1, 2. a) ¿Mbaʼérepa jaʼekuaa Armagedón oguerutaha heta mbaʼe iporãva? b) ¿Mbaʼe porandúpa ñarrespondéta ko artíkulope?

HETA hénte opensa jepi Armagedón haʼeha peteĩ gérra nukleár térã peteĩ desástre naturál ohundipátava ko yvy. Péro la Biblia nomboʼéi upéva, síno heʼi Armagedón oguerutaha heta mbaʼe iporãva, ha umi mbaʼe heʼíva hese ñanembovyʼa vaʼerã (Apoc. 1:3). Armagedón nohundimoʼãi yvyporakuérape, síno osalváta chupekuéra. ¿Mbaʼérepa jaʼe upéva?

² La Biblia ohechauka Armagedón ohunditaha umi goviérno umánope ha umi iñañávape, péro osalvataha umi ihústovape. Heʼi avei ko gérra osalvataha yvyporakuérape pórke ohundíta “umi ohundívape ko yvy” (Apoc. 11:18). Ñantende porãve hag̃ua koʼã mbaʼe, ñarrespondéta 4 porandu: ¿Mbaʼépa heʼise Armagedón? ¿Mbaʼe mbaʼépa oikóta oñepyrũ mboyve Armagedón? ¿Mbaʼépa jajapo vaʼerã jajesalva hag̃ua? ¿Ha mbaʼéichapa ikatu jasegi ñaneñeʼẽrendu ñahaʼarõ aja og̃uahẽ?

3. a) ¿Mbaʼépa heʼise “Armagedón”? b) ¿Mbaʼéichapa Apocalipsis 16:14, 16 ñanepytyvõ ñantende hag̃ua Armagedón ndahaʼeiha peteĩ lugár oĩva ko yvy ape ári?

³ (Elee Apocalipsis 16:14, 16). Pe palávra Armagedón una vénte oaparese la Bíbliape, ha ou peteĩ palávra hebrea heʼisévagui “Montáña de Meguidó” (Apoc. 16:16, nóta). Meguidó haʼe vaʼekue peteĩ siuda oĩ vaʼekue Israel yma guarépe (Jos. 17:11). Péro Armagedón ndahaʼéi hína peteĩ lugár oĩva ko yvy ape ári, síno haʼe hína umi situasión oñepresentátava oñembyaty hag̃ua ‘entéro umi rréi ko yvy ariguápe’ oñemoĩtava Ñandejára kóntrape, ha avei haʼe pe gérra oikótava oñembyaty  riremínte koʼã rréipe (Apoc. 16:14). Ko artíkulope jaipurúta pe palávra Armagedón ñañeʼẽ hag̃ua upe gérrare. Péro, ¿mbaʼérepa jaʼe Armagedón ndahaʼeiha peteĩ lugár oĩva ko yvýpe? Primero, pórke ndaipóri peteĩ montáña de Meguidó. Segundo, pórke pe sóna oĩva Meguidó jerére michĩeterei ha ndaijamoʼãi “entéro umi rréi ko yvy arigua” ni umi ijehérsito ni umi árma orekóva hikuái. Tercero, pórke jahechataháicha ko artíkulope, Armagedón oñepyrũta hína “umi rréi” oataka vove Ñandejára puévlope isarambíva ko múndo tuichakuére.

4. ¿Mbaʼérepa Jehová imanduʼa Meguidóre oñeʼẽ hag̃ua pe iñorairõ guasúre?

⁴ ¿Mbaʼérepa Jehová imanduʼa Meguidóre oñeʼẽ hag̃ua pe iñorairõ guasúre? Pórke Meguidópe ha pe válle de Jezreélpe, oĩva ijypýpe, oiko vaʼekue heta gérra ha sapyʼánte Jehová ointerveni ipuévlo rehehápe umi gérrape. Por ehémplo, “pe Meguidó y oríllape” Ñandejára oipytyvõ vaʼekue pe hués israelita Barácpe ogana hag̃ua pe ehérsito cananéope, omoakãva Sísara. Barac ha pe profetísa Débora oagradese vaʼekue Jehovápe oipytyvõ haguére chupekuéra. Peteĩ purahéi rupive haʼekuéra heʼi: “Umi estrélla yvága guive oñorairõ [...] Sísara kóntrape. Pe arrójo Cisón oguerosyry umi iñenemigokuérape” (Juec. 5:19-21).

5. ¿Mbaʼéichapa idiferénte Armagedón ha pe gérra oñorairõ haguépe Barac?

⁵ Barac ha Débora omohuʼã pe purahéi heʼívo: “Péicha toñehundipa umi ne enemigokuéra Jehová. Péro umi nderayhúva tomimbi pe kuarahýicha” (Juec. 5:31). Armagedónpe Ñandejára enemigokuéra oñehundíta avei péicha, péro umi ohayhúva chupe ojesalváta. Péro tuicha idiferénte Armagedón ha pe gérra oñorairõ haguépe Barac. Armagedónpe Ñandejára puévlo noñorairõmoʼãi ni ndoguerekomoʼãi mbaʼeveichagua árma. Haʼekuéra ‘tuicha imbaretevéta opytáramo pyʼaguapýpente ha ojerovia’ Jehováre ha ijehérsito yvagapeguáre (Is. 30:15; Apoc. 19:11-15).

6. ¿Mbaʼéichapa Jehová ikatu ohundi iñenemigokuérape?

⁶ ¿Mbaʼéichapa Jehová ohundíta iñenemigokuérape Armagedónpe? Ikatu hína heta hendáicha. Por ehémplo ikatu oipuru umi terremóto, amandáu térã umi rrájo (Job 38:22, 23; Ezeq. 38:19-22). Ikatu avei omopuʼã ojuehe iñenemigokuérape oñohundipa hag̃ua hikuái (2 Crón. 20:17, 22, 23). Ikatu oipuru avei hiʼanhelkuérape ohundi hag̃ua umi iñañávape (Is. 37:36). Tahaʼe haʼeháicha, Jehová oganáta. Enterovete iñenemigokuéra oñehundíta, péro umi ihústova ojesalváta (Prov. 3:25, 26).

7, 8. a) Heʼiháicha 1 Tesalonicenses 5:1-6, ¿mbaʼépa oanunsiáta umi goviérno umáno? b) ¿Mbaʼérepa ipeligrósota upe japu?

⁷ “Jehová ára” oñepyrũ mboyve ojeʼéta hína: “¡Jaikóma pyʼaguapýpe ha segúro porã!” (elee 1 Tesalonicenses 5:1-6). Pe téxto de 1 Tesalonicenses 5:2 heʼívo “Jehová ára”, oñeʼẽ hína pe ‘jehasa asy guasúre’ (Apoc. 7:14). ¿Mbaʼéichapa jaikuaáta oñepyrũtamaha pe ‘jehasa asy guasu’? La Biblia omombeʼu oñeanunsiataha ‘jaikomaha pyʼaguapýpe ha segúro porã’.

⁸ ¿Mbaʼérepa umi governánte heʼíta péicha? Upéva ndajaikuaaporãi. ¿Omoirũtapa chupekuéra umi omoakãva umi rrelihión? Posívlemente. Péro si jaikuaa porã ojeʼe vove ‘jaikomaha pyʼaguapýpe ha segúro porã’, upéva haʼetaha peteĩ japu oúva umi demóniogui. Ha upéva ipeligrósota pórke umi hénte añetehápe opensáta oĩmaha pyʼaguapy, péro ndoikuaaiete oñepyrũtamaha peteĩ jehasa asy arakaʼeve oikoʼỹ haguéicha. “Upepete oñeimoʼãʼỹve jave oñehundíta hikuái. Upéva  oúta hiʼarikuéra derrepentete, peteĩ kuña hasyháicha derrepentete imemby hag̃ua”. Péro, ¿mbaʼépa oikóta Jehová siervokuéra ifiélvagui? Haʼekuéra ningo ndoikuaái arakaʼetépa oikóta upéva, upévare ikatu hína oñesorprende oñepyrũvo Jehová ára, péro haʼekuéra oĩtama preparádo.

9. ¿Mbaʼéichapa Ñandejára ohundíta Satanás múndo?

⁹ Jehová nohundimoʼãi Satanás múndo kompletoite una vetépe, ojapo haguéicha Noé tiémpope. Upéva rangue, Ñandejára ohundi raẽta peteĩ párte, ha upéi ohundíta pe ótra párte. Primeroite voi ohundíta Babilonia Guasúpe, haʼéva hína entéro umi rrelihión japu oĩva ko múndope. Upe rire, Armagedónpe Ñandejára ohundíta pe ótra párte, umíva hína pe párte polítika, militár ha komersiál. Ñaanalisa porãmína mbaʼéichapa Ñandejára ojapóta upéva.

10. Heʼiháicha Apocalipsis 17:1, 6 ha 18:24, ¿mbaʼérepa Jehová ohundíta Babilonia Guasúpe?

¹⁰ “Ojekastigáta pe kuña rekovaípe” (elee Apocalipsis 17:1, 6; 18:24). Babilonia Guasu káusare hetáma oñeñeʼẽ vai Ñandejára rérare. Umi rrelihión omboʼe heta japu Ñandejárare ha oñekomporta ojapoháicha peteĩ kuña rekovai, pórke oapoja umi goviérno oĩvape ko yvýpe. Babilonia Guasu oipuru ipodér ojaprovecha hag̃ua ihentekuérare ha oipeʼa hag̃ua chuguikuéra ipláta. Avei hetaiterei héntepema ojuka, umíva apytépe Ñandejára siervokuérape (Apoc. 19:2). ¿Mbaʼéichapa Jehová ohundíta Babilonia Guasúpe?

11. ¿Mbaʼépa orrepresenta pe “animál salváhe pytãitéva”, ha mbaʼéichapa Jehová oipurúta chupe?

¹¹ Jehová ohundíta “pe kuña rekovaípe”, upearã oipurúta pe “animál salváhe pytãitéva” ha umi “10 hatĩ” orekóva. Ko animál salváhe orrepresenta hína pe Organización de las Naciones Unídaspe (ONU). Umi 10 hatĩ orrepresenta umi goviérno oapojáva upe organisasiónpe. Ñandejára oipota vove, koʼã goviérno ha pe Naciones Unidas oatakáta Babilonia Guasúpe. “Oipeʼapaitéta chugui ikosakuéra ha ohejáta chupe opío”, péicha enterove ohecháta  ojapo hague hetaiterei mbaʼe vai (Apoc. 17:3, 16). Pyaʼeterei ningo oñehundíta, oikorõguáicha “un díapente”. Entéro umi oapojáva chupe oñesorprendéta, pórke haʼe heʼi vaʼekue: “Che ningo peteĩ rréina ha amanda guasu, che ndahaʼéi viúda ha núnka ndaikomoʼãi añelamenta” (Apoc. 18:7, 8).

12. ¿Mbaʼépa Jehová ndohejamoʼãi ojapo umi tetã, ha mbaʼérepa?

¹² Ñandejára ndohejamoʼãi umi tetã ohundi ipuévlope. Haʼekuéra ningo vyʼápe ogueraha héra ha osẽ Babilonia Guasúgui haʼe omanda haguéicha (Hech. 15:16, 17; Apoc. 18:4). Ñandejára puévlo oipytyvõma avei hetaiterei héntepe osẽ hag̃ua Babilonia Guasúgui. Upévare Jehová siervokuérape ndohupytymoʼãi umi kastígo oútava Babilóniape. Upéicharõ jepe, haʼekuéra tekotevẽ ijerovia mbarete oaguanta hag̃ua umi mbaʼe oútava.

13. a) ¿Mávapa hína Gog? b) Heʼiháicha Ezequiel 38:2, 8 ha 9, ¿arakaʼépa oñepyrũta Armagedón?

¹³ Gog oatakáta (elee Ezequiel 38:2, 8, 9). Oñehundi rire entéro umi rrelihión japu, sólamente opytáta peteĩ rrelihión ko yvy ape ári. Jehová puévlo ojoguáta peteĩ yvyramáta haʼeñomíme opytáva peteĩ torménta rire. Satanás katu ipochyetereíta, upévare oipurúta umi “profesía kyʼa”, térã umi japu oúva umi demóniogui ikatu hag̃uáicha umi tetã oñembyaty oataka hag̃ua Jehová siervokuérape (Apoc. 16:13, 14). Koʼã tetã oñembyatýtavape oñehenói “Gog haʼéva Magog territoriopegua”. Umi tetã oataka vove Ñandejára puévlope, oñepyrũtama pe gérra de Armagedón (Apoc. 16:16).

14. ¿Mbaʼépa Gog ohechakuaáta?

¹⁴ Gog, térã umi tetã oñembyatýtava oataka hag̃ua Ñandejára puévlope, ojeroviáta pe podér militár orekóvare (2 Crón. 32:8). Péro ñande jajeroviáta Ñandejára Jehováre, ha umi hénte opensáta ñandevyroitereiha. ¿Mbaʼérepa? Pórke upe tiémpope ohechakuaáta hikuái Babilonia Guasu ipoderósoramo jepe, umi idioskuéra ndosalvái hague chupe ‘pe animál salváhegui’ ni umi ‘10 hatĩgui’ (Apoc. 17:16). Gog opensáta ifasiltaha ohundi hag̃ua Ñandejára puévlope, upévare “umi arai  ojahoʼiháicha peteĩ país” oatakáta chupekuéra (Ezeq. 38:16). Péro ensegidamínte Gog ohechakuaáta hoʼa hague peteĩ trámpape. Oiko haguéicha faraón rehe pe Mar Rójope, ontendéta oñorairõha hína Jehová kóntrape (Éx. 14:1-4; Ezeq. 38:3, 4, 18, 21-23).

15. ¿Mbaʼépa Cristo ojapóta Armagedónpe?

¹⁵ Cristo ha ijehérsito yvagapegua ñanedefendéta ha ohundipaitéta Gog ha ijehersitokuérape (Apoc. 19:11, 14, 15). Jaikuaaháicha, Satanás, pe enemígo tuichavéva orekóva Jehová, omomýita umi tetãme oataka hag̃ua Ñandejára puévlope. Péro, ¿mbaʼépa oikóta hese? Jesús omombóta chupe ha umi demóniope peteĩ yvykua pypukúpe, ha oĩta upépe 1.000 áñore (Apoc. 20:1-3).

16. a) ¿Mbaʼéichapa jahechauka jaikuaaha Ñandejárape? b) ¿Mbaʼépa oikóta Armagedónpe umi oikuaávagui Ñandejárape?

¹⁶ Oiméramo ñande heta tiémporema jaservi Ñandejárape térã ramoiténte, enterovéva tekotevẽ jahechauka jaikuaaha Ñandejárape ha ‘ñaneñeʼẽrenduha umi notísia porãme, oñeʼẽva ñande Ruvicha Jesús rehe’ (2 Tes. 1:7-9). Jaikuaa Ñandejárape heʼise jaikuaaha umi iléi, umi mbaʼe ogustáva chupe ha umi mbaʼe ndogustáiva chupe. Jahechauka avei jaikuaaha Ñandejárape jahayhúvo ha ñaneñeʼẽrendúvo chupe, ha avei jaadorávo chupe añoite (1 Juan 2:3-5; 5:3). Jahechaukáramo jaikuaaha Ñandejárape, haʼe avei heʼíta ñandekuaaha, ha upéva ñandesalváta Armagedónpe (1 Cor. 8:3). ¿Mbaʼérepa jaʼe upéva? Pórke Ñandejára ñandekuaáramo, upéva heʼise ñandeguerohoryha.

17. ¿Mbaʼépa heʼise ñaneñeʼẽrenduha “umi notísia porãme, oñeʼẽva ñande Ruvicha Jesús rehe”?

¹⁷ ‘Umi notísia porã, oñeʼẽva ñande Ruvicha Jesús rehe’ haʼe hína entéro mbaʼe Jesús omboʼe vaʼekue, jatopáva la Bíbliape. Ñande ñaneñeʼẽrendu koʼã notísia porãme jajapóvo umi mbaʼe Jesús omboʼe vaʼekue. Por ehémplo ñamotenondéramo Ñandejára servísio, jajapóramo iléi heʼíva ha ñañeʼẽ meméramo Ñandejára  Rréinore (Mat. 6:33; 24:14). Ñaneñeʼẽrendu avei umi notísia porãme jaapojávo umi unhídope, haʼekuéra ningo opredika vaʼerã umi notísia porã ha oipytyvõ vaʼerã la héntepe oiko hag̃ua chuguikuéra Jesús disípulo, ha upéva ningo peteĩ traváho iñimportantetereíva (Mat. 25:31-40).

18. ¿Mbaʼéichapa umi unhído omyengoviáta entéro mbaʼe ojejapo vaʼekue hesehapekuéra?

¹⁸ Umi unhído koʼẽrõitéma omyengoviáta entéro mbaʼe ojapo vaʼekue hesehapekuéra umi “ótro ovechakuéra” (Juan 10:16). ¿Mbaʼéichapa ojapóta upéva? Oñepyrũ mboyve Armagedón, enterovete umi 144.000 unhído oĩmbátama amo yvágape, haʼekuéra nomanomoʼãvéima ha oĩta pe ehérsito yvagapeguápe ohundítava Gógpe ha oprotehétava pe ‘aty guasúpe’, haʼéva Ñandejára siervokuéra (Apoc. 2:26, 27; 7:9, 10). Ajépa javyʼaitéta jaikuaágui ñaipytyvõ hague umi unhídope oĩrõ guare gueteri ko yvy ape ári.

19, 20. Tahaʼe haʼéva umi provléma jarekóva, ¿mbaʼéichapa ikatu jasegi ñaneñeʼẽrendu ñahaʼarõ aja Armagedón?

¹⁹ Koʼã ára paha ijetuʼuetévape Jehová siervokuéra jahasa heta pruéva, upéicharõ jepe ikatu hína vyʼápe ñaaguanta (Sant. 1:2-4). Péro jahupyty hag̃ua upéva ñañemboʼe meme vaʼerã ñande pyʼaite guive (Luc. 21:36). Tekotevẽ avei káda día jastudia la Biblia ha jajepyʼamongeta hese, umíva apytépe jastudia vaʼerã umi profesía ohechaukáva umi mbaʼe oikótava koʼẽrõitéma (Sal. 77:12). Avei ñasẽ meme vaʼerã japredika. Jajapóramo entéro koʼã mbaʼe, ñamombaretevéta ñande fe ha ñane esperánsa.

²⁰ Epensamíntena mbaʼeichaitépa javyʼáta ág̃a oñehundi vove Babilonia Guasu ha opa vove Armagedón. Ha koʼýte javyʼavétantema opavavénte orrespeta vove Ñandejárape ha orrekonose haʼe añoite orekoha derécho ñanegovernávo (Ezeq. 38:23). Añetehápe Armagedón peteĩ notísia porã hína umi oikuaávape g̃uarã Ñandejárape, iñeʼẽrendúvape Itaʼýrape ha oaguantávape ipahaite peve (Mat. 24:13).