1. ¿Mbaʼépa ikatu oiko peteĩ ermáno opekáramo jepe?

 PE ARTÍKULO ohasa vaʼekuépe jahecha mbaʼépa Pablo heʼi vaʼekue pe kongregasión de Coríntope ojapo hag̃ua oĩrõ guare peteĩ opeka vaíva. Upérõ pe ermáno noñarrepentíri kuri, upévare oñeguenohẽ chupe kongregasióngui. Péro ohechaukaháicha pe téxto omopyendáva ko artíkulo, Jehová ikatu oipytyvõ peteĩ pekadórpe oñarrepenti hag̃ua (Rom. 2:4). Upéicharõ, ¿mbaʼéichapa Jehová ojevale umi ansiánore oipytyvõ hag̃ua peteĩ opekávape oñarrepenti hag̃ua?

2, 3. Jaikuaáramo peteĩ ermáno opeka hague, ¿mbaʼépa jajapo vaʼerã, ha mbaʼérepa?

² Umi ansiáno ndoikuaáiramo peteĩ ermáno opeka hague ndaikatumoʼãi oipytyvõ chupe. Upévare ñande jaikuaáramo peteĩ ermáno opeka vai hague, ¿mbaʼépa ikatu jajapo? Ñamokyreʼỹ vaʼerã chupe oho hag̃ua omombeʼu umi ansiánope la oikóva, ikatu hag̃uáicha haʼekuéra oipytyvõ chupe (Is. 1:18; Hech. 20:28; 1 Ped. 5:2).

³ ¿Péro mbaʼépa oikóta pe opeka vaʼekue ndohoséiramo oñeʼẽ ansianokuérandi? Oikórõ upéva ñandete voi jaha vaʼerã ñañeʼẽ ansianokuérandi. Péicha jahechaukáta jahayhuha pe opeka vaʼekuépe, pórke ikatúta oñepytyvõ chupe oĩ porã jey hag̃ua. Pe opekáva osegíramo hembiapo vai ombyaivétantema iñamista Jehovándi. Avei ikatu hína ikáusare oñeñeʼẽ vai kongregasiónre. Upévare ijetuʼúramo jepe, jaha vaʼerã ñañeʼẽ ansianokuérandi pórke jahayhu Jehovápe ha avei pe ermáno térã pe ermána opeka vaʼekuépe (Sal. 27:14).

 ¿MBAʼÉICHAPA ANSIANOKUÉRA OIPYTYVÕ UMI OPEKÁVAPE?

 4. Umi ansiáno oñembyaty jave pe opekávandi, ¿mbaʼépa oñehaʼãmbaite ojapo hikuái?

⁴ Oĩ jave peteĩ opeka vaíva kongregasiónpe, pe kuérpo de ansiáno oiporavo ijapyteguikuéra mbohapy ansiáno ikatupyrývape. Koʼã mbohapy ermáno haʼéta pe komite de ansiáno oñembyatýtava pe opeka vaʼekuéndi. a Koʼã ermáno iñumílde ha oñehaʼãmbaite oipytyvõ pe opekávape oñarrepenti hag̃ua, péro orrekonose avei ndaikatuiha oovliga peteĩ persónape okambia hag̃ua (Deut. 30:19). Umi ansiáno ontende naentéroi oñarrepentitaha rréi David ojapo haguéicha (2 Sam. 12:13). Algúno opekáva ikatu odesidi omboyke pe konsého oúva Jehovágui (Gén. 4:​6-8). Upéicharõ jepe, umi ansiáno oñehaʼãmbaite vaʼerã oipytyvõ pe opekávape oñarrepenti hag̃ua. Péro, ¿mbaʼe rehepa umi ansiáno imanduʼa vaʼerã oñembyaty jave pe persóna opeka vaʼekuéndi?

 5. ¿Mbaʼe konséhopa osegi umi ansiáno oñeʼẽta jave pe opeka vaʼekuéndi? (2 Timoteo 2:​24-26). (Ehecha pe taʼanga).

⁵ Umi ansiáno ohecha pe opeka vaʼekuépe peteĩ ovecha iporãitéva okañy vaʼekuéicha. (Luc. 15:​4, 6). Upévare haʼekuéra oñembyaty jave pe opeka vaʼekuéndi naipyʼahatãi ha naiñeʼẽpohýiri upe persónandi, pórke umi ansiáno ndahaʼéi hína oñembyatýva hendive okumpli hag̃uánte umi instruksión. Upéva rangue haʼekuéra ohechauka ojapoha umi mbaʼe heʼíva 2 Timoteo 2:​24-26-pe (elee). Upe rreuniónpe umi ansiáno oñehaʼãmbaite ipyʼaguapy, imbaʼeporã ha oporotrata porã, pórke haʼekuéra oipytyvõseterei pe opeka vaʼekuépe okambia hag̃ua opensa lája.

 6. ¿Mbaʼéichapa umi ansiáno ojeprepara porã oñembyaty mboyve pe opeka vaʼekuéndi? (Romanos 2:4).

⁶ Umi ansiáno ojeprepara porã osegi hag̃ua Jehová gía. ¿Mbaʼéichapa haʼekuéra ojapo upéva? Haʼekuéra imanduʼa la apóstol Pablo heʼi vaʼekuére: ‘Ñandejára ivuéno ha nepytyvõse reñarrepenti hag̃ua’ (elee Romanos 2:4). Upévare haʼekuéra oñehaʼã osegi Jehová ehémplo otrata porãvo pe opeka vaʼekuépe. Umi ansiáno imanduʼa vaʼerã haʼekuéra haʼeha pastór oĩva Cristo poguýpe (Is. 11:​3, 4; Mat. 18:​18-20). Haʼekuéra oñembyaty mboyve pe opeka vaʼekuéndi oñemboʼe Jehovápe, ikatu hag̃uáicha oipytyvõ hikuái pe opeka vaʼekuépe oñarrepenti hag̃ua. Avei haʼekuéra ostudia la Biblia ha umi puvlikasionkuéra, ha oñemboʼe Jehovápe ontende porã hag̃ua upe persóna situasión. Umi ansiáno oanalisa porã entéro umi mbaʼe oikuaáva upe persónagui ontende porã hag̃ua mbaʼérepa koʼág̃a haʼe opensa opensaháicha, ha  mbaʼépa la ikatu vaʼekue omomýi chupe ojapo hag̃ua peteĩ mbaʼe ivaíva (Prov. 20:5).

7, 8. ¿Mbaʼéichapa umi ansiáno ikatu ohechauka ipasiensiaha Jehová ipasiensiaháicha?

⁷ Umi ansiáno oñehaʼã ipasiénsia Jehová ipasiensiaháicha. Umi ansiáno imanduʼa mbaʼéichapa Jehová yma otrata vaʼekue umi opeka vaʼekuépe. Por ehémplo Jehová ipasiénsia vaʼekue Caín ndive, haʼe oavisa chupe mbaʼépa oikóta nokambiáiramo, péro avei heʼi ovendesitaha chupe iñeʼẽrendúramo (Gén. 4:​6, 7). Avei Jehová omondo vaʼekue iproféta Natánpe oakonseha hag̃ua Davídpe. Natán oipuru vaʼekue peteĩ ehémplo opokóva David korasõre. Ha upéva oipytyvõ vaʼekue chupe oñarrepenti hag̃ua (2 Sam. 12:​1-7). Umi israelita avei naiñeʼẽrendúirõ guare, Jehová osegi omondo hendapekuéra iprofetakuérape ha ojapo voi upéva heta vése (Jer. 7:​24, 25). Jahechaháicha, Jehová nohaʼarõi isiervokuéra oñarrepenti raẽ oipytyvõ hag̃ua chupekuéra. Upéva rangue, haʼekuéra opeka aja gueteri Jehová oipytyvõma chupekuéra oñarrepenti hag̃ua.

⁸ Umi ansiáno osegi Jehová ehémplo oipytyvõta jave peteĩ persóna opeka vaʼekuépe. Ohechaukaháicha 2 Timoteo 4:​2, haʼekuéra ipasiénsia otratáta jave upe persónandi. Upévare umi ansiáno tekotevẽ itrankílo ha ipasiénsia omomýi hag̃ua pe opeka vaʼekuépe ojapo hag̃ua iporãva. Peteĩ ansiáno oñepyrũramo ipochy ha orrenega, ikatu hína pe opekáva nohenduséi pe konsého ha noñarrepentíri.

9, 10. ¿Mbaʼéichapa umi ansiáno ikatu oipytyvõ peteĩ persónape ohechakuaa hag̃ua ivaiha la ojapo vaʼekue?

⁹ Umi ansiáno oñehaʼã ohechakuaa mbaʼe mbaʼépa pe persóna ojapo kuri oikóvo opeka mboyve. Por ehémplo, ¿ikangýpa raʼe ohóvo pórke ndostudiaguasuvéi la Biblia, térã nosẽvéima opredika yma guaréicha? ¿Oñepyrũpa raʼe oñemboʼe saʼive térã noñeʼẽvéima Jehovándi ipyʼaite guive? ¿Ohejápa raʼe oikóvo umi deséo vai odomina chupe? ¿Mávarepa ojeheʼa oikóvo raʼe? ¿Oiporavo porãpa raʼe umi vyʼarã? ¿Mbaʼéichapa koʼã mbaʼe haʼe odesidíva okambia chugui opensa lája ha umi mbaʼe oipotáva? ¿Ohechakuaápa umi mbaʼe ojapo vaʼekue omoñeñandu vaieterei hague Jehovápe?

¹⁰ Umi ansiáno ikatu ojapo umi porandu omopensátava pe opeka vaʼekuépe. Péicha haʼe ohechakuaáta mbaʼéicha rupi iñamista Jehovándi ou ikangy ha opeka. Péro umi ansiáno ombaʼeporandukuaánte vaʼerã. Upearã haʼekuéra siémpre iñamávleta ha noporandumoʼãinte umi mbaʼe natekotevẽiva oikuaa (Prov. 20:5). Natán ojapo haguéicha David ndive, umi ansiáno ikatu oipuru umi ehémplo. Péicha omopensáta pe opeka vaʼekuépe, ha oipytyvõta chupe ontende hag̃ua mbaʼérepa ivai pe ojapo vaʼekue. Pe primera ves oñembyatyhápe hikuái, ikatu hína pe persóna oñepyrũma oñembyasy umi mbaʼe ojapo vaʼekuére, ha ikatu voi hína oñarrepenti.

11. ¿Mbaʼéichapa Jesús otrata vaʼekue umi opekávape?

¹¹ Umi ansiáno oñehaʼãmbaite osegi Jesús ehémplo. Jesús oipytyvõ hag̃ua Saulo de Társope, oporandu vaʼekue chupe: “Saulo, Saulo, ¿mbaʼére piko chepersegi hína?”. Upe porandu rupive Jesús oipytyvõ Páblope ohechakuaa hag̃ua ivaiha la ojapóva oikóvo (Hech. 9:​3-6). Ha kongregasiónpe oĩrõ guare peteĩ kuña ojoguáva Jezabélpe, Jesús heʼi vaʼekue: “Che ameʼẽma chupe tiémpo oñarrepenti hag̃ua” (Apoc. 2:​20, 21).

12, 13. ¿Mbaʼéichapa umi ansiáno ikatu omeʼẽ tiémpo pe opekávape oñarrepenti hag̃ua? (Ehecha pe taʼanga).

¹² Umi ansiáno osegírõ Jesús ehémplo ndojapuramoʼãi opensa hag̃ua pe opekáva noñarrepentimoʼãiha voi. Algúno ningo ikatu oñarrepenti pe primera ves oñembyatyhápema voi ansianokuérandi. Péro oĩ avei ótro oikotevẽvéva tiémpo upearã. Upévare umi ansiáno ikatu  odesidi oñembyatytaha pe opeka vaʼekuéndi mas de una ves. Ikatu ojejapo rire pe primera rreunión hendive, pe persóna opensa porã la ojeʼe vaʼekuére chupe. Ikatu voi ohechauka iñumildeha ha oñemboʼe Jehovápe operdonami hag̃ua chupe (Sl. 32:5; 38:18). Upéi pe ótra rreunión ojejapóvape hendive, ikatu hína ohechaukáma okambiaha ohóvo la opensáva.

¹³ Umi ansiáno oipytyvõ hag̃ua pe opekávape oñarrepenti hag̃ua oñehaʼã ontende chupe ha imbaʼeporã hendive. Haʼekuéra ojerure Jehovápe ovendesimi hag̃ua umi mbaʼe ojapóva hikuái, ha ohaʼarõ pe ermáno tohechakuaa ojavy hague ha oñarrepenti (2 Tim. 2:​25, 26).

14. ¿Mávapa la añetehápe oipytyvõva peteĩ opekávape oñarrepenti hag̃ua, ha mbaʼérepa jaʼe upéva?

¹⁴ Javyʼaiterei ningo peteĩ opekáva oñarrepenti jave (Luc. 15:​7, 10). Oiko jave upéva, ¿mávapepa oñemombaʼeguasu vaʼerã? ¿Umi ansiánope? Nahániri. Pablo heʼi vaʼekue umi opekávare: “Ikatu hína Ñandejára opermiti chupekuéra oñarrepenti” (2 Tim. 2:25). Upéicharõ ndahaʼéi hína peteĩ persóna, síno Jehová la oipytyvõva pe opeka vaʼekuépe okambia hag̃ua opensa lája. Pablo oexplika vaʼekue umi mbaʼe porã oikóva peteĩ opekáva oñarrepenti rire: Pe persóna oikuaa porãve pe añetegua, opensa porã jey ‘ha osẽ pe Diablo ñuhãgui’ (2 Tim. 2:26).

15. ¿Mbaʼéichapa umi ansiáno ikatu osegi oipytyvõ pe oñarrepentívape?

¹⁵ Peteĩ persóna oñarrepentíramo, umi ansiáno osegíta ojapo chupe visíta de pastoréo. ¿Maʼerãpa? Omombarete hag̃ua chupe ikatu hag̃uáicha haʼe osegi ipuʼaka Satanás ñuhãre, ha ‘osegi hag̃ua oguata derechoite pe tape porãre’ (Heb. 12:​12, 13). Jaikuaa ningo umi ansiáno ndoikomoʼãiha omombeʼu entéro umi mbaʼe pe opekáva ojapo vaʼekue, péro ¿mbaʼépa tekotevẽ oikuaa pe kongregasión?

“EKORREHI PE KONGREGASIÓN RENONDÉPE”

16. ¿Mbaʼépa ontendekase raʼe Pablo 1 Timoteo 5:​20-pe?

¹⁶ (Elee 1 Timoteo 5:20). Apóstol Pablo heʼi vaʼekue Timotéope, haʼéva avei ansiáno, ‘okorrehi hag̃ua pe kongregasión renondépe umi opeka memévape’. Upe téxtope oĩ peteĩ  nóta oexplikáva pe palávra “kongregasión” koʼápe heʼiseha ‘umi oĩva kongregasiónpe ha ohecháva upe pekádo’. Upéicharõ Pablo noñeʼẽi vaʼekue pe kongregasión kompletoitére voi, síno haʼe oñeʼẽ umi ohecha vaʼekuére pe pekadór ojapo vaʼekue, térã umi oikuaáva la oikóva pórke pe opekáva voi omombeʼu chupekuéra. Péicha jave umi ansiáno oñeʼẽ sólamente umi oikuaávandi la oiko vaʼekue. Ha oavisa chupekuéra oñeñatendéma hague la kásore ha ojekorrehíma hague pe opeka vaʼekuépe.

17. Oimérõ oĩ heta oikuaáva kongregasiónpe oĩ hague opekáva térã oikuaáta hikuái, ¿mbaʼe anúnsiopa ojejapo vaʼerã, ha mbaʼérepa?

¹⁷ Sapyʼánte hetáma oĩ oikuaáva kongregasiónpe peteĩ ermáno opeka hague, térã upéi ojekuaátante voi hína. Péicha jave pe kongregasión kompletoite ohecha upe pekádo. Upévare umi ansiáno ojapóta peteĩ anúnsio kongregasiónpe, ha heʼíta pe ermáno térã pe ermánape oñesensura hague. ¿Mbaʼérepa? Apóstol Pablo heʼi vaʼekue: “Péicha umi ótro okyhyjéta avei opeka hag̃ua”.

18. Peteĩ menór de eda ojevautisáva oúramo opeka, ¿mbaʼépa ojapo vaʼerã umi ansiáno? (Ehecha pe taʼanga).

¹⁸ ¿Mbaʼépa oikóta peteĩ menór de 18 áño ojevautisáva oúramo opeka vai? Péicha jave pe kuérpo de ansiáno ohecháta mokõi ansiáno oho hag̃ua oñembyaty pe menór de eda ndive, ha hendive oĩ vaʼerã avei ituakuéra haʼéva Testígo. b Umi ansiáno oporandúta umi tuakuérape mbaʼépa haʼekuéra ojapóma oipytyvõ hag̃ua pe menór de edápe oñarrepenti hag̃ua. Ikatu oime pe menór de eda ohendu ituakuéra konsého, ha okambia opensa lája ha umi mbaʼe  ojapóva. Péicha jave umi mokõi ansiáno ikatu odesidi natekotevẽiha peteĩ komite de ansiáno oñembyaty pe menór de eda ndive ha ituakuérandi. Amo ipahápe, Ñandejára omeʼẽ tuakuérape pe rresponsavilida okorrehi hag̃ua ifamiliakuérape (Deut. 6:​6, 7; Prov. 6:20; 22:6; Efe. 6:​2-4). Upe guive umi ansiáno oñeʼẽta jepi umi tuakuérandi ojasegura porã hag̃ua oñepytyvõ porãpa hína upe mitãme. Péro, ¿mbaʼépa oikóta peteĩ menór de eda ojevautisáva noñarrepentírirõ ha osegi hembiapo vai? Péicha jave peteĩ komite de ansiáno oñembyatýta hendive ha ituakuérandi.

‘JEHOVÁ OPOROMBYASY HA OPOROPORIAHUVEREKO’

19. ¿Mbaʼéichapa umi ansiáno oñehaʼã osegi Jehová ehémplo oipytyvõvo umi opekávape?

¹⁹ Umi ansiáno oĩva peteĩ komitépe, oipytyvõ vaʼerã pe kongregasión ipotĩ hag̃ua. Upéva haʼe peteĩ rresponsavilida oguerekóva hikuái Jehová renondépe (1 Cor. 5:7). Péro avei haʼekuéra ojapo ikatúva guive oipytyvõ hag̃ua pe persónape oñarrepenti hag̃ua. Upévare haʼekuéra ipositívo ha opensa pe persóna ikatuha okambia hína. ¿Mbaʼérepa? Haʼekuéra osegi Jehová ehémplo, haʼe ningo ‘oporombyasy ha oporoporiahuvereko’ (Sant. 5:11). Apóstol Juan avei ohechauka vaʼekue otrataha mborayhúpe umi ermáno ha ermánape. Haʼe oskrivi vaʼekue: “Che raʼykuéra pohayhuetéva, askrivi peẽme koʼã mbaʼe ani hag̃ua pepeka. Upéicharõ jepe oĩramo opekáva, jareko peteĩ ajudánte pe Túa renondépe, upéva hína Jesucristo, ha haʼe ihústo hína” (1 Juan 2:1).

20. ¿Mbaʼépa jahecháta pe artíkulo oúvape?

²⁰ Ñambyasýramo jepe sapyʼánte oĩ avei umi noñarrepentíriva. Upéicha jave oñenohẽmante vaʼerã pe persónape kongregasióngui. ¿Mbaʼépa ojapo umi ansiáno oĩ jave peichagua káso ijetuʼúva? Upéva jahecháta pe último artíkulo oĩvape ko rrevístape.