ÁÑO 1935-perupi che túa ha che sy hérava James ha Jessie Sinclair ova Nueva Yórkpe, peteĩ lugár héravape Bronx. Upépe oikuaa hikuái Willie Snéddonpe, ou vaʼekue Escóciagui che túa umíaicha. Ojokuaáre voi hikuái oñemongetáma ihentekuérare. Koʼã mbaʼe oiko kuri dos áñorupi che anase mboyve.

Mama omombeʼu Wílliepe itúa ha iñermáno majór omano hague mar del Nórtepe, oñepyrũ mboyvemi pe primera gérra mundiál. Pe várko peskéro oĩ haguépe hikuái ombeti peteĩ vómba oĩvare pe márpe. Upépe Willie osẽ heʼi chupe: “Nde túa oĩ infiérnope”. Willie ningo testígo de Jehová ha péicha oñepyrũ vaʼekue opredika mamáme.

Ndogustaiete kuri mamáme la Willie heʼíva pórke haʼe oikuaa porã itúa haʼe hague peteĩ karai ivuénova. Upémarõ Willie heʼi chupe: “¿Reñeñandu porãvénepa haʼérõ ndéve Jesús avei oho hague infiérnope?”. Upépe mama imanduʼa peteĩ ñemboʼe oaprende vaʼekuére irrelihiónpe hérava “Creo en Dios Padre”. Upe ñemboʼe heʼi peteĩ pártepe Jesús oho hague infiérnope ha tres día rire opuʼã jey hague. Upéicha rupi mama oñeporandu mbaʼérepa Jesús oho rakaʼe upépe siéndo ke umi iñañávante la ohóva infiérnope osufri hag̃ua pe tata rendýpe. Upéva ombokuriósa chupe ha oikuaasevéma voi umi mbaʼégui. Haʼe oñepyrũ oasisti umi rreuniónpe kongregasión de Brónxpe, ha 1940-pe ojevautisa.

Upe tiémpope ndojeʼeguasúi vaʼekue tuakuéra ostudia vaʼerãha la Biblia ifamíliandi. Che michĩʼíme papa opyta vaʼekue oñatende cherehe mama oho aja rreunionhápe térã osẽ aja opredika fin de semanakue. Tiémpo riremi, papa ha che roñepyrũ avei roho rreunionhápe hendive. Mama ningo opredika meme vaʼekue ha oreko voi heta estudiánte. Sapyʼánte ombyaty unos kuánto oikóvape ag̃ui ojuehegui ha ombostudia chupekuéra oñondivepa. Chevakasión jave eskuélape, asẽmi vaʼekue mamándi predikasiónpe. Upévare heta mbaʼe aaprende la Bíbliagui ha mbaʼéichapa amboʼe vaʼerã ótrope umi mbaʼe aaprendéva.

Ambyasýramo jepe, chemitãme ndahaʼéi vaʼekue la amombaʼetereíva umi mbaʼe  aaprendéva la Bíbliagui. Napensaguasúi pe añeteguáre. Péro arekópe 12 áño oiko chehegui puvlikadór ha upe guive apredika meme. Akumpli rire 16 áño añemeʼẽ Jehovápe. El 24 de julio de 1954 ajevautisa peteĩ asambléape Toróntope (Canadá).

Oĩ mimi kuri ore kongregasiónpe umi ermáno ombaʼapóva Betélpe térã umi ojapo vaʼekue upéva anteve. Hetaiterei mbaʼe aaprende chuguikuéra. Por ehémplo chegustaiterei ningo mbaʼéichapa ojapokuaa hikuái diskúrso ha ikatupyry oexplika hag̃ua umi mbaʼe oĩva la Bíbliape. Che profesorkuéra oipota vaʼekue aike fakultápe, che katu Betélpente voi ahase. Upéicha rupi antrega che solisitu aha hag̃ua Betélpe, pe asambléa oiko vaʼekuépe Toróntope. Upéi, 1955-pe antrega jey ótra solisitu peteĩ asambléa aha haguépe Estádio de los Yánkeespe, Nueva Yórkpe. Tiémpo riremi, arekórõ guare 17 áño, añeinvita ambaʼapo hag̃ua Betel de Broóklynpe, ha añepyrũ el 19 de septiembre de 1955. Che segundo día de traváhope aha pe tallér de enkuadernasiónpe opytáva kálle Ádamspe número 117, ha upe día guive ambaʼapo upépe. Tiémpo riremi, amaneháma pe mákina ojagarráva 32 páhina de lívro ikatu hag̃uáicha ótra mákina omboyvy oiko hag̃ua chugui la lívro.

Un mésrupi ambaʼapo pe tallér de enkuadernasiónpe, ha upéi añemondo pe Departaménto de Suskripsiónpe pórke aipurukuaa mákina de eskrivír. Upérõ guare, oĩ jave ojesuskrivi pyahúva orresivi hag̃ua Ñemañaha ha ¡Despertad!, umi ermáno ha ermána ombaʼapóva upe departaméntope oskrivi umi suskriptór pyahu direksión peteĩ chapitaʼíre. Unos kuánto mése rire, ahasa Departaménto de Envíospe. Pe ermáno omoakãva upépe, hérava Klaus Jensen, oporandu chéve añanimápa aipytyvõ  pe choférpe oraha hag̃ua puérto peve umi káha de literatúra oñemondótava ótro tetãme. Ojegueraha vaʼerã avei ofisína de korréospe umi vólsa de rrevísta, ikatu hag̃uáicha oñemondo umi kongregasión Estados Unidosguápe. Ermáno Jensen heʼi chéve ojapo porãtaha cherehe ambaʼapo pohyivéramo, pórke che ningo che pirueterei, 57 kílonte voi areko. Pe traváho ajapóva chemombareteve, ha amo ipahápe oiko ermáno Jensen heʼi hagueichaite.

Pe Departaménto de Suskripsión orresivi avei umi pedído de rrevísta oúva umi kongregasióngui. Broóklynpe oñeimprimi umi rrevísta heta idiómape, ha ambaʼapo rupi upépe aikuaa heta idióma réra. La majoría umi idióma ni ndaikuaáiva oĩha, ha avyʼaiterei oñemondo haguére atyra rrevísta umi lugár mombyryvehápe jepe. Upe tiémpope, ni nañeimahinái tenonde gotyove arekotaha pe priviléhio avisitávo umi lugár.

Áño 1961-pe añeasigna ambaʼapo hag̃ua Tesoreríape ha upe tembiapo omoakã ermáno Grant Suiter. Dos áñorupi upe rire, ermáno Nathan Knorr cherenoika iñofisínape, haʼe odirihi la óvra upe tiémpope. Ermáno Knorr heʼi chéve peteĩ ermáno ombaʼapóva hendive noĩmoʼãiha un mes, pórke oasistíta pe Eskuéla del Ministério del Rréinope ha ou rire ombaʼapóta Departaménto de Servísiope. Upévare ojerure chéve ambaʼapo hag̃ua hendaguépe ermáno Don Adams ndive. Ermáno Adams ningo la oasepta vaʼekue che solisitu aike hag̃ua Betélpe pe asambléarõ guare, áño 1955-pe. Ermáno Robert Wallen ha ermáno Charles Molohan ombaʼapóma voi kuri ermáno Adams ndive, ha los kuátro rombaʼapo oñondive mas de 50 áño. Heta adisfruta vaʼekue aservi rupi koʼã ermáno ifiél ha ijespirituálvandi (Sal. 133:1).

Áño 1970 guive añeasigna aha hag̃ua káda uno o dos áño avisita hag̃ua umi sukursál de  la sosieda Watch Tower. Koʼã visítape oñehenói vaʼekue visíta de sóna. Avisita vaʼerã amokyreʼỹ hag̃ua umi família Betel ha misionerokuérape, avei arrevisa vaʼerã umi archívo oĩva umi sukursálpe. Avyʼaiterei ningo ikatu haguére umi visítape aikuaa umi ermáno oasisti vaʼekuépe umi primera kláse Eskuéla de Galaádpe. Ahecha mbaʼéichapa umi misionéro heta tiémporema oservi fiélmente iñasignasiónpe. Avisita vaʼekue mas de 90 tetã kómo superintendénte de sóna. Péva haʼe vaʼekue peteĩ priviléhio amombaʼetereíva.

Entéro umi betelíta oservíva Broóklynpe oñeasigna vaʼekue umi kongregasión oĩvape upe sónape, che añeasigna Brónxpe. Upéi pe kongregasión okakuaa ha ojedividi. Pe kongregasión ypykuépe oñehenói Upper Bronx, ha che aha upépe.

Áño 1965-perupi, ova ore kongregasiónpe peteĩ família ou vaʼekue Letóniagui. Haʼekuéra oñepyrũ vaʼekue ostudia la Biblia sur gotyo Brónxpe. Livija, haʼéva pe tajýra ypykue, oservi kómo prekursóra otermina guive ikoléhio. Tiémpo riremi ova Massachúsettspe, oservi hag̃ua peteĩ lugár oñekotevẽvehápe opredika vaʼerã. Che ningo askrivími chupe amombeʼu hag̃ua umi mbaʼe porã ojehupytýva kongregasiónpe. Haʼe katu omombeʼu chéve umi experiénsia porã ohasáva opredikávo Bóstonpe.

Unos kuánto áño upe rire, Livíjape oñenombra prekursóra espesiál. Haʼe ningo ojapose ikatúva guive Jehová servísiope, upévare omondo isolisitu oservi hag̃ua Betélpe, ha oñeinvita chupe áño 1971-pe. Haʼetévaicha voínte Jehová oindikáva chéve álgo. El 27 de octubre de 1973 romenda, ermáno Knorr ojapo oréve pe diskúrso ha romombaʼeterei upéva. Proverbios 18:22 heʼi: “Ovyʼaiterei pe kuimbaʼe ojuhúva peteĩ kuña ivuénava hembirekorã. Jehová oguerohory ha ovendesi chupe”. Upéva siertoite, Jehová hetaitereíma orevendesi, ha mas de 40 áñoma aservi che rembirekóndi Betélpe. Avei rosegi roasisti peteĩ kongregasión oĩvape Brónxpe.

Añetehápe ningo avyʼaiterei ikatu haguére ambaʼapo ermáno Knorr ndive. Haʼe ningo ombaʼapo meme pe añetegua rehehápe, ha omombaʼeterei vaʼekue misionerokuérape. Umi misionéro ningo la omoñepyrũ vaʼekue pe óvra heta pártepe. Áño 1976-pe, ermáno Knorr oikuaa orekoha kánser, ijetuʼueterei ningo chéve ahechárõ guare chupe mbaʼéichapa osufri. Peteĩ oportunidápe, haʼe oĩ hína kuri hupápe, ha ojerure chéve alee hag̃ua chupe peteĩ informasión oñeimprimítava. Heʼi avei chéve ahenoimi hag̃ua ermáno Frederick Fránzpe, haʼe avei ohendu hag̃ua. Upe rire aikuaa ermáno Knorr peteĩ tiémporema oleémi hague ermáno Fránzpe umi informasión osẽtava, pórke haʼe ndohechaporãvéima.

Ermáno Knorr omano 1977-pe. Entéro umi roikuaa vaʼekue ermáno Knórrpe rohayhueterei  chupe, ha orekonsola haʼe ikatu haguére okumpli fiélmente iservísio ko yvy ape ári (Apoc. 2:10). Upe rire, ermáno Franz opyta hendaguépe odirihi hag̃ua pe óvra.

Upérõ che aservi kómo sekretário ermáno Milton Hénschelpe. Haʼe ombaʼapo vaʼekue hetaiterei áñore ermáno Knorr ndive. Ermáno Henschel heʼi chéve upe guive aipytyvõvetaha ermáno Fránzpe haʼe oikotevẽvape. Heta vése alee ermáno Fránzpe umi informasión oñeimprimítava. Haʼe ningo iñakã porãiterei, imanduʼa porãiterei voi entéro mbaʼére, avei ñanesorprende mbaʼéichapa oñekonsentra umi informasión ojeleévare chupe. Avyʼaiterei ikatu haguére aservi chupe péicha, otermina peve iservísio ko yvy ape ári 1992-pe.

Che sy ha che túa ifiél vaʼekue Jehovápe omano meve ha hiʼãitereíma chéve ahecha jey chupekuéra pe múndo pyahúpe (Juan 5:28, 29). Ojapóma 61 áño aservi hague Betélpe, pyaʼeterei ningo ohasa pe tiémpo. Ko múndope ndaipóri mbaʼeve ikatúva ambojoja pe priviléhio guasuete arekóvare aservívo ñane ermanokuérape umi kuimbaʼe ha kuña ifiélvandi. Livija ha che orepyʼaite guive roʼekuaa umi áño roservívape de tiémpo kompléto roñanduha “pe vyʼa Jehová omeʼẽva”, ha upéva oreprotehe (Neh. 8:10, TNM).

Ñandejára Rréino ojesegíta ojepredika toiko la oikóva, ha upéva nodependéi yvyporakuérare. Añeñandu porãiterei ningo areko haguére pe priviléhio ambaʼapóvo hetaite ermáno ha ermána ifiélvandi. La majoría umi unhído ambaʼapo vaʼekuéndi ymave, koʼág̃a noĩvéima ko yvy ape ári. Péro aagradeseterei ikatu haguére aservi Jehovápe koʼã ermáno ifiél ha ijespirituálvandi.