1. ¿Mbaʼérepa tekotevẽ ñañemoĩ Jehová poguýpe?

ENTEROVÉVA ningo ñañemoĩ vaʼerã Jehová poguýpe * pórke haʼe ñande Apohare, ha upévare oreko derécho heʼívo ñandéve mbaʼépa jajapo vaʼerã (Apoc. 4:11). Péro avei ñaneñeʼẽrendu chupe pórke haʼe ogoverna porãve enterovévagui. Heta tiémporema umi persóna orekóva podér ha autorida ogoverna umi ótro héntere, péro ndaipóri oñembojojáva Jehováre pórke haʼe iñarandu, oporohayhu, oiporiahuvereko la héntepe ha imbaʼerechakuaa. Ndaipóri ótro governánte haʼeichagua (Éx. 34:6; Rom. 16:27; 1 Juan 4:8).

2. Ohechaukaháicha Hebreos 12:9-11, ¿mbaʼérepa ñañemoĩ vaʼerã Jehová poguýpe?

² Jehová ningo ndoipotái ñañemoĩ ipoguýpe jakyhyjégui chugui, síno jahayhúgui chupe. Haʼe oipota jahecha chupe peteĩ Túa oporohayhúvaicha. Pe kárta oskrivi vaʼekuépe umi hebréope, apóstol Pablo heʼi ñañemoĩ vaʼerãha Ñandejára poguýpe pórke haʼe ñanemboʼe ‘ñane venefisiorãnte’ (elee Hebreos 12:9-11).

3. a) ¿Mbaʼéichapa jahechauka ñañemoĩha Jehová poguýpe? b) ¿Mbaʼe porandúpa ñarrespondéta?

³ Ñande ningo ñañemoĩ Jehová poguýpe ñañehaʼãmbaitéramo ñaneñeʼẽrendu chupe opa mbaʼépe, ha ñañehaʼãmbaitérõ ani hag̃ua jajerovia umi mbaʼe ñande ñapensávarente (Prov. 3:5). Ifasilve ningo ñañemoĩ hag̃ua Jehová poguýpe jaikuaa porãvévo umi kualida haʼe orekóva. ¿Mbaʼérepa  jaʼe upéva? Pórke umi ikualida ningo la omomýiva chupe ojapo hag̃ua opa mbaʼe (Sal. 145:9). Amáske jaikuaa Jehovápe jahayhuvéta chupe. Ha jahayhúramo Jehovápe nañaikotevẽmoʼãi peteĩ lísta heʼíva ñandéve mbaʼépa jajapo vaʼerã ha mbaʼépa ndajajapói vaʼerã. Ñande ñañehaʼãmbaite jahayhu pe iporãva ha ndajachaʼéi umi mbaʼe ivaívare, Jehová ojapoháicha (Sal. 97:10). Péro, ¿mbaʼérepa sapyʼánte ikatu ijetuʼu ñaneñeʼẽrendu hag̃ua Jehovápe? ¿Mbaʼépa ikatu oaprende umi ansiáno pe governadór Nehemíasgui, umi túa rréi David ehémplogui ha umi sy María ehémplogui? Ko artíkulope oñerrespondéta koʼã porandu.

4, 5. Ohechaukaháicha Romanos 7:21-23, ¿mbaʼérepa ikatu ijetuʼu ñañemoĩ hag̃ua Jehová poguýpe?

⁴ Sapyʼánte ikatu ijetuʼu ñandéve ñaneñeʼẽrendu hag̃ua pórke enterovéva japeka ha ñaneimperfékto. Upévare sapyʼánte ndajajapói Ñandejára ojeruréva. Adán ha Eva ojerrevelárõ guare Ñandejárare ha hoʼu pe frúta ojeproivi vaʼekue, haʼekuéra voi odesidi ijehegui mbaʼépa iporã ha mbaʼépa ivai (Gén. 3:22). Koʼág̃a avei oĩ hetaiterei hénte omboykéva Jehovápe ha odesidi ijehegui mbaʼépa iporã ha mbaʼépa ivai.

⁵ Ñande ningo jaikuaa ha jahayhu Jehovápe, upéicharõ jepe ikatu ijetuʼu ñañemoĩ hag̃ua ipoguýpe opa mbaʼépe. Apóstol Páblore oiko vaʼekue upéva (elee Romanos 7:21-23). Ñande avei haʼéicha jajapose iporãva, péro siémpre jaiko jalucha ani hag̃ua ñandestira pe ivaíva.

6, 7. ¿Mbaʼérepa sapyʼánte ijetuʼu avei ñañemoĩ hag̃ua Jehová poguýpe? Emoĩ peteĩ ehémplo.

⁶ Sapyʼánte avei umi kostúmbre ojerekóva pe lugár jakakuaa haguépe nañanepytyvõguasúi ñañemoĩse hag̃ua Jehová poguýpe. Umi hénte opensa lája ningo idiferénte jepi la Jehová opensa lájagui, ha sapyʼánte ijetuʼu jajehekýi hag̃ua umichagua pensamiéntogui. Jahechamína peteĩ ehémplo.

⁷ Oĩ lugár umi hénte ojepokuaahápe omboliga umi imitãvévape ipláta heta hag̃ua. Peteĩ ermána hérava Mary * ohasa vaʼekue upévare. Haʼe oikuaa mboyve Jehovápe oho vaʼekue peteĩ universida iñimportántevape oĩva ipaíspe. Ifamília omboliga chupe okonsegi hag̃ua peteĩ traváho iporãva ha oganatahápe heta pláta. Ha chupe voi ogusta upe idéa. Péro oikuaa ha ohayhu rire Jehovápe, okambia umi mbaʼe ojaposéva. Upéicharõ jepe, haʼe heʼi: “Sapyʼánte areko oportunida amoñepyrũ hag̃ua peteĩ negósio tuicháva, ikatutahápe agana heta pláta, péro oafektátava che servísio. Ijetuʼu gueteri chéve amboyke hag̃ua upe deséo, pórke upéicha voi che añemongakuaa vaʼekue. Ajerure asy Jehovápe chepytyvõ hag̃ua ikatu hag̃uáicha arrechasa umi traváho nopermitimoʼãiva chéve aservi porã chupe” (Mat. 6:24).

8. ¿Mbaʼépa jahecháta koʼág̃a?

⁸ Jahechaháicha, tuicha ñanepytyvõ ñañemoĩramo Jehová poguýpe. Péro koʼýte umi orekóva autorida, por ehémplo umi ansiáno, umi túa ha umi sy oñemoĩ vaʼerã Jehová poguýpe. ¿Mbaʼérepa upéva? Pórke upéicha ikatu hína oipytyvõ umi ótrope. Koʼág̃a jahecháta algúno ehémplo oĩva la Bíbliape ñanepytyvõtava jaipuru porã hag̃ua pe autorida jarekóva ikatu hag̃uáicha ñambovyʼa Jehovápe.

9. ¿Mbaʼe situasión ijetuʼúvapa ombohovái vaʼekue Nehemías?

⁹ Jehová onkarga umi ansiánope oñangareko hag̃ua ijovechakuérare (1 Ped. 5:2). Umi  ansiáno ikatu oaprende heta mbaʼe ohechávo mbaʼéichapa Nehemías otrata vaʼekue Ñandejára puévlope. Haʼe ningo governadór de Judá vaʼekue, upéicha rupi oreko tuicha autorida (Neh. 1:11; 2:7, 8; 5:14). Jahechamína mbaʼe situasión ijetuʼúvapa Nehemías ombohovái vaʼekue. Haʼe ohechakuaa umi judío oipuru hague pe témplo ojapo hag̃ua heta mbaʼe ndogustáiva Jehovápe ha nomeʼẽiha oikóvo umi kontrivusión okorrespondéva umi levítape pe léi omandaháicha. Avei haʼekuéra ndorrespetái pe léi sábado rehegua ha oĩ kuimbaʼe omendáva umi kuña ndoadoráivare Ñandejárape. ¿Mbaʼépa ojapo Nehemías ko situasiónpe? (Neh. 13:4-30).

10. ¿Mbaʼéichapa Nehemías ombohovái pe situasión ohasa vaʼekue?

¹⁰ Nehemías ningo ndoipuruvaíri pe autorida orekóva, upévare ndojopýi pe puévlope ojapo hag̃ua haʼe oipotávante. Upéva rangue oñemboʼe ipyʼaite guive Jehovápe oheka hag̃ua igía ha avei omboʼe pe puévlope Ñandejára léi (Neh. 1:4-10; 13:1-3). Nehemías iñumílde ha oipytyvõ iñermanokuérape omyatyrõ hag̃ua Jerusalén murálla (Neh. 4:15).

11. Heʼiháicha 1 Tesalonicenses 2:7, 8, ¿mbaʼéichapa umi ansiáno otrata vaʼerã umi ermánope?

¹¹ Umi ansiáno ningo ikatu ndohasái hína umi mbaʼe Nehemías ohasa vaʼekue, péro ikatu osegi iñehémplo heta hendáicha. Por ehémplo, haʼekuéra ningo oreko autorida, upéicharõ jepe nopensái iñimportanteveha umi ótrogui, síno ombaʼapo jejopy oipytyvõ hag̃ua umi ermáno ha ermánape ha mborayhúpe otrata chupekuéra (elee 1 Tesalonicenses 2:7, 8). Haʼekuéra iñumílde ha oporohayhueterei, ha upéva ojehechakuaa oñeʼẽ lájare umi ermánope. Andrés, peteĩ ermáno aréma oservíva kómo ansiáno, heʼi: “Ahechakuaa umi ermáno orreaksiona porãveha retratáramo chupekuéra mborayhúpe ha pyʼaporãme. Koʼã kualida oipytyvõ pe kongregasiónpe oapoja hag̃ua umi ansiánope”. Ótro ermáno hérava Tony ha aréma oservíva avei de ansiáno, heʼi: “Añehaʼãmbaite  asegi pe konsého jatopáva Filipenses 2:3-pe, ha upévare siémpre añehaʼã apensa umi ótro tuichaveha chehegui. Péva chepytyvõ ani hag̃ua aiko aovliga umi ermánope ojapo hag̃ua la che aipotávante”.

12. ¿Mbaʼérepa umi ansiáno iñumílde vaʼerã?

¹² Umi ansiáno iñumílde vaʼerã Ñandejára iñumildeháicha. Jehová ningo pe ogovernáva opa mbaʼe, upéicharõ jepe haʼe “ojayvy” omopuʼã hag̃ua “umi iñumíldevape pe yvýgui” (Sal. 18:35; 113:6, 7). Añetehápe, Jehová ndochaʼéi umi oñemombaʼeguasúvare (Prov. 16:5).

13. ¿Mbaʼérepa umi ansiáno oñatende vaʼerã la heʼívare?

¹³ Pe ansiáno oñemoĩva Jehová poguýpe oñatende vaʼerã la heʼívare ha mbaʼéichapa heʼi. Ndojapóiramo upéva, ikatu hína iñeʼẽ pohýi oĩramo ermáno ndorrespetáiva chupe (Sant. 1:26; Gál. 5:14, 15). Andrés, pe ermáno ñañeʼẽma hague, heʼi: “Sapyʼánte cheñeʼẽ pohyise haʼetéramo peteĩ ermáno térã ermána ndacherrespetaiha kómo ansiáno. Péro ajepyʼamongeta Ñandejára siervokuéra yma guare ehémplore, ha upéva chepytyvõ cheumílde ha chevuéno hag̃ua”. Umi ansiáno ohechauka oñemoĩha Jehová poguýpe oñeʼẽramo mborayhúpe umi ermanokuérape ha avei umi ótro ansiánope (Col. 4:6).

14. ¿Mbaʼe rresponsavilidápa Jehová omeʼẽ umi túape, ha mbaʼépa ohaʼarõ chuguikuéra?

¹⁴ Umi túa ningo omoakã ifamíliape, ha Jehová voi omeʼẽ chupekuéra upe rresponsavilida. Ñandejára oipota umi túa omboʼe, ogia ha okorrehi ifamiliakuérape (1 Cor. 11:3; Efes. 6:4). Péro upéva ndeʼiséi oipuru vaʼerãha hikuái ijautorida haʼekuéra oipotaháichante. Haʼekuéra ojecháta Ñandejárandi pórke haʼe rupive ningo “oexisti entéro família” (Efes. 3:14, 15). Umi túa ohechauka oñemoĩha Jehová poguýpe oipurúvo upe autorida orekóva Ñandejára oipotaháicha, ha tuichaiterei oipytyvõta chupekuéra ostudiáramo rréi David ehémplo.

15. ¿Mbaʼérepa tuakuéra osegi vaʼerã rréi David ehémplo?

¹⁵ Jehová ningo omoĩ Davídpe ndahaʼéi omoakã hag̃ua ifamíliante síno avei omoakã hag̃ua Israel kompletoite. Haʼe ningo rréi vaʼekue ha oreko heta podér, péro sapyʼánte oipuru vai avei ijautorida ha tuicha opeka (2 Sam. 11:14, 15). Upéicharõ jepe ohechauka oñemoĩha Jehová poguýpe ohejávo ojekorrehi chupe. Avei haʼe oñemboʼe ipyʼaite guive (Sal. 51:1-4). Rréi David ningo iñumílde vaʼekue, upévare oasepta umi konsého omeʼẽva chupe tahaʼe kuimbaʼe térã kuña (1 Sam. 19:11, 12; 25:32, 33). Haʼe oaprende  umi mbaʼe vai ojapo vaʼekuégui ha oservi porã jey Jehovápe, upéva ningo pe iñimportantevéva chupe g̃uarã.

16. ¿Mbaʼépa umi túa ikatu oaprende Davídgui?

¹⁶ Oiméramo nde peteĩ túa, ¿mbaʼépa ikatu reaprende David ehémplogui? Ani reipuru vai pe autorida Jehová omeʼẽva ndéve. Errekonose rejavy hague ha easepta umi konsého bíblico oñemeʼẽva ndéve. Rejapóramo upéicha ne rembireko ha ne família nderrespetáta neumílde haguére. Reñemboʼe jave ne famíliandi, emombeʼupaite Jehovápe umi mbaʼe reñandúva, péicha haʼekuéra ohendúta mbaʼeichaitépa nde reipota haʼe nepytyvõ ha ndegia. Ndéve g̃uarã Jehová servísio iñimportanteve vaʼerã opaite mbaʼégui (Deut. 6:6-9). Ne ehémplo hína pe rregálo iporãvéva ikatúva remeʼẽ ne famíliape.

17. ¿Mbaʼe rresponsavilidápa Jehová omeʼẽ umi sýpe?

¹⁷ Jehová omeʼẽ avei umi sýpe peteĩ rresponsavilida iñimportánteva pe famíliape. Omeʼẽʼimi avei chupekuéra autorida imembykuéra ári (Prov. 6:20). Haʼekuéra heʼíva ha ojapóva ikatu tuicha oipytyvõ ifamiliakuérape oikove aja entéro (Prov. 22:6). Jahechamína mbaʼépa umi sy ikatu oaprende María ehémplogui.

18, 19. ¿Mbaʼépa umi sy ikatu oaprende María ehémplogui?

¹⁸ María oikuaa porãiterei vaʼekue Ñandejára Ñeʼẽ. Haʼe ningo Jehová amigaite vaʼekue ha ipyʼaite guive orrespeta chupe. Haʼe oĩ vaʼekue dispuésta oñemoĩvo Jehová poguýpe, jepe upéva heʼise okambiaitetaha isituasión (Luc. 1:35-38, 46-55).

¹⁹ Oiméramo nde peteĩ sy, ¿mbaʼéichapa ikatu resegi María ehémplo? Primero, restudia vaʼerã la Biblia ha reñemboʼe meme oiko hag̃ua ndehegui Ñandejára amigaite. Segundo, reĩ vaʼerã dispuésta rejapóvo umi kámbio tekotevẽva Jehová ndeguerohory hag̃ua. Por ehémplo, ikatu oime nde túa ha nde sy ipochy rei vaʼekue, ha upévare iñeʼẽ pohýi ndéve ha ne ermanokuérape. Ha rekakuaágui péicha ikatu oime repensa ndaivairiha nde avei retrata péicha ne familiakuérape. Ha koʼág̃a reikuaáma mbaʼéichapa Jehová oipota retrata ne familiakuérape, upéicharõ jepe ikatu ijetuʼu gueteri ndéve ndepyʼaguapy hag̃ua ha nepasiénsia hag̃ua hesekuéra, koʼýte nekaneʼõramo ha haʼekuéra ojeporta vai (Efes. 4:31). Upéicha jave, iñimportanteterei reñemboʼe Jehovápe ha rejerure chupe tanepytyvõ. Peteĩ sy hérava Lidia heʼi: “Sapyʼánte tekotevẽ añemboʼe che pyʼaite guive ani hag̃ua cheñeʼẽ arhél che membýpe idesovediénte jave. Ha haʼe jepéramo algúna kósa, ajejokopaite jey ha añemboʼe Jehovápe chepytyvõ hag̃ua. Añetehápe  pe orasión chepytyvõ añetrankilisa hag̃ua” (Sal. 37:5).

20. ¿Mbaʼe provlémapa ikatu ombohovái umi sy, ha mbaʼéichapa ikatu osupera upéva?

²⁰ Oĩ avei umi sy ombohovái vaʼerã ótro provléma. Sapyʼánte ijetuʼu chupekuéra ohechauka hag̃ua ohayhuha imembykuérape (Tito 2:3, 4). Upéva oiko jepi pórke itúa ha isy ndohechaukái vaʼekue chupekuéra mborayhu. Oiméramo nde rekakuaa upéicha, aníkena resegi nde tuakuéra ehémplo. Peteĩ sy oñemoĩva Jehová poguýpe, tekotevẽta oaprende mbaʼéichapa ohechauka vaʼerã ohayhuha imembykuérape. Ikatu hína ijetuʼu chupe okambia hag̃ua opensáva, oñandúva ha ojapóva. Péro ikatu hína ojapo umi kámbio, ha upéva ou porãta pe sýpe ha avei ifamíliape.

21, 22. Heʼiháicha Isaías 65:13, 14, ¿mbaʼépa jahupytýta ñañemoĩramo Jehová poguýpe?

²¹ Rréi David oikuaa porã vaʼekue ideprovechoitereiha ñañemoĩ Jehová poguýpe. Haʼe heʼi: “Jehová omandáva guive oĩ porã ha ñanembopyʼarory. Jehová mandamientokuéra ideprovécho ha ñanderesapeʼa. Ñandejára, nde léi rupive nde rehekomboʼe umi ndeadorávape ani hag̃ua oho tape vaíre, ha umi ojapóva nde léi heʼíva ohupytýta hetaiterei mbaʼe porã” (Sal. 19:8, 11). Koʼág̃arupi ikatu jahecha mbaʼeichaitépa idiferénte umi oñemoĩva Jehová poguýpe ha umi orrechasáva ikonsehokuéra. Umi oñemoĩva Jehová poguýpe ‘osapukái vyʼágui, pórke oñeñandu porãiterei’ (elee Isaías 65:13, 14).

²² Umi ansiáno, umi túa ha umi sy oñemoĩramo Jehová poguýpe, oñeñandu porãve, ifamiliakuéra ovyʼave ha pe kongregasión kompletoite oĩve unído. Ha pe iñimportantevéva, péicha ombovyʼa Jehová korasõ (Prov. 27:11). ¿Oĩ piko ótra kósa iporãvéva upévagui?