Koʼápe noñeñeʼẽi nde réra térã ne píntarente, síno heʼise mbaʼeichagua kostúmbrepa ereko, mbaʼépa reguerovia, ha mbaʼéichapa nde lája.

Reikuaa porãramo mbaʼeichagua persónapa nde ndereikomoʼãi ejapo entéro mbaʼe heʼívante ndéve umi ótro mitãrusu ha mitãkuña. Upéva rangue reiméta segúro la regueroviávare ha rejegiáta umíare.

“Oĩ heta hénte ndodesidikuaáiva haʼeño ni mbaʼe aópa omondéta” (Adrian).

“Aaprendéma adefende vaʼerãha la oĩ porãva ijetuʼúramo jepe. Aikuaa máva mávapa che amígo tee pórke añeñandu porã hendivekuéra orrespeta rupi hikuái umi mbaʼe chéve g̃uarã iñimportánteva” (Katy).

¿MBAʼÉPA HEʼI LA BIBLIA? “Anive pejoguase umi hénte oĩvape ko múndope, síno pekambia pepensa lája, péicha peẽ voi pekambiaitéta” (Romanos 12:2).

Epensa mbaʼeichagua persónapa nde koʼág̃a ha mbaʼeichagua persónapa reipota oiko ndehegui. Upearã ehecha umi mbaʼe porã erekóva, mbaʼépa ofalta remehorave ha mbaʼépa reguerovia. Ikatu rejepyʼamongeta koʼã mbaʼére:

Umi mbaʼe porã erekóva. “¿Mbaʼépepa chevale ha chevakeáno? ¿Mbaʼe kualida porãpa areko? Por ehémplo, ¿ajejokokuápa?, ¿chetravahadórpa?, ¿chepojerápa? ¿Mbaʼe iporãvapa ajapo jepi?”.

¡Etanteamína! ¿Ijetuʼúpa hína ndéve ehechakuaa hag̃ua umi mbaʼe porã ejapóva? Oimérõ upéicha ikatu eporandu nde tuakuérape térã peteĩ ne amígo de konfiánsape mbaʼe kualidápa ereko ha mbaʼéicha rehechauka jepi.

¿MBAʼÉPA HEʼI LA BIBLIA? “Káda uno tojesareko umi mbaʼe ojapóvare, péicha ovyʼáta hembiapóre ha ndahaʼéi oñembojoja haguére ótrore” (Gálatas 6:4).

Mbaʼépa ofalta remehorave. “¿Mbaʼépa tekotevẽ akambia che lájape? ¿Mbaʼéicha javépa ijetuʼuve chéve ajapo iporãva? ¿Mbaʼe situasiónpepa ofalta ajejokokuaave?”.

¿MBAʼÉPA HEʼI LA BIBLIA? “Ñande jaʼéramo: ‘Ndajarekói ningo pekádo’, upéicharõ ñande ñañembotavy ñandejupe voi” (1 Juan 1:8).

Mbaʼépa reguerovia. “¿Mbaʼépa oĩ porã ha mbaʼépa oĩ vai chéve g̃uarã ha mbaʼérepa apensa péicha? ¿Agueroviápa oexistiha Ñandejára? ¿Mbaʼérepa aime segúro oexistiha? ¿Mbaʼe mbaʼe ojejapóvapa apensa iñinhustoha ha mbaʼérepa? ¿Mbaʼépa arovia oikotaha che renonderãme?”.

¿MBAʼÉPA HEʼI LA BIBLIA? “Reipurukuaáta la ne akã ha upéva ndeprotehéta, rediferensiáta ivaíva ha iporãva ha upéva oñangarekóta nderehe” (Proverbios 2:11).