1, 2. a) ¿Mbaʼépa sapyʼánte oikuaase mitãrusukuéra oservíva Jehovápe? b) ¿Mbaʼépa heʼi Ñandejára Ñeʼẽ?

GRAN BRETÁÑAPE, peteĩ ermána imitãva kompañéra de kláse, heʼi chupe: “Nde ningo haʼete la ne akã porãitereíva reguerovia hag̃ua Ñandejára oexistiha”. Alemániape, peteĩ ermáno oskrivi: “Che profesorkuéra opensa pe kreasión haʼeha kuénto reínte, ha oĩ segúro hikuái enterovéva rogueroviaha pe evolusión”. Fránciape katu peteĩ ermána imitãva heʼi: “Che profesorkuéra oñesorprende voi oĩ jave alúmno oroviáva la Biblia omboʼéva”.

² Koʼág̃arupi ningo heta persóna ndoroviái Ñandejára ñandeapo hague. Oiméramo nde peteĩ mitãrusu térã mitãkuña reservíva Jehovápe, térã reaprende hína chugui, reikuaaséne mbaʼéichapa ikatu rehechauka enterovévape Ñandejára haʼeha ñande Apohare. La Biblia ñanepytyvõ ñapensa porã hag̃ua umi mbaʼe jalee ha ñahendúvare. Avei ñanepytyvõ ñandete jadesidi hag̃ua mbaʼépa jaroviáta. Ñandejára Ñeʼẽ heʼi pe arandúre: “Upéva ndeprotehéta ha ikatúta redesidi porã”. ¿Mbaʼéichapa ndeprotehéta pe arandu? Nepytyvõta remboyke hag̃ua umi japu ha rejeroviave hag̃ua Jehováre (elee Proverbios 2:10-12).

3. ¿Mbaʼépa jahecháta ko artíkulope?

³ Ñande jaikuaa porã vaʼerã Jehovápe ikatu hag̃uáicha jajerovia  hese ñande pyʼaite guive (1 Tim. 2:4). Upévare, relee jave la Biblia térã umi puvlikasión bíblica, iporã epytaʼimi jepi ha epensa umi mbaʼe releévare. Eñehaʼãkena entende umi mbaʼe releéva (Mat. 13:23). Ko artíkulo ohechaukáta ndéve restudiáramo upéicha, retopataha heta pruéva ohechauka porãva Jehová haʼeha ñande Apohare ha la Biblia ouha chugui (Heb. 11:1).

4. a) ¿Mbaʼépepa ojojogua umi oroviáva pe kreasión ha umi oroviáva pe evolusión? b) ¿Mbaʼépa enterovéva jajapo vaʼerã?

⁴ Ikatu ningo oĩ heʼíva ndéve: “Che aguerovia pe evolusión pórke umi sientífiko heʼi siertoha. ¿Ha nde piko mbaʼéicha regueroviáta Ñandejára oexistiha, si avave núnka ndohecháiva chupe?”. Heta persóna ningo opensa péicha. Ha añetehápe ningo ndaipóri umáno ohecháva Ñandejárape, ni haʼe okreárõ guare peteĩ mbaʼe (Juan 1:18). Péro umi oroviáva pe evolusión, ogueroviánte avei peteĩ mbaʼe ndohecháiva. ¿Mbaʼérepa jaʼe upéva? Pórke ni peteĩ sientífiko, ni ótra persóna arakaʼeve ndohecháiva peteĩ ser vívo oevolusionaha. Por ehémplo, ndaipóri ohecháva peteĩ tejúgui oikoha jagua, térã peteĩ kaʼígui oikoha umáno (Job 38:1, 4). Enterovéva ñahesaʼỹijo porã vaʼerã umi mbaʼe ojeʼéva jahecha hag̃ua siértopa, ha jadesidi mbaʼépa jagueroviáta. Heta persóna ostudia pe naturalésa, ha oñemeʼẽ enkuénta Ñandejára oexistiha. Oiko hesekuéra Romanos 1:20 heʼíva: “Ndaikatúiramo jepe ojehecha Ñandejárape, ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára, upévare haʼekuéra ndaikatúi onega Haʼe oĩha”.

5. ¿Mbaʼe erramiéntapa ñanepytyvõ jaikuaave hag̃ua pe kreasióngui?

⁵ Ñamaña jave pe naturalésare ha ñapensávo hese, jahechakuaa entéro mbaʼénte ojejapo porãiterei hague. “Jajeroviágui jahechakuaa” oĩha peteĩ Apohare, ndajahecháiramo jepe chupe. Ñañemeʼẽ enkuénta iñarandu ha ipyʼaporãitereiha (Heb. 11:3, 27). Ñande ikatu avei ñaaprendeve jaleévo umi sientífiko odeskuvri vaʼekue. Heta mbaʼe haʼekuéra odeskuvríva, Jehová organisasión omoĩ umi erramiénta oguenohẽvape ñandéve g̃uarã. Por ehémplo, pe vidéo Las maravillas de la creación , umi folléto Obra de un Creador ha El origen de la vida,  ha pe lívro ¿Existe un Creador que se interese por nosotros? Heta vése rrevísta ¡Despertad! oentrevista umi sientífikope térã ótra persónape, ha omombeʼu hikuái mbaʼérepa koʼág̃a ojerovia Ñandejárare. Avei, pe seksión “¿Casualidad o diseño?” omyesakã heta mbaʼe umi animál ha pe naturalésagui, ha ohechauka umi sientífiko okopiaha chugui idiséño térã ombaʼapo lája.

6. ¿Mbaʼéichapa nepytyvõkuaa umi puvlikasión?

⁶ Peteĩ ermáno Estados Unidosgua orekóva 19 áño, olee umi mokõi folléto ñamensionáva pe ótro párrafope, ha heʼi: “Chepytyvõiterei ningo. Heta vésema astudia”. Peteĩ ermána Franciagua oskrivi: “Káda ke alee umi artíkulo ‘¿Casualidad o diseño?’, añesorprende apytávo. Ohechauka mbaʼéichapa umi inheniéro ivalevéva jepe oñehaʼã okopia pe naturalésa, péro arakaʼeve ndohupytymoʼãi Jehová kreasiónpe”. Sudáfricape katu, peteĩ mitãkuña de 15 áño tuakuéra heʼi: “Lo primero ore família oleéva osẽ jave ¡Despertad! haʼe hína pe seksión hérava ‘Entrevista’”. Añetehápe ningo koʼã puvlikasión tuichaiterei nepytyvõkuaa. Ohechaukáta ndéve heta pruéva oexistiha peteĩ Apohare, ha nepytyvõta rehechakuaa ha remboyke hag̃ua umi enseñánsa japu. Hiʼarive rejeroviavéta, ha ejoguáta peteĩ yvyramáta hapo pypukúvape ogueropuʼakáva umi yvytu atã (Jer. 17:5-8).

7. ¿Mbaʼérepa Jehová oipota reipuru ne arandu?

⁷ Ndaivaíri reñeporandu mbaʼérepa reguerovia la Biblia omboʼéva. Jehová ndoipotái rejapo upéva ojeʼégui reínte ndéve. Oipota guei reipuru ne “arandu” rentende hag̃ua Iñeʼẽ, ha retopa hag̃ua umi pruéva ohechaukáva la Biblia ouha chugui. ¿Mbaʼérepa Jehová oipota rejapo upéva? Pórke amáske reikuaave la Biblia omboʼéva, rejeroviavéta Iñeʼẽre (elee Romanos 12:1, 2 ha 1 Timoteo 2:4). Péro, ¿mbaʼéichapa ikatu reikuaave la Biblia omboʼéva? Por ehémplo, reelehikuaa peteĩ téma ndegustavéva, ha ehesaʼỹijo upéva.

8, 9. a) ¿Mbaʼe témapa ostudiase jepi algúno? b) Emombeʼu mbaʼéichapa oñevenefisia umi ermáno ojepyʼamongeta rupi la oleévare.

⁸ Oĩ persóna ostudiasetereíva umi profesía bíblica. Ótro katu okompara la Biblia heʼíva umi sientífiko, arkeólogo ha istoriadorkuéra heʼívare. Epensamína Génesis 3:15-re. Jehová omeʼẽ kuri ko profesía iñimportantetéva Adán ha Eva opuʼãrõ guare hese ha igoviérnore. Kóva haʼe pe primera profesía omombeʼúva Ñandejára Rréino ohechaukataha Jehová añoite ogoverna vaʼerãha ko univérso. Avei, ko profesía ohechauka pe Rréino rupive ojepeʼapaitetaha opa mbaʼe oporombohasa asýva. ¿Mbaʼéichapa ikatu restudia Génesis 3:15-pe heʼíva? Ñepyrũrã eanota umi ótro téxto omombeʼúva algún detálle ko profesíagui. Upéi einvestiga arakaʼépa ojeskrivi umi versíkulo, ha emoĩ en órden. Rejapóvo péicha, rehechakuaáta umi eskritór bíblico ndoikói hague la mísma épokape. Upéicharõ jepe, káda uno oipytyvõ hesakãve hag̃ua ohóvo pe profesía oĩva Génesis 3:15-pe. Rejapo rire koʼã mbaʼe, rehechakuaáta Jehová oipuru hague ijespíritu sánto ogia hag̃ua umi eskritórpe (2 Ped. 1:21).

⁹ Peteĩ ermáno Alemaniagua ohechakuaa káda lívro oĩva la Bíbliape omeʼẽha detálle oñeʼẽva Ñandejára Rréinore. Ha upéva osorprende chupe pórke la Biblia oskrivi vaʼekue 40 kuimbaʼérupi. Koʼãva apytégui oĩ oikóva diferénte épokape, ha hiʼarive ni ndojokuaái hikuái. Peteĩ ermána Australiagua ostudia aja peteĩ artíkulo osẽ vaʼekue Ñemañaha 15 de diciembre de 2013-pe, ohechakuaa pe Páskua, pe profesía oĩva Génesis 3:15-pe ha pe Mesías ojojoguaha heta mbaʼépe. Haʼe oskrivi: “Ko artíkulo chepytyvõ avaloraiteve hag̃ua Jehová ojapo vaʼekue peteĩ vuéltape umi israelita rehehápe. Haʼe ojerure chupekuéra ojapo hag̃ua  pe Páskua, ha upéi upéva oñekumpli Jesúsre. Astudia aja ko párte ajepyʼamongeta, ha ahechakuaa mbaʼeichaitépa iñimportánte la oiko vaʼekue upérõ. Añetehápe cheimpresiona la Jehová ojapo vaʼekue”. ¿Mbaʼérepa ko ermána oñeñandu péicha? Pórke ojepyʼamongeta upe oleévare, péicha rupi ontende la heʼiséva. Koʼã mbaʼe oipytyvõ pe ermánape omombareteve hag̃ua ife ha oñemoag̃uive hag̃ua Jehováre (Mat. 13:23).

10. ¿Mbaʼépa ikatu nepytyvõ rejeroviave hag̃ua la Bíbliare?

¹⁰ ¿Mbaʼépa nepytyvõta avei rejeroviave hag̃ua la Bíbliare? Nemanduʼa vaʼerã umi kuimbaʼe oskrivi vaʼekue la Biblia ipyʼaguasu hague, ha núnka ndaijapúi. Upe tiémpope, umi eskritór omoʼã jepi umi mbaʼe vai oikóva hetãme ha ojapóva igovernantekuéra. Péro Jehová profetakuéra ndaupéichai vaʼekue. Haʼekuéra ndoikói omombeʼu umi mbaʼe porãnte ojapóva umi israelita ha igovernantekuéra (2 Crón. 16:9, 10; 24:18-22). Avei omombeʼu haʼekuéra voi ofalla jave ha ambue Ñandejára siérvo (2 Sam. 12:1-14; Mar. 14:50). Peteĩ ermáno imitãva Gran Bretañagua heʼi: “Añetehápe peichagua persóna iñonéstova, ndajajuhúi oimeháme. Upévare, che ajeroviaiterei voi la Biblia ouha Jehovágui”.

11. ¿Mbaʼérepa jaʼekuaa la Biblia ouha Jehovágui?

¹¹ Jasegi jave umi konsého oĩva la Bíbliape oho porãve ñandéve, ha upéva ohechauka porã ouha Ñandejáragui (elee Salmo 19:7-11). Peteĩ ermána imitãva Japongua, oskrivi: “Che família osegi la Biblia heʼíva, ha upéva chembovyʼaiterei. Ore rojoayhu, rojogueraha porã ha roiko pyʼaguapýpe”. Añetehápe, la Biblia oipytyvõma heta persónape ohechakuaa hag̃ua orovia hague oikóvo heta japu (Sal. 115:3-8). Avei oipytyvõ chupekuéra ojerovia hag̃ua Ñandejára Ipuʼakapávare. Heta hénte opensa Ñandejára ndoexistiriha, chupekuéra g̃uarã pe naturalésa haʼete peteĩ dios. Ótro katu orovia yvyporakuéra osolusionataha umi provléma jaiko porãve ha javyʼave hag̃ua. Péro ñapensáramo umi mbaʼe ojapómava koʼág̃a peve, ndajahechamoʼãi mbaʼeveguasu. La Biblia añoite ikatu opromete ñandéve heta mbaʼe porã (Sal. 146:3, 4).

12, 13. ¿Mbaʼéichapa ikatu emorrasona nde rapichápe reñeʼẽ jave pe kreasión ha la Bíbliare?

¹² Eñeʼẽ jave ótra persónandi pe kreasiónre térã la Bíbliare, eñehaʼã eaverigua raẽ mbaʼépa oguerovia. Oĩ oroviáva pe evolusión ha avei okree Ñandejára oexistiha. Koʼãichagua persóna opensa Ñandejára oipuru hague pe evolusión okrea hag̃ua opa mbaʼe oikovéva. Ótro katu ojerovia pe evolusiónre pórke oñemboʼe eskuéla ha kolehioháre. Oĩ avei ndojeroviavéiva Ñandejárare pórke odesepsiona chupe umi rrelihión. Opa umívare, reñeʼẽ jave peteĩ persónandi eporandu raẽ chupe mbaʼépa orovia ha mbaʼérepa. Rejapysaka porãramo hese, haʼe ikatu avei nerendu porã (Tito 3:2).

¹³ ¿Mbaʼépa ikatu rejapo oĩramo oñembohorýva nderehe rejerovia haguére Ñandejárare? Nderrespetuóso vaʼerã, ha ejerure chupe toexplika ndéve mbaʼéichapa haʼe opensa oñepyrũ hague oexisti entéro mbaʼe oikovéva. Ikatu ere chupe oiméramo pe evolusión siérto hína, pe primera sélula oaparese vaʼekue tekotevẽta hague oñemultiplika. Peteĩ profesór de kímika heʼi oñekotevẽha heta mbaʼe oiko hag̃ua upéva. Por ehémplo, pe ADN oreko vaʼerã informasión okontrola hag̃ua mbaʼéichapa okakuaáta pe sélula ha mbaʼe fórmapa orekóta upe rire. Avei oreko vaʼerã kapasida okonsegi ha oipuru hag̃ua enerhía, ha umícha. Ko profesór heʼi avei: “Ñanesorprende jahechávo mbaʼéichapa peteĩ sélula jepe oikotevẽ hetaiterei mbaʼe ombaʼapo porã hag̃ua”.

14. Reñeʼẽ jave pe kreasiónre, ¿mbaʼéichapa ikatu remyesakã de fórma sensílla?

 ¹⁴ Reñeʼẽ jave pe kreasiónre, ikatu remyesakã upe téma isensilloveháicha, Pablo ojapo haguéicha. Haʼe heʼi: “Añetehápe, entéro óga oreko ijapohare, péro Ñandejára hína opa mbaʼe apohare” (Heb. 3:4). Jaikuaaháicha, peteĩ óga ningo ndaikatúi ojeaparesénte ijehegui rei, oĩmante vaʼerã peteĩ ojapo vaʼekue. Umi ser vívo ningo ijetuʼueteve ojejapo hag̃ua peteĩ ógagui, upévare oĩmante vaʼerã peteĩ okrea vaʼekue. Reñeʼẽ jave pe kreasiónre, ikatu avei reipuru ñane puvlikasionkuéra. Peteĩ ermána oñeʼẽ peteĩ mitãrusu ndojeroviáivandi Ñandejárare, ha omeʼẽ chupe umi mokõi folléto ñamensiona vaʼekue párrafo 6-pe. Una semána upe rire, pe mitãrusu heʼi: “Koʼág̃a ajeroviáma Ñandejárare”. Ko mitãrusu oñepyrũ ostudia la Biblia ha tiémpo rire ojevautisa.

15, 16. a) ¿Mbaʼépa iporã reikuaa reexplika mboyve ótrope la Biblia ouha Ñandejáragui? b) ¿Mbaʼéguipa nanderesaráiri vaʼerã?

¹⁵ ¿Mbaʼépa ikatu ere peteĩ persóna odudávape la Biblia ouha Ñandejáragui? Jaʼéma haguéicha, ñepyrũrã ikatu eporandu chupe mbaʼépa orovia, ha upéi eñehaʼã eaverigua mbaʼe témapa ointeresa chupe (Prov. 18:13). Oñeinteresárõ umi téma sientífikore, ikatu eipuru umi ehémplo ohechaukáva la Biblia núnka ndojavyiha oñeʼẽ jave koʼã témare. Ogustáramo chupe pe istória, ikatu emensiona peteĩ suséso oñemombeʼúva umi lívro de istóriape, ha ere la Biblia oñeʼẽma hague upévare heta tiémpo oiko mboyve. Sapyʼánte oĩta nerendusétava remombeʼúrõ chupe la Biblia ñanepytyvõha javyʼave hag̃ua. Por ehémplo, emensionakuaa unos kuánto konsého Jesús omeʼẽ vaʼekue pe Sermón del Móntepe.

¹⁶ Aníkena nderesarái naiporãiha rejodiskuti nde rapichándi. Ñande jaipota umi hénte ovyʼa oñemongetávo ñanendive ha oaprendévo la Bíbliagui. Upévare, eñeʼẽkena kon rrespéto embaʼeporandu jave chupe, ha ejapysaka porã hese. Emyesakã porãnte chupe umi mbaʼe regueroviáva. Upéva koʼýte iñimportánte pe persóna ijedavérõ ndehegui. Rejapóramo péicha, ifasilvéta chupe nderrespeta hag̃ua, ha ndeguerohorýta ndesério haguére nemitãramo jepe. Péro oĩrõ ojodiskutisénteva térã oñembohoryséva nderehe, natekotevẽi resegi reñeʼẽ hendive (Prov. 26:4).

17, 18. a) ¿Mbaʼéichapa ikatu rejeroviave la Bíbliare? b) ¿Mbaʼépa jahecháta pe ótro artíkulope?

¹⁷ Katuete ningo nde reikuaáma umi mbaʼe iñimportantevéva omboʼéva la Biblia. Péro rejapove vaʼerã peteĩ mbaʼe ikatu hag̃uáicha imbarete nde jerovia. Einvestiga vaʼerã retopa hag̃ua umi enseñánsa hypyʼũvéva oĩva Ñandejára Ñeʼẽme, ku rehekarõguáicha pláta yvyguy (Prov. 2:3-6). ¿Mbaʼéichapa ikatu rejapo upéva? Releepaite vaʼerã la Biblia. Ndaipóri ótra kósa nepytyvõvétava upévagui remombarete hag̃ua nde jerovia. Ikatu voi reñehaʼã releepaite un áñope. Peteĩ superintendénte de sirkuíto ojapo vaʼekue upéva imitãrõ guare, ha oipytyvõiterei chupe oñemoag̃uive hag̃ua Jehováre. Haʼe omombeʼu: “Aleepa rire la Biblia kompletoite, aĩve segúro ko lívro ouha Ñandejáragui. Avei, upépe ae antende umi istória aaprende vaʼekue chemitãme”. Ha nde, ¿mbaʼépa ikatu avei rejapo? Ikatu reipuru umi erramiénta omeʼẽva Jehová organisasión rentende porãve hag̃ua umi mbaʼe releéva. Por ehémplo, ikatu reipuru Watchtower Library, pe VIVLIOTÉKA OĨVA INTERNÉTPE Watchtower, Índice de las publicaciones Watch Tower, térã pe Gía oipurúva testígo de Jehová otopa hag̃ua informasión.

¹⁸ Peẽ sy ha túa, pemboʼékena pene famíliape oikuaave hag̃ua Jehovápe. Ndaipóri ótra persóna ojapo porãvétava upéva pendehegui. Pe artíkulo oúvape jahecháta mbaʼéichapa tuakuéra ikatu oipytyvõ ifamíliape ojeroviave hag̃ua Jehováre.