1. Emyesakã mbaʼépa Jehová opensa umi iñumíldevare.

UMI iñumíldeva ipyʼaite guive añoite ikatu hína oiko Ñandejára amigoitéramo. Jehová ohayhu umi persóna iñumíldevape, “péro mombyrýnte opyta pe oñemombaʼeguasúvagui” (Sal. 138:6). Entéronte jaipota Jehová ñanderayhu ha ñandeguerohory, upévare iñimportanteterei ñañehaʼã ñaneumílde hag̃ua.

2. ¿Mbaʼépa jahecháta ko artíkulope?

² Ko artíkulope ñarrespondéta hína koʼã mbohapy porandu: 1) ¿Mbaʼépa heʼise ñaneumildeha? 2) ¿Mbaʼérepa tekotevẽ ñañehaʼã ñaneumílde? 3) ¿Mbaʼéicha javépa ikatu hína ijetuʼu ñaneumílde hag̃ua? Jahecháta mbaʼéichapa ñaneumílderamo ou porãta ñandéve voi ha ñambovyʼáta Jehovápe (Prov. 27:11; Is. 48:17).

3. ¿Mbaʼépa heʼise ñaneumildeha?

³ Peteĩ persóna iñumíldeva noñembotuichái. Haʼe oikuaa porã Jehová tuichaveha chugui ha ndoikói opensa iñimportanteveha ótrogui, síno orrekonose umi ótro tuichaveha chugui (Filip. 2:3, 4).

4, 5. ¿Mbaʼérepa ndovaléi jajesegi umi mbaʼe jahechávarente jaʼe hag̃ua peteĩ persóna iñumildeha?

⁴ Oĩ persóna haʼetévaicha iñumildetereíva. Ikatu oime hiʼotĩ térã ikirirĩmi. Ikatu iñamávle ha otrata porã ótrope pórke ituakuéra omboʼe chupekuéra upéicha. Péro ipyʼapýpe ikatu hína oñemombaʼeguasueterei. Peichagua persóna en kualkiér moménto  ohechauka mbaʼépa añetehápe oĩ ipyʼapýpe (Luc. 6:45).

⁵ Oĩ avei persóna idesidídova ha ndokyhyjéiva heʼi hag̃ua la opensáva, péro upéva ndeʼiséi oñembotuichaha katuete (Juan 1:46, 47). Koʼãichagua persóna oñeñangareko vaʼerã ani hag̃ua ou ojeroviaiterei ijehe ikatupyry haguére. Upéicharõ, oiméramo jepe ñanekirirĩ térã ñandedesidído, entéronte tekotevẽ ñañehaʼãmbaite ñaneumílde hag̃ua.

6. Ohechaukaháicha 1 Corintios 15:10, ¿mbaʼépa ikatu ñaaprende apóstol Pablo ehémplogui?

⁶ Ñapensamína apóstol Pablo ehémplore. Jehová ningo heta oipuru vaʼekue chupe omoñepyrũ hag̃ua umi kongregasión heta siudárupi. Ikatu voi jaʼe haʼe ojapo hague hetave mbaʼe umi ótro apóstolgui. Upéicharõ jepe Pablo núnka nopensái tuichave hague iñermanokuéragui. Haʼe iñumílde ha heʼi: “Che ningo pe michĩvéva umi apóstol apytépe ha namereséi voi ojeʼe cherehe haʼeha apóstol, pórke yma apersegi vaʼekue Ñandejára kongregasiónpe” (1 Cor. 15:9). Pablo ningo oĩ porã vaʼekue Ñandejára renondépe, péro haʼe orrekonose ohupyty hague upéva Ñandejára imbaʼeporãiterei rupínte hendive, ndahaʼéi ikatupyry haguére ni ojapo haguére peteĩ traváho iñimportánteva (elee 1 Corintios 15:10). Péicha apóstol Pablo oheja peteĩ ehémplo iporãitereíva oskrivírõ guare umi ermáno Corintoguápe, upépe oĩ vaʼekue opensáva iñimportanteveha chugui (2 Cor. 10:10).

7. ¿Mbaʼéichapa peteĩ ermáno irresponsavilida hetáva ohechauka iñumílde hague?

⁷ Heta Testígope omokyreʼỹ ermáno Karl Klein rembiasakue. Haʼe oĩ vaʼekue pe Kuérpo Governántepe. Ermáno Klein iñumílde vaʼekue, upévare omombeʼu ijetuʼu hague chupe heta mbaʼe ha oreko hague heta devilida. Por ehémplo, áño 1920 rupi haʼe osẽ ypy vaʼekue  opredika ogahárupi, péro ijetuʼueterei vaʼekue chupe, upévare 2 áñorupi nosẽvéi opredika. Upéi, oservírõ guare Betélpe, opyta ipochy peteĩ tiémpore peteĩ ermánore pórke omeʼẽ chupe konsého. Avei ermáno Klein ou hasykatu pórke ojestresa ha ojepyʼapyeterei, péro upéi ojerrekupera jey. Upéicharõ jepe, haʼe ohupyty vaʼekue heta priviléhio iporãitereíva Jehová servísiope. Ko ermáno ningo oreko vaʼekue heta rresponsavilida, péro ¡ajépa iñumildete ajeve orrekonose ikangy hague heta mbaʼépe! Heta ermáno ha ermána mborayhúpe imanduʼa ermáno Klein rembiasakuére ha mbaʼeichaitépa haʼe isinséro vaʼekue. *

8. ¿Mbaʼéichapa 1 Pedro 5:6 ohechauka ñambovyʼaha Jehovápe ñaneumílderamo?

⁸ Apóstol Pedro ohechauka vaʼekue ikatuha ñambovyʼa Jehovápe ñaneumílderamo, ha ndaipóri ótra kósa iñimportantevéva upévagui (elee 1 Pedro 5:6). Oñeʼẽvo ko téxtore, pe lívro “Eju chemoirũ” heʼi: “Ñañembotuichaséramo ningo haʼete jaʼúva venéno. Peteĩ tapicha ijejapóva ikatupyryvéramo jepe ndovaléi mbaʼeverã Ñandejárape g̃uarã. Ha pe ndaijejapóiva katu jepe heta mbaʼe ndojapokuaái, ovaleterei Jehová pópe”. Upéi heʼive Ñandejára ‘katuete ñanembotuichataha avei ñañehaʼãramo ñañemomirĩ’. * ¿Oĩ piko ótra kósa iñimportantevéva ke la ñambovyʼa Jehová korasõ? (Prov. 23:15).

9. ¿Mbaʼérepa ñaneumílderamo umi ótro oñemoag̃uiséta ñanderehe?

⁹ Ñaneumílderamo ñambovyʼa Jehovápe, péro ñanderehe avei ojapo porã ha ñande rapichakuéra oñemoag̃uiséta ñanderehe. Ñantende hag̃ua upéva ñapensami mbaʼeichagua persónandipa ñaimese (Mat. 7:12). Ajépa ndaigustoiete ñaĩ peteĩ persóna oñemohatãvandi haʼe heʼívapente, térã nohenduséiva voi ñande ñapensáva. Péro igustoiterei jahasa tiémpo umi ermáno térã ermána oporohayhúva ndive, oiporiahuverekóva hapichápe ha iñumíldeva (1 Ped. 3:8). Ñande ñañemoag̃uiséramo koʼãichagua persónare, haʼekuéra ikatu avei oñemoag̃ui ñanderehe, péro upearã tekotevẽ ñaneumílde.

10. ¿Mbaʼérepa ifasilve peteĩ iñumíldevape oasepta hag̃ua umi mbaʼe ijetuʼúva?

¹⁰ Ñaneumílderamo ikatúta avei jagueropuʼaka umi situasión ijetuʼúva. Ñande ningo sapyʼánte ikatu hína jahecha térã jahasa peteĩ  situasión ñandéve g̃uarã iñinhústova. Rréi Salomón heʼi vaʼekue: “Che ahecha umi siérvo oikoha kavaju ári, ha umi governánte iñimportánteva katu oiko yvýrupi oikoháicha umi esklávo” (Ecl. 10:7). Sapyʼánte noñemombaʼéi umi ikatupyrývape, ha sapyʼánte katu umi ndaikatupyrýivape la oñemombaʼe. Upévare Salomón orrekonose iporãveha jaaseptánte umi mbaʼe oikóva, jaiko rangue jajesarekoiterei umi mbaʼe vaíre ha japyta ñandepochy (Ecl. 6:9). Ñaneumílderamo ifasilvéta jaaseptánte hag̃ua umi mbaʼe oikóva ha nañandegustáiva.

11. ¿Mbaʼéichapa ñarreaksiona vaʼerã oñemeʼẽ jave ñandéve konsého?

¹¹ Káda día ningo oñepresenta hetaiterei situasión ikatuhápe jahechauka ñaneumildeha. Jahechamína unos kuánto ehémplo. Oñemeʼẽ jave ñandéve konsého. Upéicha jave ningo tekotevẽ ñanemanduʼa upe jajapo vaʼekue ikatuha hína ivaive upe ñande ñapensávagui. Umichagua situasiónpe ndajaaseptaséi jepi umi konsého. Ikatu voi jakritika upe persónare térã nañandegustái omeʼẽ lája ñandéve pe konsého. Péro ñaneumílderamo ñañehaʼãta ñakambia ñapensa lája.

12. Heʼiháicha Proverbios 27:5, 6, ¿mbaʼérepa jaagradese vaʼerã oñemeʼẽramo ñandéve konsého? Emoĩ peteĩ ehémplo.

¹² Peteĩ persóna iñumíldeva oagradese umi konsého oñemeʼẽva chupe. Ñamoĩmína peteĩ ehémplo. Epensamína reimeha hína Salón del Réinope ha reñeʼẽma hague heta ermánondi. Upéi peteĩ ermáno nemohaʼeño ha heʼi ndéve erekoha ne rãire lechúga rembyre. Añetehápe ningo retĩetereíta, péro ajépa reagradeséta upe ermánope ndeavisa haguére. Ha repensáta voi: “¿Mbaʼére piko ótro ajeʼíma ndacheavisái raʼe?”. Upéicha avei ñaneumílderamo jaagradeséta peteĩ ermáno térã ermánape omeʼẽ haguére ñandéve pe konsého ñaikotevẽva. Jahecháta voi chupe ñane amígoramo, ndahaʼéi peteĩ enemígoicha (elee Proverbios 27:5, 6; Gál. 4:16).

13. ¿Mbaʼéichapa ikatu jahechauka ñaneumildeha ótro orresivi jave peteĩ priviléhio?

¹³ Ótro orresivi jave peteĩ priviléhio Jehová servísiope. Peteĩ ansiáno hérava Jason heʼi: “Ahecha jave oñemeʼẽha ótrope peteĩ priviléhio, añeporandu voi mbaʼérepa chéve noñemeʼẽi raʼe”. ¿Ndépa repensámava upéicha sapyʼánte? Ndaivaíri ningo ñañehaʼãmbaite ñambaʼapove Jehovápe g̃uarã (1 Tim. 3:1). Péro tekotevẽ jakuida umi mbaʼe ñapensáva, pórke ikatu hína mbeguekatúpe  ñañembotuicháma ñande pyʼapýpe. Por ehémplo, peteĩ ermáno ikatu ou opensa haʼémante voi upe ojapo porãvétava peteĩ tembiapo kongregasiónpe. Térã peteĩ ermána ikatu opensa: “Che ména ningo ikatupyryve fulánogui ha ojapo porãvéta upe traváho”. Péro añetehápe ñaneumílderamo, nañapensamoʼãi upéicha.

14. ¿Mbaʼépa ikatu ñaaprende Moisés ehémplogui?

¹⁴ Jahechamína mbaʼéichapa Moisés orreaksiona vaʼekue ótro orresivírõ guare priviléhio, ha mbaʼépa ñande ikatu ñaaprende chugui. Haʼe ningo omombaʼeterei vaʼekue pe rresponsavilida orekóva ogiávo umi israelítape. Péro upéi Jehová opermiti unos kuánto kuimbaʼe oipytyvõ Moiséspe hembiapópe. ¿Iselósopa raʼe haʼe upévare? Nahániri (Núm. 11:24-29). Upéi haʼe ohechauka avei iñumildeha opermitírõ guare unos kuánto kuimbaʼe oipytyvõ chupe ohusga hag̃ua pe puévlope (Éx. 18:13-24). Péicha oĩ rupi hetave hués, umi káso oñeñatende pyaʼeve ha umi israelita natekotevẽi ohaʼarõiterei. Jahechaháicha, Moiséspe g̃uarã iñimportanteve vaʼekue pe puévlo oĩ porã, ndahaʼéi umi priviléhio haʼe oguerekóva. ¡Ajépa iporãite iñehémplo! Ñanemanduʼa vaʼerã jaipotáramo Jehová ojevale ñanderehe iñimportanteveha hína ñaneumílde ke la ñandekatupyry. Salmo 138:6 heʼi: “Jehová oikóramo jepe yvatete oreko enkuénta pe iñumíldevape”.

15. ¿Mbaʼéichapa heta ermánogui ou okambia isituasión?

¹⁵ Okambiáramo ñane situasión. Umi áño ohasa vaʼekuépe, heta ermáno ha ermána oservímava Jehovápe heta áñore okambia iñasignasión. Por ehémplo áño 2014-pe Jehová organisasión heʼi ndaiporimoʼãveimaha superintendénte de distríto, upévare koʼã ermánope ha hembirekópe oñekambia iñasignasión. Upe áñope ojedesidi avei umi ermáno oservíva de superintendénte de sirkuíto  ohupyty vove 70 áño oñekambiataha iñasignasión. Avei umi ermáno orekóva 80 áño térã hetave, ndaikatumoʼãvéima oservi kómo koordinadór del kuérpo de ansiáno. Avei heta ermáno ha ermána oservi vaʼekue Betélpe oñekambia iñasignasión ha koʼág̃a oservi de prekursór. Oĩ avei ohejáva iñasignasión pórke ou hasykatu, oñangareko vaʼerã ifamiliakuéra oikotevẽvare ajúda, térã hetave mbaʼére.

16. ¿Mbaʼéichapa heta ermáno ohechauka iñumildeha oaseptávo umi kámbio?

¹⁶ Añetehápe heta koʼã ermánope ijetuʼu kuri umi kámbio. Oĩ ndovyʼái vaʼekue pórke ogustaiterei kuri chupekuéra umi traváho ojapo vaʼekue, térã ojapo rupi upéva heta tiémporema. Péro upéi oñeñandu porãvéma. ¿Mbaʼéicha rupípa? Pórke haʼekuéra ohayhu Jehovápe ha oikuaa porã oñemeʼẽ hague chupe, ndahaʼéi peteĩ asignasiónpe ni oreko hag̃ua peteĩ título (Col. 3:23). Haʼekuéra iñumílde ha ovyʼa osegi haguére oservi Jehovápe tahaʼe haʼéva pe traváho ojapóva koʼág̃a. Koʼã ermáno omoĩ Ñandejára pópe entéro mbaʼe oipyʼapýva chupekuéra pórke oikuaa haʼe ojepyʼapyha hesekuéra (1 Ped. 5:6, 7).

17. ¿Mbaʼérepa javyʼaite la Biblia ñanemokyreʼỹ haguére ñaneumílde hag̃ua?

¹⁷ Ajépa javyʼaite la Biblia ñanemokyreʼỹ haguére ñañehaʼã hag̃ua ñaneumílde. Ñande ñaneumílderamo, ñandéve voi ou porã ha avei ñande rapichakuérape. Ikatúta avei jagueropuʼaka umi situasión ijetuʼúva, ha iñimportanteveha katu, ñañemoag̃uive ñande Ru yvagapeguáre. ¡Ñanembovyʼaiterei ningo jaikuaávo Ñandejára, haʼéramo jepe pe Dios Todopoderóso, ohayhuha ha oguerohoryha umi isiérvo iñumíldevape! (Is. 57:15).