La Biblia ndahaʼéiramo jepe peteĩ lívro oñeʼẽva mbaʼasýre, oreko heta konsého ideprovéchova. Umi konsého ikatu oipytyvõ umi orekóvape depresión, ansieda térã ótro provléma emosionál. Jahechamína unos kuánto ehémplo.

“Umi hesãiva noikotevẽi doktór, péro umi hasýva si oikotevẽ” (MATEO 9:12).

La Biblia ohechauka sapyʼánte tekotevẽtaha jaha doktórpe. Heta persóna orekóva provléma emosionál tuicha ojalivia oikuaa rire mbaʼeichagua mbaʼasýpa oreko ha osegi rire peteĩ tratamiénto.

“Pe ehersísio ojapóva peteĩ persóna omombarete hag̃ua hete, [...] ideprovécho” (1 TIMOTEO 4:8).

Ikatu jajapo algúna kósa ñaneresãive hag̃ua ha upéva ñanepytyvõta ñañeñandu porãve hag̃ua avei. Por ehémplo jajapo meme ehersísio, ñamboyke umi tembiʼu ikatúva operkuhidika ñande salu ha japytuʼu porã.

“Peteĩ korasõ ovyʼáva, peteĩ pohã ñanemongueráva hína, péro upe oñeñandúva yvýre, mbeguekatúpe ikangypaite” (PROVERBIOS 17:22).

 Iporãta jaleéramo umi téxto bíblico ñanemokyreʼỹva ha ñamoĩ peteĩ méta ndahasýiva jahupyty hag̃ua. Koʼã mbaʼe ikatu ñanepytyvõ javyʼa hag̃ua. Ñañehaʼãramo ñandepositívo ha ñapensa entéro mbaʼe omehorataha amo gotyove, ikatúta ñandepuʼaka jahávo ko mbaʼasýre.

“Umi orrekonoséva la ndaikatúiva ojapo iñarandu” (PROVERBIOS 11:2, nóta).

Oiméne rehechakuaáta ndaikatuiha rejapo neañónte entéro mbaʼe, upévare easepta vaʼerã pe ajúda oofreséva umi ótro. Katuete ne amígo ha ne hentekuéra nepytyvõse, péro ndoikuaái mbaʼéichapa. Ere vaʼerã chupekuéra mbaʼépa nde reikotevẽ. Péro anínte neexihenteterei hendivekuéra ha eñehaʼã siémpre eagradese la ojapóva hikuái nderehehápe.

“Ahechakuaa álgo ojehuha chéve, upémarõ aha akonsulta peteĩ doktóra ndive. Haʼe heʼi chéve mbaʼépa la arekóva. Upéva chepytyvõ aasepta hag̃ua cherasyha, ha aikuaa hag̃ua mbaʼe tratamiéntopa oĩ ikatu hag̃uáicha omehora che salu” (Nicol, a orekóva transtórno vipolár).

“Che alee la Biblia che rembirekóndi káda pyhareve, ha upéva chepytyvõ chepositívo ha chekyreʼỹ hag̃ua pe díape. Pyʼỹinte ivai jave chendive, rolee peteĩ téxto opokóva che korasõre” (Peter, orekóva depresión).

“Ijetuʼu añeʼẽ ótrope la che mbaʼasýre pórke atĩeterei. Péro peteĩ che amigaite siémpre cherendu porã ha mborayhúpe oñehaʼã ontende mbaʼéichapa añeñandu. Legálmente haʼe tuichaiterei chepytyvõ ha añandu naimeiha cheaño” (Ji-yoo, orekóva transtórno alimentísio).

“Umi konsého oĩva la Bíbliape chepytyvõ ani hag̃ua ajejuka traváhope ha ahechakuaa hag̃ua iñimportanteha apytuʼu. Umi konsého neporãva chepytyvõ añorairõ hag̃ua umi provléma emosionál kóntrape” (Timothy, orekóva transtórno obsesívo kompulsívo).