1. ¿Mbaʼéichapa Jehová puévlo ohechauka ojoayhuha?

JEHOVÁ puévlo ningo haʼe peteĩ família ojoayhúva (1 Juan 4:16, 21). Upévare, sapyʼánte ojapo hikuái tuicha sakrifísio iñermanokuéra rehehápe, péro hetave vése ohechauka ohayhuha chupekuéra umi mbaʼe ojapóvare káda día hesehapekuéra. Por ehémplo, heʼi umi mbaʼe omoñeñandu porãva chupekuéra ha otrata porã enterovépe. Péicha ojapo jave hikuái, osegi hína ñande Ru yvagapegua ehémplo (Efes. 5:1).

2. ¿Mbaʼéichapa Jesús ohechauka ñanderayhuha itúa ojapoháicha?

² Jesús osegi itúa ehémplo opaite mbaʼépe. Upévare haʼe heʼi: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta [...]. Che ningo ndachepochyreíri ha añemomirĩ che pyʼaite guive” (Mat. 11:28, 29). Jasegi jave Jesús ehémplo ha jahechauka ñanembaʼerechakuaaha ñambovyʼa Jehovápe ha ñande avei javyʼaiterei (Sal. 41:1). Ko artíkulope jahecháta mbaʼéichapa ikatu jahechauka ñanembaʼerechakuaaha ñande rogapýpe, kongregasiónpe ha predikasiónpe.

3. ¿Mbaʼéichapa menakuéra ikatu ohechauka imbaʼerechakuaaha hembirekóndi? (Ehecha pe taʼanga oĩva iñepyrũme).

³ Menakuéra omoĩ vaʼerã ehémplo porã hogayguakuérape oñeinteresávo hesekuéra (Efes. 5:25; 6:4). La Biblia heʼi voi umi ména imbaʼerechakuaa ha otrata porã vaʼerãha hembirekópe (1 Ped. 3:7, nóta). Peteĩ ména imbaʼerechakuaáva nopensái kuimbaʼekuéra iñimportanteveha kuñanguéragui idiferénteramo jepe hikuái (Gén. 2:18). Upévare imbaʼerechakuaa hembirekóndi, omombaʼe ha orrespeta chupe. Peteĩ tembireko oikóva Canadápe heʼi iménare: “Haʼe arakaʼeve ndoapoʼíriva umi mbaʼe añandúva ni ndeʼíri: ‘Nereñeñandúi vaʼerã péicha’. Avei siémpre ojapysaka porã la haʼévare. Ha tekotevẽramo chepytyvõ apensa porãve hag̃ua peteĩ situasiónpe, oñatende porã la heʼítavare ani hag̃ua añeñandu vai”.

4. ¿Mbaʼéichapa peteĩ ména ohechaukáta omombaʼeha hembireko sentimiénto?

⁴ Peteĩ ména otrata porãva hembirekópe omombaʼe hembiayhu oñandúva. Upévare arakaʼeve nonovilleái ótro kuñáre ni ndoikói omeʼẽterei atensión peteĩ kuña ndahaʼéivape hembireko (Job 31:1). Upéicha avei haʼe ndoipurumoʼãi umi rred sosiál ni Internet ojapo hag̃ua koʼã mbaʼe. Upéva rangue, osegíta ifiél hembirekópe pórke ohayhu chupe, ohayhu Jehovápe ha ombojeguaru chupe umi mbaʼe vai (elee Salmo 19:14; 97:10).

5. ¿Mbaʼépa ojapo peteĩ tembireko imbaʼerechakuaáva iménandi?

⁵ Jesucristo ningo la omoakãva peteĩ ménape, upévare haʼe osegi vaʼerã iñehémplo. Ojapóramo péicha, ndahasymoʼãi hembirekópe orrespeta hag̃ua chupe ipyʼaite guive (Efes. 5:22-25, 33). Peteĩ tembireko orrespetáramo iménape, oñehaʼãta ontende la opensáva ha mborayhúpe otratáta chupe hembiapoiterei jave kongregasiónpe térã iprovléma jave. Peteĩ ména oikóva Gran Bretáñape heʼi: “Sapyʼánte che rembireko ohechakuaáma cherehe oĩha algúna kósa chepyʼapýva. Péicha jave haʼe oraha enkuénta pe konsého oĩva Proverbios 20:5-pe, ha ohaʼarõ pe moménto opyta porãhápe chéve añeʼẽ hag̃ua umi mbaʼe chepyʼapývare ha ikatúva amombeʼu chupe.

6. ¿Mbaʼéichapa enterovéva ikatu ñamokyreʼỹ umi mitãme imbaʼerechakuaa hag̃ua, ha mbaʼérepa upéva ideprovéchota chupekuéra?

⁶ Tuakuéra otrata porã ha orrespeta jave hapichápe, omoĩ peteĩ ehémplo porã ifamiliakuérape. Haʼekuéra omboʼe vaʼerã umi mitãme oreko hag̃ua enkuénta umi ótrope ha otrata porã hag̃ua chupekuéra. Por ehémplo, omboʼe vaʼerã ifamiliakuérape ani hag̃ua odipara Salónpe. Avei, oho jave hikuái peteĩ fiestítape omboʼe vaʼerã umi mitãme oheja hag̃ua umi ijedáva raẽ tojeservi umi hiʼupy. Entéro ñaĩva kongregasiónpe ikatu ñaipytyvõ umi sy ha túape. Jajapóta upéva jaguerohorýramo umi mitãme opensa jave umi ótrore, por ehémplo oavri jave ñandéve okẽ jahasa hag̃ua. Ñamombaʼéramo la ojapóva hikuái, ovyʼáta ha ohechakuaáta siertoha la Biblia heʼi jave javyʼaiteveha “ñameʼẽvo, ñandéve oñemeʼẽ rangue” (Hech. 20:35).

7. ¿Mbaʼéichapa Jesús ohechauka imbaʼerechakuaaha peteĩ kuimbaʼe nohendúivandi, ha mbaʼépa ikatu ñaaprende iñehémplogui?

⁷ Jesús oĩrõ guare peteĩ lugár héravape Decápolis, “ojegueru hendápe peteĩ kuimbaʼe nohendúiva ha ndaikatúiva oñeʼẽ porã” (Mar. 7:31-35). Jesús omonguera chupe, péro ndojapói upéva pe hénte atýpe. ¿Mbaʼérepa? Pórke pe kuimbaʼe nohendúiva posívlemente noñeñanduporãi hetahápe la hénte. Jesús imbaʼerechakuaa hendive, “ogueraha chupe haʼeñoháme” ha upépe omonguera pe kuimbaʼépe. Ñande ningo ndaikatumoʼãi jajapo peteĩ milágro, péro ikatu ñapensa umi ótro sentimiéntore ha la oikotevẽvare hikuái ikatu hag̃uáicha jatrata porã chupekuéra. Apóstol Pablo heʼi vaʼekue:  “Ñañomokyreʼỹ japorohayhu ha jajapo hag̃ua iporãva” (Heb. 10:24). Jesús oraha kuri enkuénta la oñandúva pe kuimbaʼe nohendúiva, ha upévare otrata chupe mborayhúpe. ¡Ajépa ehémplo porãite ñandéve g̃uarã!

8, 9. ¿Mbaʼéichapa ikatu ñanembaʼerechakuaa umi ijedáva ha umi diskapasitádondi? Emoĩ peteĩ ehémplo.

⁸ Ñanembaʼerechakuaákena umi ijedáva ha umi diskapasitádondi. Pe mbaʼe iñimportantevéva kongregasiónpe haʼe hína pe mborayhu, ndahaʼéi ñandevale ha jajapokuaa heta mbaʼe (Juan 13:34, 35). Jahayhúramo ñane ermanokuérape jajapóta ikatúva guive ñaipytyvõ hag̃ua umi ijedáva térã orekóvape peteĩ diskapasida ikatu hag̃uáicha oho rreunionhápe térã predikasiónpe. Ñañehaʼãta ñaipytyvõ chupekuéra opyta vaíramo jepe ñandéve térã ndaikatuvéiramo jepe ojapo hikuái heta mbaʼe (Mat. 13:23). Michael ningo peteĩ ermáno oipurúva sílla de rruéda. Haʼe oagradeseterei umi mbaʼe ojapóva hesehápe hogayguakuéra ha umi ermáno. Michael heʼi: “Chepytyvõ rupi hikuái, ikatu aha meme rreunionhápe ha asẽ apredika. Chéve ningo chegustaiterei pe predikasión púvlika”.

⁹ Heta Betélpe oiko umi ermáno ha ermána ijedáva ha orekóva peteĩ diskapasida. Umi superintendénte oĩva sukursálpe imbaʼerechakuaa hendivekuéra ha ohechauka ohayhuha koʼã ermánope. Upévare ojapo arréglo ikatu hag̃uáicha opredika hikuái por kárta ha por teléfono. Peteĩ ermáno orekóva 86 áño hérava Bill oskrivi kárta umi hénte oikóvape mombyry. Haʼe heʼi: “Amombaʼeterei ningo pe priviléhio arekóvare apredika hag̃ua por kárta”. Peteĩ ermána hérava Nancy ha orekóva 90 áño omombeʼu: “Chéve g̃uarã umi kárta ndahaʼéi peteĩ kuatia reínte ñamoĩva sóvrepe, péicha che apredika hína. Umi hénte ningo tekotevẽ oikuaa pe añetegua”. Ethel, onase vaʼekue 1921-pe, heʼi: “Tódo el tiémpo ningo cherete rasy. Oĩ día ndaikatuihápe ni añemonde”. Upéicharõ jepe, haʼe ovyʼa ikatu haguére opredika por teléfono ha ojapo unas kuánta rrevisíta. Barbara, orekóva 85 áño, heʼi: “Cherasykatúgui, ijetuʼu jepi chéve asẽ hag̃ua apredika. Péro ikatu apredika por teléfono. ¡Grásiamante Jehová!”. Un áño mboyve, peteĩ grúpo de ermáno ijedáva opredika 1.228 óra, oskrivi 6.265 kárta, opredika por teléfono mas de 2.000 vése ha okoloka 6.315 puvlikasión. Katuete Jehová ovyʼaiterei koʼã ermáno oñehaʼãmbaite haguére (Prov. 27:11).

10. ¿Mbaʼéichapa ikatu ñaipytyvõ ñane ermanokuérape oaprovechapaite hag̃ua umi rreunión?

¹⁰ Ñanembaʼerechakuaákena rreunionhápe. Jajapóramo péicha, ñaipytyvõta ñane ermanokuérape oaprovechapaite hag̃ua umi rreunión. ¿Mbaʼéichapa ikatu jajapo upéva? Por ehémplo, ñañehaʼãramo ñag̃uahẽ oñepyrũ mboyve umi rreunión ani hag̃ua jadistrae avavépe. Añetehápe ningo sapyʼánte ikatu oñepresenta peteĩ provléma ha upéva káusare ndaikatúi ñag̃uahẽ órape. Péro jajepokuaáramo voi ñag̃uahẽ tárde, tekotevẽ ñapensa mbaʼéichapa upéva oafekta umi ótrope ha mbaʼépa ikatu jajapo ñamehora hag̃ua. Aníkena ñanderesarái Jehová ha Itaʼýra hína la ñaneinvitáva rreunionhápe (Mat. 18:20). Katuete jahechaukase jarrespetaha chupekuéra ñag̃uahẽvo órape rreunionhápe.

11. ¿Mbaʼérepa umi orekóva párte rreunionhápe osegi vaʼerã pe konsého oĩva 1 Corintios 14:40-pe?

¹¹ Ñanembaʼerechakuaáramo ñane ermanokuérandi, jasegíta ko konsého oĩva la Bíbliape: “Opa mbaʼe tojejapo hekopete ha hendaitépe” (1 Cor. 14:40). Umi ermáno orekóva párte rreuniónpe ohechauka osegiha ko konsého otermina jave a tiémpo la ipárte. Avei imbaʼerechakuaa umi ótro orekótavandi párte ha enterove ermánondi. Ñapensamína mbaʼéichapa ikatu oafekta umi ótrope pe rreunión ndopáirõ órape. Oĩ ermáno oguata térã oho vaʼerã mombyry kolektívope, tren térã hiʼáutope og̃uahẽ hag̃ua hógape. Oĩ avei umi orekóva iména térã hembireko ndahaʼéiva Testígo ohaʼarõva og̃uahẽ hikuái órape.

12. ¿Mbaʼérepa umi ansiáno omerese jahayhu ha jarrespeta chupekuéra? (Ehecha pe rrekuádro hérava “ Ñanembaʼerechakuaákena umi omoakãvandi Ñandejára organisasión”).

 ¹² Umi ansiáno ningo ombaʼapo jejopy kongregasiónpe ha kyreʼỹme omoakã predikasión, upévare omerese jarrespeta ha jahayhu chupekuéra (elee 1 Tesalonicenses 5:12, 13). Katuete ñamombaʼe opa mbaʼe ojapóva hikuái. Ikatu jahechauka upéva ñaneñeʼẽrendu ha ñaipytyvõramo chupekuéra. Umi ansiáno oñehaʼã oñangareko porã ñanderehe, pórke oikuaa ojechataha Ñandejárandi ndojapóiramo hekoitépe hembiapokuéra (Heb. 13:7, 17).

13. ¿Mbaʼépa ikatu ñaaprende Jesús otrata lájare umi héntepe?

¹³ Pe profesía de Isaías oñeʼẽva Jesúsre heʼi: “Haʼe nomopẽmoʼãi ni peteĩ takuarílla opẽ mbotáva, nomboguemoʼãi ni peteĩ lámpara ogue potáva” (Is. 42:3). Jesús ningo ohayhu umi héntepe, upévare oraha enkuénta mbaʼéichapa oñeñandu hikuái. Haʼe ontende la oñandúva umi oñedesanimáva térã ikangýva ojoguáva “peteĩ takuarílla” opẽ mbotávape térã “peteĩ lámpara” ogue potávape, ha ipasiénsia ha otrata porã chupekuéra. Jahechakuaa mbaʼérepa umi mitã jepe oĩse vaʼekue Jesús ndive (Mar. 10:14). Jaikuaaháicha, ndaikatumoʼãi ñantende ni ñamboʼe umi héntepe Jesús ojapo hagueichaite. Péro ikatu jahechauka ñanembaʼerechakuaaha umi oĩvandi ñande territóriope ñañeʼẽ lájare chupekuéra. Avei jadesidi jave mbaʼe órapa javisitáta umi héntepe, ha mboy tiémpopa ñañemongetáta hendivekuéra.

14. ¿Mbaʼérepa ñañatende vaʼerã mbaʼéichapa ñañeʼẽ umi héntepe?

¹⁴ ¿Mbaʼéichapa ñañeʼẽ vaʼerã umi héntepe? Koʼág̃arupi, hetaiterei persóna “oiko asyeterei ha isarambipa” pórke heta emprésa ikorrúpto ha ndoiporiahuverekói chupekuéra, avei umi líder polítiko ha rrelihióso  káusare (Mat. 9:36). Upéicha rupi, heta hénte nokonfiavéi avavére ha nohaʼarõi mbaʼeve iporãva. Upévare ñañeʼẽ lája ha umi palávra jaipurúva ñañemongeta hag̃ua hendivekuéra ohechauka vaʼerã ñañeinteresaha umi persónare ha ñambyasyha chupekuéra. Oĩ ningo heta ohenduséva la jaʼéva ndahaʼéi jaipuru haguérente la Biblia, síno ohechakuaa haguére añetehápe ñañeinteresaha hesekuéra ha jarrespetaha la opensáva hikuái.

15. ¿Mbaʼéichapa ikatu ñanembaʼerechakuaa umi hénte oĩvandi pe território japredikahápe?

¹⁵ Heta hendáicha ningo ikatu jahechauka ñanembaʼerechakuaaha umi hénte oĩvandi ñande territóriope. Por ehémplo, jakuida vaʼerã mbaʼeichagua pregúntapa jajapo umi persónape, ha ñambaʼeporandu jave jatrata porã ha jarrespeta vaʼerã chupekuéra. Peteĩ prekursór oservíva peteĩ lugár hiʼotĩhápe umi hénte, ndojapóinte umi pregúnta ikatúva omoñeñandu vai chupekuéra ndoikuaáigui la rrespuésta. Por ehémplo, haʼe noporandúi: “¿Reikuaápa mbaʼéichapa héra Ñandejára? Térã ¿reikuaápa mbaʼépa hína Ñandejára Rréino?”. Upéva rangue, heʼi jepi kóicha: “La Biblia rupive aaprende Ñandejára orekoha héra, ¿ikatúpa ahechauka ndéve mbaʼéichapa héra? Jahechaháicha, umi pregúnta jajapóva odependéta mbaʼeichagua héntepa oĩ la jaikohárupi ha mbaʼépa la kostúmbre upérupi. Péro siémpre jatrata porã ha jarrespeta vaʼerã umi ótrope. Jajapo hag̃ua upéva ñañehaʼã vaʼerã jaikuaa porã chupekuéra.

16, 17. a) ¿Mbaʼéichapa ikatu jahechauka ñanembaʼerechakuaaha jadesidi jave mbaʼe moméntopepa javisitáta umi héntepe? b) ¿Mbaʼéichapa ñanembaʼerechakuaa umi héntendi jadesidi jave mboy tiémpopa ñandeʼaréta hogakuérape?

¹⁶ ¿Mbaʼe moméntopepa javisita vaʼerã umi héntepe? Japredika jave, umi hénte nañaneraʼarõi pórke nañandeinvitái voi kuri hógape. Upéicha rupi, iñimportánte jaha hendapekuéra peteĩ óra ikatutahápe ñanerendu porã hikuái (Mat. 7:12). Por ehémplo, ¿ojepokuaápa umi persóna oĩva reikohárupi oke tárde peve fin de semanakue? Oimérõ péicha, ikatu japredika kállere, jajapo predikasión karríto reheve térã jajapo raẽ ñande rrevisíta umi hénte ikatútavape oñatende ñanderehe.

¹⁷ ¿Mboy tiémpopa ñandeʼaréta umi ogahárupi? Heta hénte ningo hembiapoiterei, upévare naiporãmoʼãi ñandeʼareterei japredika jave chupekuéra, koʼýte ñañepyrũ ramórõ hína ñañemongeta hendivekuéra. Iporãve ñamombykýnte ñande visíta ipukueterei rangue (1 Cor. 9:20-23). Ohechakuaáramo hikuái ñantendeha saʼiha la tiémpo orekóva, naiprovlemamoʼãi ñanerendu hag̃ua japredika jey vove chupekuéra. Ñañehaʼãramo jahechauka japorotrata lájare umi mbaʼe porã oúva Ñandejára espíritugui, añetehápe oikóta ñandehegui “Ñandejára ajudánte”. Hiʼarive, Jehová ikatu hína ojevale ñanderehe oikuaauka hag̃ua peteĩ persónape pe añetegua (1 Cor. 3:6, 7, 9).

18. ¿Mbaʼe vendisiónpa jarresivíta ñanembaʼerechakuaáramo ñande rapichándi?

¹⁸ Jahecha haguéicha ko artíkulope, jajapo vaʼerã ikatúva guive ñanembaʼerechakuaa hag̃ua ñande rogapýpe, kongregasiónpe ha predikasiónpe. Péicha jarresivíta heta vendisión koʼág̃a ha tenonde gotyove avei. Pe Salmo 41:1 ha 2 heʼi voi: “Ovyʼa pe oipytyvõva umi imboriahúvape, pórke Jehová osalváta chupe ohasa asy jave. Peichagua persónape Jehová oprotehéta ha oñangarekóta hese osegi hag̃ua oikove. Enterove ohechakuaáta haʼe ovyʼaha”.