1, 2. a) Ohechaukaháicha Proverbios 16:31, ¿mbaʼéichapa jahecha vaʼerã ñane ermanokuéra ijedávape? b) ¿Mbaʼe mbaʼépa ñambohováita ko artíkulope?

PETEĨ lugár héravape Arkansas oĩva Estados Unídospe, oĩ peteĩ párke ikatuhápe ojetopa umi diamánte pe yvy reípente. Péro koʼã diamántere neʼĩra oñembaʼapo ha noñemboverái gueteri ojepuru hag̃uáicha umi jóyare. Upéicha rupi, heta hénte ohasáva upérupi ndopillái umíva haʼeha diamánte ha nopenái hese.

² Ñane ermanokuéra ijedáva ojogua hína koʼã diamántepe: Haʼekuéra ningo peteĩ tesóro ijojahaʼỹva. Ñandejára Ñeʼẽ ombojoja voi umi ijedáva akãrangue morotĩ peteĩ korónare (elee Proverbios 16:31; 20:29). Péro jajedeskuidáramo, ikatu hína ndajahechái chupekuéra peteĩ tesóroicha. Umi imitãva ohechakuaáramo mbaʼeichaitépa ivalióso umi ijedáva, irrikoitéta hikuái pórke okonsegíta peteĩ mbaʼe ivaliosovéva umi tesóro ha rrikésagui. Ko artíkulope ñambohováita koʼã mbohapy porandu: ¿Mbaʼérepa Jehová omombaʼete umi isiervokuéra ijedávape ha ohecha voi chupekuéra peteĩ tesóroicha? ¿Mbaʼérepa iñimportanteterei Jehová organisasiónpe umi ermáno ha ermána ijedáva? ¿Ha mbaʼépa ikatu jajapo ñañevenefisiave hag̃ua iñehemplokuéragui?

3. Ohechaukaháicha Salmo 92:12-15, ¿mbaʼérepa Jehová ohecha umi isiervokuéra ijedávape peteĩ tesóroicha?

³ Ñandejára Jehová ningo omombaʼeterei umi ijedávape. Haʼe oikuaa porã umi ermáno ha ermanakuéra pyʼapy, ha ovaloraiterei umi kualida porãite orekóva hikuái. Haʼe ovyʼaiterei umi ijedáva okomparti jave umi imitãvandi la oaprende vaʼekue oservívo Jehovápe hekove pukukue (Job 12:12; Prov. 1:1-4).  Jehová omombaʼeterei avei chupekuéra oaguantáma rupi heta mbaʼe (Mal. 3:16). Haʼekuéra ningo ohasáma heta mbaʼe ijetuʼúva, upéicharõ jepe osegi ojerovia mbarete Jehováre. Iñesperansakuéra imbareteve koʼág̃a upe oikuaárõ guarégui la verda. Ha Jehová ohayhu chupekuéra, pórke osegi oikuaauka hikuái héra “ijedáramo jepe” (elee Salmo 92:12-15).

4. ¿Mbaʼépa ikatu omokyreʼỹ ñane ermáno ha ermanakuéra ijedávape?

⁴ Oiméramo nde ndeedáma rehóvo, ikatu reime segúro Jehová imanduʼaha umi mbaʼe rejapo vaʼekuére ymave (Heb. 6:10). Nde ningo kyreʼỹme repredika vaʼekue, ha upéva ombovyʼaiterei ñande Ru yvagapeguápe. Reaguantáma avei heta provléma, umíva apytépe umi nemoñeñandu vaieterei vaʼekue. Nde ningo neñeʼẽrendu ha redefendéma umi mandamiénto ihústova oĩva la Bíbliape. Rembokatupyry ótrope ha rekumplíma avei heta rresponsavilida iñimportánteva Jehová organisasiónpe. Nde reñehaʼãmbaitéma resegi hag̃ua rejadapta umi kámbio ojejapóvare Jehová organisasiónpe. Hetáma avei reapoja ha remokyreʼỹ umi oservívape de tiémpo kompléto. Ñandejára Jehová ningo nderayhueterei, pórke nde siémpre ndefiél ha neñeʼẽrendu chupe, ha haʼe opromete voi ‘ndohejareimoʼãiha umi iñeʼẽrendúvape chupe’ (Sal. 37:28). Avei haʼe oasegura umi ijedávape: “Ág̃a peẽ peneakãrangue morotĩmba vove, che asegíta pende ykére” (Is. 46:4). Upévare, aníkena repensa ndeedáma haguére nandedeprovechoveimaha. ¡Añetehápe nde neimportanteterei hína Jehová organisasiónpe!

5. ¿Mbaʼe rehepa imanduʼa vaʼerã umi ijedáva?

⁵ Umi ijedáva ningo ikatu ideprovécho Jehová organisasiónpe heta hendáicha. Ikatu oime naimbaretevéima hikuái anteve guaréicha, péro umi áño ohasa vaʼekuépe haʼekuéra hetavéma iñexperiénsia ha iñaranduvéma. Jehová ikatu gueteri ojevale hesekuéra heta hendáicha, ohechaukaháicha umi ehémplo yma guare ha koʼag̃agua.

6, 7. Emombeʼu mbaʼéichapa Jehová ovendesi vaʼekue umi ijedávape oservi haguére chupe fiélmente.

⁶ La Bíbliape ningo oñeñeʼẽ heta Jehová siervokuéra ifiélvare, umi osegi vaʼekue iguápo iservísiope ijedámaramo jepe. Ha haʼekuéra  oheja vaʼekue ñandéve ehémplo iporãitereíva. Ñapensamíntena Moisésre. Haʼe ningo orekóma vaʼekue 80 áñorupi oñepyrũrõ guare omoakã umi israelítape ha oservi Jehová profétaramo. Jehová osegi vaʼekue avei oipuru Daniélpe iprofétaramo, haʼe orekómaramo jepe mas de 90 áño. Ha apóstol Juan orekómane raʼe avei mas de 90 áño Jehová ojevalérõ guare hese oskrivi hag̃ua pe lívro de Apocalipsis.

⁷ Oĩ avei heta Ñandejára siérvo ifiélva péro naikonosidoguasúi vaʼekue, ha upévare oiméne umi hénte nopenái jepi hesekuéra. Upéicharõ jepe, Jehová si ohecha koʼã isiérvope ha ovendesi chupekuéra ifiél haguére. Por ehémplo, oĩ vaʼekue peteĩ kuimbaʼe hérava Simeón, “haʼe ningo ihústo ha orrespeta Ñandejárape”. Péro la Biblia noñeʼẽguasúi hese. Upéicharõ jepe, Jehová oikuaa porã vaʼekue mávapa haʼe, ha omeʼẽ chupe pe priviléhio ohechávo Jesúspe imichĩetérõ guare, ha oprofetisa hese ha isýre (Luc. 2:22, 25-35). Ñapensamína avei pe profetísa Ánare. Haʼe ningo viúda vaʼekue, ha orekómarõ jepe 84 áño “núnka ndofaltái pe témplope”. Jehová ovendesi Ánape upe haguére, ha opermiti avei chupe ohecha Jesúspe imichĩetérõ guare. Jahechakuaa upéicharõ Simeón ha Ana ivaliosoiterei hague Jehovápe g̃uarã (Luc. 2:36-38).

8, 9. ¿Mbaʼéichapa peteĩ ermána oipytyvõ Jehová organisasiónpe opyta rire viúda?

⁸ Ñane tiémpope, heta ermáno ha ermána ijedáva omoĩ avei ehémplo iporãitereíva umi imitãvape. Ñapensamína ermána Lois Didur ohasa vaʼekuére. Haʼe ningo oreko vaʼekue 21 áño oñepyrũrõ guare oservi de prekursóra espesiál Canadápe. Upe rire, haʼe ha iména John oservi heta áñore pe sirkuítope. Tiémpo rire oservi hikuái Betel de Canadápe, ha upépe oĩ jepe hikuái mas de 20 áño. Péro Lois orekórõ guare 58 áño, oñeinvita chupekuéra oho hag̃ua oservi Ucrániape. ¿Mbaʼépa ojapóta raʼe hikuái? ¿Opensátapa ijedaitereimaha oho hag̃ua oservi ótro paíspe? ¡Nahániri! Haʼekuéra oasepta pe asignasión, ha Jóhnpe oñenombra oservi hag̃ua pe komite de sukursálpe upépe. Upéi 7 áño haguépe John omano, péro Lois odesidi opytatanteha iñasignasiónpe. Koʼág̃a haʼe orekóma 81 áño ha osegi gueteri iguápa Jehová servísiope, ha pe família Betel Ucraniapegua ohayhueterei chupe.

⁹ Ikatu oime Lois ha hetave ermána viúdape ndahaʼéi la ojehecharamoitereíva, iména oikoveha tiémpope guaréicha. Péro haʼekuéra viudami haguére ndeʼiséi Jehová ndovaloraveimaha chupekuéra. Haʼe omombaʼeterei koʼã ermánape oapoja haguére iménape heta áñore, ha osegi haguére oservi chupe fiélmente (1 Tim. 5:3). Avei haʼekuéra tuicha omokyreʼỹ umi imitãvape.

10. ¿Mbaʼe ehémplo iporãitévapa omoĩ Tony?

¹⁰ Heta ñane ermanokuéra ijedáva ningo ndaikatuvéima osẽ hógagui térã oiko hína umi ogár de ansiánope. Por ehémplo, peteĩ ermáno hérava Tony oiko peichagua lugárpe. Haʼe ojevautisa vaʼekue agosto de 1942-pe, orekórõ  guare 20 áño, Pensilvania, Estados Unídospe. Upe riremínte ojeʼe chupe ojapo vaʼerãha pe servísio militár, ha haʼe ndojaposéi rupi upéva ojegueraha chupe 2 áño imédiore kárselpe. Haʼe ha hembireko Hilda omongakuaa mokõi mitã, ha omboʼe chupekuéra oservi hag̃ua Jehovápe. Upéi, ohasávo umi áño, Tony oservi jepe mbohapy kongregasiónpe de superintendénte presidénte (koʼág̃a oñehenóiva koordinadór del kuérpo de ansiáno), ha haʼe vaʼekue avei superintendénte de asambléa de sirkuíto. Haʼe ovisitámi vaʼerã avei peteĩ kársel ojapo hag̃ua estúdio bíblico ha rreunión. Koʼág̃a Tony orekóma 98 áño ha ni nopensái gueteri oñentregávo. Haʼe osegi ojapo pe iporãvéva Jehová servísiope, ha ombaʼapo umi ermáno ha ermanakuéra ikongregasionpeguándi.

11. ¿Mbaʼéichapa ikatu jahechauka ñamombaʼetereiha ñane ermanokuéra ijedávape?

¹¹ ¿Mbaʼéichapa ikatu jahechauka ñamombaʼetereiha ñane ermanokuéra ijedávape? Ijáma guive, umi ansianokuéra ikatu oipytyvõ koʼã ermánope oho hag̃ua rreunionhápe térã ohendu hag̃ua umíva, ha avei opredika hag̃ua. Avei ikatu jahechauka jajepyʼapyha koʼã ermánore jahávo hendapekuéra, térã jajapóvo chupekuéra peteĩ videollamáda. Koʼýte jajapo vaʼerã koʼã mbaʼe umi ermáno oikóvandi mombyry Salóngui, pórke jajedeskuidáramo ndahasyiete hína ñanderesarái hag̃ua chuguikuéra. Ñañemongetávo umi ermáno ijedávandi, ikatu hína jahechakuaa algúno otĩha oñeʼẽ hag̃ua ijehe, térã opensa noiporãmoʼãiha ojapóramo upéva. Péro tuichaiterei ñañevenefisiáta ñañemotiémporamo ñambaʼeporandu hag̃ua chupekuéra, ha ñahendu omombeʼúvo umi mbaʼe porã ohasa vaʼekue Jehová organisasiónpe.

12. ¿Mbaʼeichagua ermáno ha ermánapa ikatu jatopa ñane kongregasiónpe voi?

¹² Ikatu hína ñañesorprende jahechakuaávo ñane kongregasiónpe voi oĩha umi ermáno ijedáva omoĩva ehémplo ijojahaʼỹva. Peteĩ ermána hérava Harriette oservi vaʼekue fiélmente Jehovápe heta áñore ikongregasión ypykuépe, oĩva Nueva Jersey, Estados Unídospe. Upéi haʼe ova ótro lugárpe oiko hag̃ua imembykuñándi, ha umi ermanokuéra oĩva ikongregasión pyahúpe oñemotiémpo oikuaa porãve hag̃ua chupe. ¡Ha otopa hikuái peteĩ tesóro! Ko ermána okasea chupekuéra umi mbaʼe ohasa vaʼekue oñepyrũrõ guare oservi Jehovápe áño 1925 rupi, ha upéva omokyreʼỹeterei chupekuéra. Upe tiémpope haʼe siémpre orahámi vaʼerã isepíllo de diénte predikasiónpe, peichahágui umi polisía ojagarrárõ g̃uarã chupe. Añetehápe 1933-pe, 2 vése voi ojejagarra ha ojegueraha chupe présa 1 semánare. Iména ningo ndahaʼéi vaʼekue Testígo, péro oapoja chupe. Harriette oĩ aja présa, iména oñangareko umi mbohapy ifamiliakuéra mimíre. Añetehápe ningo Harriette ha enterove umi ermáno ijedáva omerese ñamombaʼeterei ha ñanerakateʼỹ hesekuéra.

13. ¿Mbaʼeichaitépa iñimportánte umi ijedáva Jehová organisasiónpe, ha mbaʼépa ñaaprende upévagui?

¹³ Ñane ermanokuéra ijedáva ningo iñimportanteterei Jehovápe ha iñorganisasiónpe g̃uarã. Haʼekuéra ohecháma mbaʼéichapa Jehová ovendesi iñorganisasión ha chupekuéra voi heta hendáicha. Koʼã ermáno oaprendéma avei ikostíllare heta mbaʼe iñimportánteva. ‘Pe arandu osẽva chuguikuéra ningo osyry peteĩ rríoicha’, upévare jaaprovecha vaʼerã pe experiénsia orekóva hikuái ha ñaaprende chuguikuéra (Prov. 18:4). Ñañemotiémporamo jaikuaa porãve hag̃ua chupekuéra, ñamombaretéta ñande jerovia ha ñaaprendéta hetaiterei mbaʼe.

14. ¿Mbaʼe konséhopa omeʼẽ Deuteronomio 32:7 umi imitãvape?

¹⁴ Ñañehaʼãkena ñande voi ñañemboja umi ijedávare ha ñañemongeta hendivekuéra (elee Deuteronomio 32:7). Ikatu ningo añete  ndohechaporãvéima hikuái, oguataʼipaitéma ha oñeʼẽ mbegueve, péro ipyʼapýpe haʼekuéra imitã gueteri, ha ojapóma heta mbaʼe Jehová “imanduʼa porã” hag̃ua hesekuéra (Ecl. 7:1). Ñanemanduʼákena mbaʼérepa Jehová omombaʼete ha hakateʼỹete hesekuéra. Upévare, jasegíkena javalora koʼã ermánope. Ñande ningo jajoguase Eliséope. Haʼe ningo oinsisti vaʼekue Elíaspe opyta hag̃ua hendive pe último día oĩtahápe hikuái oñondive, ha 3 vése voi heʼi chupe: “Che ndorohejamoʼãi” (2 Rey. 2:2, 4, 6).

15. ¿Mbaʼe mbaʼépa ikatu ñaporandu umi ermáno ha ermanakuéra ijedávape?

¹⁵ Jahechaukákena añetehápe ñañeinteresaha umi ijedávare, ha mborayhúpe ñambaʼeporandu chupekuéra (Prov. 1:5; 20:5; 1 Tim. 5:1, 2). Por ehémplo, ikatu ñaporandu chupekuéra: “¿Mbaʼépa ndéve nekonvense rakaʼe kóva haʼeha la verda? ¿Mbaʼéichapa nemoag̃uive raʼe Jehováre umi mbaʼe rehasa vaʼekue? ¿Mbaʼépa ndéve nepytyvõ raʼe resegi hag̃ua vyʼápe reservi Jehovápe?” (1 Tim. 6:6-8). Upéi jajapysaka porã hesekuéra okasea jave ñandéve umi mbaʼe ohasa vaʼekue hikuái.

16. ¿Mbaʼéichapa ou porã peteĩ ijedávape ha peteĩ imitãvape oñemongetáramo oñondive?

¹⁶ Peteĩ ijedáva oñemongetáramo peteĩ imitãvandi, upéva ou porãitereíta mokõivévape (Rom. 1:12). Peẽ penemitãva peimevétantema segúro Jehová oñangarekoha isiervokuéra ifiélvare, ha umi ijedáva oñandúta oñemombaʼe ha ojehayhuha chupekuéra. Haʼekuéra ningo vyʼápe omombeʼúta peẽme mbaʼeichaitémapa Jehová ovendesi chupekuéra.

17. ¿Mbaʼérepa ikatu jaʼe umi ermáno ha ermanakuéra ijedáva amás día iporãiteveha?

¹⁷ Amáske ñandeeda ningo pe ñane porãngue opa ohóvo. Péro Jehovápe g̃uarã umi isiervokuéra ifiélva amás día iporãiteve (1 Tes. 1:2, 3). ¿Mbaʼérepa jaʼe upéva? Pórke káda áño ohasávape, haʼekuéra oheja Jehová espíritu omboʼe ha oipytyvõ chupekuéra oreko hag̃ua umi kualida iporãva. Upévare, jaikuaa porãvéramo ñane ermanokuéra ijedávape ha ñaaprende chuguikuéra, ñamombaʼevétantema chupekuéra ha jahechakuaáta haʼeha peteĩ tesóro ijojahaʼỹva.

18. ¿Mbaʼépa jahecháta pe ótro artíkulope?

¹⁸ Pe kongregasión ningo imbaretevéta ohóvo umi imitãva omombaʼéramo umi ijedávape, péro avei umi ijedáva omombaʼe vaʼerã umi imitãvape. Pe ótro artíkulope jahecháta mbaʼéichapa umi ijedáva ikatu ohechauka ovaloraha umi imitãva oĩvape kongregasiónpe.