¿Releépa raʼe umi rrevísta Ñemañaha osẽ vaʼekue ko áñope? Ehechamína ikatúpa nemanduʼa koʼã mbaʼére:

¿Mbaʼépa heʼise ñakambia vaʼerãha la “ñapensa lája”? (Rom. 12:2).

Ndeʼiséi ovalemaha jajapónte umi mbaʼe iporãva, umi kámbio ñañepyrũ vaʼerã jajapo ñande pyʼapýgui voi. Upévare tekotevẽ ñanesinséro porã, ha jahecha mbaʼépa ñapensa ha ñañandu. Japilláramo oĩha álgo noĩporãiva, pyaʼe ñakambiaite vaʼerã jajoguave hag̃ua Jehovápe (w23.01, páh. 8, 9).

¿Mbaʼéichapa ikatu jasegi ñapensa porã jahecha jave umi mbaʼe oikóva ko múndope?

Ñande jaikuaase mbaʼéichapa umi mbaʼe oikóva ko múndope okumpli umi profesía oĩva la Bíbliape. Péro ndajaʼeséi umi mbaʼe ñandénte ñapensáva, pórke ikatu ogueru joavy kongregasiónpe. Upéva rangue ñañeʼẽ umi informasión ipyahuvéva Jehová organisasión oguenohẽ vaʼekuére (1 Cor. 1:10) (w23.02, páh. 16).

¿Mbaʼépepa idiferénte Jesús vautísmo umi isegidór vautísmogui?

Jesús natekotevẽi vaʼekue oñemeʼẽ Jehovápe peteĩ ñemboʼe rupive, pórke onaséma voi peteĩ nasión oñemeʼẽmavape Ñandejárape. Natekotevẽi vaʼekue oñarrepenti opeka haguére, pórke haʼe perfékto vaʼekue (w23.03, páh. 5).

¿Mbaʼépa ikatu jajapo ótro okomenta hag̃ua rreunionhápe?

Ikatu ñakomenta mbykymi, péicha oĩvéta tiémpo umi ótro okomenta hag̃ua. Avei natekotevẽi ñañeʼẽ heta idéare hemby hag̃ua álgo pe párrafogui ótro ikatúva okomenta (w23.04, páh. 23).

¿Mbaʼépa pe “Tape Sagrádo” oñeʼẽha Isaías 35:8?

Ñepyrũrã haʼe pe tape oipuru vaʼekue umi judío oho hag̃ua Babilóniagui ivállepe. ¿Mbaʼépa upe tape koʼág̃a? Heta áño 1919 mboyve ojepreparáma vaʼekue upe tape, por ehémplo ojetradusi ha oñeimprimi umi Biblia ha ojejapo hetave mbaʼe. Ko tape opermiti ñandéve jaadora Jehovápe ñane ermanokuérandi pyʼaguapýpe ha en unida. Amo gotyove katu jahupytýta umi vendisión oguerútava pe Rréino (w23.05, páh. 15-19).

¿Mbaʼe rehepa oñeʼẽ Proverbios kapítulo 9?

Proverbios oñeʼẽ mokõi kuñáre. Peteĩva “pe kuña naiñarandúiva”, ha umi oaseptáva iñinvitasión “oho opyta pe Sepultúrape”. Pe ótro kuña katu orrepresenta pe “arandu”, ha jaaseptáramo iñinvitasión ‘jaguatáta pe tape ñanepytyvõtavare ñaneentendído’ ha jaikove hag̃ua (Prov. 9:​1, 6, 13, 18) (w23.06, páh. 22-24).

¿Mbaʼéichapa Jehová iñumílde ha noñemohatãi vaʼekue haʼe heʼívape otratárõ guare Lot ndive?

Jehová omanda vaʼekue Lótpe osẽvo Sodómagui oho hag̃ua okañy umi montañaháre. Péro Lot ojerure asy Jehovápe opermiti hag̃ua chupe oho Zóarpe ha Jehová omeʼẽ Lótpe la ojerure vaʼekue (w23.07, páh. 21).

¿Mbaʼépa ikatu ojapo peteĩ tembireko iména ohecháramo pornografía?

Pe tembireko ndojekulpái vaʼerã. Tekotevẽ omombarete iñamista Jehovándi ha ojepyʼamongeta unas kuánta istória oĩvare la Bíbliape. Pype oñeñeʼẽ umi kuña yma guarére osufrieterei vaʼekue, péro otopáva konsuélo oñemoag̃uívo Jehováre. Pe tembireko ikatu oipytyvõ iménape ojei hag̃ua umi situasión ipeligrósovagui chupe g̃uarã (w23.08, páh. 14-17).

Oñeporandúrõ ñandéve álgo jagueroviávare, ¿mbaʼéichapa ñanearandúrõ ñakontestáta pyʼaguapýpe porãnte?

Ñapensa rangue pe persóna okritikase térã ojodiskutisenteha, jaaprovecha vaʼerã pe oportunida jaikuaa hag̃ua mbaʼépa iñimportánte chupe g̃uarã. Upéva ñanepytyvõta ñakontesta hag̃ua pyʼaguapýpe porãnte (w23.09, páh. 17).

María oheka vaʼekue ajúda ipyʼaguasu hag̃ua, ¿mbaʼépa ñanemboʼe iñehémplo?

Oikuaárõ guare imemby haʼetaha pe Mesías, María oheka ajúda. Ánhel Gabriel ha Elisabet omokyreʼỹ vaʼekue chupe Ñandejára Ñeʼẽ heʼíva rupive. Ñande avei jaheja vaʼerã ñanepytyvõ umi ermanokuéra (w23.10, páh. 15).

¿Mbaʼéichapa ikatu Jehová okontesta ñane ñemboʼe?

Haʼe opromete ohendutaha ñane ñemboʼe ha orekotaha enkuénta ivolunta ñanerendu jave (Jer. 29:12). Haʼe ikatu okontesta diferénte hendáicha péro siémpre ñanepytyvõta (w23.11, páh. 21, 22).

Romanos 5:​2-pe oñeñeʼẽma pe esperánsare, ¿mbaʼérepa oñeñeʼẽ jey upévare versíkulo 4-pe?

Peteĩ persóna ohendúvo umi notísia porã ikatu oñepyrũ oreko pe esperánsa oikóvo ko yvy ape ári peteĩ paraísope. Péro oaguantávo umi situasión ijetuʼúva ha oñandúvo Jehová oguerohoryha chupe, ojeroviavétantema iñesperánsare (w23.12, páh. 12, 13).