1. ¿Mbaʼérepa iporã jagueromanduʼa káda áño Jesús omano hague ára?

 JEHOVÁ omeʼẽ ñandéve peteĩ rregálo ijojahaʼỹva omboúrõ guare Jesúspe opaga hag̃ua pe rreskáte (2 Cor. 9:15). Jesús omano rupi ñanderehehápe, ikatu jaiko Jehová amígoramo ha ikatúta jaikove pára siémpre. Jehová omeʼẽ pe rreskáte ñanderayhueterei rupi, ha ñande jaagradeseterei chupe upévare (Rom. 5:8). Jesús omanda vaʼekue jagueromanduʼa hag̃ua káda áño haʼe omanoha ára pórke péicha jasegíta ñamombaʼe pe rregálo (Luc. 22:​19, 20).

2. ¿Mbaʼépa jahecháta ko artíkulope?

² Ko áño pe konmemorasión hoʼa sábado 12 de abril. Katuete ningo enterovéva jajeprepara hína upe díape g̃uarã. Iporãitereíta ñañemotiémporamo pe konmemorasión mboyve ha upe rire avei jajepyʼamongeta hag̃ua la ojapo vaʼekuére ñanderehehápe Jehová ha Jesús. a Ko artíkulope jahecháta mbaʼéichapa pe rreskáte rupive ikatu jaikuaave Jehová ha Jesúspe. Ha pe sigiénte artíkulope jahecháta mbaʼéichapa pe rreskáte ñanevenefisia, ha mbaʼéichapa ikatu jahechauka jaagradeseha upe rregálore.

¿MBAʼÉPA ÑAAPRENDE JEHOVÁGUI PE RRESKÁTE RUPIVE?

3. ¿Mbaʼéichapa peteĩ kuimbaʼe perfékto omano rupi entéro persóna ikatu ojei pekádo ha ñemano poguýgui? (Ehecha pe taʼanga).

³ Pe rreskáte ohechauka ñandéve mbaʼeichaitépa Jehová  ihústo (Deut. 32:4). Ñapensamíntena: Adán naiñeʼẽrendúi haguére oiko chugui pekadór, ha upévare enterove ifamiliare ñanaséma avei pekadór ha upéi ñamano (Rom. 5:12). Péro Jehová ombou Itaʼýrape opaga hag̃ua pe rreskáte ikatu hag̃uáicha jajei pe pekádo ha ñemanógui. ¿Mbaʼéichapa peteĩ kuimbaʼe perfékto omano rupi entéro persóna ikatu ojei pekádo ha ñemano poguýgui? Apóstol Pablo heʼi: “Peteĩ kuimbaʼe naiñeʼẽrendúi rupi heta héntegui oiko pekadór, upéicha avei peteĩ kuimbaʼe iñeʼẽrendúgui heta héntere ojeʼéta ihustoha” (Deut. 32:4; 1 Tim. 2:6). Upéicharõ, peteĩ kuimbaʼe perfékto naiñeʼẽrendúi rupi ñanase pekadór ha upéi ñamano. Péro péicha avei, peteĩ kuimbaʼe perfékto iñeʼẽrendu rupi ikatu jajei pe pekádo ha ñemanógui.

4. ¿Mbaʼérepa Jehová ndohejáintema Adán familiare ipyʼaporãva oikove pára siémpre?

⁴ ¿Tekotevẽ piko raʼe Jesús omano voi ñande jajesalva hag̃ua? ¿Ndaikatúi piko Jehová ohejántema oikove pára siémpre umi Adán familiare ipyʼaporãva? Ñandéve g̃uarã haʼetévaicha oñesolusiona porãtava péicha la provléma. Péro Jehovápe g̃uarã upéva noĩporãi. Ojapórire upéva haʼetéta kuri ku nopenáinteva la Adán ojapo vaʼekuére, péro Jehová ihústo rupi ndaikatúi oheja rei la oiko vaʼekue.

5. ¿Mbaʼérepa ikatu ñaĩ segúro Jehová siémpre ojapotaha hustísia?

⁵ Jareko vaʼerã avei enkuénta ótra kósa. Ñapensami la oiko vaʼerãmoʼã Jehová nomeʼẽirire pe rreskáte ha ohejántema Adán familiare oikove pára siémpre iñimperféktoramo jepe. Jehová iñinhústota kuri ojapórire upéva, ha ikatu upéi oĩ opensáva haʼe en kualkiér moménto ikatuha ojapo jey upéva. Por ehémplo, oiméne algúno oñeporandúta kuri okumplítapa Jehová la ipromesakuéra. Péro koʼág̃a natekotevẽi ni jajepyʼapy upévare. ¿Mbaʼérepa? Pórke jahecha Jehová ojapo hague hustísia tekotevẽrõ jepe upearã omeʼẽ Itaʼýra ohayhuetévape. Upéva hasyeterei chupe, péro lomímonte ojapo la oĩ porãva. Upévare ikatu ñaĩ segúro haʼe siémpre ojapotaha umi mbaʼe ihústova.

6. ¿Mbaʼérepa avei Jehová opaga pe rreskáte? (1 Juan 4:​9, 10).

⁶ Jehová ihústo rupi ombou Itaʼýrape opaga hag̃ua pe rreskáte. Péro avei ojapo upéva ñanderayhueterei rupi (Juan 3:16; elee 1 Juan 4:​9, 10). Jehová ombou Itaʼýrape oipotágui jaikove pára siémpre, péro avei oipotágui ñaime ifamília apytépe. ¿Mbaʼérepa jaʼe upéva? Adán opekárõ guare, Jehová omosẽ chupe ifamília apytégui. Upévare ñande nañanaséi Jehová famíliape. Péro  ojepaga rupi pe rreskáte, entéro persóna ojeroviáva Ñandejárare ha iñeʼẽrendúva, ikatu hína amo gotyove oĩ Jehová família apytépe. Koʼág̃ama voi Jehová ikatu operdona ñande pekadokuéra ha ikatu jareko peteĩ amista iporãva hendive ha umi ñane ermanokuérandi. ¡Ajépa ñanderayhuete Jehová! (Rom. 5:​10, 11).

7. ¿Mbaʼérepa jaʼe pe rreskáte ohechaukaha Jehová ñanderayhuetereiha?

⁷ Ikatu jahecha Jehová ñanderayhuetereiha ñantende porãvo mbaʼeichaitépa oiméne ombyasy ohechárõ guare Itaʼýra osufriha. Satanás heʼi vaʼekue ni peteĩ Ñandejára siérvo ndosegimoʼãiha ifiél ijetuʼúramo hendive. Upévare Jehová oheja vaʼekue Itaʼýra osufri ha omano ohechauka hag̃ua Satanás ijapuha (Job 2:​1-5; 1 Ped. 2:21). Jehová ohecha vaʼekue umi líder rrelihióso oñembohoryha Jesúsre, umi soldádo ombyepotiha chupe ha upéi ojeklavaha chupe peteĩ yvyráre. Upéi ohecha mbaʼeichaitépa Itaʼyrami osufri omano meve (Mat. 27:​28-31, 39). Jehová ikatu kuri osalva Jesúspe umi hénte heʼírõ guare: “Oimérõ Ñandejára oguerohory chupe, tosalvána chupe upéicharõ” (Mat. 27:​42, 43). Péro Jehová osalvárire chupe, ndojepagamoʼãi kuri pe rreskáte ha ñande japytáta esperansaʼỹre. Upévare Jehová opermiti Itaʼýra osufri ha omano.

8. ¿Mbaʼéichapa jaikuaa Jehová oñembyasy hague Itaʼýra osufrírõ guare? Emyesakã. (Ehecha pe taʼanga).

⁸ Aníkena ñapensa Ñandejára ipoderosoiterei haguére noñanduiha mbaʼeve. Ñapensamíntena: Haʼe ñandeapo vaʼekue ijoguaháramo ha jaikuaa ñande ñañembyasyha jepi. Upéva heʼise haʼe ikatuha avei oñeñandu upéicha. La Biblia heʼi voi haʼe sapyʼánte ‘oñeñandu vaiha’ (Sal. 78:​40, 41). Avei ikatu ñanemanduʼa Abrahán ha Isaac rehe. Ñandejára omanda vaʼekue Abrahánpe osakrifika hag̃ua itaʼýra peteĩmíme (Gén. 22:​9-12; Heb. 11:​17-19). Ñapensamíntena mbaʼeichaitépa oiméne oñembyasy ha osufri Abrahán ojeprepara aja ojuka hag̃ua itaʼýrape. Upéva ñanepytyvõ ñañeimahina hag̃ua Jehová oñembyasyvéntema hague ohechávo Itaʼýrape ojetortura ha ojejukaha. (Ehecha pe vidéo Jajeroviákena haʼekuéraicha: Abrahán. Párte 2, oĩva jw.org-pe).

9. ¿Mbaʼéichapa Romanos 8:​32, 38, 39 ñanepytyvõ ñantende hag̃ua mbaʼeichaitépa Jehová oporohayhu?

⁹ Pe rreskáte ñanemboʼe Jehová ñanderayhuetereiha. Ndaipóri ótro ñanderayhuvéva chugui, ni peteĩ ñane hénte ni ñane amigoite jepe (elee Romanos 8:​32, 38, 39). Ikatu voi ni ñande ndajajehayhúi ñandejupe la haʼe ñanderayhuháicha. Epensamína, ¿ndépa reikose pára siémpre? Jehová katu  oipotavéntema upéva ndéve g̃uarã. ¿Reipotápa oñeperdona nde pekadokuéra? Jehová koʼytevéntema neperdonase. Haʼéngo oipotánte jaagradese la ojapo vaʼekuére ñanderehe, jajerovia hese ha ñaneñeʼẽrendu chupe. Pe rreskáte ningo peteĩ rregálo ndaijojaháiva ohechaukáva mbaʼeichaitépa Jehová ñanderayhu. Ha pe múndo pyahúpe jaikuaavéta mbaʼe mbaʼépa Jehová ojapove ñanderayhu rupi (Ecl. 3:11).

¿MBAʼÉPA ÑAAPRENDE JESÚSGUI PE RRESKÁTE RUPIVE?

10. a) ¿Mbaʼépa oipyʼapyeterei vaʼekue Jesúspe? b) ¿Mbaʼéichapa Jesús omopotĩ Ñandejára réra? (Ehecha pe rrekuádro “ Jesús ifiél rupi omopotĩ Ñandejára réra”).

¹⁰ Jesús ojepyʼapy la ojeʼévare Itúare (Juan 14:31). Jesúsre ojeʼe vaʼekue oñeʼẽ vaiha Ñandejárare ha opuʼã hague pe goviérnore. Upéva káusare haʼe ojepyʼapyeterei vaʼekue oñemongyʼárõ g̃uarã Itúa réra. Upévare Jesús oñemboʼe vaʼekue ha heʼi: “Che Ru, ikatúramo anína reheja haʼu ko kópagui” (Mat. 26:39). Jesús ifiél vaʼekue omano meve, péicha omopotĩ Ñandejára réra ha ojehechauka japuha umi mbaʼe heʼi vaʼekue Satanás.

11. ¿Mbaʼéichapa Jesús ohechauka vaʼekue oporohayhuha? (Juan 13:1).

¹¹ Pe rreskáte ohechauka avei Jesús oñeinteresaha ipyʼaite guive la héntere, koʼýte isegidorkuérare (Prov. 8:31; elee Juan 13:1). Jesús oikuaa vaʼekue tekotevẽtaha ojapo heta mbaʼe ijetuʼúva ko yvy ape ári, koʼýte pórke upéi omano vaʼerã. Upéicharamo jepe haʼe okumpli upe asignasión, ha ndahaʼéi Itúa heʼi haguérente chupe, síno avei oporohayhúgui. Jesús mborayhúpe opredika, oporomboʼe ha oporoservi vaʼekue. Pe pyhare omano mboyve, haʼe oñemotiémpo ombojepyhéi hag̃ua umi apóstolpe. Avei omokyreʼỹ, okonsola ha omboʼe chupekuéra (Juan 13:​12-15).  Upéi ojeklava riréma chupe pe yvyráre, Jesús oaprovecha pe oportunida omeʼẽ hag̃ua esperánsa pe kriminál oĩ vaʼekuépe ijykére, ha ojasegura mávapa oñatendéta isýre haʼe omano rire (Luc. 23:​42, 43; Juan 19:​26, 27). Jahechaháicha, Jesús ohechauka vaʼekue oporohayhuha ndahaʼéi omanoha díapente, síno oikove aja pukukue ko yvy ape ári.

12. ¿Mbaʼéichapa Jesús osegi ñanepytyvõ koʼág̃a peve?

¹² Cristo omano vaʼekue “una vénte ñande pekadokuérare”, péro koʼág̃a peve ojapo heta mbaʼe ñanderehehápe (Rom. 6:10). ¿Mbaʼe mbaʼépa ojapo? Haʼe osegi ombaʼapo omeʼẽ hag̃ua ñandéve umi mbaʼe ojehupytýva pe rreskáte rupive. Por ehémplo haʼe ningo Rréi, súmo saserdóte ha omoakã pe kongregasión (1 Cor. 15:25; Efes. 5:23; Heb. 2:17). Avei oñenkarga ombyaty hag̃ua umi unhídope ha umi oĩvape pe aty guasúpe. Ko traváho opáta pe jehasa asy guasu opa mboyve (Mat. 25:32; Mar. 13:27). b Jesús avei ñanepytyvõ koʼã ára pahápe jarekopaite hag̃ua la ñaikotevẽva jajerovia hag̃ua Jehováre (Mat. 24:45). Ha ogoverna aja 1.000 áñore haʼe osegíta ombaʼapo ñanderehehápe. Añetehápe Jehová nomeʼẽi vaʼekue Itaʼýra omano hag̃uánte umi hénte rehehápe, síno ojapo hag̃ua hetaiteve mbaʼe ñanderehehápe.

JASEGÍKENA ÑAAPRENDE HETAVE MBAʼE

13. ¿Mbaʼépa ikatu rejapo resegi hag̃ua rehecha mbaʼeichaitépa ñanderayhu Jehová ha Jesús?

¹³ Ikatu ningo resegi reaprende mbaʼeichaitépa Jehová ha Jesús nderayhu, rejepyʼamongeta meméramo la ojapo vaʼekuére hikuái. Por ehémplo, pe konmemorasión tiémpope ikatu relee peteĩ térã mokõi umi lívro oñeʼẽva Jesús rekovekuére oĩva la Bíbliape. Ani elee hetaiterei una vetépe voi, síno trankílo porãnte eho hese. Eñehaʼãkena etopa álgo ipyahúva ohechaukáva mbaʼérepa jahayhu vaʼerã Jehová ha Jesúspe. Ha upéi emombeʼu ótrope la reaprendéva nde lektúrape.

14. Ohechaukaháicha Salmo 119:97 ha pe nóta, ¿mbaʼépa jajapo vaʼerã ñaaprende hag̃ua hetave mbaʼe pe rreskátegui ha umi ótra enseñánsagui? (Ehecha pe taʼanga).

¹⁴ Ohasávo el tiémpo hetáma oñeñeʼẽ Ñandejára hustísiare, imborayhúre ha pe rreskátere. Ha oimérõ nde reservíma Jehovápe heta áñore, ikatu reñeporandu oĩpa gueteri álgo ipyahúva ikatúva reaprende koʼã témare. Legálmente siémpre oĩta álgo ipyahúva  ikatúva reaprende koʼã ha hetave témagui. ¿Mbaʼépa ikatu rejapo upearã? Eaprovechapaitékena umi informasión osẽva ñane puvlikasionkuérape. Elee jave álgo nerentendepáiva la Bíbliape, eñehaʼã estudia upéva. Upéi ejepyʼamongeta la relee vaʼekuére ha epensa mbaʼéichapa upéva ohechauka Jehová ha Jesús nderayhuha, ha mbaʼépa ikatu reaprendeve chuguikuéra (elee Salmo 119:97 ha pe nóta).

15. ¿Mbaʼérepa jasegi vaʼerã jaheka umi óro kuʼi la Bíbliape?

¹⁵ Ani reñedesanima nderetopáirõ álgo ipyahúva térã nesorprendéva káda ke relee térã restudia la Biblia. Ikatu ñapensa la ojapóvare umi ohekáva óro kuʼi. Koʼã persóna ndotopái jepi la ohekáva sapyʼaitépe, síno ohasa jepi heta óra ha día upearã. Upéicharõ jepe noñentregái hikuái ha osegi oheka pórke ovaloraiterei pe óro kuʼi michĩvéva jepe ikatúva otopa. Péro umi óro kuʼi ikatúva jatopa la Bíbliape tuichaiterei ivaliosove (Sal. 119:127; Prov. 8:10). Upévare nepasiénsiakena ha esegi elee la Biblia eaprende hag̃ua umi mbaʼe ipyahúva (Sal. 1:2).

16. ¿Mbaʼéichapa ikatu esegi Jehová ha Jesús ehémplo?

¹⁶ Restudiakuévo eñehaʼã ehecha mbaʼéichapa ikatu rejapo la reaprendéva. Por ehémplo restudiávo Jehová ihustoha, eñehaʼã esegi iñehémplo retratávo enterovépe peteĩchapa. Restudiávo Jesús ohayhuetereiha Itúape ha la héntepe, eñehaʼã nde avei ejapo la Jehová oipotáva ha eipytyvõ ermanokuérape ijetuʼúramo jepe sapyʼánte. Ikatu avei resegi Jesús ehémplo emombeʼúvo ótrope la Jehová ojapóva ñanderehehápe, ikatu hag̃uáicha haʼekuéra avei oasepta pe rregálo porãite.

17. ¿Mbaʼépa jahecháta pe artíkulo oúvape?

¹⁷ Ñantende porãvévo pe rreskáte jahayhuve Jehovápe ha Itaʼýrape, ha upéicha haʼekuéra avei ñanderayhuvéta (Juan 14:21; Sant. 4:8). Jasegíkena jaaprovechapaite la Jehová omeʼẽva ñandéve ñantendeve hag̃ua pe rreskáte. Pe artíkulo oúvape jahecháta mbaʼe iporãvapa jahupyty Jesús omano rupi ñanderehehápe, ha ñaanalisáta mbaʼéichapa ikatu jahechauka jaagradeseha pe rreskátere.