Umi tuakuéra oñemongetáva ifamiliakuérandi omombeʼu ojupe la opensáva ha oñandúva.

Ijetuʼu jepi oñeñeʼẽ hag̃ua umi mitãrusu ha mitãkuñándi. Ikatu oime ne família michĩrõ guare omombeʼu ndéve entéro mbaʼe. Péro upéi okakuaave ha og̃uahẽ peteĩ eda saʼive oñeʼẽhápe ndéve, ha nde ndereikuaavéi la opensáva ni la oñandúva. Haʼete ohasáva peteĩ rrío ipetereíva pene mbytérupi ha nde reĩ un ládo ha ne família pe ótro ládo. Añetehápe péicha jave, umi mitãrusu ha mitãkuña oikotevẽvéntema oñeʼẽ ituakuérandi.

Ejapo tekotevẽva. Eñehaʼã ejadapta ne famíliare tekotevẽramo jepe epyta tárde peve eñeʼẽ hag̃ua hendivekuéra.

“Sapyʼánte erese voi ne famíliape: ‘¡Tódo el día ñaĩ kuri oñondive, ha koʼã órape guaʼu reñeʼẽse!’. Péro ndaikatúi ningo jajeplagea ñane família omombeʼúta haguére la oĩva ikorasõme. Péva ningo la entéro sy ha túa jaipotáva” (Lisa).

“Che ahase jepi añeno voi péro heta vésema ahechakuaa la roñemongeta porãvérõ guare che famíliandi pyharepyte riréma kuri” (Héctor).

¿MBAʼÉPA HEʼI LA BIBLIA? “Káda uno jasegi vaʼerã jajapo pe ideprovéchotava ñande rapichápe, ha ani ñandévente ou porãtava” (1 Corintios 10:24).

Eñatende porã oñeʼẽ jave. Peteĩ túa heʼi: “Sapyʼánte umi mitã oñeʼẽ jave, che añepyrũ apensa ótra kosaitére, péro ni michĩmi nambotavýi chupekuéra, ensegída opilla hikuái”.

Oimérõ oiko jepi nderehe upéva, embogue la nde téle, emboykete nde selulár ha umícha. Eñehaʼã eñatende porã la heʼívare ne família, haʼetéramo jepe la vyroreíva, péicha rehechaukáta umi mbaʼe oipyʼapýva chupe iñimportanteha ndéve g̃uarã.

“Jahechauka vaʼerã ñane famíliape ñañeinteresaha la oñandúvare hikuái. Ndajajapóirõ upéicha, nomombeʼumoʼãvéima ñandéve mbaʼeve ha ohekáta ótro ládo la oipytyvõ vaʼerã chupe” (Miranda).

“Ani ndepochy ne família heʼi jave peteĩ mbaʼe noĩporãietéva” (Anthony).

¿MBAʼÉPA HEʼI LA BIBLIA? “Pejapysaka porã vaʼerã” (Lucas 8:18).

Eaprovecha oimehápe. Umi mitãrusu ha mitãkuñáme ifasilve jepi oñeʼẽ hag̃ua ituakuérandi ojapo jave álgo oñondive térã oikohárupi.

“Ore roaprovecha jepi roñeʼẽ roho jave áutope, upépe roĩ ojoykére ha ndahaʼéi romañáva ojováre ha upéva orepytyvõ roñemongeta porã hag̃ua” (Nicole).

Pekaru jave oñondivepa ikatu avei peaprovecha peñeʼẽ hag̃ua.

“Rosena aja káda uno omombeʼu la iporãvéva ha la ivaivéva ojehu vaʼekue chupe upe día. Rojepokuaa rupi rojapo upéicha oreunidove ha oremanduʼa natekotevẽiha rombohovái oreaño umi provléma” (Robin).

¿MBAʼÉPA HEʼI LA BIBLIA? ‘Enterovéva oĩ vaʼerã preparádo ohendu hag̃ua, péro ndojapurái vaʼerã oñeʼẽ hag̃ua’ (Santiago 1:19).