1. ¿Mbaʼépa ikatu ñañeporandu ñapensa jave mbaʼeichaitépa Abrahán ojerovia vaʼekue?

 HETA hénte ningo ohendúmava oñeñeʼẽha Abrahánre, péro la majoría ndoikuaaporãi chupe. Ñande katu si jaikuaa porã Abrahánpe. Por ehémplo jaikuaa ojeʼeha hese “entéro umi ojeroviáva túa” (Rom. 4:11). Upéicharõ jepe ikatu ñañeporandu: “¿Ikatúne piko che ajogua Abrahánpe ha ajerovia che pyʼaite guive Jehováre?”. Javyʼaite jaikuaávo si ikatuha.

2. ¿Mbaʼérepa iñimportánte ñaanalisa Abrahán ehémplo? (Santiago 2:​22, 23).

² ¿Mbaʼéichapa ikatu ñamombarete ñande jerovia Abrahán ojapo haguéicha? Upéva jajapóta jastudiávo iñehémplo. Abrahán siémpre ojapo vaʼekue la ojeruréva chupe Ñandejára ojapo hag̃ua. Por ehémplo, haʼe oheja vaʼekue hóga ha oho mombyry oiko hag̃ua óga kárpape heta áñore, ha hiʼarive oĩ vaʼekue osakrifika hag̃uáicha pe itaʼýra ohayhuetéva Isaácpe. Umi mbaʼe ojapo vaʼekue ohechauka ijerovia mbareteha. Upéva ombovyʼaiterei Jehovápe, ha Abrahángui oiko iñamigoite (elee Santiago 2:​22, 23). Koʼág̃a avei Jehová oipota enterove jaiko iñamígoramo ikatu hag̃uáicha ñandeguerohory. Upévare Jehová ojevale vaʼekue Pablo ha Santiágore oñeʼẽ hag̃ua Abrahán ehémplore. Koʼág̃a ñaanalisami mbaʼépa heʼi Abrahán rehe Romanos kapítulo 4 ha Santiago kapítulo 2. Mokõivéva heʼi vaʼekue álgo iñimportantetereíva Abrahán rehe.

3. ¿Mbaʼe téxto de la Bíbliapa Pablo ha Santiago osita vaʼekue?

³ Pablo ha Santiago osita vaʼekue Génesis 15:​6, upépe heʼi: ‘Abrahán ojerovia Jehováre, ha upévare haʼe heʼi hese ihustoha’.  Jehová heʼíramo peteĩ persónare ihustoha térã ndojapoiha mbaʼeve ivaíva heʼise haʼe oguerohoryha chupe. ¡Ajépa tuichaite mbaʼe Ñandejára ikatu haguére heʼi peteĩ persóna iñimperféktovare ndojapói hague mbaʼeve ivaíva! Katuete ningo ñande avei jaipota Jehová heʼi ñanderehe ñandehustoha, ha ikatu hína jahupyty upéva. Koʼág̃a jahechamíta mbaʼérepa Jehová heʼi vaʼekue Abrahán rehe ihustoha, ha mbaʼépa ñande jajapo vaʼerã ikatu hag̃uáicha haʼe heʼi avei ñanderehe upéicha.

4. ¿Mbaʼérepa ndaikatúi ojeʼénte peteĩ persónare ihustoha?

⁴ Pe kárta oskrivi vaʼekuépe Pablo umi rrománope heʼi vaʼekue enterove persóna pekadorha (Rom. 3:23). Upéicharõ, ¿mbaʼéichapa Ñandejára ikatu ovyʼa ñandereheve ha heʼi ñanderehe ñandehustoha? Pablo oipuru vaʼekue Abrahán ehémplo okontesta hag̃ua upe pregúnta umi kristiánope.

5. ¿Mbaʼérepa Jehová heʼi vaʼekue Abrahán rehe ihustoha? (Romanos 4:​2-4).

⁵ Jehová heʼíma vaʼekue Abrahán rehe ihustoha oikórõ guare Canaánpe. ¿Mbaʼérepa? Ndeʼíri vaʼekue hese upéicha okumpli haguére Moisés léi. ¿Mbaʼérepa jaikuaa upéva? (Rom. 4:13). Pórke pe léi oñemeʼẽ vaʼekue umi israelítape mas de 400 áño Ñandejára heʼi rire Abrahán rehe ihustoha. ¿Mbaʼérepa upéicharõ Jehová heʼi rakaʼe hese ihustoha? Jehová imbaʼeporãiterei vaʼekue Abrahán ndive ha heʼi hese ihustoha pórke Abrahán ojerovia hese (elee Romanos 4:​2-4).

6. ¿Mbaʼérepa Jehová ikatu heʼi ihustoha peteĩ pekadór rehe?

⁶ Pablo heʼi peteĩ persóna ojeroviáramo Ñandejárare ikatuha ojeʼe hese ihustoha (Rom. 4:5). Upéi Pablo heʼive: “Peteĩ persóna nokumplíriramo jepe entéro umi léi oĩhaichaite, Ñandejára heʼi hese ihustoha, ha pe persóna ovyʼaiterei. David oñeʼẽ vaʼekue voi peichagua persónare. Haʼe heʼi: ‘Ovyʼa umi persóna ojeheja reívape hembiapo vai, ha oñeperdonáva chupekuéra ipekádo. Ovyʼa pe persóna opeka vaʼekue péro Jehová ndogueraháiva enkuénta ipekádo’” (Rom. 4:​6-8; Sal. 32:​1, 2). Peteĩ persóna ojeroviáramo Ñandejárare, haʼe operdona térã oheja rei ipekadokuéra, ha ndoguerahavéima enkuénta umi mbaʼe vai ojapo vaʼekue. Henondépe haʼe ihústo, pórke ojerovia hese.

7. ¿Mbaʼérepa ikatu jaʼe Jehová siervokuéra yma guare ihústo hague?

⁷ Ojeʼéramo jepe ihustoha Abrahán, David ha umi ótro Ñandejára siervokuéra ifiélvare, iñimperfékto vaʼekue hikuái. Péro ojerovia rupi Ñandejárare haʼe ohecha chupekuéra ihústovaramo, koʼýte okomparáramo chupekuéra umi ndojeroviáivare hese (Efes. 2:12). Pe kárta oskrivi vaʼekuépe umi rrománope, Pablo oexplika porã vaʼekue tekotevẽha jajerovia Ñandejárare jaiko hag̃ua iñamígoramo. Por ehémplo Abrahán ha David haʼe vaʼekue Ñandejára amígo, pórke haʼekuéra ojerovia hese. Ñandehegui avei ikatu oiko Ñandejára amígo jajerovia rupi hese.

8, 9. ¿Mbaʼépa oĩ heʼíva Santiago ha Pablo oskrivi vaʼekuére, ha mbaʼérepa ikatu jaʼe ojavyha hikuái?

⁸ Hetaiterei áñorema oĩ umi omoakãva umi rrelihión heʼíva jajeroviánte vaʼerãha ha ovalemaha. Ótro katu heʼi iñimportanteveha umi mbaʼe jajapóva. Oĩ umi líder rrelihióso omboʼéva enterove ojeroviáva guive Jesús rehe ojesalvataha, oiméne ehendúma ojeʼeha: “Ejerovia Jesús rehe ha ejesalváta”. Oĩ voi umi heʼíva Pablo omboʼe hague upéva pórke  haʼe heʼi: “Peteĩ persóna nokumplíriramo jepe entéro umi léi oĩhaichaite, Ñandejára heʼi hese ihustoha” (Rom. 4:6). Péro oĩ umi heʼíva ikatuha jajesalva javisitáramo umi lugár sagrádo pe iglésiape g̃uarã ha jajapóramo heta mbaʼe porã. Haʼekuéra omensiona voi Santiago 2:24 heʼíva: “Peẽ pehechakuaa ojeʼeha peteĩ kuimbaʼére ihustoha umi mbaʼe porã ojapóvare, ha ndahaʼéi ojerovia haguérente”.

⁹ Oñepensa rupi diferentepa, oĩ umi expérto heʼíva Pablo ha Santiago oñokontradesi hague heʼírõ guare mbaʼépa ojapo vaʼerã peteĩ persóna Ñandejára oguerohory hag̃ua chupe. Oĩ umi profesór rrelihióso heʼíva Pablo opensa hague peteĩ persóna ojeroviánte vaʼerãha, péro Santiago katu heʼi hague peteĩ persóna ojapónte vaʼerãha heta mbaʼe iporãva. Peteĩva umi profesór heʼi vaʼekue Santiago nontendéi hague mbaʼérepa Pablo heʼi peteĩ persóna ojeroviánte vaʼerãha ha noĩri hague de akuérdo Páblondi la heʼívape. Péro ñande jaikuaa Jehová oskrivika hague Pablo ha Santiágope la heʼi vaʼekue hikuái (2 Tim. 3:16). Upéicharõ ndahaʼéi vaʼerã la ikomplikadoitereíva ñantende hag̃ua. Tekotevẽnte jahecha mbaʼépa oskrivive vaʼekue hikuái, ikatu hag̃uáicha ñantende porã la heʼise vaʼekue hikuái.

10. ¿Mbaʼe rehepa prinsipálmente oñeʼẽ vaʼekue Pablo? (Romanos 3:​21, 28). (Ehecha pe taʼanga).

¹⁰ ¿Mbaʼe rehepa Pablo oñeʼẽ vaʼekue Romanos 3 ha 4-pe? Haʼe oñeʼẽ vaʼekue prinsipálmente umi mbaʼe ojapóvare ‘umi okumplíva pe léi’, upéva hína pe léi oñemeʼẽ vaʼekue Moiséspe sérro Sinaípe (elee Romanos 3:​21, 28). Amalisia Pablo tiémpope oĩ vaʼekue umi kristiáno judío opensáva osegi vaʼerãha okumpli Moisés léi. Upévare Pablo oipuru Abrahán ehémplo ohechauka hag̃ua peteĩ  persóna natekotevẽiha okumpli pe léi ikatu hag̃uáicha Ñandejára heʼi hese ihustoha. Pablo heʼi upéva rangue tekotevẽha jajerovia. Upéva ningo ñanemokyreʼỹeterei, pórke ñanemboʼe jajeroviáramo Ñandejárare ha Jesucrístore, Ñandejára ikatuha ñandeguerohory.

11. ¿Mbaʼe rehepa oñeʼẽ vaʼekue Santiago?

¹¹ Péro Santiago kapítulo 2-pe noñeñeʼẽi hína umi mbaʼe ojejapo vaʼerãre oñekumpli hag̃ua Moisés léi, síno Santiago oñeʼẽ umi mbaʼe porã ojapo vaʼerãre umi kristianokuéra káda día. Umi mbaʼe ojapóva umi kristiáno ohechauka hína ojeroviápa Ñandejárare ipyʼaite guive térãpa nahániri. Ñaanalisamína koʼág̃a mokõi ehémplo Santiago oipuru vaʼekue.

12. ¿Mbaʼépa heʼi vaʼekue Santiago ohechauka hag̃ua tekotevẽha jajapo umi mbaʼe iporãva? (Ehecha pe taʼanga).

¹² Pe primer ehémplope Santiago heʼi umi kristianokuéra tekotevẽha otrata enterovépe peteĩchante. Haʼe oñeʼẽ peteĩ persóna otrata porãvare peteĩ irríkovape péro odespresia peteĩ imboriahúvape. Santiago heʼi vaʼekue upeichagua persóna heʼíramo jepe ojeroviaha Ñandejárare, umi mbaʼe ojapóvare ohechauka ndaupeichaiha (Sant. 2:​1-5, 9). Pe segundo ehémplope Santiago oñeʼẽ peteĩ persóna ohechávare iñermánope ndorekoiha ijaorã ni hembiʼurã, péro ndojapói mbaʼeve oipytyvõ hag̃ua chupe. Upe persóna heʼíramo jepe ojeroviaha Ñandejárare umi mbaʼe ojapóvare ohechauka ndaupeichaiha. Santiago heʼi vaʼekue voi: “Ndajajapóiramo umi mbaʼe porã ñande jerovia omanóta” (Sant. 2:​14-17).

13. ¿Mbaʼe ehémplopa omoĩ vaʼekue Santiago ohechauka hag̃ua tekotevẽha jajerovia ha jajapo iporãva? (Santiago 2:​25, 26).

¹³ Santiago oñeʼẽ vaʼekue Rahab ehémplore. Rahab ohechauka vaʼekue ojeroviaha  Ñandejárare umi mbaʼe ojapóva rupive (elee Santiago 2:​25, 26). Haʼe ohendu vaʼekue umi mbaʼe Jehová ojapóva ha ohechakuaa Ñandejára oipytyvõ hague umi israelítape (Jos. 2:​9-11). Umi mbaʼe ojapóva rupive Rahab ohechauka ojeroviaha Ñandejárare. Ijerovia mbarete rupi haʼe oprotehe umi mokõi espía israelítape ani hag̃ua ojejuka chupekuéra. Upéicha rupi Rahab iñimperfékta ha ndahaʼéiramo jepe israelita ojeʼe vaʼekue hese ihustaha ojeʼe haguéicha avei Abrahán rehe. Rahab ehémplo ñanemboʼe iñimportanteha jahechauka umi mbaʼe jajapóva rupive jajeroviaha Ñandejárare.

14. ¿Mbaʼérepa ikatu jaʼe Pablo ha Santiago noñokontradesíri hague?

¹⁴ Pablo ha Santiago oñeʼẽnte kuri de diferénte fórma ñande jeroviáre ha umi mbaʼe jajapóvare. Pablo heʼi vaʼekue umi kristiáno judíope Jehová núnka ndoguerohorymoʼãiha chupekuéra ojapo haguérente Moisés léi heʼíva. Santiago katu heʼi vaʼekue tekotevẽha umi kristianokuéra ohechauka ojeroviaha umi mbaʼe ojapóva rupive ótro rehehápe.

15. ¿Mbaʼe mbaʼépa ikatu jajapo jahechauka hag̃ua jajeroviaha Ñandejárare? (Ehecha pe taʼanga).

¹⁵ Jehová ndeʼíri jajapo vaʼerãha entéro mbaʼe Abrahán ojapo hagueichaite jaipotáramo haʼe heʼi ñanderehe ñandehustoha. Añetehápe ikatu jajapo heta mbaʼe jahechauka hag̃ua jajeroviaha Ñandejárare. Por ehémplo jarresivi porã umi ipyahúvape kongregasiónpe, ñaipytyvõ ñane ermáno ha ermanakuéra oikotevẽvape ha jajapo iporãva ñane família rehehápe. Entéro koʼã mbaʼe ningo Ñandejára oguerohory ha ovendesíta (Rom. 15:7; 1 Tim. 5:​4, 8; 1 Juan 3:18). Avei japredikáramo kyreʼỹme, jajapóta hína peteĩ mbaʼe iñimportantetereíva  jahechauka hag̃ua jajeroviaha (1 Tim. 4:16). Umi mbaʼe jajapóva rupive ikatu jahechauka jajeroviaha Jehová promesakuéra oñekumplitaha ha la haʼe heʼíva siémpre iporãveha. Ha jajapóramo upéicha, ikatu ñaĩ segúro Ñandejára heʼitaha ñanderehe ñandehustoha ha ñande haʼeha iñamígo.

16. ¿Mbaʼe esperánsapa oreko vaʼekue Abrahán ha mbaʼe rehepa ojerovia vaʼekue?

¹⁶ Romanos kapítulo 4 ñanemboʼe avei peteĩ mbaʼe iñimportánteva Abahángui. Upe kapítulope ñaaprende iñimportanteha jajerovia oñekumplitaha umi mbaʼe ñahaʼarõva. Jehová opromete vaʼekue Abrahángui osẽtaha “hetaiterei nasión” ha haʼe rupive oñevendesitaha chupekuéra. ¡Ajépa iporãite la Abrahán esperánsa! (Gén. 12:3; 15:5; 17:4; Rom. 4:17). Péro Abrahán orekórõ guare 100 áño ha Sara 90 neʼĩrante ifamília hikuái. Upéva oiméne ijetuʼuete rakaʼe Abrahánpe, pórke haʼetévaicha núnka ndaikatumoʼãiva ifamília hikuái. Péro “Abrahán ohaʼarõkuaa ha ojerovia hetaiterei nasión outaha chugui” (Rom. 4:​18, 19). Tiémpo rire oñekumpli la Abrahán ohaʼarõite vaʼekue ha onase itaʼýra Isaac (Rom. 4:​20-22).

17. ¿Mbaʼérepa jaikuaa Ñandejára ikatuha heʼi ñanderehe ñandehustoha ha haʼeha iñamígo?

¹⁷ Ñandéve avei Ñandejára ikatu ñandeguerohory ha ikatu heʼi ñanderehe ñandehustoha ha haʼeha iñamígo. Pablo heʼi vaʼekue voi upéva oskrivírõ guare: “Ndahaʼéi Abrahán rehehápente la ojeskrivíva Ñandejára Ñeʼẽme: ‘Upéicha rupi ojeʼe hese ihustoha’. Síno ojeskrivi avei ñanderehehápe. Ñandejára heʼi avei ñanderehe ñandehustoha pórke jajerovia hese. Haʼe hína upe omopuʼã vaʼekue ñande Ruvicha Jesúspe omanóva apytégui” (Rom. 4:​23, 24). Abrahán ojapo haguéicha, ñande avei tekotevẽ jajerovia Jehováre, jajapo umi mbaʼe iporãva ha jareko la esperánsa Jehová katuete okumplitaha umi mbaʼe opromete vaʼekue. Upéi Pablo osegi oñeʼẽ ñane esperánsare Romanos kapítulo 5-pe, upéva ñaanalisáta pe sigiénte artíkulope.