1. ¿Mbaʼéicha javépa ikatu ijetuʼu jaservi Jehovápe?

¿MBAʼÉICHA javépa nde repensa ijetuʼuveha jaservi Jehovápe? ¿Ñaneprovléma heta jave térã jaiko jave pyʼaguapýpe? Ñambohovái jave umi situasión ijetuʼúva ningo ifásil ñandéve ñanemanduʼa hag̃ua Jehováre ha ñakonfia hese. ¿Péro mbaʼépa jajapo jaiko jave pyʼaguapýpe? ¿Ikatúpa sapyʼánte ñanderesarái mbaʼeichaitépa iñimportánte jaservi Jehovápe? Umi israelítape Jehová oavisa vaʼekue ikatuha oiko hesekuéra upéva (Deut. 6:10-12).

2. ¿Mbaʼe ehémplopa oheja vaʼekue rréi Asá?

² Rréi Asá oheja vaʼekue peteĩ ehémplo iporãitereíva, pórke haʼe ohechauka vaʼekue iñaranduha ojeroviávo Jehováre ipyʼaite guive. Haʼe oservi vaʼekue Jehovápe ivaírõ guare la situasión, ha avei oikórõ guare hikuái pyʼaguapýpe. Imitãite guive, Asá “oservi vaʼekue Jehovápe ipyʼaite guive” (1 Rey. 15:14, nóta). Asá ohechauka vaʼekue oserviha Jehovápe ipyʼaite guive oipeʼávo Judágui pe adorasión fálsa. La Biblia heʼi hese: “Haʼe oipeʼapa umi dios extranhéro altár, umi lugár ijyvatéva, omonguʼi umi kolúmna sagráda ha oikytĩ umi póste sagrádo” (2 Crón. 14:3, 5). Haʼe oipeʼa vaʼekue ijavuéla Maacápe jepe ipuéstogui, haʼe ningo rréina vaʼekue upérõ. Ojapo hese upéicha, pórke haʼe omokyreʼỹ vaʼekue la héntepe oadora hag̃ua peteĩ taʼanga (1 Rey. 15:11-13).

3. ¿Mbaʼépa jahecháta ko artíkulope?

³ Asá ndahaʼéi vaʼekue ohundínteva umi taʼanga ojeadoráva, síno oipytyvõ vaʼekue umi hénte oikóvape Judápe oadora jey hag̃ua Jehovápe. Jehová ovendesi rupi Asá ha umi israelítape, oiko hikuái pyʼaguapýpe. * Asá ogovernárõ guare,  10 áño aja “pe yvýpe oiko hikuái pyʼaguapýpe” (2 Crón. 14:1, 4, 6). Ko artíkulope jahecháta mbaʼéichapa Asá oaprovecha vaʼekue upe tiémpo oikoha hikuái pyʼaguapýpe. Upéi jahecháta umi kristiáno síglo primérope guare ehémplo. Ojapo haguéicha Asá, haʼekuéra oaprovecha vaʼekue avei pe tiémpo oiko haguépe pyʼaguapýpe. Ha ultimoite ñambohováita ko porandu: Oiméramo ne retãme pe goviérno oheja peadora Jehovápe lívremente, ¿mbaʼéichapa ikatu reaprovecha pe tiémpo peikohápe pyʼaguapýpe?

4. Heʼiháicha 2 Crónicas 14:2, 6, 7, ¿mbaʼéichapa Asá oaprovecha vaʼekue pe tiémpo oikohápe hikuái pyʼaguapýpe?

⁴ (Elee 2 Crónicas 14:2, 6, 7). Asá heʼi vaʼekue umi héntepe Jehová ‘omombytuʼu hague chupekuéra umi iñenemigokuéra oĩvagui ijerére’. Péro Asá nopensái vaʼekue pe tiémpo oikohápe hikuái pyʼaguapýpe opytánte vaʼerãha hikuái ojekuʼako. Upéva rangue, heʼi oñemopuʼã hag̃ua umi siuda, umi murálla, umi tórre ha umi okẽ guasu. Haʼe heʼi umi Judaguápe: “Ñane retã oĩ gueteri ñande poguýpe”. ¿Mbaʼépa heʼise rakaʼe Asá? Haʼekuéra ikatuha oviaha lívremente pe yvy Ñandejára omeʼẽ vaʼekuépe chupekuéra, ha ojapo umi konstruksión, ndaipóri rupi umi enemígo oñemoĩ vaʼerã hesekuéra. Haʼe omokyreʼỹ umi héntepe oaprovecha hag̃ua pe tiémpo oikohápe hikuái pyʼaguapýpe.

5. ¿Mbaʼérepa Asá omombarete vaʼekue ijehérsito?

⁵ Asá oaprovecha vaʼekue avei pe tiémpo oikohápe hikuái pyʼaguapýpe omombarete hag̃ua ijehérsito (2 Crón. 14:8). ¿Heʼisépa upéva haʼe ndojeroviái hague Jehováre? Nahániri. Upéva rangue, Asá oikuaa vaʼekue haʼe rupi rréi orekoha pe rresponsavilida opreparávo umi héntepe ikatu hag̃uáicha ombohovái umi provléma ikatúva ohasa hikuái amo gotyove. Asá oikuaa vaʼekue pe pyʼaguapy Judá orekóva ikatuha opa, ha upeichaite oiko vaʼekue.

6. ¿Mbaʼéichapa umi kristiáno síglo primérope guare oaprovecha vaʼekue pe tiémpo oiko haguépe hikuái pyʼaguapýpe?

⁶ Pyʼỹinte ojepersegíramo jepe umi kristiáno síglo primérope guarépe, oreko vaʼekue avei hikuái pe tiémpo oiko haguépe pyʼaguapýpe. ¿Mbaʼéichapa haʼekuéra oaprovecha vaʼekue koʼã tiémpo? Umi kuimbaʼe ha kuña ijerovia mbaretéva opredika vaʼekue umi notísia porã oñentregaʼỹre. Pe lívro de Hechos heʼi hesekuéra ‘ohechauka hague okyhyjeha Jehovágui’. Haʼekuéra osegi vaʼekue opredika umi notísia porã ha upéicha rupi “heta hetave ohóvo” hikuái. Péicha jahecha Jehová ovendesi hague chupekuéra, kyreʼỹme opredika haguére pe tiémpo oiko haguépe hikuái pyʼaguapýpe (Hech. 9:26-31).

7, 8. ¿Mbaʼépa ojapo vaʼekue Pablo ha umi ótro kristiáno oñepresentárõ guare chupekuéra peteĩ oportunida? Emyesakã.

⁷ Umi kristiáno síglo primérope guare oaprovecha vaʼekue entéro oportunida orekóva opredika hag̃ua umi notísia porã. Por ehémplo, apóstol Pablo ohechakuaárõ guare peteĩ oportunida tuichaitereíva oñepresenta hague chupe oĩrõ guare Éfesope, haʼe oaprovecha upéva opredika hag̃ua upe siudápe (1 Cor. 16:8, 9).

⁸ Pablo ha umi ótro kristiáno ikatu vaʼekue avei opredika heta héntepe áño 49-pe, umi apóstol ha ansianokuéra Jerusalenpegua odesidírõ guare pe sirkunsisión rehegua (Hech. 15:23-29). Pablo ha umi ótro ermáno oikuaauka rire umi kongregasiónpe upe ojedesidi vaʼekue, umi disípulo osegi ombaʼapo jejopy opredika hag̃ua “umi notísia porã, upéva hína Jehová ñeʼẽ” (Hech. 15:30-35). ¿Mbaʼépa ojehupyty upe haguére? La Biblia heʼi: “Umi kongregasión osegi ojerovia mbareteve ha káda día heta hetave hikuái” (Hech. 16:4, 5).

9. ¿Mbaʼe situasiónpa ojeguereko koʼág̃arupi heta paíspe, ha mbaʼépa ikatu ñañeporandu?

⁹ Koʼág̃arupi, heta paíspe ikatu japredika lívremente. ¿Ndépa reiko hína peichagua paíspe? Oiméramo upéicha, ikatu reñeporandu: “¿Mbaʼéichapa aaprovecha hína ko liverta arekóva?”. Koʼã ára pahápe Jehová puévlo ovyʼaiterei opartisipa haguére peteĩ traváho tuichaitereívape, opredika ha omboʼe rupi hikuái la héntepe arakaʼeve ojejapoʼỹ haguéicha ko múndope (Mar. 13:10). Hetaiterei oportunida oñepresenta ñandéve ñambaʼapove hag̃ua Jehová servísiope.

10. ¿Mbaʼépa ñanemokyreʼỹ jajapo hag̃ua 2 Timoteo 4:2?

¹⁰ ¿Mbaʼéichapa ikatu reaprovecha pe tiémpo jaikohápe pyʼaguapýpe? (elee 2 Timoteo 4:2). Ikatu ningo ekalkula ne situasiónre ha ehecha oimépa nde térã peteĩ ne hénte ndaikatumoʼãipa ombaʼapove predikasiónpe, térã oservi voi de prekursór. Koʼág̃a ndahaʼéi hína tiémpo jaiko hag̃ua ñañehaʼã ñandepláta heta, pórke umi mbaʼe jarekóva ndajaguerahamoʼãi ñande apére pe jehasa asy guasu aja (Prov. 11:4; Mat. 6:31-33; 1 Juan 2:15-17).

11. ¿Mbaʼépa ojapo heta puvlikadór opredika hag̃ua hetave persónape umi notísia porã?

¹¹ Heta puvlikadór oaprendéma ótro idióma ikatu hag̃uáicha opredika ha omboʼe la héntepe Jehovágui. Ha oipytyvõ hag̃ua chupekuéra predikasiónpe, Jehová organisasión oguenohẽ umi informasión oñeʼẽva la Bíbliare heta hetave idiómape. Por ehémplo, áño 2010-pe ñane puvlikasionkuéra oñeguenohẽ vaʼekue amo 500 idiómaperupi. ¡Koʼág̃a katu ojeguerekóma mas de 1.000 idiómape!

12. ¿Mbaʼéichapa oipytyvõ umi héntepe ohendúramo umi notísia porã oñeʼẽva pe Rréinore iñidiomaitépe? Emoĩ peteĩ ehémplo.

 ¹² ¿Mbaʼéichapa la hénte oñeñandu jepi ohendu jave Ñandejára Ñeʼẽ iñidiomaitépe? Jahechami peteĩ ermána rembiasakue. Haʼe oho vaʼekue peteĩ asambléa rrehionálpe Estados Unídospe. Upe asambléa ojejapo vaʼekue kiniaruándape, peteĩ idióma oñeñeʼẽva Ruanda, República Democrática del Congo ha Ugándape. Opa rire pe asambléa, upe ermána heʼi: “Ojapóma ningo 17 áño ava hague Estados Unídospe, péro koʼág̃a primera ves antendepaite peteĩ asambléa”. Jahechakuaa ko ermána korasõme og̃uahẽ hague umi mbaʼe ojeʼe vaʼekue pe asambleahápe, pórke upéva haʼe ohendu iñeʼẽtépe. Oiméramo ne situasión opermiti ndéve, ¿ikatúnepa reaprende ótro idióma reipytyvõ hag̃ua algúnope nde territóriope? ¿Oĩpa umi ohendusevétava umi notísia porã nde territóriope reñeʼẽramo chupe iñidiomaitépe? Heta mbaʼe porã ningo rehupytýta eñehaʼãramo ejapo upéva.

13. ¿Mbaʼéichapa ñane ermanokuéra Rusiapegua oaprovecha vaʼekue pe tiémpo oikórõ guare hikuái pyʼaguapýpe?

¹³ Oĩ umi país ñane ermanokuéra ndaikatuihápe opredika lívremente, pórke umi goviérno oproivi chuguikuéra. Por ehémplo, ñapensamíntena umi ermanokuéra oĩvare Rúsiape. Chupekuéra ojepersegi vaʼekue heta áñore, péro upéi marzo de 1991-pe, pe goviérno omeʼẽ chupekuéra liverta oadora hag̃ua Jehovápe. Upe tiémpope, Rúsiape oĩ vaʼekue 16.000 puvlikadór. Upéi, 20 áño haguépe, oĩma mas de 160.000 puvlikadór. Péicha jahechakuaa ñane ermanokuéra oaprovecha porãiterei hague opredika hag̃ua orekórõ guare liverta. Upéi opa pe tiémpo oiko haguépe hikuái pyʼaguapýpe. Péro okambiáramo jepe la situasión upe paíspe, haʼekuéra osegi ikyreʼỹ Jehová servísiope. Haʼekuéra ojapo ikatúva guive osegi hag̃ua oservi Jehovápe.

14, 15. ¿Mbaʼéichapa Jehová oipuru ipodér oipytyvõ hag̃ua Asápe?

¹⁴ Asá tiémpope, opa vaʼekue pe pyʼaguapy orekóva hikuái. Peteĩ ehérsito tuichaitereíva orekóva mas de un millón soldádo, ou chupekuéra Etiopíagui. Zérah, umi etíope komandánte, oĩ vaʼekue segúro haʼe ha ijehérsito oganataha Judápe. Péro rréi Asá ojerovia vaʼekue Jehováre, ha ndahaʼéi peteĩ ehérsito tuichávare. Asá oñemboʼérõ guare heʼi: “Jehová ore Jára, orepytyvõmína, ore ningo rojerovia nderehe, ha nde rérape rosẽ koʼã henteita kóntrape” (2 Crón. 14:11).

¹⁵ Umi etíope ehérsito haimete voi el dóvle tuichave vaʼekue Asá ehérsitogui. Péro Asá oikuaa vaʼekue Jehová ipoderosoitereiha ha ikatuha oipytyvõ ipuévlope. ¡Ha Jehová upeichaite ojapo! Umi etíope ehérsito operde vaieterei (2 Crón. 14:8-13).

16. ¿Mbaʼérepa jaʼekuaa pe pyʼaguapy jarekóva koʼág̃a opataha?

¹⁶ Ñande ningo ndajaikuaái mbaʼépa oikóta káda únore amo gotyove, péro si jaikuaa opataha pe pyʼaguapy Jehová siervokuéra ikatúva oreko koʼág̃a. Ñanemanduʼa vaʼerã Jesús oprofetisa hague umi ára pahápe ‘umi hénte opa tetãygua ndaijaʼemoʼãiha’ idisipulokuérare (Mat. 24:9). Péicha avei apóstol Pablo heʼi vaʼekue: “Enterove oadoraséva Ñandejárape ipyʼaite guive Cristo Jesús disípuloramo, ojepersegíta avei” (2 Tim. 3:12). Satanás “ipochyeterei hína”, upévare aníkena ñañembotavy ñandejupe voi ñaimoʼãvo jajesalvataha chugui (Apoc. 12:12).

17. ¿Mbaʼe mbaʼépa ikatu ñambohovái tekotevẽtahápe jahechauka jajeroviaha Jehováre?

¹⁷ Koʼẽrõitéma ñambohováita heta mbaʼe ijetuʼúva tekotevẽtahápe jahechauka jajeroviaha Jehováre. Saʼipaitéma ofalta oiko hag̃ua “peteĩ jehasa asy guasu”, ha la Biblia heʼi voi: “Ko múndo oñepyrũ guive koʼág̃a peve núnka ndoikóiva péicha” (Mat. 24:21). Upe tiémpope, ñane hentekuéra ikatu hína oñemoĩ ñane kóntrape, ha ojeproivi ñandehegui umi rreunión ha predikasión (Mat. 10:35, 36). ¿Ñandépa káda uno jasegíta Asá ehémplo, ha jajeroviáta Jehová ñanepytyvõ ha ñandeprotehetaha?

18. Heʼiháicha Hebreos 10:38, 39, ¿mbaʼépa ñanepytyvõta ñaime hag̃ua preparádo ñambohovái hag̃ua umi mbaʼe ñaneraʼarõva?

¹⁸ Jehová ningo koʼág̃a ñandepreparáma  hína ñandejerovia mbarete hag̃ua, ikatu hag̃uáicha ñambohovái umi mbaʼe ñaneraʼarõva. Haʼe ojevale hína “pe esklávo de konfiánsa ha iñarandúva” rehe omeʼẽ hag̃ua ñandéve “aliménto hiʼoraitépe”, ikatu hag̃uáicha jareko entéro mbaʼe ñaikotevẽva jasegi hag̃ua ñandejerovia mbarete (Mat. 24:45). Péro káda uno ñande jajapo vaʼerã ñande párte, ha ñambaʼapo jejopy jasegi hag̃ua jajerovia mbarete Jehováre (elee Hebreos 10:38, 39).

19, 20. Jalee rire 1 Crónicas 28:9, ¿mbaʼépa ñañeporandu vaʼerã, ha mbaʼérepa?

¹⁹ Rréi Asá ojapo haguéicha, ñande ‘tekotevẽ jaheka Jehovápe’ (2 Crón. 14:4; 15:1, 2). Ñande ñañepyrũ kuri jaheka Jehovápe jaikuaárõ guare chupe ha jajevautisa. Ha upéi jaaprovecha kuri entéro oportunida jarekóva ñamombarete hag̃ua ñane mborayhu Jehováre. Jaikuaa hag̃ua mbaʼetekópa jaha hese hína koʼág̃a, ikatu ñañeporandu: “¿Ahápa kontinuadoite rreunionhápe?”. Umi rreunión ñanemombarete jasegi hag̃ua jaservi Jehovápe, ha umi ñane ermáno ha ermanakuéra ñanemokyreʼỹ (Mat. 11:28). Ikatu avei ñañeporandu: “¿Ajepokuaápa astudia meme la Biblia?”. Ha oiméramo reiko ne famíliandi, ¿peñemotiémpopa káda semána pejapo hag̃ua pende estúdio de família? Térã reikóramo neaño, ¿reñemotiémpopa avei restudia hag̃ua ojapoháicha peteĩ família? Ha, ¿rejapópa hína opa ikatúva repredika ha remboʼe hag̃ua ótrope la Biblia?

²⁰ ¿Mbaʼérepa ñañeporandu vaʼerã koʼã mbaʼe? La Biblia heʼi ñandéve Jehová ohesaʼỹijoha entéro mbaʼe ñapensáva ha oĩva ñane korasõme, ha ñande jajapo vaʼerã avei upéicha (elee 1 Crónicas 28:9). Oiméramo jahechakuaa tekotevẽha ñakambia umi mbaʼe ñapensáva ha jajaposéva, jajerure vaʼerã Jehovápe tañanepytyvõ ñakambia hag̃ua. Koʼág̃a hína pe tiémpo jajeprepara hag̃ua, ikatu hag̃uáicha ñambohovái umi mbaʼe ñaneraʼarõva. ¡Aníkena jaheja mbaʼeve ñandejoko jaaprovecha hag̃ua pe tiémpo jaikohápe hína pyʼaguapýpe!