1. ¿Mbaʼe ijetuʼúvapa tekotevẽ jajapo káda día?

 KÁDA día ningo tekotevẽ jadesidi hetaiterei mbaʼe. Oĩ umi mbaʼe ndahasýiva jadesidi hag̃ua, por ehémplo mbaʼépa ñarambosáta térã mbaʼe órapa ñañenóta jake. Péro oĩ hína umi mbaʼe ijetuʼuvéva jadesidi hag̃ua. Por ehémplo oĩ umi mbaʼe ikatúva oafekta ñande salu, ñane héntepe térã mbaʼéichapa jaservíta Jehovápe. Umi mbaʼe jadesidíva ikatu ñanembovyʼa térã nahániri. Ñande ningo jaipota entéro mbaʼe jadesidíva ideprovécho ñandéve ha ñane hentekuérape. Péro iñimportanteveha, jaipota umi mbaʼe jadesidíva ombovyʼa Jehovápe (Rom. 12:​1, 2).

2. ¿Mbaʼe mbaʼépa rejapo vaʼerã redesidi porã hag̃ua?

² Katuete redesidi porãvéta rejapóramo koʼã mbohapy mbaʼe jahechátava ko artíkulope. Primero, ereko raẽ vaʼerã enkuénta heta mbaʼe. Segundo, eikuaa porã vaʼerã mbaʼépa Jehová opensa peteĩ mbaʼére. Ha tercero, ekalkula porã la okonvenivétava ndéve. Avei ko artíkulo ikatúta nepytyvõ reipuru porãve hag̃ua ne akã (Prov. 2:11).

EREKO RAẼ VAʼERÃ ENKUÉNTA HETA MBAʼE

3. Emombeʼu peteĩ ehémplo ohechaukáva mbaʼérepa edesidi mboyve ereko vaʼerã enkuénta heta mbaʼe.

³ Primeroite voi ikatu hag̃uáicha redesidi porã ereko raẽ vaʼerã enkuénta heta mbaʼe. ¿Mbaʼérepa? Epensamína peteĩ persóna ohóvare okonsulta doktórpe orekógui peteĩ mbaʼasy ivaietereíva. ¿Iporãtapa pe doktór heʼíramo chupe mbaʼe tratamiéntopa osegi vaʼerã oporanduʼỹre mbaʼeve térã ojapoʼỹre algún estúdio? Nahániri,  ¿ajépa? Nde avei redesidi mboyve peteĩ mbaʼe, ereko raẽ vaʼerã enkuénta la reikuaáva pe situasióngui. Péro ¿mbaʼéichapa ikatu rejapo upéva?

4. Ohechaukaháicha Proverbios 18:​13, ¿mbaʼépa ikatu rejapo rejasegura porã hag̃ua redesidi mboyve peteĩ mbaʼe? (Ehecha pe taʼanga).

⁴ Reikuaa hag̃ua mbaʼe mbaʼépa ereko vaʼerã enkuénta peteĩ situasiónpe, ikatu embaʼeporandu rejasegura porã hag̃ua. Por ehémplo eñeimahinamína reñeinvitaha peteĩ fiestarã, péro nde ndereikuaaporãi pe persóna oorganisávape ni mbaʼépa ojejapóta hína upe fiéstape. Rejasegura hag̃ua ikatu eporandu pe persónape: “¿Moõpa ha arakaʼépa ojejapóta pe fiésta? ¿Mboy persónapa oĩta upépe? ¿Mávapa hína la oñerresponsavilisáva pe fiéstare? ¿Máva mávapa hína la ohótava? ¿Mbaʼeichagua aktividápa oñeplanea umi invitádope g̃uarã? ¿Ojeservítapa vevída alkoólika?”. Reikuaa porã rire entéro koʼã mbaʼe ikatútama redesidi porã (elee Proverbios 18:13).

5. Reikuaa porã rire peteĩ situasión, ¿mbaʼépa rejapo vaʼerã upéi?

⁵ Reikuaa porã rire entéro umi mbaʼe reikotevẽva, epensa porãkena pe situasiónre. Por ehémplo, ¿mbaʼépa oikóta reikuaáramo pe fiéstape ohotaha umi persóna ndoikóiva Jehová oipotaháicha? ¿Térã ojeservitaha vevída alkoólika avave okontrolaʼỹre? ¿Rehechakuaápa pe fiéstape sapyʼaitépe ikatuha oiko sarambi? (1 Ped. 4:3). Térã epensamína avei rehoha pe fiestahápe  ha upéva káusare ndaikatúi eho rreuniónpe térã esẽ predikasiónpe. Jahechaháicha, jareko rire enkuénta heta mbaʼe peteĩ situasiónpe, ifasilvéma jadesidi porã hag̃ua. Péro oĩ hína ótra kósa tekotevẽva rejapo. Ko kásope nde reikuaáma la nde repensáva pe situasiónre, ¿péro reikuaápa hína mbaʼépa Jehová opensa? (Prov. 2:6).

EIKUAA PORÃ VAʼERÃ LA JEHOVÁ OPENSÁVA

6. Ohechaukaháicha Santiago 1:​5, ¿mbaʼérepa reñemboʼe vaʼerã Jehovápe nepytyvõ hag̃ua?

⁶ Ejerurékena Jehovápe tanepytyvõ rentende hag̃ua mbaʼépa haʼe opensa peteĩ mbaʼére. Jehová opromete nemoarandutaha reikuaa hag̃ua ogustápa térã ndogustáipa chupe peteĩ mbaʼe. Jehová ningo pojerápe omeʼẽ pe arandu enterovépe ha “ndaipochymoʼãi upe ojerurévandi” (elee Santiago 1:5).

7. ¿Mbaʼéichapa ikatu jaikuaa la Jehová opensáva? Emombeʼu peteĩ ehémplo.

⁷ Reñemboʼe rire Jehovápe nepytyvõ hag̃ua, eñatende porãkena mbaʼéichapa haʼe ombohovái ne ñemboʼe. Por ehémplo, epensamína reviahaha rehóvo ha peichaháguinte ekañyete. Upévare ejerure ajúda peteĩ oikóvape pe lugárpe heʼi hag̃ua ndéve moõpa reime hína. ¿Péro ndépa reho jeýtama pe persóna okontesta mboyve ndéve? Nahániri. Upéva rangue eñatende porãta entéro mbaʼe pe persóna heʼívare ndéve. Upéicha avei, reñemboʼe rire Jehovápe nemoarandu hag̃ua, eñatende mbaʼéichapa ombohovái ne ñemboʼe reanalisávo umi léi ha konsého bíblico ikatúva  nepytyvõ ne situasiónpe. Por ehémplo, epensami jeýna pe fiésta ajeʼi ñamensionáma vaʼekuére. Peichagua situasiónpe ikatu ereko enkuénta la Biblia heʼíva umi ofarreávare itarovávaicha ha pe júnta vaíre. Avei nemanduʼa vaʼerã Jehová oipotaha ñamotenonde Irréino ñamotenonde rangue umi mbaʼe ñandéve ñandegustáva (Mat. 6:33; Rom. 13:13; 1 Cor. 15:33).

8. ¿Mbaʼépa ikatu ejapo ehekasérõ peteĩ informasión reikotevẽva? (Ehecha pe taʼanga).

⁸ Ikatu sapyʼánte ijetuʼu retopa hag̃ua peteĩ informasión reikotevẽva. Péicha jave ideprovéchota ndéve umi konsého omeʼẽva umi ermáno ha ermána iñexperiensiavéva. Péro avei iporãitereíta nde voi rehekáramo informasión. Oĩ hetaiterei mbaʼe ikatúva nepytyvõ restudia hag̃ua, por ehémplo pe Gía oipurúva testígo de Jehová otopa hag̃ua informasión ha avei pe lívro hérava Téxto bíblico ogiáva kristianokuérape. Nemanduʼákena nde edesidiseha umi mbaʼe ombovyʼáva Jehovápe.

9. ¿Mbaʼéichapa ikatu jaikuaa pe jadesidíva ombovyʼápa Jehovápe? (Efesios 5:17).

⁹ ¿Mbaʼéichapa ikatu jaikuaa pe jadesidíva ombovyʼápa Jehovápe? Primeroite voi jaikuaa porã vaʼerã chupe. Proverbios 9:10 heʼi voi: “Neentendído hag̃ua, reikuaa porã vaʼerã pe Dios Santísimope”. Jahechaháicha pe téxtope, ñaneentendído hag̃ua jaikuaa vaʼerã umi kualida Jehová orekóva, mbaʼépa hína ivolunta ha mbaʼe mbaʼépa ogusta ha ndogustái chupe. Upévare eñeporandumína: “Arekóvo enkuénta umi mbaʼe aikuaáva Jehovágui, ¿mbaʼépa ikatu adesidi ambovyʼa hag̃ua chupe?” (elee Efesios 5:17).

10. ¿Mbaʼérepa umi konsého bíblicopa siémpre iñimportanteve vaʼerã oimeraẽ mbaʼégui?

¹⁰ Sapyʼánte ñambovyʼávo Jehovápe ikatu hína jajapo algúna kósa ndogustáiva ñane hénte térã ñane amigokuérape. Por ehémplo oĩ tuakuéra iñintensión porãgui ojopýva ifamíliape omenda hag̃ua peteĩ kuimbaʼe iplátavare, jepe upe kuimbaʼe ndorekói peteĩ amista imbaretéva Jehovándi. Jaikuaa ningo peichagua túa oipotanteha ojekuida itajýrare ani hag̃ua ofalta chupe mbaʼeve. Péro péicha jave iporãta tuakuéra oñeporandúramo: “¿Ikatúta piko pe kuimbaʼe oipytyvõ che famíliape oreko hag̃ua peteĩ amista imbaretéva Jehovándi? ¿Mbaʼépa oiméne Jehová opensa ko situasiónre?”. La Biblia heʼi mbaʼépa jajapo vaʼerã péicha jave. Por ehémplo Mateo 6:​33-pe Jesús heʼi vaʼekue umi kristiánope ‘omotenonde meme hag̃ua Ñandejára Rréino’. Ñande ñamombaʼe añete ñande tuakuérape ha umi hénte oĩvape ñande jerére, péro siémpre iñimportantevéta ñambovyʼa Jehovápe.

EKALKULA PORÃ LA OKONVENIVÉTAVA NDÉVE

11. ¿Mbaʼe konséhopa jatopa Hebreos 5:​14-pe ñanepytyvõtava jakalkula porã hag̃ua pe jadesidítava?

¹¹ Reanalisa porã rire umi konsého bíblico nepytyvõtava ne situasiónpe, ekalkula porãkena mbaʼépa la okonvenivétava ndéve (elee Hebreos 5:14). Reipuru porãramo ne akã, ikatúta repilla mbaʼéichapa resẽta edesidíramo álgo. Sapyʼánte ndahasyiete jadesidi peteĩ mbaʼe, péro heta kásope avei ndahaʼéi la ifasilpáva jadesidi porã. Upévare reipuru porãramo ne akã, ikatúta redesidi porã umi situasión ijetuʼuvévape jepe.

12, 13. ¿Mbaʼéichapa ikatu reipuru porã ne akã redesidíta jave mbaʼépepa rembaʼapóta?

¹² Epensamína ko kásore. Ñamoĩ chupe ehekaha nde travahorã emantene hag̃ua ne famíliape. Peichaháguinte osẽ ndéve mokõi lugár ikatutahápe embaʼapo. Upémarõ nde eñepyrũ ekalkula: Ehecha mbaʼe traváhopa la rejapótava, mboy órapa rembaʼapóta, mboýpa nderaháta eho ha eju hag̃ua nde traváhogui ha umícha. Avei umi mokõi traváho osẽva ndéve oikoite peteĩ Testígope g̃uarã. Péro ikatu oime peteĩva ndestirave ndegustágui pe traváho rejapótava térã ojepaga porãvétagui ndéve. Upéicharõ jepe oĩ hína hetave mbaʼe ereko vaʼerã enkuénta edesidi porã hag̃ua.

 ¹³ Por ehémplo epensamíntena: ¿Eñepyrũtapa efalta mimi rreunionhápe peteĩva umi traváho káusare? ¿Oipeʼátapa ndehegui tiémpo eñangareko hag̃ua ne famíliare ha eipytyvõ hag̃ua chupekuéra oñemoag̃ui hag̃ua Jehováre? Reñeporandúramo koʼã mbaʼe ikatúta remotenonde “umi mbaʼe iñimportantevéva”, por ehémplo nde servísio Jehovápe ha umi mbaʼe ne família oikotevẽva. Avei ndereikomoʼãi emotenonde umi mbaʼerepy (Filip. 1:10). Péicha redesidi porãramo Jehová katuete nevendesíta.

14. ¿Mbaʼeichagua kualidápa ikatu ñanepytyvõ ani hag̃ua ñamoñepysanga ótrope?

¹⁴ Jaipuru porãramo ñane akã jahechakuaáta mbaʼéichapa umi mbaʼe jadesidíva ikatu oafekta ótrope. Péicha jajapóramo ‘nañamoñepysangamoʼãi ótrope’ (Filip. 1:10). Koʼã mbaʼe iñimportánte jareko enkuénta jadesidíta jave mbaʼéichapa ñañemondéta térã jajarregláta. Por ehémplo ikatu oime jajarregla térã ñañemonde ñandéve ñandegustaháicha. ¿Péro mbaʼépa oikóta upéva ndogustáiramo peteĩ ermáno térã ermánape,  térã peteĩ ndahaʼéivape Testígo? Jaipuru porãramo ñane akã jarrespetáta umi ótro oñandúva. Avei japorohayhúramo jajapóta umi mbaʼe “ideprovéchotava ñande rapichápe” ha ndajahasamoʼãi la rrája ñañemonde térã jajarregla lájape (1 Cor. 10:​23, 24, 32; 1 Tim. 2:​9, 10). Péicha ikatúta jadesidi umi mbaʼe ohechaukáva japorohayhu ha japororrespetaha.

15. ¿Mbaʼépa rejapo vaʼerã redesidi mboyve peteĩ mbaʼe iñimportánteva?

¹⁵ Iñimportanteterei ekalkula porã ikatútapa rejapo upe redesidi vaʼekue. Jesús heʼi vaʼekue jakalkula vaʼerãha ‘mboýpa jagastáta’ jajapo mboyve peteĩ mbaʼe (Luc. 14:28). Upévare epensa vaʼerã pe redesidíva ndoʼupamoʼãipa ndehegui ne tiémpo, nde pláta ha ne mbaretekue. Ikatu voi reñeʼẽ pe témare ne famíliandi ikatu hag̃uáicha káda uno heʼi mbaʼépa ojapóta oapoja hag̃ua pe ojedesidíva. ¿Mbaʼérepa iñimportantete rejapo upéva? Péicha rehechakuaáta noiméipa hína tekotevẽ reahustaʼimi la redesidítava, térã ikatu oime rehechakuaa iporãvetanteha redesidíramo rejapo ótra kósa. Avei rejeruréramo ne famíliape heʼi hag̃ua la opensáva ha rehendúramo chupekuéra, katuete haʼekuéra nepytyvõséta osẽ porã hag̃ua upe ojedesidíva (Prov. 15:22).

EDESIDI UMI MBAʼE OSẼ PORÃTAVA

16. ¿Mbaʼe mbaʼépa tekotevẽ rejapo pe redesidíva osẽ porã hag̃ua? (Ehecha pe rrekuádro “ ¿Mbaʼéichapa ikatu redesidi porã?”).

¹⁶ Oimérõ rejapóma hína umi mbaʼe ñaanalisáma vaʼekue, reĩma preparádo redesidi porã hag̃ua. Reikuaáma entéro umi mbaʼe ereko vaʼerã enkuénta ha reanalisáma umi konsého bíblico nepytyvõtava rembovyʼa hag̃ua Jehovápe. Upévare koʼág̃a ikatúma ejerure Jehovápe tanepytyvõ ikatu hag̃uáicha pe redesidíva osẽ porã.

17. ¿Mbaʼépa la iñimportantevéva hína siémpre redesidi porã hag̃ua?

¹⁷ Ikatu oime anteve heta mbaʼépema edesidi porã raʼe, péro aníkena nderesarái ko mbaʼe iñimportantetévagui: Neakãporã térã neexperiénsiaramo jepe nderejeroviái vaʼerã ndejehe, síno pe arandu oúvare Jehovágui. Jehová añoite ningo pe ikatúva nepytyvõ reikuaa hag̃ua chupe, neentendído hag̃ua ha reipuru porã hag̃ua ne akã. Koʼã mbohapy mbaʼe iñimportanteterei nearandu hag̃ua (Prov. 2:​1-5). Upéicharõ, aníkena nderesarái Jehová ikatuha nepytyvõ redesidi hag̃ua umi mbaʼe haʼe oguerohorýva (Sal. 23:​2, 3).