1. ¿Mbaʼérepa Jehová omoñepyrũ vaʼekue pe matrimónio?

 JEHOVÁ ningo haʼe ‘Ñandejára ovyʼáva’ ha oipota ñande avei javyʼa (1 Tim. 1:11). Haʼe omeʼẽ ñandéve heta rregálo iporãva ikatu hag̃uáicha jaiko vyʼápe (Sant. 1:17). Peteĩva umi rregálo haʼe hína pe matrimónio. Peteĩ kuña ha peteĩ kuimbaʼe omenda jave haʼekuéra opromete ojoayhu ha ojorrespetataha. Umi omendáva osegíramo ojoayhu ipyʼaite guive ikatúta oiko vyʼápe (Prov. 5:18).

2. ¿Mbaʼépa oiko heta matrimóniore koʼág̃arupi?

² Ñambyasýramo jepe, oĩ heta omendáva nokumplíriva la opromete vaʼekue omendárõ guare. Upéicha rupi ndovyʼavéi hikuái imatrimóniope. Ramoite pe Organización Mundial de la Salud ojapo peteĩ investigasión, ha heʼi heta ména iviolentoha, oapoʼiha hembirekópe térã omaltrata chupe diferénte hendáicha. Koʼã ména sapyʼánte otrata porã guaʼu hembirekópe ótro rovake, péro omaltrata chupe haʼeñoháme. Avei oĩ heta ména ohecháva pornografía ha upéva ojapo vaieterei tembirekokuérare.

3. ¿Mbaʼérepa oĩ jepi ména otrata vaíva hembirekópe?

³ ¿Mbaʼérepa oĩ jepi umi ména otrata vaíva hembirekópe? Ikatu oime itúa voi iviolénto rakaʼe, upévare chupe g̃uarã ndaivaíri la ojapóva. Oĩ katu umi país ojeʼehápe umi kuimbaʼe ohechauka vaʼerãha mbaretépe mávapa la omandáva hogapýpe. Ha heta kuimbaʼépe núnka noñemboʼéiva ojejokokuaa vaʼerãha, por ehémplo ipochy jave. Oĩ avei umi ména ohecha meméva pornografía, ha upéva káusare nomombaʼevéi kuñanguérape ni ndohechái hendápe porã pe séxo. Hiʼarive oĩ expérto heʼíva pe pandémia de Covid-19 káusare koʼãichagua provléma oempeorave hague. Péro ni peteĩva koʼã mbaʼe nomeʼẽi derécho peteĩ ménape otrata vai hag̃ua hembirekópe.

4. ¿Mbaʼe rehepa oñatende vaʼerã menakuéra ha mbaʼérepa?

 ⁴ Umi ména oservíva Jehovápe oñatende vaʼerã ani hag̃ua opensa kuñanguérare oñepensaháicha ko múndope. a ¿Mbaʼérepa? Pórke umi mbaʼe opensáva peteĩ persóna, normálmente upe rire ojapo. Apóstol Pablo heʼi vaʼekue umi kristiáno unhído Romaguápe ‘anive hag̃ua ojoguase umi hénte oĩvape ko múndope’ (Rom. 12:​1, 2). Pablo oskrivírõ guare pe kongregasiónpe, ojapóma kuri unos kuánto áño oiko hague umi ermánogui kristiáno. Péro la heʼívare Pablo, jahechakuaa algúno ijapyteguikuéra osegi hague opensa umi hénte mundopegua opensaháicha. Upévare haʼe heʼi umi kristiánope okambia vaʼerãha la opensáva ha oñekomporta lája. Upe konsého ideprovécho avei koʼág̃a umi ména kristiánope g̃uarã. Ñambyasýramo jepe, oĩ umi ména kristiáno ohejáva odomina chupe la oñepensáva ko múndope, ha upévare ou omaltrata hembirekópe. b ¿Mbaʼépa opensa Jehová? ¿Mbaʼéichapa haʼe oipota menakuéra otrata hembirekópe? Jatopa la rrespuésta pe téxto omopyendávape ko artíkulo.

5. Ohechaukaháicha 1 Pedro 3:​7, ¿mbaʼéichapa umi ména otrata vaʼerã hembirekópe?

⁵ (Elee 1 Pedro 3:7). Jehová omanda menakuérape omombaʼe hag̃ua hembirekópe. Jarrespetáramo peteĩ persónape ñamombaʼéta ha jatrata porãta chupe. Péicha avei peteĩ ména omombaʼéva hembirekópe imbaʼeporãta hendive ha otratáta chupe mborayhúpe. Ko artíkulope jahecháta mbaʼéichapa peteĩ ména ikatu ohechauka omombaʼeha hembirekópe. Péro primero, jahechamína mbaʼe mbaʼépa ni mbaʼevéicharõ ndojapói vaʼerã umi ména omombaʼéva hembiayhúpe.

¿MBAʼÉPA NDOJAPÓI VAʼERÃ UMI MÉNA OMOMBAʼÉVA HEMBIREKÓPE?

6. ¿Mbaʼépa Jehová opensa umi ména ivioléntovare? (Colosenses 3:19).

⁶ Aníkena peneviolénto pene rembirekóndi. Jehová ndochaʼéi umi ivioléntovare (Sal. 11:5). Ha koʼytevéntema ipochy oĩ jave peteĩ ména omaltratáva hembirekópe (Mal. 2:16; elee Colosenses 3:19). Ohechaukaháicha 1 Pedro 3:​7, peteĩ ména ndotrataporãiva hembirekópe ikatu ombyai iñamista Ñandejárandi. Ikatu voi hína Jehová ni nohenduvéi upe ména oñemboʼe jave.

7. Ohechaukaháicha Efesios 4:​31, 32, ¿mbaʼépa ndojapói vaʼerã umi ména? (Ehecha pe nóta “Mbaʼépa heʼise”).

⁷ Aníkena peguerosapukái ni peje mbaʼe vai pene rembirekópe. Oĩ ména iñeʼẽ arhélva hembirekópe térã heʼi umi mbaʼe omoñeñandu vaietereíva chupe. Péro Jehová ndoipotái ni mbaʼevéicharõ avave ‘ipochy, orrenega vaipa, ojoguerosapukái ni oñeʼẽ vai ojuehe’ (elee Efesios 4:​31, 32). c Jehová ohendu entéro mbaʼe ojeʼéva. Ha chupe g̃uarã iñimportánte mbaʼéichapa peteĩ ména oñeʼẽ hembirekópe, tahaʼe ótro rovake térã oĩ jave haʼekuérante hogapýpe. Peteĩ ména iñeʼẽ pohýiva hembirekópe ikatu ombyai imatrimónio ha iñamista Jehovándi (Sant. 1:26).

8. ¿Mbaʼépa Jehová opensa pe pornografíare, ha mbaʼérepa?

⁸ Aníkena pehecha pornografía. Jehovápe ombojeguaru pe pornografía. Upévare peteĩ ména ohecháramo umi taʼanga tieʼỹ ombyai iñamista Jehovándi, ha ohechauka  ndorrespetaiha hembirekópe. d Jehová oipota peteĩ ména ifiél hembirekópe ipensamiéntope jepe. Jesús heʼi vaʼekue voi peteĩ kuimbaʼe “osegíva omaña peteĩ kuñáre ha iñakãraku hese, upéva oporomoakãratĩma hína ipyʼapýpe” (Mat. 5:​28, 29). e

9. ¿Mbaʼérepa Jehovápe ombopochy peteĩ ména opensáramo ijehénte oreko jave rrelasión sexuál hembirekóndi?

⁹ Aníkena peovliga pene rembirekópe ojapo hag̃ua álgo opensáva oĩ vaiha pereko jave rrelasión sexuál. Algúno ména oreko jave rrelasión sexuál oovliga hembirekópe ojapo hag̃ua peteĩ mbaʼe ndojaposéiva. Upéi pe tembireko opyta ikonsiénsia kyʼa térã oñandu ojeapoʼiha chupe. Peteĩ ména ojapóramo péicha, ohechauka opensaha ijehénte ha upéva Jehovápe ombopochy. Haʼe oipota peteĩ ména ohayhu hembirekópe, omokunuʼũ chupe ha torrespeta ikonsiénsia ha la oñandúva (Efes. 5:​28, 29). Oimérõ peteĩ kristiáno ojapo umi mbaʼe vai oñemensiona vaʼekue, ¿mbaʼéichapa ikatu okambia la opensáva ha ojapóva?

¿MBAʼÉICHAPA PETEĨ MÉNA IKATU OHEJA UMI MBAʼE VAI OJAPÓVA?

10. ¿Mbaʼérepa jaʼe Jesús ehémplo ideprovechoha menakuérape g̃uarã?

¹⁰ Oimérõ peteĩ ména oporotrata vai ha ojapo umi mbaʼe oapoʼíva hembirekópe, ¿mbaʼépa ikatu oipytyvõ chupe okambia hag̃ua? Oñehaʼãmbaitérõ osegi Jesús ehémplo ikatúta okambia. Jaikuaa Jesús núnka nomendái hague, péro otrata porãiterei vaʼekue idisipulokuérape. Péicha oheja peteĩ ehémplo ndaijojaháiva menakuérape g̃uarã (Efes. 5:25). Jahechamína mbaʼéichapa Jesús oñeʼẽ ha otrata vaʼekue idisipulokuérape, ha mbaʼépa ikatu oaprende menakuéra chugui.

11. ¿Mbaʼéichapa Jesús otrata vaʼekue idisipulokuérape?

¹¹ Jesús otrata porã vaʼekue ijapostolkuérape ha omombaʼe chupekuéra. Haʼe ndoikói vaʼekue ijarhél ni odominase entéro mbaʼe ojapóva hikuái. Jesús haʼéramo jepe Imburuvicha ha Imboʼeharakuéra, haʼe ndoipurúi vaʼekue ipodér ohechauka hag̃ua haʼe omandaha hesekuéra. Upéva rangue Jesús iñumílde ha oservi idisipulokuérape (Juan 13:​12-17). Haʼe heʼi chupekuéra: “Peaprende chehegui. Che ningo ndachepochyreíri ha cheumílde che pyʼaite guive, upévare katuete pombopiroʼýta” (Mat. 11:​28-30). Jesús heʼi vaʼekue ijehe ndaipochyreiriha. Peichagua persóna ndahaʼéi ku iñarruinádova, síno ohechauka orekoha pe fuérsa ojejokokuaa hag̃ua. Oiméramo jepe ipochy, peichagua persóna osegínte trankílo porã ha norreaksionavaíri.

12. ¿Mbaʼéichapa Jesús oñeʼẽ vaʼekue ótrope?

¹² Jesús naiñeʼẽpohýiri vaʼekue isegidorkuérape, síno oporomokyreʼỹ ha oporokonsola vaʼekue (Luc. 8:​47, 48). Umi iñenemigokuéra jepe “oñeʼẽ vaírõ guare hese, haʼe ndojeréi oñeʼẽ vai avei hesekuéra” (1 Ped. 2:​21-23). Sapyʼánte Jesús odesidi vaʼekue okirirĩnte okontesta vai rangue (Mat. 27:​12-14). ¡Ajépa iporãite menakuérape g̃uarã pe ehémplo ohejáva Jesús!

13. ¿Mbaʼéichapa peteĩ ména ohechaukáta ojapoha la heʼíva Mateo 19:​4-6? (Ehecha pe taʼanga).

¹³ Jesús heʼi vaʼekue umi ména osegi vaʼerãha ifiél hembirekópe. Haʼe omomanduʼa umi héntepe Jehová heʼi hague peteĩ ména ‘opyta vaʼerãha hembirekóndi’ (elee Mateo 19:​4-6). Pe palávra griega ojetradusíva “opyta”, ojepuru jepi oñemboja jave ojuehe mokõi mbaʼe peteĩ pegaméntope. Upéicharõ pe ména ha pe tembireko ojoayhu vaʼerã ipyʼaite guive, ha oĩ vaʼerã oñondive ku ojarõguáicha ojuehe peteĩ pegaméntope. Upévare peteĩva ojapóramo álgo naiporãiva, mokõivévante osufri. Peteĩ ména ohayhúva ipyʼaite guive hembirekópe  omboykéta oimehaichagua taʼanga tieʼỹ ha pornografía. Ensegída voi ojeréta ani hag̃ua omaña “umi mbaʼe vaíre, ndovaléiva mbaʼeverã” (Sal. 119:37). Pe ména ohayhúva hembirekópe osegi Job ehémplo, ha ojapo peteĩ kompromíso hesándi ani hag̃ua omaña ótro kuñáre (Job 31:1).

14. ¿Mbaʼépa ojapo vaʼerã peteĩ ména oĩ porã jey hag̃ua Jehovándi ha hembirekóndi?

¹⁴ Oimérõ peteĩ ména iviolénto raʼe térã omaltrata hembirekópe la heʼíva rupive, ¿mbaʼépa ojapo vaʼerã oĩ porã jey hag̃ua Jehovándi ha hembirekóndi? Primero, orrekonose vaʼerã ivaiha la ojapóva. Jehová ohecha entéro mbaʼe pe ména ojapóva ha ohendu la heʼíva (Sal. 44:21; Ecl. 12:14; Heb. 4:13). Segundo, okambia vaʼerã ha otrata porã vaʼerã hembirekópe (Prov. 28:13). Tercero, ojerure vaʼerã perdón hembirekópe ha Jehovápe. Oñehaʼã vaʼerã ojapo la tekotevẽva oñeperdona hag̃ua chupe (Hech. 3:19). Avei ojerure asy vaʼerã Jehovápe toipytyvõ chupe okambiase hag̃ua, ha ikatu hag̃uáicha opensa, oñeʼẽ ha ojapo entéro mbaʼe Jehová oipotaháicha (Sal. 51:​10-12; 2 Cor. 10:5; Filip. 2:13). Cuarto, oñehaʼã vaʼerã ojapo umi mbaʼe ojeruréva oñemboʼe jave. Upearã ndochaʼéi vaʼerã pe violénsiare ha noñeʼẽvaíri vaʼerã hembirekópe (Sal. 97:10). Quinto, pyaʼe oñemboja vaʼerã umi ansiánore oipytyvõ hag̃ua chupe hikuái (Sant. 5:​14-16). Sexto, oplanea porã vaʼerã mbaʼépa ojapóta anivéma hag̃ua amo gotyove ojapo jey umi mbaʼe vai. Oimérõ peteĩ ména ohecha oikóvo pornografía ojapo vaʼerã avei koʼã 6 mbaʼe. Ha ikatu oĩ segúro Jehová ovendesitaha chupe oñehaʼã haguére okambia (Sal. 37:5). Péro, ¿ovalémapa omboyke haguérente umi mbaʼe vai? Nahániri, pe ména ohechauka vaʼerã avei omombaʼeha hembirekópe. ¿Mbaʼéichapa ikatu ojapo upéva?

¿MBAʼÉICHAPA IKATU PEHECHAUKA PEMOMBAʼEHA PENE REMBIREKÓPE?

15. ¿Mbaʼéichapa peteĩ ména ikatu ohechauka ohayhuha hembirekópe?

¹⁵ Pehechauka pehayhuha pene rembirekópe. Oĩ ermáno ovyʼáva imatrimóniope ha oñehaʼãva káda día ojapo álgo ohechauka hag̃ua hembirekópe ohayhuha chupe (1 Juan 3:18).  Umi ména ikatu ojapo umi mbaʼe isensíllova ohechauka hag̃ua la oñandúva. Por ehémplo ikatu oñakarama hembireko póre térã oañuã chupe. Ikatu avei omondo chupe peteĩ mensáhe heʼi hag̃ua: “Rohechagaʼuetéma”, térã oporandu chupe mbaʼéichapa oĩ hína. Sapyʼapyʼánte pe ména ikatu avei oskrivi peteĩ kartaʼi heʼi hag̃ua hembirekópe mbaʼeichaitépa ohayhu chupe. Peteĩ ména ojapo jave koʼã mbaʼe, omombaʼe hembirekópe ha omombarete imatrimónio.

16. ¿Mbaʼérepa pe ména heʼi vaʼerã hembirekópe ovaloraha chupe?

¹⁶ Peje pene rembirekópe pevaloraitereiha chupe. Pe ména heʼi vaʼerã hembirekópe mbaʼérepa ovalora chupe ha oñehaʼã vaʼerã omokyreʼỹ chupe. Por ehémplo oagradese vaʼerã hembirekópe entéro mbaʼe ojapóvare oapoja hag̃ua chupe (Col. 3:15). Pe ména heʼi jave hembirekópe ovaloraha chupe, pe tembireko oñeñandu segúra porã, ha ndodudái iména ohayhu ha omombaʼeha chupe (Prov. 31:28).

17. ¿Mbaʼéichapa peteĩ ména ikatu ohechauka orrespetaha hembirekópe?

¹⁷ Petrata porãkena ha perrespeta pene rembirekópe. Pe ména ohayhúva hembirekópe ovaloraiterei chupe, ha orrekonose hembireko haʼeha peteĩ rregálo oúva Jehovágui (Prov. 18:22; 31:10). Upévare otrata porã ha orrespeta hembirekópe oreko jave hikuái rrelasión sexuál. Péicha jave pe ména ndoovligamoʼãi hembirekópe ojapo hag̃ua álgo omoñeñandu vaíva térã oapoʼíva chupe, avei orrespetáta hembirekópe oimérõ ndojaposéi álgo ostorvátava ikonsiénsia. f Oreko jave rrelasión sexuál pe ména avei ndojapomoʼãi mbaʼeve omongyʼáva ikonsiénsia (Hech. 24:16).

18. ¿Mbaʼépa ojedesidiete vaʼerã ojapo menakuéra? (Ehecha pe rrekuádro “ ¿Mbaʼéichapa ikatu ehechauka errespetaha ne rembirekópe?”).

¹⁸ Menakuéra, Jehová katuete ovyʼaiterei ohecha jave peñehaʼãha pemombaʼe pene rembirekópe entéro mbaʼépe. Pejedesidietékena ndapejapomoʼãiha mbaʼeve omoñeñandu vaítava pene rembiayhúpe. Siémprekena petrata porã, perrespeta ha pemokunuʼũ pene rembirekópe. Pejapóramo koʼã mbaʼe pehechaukáta pehayhu ha pemombaʼeha pene rembirekópe. Avei pehechaukáta pevaloraha pe amista iñimportantevéva, haʼéva hína pene amista Jehovándi (Sal. 25:14).