1, 2. ¿Mbaʼépa oprofetisa vaʼekue Ageo oikotaha ñane tiémpope?

OIKÓRÕ guare peteĩ terremóto Nepálpe áño 2015-pe, umi hénte ojesalva vaʼekue heʼi koʼã mbaʼe: “Sapyʼaitépe ningo umi negósio ha edifísio tuja oñepyrũ oupaite yvýpe”. “Emañaha gotyonte la hénte ojedesesperapa [...]. Heta hénte heʼi upe yvyryrýi opa hague 2 minútopente, péro chéve g̃uarã haʼete voi kuri la ndopamoʼãiva”. Oiméramo nde rehasa raʼe avei peichagua situasión ivaietéva, ni mbaʼevéicharõ nanderesaraichéne upe oiko vaʼekuégui.

² Ñane tiémpope oiko hína avei peteĩ ñembokacha, péro kóva idiferénte ndoikói rupi peteĩ siuda térã paíspente. Upéva rangue Jehová ombokacha hína entéro tetã oĩva ko múndope, ha ojapóma heta áño oñepyrũ hague ojapo upéva. Ko ñembokacha oprofetisa vaʼekue Ageo, heʼírõ guare: “Péicha heʼi Jehová, umi ehérsito yvagapegua ruvicha: ‘Koʼẽrõitéma ambokacha jeýta pe yvága ha yvy, pe mar ha pe yvy isékova’” (Ageo 2:6).

3. ¿Mbaʼérepa ikatu jaʼe idiferenteha pe ñembokacha Ageo oñeʼẽ hague ha peteĩ terremóto?

³ Pe ñembokacha Ageo oñeʼẽ hague idiferénte hína peteĩ terremótogui, pórke umíva ningo sarambímante ojapo. Péro pe ñembokacha Ageo oñeʼẽ hague oreko rresultádo porã. Jehová voi heʼi vaʼekue: “Ambokacháta kompletoite umi tetãnguéra, ha umi mbaʼe iporãva oĩva entéro tetãme oikéta ko ógape, ha amomimbíta ha ambojajaipáta ko óga” (Ageo 2:7). ¿Mbaʼe signifikádopa oreko raʼe ko profesía umi oiko vaʼekuépe g̃uarã Ageo tiémpope? ¿Ha mbaʼe signifikádopa oreko ñandéve g̃uarã koʼág̃arupi? Ko artíkulope ñambohováita koʼã porandu, ha jahecháta avei mbaʼéichapa ñande japartisipa hína pe traváho ojejapóvape oñembokacha hag̃ua umi tetãnguéra.

4. ¿Mbaʼérepa Jehová omondo vaʼekue proféta Agéope ipuévlo rendápe?

⁴ Jehová onkarga vaʼekue proféta Agéope ojapo hag̃ua peteĩ mbaʼe iñimportantetereíva. Jahechamína la oiko vaʼekue upe mboyvemi. Áño 537-pe a.C., peteĩ grúpo de judío oĩ vaʼekue Babilóniape oho jey Jerusalénpe, ha amalisiami Ageo oho avei hendivekuéra. Og̃uahẽ riremi hikuái upépe, koʼã Jehová siervokuéra ifiélva oñepyrũ omopuʼã jey Ñandejára róga, ha omoĩmba pe témplo simiénto (Esd. 3:8, 10). Péro upe riremínte oiko peteĩ mbaʼe ñambyasyetereíva. Haʼekuéra ou oñedesanima ha nomopuʼãvéi pe témplo, pórke umi hénte oikóva ijererekuéra oñemoĩ hesekuéra (Esd. 4:4; Ageo 1:1, 2). Upévare áño 520-pe a.C. Jehová omondo Agéope omokyreʼỹ ha omombarete hag̃ua umi judíope, ikatu hag̃uáicha ojapopa hikuái pe témplo (Esd. 6:14, 15). *

5. ¿Mbaʼérepa oiméne omokyreʼỹete raʼe Ageo mensáhe Jehová puévlope?

⁵ Pe mensáhe Ageo ogueraha vaʼekue oipytyvõ vaʼerã kuri umi judíope ojeroviave hag̃ua Jehováre. Ko proféta pyʼaguasúpe heʼi umi judío oñedesanima vaʼekuépe: “‘Penembaretékena enterove peẽ hénte peikóva ko lugárpe ha pembaʼapo’, heʼi Jehová. ‘Pórke che aime penendive’, heʼi Jehová, umi ehérsito yvagapegua ruvicha” (Ageo 2:4). Pe fráse “Jehová, umi ehérsito yvagapegua ruvicha” oiméne omokyreʼỹ ha omoñeñandu raʼe chupekuéra segúro. Jehová ningo oreko ipoguýpe peteĩ ehérsito de ánhel tuichaitereíva, upévare umi judío osẽ porãséramo tekotevẽ kuri ojerovia Jehováre.

6. ¿Mbaʼépa oikóta raʼe pe ñembokacha rire Ageo oprofetisa vaʼekue?

⁶ Jehová omondo Agéope heʼi hag̃ua umi judíope haʼe ombokachataha kompletoite umi tetãnguéra. Upe mensáhe omokyreʼỹ vaʼekue umi judío oñedesanimávape ha nomopuʼãvéi vaʼekuépe pe témplo. ¿Mbaʼérepa? Pórke ko mensáhe ohechauka kuri Jehová ombokachataha Pérsiape, pe nasión ipoderosovéva oĩ vaʼekue upe tiémpope. ¿Ha mbaʼépa oikóta raʼe oñembokacha rire Pérsiape? Primero, Ñandejára puévlo ikatúta kuri omopuʼãmba pe témplo. Ha upéi umi ndahaʼéiva judío jepe omoirũta chupekuéra oadora hag̃ua Jehovápe upe témplope. ¡Añetehápe upe mensáhe oiméne omokyreʼỹeterei raʼe Ñandejára puévlope! (Zac. 8:9).

7. ¿Mbaʼéichapa ñande ñaipytyvõ hína koʼág̃arupi oñembokacha hag̃ua ko múndo?

⁷ ¿Mbaʼe signifikádopa oreko Ageo profesía ñane tiémpope? Koʼág̃arupi ningo Jehová ombokacha jey hína kompletoite umi tetãnguéra, ha ko vuéltape ñande ñaipytyvõ hína ojejapo hag̃ua upéva. Ñapensamíntena ko mbaʼére: 1914-pe Jehová onombra vaʼekue Jesucrístope Rréi ogoverna hag̃ua Irréino yvagapegua (Sal. 2:6). Upéva haʼe kuri notísia vai umi governánte ko mundopeguápe, pórke heʼise “pe tiémpo oñemeʼẽva umi nasiónpe” oñekumplíma hague, térã opamaha pe tiémpo ndaiporihápe peteĩ governánte orrepresentáva Jehovápe (Luc. 21:24). Upéicha rupi, koʼýte 1919 guive, Jehová puévlo heʼi oikóvo umi héntepe Ñandejára Rréino añoite haʼeha pe esperánsa yvyporakuérape g̃uarã. Pe traváho jajapóva japredikávo “umi notísia porã oñeʼẽva Ñandejára Rréinore” ombokacha hína ko múndo kompletoite (Mat. 24:14).

8. Ohechaukaháicha Salmo 2:1-3, ¿mbaʼéichapa orreaksiona la majoría umi nasión ohendúvo pe mensáhe?

⁸ ¿Mbaʼéichapa orreaksiona la hénte ohendúvo ko mensáhe? La majoríape ndogustái (elee Salmo 2:1-3). Umi nasión ningo  ipyʼatarovapa. Haʼekuéra ndoaseptaséi pe governánte Jehová oiporavo vaʼekuépe. Chupekuéra g̃uarã pe mensáhe oñeʼẽva Ñandejára Rréinore ndahaʼéi “notísia porã”. ¡Oĩ voi umi goviérno oproivíva pe predikasión! Heta governánte heʼíramo jepe oserviha Ñandejárape, ndopoiséi hikuái pe podér ha autorida orekóvagui. Oiko haguéicha Jesús tiémpope, koʼág̃arupi umi governánte oñemoĩ avei pe Jehová oiporavo vaʼekuére oatakávo idisipulokuéra ifiélvape (Hech. 4:25-28).

9. ¿Mbaʼépa Jehová opensa ohechávo umi tetãnguéra orreaksiona vaiha?

⁹ ¿Mbaʼépa Jehová opensa ohechávo umi tetãnguéra orreaksiona vaiha? Salmo 2:10-12-pe heʼi: “Upéicharõ peẽ rreikuéra, pehechaukána penearanduha, peẽ hués yvy arigua, peaseptána la konsého oñemeʼẽva peẽme. Peadora Jehovápe ha perrespeta chupe. Vyʼápe peservi Ñandejárape ha pemombaʼe chupe. Pehechaukáke pemombaʼeha Itaʼýrape, osino Ñandejára ipochýta penendive. Ndapejapóiramo upéicha, katuete peñehundíta, pórke pe tata pyaʼe opuʼãháicha, haʼe sapyʼaitépe ipochýta ha opuʼãta penderehe. Ovyʼa entéro umi persóna oñemoag̃uíva Ñandejárare ojeprotehe hag̃ua”. Jehová ningo imbaʼeporãitereígui omeʼẽ hína oportunida iñenemigokuérape odesidi hag̃ua okambia ha oapoja Ñandejára Rréino. Péro opaʼíntema hína la tiémpo, jaikóma rupi “umi ára pahápe” (2 Tim. 3:1; Is. 61:2). Koʼág̃arupi mas ke núnka iñurhénte la hénte oikuaa Jehovápe ha ojedesidi oservi chupe.

10. Ohechaukaháicha Ageo 2:7-9, ¿mbaʼe rresultádo porãpa orekóta pe ñembokacha?

¹⁰ Oikóvo pe ñembokacha Ageo oprofetisa vaʼekue, oĩ avei umi hénte orreaksiona porãva. Haʼe omombeʼu ñandéve pe rresultádo porã orekótava ko ñembokacha, heʼívo “umi mbaʼe iporãva [térã umi hénte ipyʼaporãva] oĩva entéro tetãme” outaha oadora Jehovápe (elee Ageo 2:7-9). * Isaías ha Miqueas oprofetisa vaʼekue avei oikotaha upéva “umi ára pahápe” (Is. 2:2-4; Miq. 4:1, 2).

11. ¿Mbaʼépa ojapo raʼe peteĩ ermáno ohendúrõ guare primera ves pe mensáhe oñeʼẽva Ñandejára Rréinore?

 ¹¹ Jahechamína mbaʼéichapa orreaksiona raʼe peteĩ ermáno hérava Ken, ohendúrõ guare pe mensáhe ombokacháva umi tetãnguérape. Haʼe ningo ombaʼapo hína pe sentrál mundiálpe, ha ojapóma 40 áñorupi ohendu hague por primera ves pe mensáhe oñeʼẽva Ñandejára Rréinore, péro koʼag̃aite peve imanduʼa porãiterei upévare. Haʼe heʼi: “Ahendúrõ guare primera ves umi mbaʼe omboʼéva Ñandejára Ñeʼẽ, avyʼaiterei aikuaávo jaikomaha ko múndo ára pahápe. Ahechakuaa aipotáramo Ñandejára cheguerohory ha ahupytyséramo pe vída etérna, tekotevẽha ajei ko múndo ivaietévagui ha ajepytaso mbarete Jehová ykére. Upévare upepete ajedesidi ajapotaha upéva, ha añemboʼe Jehovápe amombeʼu hag̃ua chupe la ajaposéva. Ajedehaite ko múndogui, ha pyaʼe porã aasepta Ñandejára Rréino, pórke upéva isegúro ha mbaʼeve nomonguʼemoʼãi chupe”.

12. ¿Mbaʼéichapa Jehová témplo espirituál omimbi ha ojajaipa hína koʼã ára pahápe?

¹² Ojekuaa porãiterei ningo Jehová ovendesiha hína ipuévlope. Koʼã ára pahápe hetaitereive hénte oñepyrũ oadora chupe. Áño 1914-pe ñaime kuri 5.000 rasamínte, koʼág̃a g̃uarã katu ñaiméma mas de 8 millón kyreʼỹme jaservíva Jehovápe. Ha káda áño ningo millones de hénte ñanemoirũ jagueromanduʼa hag̃ua Jesús omano hague día. Péicha “umi mbaʼe iporãva oĩva entéro tetãme” omyenyhẽ Jehová témplo espirituál korapy. Upéva hína umi mbaʼe Jehová ojapóva ojeadora hag̃ua chupe añoiténte. Jehová réra oñemombaʼeguasu avei koʼã persóna ojapo jave umi kámbio hekovépe ha omonde peteĩ aóicha pe kondúkta pyahu (Efes. 4:22-24).

13. ¿Mbaʼe ótra profesíapa oñekumpli avei oiko rupi koʼã mbaʼe ndaijojaháiva? (Ehecha pe taʼanga oĩva ko rrevísta apére).

¹³ Koʼã mbaʼe ndaijojaháiva ningo okumpli hína avei hetave profesía, por ehémplo pe jatopáva Isaías kapítulo 60-pe. Pe versíkulo 22 heʼi: “Pe saʼimi oĩva upéi oĩta 1.000. Pe tetã michĩvagui oikóta peteĩ tetã ipoderósova. Che, Jehová, ambotuicháta chupe itiempoitépe”. Oĩ rupi hetaiterei hénte oñepyrũva oservi Jehovápe oiko hína peteĩ mbaʼe ndaijojaháiva. Koʼã persóna, térã “umi mbaʼe iporãva”, oreko heta  avilida ha kyreʼỹme opredika “umi notísia porã oñeʼẽva Ñandejára Rréinore”. Upéicha rupi Jehová puévlo ikatu oipuru porã koʼã avilida, ha oreko ‘entéro mbaʼe oikotevẽva’ (Is. 60:5, 16). Koʼã kuimbaʼe ha kuña ivaliosoitéva oipytyvõ rupi pe predikasiónpe, ikatúma oñeg̃uahẽ mas de 240 paíspe ha oñeguenohẽma umi puvlikasión mas de 1.000 idiómape.

14. ¿Mbaʼépa odesidi vaʼerã koʼág̃arupi umi hénte?

¹⁴ Ñande ningo jaiko hína umi ára pahápe, ha Jehová ombokacha rupi umi tetãnguérape, umi hénte odesidímante vaʼerã mbaʼépa ojapóta. ¿Oapojátapa hikuái Ñandejára Rréino, térãpa ojeroviáta umi goviérno oĩvare ko múndope? Upéva ningo peteĩ mbaʼe iñimportantetereíva enterove odesidi vaʼerã. Ñande jaservíva Jehovápe ningo ñakumpli umi léi omoĩva umi goviérno pe país ñande jaikohápe, péro nañañentremetéi polítikape (Rom. 13:1-7). Ñande jaikuaa pe Rréino añoite osolusionataha yvyporakuéra provléma, ha upe Rréino ndahaʼéi hína ko mundopegua (Juan 18:36, 37).

15. ¿Mbaʼéichapa Apocalipsis ohechauka oñemoĩtaha a pruéva Ñandejára puévlo jerovia?

¹⁵ Lívro de Apocalípsispe oñemombeʼu koʼã ára pahápe oñemoĩtaha a pruéva Ñandejára puévlo jerovia. Upéva heʼise osegitaha oĩ umi oñemoĩ mbaretéva ñanderehe ha ñandepersegíva. Umi goviérno oĩva ko múndope oipota oñemeʼẽ chupekuéra pe adorasión Ñandejárape añoite oñemeʼẽ vaʼerã, ha upévare opersegi hikuái umi ndoapojáivape chupekuéra (Apoc. 13:12, 15). Haʼekuéra “oovliga entéro umi héntepe omoĩ hag̃ua peteĩ márka ipo deréchare térã isyváre, tahaʼe umi iñimportánteva térã umi ndorekoguasúiva autorida, umi iplátava térã umi imboriahúva, umi orekóva liverta térã umi esklávo” (Apoc. 13:16). Yma ningo umi esklávope oñemarka vaʼekue ojekuaa hag̃ua mávapa la ijára. Upéicha avei, koʼág̃arupi oñehaʼarõ enterove hénte oreko peteĩ márka ohechaukáva mávapepa oapoja hikuái. Ha umi hénte ohechauka hína umi mbaʼe opensáva ha ojapóva rupive, oapojaha umi goviérnope ha haʼekuéra haʼeha la ijára.

16. ¿Mbaʼérepa koʼág̃ama voi jajasegura vaʼerã ñandefieltaha Jehovápe toiko la oikóva?

¹⁶ ¿Ñandépa jaaseptáta upe márka ha jaapojáta umi goviérnope? Umi orrechasáva upe márka ningo heta ohasa asýta ha ojapeligráta. Pe lívro de Apocalipsis omombeʼu voi: “Umi ndorekóiva pe márka ndaikatumoʼãi ojogua mbaʼeve ni ovende, síno umi orekóva pe márka añoite” (Apoc. 13:17). Péro Ñandejára puévlo oikuaa mbaʼépa Jehová ojapóta umi orekóvare pe márka (Apoc. 14:9, 10). Upévare, oasepta rangue hikuái upe márka, umi mbaʼe ojapóva rupive haʼekuéra haʼetévaicha oskrivíva ipóre: “Che Jehová mbaʼe hína” (Is. 44:5). Koʼág̃a hína la tiémpo jajasegura hag̃ua ñandefieltaha Jehovápe toiko la oikóva. Jajapóramo upéicha, Jehová vyʼápe heʼíta ñanderehe ñande haʼeha imbaʼe.

17. ¿Mbaʼépa tekotevẽ ñanemanduʼa Jehová pasiénsiare?

¹⁷ Jehová ningo hetáma ipasiénsia koʼã ára pahápe, pórke haʼe ndoipotái avave oñehundi (2 Ped. 3:9). Jehová omeʼẽ hína tiémpo ha oportunida enterovépe, ikatu hag̃uáicha oñarrepenti ha odesidi oservi chupe. Péro la ipasiénsia oreko límite. Umi hénte orrechasáramo upe oportunida, oikóta hesekuéra la oiko vaʼekue faraón rehe Moisés tiémpope. Jehová heʼi vaʼekue faraónpe: “Che ikatúma kuri aipuru che podér ambou hag̃ua pende ári peteĩ mbaʼasy vai, ha péicha pohundipaite ko yvy ape árigui, ndéve ha avei nde puévlope. Péro che  aheja gueteri reikove ahechauka hag̃ua ndéve che podér, ha che réra ojekuaa hag̃ua opárupi ko yvy ape ári” (Éx. 9:15, 16). Amo ipahápe, kompletoite umi nasión oikuaáta hína Jehová añoite haʼeha pe Dios verdadéro (Ezeq. 38:23). ¿Mbaʼéichapa oikóta upéva?

18. a) ¿Mbaʼeichagua ñembokacha rehepa oñeñeʼẽ Ageo 2:6, 20-22-pe? b) ¿Mbaʼéichapa jaikuaa umi mbaʼe heʼi vaʼekue Ageo oñekumpli jeytaha amo gotyove?

¹⁸ (Elee Ageo 2:6, 20-22). Hetaiterei áño Ageo omano rire, apóstol Pablo omyesakã vaʼekue koʼã mbaʼe oñekumpli jeytaha amo gotyove. Pablo heʼi: “Koʼág̃a katu haʼe opromete: ‘Una ves mas ambokacháta pe yvy, péro ndahaʼemoʼãi upéva añónte, síno pe yvága avei’. Heʼívo: ‘Una ves mas’, heʼise Ñandejára oipeʼataha umi mbaʼe oñembokacháva, umíva ndahaʼéi Ñandejára kreasión. Péicha opyta hag̃ua umi mbaʼe noñemonguʼéiva” (Heb. 12:26, 27). Ko ñembokacha ningo idiferénte pe ojeʼévagui Ageo 2:7-pe. ¿Mbaʼérepa? Pórke kóva ko ñembokacha heʼise oñehunditaha pára siémpre umi hénte ojoguáva faraónpe ha ndoaseptaséiva pe derécho Jehová orekóva ogoverna hag̃ua.

19. ¿Mbaʼépa hína pe noñemonguʼemoʼãiva, ha mbaʼéichapa jaikuaa upéva?

¹⁹ ¿Mbaʼépa hína pe noñemonguʼemoʼãiva, térã noñembokachamoʼãiva? Pablo osegi heʼi: “Jaikuaágui jarresivitaha peteĩ Rréino ndaikatúiva oñemonguʼe, jasegíkena ñañehaʼã jarresivi hag̃ua Ñandejára mbaʼeporã. Pórke upéva rupive ñande jaservi Ñandejárape haʼe oipotaháicha, jarrespeta ha ñamombaʼévo chupe” (Heb. 12:28). Ág̃a opa rire pe último ñembokacha, Ñandejára Rréino añoite noñemonguʼemoʼãi ha opytáta pára siémpre (Sal. 110:5, 6; Dan. 2:44).

20. ¿Mbaʼépa odesidi vaʼerã umi hénte, ha mbaʼéichapa ñande ikatu ñaipytyvõ chupekuéra?

²⁰ ¡Ndaiporivéima tiémpo japerde vaʼerã! Umi hénte tekotevẽ odesidi mbaʼépa ojapóta: Haʼekuéra odesidíramo osegitaha oapoja ko múndope, oñehundíta hikuái. Péro odesidíramo oservitaha Jehovápe ha oñepyrũ oiko haʼe oipotaháicha, oikovéta hikuái pára siémpre (Heb. 12:25). Pe predikasión rupive ñande ikatu ñaipytyvõ umi héntepe odesidi hag̃ua ko mbaʼe iñimportantetéva. Hiʼãite ningo ñandéve jasegi ñaipytyvõ hetave hénte ipyʼaporãvape odesidi hag̃ua oapoja Ñandejára Rréino. Ha ñanemanduʼákena siémpre la heʼi vaʼekuére ñande Ruvicha Jesús: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mat. 24:14).