1, 2. ¿Mbaʼéichapa Eclesiastés 11:6 heʼíva ñanepytyvõ japredika hag̃ua umi notísia porã?

OĨ UMI país la hénte ohendu jave umi notísia porã oñeʼẽva pe Rréinore, oaprendeseve voi chugui. Hiʼãitereíma kuri chupekuéra ohendu umi notísia porã. Péro oĩ avei umi país umi hénte noñeinteresaguasuihápe Ñandejárare ni la Bíbliare. ¿Mbaʼépa la hénte ojapo ohendu jave umi notísia porã nde reikohápe? Tahaʼe haʼéva pe ojapóva hikuái, Jehová oipota jasegi japredika haʼe heʼi peve ovalemaha.

² Jehová odesidíma arakaʼetépa opáta pe predikasión, ha upéi “og̃uahẽta pe fin” (Mat. 24:14, 36). Péro oiko mboyve upéva, ¿mbaʼéichapa ikatu jasegi ñañotỹ pe semílla kaʼaruete peve japytuʼuʼỹre? * (Elee Eclesiastés 11:6).

3. ¿Mbaʼépa jahecháta ko artíkulope?

³ Pe artíkulo ohasa vaʼekuépe jahecha kuri 4 mbaʼe jajapo vaʼerã ikatu hag̃uáicha ñandekatupyry ‘jajagarrávo hénte ojejagarraháicha pira’ (Mat. 4:19). Ko artíkulope jahecháta mbohapy mbaʼe ñanepytyvõtava jajerresolve hag̃ua ñande pyʼaite guive jasegitaha japredika, tahaʼe haʼéva umi provléma ñambohováiva. Ñaaprendéta mbaʼérepa iñimportánte: 1) Jasegi ñamotenonde ñande rekovépe pe predikasión, 2) ñanepasiénsia, ha 3) jasegi jajerovia mbarete.

4. ¿Mbaʼérepa ñamotenonde vaʼerã pe traváho Jehová omeʼẽ vaʼekue ñandéve?

⁴ Jesús heʼi vaʼekue idisipulokuérape mbaʼéichatapa umi hénte ha mbaʼépa oikóta umi ára pahápe. Haʼe oikuaa vaʼekue  koʼã mbaʼe ikatuha ojoko isegidorkuérape anive hag̃ua omotenonde pe predikasión. Upévare heʼi vaʼekue idisipulokuérape ‘oñatende porã hag̃ua siémpre’ (Mat. 24:42). Noé tiémpope oĩ vaʼekue heta mbaʼe ikatúva ojoko umi héntepe ani hag̃ua ohendu pe avíso haʼe omeʼẽva, ha koʼág̃arupi umi mbaʼe ikatu avei ñandéve ñandejoko anivéma hag̃ua ñamotenonde pe predikasión (Mat. 24:37-39; 2 Ped. 2:5). Upévare ñande jasegise ñamotenonde ñande rekovépe pe traváho Jehová omeʼẽ vaʼekue ñandéve.

5. ¿Mbaʼéichapa Hechos 1:6-8 omombeʼu mbaʼeichaite pevépa ojepredikáta umi notísia porã?

⁵ Koʼág̃arupi koʼýte tekotevẽ ñamotenonde ñande rekovépe pe predikasión. Jesús heʼi vaʼekue idisipulokuéra osegitaha opredika haʼe omano rire, ha tuichavetaha pe traváho haʼekuéra ojapóva (Juan 14:12). Jesús omano rire, unos kuánto idisípulo oho jey vaʼekue ojededika péskape. Ha Jesús orresusita rire, peteĩ milágro rupive oipytyvõ unos kuánto idisípulope oity hag̃ua hetaiterei pira. Ojapo rire upe milágro, Jesús ohechauka idisipulokuérape iñimportanteveha opa mbaʼégui opredika, ha omboʼe umi héntepe oiko hag̃ua chuguikuéra idisípulo (Juan 21:15-17). Jesús oho mboyvemi yvágape heʼi idisipulokuérape pe predikasión haʼe omoñepyrũ vaʼekue og̃uahẽtaha umi lugár mombyryvehápe jepe, ndahaʼéi Israélpe añónte (elee Hechos 1:6-8). Heta áño rire, Jesús ohechauka apóstol Juánpe peteĩ visión rupive umi mbaʼe oikótava “ñande Ruvicha díape”. * Umíva apytépe, Juan ohecha peteĩ mbaʼe ijojahaʼỹva: Peteĩ ánhel orekóva umi “notísia porã opytátava pára siémpre”, ha oikuaauka ko notísia “entéro tetã, trívu, puévlo ha umi oñeʼẽvape diferénte idióma” (Apoc. 1:10; 14:6). Jahechakuaa upéicharõ koʼág̃arupi Jehová oipotaha ñambaʼapo pe predikasión ojejapóvape ko múndo tuichakuére oñemohuʼã meve ko tembiapo.

6. ¿Mbaʼépa ñanepytyvõta jasegi hag̃ua ñamotenonde ñande rekovépe pe predikasión?

 ⁶ Ikatúta ñamotenonde ñande rekovépe pe predikasión jajepyʼamongetáramo mbaʼeichaitépa Jehová ñanepytyvõ hína. Por ehémplo, haʼe omeʼẽ ñandéve hetaiterei puvlikasión oñeimprimíva térã ojehupíva Internétpe, avei heta áudio ha vidéo ha umi prográma de Broadcasting osẽva jepi. Epensamíntena: ¡Ñande sítio jw-pe ningo jareko informasión mas de 1.000 idiómape! (Mat. 24:45-47). Ko múndope la hénte ojedividipa, tahaʼe polítika, rrelihión térã pláta káusare, péro oĩ mas de 8 millón Ñandejára siervokuéra oĩva en unida oñoermánoicha ko múndo tuichakuére. Por ehémplo, pe viernes 19 de abril de 2019, enterove Testígo ko múndo tuichakuére oĩ kuri en unida ohecha rupi peteĩ vidéo oñeanalisa haguépe pe téxto upe diapegua. Ha upe pyharépe, 20.919.041 persóna oñembyaty kuri ogueromanduʼa hag̃ua Jesús omano hague ára. Tuichaite priviléhio ningo jahecha koʼã mbaʼe ijojahaʼỹva ha japartisipa umívape. Ñapensávo koʼã mbaʼére jasegise ñanerembiapo heta predikasiónpe.

7. ¿Mbaʼéichapa Jesús ehémplo ñanepytyvõ ñamotenonde hag̃ua ñande rekovépe pe predikasión?

⁷ Jasegíramo Jesús ehémplo, upéva ñanepytyvõta avei ñamotenonde hag̃ua ñande rekovépe pe predikasión. Haʼe ndohejái vaʼekue mbaʼeve ojoko chupe opredika hag̃ua (Juan 18:37). Satanás oofresérõ guare chupe “umi goviérno oĩva ko múndope ha umi rrikésa orekóva”, haʼe ndoʼái vaʼekue iñuhãme, ha umi hénte omoĩséramo guare chupe rréiramo, haʼe ndohejái vaʼekue avei upéva omoñuhã chupe (Mat. 4:8, 9; Juan 6:15). Jesús ndohejái vaʼekue ojoko chupe umi rrikésa ojeguerekoséva jepi, ha nomongyhyjéi vaʼekue chupe oĩrõ guare oñemoĩ mbaretéva hese (Luc. 9:58; Juan 8:59). Ñambohováiramo umi situasión ijetuʼúva jajerovia haguére Jehováre, ñanemanduʼa vaʼerã apóstol Pablo konséhore ha upéva ñanepytyvõta jasegi hag̃ua ñamotenonde pe predikasión. Haʼe omokyreʼỹ vaʼekue umi kristiánope osegi hag̃ua Jesús ehémplo ha ‘ani hag̃ua ikaneʼõ ni oñentrega’ hikuái (Heb. 12:3).

8. ¿Mbaʼépa heʼise ñanepasiénsia, ha mbaʼérepa ñaikotevẽte upéva koʼág̃a?

⁸ Ñanepasiénsia heʼise ñahaʼarõha trankílo porãnte okambia peve peteĩ situasión. Tekotevẽ ningo ñanepasiénsia ñahaʼarõ aja opa peteĩ situasión ijetuʼúva, térã hiʼãiterei jave ñandéve oñekumpli peteĩ mbaʼe ñahaʼarõmava hína heta tiémpore. Proféta Habacúcpe hiʼãitereíma kuri opa pe violénsia oĩva Judápe (Hab. 1:2). Jesús disipulokuéra ohaʼarõitereíma vaʼekue ‘ou upepete’ Ñandejára Rréino, ha oguenohẽ chupekuéra umi rrománo poguýgui (Luc. 19:11). Ha ñandéve katu hiʼãitereíma Ñandejára Rréino oipeʼa entéro mbaʼe vai, ha ogueru pe múndo pyahu henyhẽtétava umi hénte iñeʼẽrendúvagui Ñandejárape (2 Ped. 3:13). Péro tekotevẽ ningo ñanepasiénsia ha ñahaʼarõ og̃uahẽ meve pe tiémpo Jehová oiporavo vaʼekue ojapo hag̃ua upéva. Jahechamína mbaʼéichapa Jehová ñanemboʼe ñanepasiénsia hag̃ua.

9. ¿Mbaʼe ehémplopa ohechauka Jehová ipasiensiaha?

⁹ Jehová ningo ipasiénsia ha oheja ñandéve pe ehémplo iporãvéva. Haʼe omeʼẽ vaʼekue Noépe pe tiémpo oikotevẽva ojapo hag̃ua pe árka, ha ‘opredika hag̃ua umi mbaʼe ihústova’ (2 Ped. 2:5; 1 Ped. 3:20). Jehová ohendu vaʼekue Abrahánpe oporandúrõ guare chupe heta mbaʼe odesidi haguére ohundi umi hénte aña oikóvape Sodoma ha Gomórrape (Gén. 18:20-33). Ha heta tiémpore Jehová ipasiensiaiterei vaʼekue umi israelita naiñeʼẽrendúivare (Neh. 9:30, 31). Koʼág̃arupi jahecha avei mbaʼéichapa Jehová ipasiénsia, pórke haʼe omeʼẽ tiémpo ikatu hag̃uáicha “oñarrepenti”  enterove umi haʼe oipotáva oiko chugui iñamígo (2 Ped. 3:9; Juan 6:44; 1 Tim. 2:3, 4). Jehová ehémplo ñanepytyvõ ñanepasiénsia hag̃ua jasegi aja japredika ha ñaporomboʼe. Haʼe oipuru avei peteĩ ehémplo oĩva la Bíbliape ñanemboʼe hag̃ua mbaʼéichapa ñanepasiénsia vaʼerã.

10. ¿Mbaʼépa ñanemboʼe pe kokueséro ehémplo oĩva Santiago 5:7, 8-pe?

¹⁰ (Elee Santiago 5:7, 8). Pe kokueséro ehémplo ñanemboʼe ñanepasiénsia hag̃ua. Añetehápe ningo oĩ umi kóga pyaʼe okakuaáva, péro la majoría nahániri, koʼýte umi hiʼátava, pórke oraha hetave tiémpo oĩmba hag̃ua ha upéi ojekosecha. Israélpe umi kóga okakuaapa vaʼekue amo 6 méseperupi. Pe kokueséro oñemitỹ vaʼekue ou rire pe ama otoñopegua, upéva hína octubre mbytérupi, ha upéi okosecha ohasa rire pe ama primaverapegua, upéva hína abril mbytérupi (Mar. 4:28). Ñande ningo ñanearandúta jasegíramo pe kokueséro ehémplo, péro upéva sapyʼánte ndahaʼéi la ifasilpáva.

11. ¿Mbaʼéichapa ñanepasiénsiaramo ñanepytyvõta japredika ha ñaporomboʼe jave?

¹¹ Ñaneimperfékto rupi, ñande pyaʼe voi jahechase jepi la rresultádo umi mbaʼe jajapóvape. Péro ñañemitỹ hag̃ua ningo tekotevẽta jajoʼo, ñañotỹ, ñamopotĩ ha jarrega pe kóga. Ñañangareko porã vaʼerã hese kontinuadoite jaipotáramo umi plantasión okakuaa ha oprodusi porã. Ñande avei tekotevẽ ñañehaʼã kontinuadoite ñaipytyvõséramo umi héntepe oiko hag̃ua chuguikuéra Jesús disípulo. Ñaikotevẽ tiémpo ñaipytyvõ hag̃ua ñane estudiantekuérape otrata hag̃ua entérope peteĩchapa ha oporohayhu hag̃ua. Ñanepasiénsiaramo nañañedesanimamoʼãi oĩramo nañanerenduséiva. Ha tekotevẽta avei ñanepasiénsia oĩramo ñanerenduséva ha oaprendeséva Jehovágui. Ñande ndaikatúi ñambyapura peteĩ estudiántepe omombarete hag̃ua ijerovia. Sapyʼánte Jesús disipulokuéra jepe imbegue vaʼekue ontende hag̃ua umi mbaʼe haʼe omboʼéva (Juan 14:9). Ñanemanduʼa vaʼerã ñande ikatuha ñañotỹ pe  semílla ha jarrega, péro Ñandejára hína upe omongakuaáva (1 Cor. 3:6).

12. ¿Mbaʼéichapa ikatu jahechauka ñanepasiensiaha japredika jave umi ñane hénte ndahaʼéivape Testígo?

¹² Ikatu ijetuʼu ñandéve ñanepasiénsia hag̃ua japredika jave umi ñane hénte ndahaʼéivape Testígo. Péro upearã ikatu ñanepytyvõ upe heʼíva Eclesiastés 3:7. Upépe heʼi: “Oĩ tiémpo ñakirirĩ hag̃ua ha tiémpo ñañeʼẽ hag̃ua”. Sapyʼánte ikatu japredika ñane kondúkta rupive jaʼeʼỹre mbaʼeve, péro siémpre ñaime vaʼerã avei preparádo ñañeʼẽ hag̃ua chupekuéra Jehováre (1 Ped. 3:1, 2). Ñande ningo kyreʼỹme japredika ha ñaporomboʼe vaʼerã, péro siémpre tekotevẽ ñanepasiénsia enterovére, umíva apytépe ñane hentekuérare.

13, 14. ¿Máva ehémplopa ikatu jasegi ñanepasiénsia hag̃ua?

¹³ Ñande ikatu ñaaprende ñanepasiénsia hag̃ua Jehová siervokuéra ifiélva ehémplogui jatopáva la Bíbliape, ha avei umi isiervokuéra koʼag̃aguágui. Habacúcpe hiʼãitereíma vaʼekue opa umi mbaʼe vai, péro haʼe ohechauka ipasiensiaha heʼírõ guare: “Che aĩta umi guárdia oĩháme, asegíta añatende upe guive” (Hab. 2:1). Apóstol Pablo ipyʼaite guive heʼi vaʼekue omohuʼãseha pe tembiapo oñemeʼẽ vaʼekue chupe. Péro haʼe ipasiénsia vaʼekue ha osegi ‘oikuaauka porã umi notísia porã’ (Hech. 20:24).

¹⁴ Jahechamína peteĩ matrimónio ehémplo. Haʼekuéra ningo oho vaʼekue Galaádpe ha oñeasigna peteĩ país oĩháme saʼi testígo de Jehová, ha hetavehápe umi ndahaʼéiva kristiáno. Upépe saʼieterei umi hénte ostudiaséva la Biblia. Péro umi ikompañerokue Galaádpe guare oservíva ótro paíspe, omombeʼu chupekuéra orekoha hikuái heta estudiánte oprogresa porãva. Péro ko matrimónio ipasiénsia ha osegi opredika, la majoría umi hénte iterritoriopegua nohenduséiramo jepe chupekuéra. Opredika rire hikuái 8 áñore peteĩ território avave lénto nohenduseihápe umi notísia porã, ovyʼaiterei hikuái ohechávo peteĩ iñestudiánte ojevautisaha. ¿Mbaʼépa ñanemboʼe koʼã ehémplo yma guare ha koʼag̃agua? Koʼã Jehová siervokuéra ifiélva naiñateʼỹi vaʼekue, síno osegi ombaʼapo jejopy, ha Jehová ovendesi chupekuéra ipasiénsia haguére. Jajapókena ñande avei “ojapo haguéicha umi ojeroviáva ha ipasiénsia vaʼekue, umíva orresivi vaʼekue umi promésa porãite” (Heb. 6:10-12).

15. ¿Mbaʼéichapa ñande jerovia ñanepytyvõta jajerresolve hag̃ua jasegitaha japredika?

¹⁵ Ñande jaguerovia umi mbaʼe japredikáva, upévare ñamombeʼuse opa ikatúvape upe mensáhe. Ñande ningo jajerovia umi promésa oĩvare Ñandejára Ñeʼẽme (Sal. 119:42; Is. 40:8). Jahecháma hína mbaʼéichapa oñekumpli koʼág̃arupi umi profesía oĩva la Bíbliape. Jahecha avei mbaʼéichapa la hénte osegívo umi konsého oĩva la Bíbliape okambia ha oiko porãve. Koʼã mbaʼe koʼýte ñanepytyvõ jaguerovia hag̃ua enterove tekotevẽha ohendu umi notísia porã oñeʼẽva Ñandejára Rréinore.

16. a) Ohechaukaháicha Salmo 46:1-3, ¿mbaʼéichapa jajeroviáramo Jehováre ñanepytyvõta jajerresolve hag̃ua jasegitaha japredika? b) ¿Mbaʼéichapa ñanepytyvõ avei jajeroviáramo Jesúsre?

¹⁶ Ñande jajerovia Jehováre, upe omeʼẽva ñandéve umi notísia porã japredika hag̃ua. Ha jajerovia avei Jesús rehe, chupe Jehová omeʼẽ vaʼekue autorida ogoverna hag̃ua pe Rréinope (Juan 14:1). Tahaʼe haʼéva umi mbaʼe jahasáva, Jehová siémpre ñandeprotehe ha ñanemombaretéta (elee Salmo 46:1-3). Avei jajerovia Jesús odirihiha hína yvága guive pe predikasión, ha upearã oipuru pe podér ha autorida Jehová omeʼẽ vaʼekue chupe (Mat. 28:18-20).

17. Emoĩ peteĩ ehémplo ohechaukáva mbaʼérepa jasegi vaʼerã japredika.

¹⁷ Ñande jerovia ñanepytyvõta ñaĩve hag̃ua  segúro Jehová ñanevendesitaha ñañehaʼã haguére japredika, ha sapyʼánte ikatu voi ojapo upéva ñaimoʼãʼỹháicha (Ecl. 11:6). Por ehémplo, káda día hetaiterei hénte ohecha umi mesa ha karríto orekóva ñane puvlikasionkuéra. ¿Péro osẽ porã piko hína peichagua predikasión? ¡Si osẽ porãiterei! Ñane Marandu Porã noviembre de 2014-pe guare heʼi peteĩ mitãkuña ohóva universidápe ojapose hague peteĩ traváho práktiko oñeʼẽva umi testígo de Jehováre. Haʼe ndotopái kuri ni peteĩ Salón del Rréino, péro ohecha peteĩ mesa ojepurúva ojepredika hag̃ua pe universida korapýpe, ha otopa avei pe informasión oikotevẽva ojapo hag̃ua itraváho práktiko. Tiémpo rire oiko chugui Testígo, ha koʼág̃a oservíma de prekursóra rregulár. Koʼãichagua experiénsia ñanemokyreʼỹ jasegi hag̃ua japredika, pórke ohechauka oĩha gueteri hénte oikotevẽva ohendu umi notísia porã oñeʼẽva pe Rréinore.

18. ¿Mbaʼérepa ikatu ñaime segúro pe predikasión opataha Jehová oipotaháicha?

¹⁸ Ñande ikatu ñaime segúro pe predikasión opataha itiempoitépe. Jahechamína mbaʼépa oiko vaʼekue Noé tiémpope. Upérõ Jehová ohechauka vaʼekue siémpre ojapoha entéro mbaʼe itiempoitépe. Amo 120 áñorupi oiko mboyve pe dilúvio, Jehová odesidíma vaʼekue arakaʼépa oikóta upéva. Heta áño upe rire, Jehová heʼi Noépe ojapo hag̃ua pe árka. Ha 40 térã 50 áñorupi oñepyrũ mboyve pe dilúvio, Noé osegi vaʼekue ombaʼapo jejopy. Umi hénte nohenduséiramo jepe chupe, haʼe osegi vaʼekue oavisa chupekuéra, Jehová heʼi peve og̃uahẽmaha pe tiémpo oñemoinge hag̃ua umi animalkuéra pe árkape. Upéi itiempoitépe, “Jehová omboty pe árka rokẽ” (Gén. 6:3; 7:1, 2, 16).

19. ¿Mbaʼépa ikatu ñahaʼarõ jasegíramo ñambaʼapo kaʼaruete peve japytuʼuʼỹre?

¹⁹ Koʼẽrõitéma Jehová oikuaaukáta ñandéve opamaha pe predikasión. Upéi haʼe ohundíta Satanás múndo ha omoĩta peteĩ múndo pyahu, ha upépe henyhẽtéta umi hénte iñeʼẽrendúva Ñandejárape. Og̃uahẽ meve upe tiémpo, jasegíkena pe ehémplo oheja vaʼekue ñandéve Noé, Habacuc, ha hetave Jehová siervokuéra ombaʼapo vaʼekue kaʼaruete peve opytuʼuʼỹre. Ñamotenondékena ñande rekovépe pe predikasión, ñanepasiénsiakena ha jasegi jajerovia mbarete Jehová ha ipromesakuérare.