1. ¿Mbaʼépa jajapo vaʼerã oiko hag̃ua ñandehegui kristiáno ijerovia mbaretéva?

 TUICHA ñañesorprende jahechávo mbaʼéichapa pyaʼe okakuaa umi mitã ha upéi ikuñataĩma ha ikariaʼýma. Haʼete voi natekotevẽiva ojapo mbaʼeve okakuaa hag̃ua. Péro oiko hag̃ua ñandehegui peteĩ kristiáno ijerovia mbaretéva, jajapómante vaʼerã ñande párte, upéva ndoikói péicha reínte (1 Cor. 13:11; Heb. 6:1). b Jajeroviave hag̃ua Ñandejárare tekotevẽ ñamombarete ñane amista Jehovándi, ha ñaikotevẽ avei ijespíritu sántore. Avei ñañehaʼã vaʼerã jareko umi kualida porã, ñaaprende umi mbaʼe ideprovéchotava ñandéve ha jajeprepara ñakumpli porã hag̃ua umi rresponsavilida ikatúva jareko amo gotyove (Prov. 1:5).

2. ¿Mbaʼépa ñaaprende la heʼívagui Génesis 1:​27, ha mbaʼépa ñaanalisáta ko artíkulope?

² Jehová ojapo vaʼekue yvyporakuérape kuña ha kuimbaʼe (elee Génesis 1:27). Jaikuaa porãiterei ningo kuña ha kuimbaʼe idiferenteha ipíntape, péro hetave mbaʼépe idiferénte ojuehegui. Jehová ojapo vaʼekue kuña ha kuimbaʼépe okumpli hag̃ua umi rresponsavilida okorrespondéva káda únope. Upéicha rupi, mokõivévante oikotevẽ umi kualida oipytyvõtava chupe okumpli hag̃ua upe rresponsavilida, ha tekotevẽ avei oñembokatupyry upearã (Gén. 2:18). Ko artíkulope jahecháta mbaʼépa ikatu ojapo peteĩ ermána imitãva ikuñataĩvo ohóvo oiko hag̃ua chugui peteĩ kristiána ijerovia mbaretéva. Ha pe ótro artíkulope jahecháta mbaʼépa ikatu ojapo umi ermáno imitãva.

3, 4. ¿Moõpa ikatu otopa ehémplo porã umi ermána imitãva? (Ehecha pe taʼanga).

³ La Bíbliape oñeñeʼẽ heta kuña oheja vaʼekuére ehémplo iporãitereíva. Haʼekuéra ohayhu vaʼekue Jehovápe ha iñeʼẽrendu chupe (ehecha jw.org-pe pe artíkulo hérava “¿Qué aprendemos de las mujeres de la Biblia?”). Haʼekuéra ‘ojejokokuaa vaʼekue entéro mbaʼépe ha ohechauka vaʼekue ijerovia entéro mbaʼe ojapóvape’, heʼiháicha pe téxto omopyendáva ko artíkulo. Umi ermána imitãva ikatu avei otopa ikongregasiónpe voi ehémplo porã. Umi mitãkuña ikatu oaprende heta mbaʼe umi kristiána ijerovia mbaretévagui ohayhu añetéva Jehovápe.

⁴ Mitãkuñanguéra, pepensamína unas kuánta ermána omoĩvare ehémplo porã peẽme. Peñatendemína ilájare ha mbaʼe kualida porãpa oreko hikuái. Upéi pekalkula mbaʼéichapa peẽ ikatu pejogua chupekuéra. Umi párrafo oúvape jahecháta mbohapy kualida tekotevẽtereíva oreko peteĩ kristiána.

5. ¿Mbaʼérepa peteĩ ermána ijerovia mbaretéva tekotevẽterei iñumílde?

⁵ Oiko hag̃ua ñandehegui peteĩ kristiáno ijerovia mbaretéva tekotevẽ ñaneumílde. Peteĩ ermána iñumílderamo oĩ porãta Jehovándi ha ojogueraha porãta hapichándi (Sant. 4:6). Por ehémplo peteĩ ermána ohayhúramo Jehovápe iñumíldeta ha odesidíta ojegia la heʼívare 1 Corintios 11:​3-pe. Upépe Jehová oexplika mávapepa omeʼẽ la rresponsavilida omoakãvo pe kongregasión ha pe família. c

6. ¿Mbaʼe ehémplo porãpa oheja Rebeca mitãkuñanguérape g̃uarã?

⁶ Jahechamína Rebeca ehémplo. Haʼe iñarandu ha idesidída vaʼekue, haʼe oikuaa vaʼekue mbaʼe moméntopepa ha mbaʼépa la ojapo vaʼerã (Gén. 24:58; 27:​5-17). Péro Rebeca opororrespeta ha naiprovlémai vaʼekue ojapo hag̃ua la ojeʼéva chupe (Gén. 24:​17, 18, 65). Mitãkuñanguéra, peẽ avei ikatu pesegi Rebeca ehémplo ha pehechauka peneumildeha. Péicha peapojáta umi Jehová omoĩvape oporodirihi hag̃ua  ha pemoĩta ehémplo porã pene famíliape ha kongregasiónpe.

7. ¿Mbaʼéichapa mitãkuñanguéra ikatu osegi Ester ehémplo?

⁷ Enterove kristiáno ijerovia mbaretéva tekotevẽ ohechakuaa umi mbaʼe ndaikatúiva ojapo. La Biblia ningo heʼi voi ‘umi orrekonoséva la ndaikatúiva ojapo iñaranduha’ (Prov. 11:​2, nóta). Jahechamína Ester ehémplo. Oikóramo jepe chugui rréina, haʼe orrekonose vaʼekue la ndaikatúiva ojapo ha noñemombaʼeguasúi. Haʼe ohechauka vaʼekue upéva ohendu ha osegírõ guare pe konsého omeʼẽva chupe iprímo Mardoqueo (Est. 2:​10, 20, 22). Ester ningo omoĩ ehémplo iporãitereíva mitãkuñanguérape g̃uarã. Peẽ avei ikatu perrekonose la ndaikatúiva pejapo pejerurévo konsého ótrope ha pejegiávo upévare (Tito 2:​3-5).

8. Heʼiháicha 1 Timoteo 2:​9, 10, ¿mbaʼépa oipytyvõta peteĩ ermánape odesidíta jave mbaʼéichapa oñemondéta?

⁸ Ester ohechauka vaʼekue avei orrespetaha ótro opensáva. Haʼe ningo “imólde porãiterei vaʼekue ha iporãiterei voi”. Upéicharõ jepe ndoikói vaʼekue ojapo mbaʼeve oñemaña hag̃ua hesénte voi (Est. 2:​7, 15). ¿Mbaʼéichapa Ester ehémplo ikatu oipytyvõ ermanakuérape? Por ehémplo, 1 Timoteo 2:​9, 10 omombeʼu mbaʼépa ikatu ojapo ermanakuéra (elee). Koʼápe apóstol Pablo heʼi vaʼekue ermanakuérape oñemonde lája ohechauka vaʼerãha orrespetaha Ñandejárape. Pe palávra griega pe apóstol oipuru vaʼekue ko téxtope heʼise avei umi kuñanguéra siémpre oñemonde porã vaʼerãha ha ohechauka vaʼerã hikuái orrespetaha umi ótrope. ¡Ajépa ñamombaʼete ñane ermanakuérape oñemonde rupi hekoitépe!

9. ¿Mbaʼépa ñanemboʼe Abigaíl ehémplo?

⁹ Entéro ermána ijerovia mbaretéva tekotevẽ avei iñentendída. ¿Mbaʼépa heʼise upéva? Upéva heʼise odiferensiakuaa vaʼerãha mbaʼépa iporã ha ivai ha odesidi vaʼerãha pe iporãva. Jahechamína Abigaíl ehémplo. Iména odesidi vaʼekue álgo ivaíva ha upéva tuicha operhudikáta kuri entéro hogayguápe. Abigaíl iñentendída rupi ensegída voi odesidi ojapo iporãva, ha péicha osalva hetaiterei héntepe (1 Sam. 25:​14-23, 32-35). Peteĩ ermána iñentendídava ohechakuaáta avei mbaʼe moméntopepa oñeʼẽ vaʼerã ha mbaʼe moméntopepa okirirĩ vaʼerã. Avei oñeinteresáta ótrore oporopytyvõ hag̃ua, péro oñatendéta ani hag̃ua iñentremetída (1 Tes. 4:11).

10, 11. ¿Mbaʼéichapa ideprovéchota ndéve ha avei ótrope eskrivi ha eleekuaáramo? (Ehecha pe taʼanga).

¹⁰ Umi ermána tekotevẽ avei oaprende umi mbaʼe ideprovéchotava chupe. Heta mbaʼe umi ermána oaprendéva imitã aja, oipytyvõ chupe upéi oikove aja pukukue. Jahechamína unos kuánto ehémplo.

¹¹ Peñeha’ã peskrivi ha peleekuaa hag̃ua.  Heta paíspe oñepensa naiñimportanteiha kuñanguéra oaprende oskrivi ha oleekuaa hag̃ua. Péro añetehápe peteĩ kristiáno oaprendémante vaʼerã umi mbaʼe (1 Tim. 4:13). d Upévare, mitãkuñanguéra aníkena peheja mbaʼeve pendejoko peaprende hag̃ua koʼã mbaʼe. ¿Mbaʼéichapa upéva penepytyvõta? Ikatúta pekonsegi pende travahorã, avei pestudia ha pemboʼekuaáta la Biblia. Ha iñimportanteveha katu peñemoag̃uíta Ñandejárare, pórke ikatúta pelee ha pejepyʼamongeta la Biblia heʼívare (Jos. 1:8; 1 Tim. 4:15).

12. ¿Mbaʼépa ñanemboʼe Proverbios 31:26?

¹² Peaprende peñemongetakuaa hag̃ua pende rapichándi. Entéro kristiáno tekotevẽ oaprende upéva. Santiago omeʼẽ vaʼekue peteĩ konsého iporãitereíva. Haʼe heʼi: “Enterovéva oĩ vaʼerã preparádo ohendu hag̃ua, péro ndojapurái vaʼerã oñeʼẽ” hag̃ua (Sant. 1:19). Mitãkuñanguéra, pejapysaka porãrõ ótro oñeʼẽ aja pehechaukáta ‘peñemoĩha pende rapicha lugárpe’ (1 Ped. 3:8). Ha oimérõ napentendeporãi mbaʼépa álgien heʼise térã oñandu, peporandukuaánte vaʼerã chupe ha upéi pepensa porã raẽ peñeʼẽ mboyve (Prov. 15:28). Káda uno oñeporandu vaʼerã: “¿Siértopa la haʼéva ha oporomokyreʼỹtapa? ¿Ahechaukátapa apororrespeta ha chembaʼeporãha?”. Ou porãitereíta ningo peẽme pesegíramo pe ehémplo omoĩva umi ermána ojapysakakuaáva ha oñeʼẽva mborayhúpe (elee Proverbios 31:26). Peñatende porã mbaʼéichapa oñeʼẽ koʼã ermána ha mbaʼépa heʼi hikuái. Amedída ke peñemongetakuaa pende rapichándi, ifasilvéta peẽme pejogueraha porã hag̃ua hendivekuéra.

13. ¿Mbaʼéichapa ikatu peaprende umi tembiapo ogapypegua? (Ehecha pe taʼanga).

¹³ Peaprende pejapokuaa hag̃ua umi tembiapo ogapypegua. Heta lugárpe umi kuña oñenkarga umi tembiapo ogapypeguáre. Pende sy térã ótra ermána ikatupyrýva ikatu penepytyvõ pejapokuaa hag̃ua koʼã traváho. Peteĩ ermána hérava Cindy omombeʼu: “Aaprende vaʼekue che sýgui mbaʼeichaitépa ikatu javyʼa ñambaʼapo jejopýrõ. Che sy chemboʼe vaʼekue ikatu hag̃uáicha akosinakuaa, amopotĩkuaa, ajapo ha ambovyvykuaa hag̃ua la ao, ha avei mbaʼéichapa aipuru porã vaʼerã che pláta ambaʼejogua jave. Koʼã mbaʼe ideprovécho chéve ha chepytyvõ aservi porãve hag̃ua Jehovápe. Mama chemboʼe vaʼekue avei chembaʼeporã hag̃ua arresivívo ótrope ógape, ha upéicha rupi aju aikuaa heta ermáno omoĩvape ehémplo porã ikatúva asegi” (Prov. 31:​15, 21, 22). Peteĩ vendisión tuichaitereíva umi família ha kongregasiónpe g̃uarã umi ermána iguápa ha imbaʼeporãva oaprendéva ojapo umi tembiapo ogapypegua (Prov. 31:​13, 17, 27; Hech. 16:15).

14. ¿Mbaʼépa peaprende Crystal experiénsiagui, ha mbaʼépa penepytyvõta peservive hag̃ua Jehovápe?

¹⁴ Peaprende la penepytyvõtava peñemantene  hag̃ua pendejupe. Iñimportánte entéro kristiáno oaprende mbaʼéichapa ikatu oñemantene ijupe ha oñekontenta hag̃ua la orekomívare (Filip. 4:11). Peteĩ ermána hérava Crystal omombeʼu: “Che sy ha che túa chepytyvõ vaʼekue adesidi hag̃ua mbaʼe kúrsopa asegíta umi último áño de koléhiope. Papa chemokyreʼỹ vaʼekue ajagarra hag̃ua umi kúrso de kontavilida ha upéva tuichaiterei chepytyvõ”. Iporã peaprende umi mbaʼe penepytyvõtava pekonsegi hag̃ua peteĩ traváho. Péro peñehaʼã vaʼerã avei peaprende peipurukuaa hag̃ua pende pláta ha péicha ndapeikomoʼãi pegastave la peganávagui (Prov. 31:​16, 18). Pevyʼáramo peiko sensillomi haguére ha ndapeikéirõ déudape, ikatúta peservive Jehovápe (1 Tim. 6:8).

15, 16. ¿Mbaʼérepa ñamombaʼete umi ermána soltérape? (Marcos 10:​29, 30).

¹⁵ Peñehaʼãramo pereko umi kualida porã ha peaprende umi mbaʼe ideprovéchotava peẽme, penepytyvõta pekumpli porã hag̃ua umi rresponsavilida ikatúva pereko amo gotyove. Jahechamína unas kuánta kósa ikatúva pejapo.

¹⁶ Ikatu pepyta soltéra un tiémpore. Jesús heʼi haguéicha oĩ umi odesidíva nomendái, oñemboligáramo jepe chupekuéra ipaíspe omenda hag̃ua (Mat. 19:​10-12). Avei oĩ opytáva soltéro oñepresenta rupi diferénte situasión. Ikatu peĩ segúro Jehová ha Jesús ndoapoʼiriha umi nomendáivape. Ko múndo tuichakuére oĩ umi ermána soltéra tuichaiterei oipytyvõva umi kongregasiónpe. Koʼã ermána oporohayhu ha oñeinteresa ótrore, upéicha rupi hetápe g̃uarã haʼekuéra haʼetévaicha voi iñermána térã isy tee (elee Marcos 10:​29, 30; 1 Tim. 5:2).

17. ¿Mbaʼépa ikatu ojapo peteĩ ermána imitãva oñepyrũséva oservi de tiémpo kompléto?

¹⁷ Ikatu peservi de tiémpo kompléto. La majoría opredikáva ko múndo tuichakuére haʼe hína ñane ermanakuéra (Sal. 68:11). ¿Ikatúpa nde avei reservi de tiémpo kompléto? Ermanakuéra, peẽ ikatu peservi de prekursóra, pembaʼapo konstruksiónpe térã Betélpe. Peñemboʼékena umi mbaʼe pehupytysévare Jehová servísiope. Peñeʼẽ umi oservívandi de tiémpo kompléto ha pehecha mbaʼépa pejapo vaʼerã peñepyrũ hag̃ua peservi de tiémpo kompléto. Upéi pekalkula mbaʼépa pejapóta pehóvo koʼág̃ama guive pehupyty hag̃ua umi mbaʼe peipotáva. Peñepyrũrõ peservi de tiémpo kompléto oñepresentáta peẽme hetave oportunida pejapo hag̃ua umi mbaʼe ijojahaʼỹva Jehová servísiope.

18. ¿Mbaʼérepa peteĩ ermána oiporavo porã vaʼerã imenarã? (Ehecha pe taʼanga).

 ¹⁸ Ikatu pedesidi pemenda. Entéro umi mbaʼe jahecháma vaʼekue penepytyvõta oiko hag̃ua pendehegui peteĩ tembireko ikatupyrýva. Oiméramo pemendase peiporavo porã vaʼerã pene menarã. Upéva peteĩ desisión iñimportantetereíva hína, pórke ani penderesarái peñemoĩtaha pene ména poguýpe pemenda rire (Rom. 7:2; Efes. 5:​23, 33). Upévare tekotevẽterei peñeporandu koʼã mbaʼe: “¿Ko ermánopa ijerovia mbarete? ¿Omotenonde memépa Jehová servísio? ¿Ohechaukápa iñaranduha umi mbaʼe odesidívape? ¿Orrekonosépa ofalla jave? ¿Omombaʼépa kuñanguérape? ¿Chepytyvõtapa añemoag̃uive hag̃ua Jehováre? ¿Ikatútapa omoĩ chéve umi mbaʼe aikotevẽva? ¿Oikótapa chugui che amigoite cheapojátava siémpre? ¿Okumpli porãpa umi rresponsavilida orekóva? Por ehémplo, ¿mbaʼe rresponsavilidápa oreko kongregasiónpe ha mbaʼéichapa okumpli umíva?” (Luc. 16:10; 1 Tim. 5:8). Ermanakuéra, pereko vaʼerã enkuénta peẽ petopasérõ peteĩ ména penemoirũ porãtava, peẽ voi pejeprepara vaʼerã oiko hag̃ua pendehegui peteĩ tembireko ikatupyrýva.

19. ¿Mbaʼérepa jaʼekuaa ndojeapoʼiriha pe tembirekópe ojeʼévo hese oipytyvõ vaʼerãha iménape?

¹⁹ La Biblia heʼi peteĩ tembireko ‘omoirũha iménape ha oipytyvõha chupe’ (Gén. 2:18). ¿Oapoʼípa la Biblia kuñanguérape heʼívo pe tembireko haʼeha iména ajudánte? Nahániri. Pe rresponsavilida oñemeʼẽva tembirekokuérape ohechauka ojevaloraitereiha chupekuéra. La Biblia ningo heʼi Jehováre voi oipytyvõha ótrope (Sal. 54:4; Heb. 13:6). Pe tembireko ohechauka oipytyvõ porãha iménape oapojávo chupe osẽ porã hag̃ua umi mbaʼe iména odesidi vaʼekue ifamília rehehápe. Ohayhu rupi Jehovápe, pe tembireko ojapo ikatúva guive ótro ohecha hag̃ua umi mbaʼe porã ojapóva iména (Prov. 31:​11, 12; 1 Tim. 3:11). Koʼág̃ama voi ikatu pejeprepara pemoirũ porã hag̃ua pene ménape ág̃a pemenda vove. Upearã tekotevẽ pehayhuve Jehovápe ha pejepokuaa peporopytyvõ pene famíliape ha kongregasiónpe.

20. ¿Mbaʼeichaitépa peteĩ sy ikatu oipytyvõ ifamíliape?

²⁰ Ikatu peju penememby. Pemenda rire ikatu hína penefamília pene ménandi (Sal. 127:3). Upévare, iporãta pepensáramo mbaʼépa ojapo vaʼerã peteĩ sy ikatupyrýva. Entéro umi mbaʼe jahecha vaʼekue ko artíkulope penepytyvõta pemendáramo ha pejúramo penememby. Peporohayhu, penembaʼeporã ha penepasiénsiaramo, peipytyvõta pene famíliape oiko hag̃ua vyʼápe ha umi mitã oñeñandúta segúro porã ha ndodudamoʼãi ojehayhuha chupekuéra (Prov. 24:3).

21. ¿Mbaʼérepa ñamombaʼete umi ermanakuérape? (Ehecha pe taʼanga oĩva ko rrevísta apére).

²¹ Ermanakuéra, aníkena peduda, entéro pene ermanokuéra penderayhueterei umi mbaʼe pejapóvare Jehová ha ipuévlo rehehápe (Heb. 6:10). Peẽ ningo peñehaʼãmbaite pereko umi kualida porã, peaprende umi mbaʼe ideprovéchotava peẽme ha umi ótrope, ha pejeprepara pekumpli porã hag̃ua umi rresponsavilida ikatúva pereko amo gotyove. ¡Peẽ ningo pendevaliosaiterei Jehová organisasiónpe g̃uarã!