1, 2. a) ¿Mbaʼépa oiko oĩ rupi ndojejokokuaáiva? b) ¿Mbaʼérepa koʼág̃arupi oĩ hetaite ndojejokokuaáiva?

IÑIMPORTANTETEREI ningo jajejokokuaa ha Jehová ikatu ñanepytyvõ upearã (Gál. 5:22, 23). Ndaipóri haʼéicha ojejokokuaáva, ñandéve katu ijetuʼu upéva pórke ñaneimperfékto. Ko múndope oĩ hetaiterei provléma umi hénte ndojejokokuaái rupi. Por ehémplo oĩ ombotapykuéva umi mbaʼe iñimportantevéva, norrendíri itraváhope, térã oho vai chupe eskuélape. Avei heta hénte ndojejokokuaáigui oporotrata vai, ikaʼu, iviolénto, ojedivorsia, odevepa, oreko vísio vai, oho kárselpe, oñedeprimi, hyeguasu rei térã ojagarra chupe mbaʼasy vai hekovai haguére (Sal. 34:11-14).

² Jahechaháicha, umi ndojejokokuaáiva oike heta akãrasýpe ha omoprovléma avei ótrope. Amáske jaha hese hetavéntema oĩ umi ndojejokokuaáiva. Ñande ndajahecharamói upéva pórke la Biblia heʼíma vaʼekue voi koʼã “ára pahápe” umi hénte ndojejokokuaamoʼãiha (2 Tim. 3:1-3).

3. ¿Mbaʼérepa tekotevẽ jajejokokuaa?

³ ¿Mbaʼérepa tekotevẽ jajejokokuaa? Primero, pórke umi persóna ojejokokuaáva saʼive iprovléma. Ifasilve chupekuéra ojogueraha porã hag̃ua hapichándi, ojehekýi umi situasión ikatúvagui ombopochy, oipyʼapy térã odeprimi chupe. Segundo, tekotevẽ jajejokokuaa ñamboyke hag̃ua  umi deséo vai ha umi tentasión, péicharõmante Ñandejára ñandeguerohorýta. Adán ha Eva ndojapói kuri upéva, ha upéicha rupi opeka (Gén. 3:6). Koʼág̃a avei, heta persóna ohasa asyeterei ndojejokokuaái rupi.

4. ¿Mbaʼépa ikatu ñanepytyvõ ijetuʼúramo ñandéve jajejokokuaa hag̃ua?

⁴ Jehová ndahesaráiri ñaneimperfektoha ha ontende ijetuʼuha ñandéve jajejokokuaa hag̃ua. Haʼe ñanepytyvõse ikatu hag̃uáicha ñamboyke umi deséo vai (1 Rey. 8:46-50). Jehová ningo ñane amígo ha mborayhúpe ñanepytyvõ ijetuʼúramo ñandéve jajejokokuaa hag̃ua algúna kósape. Ko artíkulope jahecháta mbaʼéichapa Jehová ojejokokuaa vaʼekue. Upéi ñaanalisáta umi ehémplo oĩva la Bíbliape, ha avei umi mbaʼe ikatúva jajapo jajejokokuaave hag̃ua.

5, 6. ¿Mbaʼe ehémplopa omoĩ ñandéve Jehová?

⁵ Jehová ningo hekoitépe ojapo opa mbaʼe ha ndaipóri haʼéicha ojejokokuaáva (Deut. 32:4). Péro ñande ñaneimperfékto, upévare ñahesaʼỹijo vaʼerã iñehémplo ikatu hag̃uáicha ñahaʼanga porãve chupe ha ñantende porãve mbaʼépa heʼise jajejokokuaa. Jahechamína mbaʼéichapa Jehová ohechauka vaʼekue ojejokokuaaha.

⁶ Ñapensamína mbaʼéichapa Jehová ojejoko kuri Satanás opuʼãrõ guare hese. Katuete ningo Ñandejára siervokuéra ifiélva oĩva yvágape ipochyetereíne raʼe upérõ guare. Ñande avei ñapensávo umi mbaʼe vaieta oikóvare Satanás káusare, ikatu avei ñandepochy. Jehová oikuaa porã kuri ndaikatuiha ombohasa reínte la oikóva, upéicharõ jepe pyʼaguapýpe porãnte ojapo la tekotevẽva. Heʼiháicha la Biblia, Jehová haʼe peteĩ persóna “ndaipochyreíriva”, upévare omaneha porã pe situasión (Éx. 34:6, TNM; Job 2:2-6). Péro, ¿mbaʼérepa oheja ohasa hetaite tiémpo? Ndoipotáigui avave oñehundi, “oipota guei enterove oñarrepenti” (2 Ped. 3:9).

7. ¿Mbaʼépa ñaaprende Jehová ehémplogui?

⁷ Jehová ehémplo ñanemboʼe tekotevẽha ñapensa porã ñañeʼẽ térã jajapo mboyve peteĩ mbaʼe. Jadesidíta jave peteĩ mbaʼe iñimportánteva, ñañemotiémpo vaʼerã ñapensa hag̃ua. Jajerure vaʼerã Jehovápe tañanemoarandu ani hag̃ua jaʼe térã jajapo mbaʼeve hendapeʼỹ (Sal. 141:3). Ñandepochy jave ndahasyiete hína ñarreaksiona vai hag̃ua. Upévare heta vése oĩ ombyasýva heʼi térã ojapo haguére peteĩ mbaʼe opensa porãʼỹre (Prov. 14:29; 15:28; 19:2).

8. a) ¿Moõpa ikatu jatopa umi ehémplo ohechaukáva iñimportanteha jajejokokuaa? b) ¿Mbaʼépa oipytyvõ Josépe ani hag̃ua hoʼa pe tentasiónpe? (Ehecha pe taʼanga oĩva iñepyrũme).

⁸ ¿Mbaʼe ehémplo bíblicopa ohechauka iñimportanteha jajejokokuaa? Ñapensamína José ehémplore. Haʼe ombaʼapo vaʼekue Potifar rógape, haʼéva peteĩ mburuvicha oservíva faraónpe. Potifar rembireko ojegusta kuri hese, pórke José haʼe vaʼekue “peteĩ mitãkariaʼy porã ha imbaretéva”. Upévare pyʼỹinte haʼe oñekuaveʼẽ vaʼekue Josépe. ¿Mbaʼépa oipytyvõ Josépe ani hag̃ua hoʼa upe tentasiónpe? Haʼe oiméne opensa porã raʼe mbaʼépepa opáta ojapóramo pe kuñakarai oipotáva. José heʼi: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?”.  Upéi, pe kuñakarai ojagarrárõ guare chupe ijaógui oñeno hag̃ua hendive, haʼe osẽ odipara upégui (Gén. 39:6, 9, TNM; elee Proverbios 1:10).

9. ¿Mbaʼépa ikatu jajapo ñaĩ hag̃ua preparádo ñamboyke hag̃ua umi tentasión?

⁹ ¿Mbaʼépa ikatu ñaaprende José ehémplogui? Oñepresentáramo peteĩ tentasión, ñañehaʼãmbaite vaʼerã jagueropuʼaka. Heta ermáno oikuaa mboyve Jehovápe, ojepokuaa vaʼekue okaru rasa, okaʼu, opita, ojedroga, hekovai térã ojapo ambue mbaʼe ivaíva. Koʼã ermáno ojevautisa rire jepe ikatu ostira jey chupekuéra koʼã mbaʼe. Oikóramo ñanderehe upéicha, ñapensa vaʼerã mbaʼéichapa japytáta Jehová renondépe ndajajejokóiramo. Upévare jahecha vaʼerã mbaʼéicha javépa ikatu oñepresenta pe tentasión, ha mbaʼépa jajapokuaa jajehekýi hag̃ua upe situasióngui (Sal. 26:4, 5; Prov. 22:3). Peichahágui oñepresentáramo peteĩ tentasión, jajerure Jehovápe tañanemoarandu ha tañanepytyvõ jajejokokuaa hag̃ua.

10, 11. a) ¿Mbaʼépa ombohovái heta mitãrusu ha mitãkuña koléhiope? b) ¿Mbaʼépa ikatu oipytyvõ chupekuéra ani hag̃ua hoʼa umi tentasiónpe?

¹⁰ Ñane tiémpope, heta kristiáno imitãva ohasa avei umi situasión ojoguáva José ohasa vaʼekuépe. Por ehémplo Kimberly. Ikompañerokuéra pyʼỹinte ijuruvyrei omombeʼu oreko hague rrelasión sexuál pe fin de semána. Péro Kimberly idiferénte chuguikuéra, upévare noñeʼẽi hendivekuéra koʼã mbaʼére. Haʼe heʼi sapyʼánte oñeñanduha haʼeño ha umi ótro omboykeha chupe. Ikompañerokuéra heʼi chupe ivyraitereiha ndaichíkoi haguére. Kimberly ningo iñakãguapy, péro ohechakuaa avei upe edápe mitãrusu ha mitãkuñanguéra orekosetereiha rrelasión sexuál (2 Tim. 2:22). Ikompañéro ha ikompañerakuéra oporandúmi chupe haʼépa vírhen gueteri, ha haʼe oaprovecha umi oportunida oexplika hag̃ua chupekuéra mbaʼérepa odesidi ndorekomoʼãiha gueteri rrelasión sexuál. ¡Ajépa ñanembovyʼaite jaikuaávo oĩha mitãrusu ha mitãkuña oñehaʼãva hína omboyke koʼãichagua tentasión! Jehová avei ovyʼaiterei hesevekuéra.

¹¹ La Biblia omombeʼu oĩ hague umi ndojokokuaáiva umi deséo vai, ha avei mbaʼépa oiko hesekuéra upe haguére. Oiméramo nde rehasa hína Kimberly ohasa vaʼekue, epensa pe mitãrusu ivýrovare oñeʼẽha Proverbios kapítulo 7. Epensa avei Amnón ojapo vaʼekuére ha mbaʼépa oiko hese upe haguére (2 Sam. 13:1, 2, 10-15, 28-32). Tuakuéra ikatu oanalisa ifamiliakuérandi koʼãichagua rreláto ojapo jave ijestúdio de família. Péicha oipytyvõta chupekuéra ikatu hag̃uáicha ojejokokuaa ha odesidi porã.

12. a) ¿Mbaʼérepa José ojejokopaite iñermanokuéra rovake? b) ¿Mbaʼéicha javépa ñande avei tekotevẽ jajejoko?

¹² Jahechamína mbaʼe situasiónpepa José ohechauka vaʼekue avei ojejokokuaaha. Iñermanokuéra ohórõ guare Egíptope hiʼupy rekávo, ñepyrũrã José ndeʼíri kuri chupekuéra haʼeha iñermáno. ¿Mbaʼérepa? Pórke oikuaase raẽ mbaʼépa opensa hikuái. Upéi haʼe ndaikatuvéima ojejoko ha oho ótro ládo hasẽ hag̃ua haʼeñoháme (Gén. 43:30, 31; 45:1). Oĩramo ermáno térã ermána nemoñeñandu vaíva, iporãta resegíramo José ehémplo ha eñehaʼãmbaite ejejoko. Upéva nepytyvõta ani hag̃ua ere ni ejapo peteĩ mbaʼe rembyasýtava upe rire  (Prov. 16:32; 17:27). Ikatu avei ereko peteĩ ne hénte oñemosẽ vaʼekue kongregasióngui. Péicha jave rejejokokuaa vaʼerã avei ani hag̃ua reñeʼẽ hendive oiméramo natekotevẽtereíri hína. Añetehápe upéva ijetuʼu, péro tuicha nepytyvõta rejejokokuaáramo Jehová ojapoháicha ha rejapórõ la haʼe heʼíva.

13. ¿Mbaʼépa ñaaprende David ehémplogui?

¹³ Rréi David ehémplo ikatu avei ñanepytyvõ. Saúl opersegírõ guare chupe ha Simeí omaltratárõ guare chupe, haʼe ndaipochýi ni ndoipurúi ijautorida oñevenga hag̃ua hesekuéra (1 Sam. 26:9-11; 2 Sam. 16:5-10). Péro jaikuaaháicha, sapyʼánte David ndojejokói vaʼekue. Por ehémplo, ñepyrũrã orreaksiona vai kuri Nabal kóntrape, ha avei opeka Bat-seba ndive (1 Sam. 25:10-13; 2 Sam. 11:2-4). ¿Mbaʼépa ikatu ñaaprende David ehémplogui? Primero, ansianokuéra tekotevẽha ojejokokuaa ha oñatende ani hag̃ua oipuru vai ijautorida. Ha segundo, ani jajeroviaiterei ñandejehe ha ñapensa ñande ndajaʼaicheneha umi tentasiónpe (1 Cor. 10:12).

14. a) ¿Mbaʼépa oiko peteĩ ermánore? b) ¿Mbaʼérepa iporã jajejoko jajecháramo peichagua situasiónpe?

¹⁴ ¿Mbaʼépa ikatu jajapo jajejokokuaave hag̃ua? Jahechamína mbaʼépa oiko peteĩ ermáno héravare Luigi. Peteĩ áuto ochoka Luigi áutore, ha pe karai ochokáva hese oñepyrũ oguerosapukái chupe ha oñorairõse voi. Luigi ojerure Jehovápe oipytyvõmínte hag̃ua chupe pono orreaksiona, ha avei oñehaʼã otrankilisa pe karaípe. Péro lomímonte pe karai osegi osapukái, upéicharõ jepe Luigi ojejokopaite ha ndokapúi hese. Ohasa rire una semána, Luigi oho orrevisita peteĩ kuñakaraípe, ha aviasído pe kuñakarai ména raʼe la ochoka vaʼekue hese. Pe karai otĩeterei ha ojerure chupe diskúlpa orreaksiona vai haguére. Ojeofrese oñeʼẽ hag̃ua pe kompañía de segúro ndive omyatyrõ pyaʼeve hag̃ua Luígipe la hiʼáuto. Pe karai opyta avei hendivekuéra oñemongeta hag̃ua la Bíbliare, ha heʼi ogustaiterei hague chupe. Luigi imanduʼávo pe oiko vaʼekuére, ohechakuaa haʼetépe norreaksionái hague pe aksidénte oikórõ guare, ha opensa mbaʼépa oiko vaʼerãmoʼã ndojejokóirire (elee 2 Corintios 6:3, 4).

15, 16. ¿Mbaʼéichapa ikatu ideprovécho ñandéve ha ñane famíliape ñahesaʼỹijo meméramo la Biblia?

¹⁵ ¿Mbaʼépa ñanepytyvõta avei jajejokokuaave hag̃ua? Ñahesaʼỹijo meme vaʼerã la Biblia. Ñandejára heʼi vaʼekue Josuépe: “Siémpre reñeʼẽ vaʼerã umi mbaʼe ojeskrivívare ko lívro de la léipe, elee ha ejepyʼamongeta vaʼerã hese ára ha pyhare, ikatu hag̃uáicha ejapopaite umi mbaʼe oĩva pype. Péicha resẽ porãta rehóvo tape porãre ha nearandúta” (Jos. 1:8). Péro, ¿mbaʼéichapa la Biblia ikatu ñanepytyvõ jajejokokuaave hag̃ua?

¹⁶ Jahechaháicha, la Bíbliape oĩ umi rreláto ohechaukáva mbaʼépa ohupyty umi ojejokokuaáva, ha mbaʼépa oiko umi ndojejokokuaáivare. Jehová nomoĩreíri la Bíbliape koʼã mbaʼe, síno omoĩ ñanerekomboʼe hag̃ua (Rom. 15:4). Upévare iporãta jalee, jastudia ha jajepyʼamongeta porã umi rrelátore. Ñañehaʼã vaʼerã jahecha mbaʼéichapa ikatu ideprovécho ñandéve ha ñane famíliape. Jajerure Jehovápe tañanepytyvõ jajapo hag̃ua umi mbaʼe  ñaaprendéva Iñeʼẽme. Jahechakuaáramo tekotevẽha jajejokokuaave, ñañemboʼe vaʼerã Jehovápe ha ñañehaʼã jahechakuaa mbaʼépepa tekotevẽ ñamehora (Sant. 1:5). Avei tuicha ñanepytyvõta ñainvestigáramo ñane puvlikasionkuérape umi téma oñeʼẽva upévare.

17. ¿Mbaʼéichapa tuakuéra ikatu oipytyvõ ifamíliape ojejokokuaave hag̃ua?

¹⁷ Tuakuéra, ¿mbaʼéichapa ikatu peipytyvõ pene famíliape ojejokokuaave hag̃ua? Jaikuaaháicha, haʼekuéra ndogueronaséi upe kualida, peẽ voi pemoĩ vaʼerã chupekuéra la ehémplo (Efes. 6:4). Pehechakuaáramo ijetuʼuha hína pene famíliape ojejokokuaa hag̃ua, peñeporandu vaʼerã mbaʼeichagua ehémplopa peẽ pemoĩ. Pesẽ memérõ predikasiónpe, peho meme rreunionhápe ha káda semána pejapórõ pende estúdio de família, pemoĩ hína ehémplo porã chupekuéra. Ani pekyhyje peje hag̃ua no pene famíliape tekotevẽ jave. Jehová omoĩ vaʼekue límite Adán ha Évape omboʼe hag̃ua chupekuéra orrespeta vaʼerãha ijautorida. Upéicha avei, tuakuéra omoĩvo ehémplo porã ifamíliape ha okorrehívo chupekuéra hendaitépe, omboʼéta chupekuéra ojejokokuaa hag̃ua. Peipytyvõ jave pene famíliape omombaʼe hag̃ua Jehová autorida ha orrespeta hag̃ua iléi, pejapo hína peteĩ mbaʼe iñimportantetereíva (elee Proverbios 1:5, 7, 8).

18. ¿Mbaʼérepa jaiporavo porã vaʼerã ñane amigorã?

¹⁸ Oiméramo ñanefamília térã nahániri, enterovévante tekotevẽ jaelehi porã ñane amigorã. ¿Mbaʼérepa? Pórke ñane amigokuéra ohayhúramo Jehovápe ñanepytyvõta ñanekyreʼỹve hag̃ua Ñandejára servísiope ha jajehekýi hag̃ua heta akãrasýgui (Prov. 13:20). Upéicha avei, ñañehaʼãta jasegi iñehémplo ikatu hag̃uáicha jajejokokuaa. Ñande avei ñañehaʼãramo ñanderekoporã ñamokyreʼỹta ñane amigokuérape. Káda día ñañehaʼãramo jajejokokuaa, Ñandejára ñandeguerohorýta ha jajogueraha porãvéta umi persóna jahayhúva ndive.