UMI ansiáno oĩva ko yvy tuichakuére omombaʼeterei umi priviléhio orekóva Ñandejára puévlope. Haʼekuéra ningo peteĩ vendisión enterovévape g̃uarã. Upéicharõ jepe, ndaʼareiete oiko kuri peteĩ kámbio. Heta ansiáno ijedávape ojejerure kuri omeʼẽ hag̃ua umi rresponsavilida ipohyivéva umi ansiáno imitãvévape.

Ko arréglo pyahúpe, umi superintendénte de sirkuíto ha umi instruktór umi eskuéla teokrátikape g̃uarã, oheja vaʼerã ipriviléhio ohupytývo 70 áño. Upéicha avei, umi ansiáno ombotýva 80 áño omeʼẽ vaʼerã umi imitãvévape umi rresponsavilida haʼekuéra oreko vaʼekue. Por ehémplo, ndoservimoʼãvéima hikuái kómo koordinadór peteĩ Komite de Sukursálpe térã kómo koordinadór peteĩ kuérpo de ansiánope. Péro, ¿mbaʼéichapa ojagarra koʼã kámbio umi ansiáno ijedáva? Haʼekuéra ohechauka ifielha Jehová ha iñorganisasiónpe.

Peteĩ ermáno hérava Ken oservi vaʼekue haimete 49 áño kómo koordinadór peteĩ Komite de Sukursálpe. Haʼe heʼi: “Che aĩ de akuérdo la ojedesidi vaʼekuére”. Heʼi avei: “Upe día aikuaa haguépe la kámbio oikótava, añemboʼéma voi kuri Jehovápe pe pyharevépe ikatu hag̃uáicha peteĩ ermáno imitãvéva oservi kómo koordinadór”. Heta ermáno ijedáva oikóva diferénte lugárpe ko yvy tuichakuére orreaksiona avei Ken orreaksiona haguéicha. Péro ndaifasilpái kuri ñepyrũrã, pórke koʼã ermáno omombaʼe pe traváho ojapóva oikóvo iñermanokuéra rehehápe.

Peteĩ ermáno hérava Esperandio ha oservi vaʼekue ikongregasiónpe de koordinadór pe kuérpo de ansiánope heʼi pe kámbio oiko vaʼekuére:  “Añentristeseʼimi kuri”. Péro heʼi avei: “Aikotevẽmie tiémpo añatende porã hag̃ua che salúre”. Ko ermáno osegi oservi fiélmente Jehovápe, upévare haʼe peteĩ vendisión ikongregasiónpe g̃uarã.

¿Ifásilpa raʼe umi oservi vaʼekuépe kómo superintendénte de sirkuíto heta tiémporema, okumpli hag̃ua ótra asignasión Jehová servísiope? Allan, oservi vaʼekue 38 áñore kómo superintendénte de sirkuíto, heʼi: “Aikuaárõ guare la kámbio oikótava ajeparalisaite”. Upéicharõ jepe, ohechakuaa ideprovechoha oñentrenáramo umi imitãvévape, ha haʼe osegi ifiél Ñandejára servísiope.

Russell oservi vaʼekue 40 áñore kómo superintendénte de sirkuíto ha instruktór umi eskuélape g̃uarã. Ko ermáno omombeʼu ñepyrũrã haʼe ha hembireko ndovyʼái hague oikuaávo la oikótava. Russell heʼi: “Ore ningo rovyʼaiterei vaʼekue ore asignasiónpe ha ropensa orepuʼakataitiha rosegi hag̃ua rojapo upéva”. Koʼág̃a, haʼe ha hembireko oipuru pe entrenamiénto ha experiénsia orekóva oipytyvõ hag̃ua ótrope pe kongregasión oservihápe. Umi ermáno upepegua ovyʼa hesevekuéra.

Ikatu hína nañandeafektái direktoite umi kámbio koʼã ermáno ohasáva. Péro peteĩ rreláto oĩva 2 Samuélpe ikatu ñanepytyvõ ñantende hag̃ua chupekuéra.

Ñapensamína pe situasión oñepresenta vaʼekuére rréi David raʼy hérava Absalón opuʼãrõ guare hese. David odipara chugui Jerusaléngui ha oho Mahanáimpe, rrío Jordán éste gotyo. Upe lugárpe, David ha umi oĩva hendive oikotevẽ kuri provístare. ¿Ñanemanduʼápa mbaʼépa oiko rakaʼe upérõ?

Mbohapy kuimbaʼe uperupigua ipojera hendivekuéra. Upévare omeʼẽ David ha iñirũnguérape tupa, tembiʼu ha umi tembipuru oikotevẽva. Barzilai haʼe vaʼekue peteĩva umi kuimbaʼe (2 Sam. 17:27-29). Tiémpo rire, opa kuri pe rrevelión Absalón omoñepyrũ vaʼekue. Upévare David oho jey Jerusalénpe, ha Barzilai oakompaña chupe rrío Jordán peve. David ojerure chupe oho hag̃ua hendive Jerusalénpe. Pe rréi heʼi ndofaltamoʼãiha chupe tembiʼu, péro Barzilai ningo “ipláta heta” voi ha noikotevẽi oñemeʼẽ chupe tembiʼu (2 Sam. 19:31-33). David ojapo upéva pórke oapresiaiterei ohechávo mbaʼéichapa imbaʼeporã ko kuimbaʼe. Avei oikuaa oipytyvõitereitaha chupe oimeraẽ suherénsia ko kuimbaʼe omeʼẽva chupe. David oofreséva tuicha mbaʼe kuri, pórke Barzilai ikatúta oiko ha ombaʼapo pe rréi ykére.

Barzilai ningo iñumílde ha ohechakuaa mbaʼe situasiónpepa oĩ orekóma rupi 80 áño. Upévare haʼe heʼi ijehe: “Ndapillavéima mbaʼépa iporã ha mbaʼépa ivai” ¿Mbaʼe piko la heʼiséva? Ndeʼiséi ndaikatumoʼãiha omeʼẽ konsého porã, pórke katuete omoarandúne chupe umi mbaʼe ohasámava hekove pukukue. Haʼe ikatúta kuri oipytyvõ peteĩ rréipe, ojapo haguéicha upe rire umi kuimbaʼe ijedáva rréi Rehoboam tiémpope (1 Rey. 12:6, 7; Sal. 92:12-14; Prov. 16:31). Barzilai heʼírõ guare ndopillaveimaha iporãva ni ivaíva oiméne ohechaukánte raʼe ndaikatuveimaha ojapo heta mbaʼe ijedáma  rupi. Haʼe omombeʼu voi umi mbaʼe hoʼúva jepe ndaheveimaha chupe ha nohenduporãveimaha (Ecl. 12:4, 5). Upémarõ Barzilai ojerure Davídpe oraha hag̃ua hendive peteĩ kuimbaʼe imitãvape hérava Kimham. Posívlemente ko kuimbaʼe haʼe vaʼekue Barzilai raʼy (2 Sam. 19:35-40).

Pe kámbio oikóva Ñandejára organisasiónpe ohechauka oñentendeha umi ermáno ijedáva situasión ha upéva okoinsidi la opensa vaʼekuére Barzilai. Péro ñane tiémpope hetave mbaʼe ojeguereko kuri enkuénta ojedesidi hag̃ua, ndahaʼéi peteĩ persóna situasión añónte oiko haguéicha Barzilai kásope. Tekotevẽ kuri oñeanalisa porã mbaʼépa iporãve umi ermáno ijedávape g̃uarã, oservíva hína fiélmente Jehovápe ko yvy tuichakuére.

Umi ansiáno ijedáva ha iñumíldeva ohechakuaa Jehová organisasión okakuaaha ohóvo. Upévare amáske hetave la tembiapo, Ñandejára puévlo oĩvéta preparádo oñemeʼẽramo umi ermáno imitãvévape umi rresponsavilida umi ijedáva oreko vaʼekue. Heta vése umi ermáno ijedáva oentrena umi imitãvape okumpli porã hag̃ua peteĩ rresponsavilida, Barzilai oentrena haguéicha itaʼýrape ha apóstol Pablo ojapo haguéicha avei Timotéore (1 Cor. 4:17; Filip. 2:20-22). Umi ermáno imitãva ohechauka haʼeha umi persóna Cristo omeʼẽva “rregáloramo” ikatu hag̃uáicha oservi iñermanokuérape omombarete hag̃ua pe kongregasión (Efes. 4:8-12; embojoja Números 11:16, 17, 29 heʼívare).

Heta lugárpe umi ermáno koʼág̃a orekóva saʼive rresponsavilida oaprovecha isituasión oservi hag̃ua ótro priviléhiope térã ombaʼapove hag̃ua Jehová servísiope.

Peteĩ ermáno hérava Marco ha oservi vaʼekue kómo superintendénte de sirkuíto 19 áñore heʼi: “Koʼág̃a areko oportunida aipytyvõ porãve hag̃ua umi ermána ménape ndahaʼéiva Testígo”.

Geraldo ningo oservi vaʼekue kómo superintendénte de sirkuíto 28 áñore. Haʼe heʼi: “Koʼág̃a roñehaʼã roguerekove estúdio bíblico ha roipytyvõ umi ermáno inaktívope”. Ko ermáno omombeʼu haʼe ha hembireko ojapomaha 15 estúdio bíblico ha unos kuánto ermáno inaktívo oñepyrũ jey oho rreunionhápe.

Allan, pe ermáno ñañeʼẽ hague anteve heʼi: “Roreko oportunida roñemeʼẽmbaitévo predikasiónpe. Rovyʼa ikatu haguére ropredika umi território de negósiope, ropartisipa pe predikasión púvlikape, ha ikatu rupi roñeʼẽ la Bíbliare ore vesinokuérape. Mokõi che vesíno ohóma kuri Salón del Réinope”.

Oiméramo nde peteĩ ermáno ifiélva ha iñexperiénsiava rerresivíva peteĩ asignasión pyahu Ñandejára organisasiónpe, reguereko avei ótra fórma ikatuháicha reipytyvõ. Ikatu eipuru pe experiénsia reguerekóva rembokatupyry hag̃ua umi kuimbaʼe imitãvape oĩva kongregasiónpe. Péicha rejapóramo reaprovecháta peteĩ oportunida iporãitereíva rekolavora hag̃ua Ñandejára puévlondi. Russell, pe ermáno ñamensionáma vaʼekue anteve heʼi: “ Jehová oentrena ha oipuru hína umi imitãvape pórke haʼekuéra iguapoiterei ha ivale”. Haʼe heʼi avei: “Umi ermáno oparupigua oñevenefisia ikatu haguére ombaʼapo koʼã ermáno imitãvandi pórke ikyreʼỹeterei hikuái oporomboʼe ha oporoanima hag̃ua” (ehecha pe rrekuádro hérava “ Eipytyvõ umi kuimbaʼe imitãvape oipurupaite hag̃ua pe kapasida orekóva”).

Oiméramo ndaʼareguasúi gueteri reheja hague pe rresponsavilida ereko vaʼekue ha reñepyrũ hague eservi ótra asignasiónpe, aníkena reñedesanima. Heta persónapema reipytyvõ pe tembiapo rejapo vaʼekuépe nde pyʼaite guive, ha katuete resegíta eipytyvõ hetavépe. Heta persóna oĩ nderayhúva, ha aníke reduda enterovéva osegitaha omombaʼe la rejapóva.

Jehová siémpre pendeguerohorýta pendefiél haguére chupe ha upéva la iñimportantevéva  opa mbaʼégui. Haʼe “ndahesaraimoʼãi umi mbaʼe pejapo vaʼekuégui, mbaʼéichapa pehayhu héra, ha mbaʼéichapa yma guive koʼág̃a peve pesegi peservi meme umi imarangatúvape” (Heb. 6:10). Ko téxto ohechauka Ñandejára orekoha enkuénta umi mbaʼe porã jajapóva ymaite guive. Jehová ningo hakateʼỹ penderehe ha upévare ndahesaraimoʼãi pendehegui pórke peservi porã kuri chupe ha pesegíta pejapo upéva.

¿Ha nañaiméirõ umi ermáno okambiáva de asignasión ijedáma rupi apytépe? Lomímonte ideprovécho ñandéve ko informasión. ¿Mbaʼérepa jaʼe upéva?

Koʼág̃a ikatu avei oĩ ñanendive umi ermáno madúro ha iñexperiénsiava, okambia vaʼekue de asignasión. Jaaprovechákena pe oportunida jarekóva ñaaprende hag̃ua chuguikuéra. Upearã ikatu jajerure chupekuéra konsého térã suherénsia. Jajesareko avei hesekuéra jahecha hag̃ua mbaʼéichapa oipuru pe experiénsia orekóva hikuái okumpli porã hag̃ua iñasignasión.

¿Ndépa haʼe peteĩ ermáno ijedáva okambia vaʼekue de asignasión, térã peteĩ ermáno o ermána ikatúva oñevenefisia umi ermáno ijedáva experiénsiagui? Aníkena nderesarái Jehová omombaʼetereiha entéro umi oservi vaʼekuépe chupe fiélmente, ha osegíva hína ojapo upéva.