AREKÓPE 15 áño ajevautisa, ha seis mése haguépe añepyrũ ajapo che prekursorádo auxiliár, ha un áño upe rire añepyrũ ajapo che prekursorádo rregulár. Atermina rire che koléhio, ajeofrese aservi peteĩ lugár oñekotevẽhápe opredika vaʼerã. Che avase pe siuda akakuaahaguégui ha aiko haguépe che avuélandi, ndahaʼéiva testígo de Jehová. Péro upéi pe superintendénte de sirkuíto heʼi chéve che siudápe voi oĩha heta nesesida. Apyta ambyasyeterei ahendúvo upéva, ha añehaʼã ani hag̃ua ohechakuaa cherehe mbaʼéichapa añeñandu. Chetĩndýnte ha asẽ upégui apensa hag̃ua pe superintendénte heʼi vaʼekuére chéve. Upéi haʼe pe ermána chemoirũvape predikasiónpe: “Chéverõ g̃uarã ajogua Jonáspe. Péro amo ipahápe haʼe oho kuri Nínivepe. Upéicha avei, che aservíta ojeʼehápe chéve”.

“Koʼág̃a ojapóma 4 áño aservi hague de prekursóra che vállepe. Ahechakuaa mbaʼeichaitépa ideprovécho ñahendu umi konsého oñemeʼẽva ñandéve. Añemeʼẽ enkuénta pe apensa lája haʼe hague la provléma. Péro koʼág̃a ahasa heta mbaʼe chembovyʼaitereíva. Por ehémplo, peteĩ méspente amoñepyrũ kuri 24 estúdio bíblico. Hiʼarive, che avuéla haʼéva kuri opositóra, oñepyrũ ostudia la Biblia chendive. Ndaikuaái ningo mbaʼéichapa aagradesepáta Jehovápe upévare.”

Fíjipe, peteĩ kuñakarai ostudiáva la Biblia odesidi vaʼerã oasistítapa peteĩ asambleahápe, térãpa ohóta iména pariénte kumpleáñope. Pe estudiánte ména nomoprovlémai chupe oho hag̃ua pe asambléape, upémarõ haʼe heʼi iménape ohotaha hendápe pe kumpleañohápe opáre pe asambléa. Péro pe estudiánte og̃uahẽ rire hógape, opensa porã ha ohechakuaa ojapóramo upéva, opyta vaitaha Jehová renondépe. Upémarõ odesidínte ndohói.

Upéi, pe estudiánte ména omombeʼu iparientekuérape haʼe heʼi hague hembirekópe ou hag̃ua hendapekuéra opa rire peteĩ rreunión ojapóva umi Testígo. Péro haʼekuéra heʼi chupe: “Haʼe ndoumoʼãi, pórke umi testígo de Jehová ndofestehái kumpleáño”. *

Pe estudiánte ména omombaʼe la hembireko ojapóva, pórke ohechakuaa haʼe orrespetaha la ikonsiénsia heʼíva, ha ojapoha umi mbaʼe oaprendéva la Bíbliagui. Pe kuñakarai iñeʼẽrendu rupi Ñandejárape, omoĩ ehémplo porã iménape ha avei ótrope. Upe rire, iména oñepyrũ ostudia la Biblia ha oho rreunionhápe.