1. ¿Mbaʼéichapa heta ermáno ha ermána oñeñandu opredikáta jave? (Ehecha pe taʼanga).

 ÑANDE testígo de Jehová japredika pórke jahayhu ñande Ru Jehovápe ha ñaipytyvõse ñande rapichakuérape oikuaa hag̃ua chupe. Hetaiterei ermáno ha ermána ovyʼaiterei opredika jave. Péro oĩ avei la ndovyʼapáiva. ¿Mbaʼérepa? Oĩ ningo hiʼotĩva ha ndojeroviapáiva ijehe. Oĩ avei noñeñanduporãiva og̃uahẽ reíntema hag̃ua óga ahénope. Algúno okyhyje oñemosẽrõ g̃uarã, ótro katu nombopochyséi avavépe. Koʼã ermáno ha ermána ohayhueterei Jehovápe, péro ijetuʼu chupekuéra omombeʼu hag̃ua umi notísia porã umi extráñope. Upéicharõ jepe haʼekuéra osẽ meme opredika, pórke oikuaa iñimportantetereiha ko tembiapo. ¡Oiméne ovyʼaite Jehová ohechávo upéva!

2. Oimérõ nderevyʼapái predikasiónpe, ¿mbaʼérepa ndovaléi reñedesanima?

² Sapyʼánte reñeñandúramo péicha, aníkena reñedesanima. Oimérõ nderejeroviapái ndejehe, upéva ohechaukánte hína neumildeha ha ndereikoseiha reñembovale ótro renondépe. Ndaivaíri avei jaheka fórma ani hag̃ua jajodiskuti ñande rapichándi. Ha legálmente ndaigústoi voi ñañemosẽ óga ahénogui, koʼýte oimérõ jajapose iporãva ñande rapichakuéra rehehápe. Ñande Ru Jehová oikuaa porã umi mbaʼe ijetuʼúva ñandéve, ha ñanepytyvõseterei voi (Is. 41:13). Ko artíkulope jahecháta 5 mbaʼe ikatúva ñanepytyvõ javyʼave hag̃ua predikasiónpe.

ÑANDEJÁRA ÑEʼẼ IKATU NEMBOPYʼAGUASU

3. ¿Mbaʼépa oipytyvõ vaʼekue proféta Jeremíaspe opredika hag̃ua?

³ Ymaite guive Jehová siervokuéra orekónteva voi umi asignasión ijetuʼúva, péro la Ñandejára heʼíva ombopyʼaguasu  chupekuéra. Upéicha vaʼekue Jeremías kásope. Jehová omanda vaʼekue chupe opredika hag̃ua, péro haʼe okyhyje. Jeremías heʼi voi Jehovápe: “Che ningo chemitãiterei gueteri ha nañeʼẽkuaái” (Jer. 1:6). Jahechaháicha Jeremías ndojeroviapái vaʼekue ijehe, péro la Jehová heʼi vaʼekue chupe omombeʼu hag̃ua ombopyʼaguasu chupe. Haʼe heʼi: “Pe iñeʼẽ haʼete voi tatarendy oĩva che kangue kuápe, ha chekaneʼõma ajejoko hague” (Jer. 20:​8, 9). Jeremías oikuaa vaʼekue ijetuʼutaha opredika umi héntepe, péro pe mensáhe tekotevẽ vaʼekue omombeʼu ombopyʼaguasu chupe okumpli hag̃ua iñasignasión.

4. ¿Mbaʼépa jahupytýta jaleéramo la Biblia ha jajepyʼamongeta hese? (Colosenses 1:​9, 10).

⁴ Koʼág̃arupi avei Jehová ñanembopyʼaguasu umi mbaʼe heʼíva rupive la Bíbliape. Apóstol Pablo oskrivírõ guare umi Colosasguápe, haʼe ojerure vaʼekue chupekuéra ‘oikuaa porã hag̃ua Ñandejára rembipota’. ¿Maʼerãpa? Ikatu hag̃uáicha oiko “oikoháicha umi oservíva Jehovápe”, péicha haʼekuéra ikatúta kuri osegi ojapo “umi mbaʼe oĩ porãva” (elee Colosenses 1:​9, 10). Japredika jave umi notísia porã jajapo hína peteĩ “mbaʼe oĩ porãva”. Upéicharõ, jalee jave la Biblia ha jajepyʼamongeta hese, katuete jajeroviavéta Jehováre ha ñantende porãvéta avei mbaʼérepa iñimportánte japredika.

5. ¿Mbaʼéichapa ikatu reaprovecha porãve Ñandejára Ñeʼẽ heʼíva?

⁵ Jaaprovecha porã hag̃ua Ñandejára Ñeʼẽ heʼíva tekotevẽ jalee, jastudia ha jajepyʼamongeta hese. Péro ani la apúrope, síno ñañemotiémpo vaʼerã upearã. Oimérõ etopa peteĩ téxto bíblico nerentendeporãiva, ani rembohasa reíntema, upéva rangue eñehaʼã vaʼerã entende la heʼiséva pe versíkulo. Upearã ikatu eipuru pe Índice de las publicaciones Watch Tower ha Gía oipurúva testígo de Jehová otopa hag̃ua informasión. Reñemotiémporamo restudia porã hag̃ua, regueroviavéta siertoha la Biblia heʼíva (1 Tes. 5:21). Ha amáske rejeroviave la Biblia heʼívare, evyʼavéta ikatu haguére ekomparti ótrondi la reaprendéva.

EJEPREPARA PORÃ EPREDIKA HAG̃UA

6. ¿Mbaʼérepa jajeprepara porã vaʼerã japredika hag̃ua?

⁶ Ejeprepara porãrõ, tuicha ndepyʼaguapyvéta epredikáta jave. Jesús oprepara vaʼekue idisipulokuérape omondo mboyve chupekuéra opredika hag̃ua (Luc. 10:​1-11). Haʼekuéra osegi vaʼekue umi konsého omeʼẽva  chupekuéra Jesús. Upéicha rupi ohupyty hikuái heta mbaʼe porã ha upéva ombovyʼa chupekuéra (Luc. 10:17).

7. ¿Mbaʼéichapa ikatu jajeprepara japredika hag̃ua? (Ehecha pe taʼanga).

⁷ ¿Mbaʼéichapa ikatu jajeprepara japredika hag̃ua? Primerorã tekotevẽ ñapensa mbaʼépa jaʼéta ha upéi ñapensa mbaʼéichapa jaʼéta upéva ñañeʼẽháicha jepi voi normálmente. Iporãta jakalkuláramo mbaʼépa ikatu heʼi ñandéve umi hénte ñande territoriopegua ha mbaʼépa jaʼekuaa káda kásope. Upéi, ñañeʼẽta jave umi héntendi ñañehaʼã vaʼerã ñañetrankilisa, japukavy ha ñaneamávle hendivekuéra.

8. ¿Mbaʼérepa ikatu jaʼe Ñandejára siervokuéra ojoguaha umi kambuchi omensiona vaʼekuépe Pablo?

⁸ Apóstol Pablo heʼi vaʼekue jajoguaha “umi kambuchi ojejapóvape ñaiʼũgui, ha orekóva hyepýpe peteĩ tesóro” (2 Cor. 4:7). ¿Mbaʼépa hína upe tesóro? Pe tembiapo ojejapóva oñemombeʼu hag̃ua umi notísia porã oñeʼẽva Ñandejára Rréinore. Ko traváho ningo ikatu osalva umi héntepe (2 Cor. 4:1). ¿Mbaʼépa hína umi kambuchi? Umi kambuchi orrepresenta Ñandejára siervokuéra omombeʼúvape umi notísia porã la héntepe. Pablo tiémpope umi komersiánte oguerojámi vaʼerã kambuchípe heta mbaʼe ivaliósova, por ehémplo tembiʼu, víno térã pláta. Koʼág̃a avei Jehová omeʼẽ ñandéve peteĩ mbaʼe ivaliosoitereíva: Umi notísia porã oñeʼẽva Ñandejára Rréinore. Ha haʼe ñanepytyvõ rupi ikatúta ñakumpli porã ñane asignasión ha jasegi ñamombeʼu umi notísia porã.

EÑEMBOʼE NDEPYʼAGUASU HAG̃UA

9. ¿Mbaʼépa ikatu jajapo oimérõ jakyhyje japredika hag̃ua? (Ehecha pe taʼanga).

⁹ Sapyʼánte ikatu jakyhyje oĩrõ g̃uarã oñemoĩva ñanderehe térã umi hénte nañanerenduséirõ g̃uarã. ¿Mbaʼépa ikatu jajapo? Jahechamína umi apóstol ehémplo. Chupekuéra oñemanda vaʼekue anivéma hag̃ua opredika. Péro okyhyje ha oñentrega rangue hikuái, ¿mbaʼépa ojapo? Oñemboʼe hikuái Jehovápe ha ojerure toipytyvõmi chupekuéra ‘osegi hag̃ua omombeʼu iñeʼẽ pyʼaguasúpe’. Ha Jehová okontesta chupekuéra upepete (Hech. 4:​18, 29, 31). Jakyhyjéramo sapyʼánte, ñañemboʼékena avei Jehovápe. Jajerure chupe tañanepytyvõ jahayhuve hag̃ua ñande rapichápe, pórke upéva ñanepytyvõta ani hag̃ua  jakyhyjeterei ñamombeʼúta jave umi notísia porã.

10. ¿Mbaʼéichapa Jehová ñanepytyvõ ñakumpli hag̃ua ñande traváho kómo Testígo? (Isaías 43:​10-12).

¹⁰ Jehová ningo ñanenombra Itestígo ha haʼe opromete ñanembopyʼaguasutaha upearã (elee Isaías 43:​10-12). Jahechamína 4 kósa Jehová ojapóva ñanderehehápe. Primero, Jesús oĩ ñanendive japredikaha órante (Mat. 28:​18-20). Segundo, Jehová onkargáma umi ánhelpe ñanepytyvõ hag̃ua (Apoc. 14:6). Tercero, Jehová omeʼẽ ñandéve ijespíritu sánto ñanemomanduʼa hag̃ua umi mbaʼe ñaaprende vaʼekuére (Juan 14:​25, 26). Cuarto, Jehová omoĩ ñane ermáno ha ermanakuérape ñanemoirũ hag̃ua ko traváhope. Añetehápe, Jehová ha ñane ermanokuéra ñanepytyvõ rupi, jarekopaite la ñaikotevẽva ñandepyʼaguasu ha japredika meme hag̃ua.

EJADAPTA UMI HÉNTERE HA NDEPOSITÍVOKENA

11. ¿Mbaʼépa ikatu rejapo retopave hag̃ua la héntere? (Ehecha pe taʼanga).

¹¹ ¿Reñedesanimápa nderetopái jave la héntere hógape epredika jave? Oimérõ upéicha, iporãta eñeporandúramo: “¿Moõpa oiméne oĩ umi hénte koʼag̃aite? ¿Ombaʼapo joápa térã ombaʼejogua hína?” (Hech. 16:13). Oimérõ upéicha, ¿ndaikatuichénepa repredika kállere? Peteĩ ermáno hérava Joshua heʼi: “Oho porãiterei chéve apredika jave umi lugár oĩháme heta negósio ha umi estasionamientohárupi”. Ko ermáno ha hembireko Bridget otopave jepi la héntere hógape ohórõ opredika kaʼaruete ha domingo kaʼarukue (Efes. 5:​15, 16).

12. ¿Mbaʼéichapa ikatu jaikuaa la hénte ogueroviáva ha la oipyʼapýva chupekuéra?

¹² Oimérõ umi hénte primerorã ndahaʼéi la ñanerendusepáva, ñañehaʼã vaʼerã japilla mbaʼépa oguerovia térã mbaʼépa oipyʼapy chupekuéra. Oñepyrũ hag̃ua, Joshua ha Bridget oipuru jepi umi porandu oĩva umi tratádo apére. Por ehémplo oipuru jave pe tratádo ¿Mbaʼépa nde repensa la Bíbliare?, haʼekuéra heʼi: “Oĩ hénte opensáva la Biblia ouha Ñandejáragui, ótro katu ndogueroviái upéva. ¿Mbaʼépa nde repensa?”. Péicha oñepyrũ jepi hikuái oñemongeta porã la héntendi.

13. Oimérõ ndaikatúi japredika avavépe, ¿mbaʼérepa ndaikatúi jaʼe oho vaiha ñandéve? (Proverbios 27:11).

 ¹³ Umi hénte nohenduséiramo jepe japredika jave, upéva ndeʼiséi oho vaiha ñandéve. ¿Mbaʼérepa? Pórke jajapo hína la Jehová ha Itaʼýra oipotáva jajapo: Ñakumpli ñande traváho de Testígo (Hech. 10:42). Upévare ani ñamboguapy ñandejehe ndajatopáiramo umi héntere térã oĩramo nohenduséiva ñane mensáhe. Upéva rangue javyʼa vaʼerã jaikuaágui jajapoha la ogustáva ñande Ru yvagapeguápe (elee Proverbios 27:11).

14. ¿Mbaʼéichapa ñañeñandu ótro otopa jave peteĩ persóna oñeinteresáva la Bíbliare, ha mbaʼérepa?

¹⁴ Avei ikatu javyʼa ótro ermáno otopa jave peteĩ persóna oñeinteresáva la Bíbliare. Peteĩ Ñemañaha omoĩ vaʼekue ko ehémplo: Ñamoĩ chupe okañyha peteĩ mitã. Upéi heta hénte oñemoĩ oheka chupe opárupi. Amo ipahápe ojetopávo pe mitãre, ndahaʼéi ku ovyʼáva sólamente pe otopa vaʼekue hese, síno enterovéva ovyʼaiterei. Kongregasiónpe avei enterovéva ombaʼapo en unida oiko hag̃ua peteĩ persónagui Jesús disípulo. Oñekotevẽ ningo opavavére ojepredika hag̃ua pe território kompletoite ha enterovénte javyʼaiterei peteĩ persóna oñepyrũvo oho rreunionhápe.

EPOROHAYHÚKENA

15. ¿Mbaʼéichapa Mateo 22:​37-39 ñanepytyvõta javyʼave hag̃ua? (Ehecha pe taʼanga ).

¹⁵ Javyʼavéta avei ñanemanduʼa memérõ japredikaha jahayhúgui Jehovápe ha ñande rapichakuérape (elee Mateo 22:​37-39). Ñapensamíntena mbaʼeichaitépa Jehová ovyʼa ohechávo japredikaha ha mbaʼéichapa umi hénte ovyʼáta oñepyrũvo ostudia la Biblia. Ñanemanduʼákena avei umi ñanerendúva ha odesidíva oservi Jehovápe ikatutaha oiko pára siémpre (Juan 6:40; 1 Tim. 4:16).

16. ¿Mbaʼéichapa ikatu jaservi Jehovápe ha javyʼa ndaikatúiramo jepe ñasẽ ñande rógagui? Emoĩ peteĩ ehémplo.

¹⁶ ¿Mbaʼépa oikóta ndaikatúiramo esẽ nde rógagui? Oimérõ upéicha, epensa la ikatúvare rejapo rehechauka hag̃ua rehayhuha Jehovápe ha nde rapichakuérape. Pe pandémia de COVID-19 aja, Samuel ha Dania ndaikatúi vaʼekue osẽ hógagui. Ijetuʼúramo jepe isituasionkuéra haʼekuéra opredika meme por teléfono, oskrivi kárta ha oporombostudia  la Biblia Zoom rupive. Samuel osegi kuri peteĩ tratamiénto kánserpe g̃uarã peteĩ ospitálpe, ha oaprovecha opredika umi otopávape upépe. Haʼe heʼi: “Jahasa jave álgo ijetuʼúva ñañekevranta, ñanekaneʼõ ha ikatu voi ou ikangy ñande jerovia. Péicha jave tekotevẽterei jaservi Jehovápe ikatu hag̃uáicha javyʼa”. Hiʼarive upe tiémpope Dania hoʼa ha opyta tupápe 3 mése. Upéi oñepyrũ oiko sílla de rruédape 6 mése aja. Ko ermána heʼi: “Añehaʼãmbaite ajapo la ikatumíva guive. Apredika pe enferméra oúvape che rendápe ha avei umi orahávape ógape algún pedído rojapóva. Avei añemongeta vaʼekue peteĩ cherenóivandi jepi peteĩ emprésa médikagui”. Jahechaháicha Samuel ha Dania ndaikatúi vaʼekue opredika ymave guaréicha, péro ovyʼa ojapo haguére omeʼẽháicha chupekuéra iposivilida.

17. ¿Mbaʼéichapa ikatu ideprovécho ndéve umi konsého oĩva ko artíkulope?

¹⁷ Umi konsého jahecha vaʼekue ko artíkulope ideprovéchota ndéve resegíramo kompletoite. Ikatu ñakompara peteĩ tembiʼu rresétare. Káda konsého ojogua káda ingrediéntepe ha remoĩramo oñondivepa oikoitéta la osẽva. Upévare, jasegíramo kompléto umi konsého ñandepositívota ha javyʼavéta predikasiónpe.