1. ¿Mbaʼépa ojapo peteĩ persóna oñarrepentíva?

 JAJAPO jave álgo ivaíva tekotevẽterei ñañarrepenti. La Biblia heʼi peteĩ persóna oñarrepentíva okambiaha opensa lája ha ndogustaveietemaha chupe upe mbaʼe vai ojapo vaʼekue. Avei ndojapovéi ha odesidi voi ndojapomoʼãveimaha upe mbaʼe vai (ehecha pe Diksionário oĩva Bíbliape “Arrepentimiénto”).

2. ¿Mbaʼérepa enterovetéva tekotevẽ ñantende porã mbaʼépa hína pe arrepentimiénto? (Nehemías 8:​9-11).

² Enterovetéva tekotevẽ ñantende porã mbaʼépa hína pe arrepentimiénto. ¿Mbaʼérepa? Pórke káda día enterovetéva japeka. Ñande haʼe rupi Adán ha Eva familiare ñanaséma pekadór ha upéi ñamano (Rom. 3:23; 5:12). Ni peteĩva ndaikatúi ojei pe pekádogui. Umi kuimbaʼe ijerovia mbaretéva jepe apóstol Pábloicha olucha vaʼekue pe pekádo kóntrape (Rom. 7:​21-24). ¿Heʼisépa upéva tekotevẽha tódo el tiémpo ñañeñandu vai japeka haguére? Nahániri. Jehová ningo ñandeporiahuvereko ha oipota jaiko vyʼápe. Jahechamína la oiko vaʼekue Nehemías tiémpope (elee Nehemías 8:​9-11). Jehová ndoipotái vaʼekue umi judío oiko oñembyasyháre umi mbaʼe vai ojapo vaʼekuére, síno haʼe oipota haʼekuéra oservi chupe vyʼápe. Jehová oikuaa porã ñañarrepentíramo ikatuha javyʼa, upévare haʼe ñanemboʼe mbaʼépa hína pe arrepentimiénto. Ñañarrepentíramo ikatu ñaĩ segúro ñande Ru ñandeporiahuverekóva ñaneperdonataha.

3. ¿Mbaʼépa jahecháta ko artíkulope?

³ Ko artíkulope ñañeʼẽta pe arrepentimiéntore, ha ñaanalisáta mbohapy mbaʼe. Primero jahecháta mbaʼéichapa Jehová oipytyvõ vaʼekue umi israelítape ontende hag̃ua mbaʼépa hína pe arrepentimiénto. Avei jahecháta mbaʼéichapa Jehová oipytyvõ umi  persónape oñarrepenti hag̃ua, ha ipahápe ñaanalisáta mbaʼépa Jesús omboʼe vaʼekue idisipulokuérape ko témare.

OÑEPYTYVÕ UMI ISRAELÍTAPE ONTENDE HAG̃UA MBAʼÉPA PE ARREPENTIMIÉNTO

4. ¿Mbaʼépa Jehová omboʼe vaʼekue umi israelítape?

⁴ Jehová ojapo vaʼekue peteĩ kompromíso umi israelítandi. Haʼe omeʼẽ chupekuéra imandamiénto ha haʼekuéra opromete iñeʼẽrendutaha chupe. Jehová oprotehe ha ovendesíta kuri umi israelítape haʼekuéra iñeʼẽrendu aja chupe. Jehová heʼi vaʼekue chupekuéra: “Ko mandamiénto ameʼẽva peẽme koestedía ndahaʼéi hína ijetuʼuetereíva peẽme g̃uarã, ni hasyetereíva pekumpli hag̃ua” (Deut. 30:​11, 16). Péro umi israelita naiñeʼẽrendúiramo Jehová léipe, térã odesidíramo oservi ótro dióspe, Jehová novendesimoʼãvéima chupekuéra ha pe puévlo osufríta. Upéva ndeʼiséi vaʼekue Jehová núnka mas ndoguerohorymoʼãveimaha chupekuéra. Upéva rangue haʼekuéra ikatu vaʼekue ‘ojevy jey Jehová Ijára rendápe ha ohendu iñeʼẽ’ (Deut. 30:​1-3, 17-20). Péicha jahecha haʼekuéra ikatu hague oñarrepenti, ha haʼekuéra ojapóramo upéva Jehová oñemoag̃ui jeýta hesekuéra ha ovendesi jeýta chupekuéra.

5. ¿Mbaʼéichapa Jehová ohechauka vaʼekue nopensaiha ipuévlo naipohãveimaha? (2 Reyes 17:​13, 14).

⁵ Pe puévlo Jehová oiporavo vaʼekue hetaiterei vése ojerrevela ikóntrape. Haʼekuéra oadora umi dios raʼangápe ha ojapo hetaitereive mbaʼe ombojeguarúva Ñandejárape. Upéicha rupi haʼekuéra heta osufri. Péro Jehová nopensái vaʼekue haʼekuéra naipohãveimaha, upéva rangue oñehaʼã oipytyvõ ipuévlope oservi jey hag̃ua chupe. Upévare omondo jey jey iprofetakuérape omomýi hag̃ua ipuévlope oñarrepenti ha oñemoag̃ui jey hag̃ua hese (elee 2 Reyes 17:​13, 14).

6. ¿Mbaʼéichapa Jehová ojevale vaʼekue iprofetakuérare ipuévlo ontende hag̃ua tekotevẽha oñarrepenti? (Ehecha pe taʼanga).

⁶ Jehová pyʼỹinte ojevale vaʼekue iprofetakuérare okorrehi hag̃ua ipuévlope, ha oavisa hag̃ua chupekuéra mbaʼépa oikóta haʼekuéra nokambiáiramo. Por ehémplo proféta Jeremías rupive Jehová heʼi vaʼekue chupekuéra:  ‘Eju jeýna che rendápe Israel, nde ningo upe repuʼã vaʼekue cherehe. Che namañavaimoʼãi nderehe ni ndachepochymoʼãi, pórke che chembaʼeporã. Che ndachepyʼaromoʼãi pára siémpre. Errekonoséntena refalla hague, pórke repuʼã nde Jára Jehová kóntrape’ (Jer. 3:​12, 13). Proféta Joel rupive Ñandejára heʼi vaʼekue: “Peju jeýna koʼág̃a che rendápe pende pyʼaite guive” (Joel 2:​12, 13). Avei proféta Isaías rupive heʼi vaʼekue: ‘Penepotĩ vaʼerã pepytávo. Anive pejapo umi mbaʼe vai che resa renondépe. Anive peneñaña’ (Is. 1:​16-19). Avei Jehová ojevale vaʼekue Ezequiel rehe oporandu hag̃ua: ‘¿Che piko avyʼáta omano haguére peteĩ persóna iñañáva? ¿Che piko ndaipotái mbaʼe haʼe oheja umi hembiapo vaikue ha osegi oikove? Chéve ningo nachembovyʼái oĩramo omanóva. Upévare, pejevýna pene rembiapo vaikuégui ha peikovéta’ (Ezeq. 18:​23, 32). Jehová ningo ovyʼa ipyʼaite guive peteĩ persóna oñarrepentíramo, pórke oikuaa péicha haʼe oikovetaha pára siémpre. Upéicharõ, Jehová ndahaʼéi ku opytáva ojapoʼỹre mbaʼeve ha ohaʼarõnte pe persóna okambia raẽ oipytyvõ hag̃ua chupe. Jahechamína hetave ehémplo ohechaukáva upéva.

7. Oseas ehémplo rupive, ¿mbaʼépa Jehová omboʼe vaʼekue ipuévlope?

⁷ Jahechamína mbaʼépa la oiko vaʼekue Oseas rehe, ha mbaʼépa la Ñandejára omboʼese vaʼekue ipuévlope upérõ. Oseas rembireko héra vaʼekue Gómer, ha haʼe omoakãratĩ vaʼekue iménape ha oho ótro kuimbaʼéndi. ¿Péro ikatu piko jaʼe Gómer naipohãvéima hague? Jehová ningo oikuaa porã la oĩva káda persóna korasõme, upévare heʼi vaʼekue Oséaspe: “Ehayhu jey ne rembirekópe, chupe ningo ohayhu hína ótro kuimbaʼe ha nemoakãratĩ. Upéicha avei Jehová ohayhu pe puévlo de Israélpe, ha haʼekuéra katu oho umi ótro dios rapykuéri” (Os. 3:1; Prov. 16:2). Jahechaháicha Oseas rembireko opeka gueteri hína kuri, péro upe moméntopema Jehová heʼi Oséaspe oho hag̃ua oheka hembirekópe ha operdona chupe. a Upe ehémplo rupive Jehová ohechaukase ipuévlope mbaʼépa la haʼe oñandúva. Haʼekuéra osegíramo jepe hembiapo vai, haʼe ohayhu gueteri chupekuéra ha kontinuadoite oipytyvõ ipuévlope oñarrepenti ha okambia hag̃ua. Ko ehémplo ñanemboʼe Jehová oikuaa porãitereiha la oĩva káda persóna korasõme, ha oñehaʼãha oipytyvõ peteĩ persóna opekávape gueteri ikatu hag̃uáicha oñarrepenti (Prov. 17:3). Jahechamiéna mbaʼérepa ikatu jaʼe upéva.

¿MBAʼÉICHAPA JEHOVÁ OIPYTYVÕ UMI OPEKÁVAPE OÑARREPENTI HAG̃UA?

8. ¿Mbaʼépa ojapo raʼe Jehová oipytyvõ hag̃ua Caínpe oñarrepenti hag̃ua? (Génesis 4:​3-7). (Ehecha pe taʼanga).

⁸ Adán ha Eva família ypykue haʼe vaʼekue Caín. Haʼe onaséma vaʼekue pekadór, upévare oitira chupe umi mbaʼe ivaíva. Avei la Biblia heʼi Caín rehe ‘hembiapo vai hague’ (1 Juan 3:12). Oiméne upévare Jehová “ndoguerohorýi Caínpe ni ndoaseptái iñofrénda” haʼe omeʼẽrõ guare chupe peteĩ sakrifísio. Péro Caín okambia rangue, haʼe “ipochyeterei ha hovapuku opytávo”. ¿Mbaʼépa upéi ojapo Jehová? Haʼe oñeʼẽ Caín ndive (elee Génesis 4:​3-7). Jehová mborayhúpe oñemoñeʼẽ Caínpe ha heʼi ovendesitaha chupe okambiáramo. Avei Jehová oavisa Caínpe ikatuha ojapo peteĩ mbaʼe ivaietereíva osegíramo ipochy. Ñambyasýramo jepe, Caín nopenái Jehováre ha ndohejái haʼe oipytyvõ chupe oñarrepenti hag̃ua. Jehová ohecha rire la Caín ojapo vaʼekue, ¿serápa haʼe heʼi upe guive noipytyvõmoʼãveimaha avavépe oñarrepenti hag̃ua? Ni mbaʼevéicharõ.

9. ¿Mbaʼéichapa Jehová oipytyvõ Davídpe oñarrepenti hag̃ua?

 ⁹ Jehová ningo ohayhueterei vaʼekue rréi Davídpe, ha heʼi voi haʼe ‘oguerohoryha chupe’ (Hech. 13:22). Péro David opeka vaieterei vaʼekue, haʼe hekovai ha ojukauka peteĩ kuimbaʼe inoséntepe. Asegún Moisés léi, David omerese vaʼekue ojejuka chupe (Lev. 20:10; Núm. 35:31). Péro Jehová oipytyvõseterei vaʼekue Davídpe oñarrepenti hag̃ua. b Upearã omondo proféta Natánpe ovisita hag̃ua chupe. Hiʼarive upérõ David ndohechaukái gueteri ni michĩmi oñarrepentiha. Proféta Natán oipuru vaʼekue peteĩ ehémplo ohechauka hag̃ua Davídpe la haʼe ojapo vaʼekue ivaieterei hague. Upe ehémplo opokoiterei Davídre ha oipytyvõ chupe oñarrepenti hag̃ua (2 Sam. 12:​1-14). Upéi David oskrivi vaʼekue peteĩ purahéi ohechauka porãitereíva haʼe ombyasy hague ipyʼaite guive la ojapóva (Sal. 51, introduksión). Upe Salmo okonsoláma heta persóna opekávape ha oipytyvõ chupekuéra oñarrepenti hag̃ua. Ajépa javyʼaite Jehová mborayhúpe oipytyvõ haguére Davídpe oñarrepenti hag̃ua.

10. ¿Mbaʼéichapa nde reñeñandu reikuaávo Jehová ipasiénsia ha oporoperdonaseha?

¹⁰ Jehovápe g̃uarã opaichagua pekádo ivaieterei (Sal. 5:​4, 5). Upéicharamo jepe haʼe oikuaa porã enterovéva haʼeha pekadór, ha ñanderayhúgui ñanepytyvõse jalucha hag̃ua pe pekádo kóntrape. Pe hembiapo vaivévape jepe haʼe oipytyvõse oñarrepenti ha oñemoag̃ui jey hag̃ua hese. ¡Ajépa upéva tuicha ñanekonsola! Jahecháma haguéicha Jehová ipasiensiaiterei ñanderehe ha ñaneperdonase. Upéva ñanemomýi jasegi hag̃ua ñandefiél ha pyaʼe ñañarrepenti hag̃ua japeka jave. Jahechamína koʼág̃a mbaʼépa Jesús omboʼe vaʼekue idisipulokuérape.

JESÚS OÑEʼẼ IDISIPULOKUÉRAPE PE ARREPENTIMIÉNTORE

11, 12. ¿Mbaʼe istóriapa Jesús omombeʼu ohechauka hag̃ua Jehová ñaneperdonasetereiha? (Ehecha pe taʼanga).

¹¹ Primer síglope oñekumplíma kuri pe tiémpo pe Mesías og̃uahẽ hag̃ua. Jahecha haguéicha pe artíkulo ohasa vaʼekuépe, Jehová  ojevale vaʼekue Juan el Bautístare ha Jesucrístore omboʼe hag̃ua la héntepe tekotevẽtereiha oñarrepenti (Mat. 3:​1, 2; 4:17).

¹² Jesús oĩrõ guare ko yvy ape ári heʼi vaʼekue Itúa ñaneperdonasetereiha, ha ohechauka haʼe siemprenteha voi upéicha. Jesús omboʼe vaʼekue upéva oñeʼẽrõ guare pe taʼýra ofalla vaʼekuére. Upe mitãkariaʼy odesidi vaʼekue osẽ hógagui, ha un tiémpore ojapo vaʼekue heta mbaʼe vai. Péro upéi haʼe “ohechakuaa ivyroiterei hague” ha oho jey hógape. ¿Mbaʼépa upémarõ ojapo itúa? Jesús heʼi vaʼekue pe túa mombyry guive ohecháma itaʼýra ouha, “ha oiporiahuverekoiterei chupe, upévare odipara hendápe, hatã oañuã itaʼýrape ha ohetũ chupe”. Pe taʼýra ni noĩmoʼãi vaʼekue itúa operdonataha chupe, upévare heʼi itúape ndaikatúipa ombaʼapo chupe g̃uarã isirviénteramo. Pe túa katu ohenói voi itaʼýrape “che raʼymi”, ha ogueraha jey chupe hógape. Pe túa heʼi: ‘Che raʼymi okañy kuri péro ou jey’ (Luc. 15:​11-32). Katuete Jesús oĩrõ guare Itúandi yvágape, ohecháne raʼe mbaʼeichaitépa haʼe oiporiahuvereko hetaiterei pekadór oñarrepentívape. Ko istória tuicha ñanekonsola ha ohechauka mbaʼéichapa ñande Ru Jehová ñandeporiahuvereko.

13, 14. ¿Mbaʼépa apóstol Pedro oaprende vaʼekue ha mbaʼépa upéi omboʼe umi ótrope? (Ehecha pe taʼanga).

¹³ Apóstol Pedro pyʼỹinte ojavy vaʼekue ha Jesús siémpre oĩ operdona hag̃uáicha chupe. Péicha Jesús rupive apóstol Pedro oaprende vaʼekue Jehová operdonakuaaitereiha umi oñarrepentívape. Por ehémplo Pedro oñeñandu vaʼekue yvýre onega rire tres vése voi Jesúspe (Mat. 26:​34, 35, 69-75). Péro Jesús oikove jey rire ojehechauka vaʼekue Pédrope, provávlemente oĩrõ guare haʼeño oñeʼẽ hag̃ua hendive (Luc. 24:​33, 34; 1 Cor. 15:​3-5). Jesús oikuaa vaʼekue Pedro oñarrepentíma hague, upévare oñeʼẽrõ guare hendive ikatu ñaĩ segúro haʼe oasegura hague Pédrope operdonáma hague chupe.

¹⁴ Pedro oikuaa porã vaʼekue mbaʼépa heʼise ñañarrepenti ha mbaʼépa ñañandu ótro ñaneperdona  jave. Upéicha rupi haʼe omboʼe upéva umi héntepe. Por ehémplo pe Pentekostés rire Pedro ojapo peteĩ diskúrso heta judío renondépe. Haʼe oexplika haʼekuéra ojuka hague pe Mesíaspe, péro avei mborayhúpe heʼi chupekuéra: “Peñarrepentíke ha pejevy pende rape vaígui, ikatu hag̃uáicha Jehová operdona pende pekádo ha penemombarete jey” (Hech. 3:​14, 15, 17, 19). Péicha Pedro omboʼe peteĩ oñarrepentíva ojevyha hembiapo vaígui. Péa heʼise okambiaha umi mbaʼe vai opensáva ha ojapóva, ha oñepyrũha ojapo umi mbaʼe ogustáva Ñandejárape. Avei apóstol Pedro ohechauka Jehová ñaneperdonambaiteha, haʼete voi ku ovorrapaitéva umi mbaʼe vai jajapóva. Heta áño upe rire Pedro heʼi vaʼekue avei umi kristiánope: ‘Jehová ipasiénsia penderehe, pórke ndoipotái avave oñehundi, síno oipota enterove oñarrepenti’ (2 Ped. 3:9). Tuicha ñandepyʼaguapy jaikuaávo japeka vaíramo jepe Jehová ikatuha ñaneperdona.

15, 16. a) ¿Mbaʼépa oaprende vaʼekue apóstol Pablo? (1 Timoteo 1:​12-15). b) ¿Mbaʼépa jahecháta pe artíkulo oúvape?

¹⁵ Saulo de Tarso ojapo vaʼekue hetaiterei mbaʼe vai ha tekotevẽ vaʼekue oñarrepenti oñeperdona hag̃ua chupe. Haʼe opersegi mbarete vaʼekue Jesús disipulokuérape. Provávlemente umi kristiáno upe tiémpope opensa vaʼekue Saulo péicha g̃uarãntemaha ha núnka nokambiamoʼãveimaha. Péro Jesús nopensái vaʼekue umi hénte opensaháicha, haʼe ha Itúa ohecha vaʼekue Saulo orekoha heta mbaʼe iporãva. Jesús heʼi vaʼekue hese: “Ko kuimbaʼépe che aiporavóma” (Hech. 9:15). Jesús ojapo vaʼekue voi peteĩ milágro omomýi hag̃ua Sáulope oñarrepenti hag̃ua (Hech. 7:58–8:3; 9:​1-9, 17-20). Upéi Saulo oñarrepenti ha oiko chugui kristiáno ha oñehenóima chupe apóstol Pablo. Haʼe pyʼỹinte oagradese vaʼekue Jehová ha Jesús imbaʼeporã ha oiporiahuvereko haguére chupe (elee 1 Timoteo 1:​12-15). Apóstol Pablo heʼi vaʼekue iñermanokuérape: ‘Ñandejára ivuéno ha ñanepytyvõse ñañarrepenti hag̃ua’ (Rom. 2:4).

¹⁶ Peteĩ vuéltape apóstol Pablo ohendu pe kongregasión de Coríntope oĩ hague peteĩ provléma ndevaipa jepéva. Upépe oñepermiti vaʼekue peteĩ kuimbaʼe hekovaívape osegi kongregasiónpe. ¿Mbaʼépa heʼi vaʼekue apóstol Pablo umi ermánope ojapo hag̃ua? La haʼe heʼi vaʼekue upérõ ñanemboʼe Jehová mborayhúpe okorrehiha isiervokuérape, ha oiporiahuverekoha chupekuéra oñarrepenti jave. Avei ñanemboʼe mbaʼéichapa jaiporiahuvereko vaʼerã Jehová ojapoháicha. Pe artíkulo oúvape jahechavéta mbaʼépa la oiko vaʼekue pe kongregasión de Coríntope.