1, 2. ¿Mbaʼe ehémplopa ñanepytyvõ ñantende hag̃ua mbaʼéichapa Jehová oñeñandu vaʼekue oñeñeʼẽ vaírõ guare hese?

 ÑAÑEIMAHINAMÍNA peteĩ persóna jahayhúva oñeʼẽ vaiha ñanderehe. Ñande jaikuaa japuha la heʼíva, péro oĩ la ogueroviáva chupe. Ha ivaiveha katu, umíva oñepyrũma omosarambi upe japu ha hetavéntema oĩ la ogueroviáva. ¿Mbaʼéichapa ñañeñandúta? Katuete ningo ñandepyʼapýta la hénte oñeʼẽ vaíta haguére ñanderehe ha ñañeñandu vaíta voi (Prov. 22:1).

² Ko ehémplo ikatu ñanepytyvõ ñantende hag̃ua mbaʼéichapa Jehová oñeñandu vaʼekue peteĩva umi itaʼýra oĩva yvágape oñepyrũrõ guare ijapu ha oñeʼẽ vai hese. Eva oguerovia vaʼekue upe japu, upéicha rupi umi ñande túa ypykue opuʼã Jehová kóntrape. Upéva káusare enterove ñande japeka ha kon el tiémpo ñamano (Gén. 3:​1-6; Rom. 5:12). Hiʼarive umi japu Satanás omosarambi vaʼekue hardín de Edénpe la omoñepyrũ vaʼekue entéro provléma oĩva ko múndope, por ehémplo ñemano, gérra ha sufrimiénto. Katuete ningo Jehová oñeñandu vai umi japu ojeʼe vaʼekuére, péro upéicharõ jepe haʼe ndopytái vaʼekue oñamarga ha ipyʼaro. La Biblia heʼi voi hese haʼeha ‘Ñandejára ovyʼáva’ (1 Tim. 1:11).

3. ¿Mbaʼépa enterove ikatu jajapo?

³ Ñande ikatu ñaipytyvõ ojekuaa hag̃ua japuha la Satanás heʼi vaʼekue Jehováre. Upéva ikatu jajapo ñakumplívo ko mandamiénto: “Pembotuicha Jehová réra porãite” (Sal. 113:1). ¿Ha mbaʼéichapa ikatu jajapo upéva? Ñañeʼẽ porãvo ótrope Jehováre. ¿Ñamombaʼeguasusépa avei Jehovápe upéicha? Jahechamína mbohapy mbaʼe ñanepytyvõtava ñamombaʼeguasu hag̃ua Ñandejára réra ñande pyʼaite guive.

 ÑAMBOVYʼA JEHOVÁPE

4. ¿Mbaʼérepa Jehová oipota ñamombaʼeguasu chupe? Emoĩ peteĩ ehémplo. (Ehecha pe taʼanga).

⁴ Jehová ningo ñande Ru yvagapegua ha haʼe oipota oñemombaʼeguasu héra (Sal. 119:108). Jaikuaa ningo Ñandejára ipoderosoitereiha, ¿péro haʼe piko ñandéicha avei oikotevẽ oñemombaʼe chupe oñeñandu porã hag̃ua? Nahániri. Por ehémplo ñañeimahinamína peteĩ mitãkuñaʼi oñemoag̃uiha itúare ha oañuã mbarete chupe ha heʼi: “Rohayhueterei papa, ndaipóri ótro ndeichagua”. Itúa opukavy ha ovyʼaiterei voi la itajyraʼi ojapo haguére péicha. ¿Mbaʼérepa? ¿Oikotevẽ mbaʼéiko itajyraʼi oguerohory chupe haʼe oñeñandu porã hag̃ua? Nahániri. Haʼe ningo ovyʼa la itajyraʼi heʼi jave ohayhu ha omombaʼeha chupe. Haʼe oikuaa koʼã mbaʼe oipytyvõtaha itajyraʼípe ovyʼa hag̃ua okakuaa aja. Péicha avei Jehová ovyʼa ñamombaʼeguasu jave chupe, pórke haʼeichagua túa ndaipóri ótro.

5. ¿Mbaʼépa jahechauka ñamombaʼeguasu jave Jehovápe?

⁵ Ñamombaʼeguasu jave ñande Ru yvagapeguápe jahechauka hína japuha la Satanás heʼi vaʼekue ñanderehe. Haʼe heʼi vaʼekue ndaiporimoʼãiha ni peteĩ persóna ohasa asy jave osegítava ifiél Ñandejárape ha odefende chupe. Satanás heʼi vaʼekue enterove jahejataha Ñandejárape jahechakuaáramo upéva ñanevenefisiataha (Job 1:​9-11; 2:4). Péro por ehémplo Job ifiél vaʼekue ha ohechauka Satanás ijapuha. ¿Ha ndépa esegíta avei ndefiél Ñandejárape? Remombaʼeguasu jave Jehovápe rehechauka avei hína Satanás ijapuha. Káda uno ikatu ñambovyʼa Jehovápe, jadesidíramo ñamombaʼeguasutaha héra ha jaservi chupe fiélmente (Prov. 27:11). ¡Añetehápe tuichaiterei mbaʼe la ikatúva jajapo!

6. ¿Mbaʼéichapa ikatu jasegi rréi David ha umi levita ehémplo? (Nehemías 9:5).

⁶ Umi ohayhúva Jehovápe, ipyʼaite guive voi omombaʼeguasuse héra. Rréi David oskrivi vaʼekue: “Pehejamíntena chéve tamombaʼeguasu Jehovápe. Che pyʼaite guive ambotuicháta héra porãite, Ñandejára réra sagrádo hína” (Sal. 103:1). David oikuaa vaʼekue omombaʼeguasu jave Jehová réra, omombaʼeguasuha hína Jehovaitépe voi. Ñahendu jave Jehová réra ñapensa mbaʼeichaguápa haʼe, ñanemanduʼa umi kualida porã orekóvare, ha umi mbaʼe ijojahaʼỹva ojapóvare. Davídpe g̃uarã sagrádo vaʼekue Jehová réra, upévare omombaʼeguasuse héra porãite ha ojapose upéva ‘ipyʼaite guive’. Upeichaite vaʼekue avei umi levita, haʼekuéra púntape voi omombaʼeguasu vaʼekue Jehovápe iñermanokuéra apytépe. Umi levita iñumílde ha orrekonose  la umi mbaʼe heʼíva rupivénte ndaikatumoʼãiha omombaʼeguasu Jehovápe la omereseháicha (elee Nehemías 9:5). Mbaʼeichaitépa oiméne Jehová ovyʼa rakaʼe ohendúrõ guare omombaʼeguasuha chupe hikuái ipyʼaite guive.

7. ¿Mbaʼéichapa ikatu ñamombaʼeguasu Jehovápe predikasiónpe ha umi mbaʼe jajapóvape káda día?

⁷ Koʼág̃arupi ñamombaʼeguasu Jehovápe umi mbaʼe jaʼéva rupive jahechaukáramo jahayhu ha jaagradeseha chupe. Japredika jave, ñande ñaipytyvõse la héntepe oñemoag̃ui hag̃ua Jehováre, ha ñandéicha avei ohayhu hag̃ua chupe (Sant. 4:8). Ñande jahechaukaseterei voi chupekuéra la Biblia rupive umi kualida porã Jehová orekóva. Por ehémplo mbaʼéichapa haʼe oporohayhu, ihústo, iñarandu, ha ipoderóso. Avei ñamombaʼeguasu Jehovápe ha ñambovyʼa chupe jajapóramo opa ikatúva jasegi hag̃ua iñehémplo (Efes. 5:1). Jajapo jave upéicha la hénte ikatu ohechakuaa ñanediferenteha ha oikuaase hikuái mbaʼérepa (Mat. 5:​14-16). Avei jatrata jave hendivekuéra káda día ikatu jareko la oportunida jaexplika hag̃ua chupekuéra mbaʼérepa ñanediferénte. Péicha jajapóvo umi persóna ipyʼaporãva oñemoag̃uiséta katuete Ñandejárare. Ha ñande jajapóramo koʼã mbaʼe ñamombaʼeguasu hag̃ua Jehovápe katuete ñambovyʼáta chupe (1 Tim. 2:​3, 4).

ÑAMBOVYʼA JESÚSPE

8. ¿Mbaʼéichapa Jesús omoĩ vaʼekue pe ehémplo iporãvéva oñemombaʼeguasu hag̃ua Jehová réra?

⁸ Ndaipóri ótro ko univérsope Jesúsgui oikuaa porãvéva Itúa Jehovápe (Mat. 11:27). Jesús ningo ohayhu Itúape, ha púntape voi ohechaukami omombaʼeguasuseha Itúa réra (Juan 14:31). Oñemboʼérõ guare Itúape pe pyhare omano mboyve, heʼi vaʼekue mbaʼépa la iñimportantevéva ojapo vaʼekue. Haʼe heʼi: “Che aikuaauka chupekuéra nde réra” (Juan 17:26). ¿Mbaʼéichapa haʼe ojapo vaʼekue upéva?

9. ¿Mbaʼe ehémplopa Jesús oipuru vaʼekue oipytyvõ hag̃ua umi héntepe oikuaa porãve hag̃ua Jehovápe?

⁹ Jesús ndahaʼéi omombeʼúnte vaʼekue la héntepe Ñandejára heraha Jehová, upéva ningo umi judío oikuaáma vaʼekue voi. Upéva rangue Jesús ‘oikuaauka vaʼekue chupekuéra mávapa Ñandejára’ (Juan 1:​17, 18). Por ehémplo pe Escrituras Hebreas heʼi vaʼekue Jehováre oporoporiahuvereko ha oporombyasyha (Éx. 34:​5-7). Péro Jesús omyesakã porãve vaʼekue upéva omombeʼúvo pe ehémplo oñeʼẽva pe taʼýra ofalla vaʼekuére. Pe túa ohechávo la itaʼýra oñarrepenti vaʼekue ouha hína, odipara oho ohug̃uaitĩ chupe oĩramo jepe ‘mombyry gueteri’, ha og̃uahẽvo hendápe oañuã ha operdona chupe ipyʼaite guive. Jaleévo upéva ñanepytyvõ jahechakuaa hag̃ua mbaʼeichaitépa Jehová oporombyasy ha oporoporiahuvereko (Luc. 15:​11-32). Jahechaháicha Jesús oipytyvõ vaʼekue la héntepe oikuaa porãve hag̃ua Jehovápe.

10. a) ¿Mbaʼéichapa jaikuaa Jesús oipuru hague Ñandejára réra ha oipota hague avei umi ótro ojapo upéicha? (Marcos 5:19). (Ehecha pe taʼanga). b) ¿Mbaʼépa Jesús oipota ñande jajapo koʼág̃arupi?

¹⁰ Jesús oipota vaʼekue umi ótra hénte oipuru Ñandejára réra. Péro heta líder rrelihióso itiempopegua oproivi vaʼekue chuguikuéra upéva, pórke heʼi Ñandejára réra sagradoitereiha. Upéicharõ jepe, Jesús ndohejái vaʼekue ojoko chupe koʼã kostúmbre omombaʼeguasu hag̃ua Ñandejára réra. Epensamíntena la oiko vaʼekuére Jesús omonguerárõ guare peteĩ oñendemoniávape pe lugár héravape Gerasa. Upérõ umi hénte opyta vaʼekue okyhyjeterei ha upévare ojerure Jesúspe oho hag̃ua upe lugárgui (Mar. 5:​16, 17). Upéicharõ jepe Jesús oipota vaʼekue la hénte upepegua oikuaa  Jehová réra. Upévare haʼe ojerure pe kuimbaʼe oñendemonia vaʼekuépe teʼi umi héntepe mbaʼépa Jehová ojapo, ndahaʼéi mbaʼépa haʼe ojapo (elee Marcos 5:19). a Upéva avei haʼe oipota koʼág̃a jajapo. Jesús oipota ñamombeʼu oparupiete ko múndope Ñandejára réra (Mat. 24:​14, 28:​19, 20). Ñañehaʼã jave jajapo upéva ñambovyʼa hína ñande Rréi Jesúspe.

11. ¿Mbaʼépa Jesús heʼi vaʼekue idisipulokuérape ojerure hag̃ua oñemboʼe jave, ha mbaʼérepa upéva iñimportantete? (Ezequiel 36:23).

¹¹ Jehová ningo ndoipotavéima avave oñeʼẽ vai hérare. Upéva rangue oipota toñemombaʼeguasu la héra ha toñesantifika. Jesús oikuaa rupi upéva heʼi vaʼekue idisipulokuérape oñemboʼe hag̃ua péicha: “Ore Ru reiméva yvágape, toñembotuicha nde réra” (Mat. 6:9). Jesús oikuaa vaʼekue upéva haʼeha la iñimportantevéva ko univérsope (elee Ezequiel 36:23). Haʼéicha oñehaʼã vaʼekue omopotĩ hag̃ua Ñandejára réra ndaipóri voi ótro. Péro iñenemigokuéra ojagarrárõ guare chupe heʼi hese haʼe oñeʼẽ vaiha Ñandejárare. Jesúspe g̃uarã upéva haʼe vaʼekue la pekádo ivaivéva oĩva, ombojeguaru voi chupe opensa haguérente upévare. Ndareíri oñeñandu vaieterei vaʼekue oikuaágui oñekondenataha chupe oñeʼẽ vai haguére Ñandejárare. Upéva oiméne la okevrantave vaʼekue Jesúspe ojejagarra mboyve chupe (Luc. 22:​41-44).

12. ¿Mbaʼépa ojapo vaʼekue Jesús ombotuicha hag̃ua Jehová réra? Emyesakã.

¹² Ombotuicha hag̃ua Itúa réra, Jesús oheja vaʼekue ojetortura chupe, oñeñeʼẽ vai hese ha ojeakusa rei chupe. Haʼe iñeʼẽrendu vaʼekue Itúape opa mbaʼépe ha ndojapói vaʼekue mbaʼeve ombyasýtava upe rire (Heb. 12:2). Upe moménto ijetuʼuetévape, Jesús oikuaa vaʼekue Satanás direktoite oataka hague chupe (Luc. 22:​2-4; 23:​33, 34). Satanás oipota vaʼekue Jesús opeka ha oheja Jehovápe, péro nosẽi la ijidéape. Upéicha Jesús ohechauka porã vaʼekue ndaiporiha ijapuvéva Satanásgui, ha Jehová orekoha isiérvo osegítava ifiél chupe ohasáramo jepe umi situasión ijetuʼuvéva.

13. ¿Mbaʼéichapa ikatu rembovyʼa ñande rréi Jesúspe?

¹³ ¿Mbaʼépa ikatu rejapo rembovyʼa hag̃ua  ñande Rréi Jesúspe? Esegíkena emombaʼeguasu Ñandejára réra ha eipytyvõ ótrope oikuaa porã hag̃ua chupe. Péicha rejapóramo resegíta hína Jesús ehémplo (1 Ped. 2:21). Ha Jesús ojapo haguéicha, rembovyʼáta Jehovápe ha rehechaukáta iñenemígo Satanás haʼeha peteĩ tekove japu.

ÑAIPYTYVÕ ÑANDE RAPICHÁPE OJESALVA HAG̃UA

14, 15. ¿Mbaʼe iporãvapa jahecha oikoha ñaipytyvõ jave umi héntepe oikuaa hag̃ua Jehovápe?

¹⁴ Ñamombaʼeguasu jave Jehová réra, ñaipytyvõ ñande rapichápe ojesalva hag̃ua. ¿Mbaʼérepa jaʼe upéva? Epensamíntena, Satanás ningo ‘omohesatũ umi héntepe ani hag̃ua opilla mbaʼeve’ (2 Cor. 4:4). Upéicha rupi haʼekuéra oguerovia umi japu Satanás omosarambíva ko múndope. Por ehémplo Ñandejára ndoexistiriha, oĩha mombyry ñandehegui ha noñeinteresaiha ñanderehe. Avei heʼi Ñandejára ipyʼahatãha ha ombohasa asyha umi iñañávape pára siémpre. ¿Maʼerãpa Satanás ojapo upéicha? Omongyʼa hag̃ua Jehová réra ha ani hag̃ua umi hénte oñemoag̃uise hese. Péro japredika jave, ñamboʼe jave umi héntepe pe añetegua ha ñamombaʼeguasu jave Ñandejára réra, ndajahejái hína Satanáspe osẽ la ijidéape. ¿Ha mbaʼépa jahupytýta avei upe haguére?

¹⁵ Ndaijojahái ningo umi mbaʼe ikatúva jahupyty Ñandejára Ñeʼẽ rupive. Ñamboʼe jave la héntepe pe añetegua, haʼekuéra oñepyrũ oikuaa porãve Jehovápe ha upéicha jave jahecha peteĩ mbaʼe iporãitereíva. Mbeguekatúpe, umi hénte Satanás omohesatũ vaʼekue, oñepyrũma opilla hetave mbaʼe ha ohayhu Jehovápe ñande jahayhuháicha chupe. Ha ndahaʼéi voi upévante, osorprendeterei chupekuéra mbaʼeichaitépa Jehová ipoderóso (Is. 40:26). Haʼekuéra ojerovia hese ohechávo ihustoitereiha (Deut. 32:4). Ojesapeʼa hikuái ohechávo mbaʼeichaitépa Jehová iñarandu (Is. 55:9; Rom. 11:33). Tuicha ipyʼaguapyve hikuái oaprendévo Jehová mborayhu memeteha (1 Juan 4:8). Ha oñemoag̃uívo ohóvo Jehováre, oikuaa hikuái ikatuha oiko chuguikuéra Jehová família ha ogueroviavéntema ikatutaha oikove pára siémpre amo gotyove. ¡Ajépa tuichaite mbaʼe ñaipytyvõ umi héntepe  oñemoag̃ui hag̃ua Jehováre! Jajapo jave péicha, Jehová heʼi ñanderehe ñande haʼeha ‘iñajudánte’ (1 Cor. 3:​5, 9).

16. ¿Mbaʼéichapa oipytyvõ la héntepe oikuaávo Ñandejára réra? Emombeʼu peteĩ ehémplo.

¹⁶ Ñepyrũrã, ikatu ñamboʼe la héntepe Ñandejára heraha Jehová, upévante voi tuicháma ikatu oipytyvõ umi ipyʼaporãvape. Por ehémplo, peteĩ mitãkuña hérava Alía b oreko vaʼekue peteĩ rrelihión nomboʼéiva la Biblia heʼíva. Haʼe noñandúi vaʼekue oipytyvõha chupe irrelihión ni omoag̃uiha chupe Ñandejárare. Péro upéva okambia oñepyrũ rire ostudia la Biblia testígo de Jehovándi. Ni ndogueroviaséi kuri oikuaárõ guare ojepeʼa hague heta Bíbliagui Ñandejára réra ha oñemoĩ hague hendaguépe Señór ha mbaʼe. Upéi haʼe oñepyrũma oñandu Ñandejára haʼeha iñamígo, oikuaa rire Ñandejára réra tuichaiterei okambia la hekove. Haʼe heʼi voi: “¡Avía sído la che mehór amígo oreko raʼe la héra!”. ¿Ha mbaʼépa oiko upéi? Haʼe heʼi: “Tuichaiterei chepyʼaguapy apytávo, amombaʼeterei la aaprende vaʼekue”. Steve haʼe vaʼekue peteĩ músiko ha okakuaa vaʼekue peteĩ família ijudío hatãvape. Haʼe oñemomombyry vaʼekue entéro rrelihióngui pórke ohecha hetaiterei oĩha la hovamokõiva. Upéi isy omano riremi, oñeinvita chupe ohendu hag̃ua peteĩ testígo de Jehová omboʼe jave ótra persónape la Biblia. Opokoiterei hese oikuaárõ guare mbaʼéichapa héra Ñandejára. Haʼe heʼi: “Che ndaikuaái vaʼekue Ñandejára réra”. Upéi heʼi avei: “Hasypeve ahechakuaa Ñandejára añetehápe oexistiha, ha upépe añemeʼẽ enkuénta atopa hague che amigorã”.

17. ¿Mbaʼérepa nde esegise emombaʼeguasu Ñandejára réra? (Ehecha pe taʼanga).

¹⁷ Repredika ha reporomboʼe jave, ¿emombeʼúpa la héntepe mbaʼéichapa héra Ñandejára? ¿Eipytyvõpa chupekuéra oikuaa porã hag̃ua Jehovápe? Ejapo jave upéicha, embotuicha hína Ñandejára réra. Esegíkena emombaʼeguasu Ñandejára réra eipytyvõvo la héntepe ndahaʼéi oikuaa hag̃uánte pe téra Jehová, síno oikuaa hag̃ua mbaʼeichagua Dióspa haʼe. Péicha rejapóramo, eipytyvõta nde rapichápe ojesalva hag̃ua. Resegíta avei ñande Rréi Jesucristo ehémplo ha iñimportanteveha, rembovyʼáta ñande Ru ñanderayhuetéva Jehovápe. Péicha ikatúta ere pe salmísta heʼi haguéicha: “Ambotuicháta nde réra, ajapóta upéva opa árare voi” (Sal. 145:2).