1. ¿Mbaʼépa ojapo vaʼerã peteĩ ermáno osẽ porã hag̃ua?

 RRÉI David heʼi vaʼekue Salomónpe: “Rehechauka vaʼerã nembarete ha ndepyʼaguasuha” (1 Rey. 2:​1-3). Entéro ermáno ningo ojapo porãta osegíramo ko konsého. Upearã iñeʼẽrendu vaʼerã hikuái Ñandejára léipe ha osegi umi konsého oĩva la Bíbliape entéro mbaʼe ojapóvape (Luc. 2:52). ¿Mbaʼérepa iñimportantete mitãrusukuéra oñehaʼãmbaite oiko hag̃ua chuguikuéra kristiáno ijerovia mbaretéva?

2, 3. ¿Mbaʼérepa peteĩ ermánope g̃uarã iñimportánte oiko chugui peteĩ kristiáno ijerovia mbaretéva?

² Peteĩ kuimbaʼe ningo oreko rresponsavilida iñimportantetereíva ifamíliandi ha kongregasiónpe. Peẽ mitãrusukuéra oiméne peikuaáma umi rresponsavilida ikatúva pereko amo gotyove. Ikatu oime peipota oiko pendehegui prekursór rregulár, siérvo ministeriál ha kon el tiémpo ansiáno. Avei oiméne pemendase ha penefamiliase (Efes. 6:4; 1 Tim. 3:1). Pehupyty hag̃ua koʼã mbaʼe ha pesẽ porã hag̃ua tekotevẽ oiko pendehegui peteĩ kristiáno ijerovia mbaretéva. b

³ ¿Mbaʼépa ikatu penepytyvõ oiko hag̃ua pendehegui kristiáno ijerovia mbaretéva? Upearã iñimportánte peaprende umi mbaʼe ideprovéchotava peẽme ha peñembokatupyry pejapokuaa hag̃ua umíva. ¿Mbaʼéichapa pejepreparakuaa pekumpli hag̃ua umi rresponsavilida ikatúva pereko amo gotyove?

4. ¿Moõpa petopáta ehémplo porã ikatúva pesegi? (Ehecha pe taʼanga).

⁴ Peelehíkena umi ehémplo porã pesegi hag̃ua. La Bíbliape henyhẽ umi ehémplo porã mitãrusukuéra ikatúva osegi.  Umi kuimbaʼe yma guare ohayhu vaʼekue Ñandejárape ha oreko umi rresponsavilida tuicháva okumpli vaʼerã pe puévlondi. Petopáta avei umi ehémplo iporãva pene famíliape voi ha kongregasiónpe (Heb. 13:7). Ha pereko Jesús ehémplo iporãitéva (1 Ped. 2:21). Pestudiakuévo koʼã kuimbaʼe ehémplo pepensa umi kualida porã oreko vaʼekuére ha pendegustavévare (Heb. 12:​1, 2). Upéi pehecha mbaʼéichapa pesegíta iñehemplokuéra.

5. ¿Mbaʼéichapa ikatu peaprende pepensa porã hag̃ua la pejapótavare, ha mbaʼérepa iñimportánte upéva? (Salmo 119:9).

⁵ Peñehaʼãkena ‘pepensa porã’ (Prov. 3:21). Pe kuimbaʼe opensa porãva ningo ndaipyʼaʼapurádoi odesidi hag̃ua peteĩ mbaʼe. Upévare pejepokuaa vaʼerã pepensa porã pedesidi mboyve álgo ha pesegi pejapo upéicha. ¿Mbaʼérepa? Pórke la majoría umi mitãrusu ko múndope oiko iñakãre ha odesidíta jave álgo oheja odomina chupekuéra la oñandúva (Prov. 7:7; 29:11). Avei umi mbaʼe ojehecháva télepe, pelíkula, Internet ha umi rred sosiálpe ikatu okambia pendehegui pepensa lája ha umi mbaʼe pejapóva. ¿Péro mbaʼéichapa ikatu peaprende pepensa porã hag̃ua la pejapótavare? Primero peaprende la Bíbliape mbaʼéichapa Jehová opensa ha mbaʼépa haʼe oñandu. Upéi pejepyʼamongeta mbaʼérepa iporãve pejapo la haʼe heʼíva. Upe rire peipuru umi mbaʼe peaprende vaʼekue pedesidi hag̃ua umi mbaʼe ogustátava Jehovápe (elee Salmo 119:9). Pejepokuaárõ pepensa porã, penepytyvõta oiko hag̃ua pendehegui kristiáno ijerovia mbaretéva (Prov. 2:​11, 12; Heb. 5:14). Jahechamína koʼág̃a mbaʼéichapa ideprovéchota peẽme pepensa porãrõ la pejapótavare koʼã mokõi kásope: 1) Mbaʼéichapa petrata ermanakuérape, 2) pedesidi jave mbaʼéichapa peñemondéta.

6. ¿Mbaʼéichapa peteĩ ermáno opensa porãva ohechauka orrespetaha ermanakuérape?

⁶ Pepensáramo Jehová opensaháicha perrespetáta umi kuñanguérape. Por ehémplo peteĩ ermáno imitãva ikatu oime ojegusta peteĩ ermánare ha legálmente ndaivaíri upéva. Péro oimérõ pe ermáno nopensái hína omendávo pe ermánare ndeʼimoʼãi, ndojapomoʼãi ni ndoskrivimoʼãi mbaʼeve pe ermánape omopensátava chupe haʼe ojegustaha hese. Péicha pe ermáno ohechaukáta opensa porãha  la ojapótavare (1 Tim. 5:​1, 2). Oiméramo reĩ de nóvio peteĩ ermánandi, siémpre eñatende vaʼerã oĩ hag̃ua penendive peteĩ persóna rresponsávle. Péicha rejapóramo avave noñeʼẽvaimoʼãi pe ermánare (1 Cor. 6:18).

7. ¿Mbaʼéichapa peteĩ mitãrusu oñemonde ha oikytĩka lája iñakãrangue ohechauka opensa porãha pe ojapótavare?

⁷ Peteĩ mitãrusu oaprendémava opensa Jehová ojapoháicha, ojekuaa oñemonde lájare ha oikytĩka lájare iñakãrangue. Pyʼỹinte umi persóna ojapóva umi ao ha omopropagándava umíva, ndorrespetái Jehovápe ha hekokyʼa avei. Upéicha rupi umi ao ojapóva hikuái ijahustadoiterei ha omondéramo peteĩ kuimbaʼe omopínta kuña chupe. Peteĩ mitãrusu ijerovia mbaretéva odesidíta jave mbaʼéichapa oñemondéta oreko vaʼerã enkuénta mbaʼépa heʼi la Biblia ha avei umi ehémplo porã oĩva kongregasiónpe. Iporãta avei oñeporandúramo hikuái: “¿Ohechaukápa umi ao aiporavóva apensa porãha umi mbaʼe ajapóvare ha arrespetaha che rapichápe? ¿Ndahasýipa umi ótrope ohechakuaa hag̃ua pe añemonde lájare aserviha hína Ñandejárape?” (1 Cor. 10:​31-33; Tito 2:6). Katuete ningo umi ermáno ha ermána, ha avei Jehová omombaʼéta pe mitãrusu opensa porãvape umi mbaʼe ojapótavare.

8. ¿Mbaʼépa ikatu ojapo peteĩ mitãrusu oiko hag̃ua chugui peteĩ persóna de konfiánsa?

⁸ Oiko vaʼerã pendehegui persóna de konfiánsa. Peteĩ mitãrusu de konfiánsa okumpli porã entéro umi rresponsavilida orekóva (Luc. 16:10). Jahechamína Jesús ehémplo porãite. Haʼe ningo irresponsávle vaʼekue ha okumpli porã itraváho. Jesús ojapo vaʼekue entéro mbaʼe Itúa ojerure vaʼekue chupe, sapyʼánte ijetuʼúramo jepe. Haʼe ohayhu vaʼekue umi héntepe, koʼýte idisipulokuérape ha omano vaʼekue voi hesehapekuéra (Juan 13:1). Peẽ avei mitãrusukuéra ikatu pesegi Jesús ehémplo. Upearã tekotevẽ pembaʼapo jejopy pekumpli porã hag̃ua oimeraẽ asignasión oñemeʼẽva peẽme. Oiméramo ndapeikuaaporãi mbaʼéichapa pejapo vaʼerã peteĩ traváho, peneumíldekena ha pejerure ajúda umi ermáno ijerovia mbaretévape. Aníkena pendekaigue ha upévare pejapo tekotevẽkueténte (Rom. 12:11). Upéva rangue pekumpli porã pene asignasión “peserviramoguáicha Jehovápe ha ndahaʼéi kuimbaʼekuérape” (Col. 3:23). Péro penemanduʼa vaʼerã pejavytanteha voi, upévare peneumíldekena ha perrekonose pejavy jave (Prov. 11:2).

9. ¿Mbaʼérepa peteĩ ermáno imitãva tekotevẽ oaprende umi mbaʼe ideprovéchotava chupe?

⁹ Oiko hag̃ua pendehegui kristiáno ijerovia mbaretéva, tekotevẽ avei peaprende umi mbaʼe ideprovéchotava peẽme. Péicha ikatúta oñemeʼẽ peẽme rresponsavilida kongregasiónpe. Avei pekonsegíta pende travahorã ikatu hag̃uáicha peñemantene pendejupe térã pene famíliape, ha pejogueraha porãta ótrondi. Jahechamína koʼág̃a umi mbaʼe iñimportánteva ikatúva peaprende.

10, 11. ¿Mbaʼéichapa oipytyvõta peteĩ ermáno imitãvape oaprendéramo oskrivi ha oleekuaa hag̃ua? (Salmo 1:​1-3). (Ehecha pe taʼanga).

 ¹⁰ Peaprende peskrivi ha peleekuaa hag̃ua. La Biblia heʼi peteĩ kuimbaʼe ovyʼa ha oho porãva hese oleeha Ñandejára Ñeʼẽ ha ojepyʼamongetaha hese káda día (elee Salmo 1:​1-3). Peleéramo la Biblia káda día peikuaáta mbaʼéichapa Jehová opensa ha upéva penepytyvõta pepensa porã hag̃ua la pejapótavare ha peipurukuaa hag̃ua la Biblia heʼíva (Prov. 1:​3, 4). Kongregasiónpe oñekotevẽterei koʼãichagua ermánore. ¿Mbaʼérepa?

¹¹ Umi ermáno ha ermána kongregasionpegua ojerure jepi ajúda umi ermáno ivalévape oporomboʼe ha omeʼẽ hag̃ua konsého oñenohẽva la Bíbliagui (Tito 1:9). Peẽ peskrivi ha peleekuaaáramo ikatúta peprepara porã umi diskúrso ha komentário ideprovéchotava ermanokuérape ha omombaretétava ijerovia. Avei ikatúta peanota umi mbaʼe iñimportánteva pestudia jave ha pehendu jave umi diskúrso rreunionhápe ha asambleahápe. Umi mbaʼe peanotáva penepytyvõta pendejerovia mbareteve hag̃ua ha pemokyreʼỹ hag̃ua ótrope.

12. ¿Mbaʼépa oipytyvõta umi mitãrusukuérape oñemongetakuaa hag̃ua?

¹² Peaprende peñemongetakuaa hag̃ua pende rapichándi. Tekotevẽterei umi ermáno oaprende oñemongetakuaa hag̃ua ótrondi. Upéva heʼise oporohendukuaa vaʼerãha ha ontende vaʼerãha ótro opensáva ha oñandúva (Prov. 20:5). Peteĩ ermáno opillakuaa vaʼerã mbaʼéichapa oñeñandu peteĩ persóna oñeʼẽ lájare, hováre ha ihéstore. Koʼã mbaʼe ningo peaprendéta sólamente pehasárõ tiémpo la héntendi. Pejepokuaaitereírõ peipuru umi aparáto elektróniko peñekomunika hag̃ua ótrondi, upéi ijetuʼuvéta peẽme peñemongeta hag̃ua en persóna pende rapichándi. Upévare pehekákena oportunida peñemongeta hag̃ua pende rapichándi peipuruʼỹre umi aparáto elektróniko (2 Juan 12).

13. ¿Mbaʼépa tekotevẽ oaprende avei umi mitãrusu? (1 Timoteo 5:8). (Ehecha pe taʼanga).

¹³ Peaprende la penepytyvõtava peñemantene hag̃ua pendejupe. Peteĩ kuimbaʼe ijerovia mbaretéva oñemantenekuaa vaʼerã ijupe ha ifamíliape (elee 1 Timoteo 5:8). Heta paíspe umi mitãrusu oaprende iprofesionrã itúagui térã ótro ipariéntegui. Ótro paíspe katu umi último áño oĩ aja koléhiope umi mitãrusu oaprende peteĩ profesión térã ojapokuaa hag̃ua ótro traváho. Tahaʼe haʼeháicha, iñimportanteterei peaprende pejapokuaa hag̃ua álgo ikatu hag̃uáicha petopa pende travahorã (Hech. 18:​2, 3; 20:34; Efes. 4:28). Peñehaʼãkena pembaʼapo jejopy ha petermina umi traváho pemoñepyrũva. Umi hénte katuete ohechakuaáta upéva ha opensa porãta penderehe. Pendeguáporamo  ifasilvéta peẽme pekonsegi hag̃ua pende travahorã ha ndapeperdereimoʼãi pende traváho. Entéro umi mbaʼe jahechámava ko artíkulope oipytyvõta umi mitãrusúpe okumpli porã hag̃ua umi rresponsavilida ikatúva oreko amo gotyove. ¿Mbaʼépa hína umíva?

14. ¿Mbaʼéichapa peteĩ mitãrusu ikatu ojeprepara oservi hag̃ua de tiémpo kompléto?

¹⁴ Ikatu peservi de tiémpo kompléto. Heta ermáno ijerovia mbaretéva oñepyrũ vaʼekue iservísio de tiémpo kompléto imitãrõ guare. Pe prekursorádo oipytyvõ umi mitãrusúpe ojogueraha porã hag̃ua opaichagua persónandi. Pe mitãrusu ojapóva iprekursorádo oaprendéta avei oipurukuaa hag̃ua ipláta ha ndoikomoʼãi ogastave la orekóvagui (Filip. 4:​11-13). Peñepyrũ hag̃ua pende servísio de tiémpo kompléto ikatu pejapo prekursorádo auxiliár. Heta oĩ ojapóva iprekursorádo auxiliár peteĩ tiémpore ha upéi oĩma preparádo ojapo hag̃ua iprekursorádo rregulár. Pejapóramo péicha, upéi ikatu oñepresenta peẽme hetave oportunida peservi hag̃ua de tiémpo kompléto. Por ehémplo pembaʼapo hag̃ua konstruksiónpe térã Betélpe.

15, 16. ¿Mbaʼépa ojapo vaʼerã peteĩ ermáno imitãva oiko hag̃ua chugui siérvo ministeriál térã ansiáno?

¹⁵ Ikatu peservi de siérvo ministeriál térã ansiáno. Entéro ermáno oñehaʼã vaʼerã okumpli umi rrekisíto oiko hag̃ua chugui ansiáno. La Biblia heʼi peteĩ kuimbaʼe ‘oñehaʼãmbaitéramo oservi ansiánoramo, ojaposeha peteĩ mbaʼe iporãva’ (1 Tim. 3:1). Peteĩ ermánope oñenombra mboyve ansiáno, oservi vaʼerã de siérvo ministeriál kongregasiónpe. Umi siérvo ministeriál oipytyvõ umi ansiánope heta hendáicha. Umi ansiáno ha siérvo ministeriál ningo iñumílde, haʼekuéra oipytyvõ umi ermánope ha kyreʼỹme opredika. Umi ermáno imitãva okumplíva umi rrekisíto ikatu oservi de siérvo ministeriál orekóramo jepe éntre 17 ha 19 áñonte. Ha peteĩ siérvo ministeriál ikatupyrýva ikatúma oñenombra ansiáno orekóramo jepe 20 áñonte.

¹⁶ La Biblia omombeʼu umi rrekisíto tekotevẽva pekumpli peservi hag̃ua de siérvo ministeriál térã ansiáno. Peñehaʼã vaʼerã pekumpli umi rrekisíto pehayhúgui Jehovápe, pene famíliape ha kongregasiónpe (1 Tim. 3:​1-13; Tito 1:​6-9; 1 Ped. 5:​2, 3). Peprokura pentende porã káda rrekisíto ha peñemboʼe Jehovápe ikatu hag̃uáicha pekumpli umíva. c

17. ¿Mbaʼéichapa ojepreparáta peteĩ mitãrusu omendárõ g̃uarã omoakã porã hag̃ua hogapy? (Ehecha pe taʼanga).

¹⁷ Pemendárõ pemoakã vaʼerã pende rogapy. Jesús heʼi haguéicha, oĩ umi ermáno ijerovia  mbaretéva opytánteva soltéro (Mat. 19:12). Péro pedesidíramo pemenda hetavéta pene rresponsavilida, pórke perekótama pene rembireko ha pemoakã vaʼerã pende rogapy (1 Cor. 11:3). Jehová oipota umi ména ohayhu hembirekópe, omoĩ chupe umi mbaʼe oikotevẽva, oapoja chupe iñamigoitéramo ha oipytyvõ hembirekópe oñemoag̃ui hag̃ua Jehováre (Efes. 5:​28, 29). Ko artíkulope jahecháma umi ermáno tekotevẽha siémpre opensa porã la ojapótavare, omombaʼe kuñanguérape ha oiko vaʼerãha chugui peteĩ persóna de konfiánsa. Entéro koʼã mbaʼe ideprovéchota peẽme pemendárõ g̃uarã. Penepytyvõta pekumpli hag̃ua umi mbaʼe oñehaʼarõva peteĩ ménagui ha pemoakã porãta pende rogapy.

18. ¿Mbaʼéichapa ikatu ojeprepara peteĩ mitãrusu ág̃a oúramo g̃uarã ifamília?

¹⁸ Ikatu peju penefamília. Pemendáramo ikatu upéi penefamília hína. Jehová ningo peteĩ ehémplo iporãitereíva tuakuérape g̃uarã ha heta mbaʼe ikatu peaprende chugui (Efes. 6:4). Por ehémplo Jehová naiprovlémai vaʼekue heʼi hag̃ua ohayhuha Itaʼýra Jesúspe ha oguerohoryha chupe (Mat. 3:17). Upévare pejúramo penefamília, peje memékena chupekuéra pehayhuha ha pyʼỹi pefelisita chupekuéra umi mbaʼe porã ojapóvare. Umi túa osegíva Jehová ehémplo oipytyvõ ifamíliape oiko hag̃ua chuguikuéra kristiáno ijerovia mbaretéva. Peẽ ikatu koʼág̃ama voi pejeprepara. ¿Mbaʼéichapa? Pekuida porã ótrore kongregasiónpe, pene hentekuérare ha pejepokuaa peje chupekuéra pehayhuha ha pemombaʼeha (Juan 15:9). Pejapóramo koʼã mbaʼe pekumpli porãta pene rresponsavilida pejúramo pemenda ha penefamília. Ha koʼág̃a penemitã aja pendedeprovechoitereíta Jehovápe, pene hentekuérape ha avei kongregasiónpe.

19, 20. ¿Mbaʼépa oipytyvõta umi mitãrusúpe oiko hag̃ua chuguikuéra kristiáno ijerovia mbaretéva? (Ehecha pe taʼanga oĩva ko rrevísta apére).

¹⁹ Mitãrusukuéra, ndoikomoʼãi pendehegui péicha reínte kristiáno ijerovia mbaretéva. Tekotevẽterei peiporavo ehémplo porã pesegi hag̃ua, pepensa porã la pejapótavare ha oiko vaʼerã pendehegui peteĩ persóna de konfiánsa. Avei peaprende vaʼerã umi mbaʼe ideprovéchotava peẽme ha pejeprepara pekumpli hag̃ua umi rresponsavilida ikatúva pereko amo gotyove.

²⁰ Pepensávo entéro umi mbaʼe tekotevẽváre pejapo ikatu peñandu hetaitereimaha peẽme g̃uarã. Péro katuete ningo pesẽ porãta. Penemanduʼákena Jehová penepytyvõsetereiha (Is. 41:​10, 13). Avei umi ermáno ha ermána kongregasionpegua pendeapojáta. Pehecháta mbaʼeichaitépa pevyʼáta oiko vove pendehegui peteĩ kristiáno ijerovia mbaretéva Jehová oipotaháicha. Mitãrusukuéra, aníkena penderesarái entéro ermanokuéra penderayhuetereiha. Hiʼãite ningo Jehová penevendesi peñehaʼã aja oiko hag̃ua pendehegui kristiáno ijerovia mbaretéva (Prov. 22:4).