1. ¿Mbaʼépa Jehová oipota jajapo?

 UMI túa ha sy ningo ovyʼaiterei orekóvo peteĩ mitã. Péro ohayhuetereíramo jepe la iveveʼípe, ndoipotái hikuái opyta péicha tóda la vída. Umi tuakuéra ojepyʼapýta voi upe mitãmi ndokakuaáirõ. Péicha avei Jehová ovyʼaiterei ñañepyrũvo jaikuaa chupe ha ñañemoag̃ui hese. Péro haʼe ndoipotái japyta upéicha siémpre (1 Cor. 3:1). Haʼe oipota ‘ñapensa peteĩ persóna okakuaapámava ojapoháicha’ (1 Cor. 14:20).

2. ¿Mbaʼe mbaʼépa ñaanalisáta ko artíkulope?

² ¿Mbaʼépa heʼise peteĩ kristiáno okakuaapamaha Ñandejára servísiope? ¿Mbaʼéichapa ikatu jahupyty upéva? ¿Mbaʼéichapa ñanepytyvõkuaa pe “tembiʼu iñaliméntova”, térã umi enseñánsa hypyʼũvéva oĩva la Bíbliape? ¿Ha mbaʼérepa ndovaléi jajeroviaiterei ñandejehe? Ko artíkulope ñakontestáta koʼã porandu.

¿MBAʼÉPA HEʼISE JAKAKUAAPAMAHA ÑANDEJÁRA SERVÍSIOPE?

3. ¿Mbaʼépa heʼise peteĩ kristiáno okakuaapamaha Ñandejára servísiope?

³ La Bíbliape pe palávra griega ojetradusíva “okakuaapáma” heʼise avei “perfékto” térã “kompletoite” (1 Cor. 14:20). a Peteĩ mitãraʼy ningo okakuaa oiko peve chugui peteĩ persóna imbarete ha okakuaapámava. Péicha avei ñane amista Jehovándi osegi vaʼerã imbarete oiko peve ñandehegui peteĩ kristiáno ijerovia mbaretéva. Upéva oiko vove ikatu jaʼe jakakuaapamaha Ñandejára servísiope. Péro upe rire lomímonte tekotevẽta siémpre ñamehora álgope (1 Tim. 4:15). Enterovévagui ikatu oiko peteĩ kristiáno okakuaapámava Ñandejára servísiope, tahaʼe umi imitãva térã  ijedávagui. ¿Péro mbaʼéichapa ikatu jaikuaa jakakuaapamaha upe sentídope?

4. ¿Mbaʼéichapa hína peteĩ kristiáno okakuaapámava Ñandejára servísiope?

⁴ Peteĩ kristiáno okakuaapámava Ñandejára servísiope ojapopaite umi mbaʼe Ñandejára omandáva, ha ndahaʼéi ojapóva la okonvenívante chupe. Jaikuaa ningo osegiha iñimperfékto ha ojavytaha, péro káda día oñehaʼã opensa ha oñekomporta Ñandejárape ogustaháicha. Pe kristiáno omoĩma “peteĩ aóicha pe kondúkta pyahu” ha oñehaʼã opensave Jehová opensaháicha (Efes. 4:​22-24). Avei oaprendéma odesidi porã hag̃ua oreko vaʼerãha enkuénta Jehová léi ha ikonsehokuéra. Upéicha rupi noikotevẽi ojeʼe chupe uno por uno la ovaléva ojapo ha la nahániriva. Pe kristiáno ijerovia mbaretéva odesidi jave álgo, ombaʼapo jejopy ojapo hag̃ua la odesidi haguéicha (1 Cor. 9:​26, 27).

5. ¿Mbaʼéichapa hína peteĩ kristiáno osegíva opensa mitãicha? (Efesios 4:​14, 15).

⁵ ¿Péro mbaʼéichapa hína umi kristiáno opensáva gueteri mitãicha? Haʼekuéra ogueroviapa rei “umi japu omboʼéva umi kuimbaʼe oikóva oporombotavy”. Ndahasyiete oguerovia hag̃ua hikuái umi informasión ha notísia japu oñemombeʼúva. Ha ikatu voi ombotavy chupekuéra umi apóstata heʼíva (elee Efesios 4:​14, 15). b Peichagua kristiáno ikatu iñenvidióso, oiko vai ótrondi ha pyaʼeterei oñeofende. Avei oñepresenta jave chupe peteĩ tentasión, ndahasyiete hína ojapo hag̃ua la ivaíva (1 Cor. 3:3).

6. ¿Mbaʼe sentídopepa peteĩ kristiáno okakuaa vaʼerã peteĩ mitã okakuaaháicha? (Ehecha pe taʼanga).

⁶ Jaʼéma haguéicha, la Biblia heʼi peteĩ kristiáno okakuaa vaʼerãha Ñandejára servísiope okakuaaháicha umi mitã. Ñapensamíntena, peteĩ mitã ningo ndoikuaái gueteri heta mbaʼe ha upévare peteĩ kakuaa ogia vaʼerã chupe ha okuida vaʼerã hese. Por ehémplo peteĩ sy okrusáta jave pe kálle imembykuñaʼíndi, katuete ojagarráta chupe ipógui. Pe mitãkuñaʼi tuichamiévo ohóvo provávlemente isy ohejátama chupe okrusa haʼeño, péro osegíta omomanduʼa chupe omaña porã vaʼerãha ohasa mboyve. Péro pe mitãkuñaʼi okakuaapa rire, oikuaáma mbaʼépa ojapo vaʼerã pono ojapeligra. Upéicha avei, umi kristiáno neʼĩrava okakuaapa Ñandejára servísiope oikotevẽ gueteri peteĩ kristiáno ijerovia mbaretéva oipytyvõ chupe. Péicha ndojapomoʼãi umi mbaʼe ikatúva ombyai iñamista Jehovándi ha odesidi  porãta. Péro umi kristiáno okakuaapámava idiferénte. Tekotevẽ jave odesidi álgo, haʼekuéra ojasegura porã mbaʼépa heʼi la Biblia oikuaa hag̃ua Jehová opensáva, ha upéi ojapo la oĩ porãva.

7. ¿Oikotevẽpa ajúda umi kristiáno ijerovia mbaretémava?

⁷ ¿Heʼisépa upéva umi kristiáno ijerovia mbaretémava noikotevẽiha avave oipytyvõ chupe? Nahániri. Sapyʼánte haʼekuéra oikotevẽ avei ajúda. Péro oĩ peteĩ diferénsia. Umi kristiáno opensáva gueteri mitãicha oipota jepi ojedesidi ivése térã ojeʼéntema chupe la ojapo vaʼerã. Peteĩ kristiáno ijerovia mbaretéva katu ohendúta umi konsého omeʼẽva chupe umi iñaranduvéva, péro oikuaa haʼe odesidi vaʼerãha pórke Jehová heʼi ‘káda uno oguerahataha ikárga’ (Gál. 6:5).

8. ¿Mbaʼépepa ikatu idiferénte ojuehegui umi kristiáno ijerovia mbaretémava?

⁸ Umi persóna ningo idiferénte ojuehegui. Por ehémplo ndahaʼéi okakuaapáma haguére ojojoguapaitéva hikuái. Péicha avei umi kristiáno okakuaapámava Ñandejára servísiope ikatu idiferénte ojuehegui: Oĩ umi iñaranduetereíva, umi ipyʼaguasúva, umi imbaʼeporãitereíva ha umi ontendéva hapichápe. Avei ikatu oñepresenta chupekuéra la mísma situasión ha odesidi diferénte mbaʼe, péro siémpre ojasegura hikuái odesidiha la Biblia heʼiháicha. Ko mbaʼe oiko espesiálmente tekotevẽ jave káda uno odesidi ikonsiénsia heʼiháicha chupe. Umi kristiáno ijerovia mbaretémava ndoikomoʼãi okopi ótro kristiáno odesidívare, síno oñehaʼãta hikuái oiko “peteĩ ñeʼẽme” (Rom. 14:10; 1 Cor. 1:10).

¿MBAʼÉICHAPA IKATU JAKAKUAAPA ÑANDEJÁRA SERVÍSIOPE?

9. ¿Ikatúpa jakakuaa Ñandejára servísiope ohasa haguérente la tiémpo? Emyesakã.

⁹ Umi mitã okakuaa ohóvo ohasa haguérente la tiémpo, péro jakakuaa hag̃ua Ñandejára servísiope ñañehaʼãmante vaʼerã ñandejehe. Por ehémplo umi ermáno ha ermána Corintogua ojerovia vaʼekue umi notísia porãre, ojevautisa, orresivi espíritu sánto ha oaprende heta mbaʼe apóstol Páblogui (Hech. 18:​8-11). Péro ohasáramo jepe heta áño, haʼekuéra osegi vaʼekue opensa mitãicha Ñandejára servísiope (1 Cor. 3:2). ¿Mbaʼépa ikatu jajapo ani hag̃ua oiko avei ñanderehe upéva?

10. ¿Mbaʼépa jajapo vaʼerã oiko hag̃ua ñandehegui kristiáno okakuaapámava? (Judas 20).

¹⁰ Oiko hag̃ua ñandehegui kristiáno okakuaapámava Ñandejára servísiope, primeroite voi jaipota vaʼerã oiko ñandehegui peichagua kristiáno. Umi ‘ndorekóiva experiénsia ha nokambiaséiva’ voi, ndaikatumoʼãi oprogresa ha opytáta péicha (Prov. 1:22). Oĩ ningo umi persóna okakuaapámava, péro ndojagarraséiva rresponsavilida ha oipota ituakuérante odesidi ivése. Ñande katu ndajajoguaséi peichagua persónape, síno jasegise ñañehaʼã ñandejehe ñamombarete hag̃ua ñane amista Jehovándi (elee Judas 20). Oimérõ epensa ofaltaha gueteri ndéve emombareteve nde jerovia, ejerurékena Jehovápe tomeʼẽ ndéve ‘pe deséo ha pe podér rejapo hag̃ua entéro mbaʼe chupe ogustáva’ (Filip. 2:13).

11. ¿Mbaʼéichapa Jehová ñanepytyvõ oiko hag̃ua ñandehegui kristiáno okakuaapámava? (Efesios 4:​11-13).

¹¹ Jehová oipota oiko ñandehegui kristiáno okakuaapámava iservísiope. Péro ndohejái jajecha ñaneaño upearã, haʼe ñanepytyvõse guei. Por ehémplo, kongregasiónpe omeʼẽ ñandéve “pastór ha mboʼehára” ikatúva ñanepytyvõ ‘oiko hag̃ua ñandehegui peteĩ kristiáno okakuaapámava ha ohupytýva Crístope entéro mbaʼépe’ (elee Efesios 4:​11-13). Jehová omeʼẽ avei ñandéve ijespíritu sánto ikatu hag̃uáicha “ñapensa Cristo opensaháicha” (1 Cor. 2:​14-16). Avei oskrivika umi lívro de Mateo, Marcos, Lucas ha Juan ikatu hag̃uáicha jaikuaa porã la ojapo vaʼekue Jesús ko yvy ape ári. Jasegíkena Jesús ehémplo, ñapensa ha ñañekomporta haʼe ojapo haguéicha, péicha oikóta ñandehegui kristiáno ijerovia mbaretéva.

 ¿MBAʼÉICHAPA ÑANEPYTYVÕ UMI ENSEÑÁNSA HYPYʼŨVÉVA?

12. ¿Mbaʼépa hína umi “enseñánsa primeroite oñemboʼéva Crístogui”?

¹² ¿Mbaʼépa ñaaprende vaʼerã jakakuaapa hag̃ua Ñandejára servísiope? Ndaikatúi jastudia sólamente umi “enseñánsa primeroite oñemboʼéva Crístogui”, umíva hína umi enseñánsa primeroite ñaaprendéva. Por ehémplo tekotevẽha ñañarrepenti, jajerovia Ñandejárare ha pe enseñánsa oñeʼẽva vautísmore ha rresurreksiónre (Heb. 6:​1, 2). Koʼã mbaʼe hína umi enseñánsa iñimportantevéva ha primeroite ogueroviáva peteĩ kristiáno. Upévare apóstol Pedro omboʼe vaʼekue koʼã mbaʼe umi héntepe pe Pentekostéspe (Hech. 2:​32-35, 38). Ñande ningo jaasepta vaʼerã koʼã enseñánsa oiko hag̃ua ñandehegui Cristo segidór. Upévare Pablo heʼi vaʼekue voi ndajajeroviáiramo pe rresurreksiónre, ndaikatuiha jaʼe ñande haʼeha kristiáno tee (1 Cor. 15:​12-14). Péro ndaikatúi ñañekontenta koʼã enseñánsarente jajerovia mbarete hag̃ua.

13. ¿Mbaʼépa tekotevẽ jajapo jaaprovecha porã hag̃ua pe “tembiʼu iñaliméntova”? (Hebreos 5:14). (Ehecha pe taʼanga).

¹³ ¿Mbaʼépa pe “tembiʼu iñaliméntova” térã umi enseñánsa hypyʼũvéva? Umíva apytépe ndoikéi Jehová leikuéra añónte, síno umi konsého ha hetave enseñánsa bíblica ñanepytyvõva jaikuaa hag̃ua Jehová opensa lája. Jaaprovecha porã hag̃ua pe “tembiʼu iñaliméntova”, tekotevẽ jastudia Ñandejára Ñeʼẽ, jajepyʼamongeta hese ha upéi ñañehaʼãmbaite jajapo hag̃ua la ñaaprendéva. Péicha ñaaprende hína jadesidi hag̃ua umi mbaʼe ogustáva Ñandejárape (elee Hebreos 5:14). c

14. ¿Mbaʼéichapa oipytyvõ vaʼekue Pablo umi kristiáno Corintoguápe?

¹⁴ Heta vése la Biblia ndeʼíri derechoite mbaʼépa jadesidi vaʼerã. Upéicha jave umi kristiáno neʼĩrava okakuaapa ndoikuaái mbaʼépa ojapóta ha oforsa chupekuéra odesidi hag̃ua. Péicha jave koʼãichagua kristiáno opensa ikatuha ojapo la ojaposéva, térã oipota oñemoĩ peteĩ léi osegi vaʼerã, natekotevẽiramo jepe. Por ehémplo, amalisia umi Corintogua ojerure vaʼekue Páblope heʼi hag̃ua ovale térã ndovaléipa peteĩ kristiáno hoʼu umi tembiʼu ojeofrese vaʼekue umi dios raʼangápe. Heʼi rangue umi kristiánope mbaʼépa ojapo vaʼerã, Pablo omomanduʼa chupekuéra  káda uno orekoha ‘derécho odesidi hag̃ua’ asegún la ikonsiénsia. Haʼe omensiona umi enseñánsa oĩva la Bíbliape ikatúva oipytyvõ umi kristiánope ojegia hag̃ua ikonsiénsia heʼívare ha pono oofende ótrope (1 Cor. 8:​4, 7-9). Péicha Pablo omboʼe umi Corintoguápe oipuru hag̃ua iñakã odesidíta jave álgo, oiko rangue odepende ótrore térã oheka rangue peteĩ léi opa mbaʼépe. Jahechaháicha Pablo oipytyvõ vaʼekue umi kristiánope okakuaapa hag̃ua Ñandejára servísiope.

15. ¿Mbaʼéichapa Pablo oipytyvõ vaʼekue umi kristiáno hebréope?

¹⁵ Ikatu avei ñaaprende álgo iñimportánteva Pablo heʼi vaʼekuégui umi hebréope. Oĩ vaʼekue umi nomombaretevéiva iñamista Jehovándi, upéicha rupi Pablo oskrivi chupekuéra peteĩ kárta ha heʼi: “Peikotevẽ jey kambýre umi mitãraʼy oikotevẽháicha, peʼu rangue tembiʼu iñaliméntova hoʼúva umi okakuaapámava” (Heb. 5:12). Haʼekuéra noaprendéi ha ndoaseptái vaʼekue umi mbaʼe pyahu Jehová omboʼéva chupekuéra pe kongregasión rupive (Prov. 4:18). Por ehémplo oĩ vaʼekue umi kristiáno judío oñemohatãva ha heʼíva ojesegi vaʼerãha oñekumpli Moisés léi. Péro upérõ ohasáma kuri 30 áño upe léi opa hague Cristo sakrifísio rupive (Rom. 10:4; Tito 1:10). ¡Heta tiémpoma upéva! Oñemeʼẽma kuri 30 áño umi kristiánope oasepta ha ontende hag̃ua natekotevẽveimaha ojesegi pe léi. Upévare Pablo oipytyvõse chupekuéra oasepta hag̃ua umi enseñánsa hypyʼũvéva omboʼéva chupekuéra ko kártape. Pablo oipota vaʼekue umi kristiáno ontende Jesucristo rupive ojeadora vaʼerãha Jehovápe, ha upéva iporãiteveha yma guarégui. Avei Pablo oipytyvõ chupekuéra ipyʼaguasu ha osegi hag̃ua opredika, oñemoĩ mbaretéramo jepe hesekuéra umi judío (Heb. 10:​19-23).

ANI JAJEROVIAITEREI ÑANDEJEHE

16. ¿Mbaʼépa ñañehaʼã vaʼerã avei jajapo?

¹⁶ Iporãiterei ningo ñañehaʼã jakakuaapa Ñandejára servísiope. Péro ñañehaʼã vaʼerã avei ñañemantene upéicha. Upévare ndovaléi jajerovia ñandejehe ha ñapensa natekotevẽveimaha ñamombareteve ñane amista Jehovándi (1 Cor. 10:12). Iñimportánte ‘jasegi ñañatende ñandejehe’ ikatu hag̃uáicha japrogresave jahávo (2 Cor. 13:5).

17. ¿Mbaʼépa ñanemboʼe la Pablo oskrivi vaʼekue umi kristiáno Colosasguápe?

¹⁷ Apóstol Pablo oskrivi vaʼekue avei umi kristiáno Colosasguápe tekotevẽha osegi hikuái ojerovia mbarete. Umi kristiáno upepegua okakuaapáma vaʼekue Ñandejára servísiope. Péro  lomímonte heʼi chupekuéra toñatende ani hag̃ua ombotavy chupekuéra la heʼíva umi hénte ko mundopegua (Col. 2:​6-10). Epafras oikuaa porã vaʼekue avei umi kristiáno Colosasguápe ha siémpre oñemboʼe hesehapekuéra. ¿Maʼerãpa? Ikatu hag̃uáicha osegi hikuái ‘ojepytaso mbarete’ térã ‘ikompléto’ hag̃ua (Col. 4:​12, nóta). ¿Mbaʼépa ñaaprende? Pablo ha Epafras oikuaa vaʼekue jasegi hag̃ua jajerovia mbarete ñaikotevẽha Ñandejára ñanepytyvõ, péro avei ñamoĩ vaʼerãha ñande párte ñamombareteve hag̃ua ñane amista Jehovándi. Haʼekuéra oipota vaʼekue umi kristiáno Colosasgua osegi ijerovia mbarete ohasáramo jepe heta mbaʼe ijetuʼúva.

18. ¿Mbaʼépa ikatu oiko peteĩ kristiáno ijerovia mbaretévare? (Ehecha pe taʼanga).

¹⁸ Pablo heʼi vaʼekue umi hebréope peteĩ kristiáno ijerovia mbaretéva noñatendéiramo ikatuha opyta vai Ñandejára renondépe pára siémpre. Pe kristiáno oúramo ipyʼahãta ha nohendusevéi Jehovápe ikatu oñemomombyry chugui, noñarrepentikuaavéi ha upévare Ñandejára noperdonái chupe. Haʼetépe ningo umi kristiáno hebreo noĩri vaʼekue upe situasiónpe (Heb. 6:​4-9). Ha ñane tiémpope, ¿mbaʼépa oiko peteĩ kristiáno opytáramo inaktívo térã oúramo oñemosẽ kongregasióngui ha upéi oñarrepenti? Haʼe iñumílde ha oñarrepentíramo, ohechauka idiferenteha umi ipyʼahatãvagui oñeʼẽ vaʼekuére Pablo. Péro oñemoag̃ui jeývo haʼe oikotevẽ Jehová oipytyvõ chupe (Ezeq. 34:​15, 16). Upévare umi ansiáno ikatu ojerure umi kristiáno ijerovia mbaretévape oipytyvõ hag̃ua umi oñemoag̃ui jeývape Jehováre.

19. ¿Mbaʼépa ñañehaʼã vaʼerã jajapo?

¹⁹ Oimérõ nde eñehaʼã hína oiko hag̃ua ndehegui peteĩ kristiáno okakuaapámava, esegíkena péicha ha katuete ehupytýta upéva. Eaprendékena kontinuadoite umi enseñánsa hypyʼũvéva ha eñehaʼã epensa Jehová opensaháicha. Ha oimérõ nde haʼéma peteĩ kristiáno okakuaapámava Ñandejára servísiope, ejepytasókena ha esegi péicha opa árare.