1, 2. a) ¿Mbaʼépa hína pe pekádo ha mbaʼéichapa ikatu jagerrea ikóntrape? (Ehecha pe nóta “Mbaʼépa heʼise”). b) ¿Mbaʼépa ñaanalisáta ko artíkulope ha umi ótro oĩvape ko Ñemañaháme? (Ehecha “¿Reikuaasépa la jastudiátava?”).

 ¿REIKUAASÉPA mbaʼeichaite pevépa Jehová nderayhu? Eikuaa hag̃ua upéva, tekotevẽ restudia mbaʼépa haʼe ojapóma ndesalva hag̃ua pe pekádo ha ñemanógui. Pe pekádo ningo ñane enemigoite ha ndaikatúi jagerrea ikóntrape ñandejehegui reínte. a Ñambyasýramo jepe japeka káda día ha ñamano pe pekádo káusare (Rom. 5:12). Péro oĩ peteĩ notísia ñanembovyʼaitereíva. Jehová heʼíma katuete ñandesalvataha pe pekádo ha ñemano poguýgui.

² Ojapóma ningo amo 6.000 áñorupi Jehová oipytyvõ hague yvyporakuérape oiko hag̃ua chuguikuéra iñamígo iñimperféktoramo jepe. ¿Mbaʼérepa Jehová ojapo upéva? Pórke haʼe ñanderayhueterei ñandeapo ypy guive. Upévare ñanepytyvõse jagerrea hag̃ua pe pekádo kóntrape. Upearã ojapóma hetaiterei mbaʼe ñanderehehápe. Haʼe oikuaa pe pekádo káusare ñamanoha, péro haʼe ndoipotaiete ñamano, síno oipota jaikove pára siémpre. Upéva la Jehová oipotáva ndéve g̃uarã avei (Rom. 6:23). Ko artíkulope ñaanalisáta mbohapy porandu: 1) ¿Mbaʼéichapa Jehová omeʼẽ esperánsa yvyporakuéra pekadórpe? 2) ¿Mbaʼépa ojapo vaʼekue Ñandejára siervokuéra yma guare Jehová oguerohory hag̃ua chupekuéra? Ha 3) ¿mbaʼéichapa Jesús ñandesalva pe pekádo ha ñemanógui?

 ¿MBAʼÉICHAPA JEHOVÁ OMEʼẼ ESPERÁNSA YVYPORAKUÉRA PEKADÓRPE?

 3. ¿Mbaʼéicha rupípa Adán ha Évagui oiko vaʼekue pekadór?

³ Jehová okreárõ guare pe kuña ha kuimbaʼe ypykuépe oipota vaʼekue oiko vyʼápe. Upévare omeʼẽ chupekuéra peteĩ lugár iporãva oiko hag̃ua, avei omeʼẽ chupekuéra iñirũrã ha peteĩ asignasión ombovyʼátava chupekuéra. Adán ha Eva omyenyhẽ vaʼerã kuri ko yvy ifamiliarégui, ikatu hag̃uáicha oiko ko yvy kompletoitégui peteĩ paraíso iporãva, iporãháicha avei pe hardín de Edén. Péro Ñandejára oproivi chuguikuéra peteĩ mbaʼe isensilloitereíva, hiʼarive Jehová oavisa chupekuéra oúramo naiñeʼẽrendúi omanotaha opeka rupi. Ha jaikuaa la oiko vaʼekue upéi. Peteĩ ánhel iñañáva, ndohayhúiva Ñandejárape ni yvypórape omboliga Adán ha Évape opeka hag̃ua, ha haʼekuéra ojapo pe ánhel aña oipotáva. Haʼekuéra nokonfiái Itúa ohayhuetévare chupekuéra, ha ou naiñeʼẽrendúi ha opeka. ¿Mbaʼépa oiko upémarõ? Oñekumpli la Jehová heʼi vaʼekue, Adán ha Eva naiñeʼẽrendúi rupi osufri oikove aja pukukue. Haʼekuéra oñepyrũ ijeda, hasy ha amo ipahápe omano (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

 4. ¿Mbaʼérepa Jehovápe g̃uarã ivaiete pe pekádo ha mbaʼére ñanepytyvõ jagerrea hag̃ua ikóntrape? (Romanos 8:​20, 21).

⁴ Jehová oñenkarga ojeskrivi hag̃ua la Bíbliape pe oiko vaʼekue hardín de Edénpe, ikatu hag̃uáicha ñantende álgo iñimportánteva. Upéicha rupi jaikuaa mbaʼérepa ivaiete Jehovápe g̃uarã pe pekádo, pórke ñanemomombyry chugui ha pe pekádo káusare ñamano (Is. 59:2). Satanás katu ndochaʼeiete Jehováre ni umi héntere. Upévare koʼág̃a peve ñanemboliga japeka hag̃ua, omboliga haguéicha yma Adán ha Évape. Ikatu oime haʼe opensáma voi osẽ hague ijidéape hardín de Edénpe ombopekárõ guare chupekuéra. Péro Satanás ndoikuaái mbaʼeichaite pevépa Jehová oporohayhu. Koʼág̃a peve Ñandejára oipota oñekumpli ivolunta Adán ha Eva familiarépe g̃uarã. Haʼe ohayhu rupi la héntepe ensegída voi omeʼẽ peteĩ esperánsa enterovépe g̃uarã (elee Romanos 8:​20, 21). Jehová oikuaa vaʼekue Adán ha Eva familiare apytépe oĩtaha umi ohayhútava chupe ha iñeʼẽrendusétava. Upévare Jehová ojapo la oñekotevẽtava haʼekuéra oñemoag̃ui hag̃ua hese, ha ojesalva hag̃ua pekádo ha ñemanógui. ¿Mbaʼépa ojapo vaʼekue Jehová upearã?

 5. ¿Arakaʼépa Jehová primera ves omeʼẽ esperánsa yvyporakuérape g̃uarã? Emyesakã. (Génesis 3:15).

⁵ (Elee Génesis 3:15). Ensegída voi Jehová heʼi oñehunditaha Satanáspe, ha upérõ primera ves omeʼẽ peteĩ esperánsa yvyporakuérape g̃uarã. Ñandejára heʼi vaʼekue pe “kuña familiare” rupive ojesalvataha entéro persónape. Ko kuña familiare kon el tiémpo ohundíta Satanáspe, ha péicha oñesolusionáta entéro provléma haʼe omoñepyrũ vaʼekue hardín de Edénpe (1 Juan 3:8). Péro og̃uahẽ mboyve pe tiémpo, pe kuña familiare osufri vaʼerã kuri, Satanás operhudika vaietereíta kuri chupe omano meve. Jehová ombyasyeterei vaʼekue ohechávo pe kuña familiare ohasa asy ha omano. Péro haʼe oĩ vaʼekue oaguanta hag̃uáicha upéva oikuaágui péicha rupi ojesalvataha heta héntepe.

¿MBAʼÉICHA RUPI JEHOVÁ YMA OGUEROHORY YVYPÓRA IMPERFÉKTOPE?

 6. ¿Mbaʼépa ojapo vaʼekue Ñandejára siervokuéra yma guare oñemoag̃ui hag̃ua Jehováre?

⁶ Ohasávo pe tiémpo Jehová mbeguekatúpe omyesakã mbaʼéichapa yvypóra imperfékto ikatu oñemoag̃ui hese. Adán ha Eva ifamília vaʼekue, pe mokõiha héra vaʼekue Abel. Haʼe ningo pe primera persóna ohechauka vaʼekue ojeroviaha Jehováre oiko rire pe sarambi Edénpe. Abel ohayhueterei vaʼekue Jehovápe, upévare haʼe oipota vaʼekue Ñandejára oguerohory chupe ha oñemoag̃uise hese. ¿Mbaʼépa ojapo upearã? Omeʼẽ peteĩ sakrifísio Jehovápe g̃uarã. Haʼe ningo haʼe vaʼekue pastór, upévare ojagarra unos  kuánto ovecha, okarnea ha omeʼẽ Jehovápe sakrifísioramo. ¿Mbaʼépa Jehová opensa upévare? La Biblia heʼi: “Jehová oguerohory Abélpe ha oasepta iñofrénda” (Gén. 4:4). Kon el tiémpo Noé ha hetave persóna omeʼẽ vaʼekue sakrifísio Jehovápe g̃uarã, ha haʼe oasepta umíva pórke haʼekuéra ohayhu chupe ha ojerovia hese (Gén. 8:​20, 21). Jehová oaseptávo umichagua sakrifísio ohechauka ikatuha oguerohory umi umáno imperféktope, ha ñande ikatuha ñañemoag̃ui hese. b

 7. Abrahán oĩ vaʼekue osakrifika hag̃uáicha itaʼýrape, ¿mbaʼépa ohechauka vaʼekue upéva?

⁷ Abrahán ningo haʼe vaʼekue peteĩ kuimbaʼe ojerovia mbaretéva Jehováre. Peteĩ vuéltape Jehová ojerure chupe álgo ijetuʼuetereíva. Heʼi Abrahánpe omeʼẽ hag̃ua itaʼýra Isaácpe sakrifísioramo. Ndaikatúi ningo ni ñañeimahina mbaʼeichaitépa oiméne hasy asy upéva Abrahánpe, upéicharõ jepe haʼe odesidi vaʼekue iñeʼẽrendutaha Ñandejárape. Upéi Abrahán ojuka potaitéma kuri itaʼýrape péro Jehová upepete ojoko chupe. Upe oiko vaʼekue ñanemboʼe álgo iñimportánteva, pórke ohechauka la Jehová ojapo vaʼekue. Haʼe omeʼẽ Itaʼýra ohayhuetévape sakrifísioramo ohayhuetereígui la héntepe (Gén. 22:​1-18).

 8. Pe léipe ojejerure vaʼekue ojejapo hag̃ua heta sakrifísio, ¿mbaʼépa ñaaprende upévagui? (Levítico 4:​27-29; 17:11).

⁸ Hetaiterei tiémpo upe rire, Moisés léipe oñemanda vaʼekue umi israelítape osakrifika hag̃ua animál ikatu hag̃uáicha oñeperdona ipekadokuéra (elee Levítico 4:​27-29; 17:11). Umi sakrifísio ohechauka kuri Jehová upe rire ojapotaha peteĩ sakrifísio iporãitevéntemava, pórke upe sakrifísio rupive umi hénte ojeietéta pe pekádo poguýgui. Ñandejára ojevale vaʼekue iprofetakuérare oexplika hag̃ua pe kuña familiare, haʼétava hína Ñandejára Raʼy osufri ha omano vaʼerãha. Ojejukáta kuri chupe ojejukaháicha peteĩ ovecha ojesakrifikávape (Is. 53:​1-12). Upéicharõ Jehová opromete vaʼekue omeʼẽtaha Itaʼýra ohayhuetévape sakrifísioramo ikatu hag̃uáicha ojesalva yvypórape pekádo ha ñemanógui. Upéva ningo peteĩ mbaʼe ijojahaʼỹva Jehová ojapo vaʼekue. Aníkena nderesarái avei haʼe ojapo hague upéva nderehehápe.

¿MBAʼÉICHAPA JESÚS ÑANDESALVA PE PEKÁDO HA ÑEMANÓGUI?

 9. ¿Mbaʼépa Juan el Bautista heʼi vaʼekue Jesús rehe? (Hebreos 9:22; 10:​1-4, 12).

⁹ Áño 29-pe Juan el Bautista ohecha Jesús pe Nazarénope, ha heʼi: “¡Pemañami, Ñandejára Ovecha Raʼy, oipeʼáva pe pekádo ko múndogui!” (Juan 1:29). Péicha ojehecha Jesús haʼe hague pe kuña familiare Ñandejára opromete vaʼekue outaha, haʼe omeʼẽta kuri hekove sakrifísioramo. Upérõ guare imbaretevéntema pe esperánsa oñemeʼẽva la héntepe, pórke og̃uahẽma kuri pe kuña familiare oipeʼaitétava yvyporakuérape pe pekádo poguýgui (elee Hebreos 9:22; 10:​1-4, 12).

10. ¿Mbaʼérepa jaʼekuaa Jesús ou hague oipytyvõ hag̃ua umi pekadórpe?

¹⁰ Jesús oipytyvõseterei vaʼekue umi hénte oñeñandúvape yvýre opeka haguére, haʼe oinvita koʼã héntepe oiko hag̃ua chuguikuéra idisípulo. Jesús oikuaa porã vaʼekue pe pekádo káusare la hénte osufrietereiha, upévare oñehaʼã vaʼekue oñemoag̃ui umi hénte hembiapo vaívare. Jesús omoĩ vaʼekue peteĩ ehémplo ha heʼi: ‘Umi hesãiva noikotevẽi doktór, péro umi hasýva si oikotevẽ. Che ndajúi ajerure umi ihústovape oñarrepenti hag̃ua, síno aju ajerure umi pekadórpe toñarrepenti’ (Mat. 9:​12, 13). Ha upevaite la Jesús ojapo vaʼekue. Por ehémplo peteĩ kuña ombojepyhéirõ guare chupe hesaýpe, haʼe oñeʼẽ chupe mborayhúpe ha operdona ipekadokuéra (Luc. 7:​37-50). Avei Jesús omboʼe vaʼekue peteĩ kuña samaritánape heta mbaʼe iñimportantetereíva  oikuaáramo jepe haʼe hekovaiha (Juan 4:​7, 17-19, 25, 26). Ha Ñandejára omeʼẽ vaʼekue Jesúspe podér ipuʼaka hag̃ua pe ñemanóre jepe, haʼéva hína pe provléma ivaivéva oguerúva pe pekádo. ¿Mbaʼéichapa oiko vaʼekue upéva? Jesús omoingove jeýrõ guare umi héntepe, tahaʼe kuña, kuimbaʼe, mitã ha kakuaa (Mat. 11:5).

11. ¿Mbaʼérepa umi hembiapo vaíva oñemoag̃uise vaʼekue Jesús rehe?

¹¹ Ñantende porãiterei mbaʼérepa umi hénte hembiapo vaíva oñemoag̃uise vaʼekue Jesús rehe. Haʼe oiporiahuvereko chupekuéra, ontende isituasión ha upévare haʼekuéra ndokyhyjéi vaʼekue oñeʼẽ hag̃ua Jesús ndive (Luc. 15:​1, 2). Jesús imbaʼeporã hendivekuéra ha ofelisita vaʼekue koʼãichagua persónape ohechauka haguére ojeroviaha hese (Luc. 19:​1-10). Haʼe otrata porãvo umi héntepe ohechauka mbaʼeichaitépa Itúa oiporiahuvereko entérope (Juan 14:9). Jesús heʼíva ha ojapóva rupive jahechakuaa Jehová ohayhuha umi persóna imperféktape, ha ñanepytyvõseha jalucha hag̃ua pe pekádo kóntrape. Yma Jesús oipytyvõ vaʼekue voi umi héntepe okambia hag̃ua oiko hag̃ua chuguikuéra idisípulo (Luc. 5:​27, 28).

12. ¿Mbaʼe mbaʼépa Jesús heʼi vaʼekue oikotaha hese?

¹² Jesús oikuaa vaʼekue la ohaʼarõva chupe, heta vése heʼi vaʼekue idisipulokuérape oñetraisionataha chupe, ha ojejuka hag̃ua ojeklavataha chupe yvyráre (Mat. 17:22; 20:​18, 19). Haʼe oikuaa vaʼekue isakrifísio rupive ojepeʼataha ko múndogui pe pekádo, Juan el Bautista ha heta proféta heʼíma haguéicha. Jesús omboʼe vaʼekue avei haʼe omano rire ‘ombyatytaha opaichagua héntepe ou hag̃ua hendápe’ (Juan 12:32).  Péicha Jehová ikatúta oguerohory umi hénte ojeroviávape Jesúsre ha ojapóva haʼe omandáva. Upéicha rupi umi hénte ikatúta ‘ojei pekádo poguýgui’ (Rom. 6:​14, 18, 22; Juan 8:32). Jesús oikuaáramo jepe omano asyetereitaha, pyʼaguasúpe omeʼẽ hekove ikatu hag̃uáicha ñandesalva (Juan 10:​17, 18).

13. ¿Mbaʼéichapa omano vaʼekue Jesús, ha mbaʼépa ohechauka ñandéve upéva? (Ehecha pe taʼanga).

¹³ Jesúspe otraisiona vaʼekue peteĩva iñamígo, upéi umi ndochaʼéiva hese ojagarra chupe, omaltrata ha oakusa reiete chupe ojapo hague heta mbaʼe vai. Haʼekuéra okondena Jesúspe omano hag̃ua ha heta otortura chupe. Upéi umi soldádo oraha Jesúspe pe omanotahápe ha oklava chupe peteĩ yvyráre omano hag̃ua. Jesús heta ohasa asy ha osufri, péro Jehová ohasa asyvéntema kuri ohechávo umi mbaʼe vaiete ojejapóva Itaʼýrare. Ñande jaikuaa Jehová ohayhuetereiha Jesúspe ha orekoha kuri pe podér osalva hag̃ua Itaʼýrape. ¿Mbaʼére piko upéicharõ ojejoko ha ndosalvái chupe? Haʼe ojapo upéva ñanderayhu rupi. Upévare Jesús heʼi vaʼekue: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre” (Juan 3:16).

14. ¿Mbaʼépa ñanemboʼe Jesús sakrifísio?

¹⁴ Jesús sakrifísio ningo haʼe pe pruéva tuichavéva oaseguraitéva Jehová ohayhuetereiha Adán ha Eva familiarépe. Avei ohechauka mbaʼeichaitépa Jehová nderayhu, haʼe heta ohasa asy ikatu hag̃uáicha nde rejei pe pekádo ha ñemano poguýgui. Jehová ojapo la oñekotevẽva guive ikatu hag̃uáicha nde rejesalva (1 Juan 4:​9, 10). Ndajadudái Jehová oipytyvõseha káda únope jagerrea hag̃ua pe pekádo kóntrape, ha amo ipahápe ñagana hag̃ua.

15. ¿Mbaʼépa jajapo vaʼerã ñañevenefisia hag̃ua Jesús sakrifísiogui?

¹⁵ Ñandejára ikatu operdona ñandéve ñande pekadokuéra omeʼẽ rupi Itaʼýra peteĩete ñanderreskata hag̃ua. Upe sakrifísio ningo peteĩ rregálo iporãitereíva Ñandejára omeʼẽva ñandéve, péro ikatu hag̃uáicha haʼe ñaneperdona tekotevẽ avei jajapo álgo. ¿Mbaʼépa hína upéva? Juan el Bautista ha upéi Jesús avei heʼi vaʼekue: “Peñarrepentíke, pórke pe Rréino yvagapegua hiʼag̃uimbaitéma” (Mat. 3:​1, 2; 4:17). Upéicharõ tekotevẽterei ñañarrepenti ikatu hag̃uáicha Ñandejára ñaneperdona ha ñañemoag̃ui hese. ¿Péro mbaʼépa heʼise ñañarrepenti? ¿Mbaʼéichapa upéva ñanepytyvõ Jehová ñandeguerohory hag̃ua ñaneimperféktorõ jepe? Pe sigiénte artíkulope jahecháta upéva.