1. ¿Mbaʼe rehepa algúno koʼág̃arupi ojesarekoiterei?

 OIMÉNE rehechakuaáma ko múndope oĩha hetaiterei hénte ojesarekoitereíva ijehe. Por ehémplo algúno oipuru umi rred sosiál oñemombaʼeguasu hag̃ua umi mbaʼe ojapóvare térã ohupytývare. Péro saʼieterei oĩ la omombaʼeguasuséva Ñandejárape. Upévare ko artíkulope jahecháta mbaʼéichapa ikatu ñamombaʼeguasu Jehovápe, ha mbaʼépa la ñanemomýi vaʼerã jajapo hag̃ua upéva. Avei ñaanalisáta mbaʼépa Jehová ojapóta koʼẽrõitéma omombaʼeguasu hag̃ua héra porãite.

¿MBAʼÉICHAPA IKATU ÑAMOMBAʼEGUASU JEHOVÁPE?

2. ¿Mbaʼéichapa Jehová ohechauka vaʼekue ipoderosoitereiha pe Sérro Sinaípe? (Ehecha pe taʼanga).

² La Biblia ohechauka Jehová haʼeha peteĩ Dios ipoderosoitereíva ha ndaijojaháiva. Por ehémplo haʼe oipytyvõ vaʼekue umi israelítape osẽ hag̃ua Egipto poguýgui, ha unos kuánto día upe rire haʼe ohechauka chupekuéra mbaʼeichaitépa tuicha ipodér. Eñeimahinamína la oiko vaʼekue. Hetaiterei israelita oho pe Sérro Sinaípe ha ojekoloka hikuái pe montáña renondépe ohendu hag̃ua la Jehová heʼítava chupekuéra. Upémarõ peteĩ arai hũ ojahoʼi pe montáña. Peichaháguinte pe yvy oñepyrũ oryrýi ha pe montáña otimbopa, hiʼarive oñepyrũ osunu, hoʼa rrájo ha peteĩ turu hatãiterei ipu (Éx. 19:​16-18; 24:17; Sal. 68:8). Umi israelita opytáne raʼe ijurujái ohechávo Jehová podér tuichaitéva.

3. ¿Mbaʼéichapa ikatu ñamombaʼeguasu Jehovápe?

³ ¿Péro ikatúpa ñande avei ñamombaʼeguasu Jehovápe? ¡Kláro ke si! Jajapokuaa upéva ñañeʼẽvo umi persónape umi mbaʼe Jehová ojapóvare ha umi kualida porãite haʼe orekóvare. Avei  ñamombaʼeguasu Jehovápe ñarrekonosévo haʼe omeʼẽha ñandéve pe fuérsa ñaikotevẽva jajapo hag̃ua heta mbaʼe (Is. 26:12). Rréi David ohechauka vaʼekue omombaʼeguasuha Jehovápe. Peteĩ vuéltape oñemboʼérõ guare pe kongregasión de Israel renondépe haʼe heʼi vaʼekue Ñandejárape: “Jehová, nde ningo ndetuicha ha ndepoderóso, opa mbaʼe iporãva nembaʼe hína. Nde ningo remimbipa ha nandejojahái, pórke entéro mbaʼe oĩva yvágape ha ko yvy ape ári nembaʼepaite hína”. Upéi David oñemboʼepa rire “kompletoite pe kongregasión omombaʼeguasu Jehovápe” (1 Crón. 29:​11, 20).

4. ¿Mbaʼéichapa Jesús omombaʼeguasu vaʼekue Jehovápe?

⁴ Jesús oĩrõ guare ko yvy ape ári omombaʼeguasu Itúape heʼívo haʼe omeʼẽha chupe pe podér ojapo hag̃ua umi milágro (Mar. 5:​18-20). Avei Jesús omombaʼeguasu Jehovápe oñeʼẽ porãvo hese, ha avei otrata porãvo umi persónape. Peteĩ vuéltape Jesús oporomboʼe hína kuri pe sinagógape. Umi hénte apytépe oĩ vaʼekue peteĩ kuña oñendemoniáva, ha 18 áñorema oiko kuri upéicha. Pe demónio káusare pe kuña ikarapã ha ndaikatuiete voi oñemboʼy porã. ¡Ajépa ijetuʼuete anga la isituasión! Jesús ombyasyeterei pe kuñáme, upévare oñemoag̃ui hese ha heʼi chupe: “Che ermána, koʼág̃a repytuʼúma ne mbaʼasýgui”. Upéi Jesús omoĩ ipo hiʼári ha upepete pe kuña ikatúma kuri oñemboʼy porã ha “oñepyrũ ombotuicha Ñandejárape”. Pe kuña ningo ovyʼaiterei hesãi jey haguére (Luc. 13:​10-13). Haʼe ikatu vaʼekue oagradese Jehovápe hetaiterei mbaʼére ha ñande avei upéicha.

¿MBAʼÉPA ÑANEMOMÝI VAʼERÃ ÑAMOMBAʼEGUASU HAG̃UA JEHOVÁPE?

5. ¿Mbaʼe mbaʼérepa ñande jarrespeta Jehovápe?

⁵ Ñamombaʼeguasu Jehovápe jarrespetágui chupe ñande pyʼaite guive. Jehová ipoderosoiterei ha ikatu ojapo oimeraẽ mbaʼe ojaposéva, ha núnka voi naikaneʼõi (Sal. 96:​4-7). Pe iñarandu ojekuaa porã entéro mbaʼe haʼe ojapóvape. Haʼe rupive ningo jaexisti, péro ndahaʼéi upévante. Haʼe omeʼẽ avei ñandéve la ñaikotevẽva jasegi hag̃ua jaikove (Apoc. 4:11). Jehová núnka ndofallái ñanendive (Apoc. 15:4). Entéro mbaʼe haʼe ojapóva osẽ porã ha siémpre okumpli la oprometéva (Jos. 23:14). Ndareíri ningo proféta Jeremías heʼi vaʼekue Jehováre: “Umi iñarandúva apytépe umi nasionkuérape ha enterove umi igoviernokuéra apytépe, ndaipóri ni peteĩ ndeichagua” (Jer. 10:​6, 7). Oĩ heta mbaʼe ñanemomýiva jarrespeta hag̃ua ñande Ru yvagapeguápe, péro ñande ndahaʼéi jarrespetánteva Jehovápe síno jahayhueterei avei chupe.

6. ¿Mbaʼérepa jahayhu Jehovápe?

⁶ Ñamombaʼeguasu Jehovápe jahayhúgui chupe ñande pyʼaite guive. Jehová oreko hetaiterei kualida, ha upévare jahayhueterei voi chupe. Haʼe ñandeporiahuvereko ha ñanembyasy (Sal. 103:13; Is. 49:15). Jehová ontende porãiterei la ñañandúva, por ehémplo ñañembyasy jave haʼe oñembyasy avei (Zac. 2:8). Haʼe ningo ombohapepa voi ñandéve ñañemoag̃ui hag̃ua hese jaiko hag̃ua iñamígoramo (Sal. 25:14; Hech. 17:27). Jehová “iñumílde rupi, ojayvy omaña hag̃ua yvágare ha ko yvy ape ári. Haʼe omopuʼã umi iñumíldevape pe yvýgui” (Sal. 113:​6, 7). Ñapensávo entéro koʼã mbaʼére, ¿mbaʼéicha voi piko nañamombaʼeguasusemoʼãi Ñandejára ndaijojaháivape? (Sal. 86:12).

7. ¿Mbaʼeichagua oportunidápa hína jareko?

⁷ Ñamombaʼeguasu Jehovápe jaipotaitereígui umi hénte oikuaa porã chupe. Oĩ hetaiterei persóna ndoikuaaporãiva Jehovápe. ¿Mbaʼérepa? Pórke Satanás omohesatũ la héntepe heʼívo hetaiterei japu Jehováre (2 Cor. 4:4). Satanás káusare la hénte oimoʼã Jehová haʼeha  peteĩ Dios iñañáva, noimportaiha chupe avave ha ikáusare jasufriha. Péro ñande jaikuaa porãiterei Jehovápe, ha jareko oportunida ñaipytyvõ hag̃ua la héntepe oikuaa hag̃ua mbaʼeichagua Dióspa hína haʼe. Upéicha haʼekuéra avei ikatúta omombaʼeguasu Jehovápe (Is. 43:10). Salmo kapítulo 96 heʼi ñamombaʼeguasu vaʼerãha Jehovápe. Upévare ñaanalisávo la heʼíva ko kapítulo ejepyʼamongetamína mbaʼéichapa nde ikatu remombaʼeguasu Jehovápe haʼe oipotaháicha.

¿MBAʼE ÓTRA KÓSAPA IKATU JAJAPO ÑAMOMBAʼEGUASU HAG̃UA JEHOVÁPE?

8. ¿Mbaʼépa ikatu jajapo ñamombaʼeguasu hag̃ua Jehovápe? (Salmo 96:​1-3).

⁸ (Elee Salmo 96:​1-3). Ikatu ñamombaʼeguasu Jehovápe umi mbaʼe jaʼéva rupive. Pe Salmo heʼi ñandéve ‘japurahéi vaʼerãha Jehovápe’, ‘ñambotuicha vaʼerãha héra’, ‘ñamombeʼu vaʼerãha haʼe osalvaha ipuévlope’ ha ‘ñamombeʼu vaʼerãha umi tetãrupi haʼe ipoderosoha’. Entéro koʼã mbaʼe rupive ikatu hína ñamombaʼeguasu ñande Ru yvagapeguápe. Yma umi judío ifiélva ha umi kristiáno síglo primeropegua ndodudái vaʼekue omombeʼu hag̃ua la héntepe entéro mbaʼe Jehová ojapo vaʼekue hesehapekuéra, ha odefende voi hikuái Jehová réra (Dan. 3:​16-18; Hech. 4:29). ¿Mbaʼéichapa ñande avei koʼág̃a ikatu jajapo upéva?

9, 10. ¿Mbaʼépa ñaaprende Angelica ehémplogui? (Ehecha pe taʼanga).

⁹ Jahechamína la oiko vaʼekue peteĩ ermána héravare Angelica. a Haʼe ningo oiko Estados Unídospe, ha pyʼaguasúpe odefende Jehová réra pe lugár ombaʼapohápe. Haʼe ningo oñepyrũta kuri ombaʼapo peteĩ emprésape. Upévare oñeinvita chupe ha entéro umi ipyahúvape oñepresenta hag̃ua ikompañerokuéra rovake. Upévare Angelica oprepara unas kuánta fóto ohechauka hag̃ua mbaʼeichaitépa ovyʼa haʼe haguére testígo de Jehová. Péro haʼe oñeʼẽ mboyvemi, peteĩ ikompañéro de traváho oñepresenta ha omombeʼu haʼe okakuaa hague peteĩ família de Testígope. Hiʼarive oñepyrũ oñembohory umi mbaʼe jagueroviávare. Angelica omombeʼu: “Upérõ akyhyjeterei vaʼekue, péro apensa avei: ‘¿Mbaʼéicha piko apytátante akirirĩ ha ahejáta álgien oñeʼẽ vai Jehováre?’”.

¹⁰ Pe ikompañéro oñeʼẽmba rire, Angelica mbykymi oñemboʼe Jehovápe. Upéi trankílonte heʼi pe ikompañérope: “Che ningo ndéicha avei akakuaa peteĩ família de Testígope, ha koʼag̃aite peve che haʼe testígo de Jehová”.  Upérõ legálmente haku la yvy, péro Angelica oñehaʼãmbaite oĩ trankíla. Haʼe ohechauka ikompañerokuérape umi fóto ojekuaahápe haʼe ha iñamigokuéra oserviha vyʼápe Jehovápe. Avei haʼe trankílonte oexplika ikompañerokuérape umi mbaʼe ogueroviáva (1 Ped. 3:15). ¿Mbaʼépa oiko upéi? Angelica ojapopa rire la ipresentasión, pe ikompañéro oñetrankilisáma avei. Upéi pe ikompañéro voi oñepyrũ imanduʼa umi mbaʼe porã ohasa vaʼekuére imitãme oĩrõ guare umi testígo de Jehová apytépe. Angelica heʼi: “Jehová ningo omerese ñadefende héra. Tuicha priviléhio ningo ñamombeʼu ótrope mbaʼeichaguápa hína haʼe”. Ñande avei jareko pe priviléhio ñamombaʼeguasúvo Jehová réra oĩramo jepe algúno ndorrespetáiva chupe.

11. ¿Mbaʼéichapa ymaite guive umi oservíva Jehovápe ojapo la heʼíva Salmo 96:8?

¹¹ (Elee Salmo 96:8). Ikatu ñamombaʼeguasu Jehovápe ñane mbaʼerepy rupive. Ymaite guive umi ifiélva Jehovápe omombaʼeguasu chupe umi mbaʼerepy rupive (Prov. 3:9). Por ehémplo yma umi israelita omeʼẽ vaʼekue ikontrivusión oñemopuʼã ha oñemantene hag̃ua pe témplo (2 Rey. 12:​4, 5; 1 Crón. 29:​3-9). Avei Jesús disipulokuéra ‘oipuru vaʼekue ipláta ha umi mbaʼe orekóva oñatende hag̃ua hese ha umi apóstol rehe’ (Luc. 8:​1-3). La Biblia avei omombeʼu síglo primérope oĩ hague kristiáno ohasa asýva pe ñembyahýi káusare. Upévare umi ermáno ha ermána oikóva ótro lugárpe omeʼẽ pláta oipytyvõ hag̃ua iñermanokuérape (Hech. 11:​27-29). Koʼág̃a avei ñande ikatu ñamombaʼeguasu Jehovápe umi ñane kontrivusión rupive.

12. ¿Mbaʼéichapa umi ñane kontrivusión ikatu omombaʼeguasu Jehovápe? (Ehecha pe taʼanga).

¹² Jahechamína peteĩ ehémplo ohechaukáva mbaʼéichapa umi ñane kontrivusión omombaʼeguasu Jehovápe. Áño 2020-pe ou vaʼekue peteĩ séka ipukuetereíva Zimbábuepe. Hetaiterei persóna haimete omano ñembyahýigui, ha upe situasiónpe oĩ vaʼekue avei peteĩ ñane ermána hérava Prisca. Ijetuʼuetereíramo jepe pe séka tiémpo, Prisca lomímonte osegi opredika miércoles ha vierneskue. Haʼe osegi ojapo upéva umi hénte opreparaha tiémpo ikokue oñemitỹ hag̃ua. Umi ivesinokuéra oñembohorými vaʼekue hese osẽ haguére opredika opyta rangue ombaʼapo ikokuépe. Haʼekuéra heʼi Príscape: “Péichante esegírõ emanóta vareʼágui”. Péro Prisca oĩ segúra Jehová okuidataha hese. Upévare heʼi ivesinokuérape: “Jehová núnka ndohejareíriva isiervokuérape”. Tiémpo riremi, ñane organisasión rupive  oñemeʼẽ Príscape tembiʼu ha umi mbaʼe oikotevẽva. Umi mbaʼe ningo ikatu hína ojejapo ñane kontrivusión rupive. Prisca vesinokuéra opyta ijurujái ohechávo la oikóva ha heʼi hikuái Príscape: “Ñandejára núnka ndofalláiva nendive, upévare ore roikuaase avei la nde Járape”. Upéi 7 ivesíno oñepyrũma oho rreunionhápe.

13. ¿Mbaʼéichapa ñane kondúkta rupive ikatu jahechauka ñamombaʼeguasuha Jehovápe? (Salmo 96:9).

¹³ (Elee Salmo 96:9). Ikatu ñamombaʼeguasu Jehovápe ñane kondúkta rupive. Yma umi saserdóte oservi hag̃ua Jehovápe itémplope tekotevẽ vaʼekue ipotĩ asy (Éx. 40:​30-32). Ñande avei jajapo vaʼerã upéicha, péro oĩ álgo iñimportanteve jeýva upévagui. Tekotevẽ ñanekondúkta potĩ Jehová renondépe (Sal. 24:​3, 4; 1 Ped. 1:​15, 16). La Biblia heʼi ñañehaʼã vaʼerãha jaipeʼa hag̃ua ñandejehegui pe “kondúkta yma guare”, ha ñamonde hag̃ua aóicha pe “kondúkta pyahu”. Upéva heʼise nañapensamoʼãiha umi mbaʼe ikyʼávare, térã ndajajapomoʼãiha umi mbaʼe ndogustáiva Jehovápe. Upéva rangue ñañehaʼãmbaitéta jajapo térã ñapensa umi mbaʼe ohechaukáva jasegiha Jehová ehémplo (Col. 3:​9, 10). Umi iviolentovéva térã umi hekovaivéva jepe ikatu okambia. Haʼekuéra ikatu omonde aóicha pe kondúkta pyahu Jehová oipytyvõ rupi chupekuéra.

14. ¿Mbaʼépa ñaaprende Jack ehémplogui? (Ehecha pe taʼanga).

¹⁴ Jahechamína Jack ehémplo. Haʼe ningo haʼe vaʼekue peteĩ kuimbaʼe iviolénto ha ipeligrosoitereíva, upévare oñehenói vaʼekue chupe “pe Demónio”. Haʼe ningo ojapo vaʼekue heta mbaʼe ivaietereíva, upévare oñekondena chupe ojejuka hag̃ua. Péro Jack ohaʼarõ aja oñekumpli ikondéna, peteĩ ermáno oho ovisita pe kársel ha oofrese chupe peteĩ kúrso bíblico. Upémarõ haʼe oñepyrũ ostudia la Biblia. Jack ojapo vaʼekue hetaiterei mbaʼe ivaíva, péro haʼe oheja pe ikondúkta yma guare, okambia ha tiémpo rire ojevautisa. Haʼe ningo tuichaiterei okambia vaʼekue. Upévare pe día ojejukatahápe chupe, algúno umi guárdia hesay pororopa ojedespedívo chugui. Peteĩ sarhénto ombaʼapóva pe kárselpe heʼi vaʼekue: “Jack haʼe vaʼekue pe préso ipeligrosovéva, péro koʼág̃a haʼe hína la ivuenovéva”. Ohasa rire una semána Jack omano hague, umi ermáno oho kárselpe ojapo hag̃ua pe rreunión éntre semanagua. Upépe umi ermáno otopa peteĩ préso ohóvape primera ves rreunionhápe. ¿Mbaʼépa la omomýi vaʼekue chupe oĩ hag̃ua rreunionhápe?  Haʼe ningo tuichaiterei oñesorprende ohechávo mbaʼeichaitépa Jack okambia, ha oikuaase mbaʼépa ojapo vaʼerã oservi hag̃ua avei Jehovápe. Ko ehémplo rupive jahecha mbaʼeichaitépa ikatu ñamombaʼeguasu Jehovápe ñane kondúkta rupive (1 Ped. 2:12).

¿MBAʼÉPA JEHOVÁ OJAPÓTA KOʼẼRÕITÉMA OMOMBAʼEGUASU HAG̃UA HÉRA?

15. ¿Mbaʼéichapa Jehová koʼẽrõitéma omopotĩetéta héra? (Salmo 96:​10-13).

¹⁵ (Elee Salmo 96:​10-13). Umi versíkulo paha oĩva Salmo 96-pe heʼi Jehová haʼeha peteĩ Hués ha Rréi ihústova. Upéicharõ, ¿mbaʼépa Jehová koʼẽrõitéma ojapóta omombaʼeguasu hag̃ua héra? Haʼe ojapóta hustísia. Koʼẽrõitéma ohundíta Babilonia Guasúpe omongyʼa haguére héra porãite (Apoc. 17:​5, 16; 19:​1, 2). Algúno ohecha vove mbaʼéichapa oñehundi Babilonia Guasúpe ikatu hína odesidi oñemoĩ ñande ykére oservi hag̃ua Jehovápe. Upéi Armagedónpe Jehová ohundietéta Satanás múndo, ha ohundíta avei entéro umi oñemoĩvape ikóntrape ha umi omongyʼávape héra. Péro haʼe osalváta umi ohayhúvape chupe, umi iñeʼẽrendúvape ha umi omombaʼeguasusévape héra (Mar. 8:38; 2 Tes. 1:​6-10). Jesús goviérno de 1.000 áño ha pe pruéva finál rire, Jehová ohechaukátama omereseha entéro persóna oadora chupe añoiténte (Apoc. 20:​7-10). Upe tiémpope g̃uarã “opárupi ojekuaáta Jehová podér tuichaha, upe ojekuaáva omyenyhẽta ko yvy, pe y omyenyhẽháicha pe mar” (Hab. 2:14).

16. ¿Mbaʼépa jadesidi vaʼerã jajapotaha? (Ehecha pe taʼanga).

¹⁶ Igustoitéta ningo enterove persóna omombaʼeguasu vove Jehová réra porãite. Péro og̃uahẽ aja upe día, ikatu jaaprovecha entéro oportunida jarekóva ñamombaʼeguasu hag̃ua Jehovápe. Jasegi hag̃ua ñanemanduʼa ko mbaʼe iñimportantetévare, pe Kuérpo Governánte odesidi pe téxto ko áño 2025-pe g̃uarã haʼetaha Salmo 96:8. Upépe heʼi: “Pemombaʼeguasu vaʼerã Jehová réra”.