1. Heʼiháicha Malaquías 3:16-pe, ¿mbaʼe lívropa Jehová oñepyrũ oskrivi, ha mbaʼépa oĩ pype?

 HETAITEREI áñoma ojapo Jehová oskrivi hague oikóvo peteĩ lívro espesiál. Ko lívrope oĩ umi téra, ha oñepyrũ pe primer Testígo ifiélva réragui voi: Abel (Luc. 11:50, 51). b Upe tiémpo guive Jehová oanotave ohóvo upe lívrope umi téra. Ha koʼág̃a g̃uarã oĩma hetaiterei persóna réra pýpe. Ko lívrope la Biblia ohenói “peteĩ lívro orekóva umi hénte réra, umi haʼe imanduʼátavare”, ‘pe lívro de la vída’ ha ‘pe rróllo de la vída’. Ko artíkulope ñañeʼẽ hag̃ua ko lívrore jaʼéta hína ‘pe lívro de la vída’ (elee Malaquías 3:16; Apoc. 3:5; 17:8, nóta).

2. ¿Máva rérapa ojeskrivi pe lívro de la vídape, ha mbaʼépa ikatu jajapo ojeskrivi hag̃ua ñande réra upe lívrope?

² Ko lívro espesiálpe ningo oĩ enterove umi persóna réra oadoráva Jehovápe ha okyhyjéva chugui, térã umi orrespetáva chupe ipyʼaite guive ha omombaʼetereíva Jehová réra. Umi persóna oguerekóta la oportunida oikovévo pára siémpre. Koʼág̃arupi ñande réra ikatu hína oñeanota upe lívrope jarekóramo Jehovápe ñane amigoitéramo. Ha upearã jajevale vaʼerã Itaʼýra Jesucristo sakrifísiore (Juan 3:16, 36). Enterove ningo  ñande jaipotaiterei ñande réra oĩ upe lívrope, tahaʼe jepe raʼe jareko la esperánsa jaikóvo yvágape térã ko yvy ape ári.

3, 4. a) ¿Jaikovétapa pára siémpre ñande réra ojeskrivíramo koʼág̃a pe lívro de la vídape? Emyesakã. b) ¿Mbaʼépa jahecháta ko artíkulope ha pe oúvape?

³ ¿Heʼisépa upéva enterove umi ojeskrivíma vaʼekue héra upe lívrope orekoha la garantía oikovévo pára siémpre? La rrespuésta jatopa Éxodo 32:33-pe, upépe Jehová heʼi vaʼekue Moiséspe: “Umi opeka vaʼekue che kóntrape, umíva réra la avorrátava che lívrogui”. Upéicharõ umi persóna orekómava héra upe lívrope ikatu hína ojevorra upégui, upéva haʼete voi Jehová oñepyrũ vaʼekue oskrivi lápipe umi téra (Apoc. 3:5). Ñande ningo jajasegura vaʼerã ñande réra osegi hag̃ua upe lívrope ág̃a ojeskrivi peve tínta permanéntepe.

⁴ Ñande ningo ikatu hína jaikuaaseve heta mbaʼe ko témagui. Por ehémplo, ¿mbaʼépa heʼi la Biblia umi persóna réra ojeskrivíma vaʼekuére pe lívro de la vídape ha avei umi téra ndojeskrivíri vaʼekuére upépe? ¿Mbaʼe tiémpopepa umi persóna orekóva héra pe lívrope orresivíta vída etérna? ¿Ha mbaʼépa oikóta umi persóna omano vaʼekuégui oguerekoʼỹre la oportunida oikuaávo Jehovápe? ¿Ojeskrivíne piko avei herakuéra pe lívrope? Koʼã pregúnta ñambohováita ko artíkulope ha pe oúvape.

¿MÁVA RÉRAPA OĨ PE LÍVROPE?

5, 6. a) Ohechaukaháicha Filipenses 4:3, ¿máva rérapa ojeskrivi pe lívro de la vídape? b) ¿Mbaʼe tiémpopepa herakuéra ojeskrivíta permanéntemente pe lívro de la vídape?

⁵ ¿Máva rérapa ojeskrivi pe lívro de la vídape? Ñambohovái hag̃ua ko pregúnta jahechami 5 diferénte grúpo de persóna. Koʼãva apytépe oĩ umi ojeskrivi vaʼekue héra pe lívro de la vídape ha ótro katu nahániri.

 ⁶ Pe primer grúpope oĩ umi ojeporavo vaʼekue oho hag̃ua ogoverna Jesús ndive yvágape. ¿Ojeskrivípa herakuéra pe lívro de la vídape koʼág̃a? Si ojeskrivi. Apóstol Pablo oskrivírõ guare umi omoirũvape chupe Filípospe, heʼíma vaʼekue ojeskrivíma hague pe lívro de la vídape umi unhído réra, umi ojeporavo vaʼekue ogoverna hag̃ua Jesús ndive (elee Filipenses 4:3). Péro ani hag̃ua ojevorra herakuéra upe lívrogui, haʼekuéra osegi vaʼerã ifiél Jehovápe. Ha orresivi vove hikuái pe séllo finál, tahaʼe jepe raʼe omano mboyve térã oñepyrũ mboyve pe jehasa asy guasu, la herakuéra ojeskrivítama permanéntemente ko lívrope (Apoc. 7:3).

7. ¿Mbaʼéichapa Apocalipsis 7:16, 17 rupive jaikuaa mbaʼe tiémpopepa umi ótro ovechakuéra réra ojeskrivíta permanéntemente pe lívro de la vídape?

⁷ Pe segundo grúpope oĩ umi ótro ovechakuéra aty guasu. ¿Ojeskrivípa herakuéra avei pe lívro de la vídape? Si ojeskrivi. ¿Osegítapa oĩ herakuéra pe lívro de la vídape ohasa rire Armagedón? Si (Apoc. 7:14). Jesús heʼi vaʼekue koʼã persóna ojoguáva ovechápe ‘oikovetaha pára siémpre’ (Mat. 25:46). Péro umi ohasátava Armagedón ndahaʼemoʼãi upepete voi oñemeʼẽtava chupekuéra vída etérna. Haʼetétavaicha la herakuéra ojeskrivíva lápipe pe lívro de la vídape. Jesús ogoverna aja umi 1.000 áño oñangarekóta hesekuéra ojapoháicha ‘peteĩ pastór, ha ogueraháta chupekuéra oĩháme yvu orekóvape y oporomoingovéva’. Umi osegíva Cristo gía ha amo ipahápe ojehusgávape ifielha Jehovápe ojeskrivíta la herakuéra permanéntemente pe lívro de la vídape (elee Apocalipsis 7:16, 17).

8. ¿Máva rérapa ndojeskrivíri pe lívro de la vídape, ha mbaʼépa oikóta hesekuéra?

⁸ Pe tercer grúpope oĩ umi kavara oñehundítava Armagedónpe. Herakuéra noĩri pe lívro de la vídape. Jesús heʼi vaʼekue hesekuéra ‘oñehunditaha opa ára g̃uarã’ (Mat. 25:46). Ha espíritu sánto rupive apóstol Pablo heʼi vaʼekue: “Ñande Ruvicha ohusgáta koʼãvape ha okastigáta chupekuéra ohundívo pára siémpre” (2 Tes. 1:9; 2 Ped. 2:9). Upéva oikóta avei umi ymaite guive opekávare pe espíritu sánto kóntrape a propósito. Chupekuéra oñehundíta pára siémpre ha ndorekomoʼãi hikuái vída etérna. Péicha hesakã porãiterei haʼekuéra ndorresusitamoʼãiha (Mat. 12:32; Mar. 3:28, 29; Heb. 6:4-6). Ñaanalisa porãmína koʼág̃a umi mokõi grúpo orresusitátava ko yvy ape ári.

UMI ORRESUSITÁTAVA

9. Ohechaukaháicha Hechos 24:15, ¿mbaʼe mokõi grúpopa orresusitáta ko yvy ape ári, ha mbaʼe diferénsiapa oreko?

⁹ La Biblia oñeʼẽ mokõi grúpo de persóna orresusitátavare ha orekóva la esperánsa oikóvo pára siémpre ko yvy ape ári, “umi ihústova” ha ‘umi iñinhústova’ (elee Hechos 24:15). “Umi ihústova” haʼe hína umi oservíva Jehovápe fiélmente oikove aja, ha ‘umi iñinhústova’ katu ndoservíri kuri Jehovápe fiélmente. Añetehápe la majoría umíva ikondúktare ohechauka kuri ndoikói hague Jehová heʼiháicha. Koʼã mokõi grúpo orresusitáta rupi, ¿ikatúpa jaʼe ojeskriviha herakuéra pe lívro de la vídape? Ñambohovái hag̃ua ko pregúnta ñaanalisa porãmi káda grúpo.

10. ¿Mbaʼérepa ojerresusitáta “umi ihústovape”, ha mbaʼe priviléhiopa oĩ orekótava ijapytepekuéra? (Ehecha avei ko rrevístape pe artíkulo “Oñeporandúva jepi” oñeʼẽva pe rresurreksión oikótavare ko yvy ape ári).

¹⁰ “Umi ihústova” haʼe hína pe cuarto grúpo. Haʼekuéra omano mboyve, herakuéra ojeskrivíma pe lívro de la vídape. ¿Ojevorrápa herakuéra pe lívrogui omano rire hikuái? No, pórke haʼekuéra ‘oikove’ gueteri Jehová memóriape. “Haʼe hína umi persóna oikovéva Jára, ndahaʼéi umi omano vaʼekue Jára.  Ñandejárape g̃uarã enterove haʼekuéra oikove gueteri” (Luc. 20:38). Upéva heʼise umi ihústova orresusita rire ko yvy ape ári, herakuéra oĩta pe lívro de la vídape, ndahaʼéiramo jepe permanénte gueteri la ojeskrivíva upépe (Luc. 14:14). Oĩta avei umi orresusitátava apytépe, umi orekótava pe priviléhio oservívo kómo “prínsipe ko yvy ape ári” (Sal. 45:16).

11. ¿Mbaʼépa oikotevẽta ‘umi iñinhústova’ ojeskrivi mboyve herakuéra pe lívro de la vídape?

¹¹ Ñañeʼẽmíta pe quinto grúpore: ‘Umi iñinhústova’. Ikatu oime haʼekuéra ndoikuaái rakaʼe Jehová léi. Haʼekuéra omano mboyve hekovére ohechauka vaʼekue ndaihustoiha. Upévare la herakuéra ndojeskrivíri pe lívro de la vídape. Péro Ñandejára orresusitáta chupekuéra oreko hag̃ua hikuái la oportunida ojeskrivívo herakuéra upe lívrope. Koʼã ‘iñinhústova’ ningo oikotevẽta hína oñepytyvõ chupekuéra. Koʼãva apytépe oĩ umi omano mboyve ojapo vaʼekue umi mbaʼe ivaietereíva. Upévare haʼekuéra oikotevẽta oñemboʼe chupekuéra mbaʼéichapa oiko vaʼerã umi Jehová léi ihústova heʼiháicha. Ha ikatu hag̃uáicha ojapo hikuái upéva, Ñandejára Rréino ojapóta pe traváho tuichavéva ko yvy ape ári oñemboʼe hag̃ua chupekuéra.

12. a) ¿Mávapa omboʼéta umi iñinhústovape? b) ¿Mbaʼépa oikóta umi nomoĩséivare en práktika umi mbaʼe oaprendéva?

¹² ¿Mávapa omboʼéta umi iñinhústovape? Pe aty guasu ha umi ihústova orresusitátava. Umi iñinhústova réra ojeskrivi hag̃ua pe lívro de la vídape, haʼekuéra tekotevẽta oñepyrũ oreko peteĩ amista Jehovándi ha oñemeʼẽ chupe. Jesucristo ha umi unhído oñatende porãta hína yvága guive ohecha hag̃ua umi iñinhústovapa omoĩ en práktika umi mbaʼe oñemboʼéva chupekuéra (Apoc. 20:4). Umi ndoaseptaséivape upe ajúda noñepermitimoʼãi osegi oikove orekóramo jepe 100 áño (Is. 65:20). Jehová ha Jesús ningo ikatu ohecha mbaʼépa oreko peteĩ persóna ikorasõme. Ha avavépe nopermitimoʼãi ojapo umi mbaʼe vai oporoperhudikátava pe múndo pyahúpe (Is. 11:9; 60:18; 65:25; Juan 2:25).

 UMI ORRESUSITÁVA OIKOVE HAG̃UA HA UMI ORRESUSITÁVA OJEHUSGA HAG̃UA

13, 14. a) ¿Mbaʼéichapa ymave ñantende vaʼekue Jesús heʼíva Juan 5:29-pe? b) ¿Mbaʼépa tekotevẽ jahechakuaa umi mbaʼe heʼi vaʼekuére Jesús?

¹³ Jesús oñeʼẽ vaʼekue avei umi orresusitátavare ko yvy ape ári. Por ehémplo haʼe heʼi vaʼekue: “Og̃uahẽta pe tiémpo enterove umi oĩva pe sepultúrape ohendutaha iñeʼẽ ha osẽta pe sepultúragui. Umi ojapo vaʼekue iporãva orresusitáta oikove hag̃ua, umi ojapo vaʼekue ivaíva katu orresusitáta ojehusga hag̃ua” (Juan 5:28, 29). ¿Mbaʼépa la heʼise vaʼekue Jesús?

¹⁴ Yma ningo ñande ñantende vaʼekue Jesús oñeʼẽ hague umi mbaʼe ojapóvare umi persóna oñemoingove jeýva orresusita riréma. Upéva heʼise oĩtaha umi orresusita rire ojapótava umi mbaʼe iporãva, ha ótro katu ojapotaha umi mbaʼe ivaíva. Péro jahechakuaápa Jesús ndeʼíri hague umi osẽva pe sepultúragui ojapotaha iporãva térã ojapotaha umi mbaʼe ivaíva. Haʼe oñeʼẽ umi mbaʼe anteve oiko vaʼekuére, pórke heʼi umi “ojapo vaʼekue iporãva” ha umi “ojapo vaʼekue ivaíva”. Upéva ohechauka koʼã mbaʼe ojapo hague hikuái omano mboyve. ¿Ajépa upéva isentído? Upéicha ningo, pórke avavépe noñepermitimoʼãi oiko ojapo mbaʼe vai pe múndo pyahúpe. Umi iñinhústova ojapopátama umi mbaʼe vai omano mboyve. Upéicharõ, ¿mbaʼépa heʼise vaʼekue Jesús oñeʼẽrõ guare umi ‘orresusitátavare oikove hag̃ua’ ha umi ‘orresusitátavare ojehusga hag̃ua’?

15. ¿Mávapa hína umi ‘orresusitátava oikove hag̃ua’, ha mbaʼérepa?

¹⁵ Umi ihústova ningo ojapo umi mbaʼe iporãva omano mboyve. Umíva “orresusitáta oikove hag̃ua”, pórke herakuéra ojeskrivítama pe lívro de la vídape. Upéva heʼise orresusitataha “umi ojapo vaʼekue iporãva” heʼiháicha Juan 5:29-pe, haʼe avei el mísmo “umi ihústova” orresusitátava oñeñeʼẽha Hechos 24:15-pe. Ko explikasión opyta porã la heʼívare Romanos 6:7-pe, upépe heʼi: “Peteĩ persóna omano vove ja oñeperdonáma chupe ipekadokuéra”. Upéicharõ umi ihústova omanóvo, la ipekadokuéra ja ojevorráma, péro umi mbaʼe porã ojapo vaʼekue ndopytamoʼãi tesaráipe (Heb. 6:10). Jaikuaa ningo umi ihústova orresusitátava tekotevẽtaha osegi ifiél ani hag̃ua la herakuéra ojevorra pe lívro de la vídagui.

16. ¿Mbaʼépa heʼise oĩtaha ‘orresusitátava ojehusga hag̃ua’?

¹⁶ ¿Mbaʼépa oikóta umi ojapo vaʼekuégui mbaʼe vai omano mboyve? Haʼekuéra opagapáramo jepe ipekadokuérare omanóvo, neʼĩra gueteri oservi Jehovápe fiélmente oikove aja. Upévare herakuéra neʼĩra gueteri ojeskrivi pe lívro de la vídape. Upéicharõ “umi ojapo vaʼekue ivaíva” orresusitátava ojehusga hag̃ua haʼe hína ‘umi iñinhústova’ oñeñeʼẽha Hechos 24:15-pe. Chupekuéra oñemoingove jeýta “ojehusga hag̃ua”. c Upéva heʼise Jesús omañataha ha ohusgataha umi iñinhústovape (Luc. 22:30). Ohasámante vaʼerã tiémpo Jesús ohusga hag̃ua chupekuéra omeresépa ojeskrivi la herakuéra pe lívro de la vídape. Umi iñinhústova okambiáva ikondúkta vai yma guare ha oñemeʼẽva Jehovápe añoite, ojeskrivíta herakuéra pe lívro de la vídape.

17, 18. ¿Mbaʼépa tekotevẽta ojapo umi orresusitátava ko yvy ape ári, ha mbaʼe rehepa oñeñeʼẽ ojeʼévo ‘hembiapokue’ Apocalipsis 20:12, 13-pe?

¹⁷ Umi orresusitáva haʼéramo jepe anteve ihústova térã iñinhústova, tekotevẽta okumpli umi léi oĩtava umi rróllo pyahúpe. Ha upéva  ojeavríta hína umi 1.000 áño aja. Apóstol Juan ohecha vaʼekue upéva peteĩ visiónpe, ha heʼi: “Ahecha umi omano vaʼekuépe, umi iñimportánteva ha umi ndorekoguasúiva autorida. Haʼekuéra oñemboʼy pe tróno renondépe ha ojeavri umi kuatiañeʼẽ. Péro ojeavri ótro kuatiañeʼẽ, péva hína pe lívro de la vída. Ha ojepuru umi mbaʼe ojeskrivíva umi kuatiápe ojehusga hag̃ua hembiapokuére umi omanóvape. Pe mar omeʼẽ umi omanóva oĩva pype, ha pe ñemano ha pe Sepultúra omeʼẽ umi omanóva oĩva ipypekuéra ha káda únope ojehusga hembiapokuére” (Apoc. 20:12, 13).

¹⁸ ¿Mbaʼépa hína umi orresusitátava rembiapokue ojehusgátava? ¿Haʼétapa umi mbaʼe haʼekuéra ojapo vaʼekue omano mboyve? ¡Nahániri! Ñanemanduʼákena haʼekuéra opagapáma hague umi ipekadokuéra omano mboyve guarére. Upéicharõ koʼápe oñeñeʼẽvo umi “hembiapokuére”, noñeñeʼẽi hína umi mbaʼe ojapo vaʼekuére hikuái omano mboyve. Upéva rangue oñeñeʼẽ umi hembiapokue ojapótavare hikuái osegívo umi mbaʼe oñemboʼéva chupekuéra pe múndo pyahúpe. Por ehémplo, koʼã kuimbaʼe ifiélva: Noé, Samuel, David ha Daniel oaprende vaʼerã avei Jesucrístogui ha ohechauka ojeroviaha isakrifísiore. Upéicharõ koʼytevéntema koʼã persóna iñinhústova oaprende vaʼerã koʼã mbaʼe.

19. ¿Mbaʼépa oikóta umi orrechasávagui ko oportunida ijojahaʼỹva?

¹⁹ ¿Mbaʼépa oikóta umi orrechasávagui ko oportunida ijojahaʼỹva? Apocalipsis 20:15-pe heʼi ñandéve: “Entéro umi noĩriva pe lívro de la vídape ojepoi pe lágo oĩháme tatarendy”. Péicha haʼekuéra oñehundietéta pára siémpre. ¡Ajépa iñimportantete upéicharõ jajasegura tojeskrivi la ñande réra pe lívro de la vídape, ha anítei ojevorra upégui!

20. ¿Mbaʼe traváho ijojahaʼỹvapa ojejapóta umi 1.000 áño de goviérno aja? (Ehecha pe taʼanga oĩva ko rrevísta apére).

²⁰ ¡Ajépa javyʼaitéta umi 1.000 áño de goviérno aja! Upe tiémpope Ñandejára puévlo ojapóta pe traváho tuichavéva oporomboʼe hag̃ua ko yvy ape ári. Péro upe tiémpope avei ojehusgáta umi ihústova ha umi iñinhústova kondúkta (Is. 26:9; Hech. 17:31). ¿Mbaʼéichapa ojejapóta pe traváho oñemboʼe hag̃ua la héntepe? Pe artíkulo oúva ñanepytyvõta ñantende hag̃ua ha javalora hag̃ua ko mbaʼe porãite.