1. ¿Mbaʼe situasión ijetuʼúvapa ohasa vaʼekue Jehoás, Uzías ha Josías?

 EÑEIMAHINAMÍNA oikoha ndehegui rréi ha reñepyrũ vaʼerãha regoverna nemitãite guive Ñandejára puévlo. ¿Mbaʼéichapa reipurúta nde autorida? La Biblia oñeʼẽ unos kuánto mitãrusu ogoverna vaʼekuére Judápe. Por ehémplo Jehoásgui oiko vaʼekue rréi orekórõ guare 7 áño, Uzíasgui orekórõ guare 16 ha Josíasgui katu orekórõ guare 8 áño. Oiméne ndaifasilpái rakaʼe upe rresponsavilida chupekuéra g̃uarã. Péro ijetuʼúramo jepe Jehová ha hetave persóna oipytyvõ vaʼekue chupekuéra osẽ porã hag̃ua.

2. ¿Mbaʼérepa iporãta jastudia Jehoás, Uzías ha Josías ehémplo?

² Ñande ningo ndahaʼéi rréi térã rréina, péro ikatu ñaaprende heta mbaʼe ideprovéchova koʼã mbohapy mitãrusúgui. Haʼekuéra odesidi porã vaʼekue péro sapyʼánte ojavy vaʼekue avei. Jastudiávo jahávo iñehemplokuéra jahecháta mbaʼérepa tekotevẽ jaiporavo porã ñane amigorã, jasegi ñaneumílde ha ñañemoag̃ui meme Jehováre.

3. ¿Mbaʼéichapa Jehoiadá oipytyvõ vaʼekue rréi Jehoáspe odesidi porã hag̃ua?

³ Edesidi porã Jehoás ojapo haguéicha. Jehoás imitãrõ guare omano vaʼekue itúa. Upévare pe saserdóte Jehoiadá omongakuaa Jehoáspe ha oipytyvõ chupe oñemoag̃ui hag̃ua Jehováre. Jehoás iñarandu vaʼekue ha ohendu umi konsého omeʼẽva chupe pe saserdóte Jehoiadá. Upéicha rupi odesidi oadorataha Jehovápe ha oipytyvõ avei pe puévlope ojapo hag̃ua upéva. Rréi Jehoás oñenkarga avei oñemyatyrõ hag̃ua Jehová témplo (2 Crón. 24:1, 2, 4, 13, 14).

4. ¿Mbaʼéichapa ou porã ñandéve ñamombaʼéramo Jehová leikuéra? (Proverbios 2:1, 10-12).

 ⁴ Oimérõ nde tuakuéra térã ótra persóna nepytyvõ hína rehayhu hag̃ua Jehovápe ha rejapo hag̃ua haʼe heʼíva, rerresivi hína peteĩ rregálo ndaijojaháiva (elee Proverbios 2:1, 10-12). Tuakuéra ikatu ojapo heta mbaʼe omboʼe hag̃ua ifamíliape. Jahechamína Katya ehémplo. Itúa oipytyvõ vaʼekue chupe odesidi porã hag̃ua. Káda día haʼe orahámi chupe koléhiope ha tapére oñemongeta hendive pe téxto diáriore. Katya heʼi: “Che túa ojapo rupi upéva chepytyvõ aikuaa hag̃ua mbaʼépa ajapo vaʼerã oñepresentárõ algún provléma upe díape”. Katuete ningo nde tuakuéra ojegia hína la Biblia heʼívare omoĩ hag̃ua ndéve umi rrégla resegi vaʼerã, ¿mbaʼéichapa ikatu neñeʼẽrendu chupekuéra reñandúramo jepe ndaikatuiha rejapo umi mbaʼe ndegustáva? Peteĩ ermána hérava Anastasia omombeʼu ituakuéra oñemotiémpo hague oexplika hag̃ua chupe mbaʼérepa oproivi chugui algúna kósa. Anastasia heʼi: “Upéva chepytyvõ antende hag̃ua haʼekuéra nomoĩriha umi rrégla okontrola hag̃ua ajapóva guive, síno cheprotehe hag̃ua cherayhúgui hikuái”.

5. ¿Mbaʼéichapa oñeñandúta nde tuakuéra ha Jehová redesidi porãrõ? (Proverbios 22:6; 23:15, 24, 25).

⁵ Resegíramo umi konsého oúva la Bíbliagui, embovyʼáta nde tuakuérape ha la iñimportantevéva katu, embovyʼáta Ñandejárape ha ne amista hendive imbaretevéta (elee Proverbios 22:6; 23:15, 24, 25). Koʼã mbaʼe ningo iñimportanteterei, upévare iporãta resegíramo umi konsého ojapo haguéicha rréi Jehoás imitãme.

6. ¿Máva konséhopa oñepyrũ ohendu Jehoás, ha mbaʼépa oiko upéi? (2 Crónicas 24:17, 18).

⁶ Eaprende Jehoás desisión vaígui. Pe saserdóte Jehoiadá omano rire, Jehoás oiporavo vai iñamigorã ha oñepyrũ ojapo umi mbaʼe vai (elee 2 Crónicas 24:17, 18). Haʼe odesidi ojegia umi konsého omeʼẽvare chupe umi prínsipe de Judá ndohayhúiva Jehovápe. Haʼe ningo oñemomombyry vaʼerã kuri chuguikuéra pórke ojapo hikuái ivaíva (Prov. 1:10). Péro upéva rangue haʼe osegi koʼã prínsipe konsého. Upéi iprímo Zacarías oñehaʼã okorrehi Jehoáspe, péro haʼe omanda ojejuka hag̃ua chupe (2 Crón. 24:20, 21; Mat. 23:35). ¡Ajépa ivaiete la ojapóva rréi Jehoás! Haʼe oñepyrũ porãite kuri, péro ñambyasýramo jepe upéi oñemoĩ Jehová kóntrape ha oiko chugui peteĩ asesíno. Amo ipahápe isiervokuéra opuʼã hese ha ojuka chupe (2 Crón. 24:22-25). Idiferentete vaʼerãmoʼã ningo Jehoás osegírire iñeʼẽrendu Jehovápe ha umi oadorávape chupe.  ¿Mbaʼépa ikatu reaprende Jehoás odesidi vaʼekuégui?

7. ¿Mbaʼeichagua amígopa reiporavo vaʼerã? (Ehecha pe taʼanga).

⁷ Jehoás ojapo vaʼekue ñanemboʼe tekotevẽha jaiporavo ñane amigorã umi ohayhúva Jehovápe ha ombovyʼaséva chupe. Koʼãichagua amígo ñanepytyvõta jajapo hag̃ua iporãva. Ñane amigokuéra ningo ikatu ijedave térã imitãve ñandehegui. Ñanemanduʼa vaʼerã Jehoás tuichaiterei imitãve hague pe saserdóte Jehoiadágui. Koʼág̃a epensamína ne amigokuérare ha eñeporandu: “¿Chepytyvõpa hikuái ajeroviave hag̃ua Jehováre? ¿Ojapópa hikuái Ñandejára heʼíva ha chemokyreʼỹ ajapo hag̃ua avei upéicha? ¿Oñeʼẽpa hikuái Jehováre ha umi mbaʼe oaprendévare la Bíbliagui? ¿Heʼípa chéve la ahendusévante térãpa chekorrehi hikuái aikotevẽ jave?” (Prov. 27:5, 6, 17). Legálmente oimérõ ne amigokuéra ndohayhúi hína Jehovápe, nde nereikotevẽi umichagua amígore. Péro oimérõ ne amigokuéra ohayhu Jehovápe, eñakarama hatãkena hesekuéra, pórke haʼekuéra siémpre nepytyvõta resẽ porã hag̃ua (Prov. 13:20).

8. ¿Mbaʼépa iporãta jarekóramo enkuénta oimérõ jaipuru umi rred sosiál?

⁸ Umi rred sosiál ningo ikatu ñanepytyvõ ñañekomunika hag̃ua ñane hentekuéra ha ñane amigokuérandi. Péro heta oĩ oipurúva umíva ojechauka hag̃ua, upévare ohupi umi fóto ha vidéo ohechaukahápe mbaʼépa ojogua térã mbaʼépa ojapo raʼe. Oimérõ nde reipuru umi rred sosiál, eñeporandumína: “¿Che piko ajechaukasénte hína? ¿Akompartisépa legálmente álgo iporãva térã asovrasénte? ¿Akopiápa hína umi hénte oipurúvape koʼã rred sosiál ha añepyrũ apensa ha añeʼẽ haʼekuéraicha? ¿Ajapópa umi mbaʼe vai haʼekuéra ojapóva?”. Ermáno Nathan Knorr, oservi vaʼekue pe Kuérpo Governántepe, omeʼẽ ko konsého: “Ani pepyta porãsénte pende rapichakuérandi, pórke napemeʼẽmoʼãi gústo enterovépe. Peñehaʼã guei pembovyʼa Jehovápe ha pembovyʼáta entéro ohayhúvape avei chupe”.

9. ¿Mbaʼépa ikatu vaʼekue ojapo Uzías Jehová oipytyvõ rupi chupe? (2 Crónicas 26:1-5).

⁹ Edesidi porã Uzías ojapo haguéicha. Rréi Uzías imitãrõ guare iñumílde vaʼekue. Chupe ningo oñehekomboʼe vaʼekue “okyhyje ha orrespeta hag̃ua Ñandejára teépe”. Jehová heta tiémpore ovendesi chupe ha upéi omano orekópe 68 áño (elee 2 Crónicas 26:1-5). Uzías ohundi heta enemígo oñemoĩ vaʼekuépe ipuévlo kóntrape, ha ojapo la tekotevẽva guive Jerusalén isegúro porã hag̃ua (2 Crón. 26:6-15). Oiméne ovyʼaite rakaʼe Uzías la ojapóvare Ñandejára oipytyvõ rupi chupe (Ecl. 3:12, 13).

10. ¿Mbaʼépa oiko upéi Uzías rehe?

¹⁰ Eaprende Uzías desisión vaígui. Rréi Uzías ojepokuaa vaʼekue omanda ótrope la ojapo vaʼerã. Ikatu oime upévare kon el tiémpo ou opensa haʼe ikatuha ojapo la ojaposéva guive. Peteĩ jey oho oike Jehová témplope ha oñemombaʼeguasúgui ohapyse insiénso pe altárpe. Péro upéva noñepermitíri kuri ojapo umi rréipe (2 Crón. 26:16-18). Pe saserdóte Azarías oñehaʼã okorrehi chupe péro Uzías ipochyeterei. Péicha Uzías naiñeʼẽrenduvéi Jehovápe, ha haʼe okastiga hag̃ua chupe onohẽmba hese lépra (2 Crón. 26:19-21). ¡Ajépa idiferentete vaʼerãmoʼã Uzías rekove haʼe osegírire iñumílde!

11. ¿Mbaʼéichapa ikatu jahechauka ñaneumildeha? (Ehecha pe taʼanga).

¹¹ Uzías oúrõ guare ipoderóso, hesarái Jehovánte omeʼẽ hague chupe entéro mbaʼe porã orekóva. ¿Mbaʼépa ñaaprende? Aníkena ñanderesarái entéro vendisión ha priviléhio jarekóva Jehová servísiope ouha chuguínte voi. Jaiko rangue ñañemombaʼeguasu umi mbaʼe  jahupytývare, siémpre jaagradese vaʼerã Jehovápe umi mbaʼe ikatúvare jajapo (1 Cor. 4:7). b Avei ñaneumílde vaʼerã ñarrekonose hag̃ua ñaneimperfektoha ha ñaikotevẽha jajekorrehiʼimi. Peteĩ ermáno orekóva 60 áñorupi heʼi voi: “Aaprendéma ndachepochýi ha nañedesanimái vaʼerãha afalla jave. Sapyʼánte vyrorei ajapo ha oĩ chekorrehíva, péro péicha jave añehaʼã amehora ha asegi aservi Jehovápe iporãveháicha”. Upéicharõ ikatu jaʼe jarrespetáramo Jehovápe ha jasegíramo ñaneumílde javyʼataha katuete (Prov. 22:4).

12. ¿Mbaʼépa ojapo vaʼekue Josías imitãrõ guare? (2 Crónicas 34:1-3).

¹² Edesidi porã Josías ojapo haguéicha. Josías oreko vaʼekue 16 áño oñepyrũrõ guare oservi Jehovápe. Haʼe oikuaa porãseve vaʼekue Jehovápe ha ojapose ivolunta. Péro ndahaʼéi vaʼekue la ifasilpáva entéro mbaʼe ko rréi imitãvape g̃uarã. Upe tiémpope hetaiterei hénte oadora vaʼekue umi dios guaʼúpe. Upévare Josías ojokoséramo chupekuéra ipyʼaguasúmante vaʼerã, ha haʼe ohechauka ndaipyʼajuiha. Omboty mboyve 20 áño, Josías oñepyrũ oipeʼa pe rrelihión fálsa pe puévlogui (elee 2 Crónicas 34:1-3).

13. ¿Mbaʼéichapa okambiáta nde rekove reñemeʼẽramo Jehovápe?

¹³ Nemitãramo jepe, nde ikatúma edesidi esegitaha Josías ehémplo. Upearã eikuaave vaʼerã Jehovápe ha umi kualida porãite orekóva. Upéva nemomýita eñemeʼẽ hag̃ua chupe. ¿Mbaʼéichapa nepytyvõta reñemeʼẽramo Jehovápe? Lucas ojevautisa vaʼekue orekórõ guare 14 áño, ha heʼi: “Koʼág̃a guive amotenondéta che rekovépe Jehová servísio ha añehaʼãta ambovyʼa chupe” (Mar. 12:30). Nde avei ikatu rehupyty heta vendisión rejaposéramo upéva.

14. Emombeʼu mbaʼéichapa umi mitãrusu ha mitãkuña osegi hína rréi Josías ehémplo.

¹⁴ ¿Mbaʼe situasión ijetuʼúvapa ikatu ohasa peteĩ mitãkuña térã mitãrusu oservíva Jehovápe? Johan ojevautisa vaʼekue orekópe 12 áño. Haʼe omombeʼu ikompañerokuéra ojopy hague chupe oipuru hag̃ua pe vapeadór. Ikatu hag̃uáicha oaguanta, Johan imanduʼa meme oipurúramo pe vapeadór ikatuha ou hasy ha  avei ombyaitaha iñamista Jehovándi. Raquel ojevautisa vaʼekue orekórõ guare 14 áño, ha haʼe omombeʼu mbaʼépa oipytyvõ chupe oaguanta hag̃ua umi pruéva oñepresentáva koléhiope. Haʼe heʼi: “Añehaʼã apensa umi mbaʼe chemomanduʼátavare la Biblia ha Jehováre. Por ehémplo, romeʼẽ jave istória chemanduʼa umi rreláto bíblicore térã umi profesíare. Avei añemongeta jave álgien ndive añehaʼã apensa mbaʼe téxtopa ikatu akomparti hendive”. Mitãrusukuéra, umi mbaʼe peẽ pehasáva ningo idiferénte rréi Josías ohasa vaʼekuégui, péro haʼe ojapo haguéicha ikatu penearandu ha pendefiél Jehovápe. Umi mbaʼe ijetuʼúva pehasáva koʼág̃a penemitã aja, pendeprepara hína peaguanta hag̃ua umi situasión ijetuʼúva oútava upe rire.

15. ¿Mbaʼépa oipytyvõ vaʼekue Josíaspe oservi porã hag̃ua Jehovápe? (2 Crónicas 34:14, 18-21).

¹⁵ Rréi Josías orekórõ guare 26 áño omyatyrõka vaʼekue pe témplo. Ha ojejapo aja pe traváho ojetopa “Jehová lívro de la léi, pe oñemeʼẽ vaʼekue Moisés rupive”. Pe rréi ohendúrõ guare mbaʼépa heʼi pe léi, ensegída voi okambia heta mbaʼe ikatu hag̃uáicha ojejapo la heʼíva upe léi (elee 2 Crónicas 34:14, 18-21). Ha nde, ¿releesépa la Biblia káda día? Oimérõ reñehaʼã hína rejapo upéva, ¿ndegustápa nde lektúra? ¿Reanotápa umi versíkulo nepytyvõtava? Lucas, pe ermáno oñemensiona vaʼekue ajeʼi, oanota peteĩ kuadérnope umi mbaʼe iñinteresánteva otopa vaʼekue ilektúrape. Nde avei reñehaʼãramo rejapo upéicha, nemanduʼa porãvéta umi versíkulo de la Bíbliare ha umi mbaʼe reaprendévare chugui. Amedída ke reikuaa ha remombaʼeve la Biblia, reservisevéta avei Jehovápe. Ñandejára Ñeʼẽ omomýi vaʼekue rréi Josíaspe ojapo hag̃ua iporãva, ha katuete ndéve avei nepytyvõta upearã.

16. ¿Mbaʼe ivaívapa ojapo kuri Josías ha mbaʼépa ñaaprende?

¹⁶ Eaprende Josías desisión vaígui. Josías orekórõ guare 39 áñorupi ou kuri ofalla ha upévare omano. Josías ojerovia kuri ijehe,  ha ndojeruréi Jehovápe ogia hag̃ua chupe (2 Crón. 35:20-25). Ape ñaaprende álgo iñimportantetereíva: Oiméramo jepe ñandeedavéma térã hetáma jastudia la Biblia, lomímonte jasegi vaʼerã ñañemoag̃ui Jehováre. Upéva heʼise jasegi vaʼerãha ñañemboʼe ha jajerure chupe tañandegia, jastudia Iñeʼẽ ha ñahendu umi konsého porã omeʼẽva ñandéve umi kristiáno ijerovia mbaretéva. Upéva ñanepytyvõta ani hag̃ua tuicha jajavy ha javyʼa hag̃ua (Sant. 1:25).

17. ¿Mbaʼépa ñaaprende ñaanalisa rire umi mbohapy rréi de Judá istória?

¹⁷ Oĩ ningo hetaiterei mbaʼe iporãva ikatúva rejapo nemitã aja. Pe ehémplo ohejáva Jehoás, Uzías ha Josías ohechauka umi imitãva ikatuha odesidi porã ha ombovyʼa Jehovápe. Siérto ningo, koʼã mbohapy mitãrusu ojavy vaʼekue ha opa vai. Péro nde reñehaʼãramo rejapo umi mbaʼe porã haʼekuéra ojapóva ha eaprende la ifallakuéragui, ikatúta resẽ porã ha revyʼa.

18. ¿Máva máva ehémplopa ohechauka ikatuha resẽ porã ha revyʼa? (Ehecha pe taʼanga).

¹⁸ La Biblia oñeʼẽ avei ótro mitãrusukuérare. Haʼekuéra oñemoag̃ui vaʼekue Jehováre, ombovyʼa chupe ha osẽ porã vaʼekue hikuái. Umíva apytépe oĩ hína David. Haʼe imitãite guive odesidi vaʼekue oadorataha Ñandejárape, ha kon el tiémpo oiko chugui peteĩ rréi iñeʼẽrendúva Jehovápe. Siérto, David ojavy vaʼekue avei, péro Jehová heʼi hese ifiél hague chupe (1 Rey. 3:6; 9:4, 5; 14:8). Restudiáramo David ehémplo nekyreʼỹvéta reservi hag̃ua Jehovápe fiélmente. Ikatu avei reaprende heta mbaʼe restudiávo Marcos térã Timoteo ehémplo. Haʼekuéra odesidi vaʼekue iñeʼẽrendutaha Jehovápe imitãite guive, ha osegi oservi chupe fiélmente. Upéva ombovyʼaiterei vaʼekue chupekuéra ha Jehovápe avei.

19. ¿Mbaʼéichapa ikatu resẽ porã?

¹⁹ Umi mbaʼe rejapóva koʼág̃a ikatu ndeperhudika térã nepytyvõ amo gotyove. Ndereikóiramo rejerovia ndejehe síno Jehováre, ikatúta nearandu ha redesidi porã (Prov. 20:24). Nde ningo ikatu revyʼa ha rehupyty heta mbaʼe porã. Ani nderesarái Jehová ovaloraitereiha la rejapóva chupe g̃uarã. Núnka nerembyasymoʼãi redesidíramo reservi ñande Ru yvagapeguápe, pórke ndaipóri mbaʼeve iporãvéva upévagui.