane arandu “osyrýta voi peteĩ rríoicha”, ha upéva omoñeñandu porã ha omokyreʼỹta ñande rapichakuérape (Prov. 18:4).

18. ¿Mbaʼéichapa ikatu ñanepytyvõ Proverbios 24:6-pe heʼíva japredika ha ñaporomboʼe porãve hag̃ua?

 ¹⁸ Esegi umi instruksión. La Biblia omeʼẽ ñandéve ko konsého ideprovechoitereítava ñandéve: “Reho hag̃ua gerrahápe reikotevẽ peteĩ kuimbaʼe iñarandúvare ndegia hag̃ua. Oĩramo heta omeʼẽva konsého reganáta pe ñorairõ” (Prov. 24:6, nóta). Epensamína mbaʼéichapa ko konsého ñanepytyvõ japredika ha ñaporomboʼe porãve hag̃ua. Jaiko rangue japredika ha ñaporomboʼe ñandéve ñandegustaháichante, jasegi umi instruksión oñemeʼẽva ñandéve. Umi ñane rreunionkuérape jarresivi jepi umi gía ikatúva ñanembokatupyry, ñahendu mbaʼéichapa umi ermáno oguerekóva experiénsia ojapo umi diskúrso ha umi demostrasión. Koʼã mbaʼe ñanepytyvõta ñaporomboʼe porãve hag̃ua la Biblia. Avei Jehová organisasión omeʼẽ ñandéve umi erramiénta ñaikotevẽva. Por ehémplo umi puvlikasión ha vidéo oipytyvõva umi héntepe ontende porã hag̃ua la Biblia omboʼéva. ¿Ndépa reñehaʼãmbaite hína reipurukuaa hag̃ua koʼã erramiénta?

19. ¿Mbaʼéichapa nde reñeñandu Jehová omeʼẽ haguére ndéve pe arandu oúva chugui? (Proverbios 3:13-18).

¹⁹ (Elee Proverbios 3:13-18). ¡Ajépa jaagradesete ikatu haguére jatopa umi konsého ideprovechoitereíva la Bíbliape! Ha ikatu voi ñañeporandu: “¿Mbaʼépa oiko vaʼerãmoʼã chehegui heseʼỹ?”. Ko artíkulope jahecháma umi konsého ideprovechoitéva jatopáva lívro de Provérbiospe. Péro ndahaʼéi upépe añónte jatopáva, Jehová omoĩ umi konsého ideprovechoitereíva ñandéve la Biblia kompletoitépe. Upévare jajedesidíkena jaikotaha pe arandu oúva Jehovágui heʼiháicha. La majoría umi persóna ningo orrechasa pe arandu oúva Jehovágui, péro ñande ñaime segúro “pe persóna oñakarama hatãva pe arandúre ovyʼataha”.