1. ¿Mbaʼéichapa ikatu jaikuaa peteĩ persónapa haʼe de konfiánsa?

 PETEĨ persóna de konfiánsa katuete okumplíta ipromésa ha siémpre heʼíta la verda (Sal. 15:4). Upévare entéronte ikatu okonfia hese. Ñande avei jaipota ñane ermanokuéra okonfia ñanderehe. ¿Mbaʼépa ikatu jajapo haʼekuéra okonfia hag̃ua ñanderehe?

2. ¿Mbaʼéichapa ikatu jahechauka ñande haʼeha peteĩ persóna de konfiánsa?

² Ñande ningo ndaikatúi jaovliga peteĩ persónape okonfia hag̃ua ñanderehe, síno ñañehaʼã vaʼerã ñagana la ikonfiánsa. Upéva ikatu ñakompara pe plátare. Heta ningo ñambaʼapo jejopy vaʼerã ñakonsegi hag̃ua pe pláta, péro ifasileterei la japerdepa hag̃ua. Añetehápe entéro mbaʼe Jehová ojapóvape ogana la ñane konfiánsa. Haʼe arakaʼeve nomeʼẽi ñandéve motívo ñadeskonfia hag̃ua hese, pórke “ojapóva guive ohechauka ikatuha jajerovia hese” (Sal. 33:4). Ha haʼe ohaʼarõ ñande jasegi iñehémplo (Efes. 5:1). Jahechamína koʼág̃a unos kuánto Jehová siérvo ehémplo ohechauka vaʼekue ikatuha ojejerovia hesekuéra ojapoháicha Itúa yvagapegua. Avei jahecháta 5 kualida ñanepytyvõtava ñande haʼe hag̃ua peteĩ persóna de konfiánsa.

3, 4. a) ¿Mbaʼéichapa proféta Daniel ohechauka haʼe hague peteĩ persóna de konfiánsa? b) ¿Mbaʼépa iporãta ñande avei ñañeporandu?

³ Proféta Daniel ohechauka porãiterei vaʼekue haʼeha peteĩ persóna de konfiánsa. Umi babilonio ningo ogueraha vaʼekue chupe prisionéroramo. Péro haʼe pyaʼe voi ohechauka vaʼekue ikatuha ojejerovia hese. ¿Mbaʼéicha rupípa Daniélpe ojekuaa vaʼekue haʼeha peteĩ persóna de konfiánsa? Por ehémplo, rréi de Babilonia hérava Nabucodonosor orekórõ guare peteĩ suéño, Jehová oipytyvõ vaʼekue Daniélpe omyesakã hag̃ua pe rréipe mbaʼépa heʼise la haʼe osoña vaʼekue. Peteĩ vuéltape Daniel heʼi vaʼerã kuri pe rréipe Jehová ndoguerohoryiha chupe. Ha katuete ningo rréi Nabucodonosor  nohaʼãrõiete kuri ohendutaha peichagua mensáhe. ¡Rréi Nabucodonosor ningo ijarheleterei ha iviolénto vaʼekue! Upévare Daniel tekotevẽ vaʼekue ipyʼaguasu (Dan. 2:12; 4:20-22, 25). Heta áño rire, Daniel ohechauka jey vaʼekue haʼe hague peteĩ persóna de konfiánsa. Upérõ ningo pe palásio de Babilonia parére oaparese vaʼekue peteĩ mensáhe iñextráñova, ha Daniel oikuaauka vaʼerã kuri mbaʼépa heʼise upéva (Dan. 5:5, 25-29). Tiémpo rire Darío el Medo ha ijofisialkuéra ohechakuaa vaʼekue avei Daniel rehe iñaranduetereiha ha ndaiporiha voi ohupytýva chupe. Orrekonose avei hikuái Daniel haʼeha ‘peteĩ persóna de konfiánsa, iñonrrádo ha ojapo porãha opa mbaʼe oñemoĩva ikárgope’ (Dan. 6:3, 4). Añetehápe umi governánte ndoservíriva Jehovápe jepe orrekonose vaʼekue Daniel haʼe hague Jehová siérvo ikatúva ojejerovia hese.

⁴ Jahecha rire Daniel ehémplo, iporãta ñañeporandumi avei: “¿Mbaʼépa opensa cherehe umi ndahaʼéiva testígo de Jehová? ¿Ojehechakuaápa cherehe akumpliha entéro umi rresponsavilida arekóva ha haʼeha peteĩ persóna de konfiánsa?”. ¿Mbaʼérepa iñimportantete ñañeporandu koʼã mbaʼe? Pórke ñande haʼéramo peteĩ persóna de konfiánsa ñamombaʼeguasu hína Jehovápe.

5. ¿Mbaʼépa oipytyvõ raʼe Hananíaspe haʼe hag̃ua peteĩ persóna de konfiánsa?

⁵ Áño 455 a.C., oñemopuʼãmba rire umi murálla de Jerusalén, pe governadór Nehemías oheka vaʼekue peteĩ kuimbaʼe de konfiánsa ikatúva oñangareko pe siudáre. Nehemías oiporavo unos kuánto apytégui pe prínsipe Hananíaspe oĩva pe kastíllope. La Biblia heʼi Hananíasre ‘haʼe hague peteĩ kuimbaʼe ikatúvare jajerovia ha hetágui haʼe okyhyjeve ha orrespetaveha  Ñandejára teépe’ (Neh. 7:2). Hananías ningo ohayhueterei vaʼekue Jehovápe, ha oipota voi siémpre oguerohory chupe. Upévare ombaʼapo jejopy okumpli hag̃ua oimeraẽ asignasión oñemeʼẽva chupe. Koʼã kualida ningo ideprovechoitereíta avei ñandéve oiko hag̃ua ñandehegui peteĩ persóna de konfiánsa jaservívo Jehovápe.

6. ¿Mbaʼéichapa Tíquico ohechauka vaʼekue apóstol Páblope haʼe hague peteĩ amígo de konfiánsa?

⁶ Jahechamína koʼág̃a Tíquico ehémplo. Apóstol Pablo ningo ojeroviaiterei vaʼekue hese. Pablo oĩrõ guare préso hógape, haʼe okonfia vaʼekue Tíquicore ha heʼi hese ‘oserviha ipyʼaite guive ñande Ruvichápe’ (Efes. 6:21, 22). Pablo okonfia rupi hese, onkarga vaʼekue chupe ontrega hag̃ua umi kárta umi ermanokuéra oĩvape Éfeso ha Colósaspe. Péro ndahaʼéi upearãnte la ojeroviáva hese, síno avei omokyreʼỹ ha okonsola hag̃ua umi ermáno upepeguápe. Tíquico ehémplo ñanemomanduʼa umi kuimbaʼe ifieletévare ha ikatúvare jajerovia ñane tiempopegua. Koʼã ermánope ningo oñenkarga omog̃uahẽ hag̃ua ñandéve umi informasión ñanepytyvõtava ñamombarete hag̃ua ñande jerovia (Col. 4:7-9).

7. ¿Mbaʼépa ikatu reaprende umi ansiáno ha siérvo ministeriál oĩvagui ne kongregasiónpe?

⁷ Ñande avei ñamombaʼeterei umi ansiáno ha siérvo ministeriál oĩva ñane kongregasiónpe ha ohechaukáva ikatuha ojejerovia hesekuéra. Proféta Daniel, Hananías ha Tíquico ojapo haguéicha, haʼekuéra avei ojagarra ensério umi rresponsavilida orekóva ha oñehaʼãmbaite okumpli porã umíva. Por ehémplo, jaasisti jave pe rreunión éntre semanaguápe ñande ni michĩmi ndajadudái káda párte oĩva pe prográmape oñeasigna hague álgienpe. Umi ansianokuéra oapresiaiterei avei ikatu haguére okonta umi ermáno oguerekóvandi párte, pórke ojeroviaiterei oprepara ha opresentataha umi ipartekuéra pe rreuniónpe. Ñapensamíntena, ñande ningo ni michĩmi ndajadudái ñainvita hag̃ua ñane estudiántepe oasisti hag̃ua umi rreunión fin de semanaguápe, pórke ni michĩmi ndajakyhyjéi umi ermáno hesaráine hague oorganisa hag̃ua mávapa ojapóta pe diskúrso púvliko. Avei jajeroviaiterei jarekopaitetaha umi puvlikasión ñaikotevẽtava ñasẽ hag̃ua predikasiónpe. Añetehápe ñande jahechakuaa umi ansiáno ha siérvo ministeriál okuida porãitereiha ñanderehe. Ha jaagradese Jehovápe omeʼẽ haguére ñandéve koʼã ermáno. ¿Péro mbaʼéichapa ñande ikatu jahechauka haʼeha peteĩ persóna de konfiánsa?

8. ¿Mbaʼéichapa jahechauka ñandeekilivradoha ñañeinteresávo ñane ermanokuéra ohasávare? (Proverbios 11:13).

⁸ Ñande ningo jahayhueterei ñane ermanokuérape, ha jajepyʼapy umi mbaʼe ohasávare hikuái. Péro ñandeekilivrádo vaʼerã ha jarrespeta chupekuéra. Pe kongregasión kristiána síglo primero guarépe oĩ vaʼekue ‘umi ichismósova, oñentremetéva ótro ojapóvare ha oñeʼẽva oñeʼẽʼỹ vaʼerãre’ (1 Tim. 5:13). Añetehápe ñande ndajajoguaséi chupekuéra. Epensamíntena peteĩ persóna omombeʼuha ñandéve peteĩ mbaʼe, ha ojerure ñandéve ani hag̃ua ñamombeʼu ótrope. Por ehémplo, peteĩ ermána ikatu omombeʼu ñandéve oguerekoha peteĩ mbaʼasy térã ohasaha hína peteĩ situasión ijetuʼúvare, ha ojerure ñandéve ani hag̃ua ñamombeʼu ótrope. Upéicha jave ñande jarrespeta vaʼerã chupe, ha jajapo la haʼe ojeruréva ñandéve (elee Proverbios 11:13). b Koʼág̃a jahechamíta mbaʼéicha javépa iñimportánte avei jahechauka ñande haʼeha peteĩ persóna de konfiánsa.

9. ¿Mbaʼéichapa entéro umi oĩva peteĩ famíliape ikatu ohechauka haʼeha peteĩ persóna de konfiánsa?

⁹ Ñande rogapýpe. Entéro ñaĩva peteĩ familíape  ningo jareko la rresponsavilida nañamosarambírivo umi mbaʼe oikóva ñande rogapýpe. Por ehémplo, peteĩ ména ikatu opensa peteĩ kostúmbre orekóvare hembireko ikatuha ojepuka. ¿Péro oĩ porãtapa pe ména omombeʼu ótrope upéva omotĩ hag̃ua hembirekópe? Ni mbaʼevéicharõ ndojapomoʼãi upéva. Pe ména ningo ohayhu hembirekópe, upévare arakaʼeve ndojaposéi peteĩ mbaʼe omotĩ térã omoñeñandu vaítava chupe (Efes. 5:33). Umi sy ha túa imanduʼa vaʼerã avei umi ifamília imitãvape ogustaha ojetrata chupekuéra kon rrespéto. Upévare nomotĩmoʼãi avei chupekuéra omombeʼúvo ótrope mbaʼe mbaʼépepa ojavy hikuái (Col. 3:21). Umi mitã tekotevẽ avei oaprende okirirĩkuaa hag̃ua ha oĩha algúna kósa natekotevẽiva omombeʼu ani hag̃ua omotĩ ifamíliape (Deut. 5:16). Káda uno umi oĩva peteĩ famíliape oñehaʼãmbaitéramo ani hag̃ua omosarambi umi mbaʼe oikóva hogapýpe, ifamília oĩvéta unído.

10. ¿Mbaʼéichapa hína peteĩ amígo verdadéro? (Proverbios 17:17).

¹⁰ Ñane amigokuérandi. Ñande ningo la majoría ñaikotevẽ peteĩ amígo ñamombeʼu hag̃ua chupe mbaʼéichapa ñañeñandu. Péro upéva sapyʼánte ijetuʼu, pórke ndajajepokuaái ñamombeʼu mbaʼéichapa añetehápe ñañeñandu hína. Ha la ñamombeʼu sapyʼárõ katu, ha upéi jaikuaa pe ñane amígo omombeʼu hague ótrope umi mbaʼe jaʼe vaʼekue chupe, katuete ñañeñandu vaietereíta. Péro ajépa ñamombaʼete jarekóramo peteĩ ñane amígo haʼéva de konfiánsa ha ikatúva jajerovia hese. Upéva hína “peteĩ amígo verdadéro” (elee Proverbios 17:17).

11. a) ¿Mbaʼéichapa peteĩ ansiáno ha hembireko ohechauka haʼeha peteĩ persóna de konfiánsa? b) ¿Mbaʼépa ñaaprende peteĩ ansiáno otratávagui peteĩ téma konfidensiál ha upéi oĩva ifamíliandi? (Ehecha pe taʼanga).

¹¹ Kongregasiónpe. Umi ansiáno ndoikóiva omombeʼu upérupi umi mbaʼe oñekonfiáva chupekuéra, “haʼetéta peteĩ lugár ikatuhápe ñañemoʼã yvytu atãgui”, ha “peteĩ lugár ikatuhápe ñakañy” (Is. 32:2). Ñande ñañeñandu porã hendivekuéra ha ndakyhyjéi ñamombeʼu hag̃ua chupekuéra peteĩ mbaʼe, pórke jajerovia nomombeʼumoʼãiha ótrope. Avei ñande ndajajopýi chupekuéra omombeʼu hag̃ua ñandéve peteĩ mbaʼe nokorrespondéiva ñandéve jaikuaa. Avei  ñamombaʼeterei umi ansiáno rembirekópe, pórke ndoikói oporandu iménape umi mbaʼe natekotevẽiva oikuaa. Añetehápe ningo tuichaiterei mbaʼe peteĩ ansiáno ndeʼíriramo hembirekópe umi mbaʼe omombeʼúva chupe ermanokuéra. Peteĩ ansiáno rembireko heʼi vaʼekue: “Tuicha mbaʼe ningo chéve g̃uarã la che ména nomombeʼúi chéve mávapepa ojapo umi visíta de pastoréo, pórke péicha che nañekevrantái umi provléma orekóvare umi ermáno, ha che ndaikatumoʼãiva asolusiona. Avei chepytyvõ añeʼẽ hag̃ua trankílamente umi ermanokuérandi. Ha amombeʼúramo che ménape algún provléma arekóva térã mbaʼéichapa añeñandu, akonfia haʼe nomombeʼumoʼãiha avavépe”. Añetehápe enterovévante jaipota ojeʼe ñanderehe haʼeha peteĩ persóna de konfiánsa. ¿Mbaʼe kualidápa ñanepytyvõta jahupyty hag̃ua upéva? Jahechamína koʼág̃a 5 kualida ñanepytyvõtava upearã.

12. ¿Mbaʼérepa ikatu jaʼe pe mborayhu iñimportantetereiha ñakonfia hag̃ua ojuehe? Emoĩ peteĩ ehémplo.

¹² Japorohayhu. Tekotevẽterei ningo jajoayhu jajerovia hag̃ua ojuehe. Jesús heʼi vaʼekue voi umi mandamiénto iñimportantevéva haʼeha jahayhu Jehovápe ha ñande rapichápe (Mat. 22:37-39). Jehová ningo ohechauka entéro mbaʼépe haʼeha peteĩ persóna de konfiánsa, ha ñande jahayhúgui chupe jasegise iñehémplo. Por ehémplo, jahayhu rupi ñane ermanokuérape ndajaikomoʼãi ñamombeʼu upérupi umi mbaʼe haʼekuéra okonfiáva ñandéve. Avei ni mbaʼevéicharõ nañamombeʼumoʼãi umi mbaʼe omoñeñandu vaítava, olastima térã omotĩtava chupekuéra (Juan 15:12).

13. ¿Mbaʼéichapa ñaneumílderamo ñanepytyvõta oiko hag̃ua ñandehegui peteĩ persóna de konfiánsa?

¹³ Ñaneumílde. Pe umilda ñanepytyvõta oiko hag̃ua ñandehegui peteĩ persóna de konfiánsa. Peteĩ kristiáno iñumíldeva ndoikomoʼãi oñehaʼã haʼe hag̃ua pe primera persóna omombeʼúva peteĩ notísia oimpresiona hag̃ua ótrope (Filip. 2:3). Avei ndoikomoʼãi oñemoimportánte ontendekávo haʼe oikuaaha informasión ndaikatumoʼãiva omombeʼu ótrope. Ñaneumílderamo ndajaikomoʼãi ñamombeʼu umi idéa ñande jarekóva peteĩ témare la Biblia ha ñane puvlikasión ndeʼírivare mbaʼeve.

14. ¿Mbaʼéichapa ñanearandúramo ñanepytyvõ oiko hag̃ua ñandehegui peteĩ persóna de konfiánsa?

¹⁴ Ñanearandu. Pe arandu ningo oipytyvõ peteĩ kristiánope oikuaa hag̃ua arakaʼépa ‘pe tiémpo okirirĩ hag̃ua ha pe tiémpo oñeʼẽ hag̃ua’ (Ecl. 3:7). Oĩ lugár térã kultúra ojepuruhápe ko ñeʼẽnga: “Umi mbaʼe jaʼéva ojogua plátape, péro oroite hína ñakirirĩramo”. Upéva heʼise hetave vése iporãveha ñakirirĩ, ñañeʼẽ rangue. Upéicha rupi Proverbios 11:12 heʼi: “Pe iñarandúva okirirĩkuaa”. Jahechamína peteĩ ansiáno de experiénsia ehémplo. Chupe ningo pyʼỹinte ojejerure oipytyvõ hag̃ua diferénte kongregasiónpe ombohováiva hína algún provléma. Jahechamína mbaʼépa opensa ótro ansiáno ko ermánore, haʼe heʼi: “Haʼe ningo siémpre oñatende ani hag̃ua omombeʼu umi informasión ndovaléiva ojekuaa umi kongregasión rehegua”. Ko ansiáno iñexperiénsiava iñarandu rupi, umi ótro ansiáno ikongregasiongua orrespeta chupe, pórke oikuaa porã ndoikomoʼãiha omombeʼu umi téma konfidensiál.

15. Emoĩmína peteĩ ehémplo ohechaukáva mbaʼéichapa ñaneonrrádoramo umi ótro okonfiáta ñanderehe.

¹⁵ Ñaneonrrádo. Ko kualida ningo tuichaiterei ñanepytyvõta oñekonfia hag̃ua ñanderehe. Ndahasyiete ningo ñakonfia hag̃ua peteĩ persóna iñonrrádovare, pórke jaikuaa haʼe siémpre heʼitaha la siertoguáva (Efes. 4:25; Heb. 13:18). Por ehémplo, ñamoĩ chupe nde reporomboʼekuaaseveha la Biblia. Upévare ejerure ótro ermánope ojapysaka hag̃ua nderehe ha heʼi hag̃ua ndéve mbaʼépepa ikatu emehora ejapo porãve hag̃ua nde diskúrso. ¿Mávapepa ejeruréta nepytyvõ hag̃ua? ¿Ejerurétapa peteĩ heʼítavape ndéve umi  mbaʼe rehendusévante, térã peteĩ isinsérovape ha mborayhúpe heʼítava ndéve la verda? Japilláma la idéa, ¿ajépa? La Biblia heʼi voi: “Ikuentave jakorrehi ñande rapichápe ke la japorohayhu ha ndajahechaukái. Peteĩ amígo verdadéro ndekorrehíta oikuaáramo jepe ndaigustoiha upéva” (Prov. 27:5, 6). Umi konsého isinsérova omeʼẽva ñandéve peteĩ amígo, ñepyrũrã ikatu ijetuʼu jaasepta hag̃ua, péro kon el tiémpo tuichaiterei ñanepytyvõta.

16. ¿Mbaʼéichapa Proverbios 10:19 ohechauka iñimportantetereiha jajejokokuaa?

¹⁶ Jajejokokuaa. Tekotevẽterei ningo jajejokokuaa ikatu hag̃uáicha oiko ñandehegui peteĩ persóna de konfiánsa. Ko kualida ñanepytyvõ jajoko hag̃ua ñande juru jaʼeseterei jave peteĩ mbaʼe ojejerure vaʼekue ñandéve ani hag̃ua ñamombeʼu (elee Proverbios 10:19). Ikatu hína ijetuʼu ñandéve jajejokokuaa hag̃ua jaipuru jave umi rred sosiál. Ha nañañatendéiramo ikatu hína ñamombeʼu peteĩ informasión konfidensiál hetaiterei persónape. Ha ñamosarambi rire pe informasión elektrónikamente, ñande ndaikatumoʼãvéima ñakontrola mbaʼéichapa ojepurúta pe informasión ha mboy provlémapa oguerúta upéva. Jajejokokuaáramo avei ñanepytyvõta ñanembotavyse jave umi oñemoĩva ñanderehe ñamombeʼu hag̃ua umi mbaʼe ikatúva oapeligra ñane ermanokuérape. Upéva ikatu oiko umi polisía ñaneinterroga jave peteĩ país ojeproivihápe ñane rembiapo. Koʼãva ha avei ótra situasiónpe ikatu ñanemanduʼa Salmo 39:1 heʼívare, upépe heʼi: “Aĩ aja umi iñañáva renondépe, añatendéta la haʼévare ha ambotyetéta la che juru”. Jahechaháicha iñimportanteterei ningo jahechauka ikatuha ojejerovia ñanderehe, tahaʼe ñane famíliandi, ñane amigokuérandi ha ñane ermanokuérandi. Añetehápe tekotevẽterei jajejokokuaa jahechauka hag̃ua ñande haʼeha peteĩ persóna de konfiánsa.

17. ¿Mbaʼépa ikatu jajapo entéro ñaiméva kongregasiónpe haʼe hag̃ua peteĩ persóna de konfiánsa?

¹⁷ Ajépa jaagradesete Jehovápe ñanemoag̃ui haguére ijehe, ha péicha rupi jareko heta ermáno ha ermána ñanderayhuetereíva ha ikatúva jajerovia hesekuéra. Enterovéva ningo ñañehaʼãmbaite vaʼerã ñagana hag̃ua ñane ermanokuéra konfiánsa. Amáske jahechauka ñaneumildeha, ñanearandu, ñaneonrrádo ha jajejokokuaaha, ñaipytyvõ hína ñane kongregasiónpe jajogueraha porã ha ñakonfia hag̃ua ojuehe. Añetehápe káda uno tekotevẽterei ñambaʼapo ñandejehe oiko hag̃ua ñandehegui peteĩ persóna de konfiánsa. Upévare jasegíkena Jehová ehémplo ha jahechauka ikatuha oñekonfia ñanderehe.