1, 2. ¿Mbaʼérepa ideprovéchota ñandéve jastudiáramo Sansón ehémplo?

 OÑEÑEʼẼ jave Sansón rehe, ¿mbaʼépa ou ñandéve ñane akãme? Oiméne ñapensa peteĩ kuimbaʼe imbaretetereívare, ha añetehápe upéicha vaʼekue. Péro Sansón odesidi vai vaʼekue ha upéva káusare heta osufri. Upéicharõ jepe Jehová ojesareko entéro umi mbaʼe Sansón ojapo vaʼekuére oservi hag̃ua chupe. Upévare Ñandejára omoĩka iñehémplo la Bíbliape.

² Jehová ojevale vaʼekue Sansón rehe osalva hag̃ua ipuévlo Israélpe. Heta tiémpo Sansón omano rire, Jehová ogia vaʼekue apóstol Páblope oskrivi hag̃ua Sansón réra umi kuimbaʼe ijerovia mbaretéva réra apytépe (Heb. 11:32-34). Sansón ehémplo ikatu ñanemokyreʼỹ. Haʼe ningo ojerovia vaʼekue Jehováre ombohováirõ guare umi situasión ijetuʼúva. Ko artíkulope jahecháta mbaʼépa ikatu ñaaprende Sansón ehémplogui ha mbaʼéichapa upéva ikatu ñanemombarete.

3. ¿Mbaʼe asignasiónpa Jehová omeʼẽ vaʼekue Sansónpe?

³ Sansón onasérõ guare, umi filisteo ogoverna vaʼekue Israélpe ha ojopyeterei hendivekuéra (Juec. 13:1). Umi israelita ohasa asy vaʼekue umi filisteo iñañaiterei rupi. Upévare Jehová oiporavo Sansónpe ‘osalva hag̃ua Israélpe umi filistéogui’ (Juec. 13:5). Upe asignasión ijetuʼueterei kuri, upévare Sansón ojeroviámante vaʼerã Jehováre.

4. ¿Mbaʼéichapa Jehová oipytyvõ vaʼekue Sansónpe ojesalva hag̃ua iñenemigokuéragui? (Jueces 15:14-16).

 ⁴ Sansón ningo ojerovia vaʼekue Jehová oipytyvõtaha chupe. Peteĩ vuéltape, umi soldádo filisteo ou ojagarra hag̃ua Sansónpe peteĩ lugár héravape Lehí, provávlemente oĩva Judápe. Umi kuimbaʼe upepegua okyhyjeterei kuri, upévare odesidi ontrega hikuái Sansónpe iñenemigokuérape. Umi hénte Sansón paisgua voi “oñapytĩ chupe mokõi pióla pyahúpe” ha ogueraha ontrega umi filistéope (Juec. 15:9-13). Péro “Jehová espíritu omombarete Sansónpe” ha haʼe omondoho umi pióla ojepurúva oñeñapytĩ hag̃ua chupe. “Upéi ojuhu peteĩ vúrro omano ramoitéva rañykãngue”, ojagarra ha ojuka upévape 1.000 filistéope (elee Jueces 15:14-16).

5. ¿Mbaʼéichapa Sansón ohechauka vaʼekue ojeroviaha Jehováre oñorairõrõ guare?

⁵ ¿Mbaʼérepa Sansón oipuru vaʼekue peteĩ vúrro rañykãngue? Ñapensa porãramo, upéva ndahaʼéi vaʼekue álgo ojepuru vaʼekue oñeñorairõ hag̃ua. Péro Sansón ndodudái Jehová oipytyvõta hague chupe. Haʼe oikuaa porã ogana hag̃ua umi filistéope nodependeiha la oipurúvare oñedefende hag̃ua. Upéicha rupi oipuru la orekóva upérupi okumpli hag̃ua Jehová volunta. Jahechaháicha, Sansón ogana vaʼekue iñenemigokuérape ojerovia rupi Jehováre.

6. ¿Mbaʼépa ñanemboʼe pe rreláto oñeʼẽva Sansónre?

⁶ Jehová avei ikatu ñanemombarete ñakumpli hag̃ua umi asignasión omeʼẽva ñandéve. Sapyʼánte ñandéve g̃uarã haʼetévaicha voi ndaikatumoʼãiva ñakumpli, péro Ñandejára ikatu hína ñanepytyvõ ñaimoʼãʼỹháicha. Jehová omombarete haguéicha Sansónpe katuete avei ñanepytyvõta ñandéve jajeroviáma guive hese (Prov. 16:3).

7. ¿Mbaʼe ehémplopa ohechauka iñimportanteha jaheka Jehová gía?

⁷ Heta ermáno ha ermána ombaʼapóva umi projékto de konstruksiónpe ohechauka ojeroviaha Jehováre. Yma umi ermáno  ojepokuaámi ojapo umi pláno ha omopuʼã umi Salón del Reino ha umi ótro lugár oipurúva Jehová organisasión. Upéi pyaʼeterei okakuaa rupi Jehová puévlo tekotevẽ kuri ojejapo kámbio. Upévare umi ermáno odirihíva koʼã traváho oñemboʼe Jehovápe ojerure hag̃ua chupe gía ha odesidi ombaʼapotaha de ótra fórma. Por ehémplo ojogua umi konstruksión oĩmbámava voi ha ombopyahu ojepuru hag̃ua. Peteĩ ermáno hérava Robert heta áñorema ombaʼapo umi projékto de konstruksiónpe ko múndo tuichakuére. Haʼe heʼi: “Iñepyrũme hetápe ijetuʼu kuri ojadapta hag̃ua ko kámbiore, pórke idiferentete la rojepokuaa vaʼekuégui rojapo heta áñore. Péro umi ermáno ndojagarravaíri la kámbio ha upe rire ojehecha porãiterei mbaʼéichapa Jehová ovendesi la ojejapóva”. Kóva peteĩ ehémplonte ohechaukáva Jehová ogiaha ipuévlope okumpli hag̃ua ivolunta. Upévare iporãta ñañeporandúramo jepi: “¿Añemboʼépa Jehovápe chegia hag̃ua ha nacheprovlémaipa ajapo hag̃ua umi kámbio tekotevẽva aservi porãve hag̃ua chupe?”.

8. Sansón ijuheietereírõ guare, ¿mbaʼépa ojapo raʼe?

⁸ Oiméne jaleéma raʼe hetave mbaʼe ñanesorprendéva ojapo vaʼekue Sansón. Por ehémplo una vuéltape haʼeñoite ojuka vaʼekue peteĩ león ha upe rire ojuka 30 filistéope peteĩ siuda héravape Asquelón (Juec. 14:5, 6, 19). Sansón oikuaa porã vaʼekue haʼe núnka ndaikatumoʼãiha ojapo koʼã mbaʼe Jehová noipytyvõirire chupe. Upéva ojekuaa porãiterei vaʼekue peteĩ jey ijuheietereírõ guare ojuka rire 1.000 soldádo filistéope. ¿Mbaʼépa ojapo raʼe upérõ? Opensa rangue ijeheguínte ikatuha okonsegi pe y hoyʼu hag̃ua, ojerure ajúda Jehovápe (Juec. 15:18).

9. ¿Mbaʼéichapa Jehová okontesta Sansónpe ojerurérõ guare chupe ajúda? (Jueces 15:19).

⁹ Sansón ojerure asy ajúda Jehovápe, ha Jehová okontesta chupe. ¿Mbaʼéichapa? Peteĩ milágro rupive onohẽ y peteĩ yvykuágui ha Sansón hoʼu rire pe y “imbarete jey ha oñepyrũ oñeñandu porã” (elee Jueces 15:19). Amalisia ko ykua oĩ vaʼekue gueteri heta áño upe rire, proféta Samuel oskrivírõ guare lívro de Jueces. Umi israelita ohechávo upe ykua oiméne imanduʼa ojeroviáramo Jehováre, haʼe ikatuha oipytyvõ umi isiérvo ifiélvape oikotevẽ jave.

10. ¿Mbaʼépa jajapo vaʼerã Jehová ñanepytyvõ hag̃ua? (Ehecha pe taʼanga).

¹⁰ Ñande avei jajerovia vaʼerã Jehováre ha jajerure chupe ajúda, oimérõ jepe ñandevale térã jajapóma heta mbaʼe Jehová servísiope. Tekotevẽ ñaneumílde ha ñarrekonose ikatuha jajapo la Jehová ojeruréva ñandéve jajeroviárõ añoite hese. Sansón hoʼu vaʼekue pe y Jehová omeʼẽva chupe ha imbarete jey. Péicha avei ñande tekotevẽ jaasepta entéro mbaʼe Jehová omeʼẽva ñandéve ñamombarete hag̃ua ñande jerovia ha jasegi hag̃ua ñandefiél chupe (Mat. 11:28).

11. ¿Mbaʼéichapa ikatu jaaprovecha pe ajúda Jehová omeʼẽva? Emoĩ peteĩ ehémplo.

¹¹ Jahechami Aleksey ehémplo, haʼe hína peteĩva umi ñane ermáno ojepersegi mbaretéva Rúsiape. ¿Mbaʼépa oipytyvõ chupe osegi hag̃ua oaguanta? Haʼe ha hembireko osegi ostudia la Biblia ha oadora Jehovápe. Pe ermáno heʼi: “Añehaʼãmbaite ajapo che estúdio personál ha alee la Biblia káda día. Káda pyhareve che ha che rembireko rolee pe téxto diário ha roñemboʼe Jehovápe”. ¿Mbaʼépa ñanemboʼe ko ermáno ehémplo? Jajerovia rangue  ñandejehénte jagueropuʼaka hag̃ua umi situasión ijetuʼúva, tekotevẽ ñakonfia Jehováre. ¿Mbaʼéichapa ikatu jajapo upéva? Jajapo vaʼerã umi mbaʼe omombaretétava ñande jerovia, por ehémplo jastudia la Biblia, ñañemboʼe, jaha rreunionhápe ha japredika. Jajapóramo koʼã mbaʼe Jehová ñanepytyvõta jasegi hag̃ua jaservi chupe. Ha omombarete haguéicha Sansónpe, ñandéve avei katuete ñanemombaretéta.

12. ¿Mbaʼépepa odesidi vai rakaʼe Sansón, ha mbaʼérepa ko káso idiferénte vaʼekue?

¹² Sansón ningo ñandéichante avei iñimperfékto vaʼekue, upévare haʼe sapyʼánte odesidi vai kuri. Peteĩ jey la odesidi vaʼekue káusare oiko heta mbaʼe vai. Sansón oservi rire peteĩ tiémpore de hués Israélpe, upéi ou “iñakãvaiete peteĩ kuñataĩre, oikóva Sorec Ñúme, upe kuñataĩ ningo héra vaʼekue Dalila” (Juec. 16:4). Anteve Sansón oñekompromete kuri peteĩ kuñataĩ filistéandi, péro Jehová voi odirihi kuri Sansónpe ojapo hag̃ua upéva ikatu hag̃uáicha oreko “peteĩ oportunida oñorairõ hag̃ua umi filistéondi”. Tiémpo rire, Sansón opyta peteĩ prostitúta rógape pe siuda filistea héravape Gaza. Upérõ guare Ñandejára omombarete Sansónpe oipeʼa ha ogueraha hag̃ua pe siuda rokẽ, upévare ikatu kuri ojehu oimeraẽ mbaʼe pe siudápe (Juec. 14:1-4; 16:1-3). Péro Dalila káso idiferénte vaʼekue, pórke haʼe provávlemente israelita vaʼekue ha hendive Sansón ndorekomoʼãi kuri peteĩ oportunida oñorairõ hag̃ua umi filisteo kóntrape.

13. ¿Mbaʼépa ojapo Dalila Sansón rehe?

¹³ Dalílape ojeofrese kuri heta pláta otraisiona hag̃ua Sansónpe, ha haʼe oasepta upéva. Ikatu oime Sansón ohayhueterei raʼe Dalílape,  upévare ndopillái mbaʼépa la ojapose vaʼekue. Tahaʼe haʼeháicha Dalila kontinuadoite oporandu Sansónpe mbaʼérepa imbaretete, ha ipahápe Sansón omombeʼu chupe. Ñambyasýramo jepe, Sansón odesidi vai rupi ou ikangy ha opyta vai Jehová renondépe peteĩ tiémpore (Juec. 16:16-20).

14. ¿Mbaʼépa ojehu Sansónpe ojerovia haguére Dalílare?   

¹⁴ Sansón ojeroviave vaʼekue Dalílare, ojerovia rangue Jehováre ha upévare heta ohasa asy. Umi filisteo ojagarra Sansónpe ha ohesaʼo chupe. Upéi oreko chupe préso Gázape, anteve haʼe oipeʼa vaʼekue upe siuda rokẽ, péro ko vuéltape omoĩ hikuái Sansónpe omolina hag̃ua semílla kárselpe. Upe rire umi filisteo oñembyaty ojapo hag̃ua heta sakrifísio idioskuéra Dagónpe ha ofesteha hag̃ua. Upe fiéstape ogueraha hikuái Sansónpe ‘oñembohory hag̃ua hese’ (Juec. 16:21-25).

15. ¿Mbaʼéichapa Sansón ohechauka ojerovia jey hague Jehováre? (Jueces 16:28-30). (Ehecha pe taʼanga oĩva ko rrevísta apére).

¹⁵ Sansón tuicha ojavýramo jepe, haʼe noñentregái. Haʼe oheka jey vaʼekue la oportunida oñorairõ hag̃ua umi filisteo kóntrape, ha péicha okumpli Jehová volunta (elee Jueces 16:28-30). Sansón oñemboʼe asy vaʼekue Jehovápe ha heʼi chupe: “Epermitimína chéve tañevenga umi filistéore”. Ñandejára okontesta vaʼekue chupe iñemboʼe ha peteĩ milágro rupive omombarete jey Sansónpe. ¿Mbaʼépa oiko upéi? Ko vuéltape Sansón ojuka hetave filistéope anteve guarégui.

16. ¿Mbaʼépa ikatu ñaaprende Sansón ehémplogui?

¹⁶ Sansón heta ohasa asy vaʼekue odesidi vai haguére, péro lomímonte oñehaʼã jey ojapo Jehová volunta. ¿Mbaʼépa ñaaprende chugui? Jajavy sapyʼárõ ha tekotevẽrõ jepe jajekorrehi térã japerde peteĩ priviléhio, aníkena ñañentrega. Ñanemanduʼákena Jehová oĩha ñaneperdona hag̃uáicha (Sal. 103:8-10). Jajavýramo jepe Jehová ikatu omeʼẽ ñandéve pe fuérsa ñaikotevẽva ñakumpli hag̃ua ivolunta, ojapo haguéicha Sansón rehe.

17, 18. ¿Mbaʼérepa nemokyreʼỹ Michael ehémplo? (Ehecha pe taʼanga).

¹⁷ Ñapensamína peteĩ ermáno imitãva ehémplore. Haʼe héra Michael ha iguápo Jehová servísiope, pórke oservi kuri de prekursór rregulár ha siérvo ministeriál. Upéinte ou ojavy ha upévare operdepaite la  priviléhio orekóva kongregasiónpe. Haʼe heʼi: “Heta cherembiapo vaʼekue Jehová servísiope, péro derrepénte añandu ndaikatuiha ajapo mbaʼevete chupe g̃uarã. Che núnka napensáiva Jehová chereja reitaha, péro aduda algún díapa aime porã jeýne hag̃ua hendive anteve guaréicha térãpa aservi jeýne chupe kongregasiónpe ajapo haguéicha yma”.

¹⁸ Michael noñentregái. Haʼe heʼi: “Añehaʼãmbaite añemoag̃uive Jehováre ha upearã pyʼỹi añemboʼe, astudia ha ajepyʼamongeta”. Kon el tiémpo oñemeʼẽ jey ko ermánope umi priviléhio oreko vaʼekue kongregasiónpe. Koʼág̃a haʼe ansiáno ha prekursór rregulár. Haʼe heʼi: “Heta oĩ vaʼekue chemokyreʼỹva ha chepytyvõva, koʼýte umi ansiáno, péicha ahechakuaa Jehová cherayhuha gueteri. Koʼág̃a aservi jeýma chupe konsiénsia potĩ reheve. La ahasa vaʼekue chemboʼe Jehová operdonaha umi oñarrepentívape ipyʼaite guive”. Añetehápe ikatu ñaĩ segúro Jehová osegitaha ojevale ñanderehe ha ñanevendesi jajavýramo jepe. Péro upearã jajapo vaʼerã opa ikatúva ñaime porã jey hag̃ua hendive ha jasegi jajerovia hese (Sal. 86:5; Prov. 28:13).   

19. ¿Mbaʼéichapa nemombarete Sansón ehémplo?

¹⁹ Ko artíkulope jahecha umi mbaʼe ijojahaʼỹva ojapo vaʼekue Sansón. Haʼe iñimperfékto vaʼekue péro oñehaʼãmbaite osegi hag̃ua oservi Jehovápe. Sansón noñentregái ojavýramo jepe omendárõ guare Dalílare. Ha Jehová nopensái vaʼekue hese naipohãveimaha, síno ojevale jey hese ojapo hag̃ua peteĩ mbaʼe tuichaitereíva. Jehovápe g̃uarã Sansón ohechauka vaʼekue ijerovia mbareteha, upévare omoĩka héra umi ijerovia mbaretévandi Hebreos kapítulo 11-pe. Javyʼaite jaservi haguére ñande Ru yvagapegua ñanderayhuetévape. Haʼe omeʼẽse ñandéve pe fuérsa ñaikotevẽva jahasa jave umi situasión ijetuʼúva. Upévare, Sansón ojapo haguéicha jajerurékena Jehovápe: “Nemanduʼamína cherehe ha chemombarete jey” (Juec. 16:28).