1. ¿Mbaʼéichapa Jehová ojevale vaʼekue apóstol Pédrore omano mboyve?

 APÓSTOL Pedro oservi vaʼekue fiélmente Jehovápe heta tiémpore. Haʼe ningo omoirũ vaʼekue Jesúspe pe predikasiónpe, oñepyrũ opredika umi ndahaʼéivape judío ha tiémpo rire oservi pe kuérpo governántepe. Péro Pedro oikuaárõ guare omanotamaha, Jehová omeʼẽve chupe hembiaporã. Áño 62 al 64 rupi, Ñandejára ojevale hese oskrivi hag̃ua umi mokõi kárta hérava Primera ha Segunda de Pedro. Apóstol Pedro oipotaiterei vaʼekue umi kárta oipytyvõ umi kristiánope haʼe omano rire (2 Ped. 1:12-15).

2. ¿Mbaʼérepa jaʼekuaa Pedro oskrivi hague umi kárta itiempoitépe?

² ¿Mbaʼépa oiko raʼe Pedro oskrivírõ guare umi kárta? Upe tiémpope umi ermanokuéra ‘oñembyasy ohaságui heta mbaʼe ijetuʼúva’ (1 Ped. 1:6). Umi kuimbaʼe iñañáva oñehaʼã kuri omoinge kongregasiónpe umi enseñánsa japu ha tekokyʼa (2 Ped. 2:1, 2, 14). Umi kristiáno oikóva Jerusalénpe ombohovái potaite kuri álgo ijetuʼúva, pórke hiʼag̃uimbaitéma kuri pe tiémpo “entéro mbaʼe oñemohuʼã hag̃ua”. Umi rrománo ohundítama kuri pe siuda ha pe témplo (1 Ped. 4:7). Katuete umi kárta Pedro oskrivi vaʼekue oipytyvõ umi kristiánope oaguanta hag̃ua umi mbaʼe ohasáva ha oprepara chupekuéra amo gotyove g̃uarã. b

3. ¿Mbaʼérepa ñandéve ideprovéchota jastudia umi kárta Pedro oskrivi vaʼekue?

³ Pedro oskrivíramo jepe umi kárta umi kristiáno oikóvape  g̃uarã síglo primérope, Jehová omoĩka umíva la Bíbliape. Upéicha rupi koʼã kárta ideprovécho avei ñandéve koʼág̃arupi (Rom. 15:4). Ñande avei jaiko peteĩ múndo oĩháme heta hekokyʼáva ha upévare ijetuʼu jepi jaservi porã hag̃ua Jehovápe. Upéva ári, koʼẽrõitéma ñambohováita pe jehasa asy guasu tuichavétava umi kristiáno ypykue ohasa vaʼekuégui. Umi mokõi kárta Pedro oskrivi vaʼekue ñanemomanduʼa unas kuánta kósa iñimportántevare. Koʼã mbaʼe ñanepytyvõta jasegi hag̃ua ñahaʼarõ Jehová ára, ñandepyʼaguasu hag̃ua oimérõ jakyhyje la héntegui ha jajoayhu hag̃ua ñande pyʼaite guive. Avei koʼã mbaʼe ideprovéchota ansianokuérape okuida porãve hag̃ua Jehová ovechakuérare.

4. Heʼiháicha 2 Pedro 3:3, 4, ¿mbaʼépa ikatu omokangy ñande jerovia?

⁴ Umi hénte oikóva ñande jerére ndojeroviái umi profesía oĩvare la Bíbliape. Umi oñemoĩva testígo de Jehováre oñembohory ñanderehe pórke heta tiémporema jaʼe outaha pe fin. Oĩ voi umi heʼíva núnka nog̃uahẽmoʼãiha upe día (elee 2 Pedro 3:3, 4). Ñahendúramo koʼã mbaʼe heʼiha umi ñane vesíno, ñane kompañéro de traváho térã ñane hentekuéra, ikatu jaju ñandejerovia kangy. Péicha jave tuicha ñanepytyvõta la Pedro heʼi vaʼekue.

5. ¿Mbaʼépa ñanepytyvõta ñanepasiénsia hag̃ua ou peve pe fin? (2 Pedro 3:8, 9).

⁵ Heta persóna ikatu opensa Jehová otardaitereiha ohundi hag̃ua ko múndo aña. Péro umi mbaʼe Pedro heʼi vaʼekue ikatu ñanepytyvõ, pórke ñanemomanduʼa Jehová ndohechaiha pe tiémpo ñande jahechaháicha (elee 2 Pedro 3:8, 9). Jehovápe g̃uarã 1.000 áño haʼete un díante. Haʼe ningo ipasiénsia ha ndoipotái avave oñehundi. Péro og̃uahẽ vove pe día haʼe omoĩ vaʼekue ohundi hag̃ua ko múndo aña, katuete ojapóta upéva. Javyʼaite ikatu haguére jaaprovecha porã pe tiémpo hembýva japredika hag̃ua umi hénte oĩvape ko múndo tuichakuére.

6. ¿Mbaʼépa jajapokuaa ‘ñanemanduʼa meme hag̃ua Jehová árare’? (2 Pedro 3:11, 12).

⁶ Apóstol Pedro ñanemokyreʼỹ ‘ñanemanduʼa meme hag̃ua Jehová árare’ (elee 2 Pedro 3:11, 12). ¿Mbaʼéichapa jajapokuaa upéva? Ikatúma guive iporãta jajepyʼamongeta káda día umi vendisión jadisfrutátavare pe múndo pyahúpe. Ñañeimahinamína ñaimemaha upépe: Ñandepejuha pe yvytu piroʼy asy, jaʼuha umi tembiʼu porã porã, jarresiviha ñane hénte ha ñane amígo oikove jeývape ha ñamboʼeha umi hénte yma guarépe mbaʼéichapa oñekumpli umi profesía oĩva la Bíbliape. Péicha jajepyʼamongetáramo, ñanepytyvõta jasegi hag̃ua ñahaʼarõ Jehová ára ha ñaime hag̃ua segúro koʼẽrõitéma og̃uahẽtaha pe fin. Ñande ‘jaikuaáma de antemáno’ mbaʼépa oikóta amo gotyove, upévare umi mboʼehára japu ndaikatúi ‘ñandegueraha tape vaíre’ (2 Ped. 3:17).

7. ¿Mbaʼépa ikatu oiko jakyhyjéramo ñande rapichágui?

⁷ Jaikuaa rupi Jehová ára hiʼag̃uietereimaha jajapose ikatúva guive japredika hag̃ua ñande rapichápe. Péro sapyʼánte ikatu jaduda jajapo hag̃ua. ¿Mbaʼérepa? Pórke jakyhyje la hénte ikatúvagui heʼi térã ojapo ñanderehe. Upéva oiko vaʼekue Pédrore. Pe pyhare Jesús ojehusgárõ guare, Pedro okyhyje vaʼekue heʼi hag̃ua haʼeha Jesús disípulo ha onega jey jey oikuaaha chupe (Mat. 26:69-75). Péro tiémpo rire apóstol Pedro ipyʼaguasu ha ndokyhyjevéi. Upéicha rupi ikatu vaʼekue heʼi: “Ani pekyhyje umi mbaʼe omongyhyjévagui umi héntepe ni pejepyʼapyeterei” (1 Ped. 3:14). La Pedro heʼi vaʼekue oasegura ñandéve ikatuha ñandepyʼaguasu ha ndajakyhyjevéi la héntegui.

8. ¿Mbaʼépa ñanepytyvõta anivéma hag̃ua jakyhyje ñande rapichágui? (1 Pedro 3:15).

 ⁸ ¿Mbaʼépa ikatu ñanepytyvõ anivéma hag̃ua jakyhyje ñande rapichágui? Pedro heʼi vaʼekue: “Pembotuicha vaʼerã Crístope pende pyʼapýpe pende Ruvicháramo” (elee 1 Pedro 3:15). Péva heʼise jajepyʼamongeta vaʼerãha Jesucristo haʼeha ñane Governánte ha ipoderosoitereiha. Upévare, jakyhyje jave ñanemanduʼa vaʼerã mávapa ñande Rréi. Oñepresenta jave peteĩ oportunida japredika hag̃ua, ñañeimahina vaʼerã Jesúspe yvágape itrónope ha ijerére oĩha umi millones de ánhel. Ñanemanduʼáke haʼe orekoha ipoguýpe “entéro mbaʼe oĩva yvágape ha ko yvy ape ári” ha ‘oĩtaha ñanendive káda día, og̃uahẽ meve pe fin’ (Mat. 28:18-20). Pedro heʼi voi ñandéve ‘siémpre ñaime vaʼerãha preparádo ñadefende’ hag̃ua ñande jerovia. Ñapensamína, ¿japredikasépa ñande travahohápe, eskuéla, koléhiope térã oimehápe? Upéicharõ tekotevẽ ántema voi ñapensa mbaʼe moméntopepa opyta porãta upéva ha jakalkuláma mbaʼépa jaʼéta. Jajerure Jehovápe tañanembopyʼaguasu ha jajerovia haʼe ñanepytyvõtaha anivéma hag̃ua jakyhyje (Hech. 4:29).

9. ¿Mbaʼéichapa peteĩ jey Pedro ndohechaukái vaʼekue oporohayhuha? (Ehecha pe taʼanga).

⁹ Pedro oaprende vaʼekue mbaʼéichapa ikatu ohechauka oporohayhuha. Haʼe ohendu vaʼekue Jesúspe heʼírõ guare: “Ameʼẽ peẽme peteĩ  mandamiénto pyahu: pejoayhu vaʼerã. Che pohayhu haguéicha, peẽ pejoayhu vaʼerã avei” (Juan 13:34). Upéicharõ jepe, tiémpo rire Pedro ndokaruséi vaʼekue iñermanokuéra ndahaʼéivandi judío pórke okyhyje umi kristiáno judíogui. Upérõ apóstol Pablo heʼi vaʼekue Pédrope ‘hovamokõiha’ (Gál. 2:11-14). Pedro oasepta ojekorrehírõ guare chupe. Ha umi mokõi kárta oskrivi vaʼekuépe heʼi ndahaʼéi jaʼénte vaʼerãha japorohayhuha síno jahechauka vaʼerãha.

10. ¿Mbaʼépa ñanepytyvõta ‘jajoayhu hag̃ua oñoermánoicha tovamokõiʼỹre’? (1 Pedro 1:22).

¹⁰ Pedro heʼi vaʼekue ‘jajoayhu vaʼerãha oñoermánoicha tovamokõiʼỹre’ kongregasiónpe (elee 1 Pedro 1:22). ¿Mbaʼépa ñanepytyvõta upearã? Japorohayhu hag̃ua péicha ‘ñaneñeʼẽrendu vaʼerã pe añeteguápe’. Por ehémplo pe añetegua rupive ñande ñaaprende “Ñandejára otrataha enterovépe peteĩchante” (Hech. 10:34, 35). Ha oimérõ jahayhu algúnopente kongregasiónpe, jahechauka nañaneñeʼẽrenduiha Jesús heʼi vaʼekuépe. Jaikuaa ningo ikatuha jajepokuaave algúnore kongregasiónpe, Jesús voi ojepokuaave haguéicha algúno idisípulore (Juan 13:23; 20:2). Péro Pedro ñanemomanduʼa ñañehaʼã vaʼerãha jahayhu enterove ñane ermáno ha ermánape haʼerõguáicha ñane hénte teete (1 Ped. 2:17).

11. ¿Mbaʼéichapa jahechaukáta jahayhuetereiha enterovépe ñande pyʼaite guive?

¹¹ Pedro heʼi vaʼekue: “Pejoayhuetereíkena pende pyʼaite guive”. Koʼápe pe palávra “pejoayhuetereíkena” heʼise jahayhuha peteĩ persónape ijetuʼúramo jepe ñandéve jahayhu chupe. Por ehémplo, ¿mbaʼépa oikóta peteĩ ermáno heʼi térã ojapóramo álgo ñaneofende térã ñanelastimáva? Provávlemente ensegída voi jajaposéta hese la mísma kósa, jahechauka rangue jahayhuha chupe. Péro Jesús ohechauka vaʼekue Pédrope Jehovápe ndogustaiha jajedeskita ñande rapicháre (Juan 18:10, 11). Upévare Pedro oskrivi vaʼekue: “Ani pejapo ivaíva ótrore peñevenga hag̃ua, ni peñeʼẽ vai ótrore peñevenga hag̃ua. Upéva rangue, pejapo vaʼerã iporãva hesehápe” (1 Ped. 3:9). Jahayhuetereíramo ñane ermanokuérape jatrata porãta enterovépe ha ñanembaʼerechakuaáta hendivekuéra, oĩramo jepe ñanelastima vaʼekue.

12. a) ¿Mbaʼépa jajapóta japorohayhúramo ñande pyʼaite guive? b) Jahechaháicha pe vidéo héravape Jaikókena pyʼaguapýpe ermanokuérandi, ¿mbaʼépa ñañehaʼã vaʼerã jajapo?

¹² Pe primera kárta Pedro oskrivi vaʼekuépe heʼi avei: “Pejoayhu vaʼerã pende pyʼaite guive”. Péicha japorohayhúrõ nañaperdonamoʼãi unas kuánta vésente, síno ‘siémpre ñaĩta ñaperdona hag̃uáicha ñande rapichápe’ (1 Ped. 4:8). Oiméne Pedro imanduʼa raʼe Jesús omboʼe hague chupe oporoperdona vaʼerãha. Upérõ guare oiméne Pedro oimoʼã ivuenoitereimaha operdonáta haguére hapichápe “siete vése”. Péro Jesús omboʼe chupe oporoperdona vaʼerãha “77 vése voi”, heʼiséva siémpre oĩ vaʼerãha operdona hag̃uáicha ótrope (Mat. 18:21, 22). Ko konsého ñandéve g̃uarã avei, péro oimérõ ijetuʼu jepi ñandéve jajapo hag̃ua upéva, aníkena ñañentrega. Enterove Jehová siérvo iñimperfékto ha upévare sapyʼánte ijetuʼúnte voi ñaperdona hag̃ua ótrope. La iñimportánteva hína jajapo ikatúva guive ñaperdona hag̃ua ñane ermanokuérape ha jaiko porã jey hendivekuéra. c

13. ¿Mbaʼérepa ikatu ijetuʼu umi ansiánope oñangareko porã hag̃ua Jehová ovechakuérare?

¹³ Orresusita rire, Jesús heʼi vaʼekue Pédrope: “Eñangareko che ovecha mimíre peteĩ pastór ojapoháicha”. Oiméne Pedro núnka ndahesaráiri vaʼekue upévagui (Juan 21:16).  Oiméramo nde peteĩ ansiáno eikuaáma ko konsého haʼeha avei ndéve g̃uarã. Péro ikatu hína ijetuʼu umi ansiánope oñemotiémpo hag̃ua ikatu hag̃uáicha okumpli porã ko rresponsavilida iñimportánteva. Primeroite voi umi ansiáno omantene vaʼerã ifamíliape, ohechauka vaʼerã ohayhuha chupekuéra ha oipytyvõ vaʼerã ifamíliape oñemoag̃ui hag̃ua Jehováre. Avei umi ansiáno omotenonde vaʼerã pe predikasión, oprepara ha okumpli vaʼerã umi asignasión orekóva umi rreunión ha asambleahápe. Oĩ avei umi ansiáno ombaʼapóva pe Comité de Enlace con los Hospitálespe térã pe Departamento Local de Diseño y Construcciónpe. Jahechaháicha umi ansiáno hetaiterei hembiapo.

14. ¿Mbaʼépa oipytyvõta umi ansiánope oñangareko hag̃ua Jehová ovechakuérare? (1 Pedro 5:1-4).

¹⁴ Pedro heʼi vaʼekue umi ansiánope: “Ojapoháicha peteĩ pastór, peñangarekóke Ñandejára ovechakuérare” (elee 1 Pedro 5:1-4). Oiméramo nde peteĩ ansiáno, katuete rehayhu umi ermanokuérape ha ekuidase hesekuéra ojapoháicha peteĩ pastór. Péro oiméne sapyʼánte heta nerembiapo térã nekaneʼõ ha repensa ndaikatumoʼãiha rekumpli porã ne asignasión. ¿Mbaʼépa ikatu rejapo? Emombeʼupaitékena Jehovápe umi mbaʼe ndepyʼapýva. Pedro oskrivi vaʼekue: “Oĩramo oservíva ótrope, tojerovia pe fuérsa Ñandejára omeʼẽvare” (1 Ped. 4:11). Umi ermanokuéra ikatu ombohovái umi provléma noñesolusionamoʼãiva jaiko aja ko múndo añáme. Péro nemanduʼákena “pe pastór prinsipál” Jesucristo ikatuha oipytyvõ porãve chupekuéra oimeraẽ ótrogui. Ha ikatu ojapo upéva koʼág̃ama voi ha avei pe múndo pyahúpe. La Jehová oipotáva ningo umi ansiáno ohayhu umi ermánope, oñangareko hesekuéra ha ‘omoĩ ehémplo pe ovecha atýpe g̃uarã’.

15. ¿Mbaʼéichapa peteĩ ansiáno oñangareko Jehová ovechakuérare? (Ehecha pe taʼanga).

¹⁵ Peteĩ ermáno hérava William oservíma heta tiémpore de ansiáno. Haʼe ohechakuaa iñimportanteha oñeñangareko porã Jehová ovechakuérare. Oñepyrũrõ guare pe pandémia de COVID-19, haʼe ha umi ótro ansiáno oñehaʼã oñekomunika káda ermáno oĩvandi igrúpo de predikasiónpe káda semána. Haʼe omombeʼu: “Heta ermáno oĩ vaʼekue haʼeño hógape, upévare pyaʼe ikatu oñepyrũ ndohechavéi mbaʼeve iporãva, síno ivaíva memete”. Peteĩ ermáno iprovléma jave, William ojapysaka  porã hese oikuaa hag̃ua mbaʼépa la oipyʼapýva chupe ha mbaʼépa oikotevẽ. Upéi oheka umi puvlikasión térã vidéo oĩva ñande sítio de Internétpe ikatútava oipuru oipytyvõ hag̃ua pe ermánope. Haʼe heʼi: “Koʼág̃arupi mas ke núnka tekotevẽ oñeñangareko porã umi ermanokuérare. Ñande ñañehaʼãmbaite ñaipytyvõ la héntepe oikuaa hag̃ua Jehovápe, ha péicha avei ore ansianokuéra roñehaʼã vaʼerã roñangareko porã Jehová ovechakuérare osegi hag̃ua oservi chupe”.

16. ¿Mbaʼéichapa ikatu jajapo la ñaaprende vaʼekue Pedro kartakuéragui?

¹⁶ Jahecháma mbykymi unos kuánto mbaʼe ñanemboʼéva umi mokõi kárta Pedro oskrivi vaʼekue. Oiméne jahechakuaa oĩha umi mbaʼe tekotevẽhápe ñamehorave. Por ehémplo, ikatu oime ofalta ñandéve jajepyʼamongeta pyʼỹive umi mbaʼe porã jahupytýtavare pe múndo pyahúpe. Avei ikatu ñañepyrũse japredika ñande travahohápe, eskuéla, koléhiope térã oimehápe. Térã ikatu oime ñañehaʼãve vaʼerã jahechauka hag̃ua jahayhuha ñane ermanokuérape ñande pyʼaite guive. Peẽ ansianokuéra, ¿pejedesidípa peñangarekotaha Jehová ovechakuérare kyreʼỹme ha mborayhúpe? Jajepyʼamongeta ha ñanesinsérokena jahechakuaa hag̃ua mbaʼépepa tekotevẽ ñamehora. Oimérõ ijetuʼu ñandéve álgo, aníkena ñañentrega. “Ñande Ruvicha imbaʼeporã” ha haʼe ñanepytyvõta ñamehora hag̃ua (1 Ped. 2:3). Pedro oasegura ñandéve: ‘Ñandejára omohuʼãta pene entrenamiénto. Haʼe penemombaretéta ha penepytyvõta pesegi hag̃ua pendefiél ha pejepytaso mbarete hag̃ua’ (1 Ped. 5:10).

17. ¿Mbaʼépa jahupytýta nañañentregáirõ ha jahejáramo Jehová ñanentrena?

¹⁷ Ñepyrũrã Pedro opensa vaʼekue nomereseiha ni oĩ Jesús ypýpe (Luc. 5:8). Péro Jehová ha Jesús mborayhúpe oipytyvõ rupi chupe, Pedro osegi vaʼekue omoirũ Crístope. Upévare Jehová oheja vaʼekue Pédrope oike “ñande Ruvicha ha Salvadór Jesucristo Rréino etérnope” (2 Ped. 1:11). ¡Ajépa tuichaite rregálo oñemeʼẽ chupe! Ñande avei nañañentregáirõ ha jahejáramo Jehová ñanentrena, haʼe omeʼẽta ñandéve pe vída etérna. Péicha ‘vyʼápe jarresivíta pe salvasión jajerovia rupi’ (1 Ped. 1:9).