1. ¿Mbaʼérepa jasegi vaʼerã Jehová gía? Emoĩ peteĩ ehémplo.

 EÑEIMAHINAMÍNA rekañyeteha peteĩ kaʼaguy mbytépe ha upépe oĩ heta mbaʼe ikatúva ndeapeligra. Por ehémplo umi mymba ñarõ, umi vícho iponsóñava ha ikatu voi hína ndepyho peteĩ yvykuápe. Katuete revyʼáta oĩramo nendive peteĩ oikuaa porãva pe lugár ha ikatúva ndegia ani hag̃ua oiko nderehe mbaʼeve ivaíva. Upeichaite avei ko múndope, oĩ heta mbaʼe ñandeapeligráva ha ikatúva operhudika ñane amista Jehovándi. Péro jareko peteĩ ikatúva ñandegia porãiterei: Upéva hína Jehová voi. Haʼe ohechauka ñandéve mbaʼe tapérupipa jaha vaʼerã jajehekýi hag̃ua umi pelígrogui ha ñag̃uahẽ hag̃ua pe múndo pyahúpe ikatutahápe jaiko pára siémpre.

2. ¿Mbaʼéichapa ñandegia Jehová?

² ¿Mbaʼéichapa ñandegia Jehová? Prinsipálmente la Biblia rupive. Péro avei ojevale unos kuánto kuimbaʼére ñandegia hag̃ua. Por ehémplo, oipuru ‘pe esklávo de konfiánsa ha iñarandúvape’ omeʼẽva ñandéve pe aliménto hiʼoraitépe ñanepytyvõva jadesidi porã hag̃ua (Mat. 24:45). Péro ndahaʼéi hesekuéra añónte la ojevaléva, síno ojevale avei umi superintendénte de sirkuíto ha umi ansiáno oĩvare kongregasiónpe. Haʼekuéra ñanemokyreʼỹ ha ñandegia ijetuʼu jave la situasión. Jaagradeseterei ningo Jehovápe ñandegia porãite haguére koʼã ára paha ivaietévape. Jasegíramo igía haʼe ñandeguerohorýta ha jasegíta pe tape ñandeguerahávare pe jeikove opaveʼỹvape.

3. ¿Mbaʼépa jahecháta ko artíkulope?

³ Upéicharõ jepe, sapyʼánte ikatu hína ijetuʼu jasegi Jehová gía, koʼýte og̃uahẽ jave ñandéve kuimbaʼe imperfékto rupive. ¿Mbaʼérepa ikatu ijetuʼu upéva? Pórke sapyʼánte ndeʼíri ñandéve hikuái umi mbaʼe ñahenduséva térã ikatu ñapensa umi konsého omeʼẽva hikuái naisentidoiha ha ndoikomoʼãiha.  Upévare ikatu mbaʼe ñapensa umíva ndouiha Jehovágui. Upéicha jave, tekotevẽ jajerovia Jehová ogiaha hína ipuévlope ha siémpre iporãvetaha jasegi la igía. Ani hag̃ua jaduda chugui ko artíkulope ñaanalisáta mbohapy mbaʼe: 1) ¿Mbaʼéichapa Jehová ogia vaʼekue ipuévlope ymave? 2) ¿Mbaʼéichapa ogia ipuévlope koʼág̃arupi? 3) ¿Ha mbaʼe iporãvapa jahupytýta siémpre jasegíramo la igía?

JEHOVÁ OGIA VAʼEKUE UMI ISRAELÍTAPE

4, 5. ¿Mbaʼéichapa Jehová ohechauka vaʼekue ojevaleha Moisés rehe ogia hag̃ua umi israelítape? (Ehecha pe taʼanga).

⁴ Jehová oiporavo vaʼekue Moiséspe oguenohẽ hag̃ua umi israelítape Egíptogui. Umi israelita ohechakuaa hag̃ua upéva, Jehová ojevale kuri peteĩ araíre ogia hag̃ua chupekuéra de diakue ha tatarendýre ogia hag̃ua chupekuéra pyharekue (Éx. 13:21). Ojegia rupi koʼã mokõi mbaʼére, Moisés ha umi israelita og̃uahẽ pe mar Rójope. Og̃uahẽrõ guare hikuái upépe, umi israelita ndoikuaavéi moõ gotyopa ojapíta. Upévare oñepyrũ ojedesesperapa hikuái oimoʼãgui umi egipcio ojukapataha chupekuéra. Haʼekuéra heʼi Moisés tuicha ojavy hague orahávo chupekuéra upépe, péro upépe voi kuri la Jehová oipota oho umi israelita (Éx. 14:2). Upéi haʼe osalva chupekuéra oñeimoʼãʼỹ haguéicha (Éx. 14:​26-28).

⁵ Upe guive, 40 áñore Moisés ojegia pe arai ha pe tatarendýre ogia hag̃ua umi israelítape pe desiértore. a Sapyʼánte Jehová omboguejy pe arai Moisés róga kárpa ári ha enterove umi israelita ikatu kuri ohecha upéva (Éx. 33:​7, 9, 10). Pe arai guive Jehová oñeʼẽ Moisésndi ha omeʼẽ chupe umi instruksión umi israelítape g̃uarã (Sal. 99:7). Oĩ vaʼekue heta mbaʼe ohechauka porãva umi israelítape Jehová ojevale hague Moisés rehe ogia hag̃ua chupekuéra.

6. ¿Mbaʼéichapa orreaksiona vaʼekue umi israelita Jehová ogiasérõ guare chupekuéra? (Números 14:​2, 10, 11).

⁶ Ñambyasýramo jepe umi israelita norrekonoseséi umi pruéva ohechauka porãva Jehová ojevale hague Moisésre ogia hag̃ua chupekuéra (elee Números 14:​2, 10, 11). Haʼekuéra heta vése norrekonoseséi kuri upéva. Upévare Jehová nopermitíri chupekuéra oike pe yvy oñepromete vaʼekuépe (Núm. 14:30).

7. ¿Máva mávapa osegi vaʼekue Jehová gía? (Números 14:24). (Ehecha pe taʼanga).

⁷ Péro oĩ vaʼekue unos kuánto israelita osegíva Jehová gía. Por ehémplo Jehová heʼi vaʼekue: ‘Caleb osegi iñeʼẽrendu chéve ipyʼaite guive’ (elee Números 14:24). Ñandejára ovendesi vaʼekue Calébpe ha opermiti chupe oho oiko pe lugár ogustavehápe chupe Canaánpe (Jos. 14:​12-14). Umi israelita oike vaʼekue pe Tiérra Prometídape omoĩ avei ehémplo porã osegívo Jehová gía. Por ehémplo Josuépe oñemoĩrõ guare odirihi hag̃ua umi israelítape Moisés rekovia, haʼekuéra ‘orrespeta chupe ipyʼaite guive haʼe oikove aja entéro’ (Jos. 4:14). Upéicha rupi Jehová ovendesi ha opermiti chupekuéra oike pe Tiérra Prometídape (Jos. 21:​43, 44).

8. ¿Mbaʼéichapa Jehová ogia vaʼekue ipuévlope umi rréi tiémpope? (Ehecha pe taʼanga).

⁸ Heta áño upe rire Jehová omoĩ vaʼekue umi hués ogia hag̃ua ipuévlope. Upe rire umi rreikuéra tiémpope Jehová omoĩ vaʼekue umi profétape ogia hag̃ua ipuévlope. Umi rréi ifiélva Jehovápe osegi vaʼekue umi profetakuéra konsého. Por ehémplo, rréi David  iñumílde vaʼekue ha oasepta proféta Natán okorrehírõ guare chupe (2 Sam. 12:​7, 13; 1 Crón. 17:​3, 4). Rréi Jehosafat ojapo vaʼekue la proféta Jahaziel heʼi vaʼekue chupe ha omokyreʼỹ pe puévlo de Judápe ‘ojerovia hag̃ua Jehová profetakuérare’ (2 Crón. 20:​14, 15, 20). Rréi Ezequías oñekevrantaitereírõ guare ojerure vaʼekue ajúda proféta Isaíaspe (Is. 37:​1-6). Umi rréi osegírõ guare Jehová gía haʼe ovendesi chupekuéra ha oprotehe pe puévlope (2 Crón. 20:​29, 30; 32:22). Péicha hesakã porãiterei vaʼekue Jehová ojevale hague umi profétare ogia hag̃ua ipuévlope. Upéicharõ jepe la majoría umi rréi ha umi israelita nohenduséi vaʼekue umi profétape (Jer. 35:​12-15).

JEHOVÁ OGIA UMI KRISTIANOKUÉRA YPYKUÉPE

9. ¿Mbaʼéichapa Jehová ogia vaʼekue umi kristiáno ypykuépe? (Ehecha pe taʼanga).

⁹ Pentekostés áño 33-pe, Jehová omoñepyrũ vaʼekue pe kongregasión kristiána. ¿Mbaʼéichapa haʼe ogia vaʼekue chupekuéra upe tiémpope? Haʼe onombra Jesúspe omoakã hag̃ua pe kongregasión (Efes. 5:23). Péro Jesús ndeʼíri vaʼekue káda disípulope mbaʼépa la ojapo vaʼerã. Upéva rangue haʼe ojevale umi apóstol ha umi ansiáno oĩvare Jerusalénpe odirihi hag̃ua chupekuéra (Hech. 15:​1, 2). Avei oñenombra vaʼekue ansianokuéra ogia hag̃ua umi kongregasión (1 Tes. 5:12; Tito 1:5).

10. a) ¿Oaseptápa raʼe umi kristiáno ypykue umi instruksión orresivi vaʼekue? (Hechos 15:​30, 31) b) ¿Mbaʼérepa oĩ vaʼekue umi orrechasáva umi kuimbaʼe Jehová omoĩ vaʼekuépe oporogia hag̃ua? (Ehecha pe rrekuádro “H esakã porãramo jepe oĩ la ndoaseptaséiva”).

¹⁰ ¿Oaseptápa raʼe umi kristiáno ypykue pe gía Jehová omeʼẽva chupekuéra? La majoría oasepta kuri pe gía ha vyʼápe osegi hikuái umi instruksión (elee Hechos 15:​30, 31). ¿Péro mbaʼéichapa Jehová ogia ipuévlope koʼág̃arupi?

JEHOVÁ ÑANDEGIA KOʼÁG̃ARUPI

11. ¿Mbaʼéichapa Jehová ogiáma raʼe oikóvo umi kuimbaʼe haʼe oiporavo vaʼekuépe? Emoĩ peteĩ ehémplo.

¹¹ Koʼág̃arupi Jehová ogia ipuévlope la Biblia ha Jesús rupive, pe omoakãva hína pe kongregasión. ¿Péro mbaʼépa ohechauka avei  Jehová ojevaleha unos kuánto kuimbaʼére ogia hag̃ua ipuévlope koʼág̃arupi? Jahechamína peteĩ ehémplo. Áño 1870 rire, Charles Russell ha iñirũnguéra ohechakuaa kuri 1914 haʼetaha peteĩ áño iñimportantetereíva. Haʼekuéra ontende upe áñope Ñandejára Rréino ikatuha oñepyrũ ogoverna (Dan. 4:​25, 26). ¿Mbaʼéichapa ou ontende hikuái upéva? Ostudia porã rupi hikuái umi profesía. Upérõ ojekuaa porã vaʼekue Jehová ogia hague chupekuéra. Umi mbaʼe oiko vaʼekue 1914-pe ohechauka Ñandejára Rréino oñepyrũma hague ogoverna. Upe áñope oñepyrũ kuri pe primera gérra mundiál ha avei oĩ opaichagua mbaʼasy, yvyryrýi tuicháva ha ñembyahýi guasu (Luc. 21:​10, 11). Ojekuaa porãiterei Jehová ojevale hague koʼã kuimbaʼe ipyʼaporãvare oipytyvõ hag̃ua ipuévlope. Jahechamína avei mbaʼépa oiko vaʼekue pe segunda gérra mundiál aja.

12, 13. ¿Mbaʼépa ojejapo raʼe pe segunda gérra mundiál aja ikatu hag̃uáicha ojepredika ha oñemboʼe hetave héntepe?

¹² Umi ermáno pe sentrál mundialpegua ostudia porã vaʼekue la heʼíva Apocalipsis 17:8. ¿Mbaʼépa ontende hikuái upe rire? Ohechakuaa pe segunda gérra mundiál rire ndoumoʼãitiha Armagedón, síno peteĩ tiémpore oĩtaha pyʼaguapy ha ikatuha ojeaprovecha upéva ojepredikave hag̃ua. Upévare Jehová organisasión odesidi peteĩ mbaʼe haʼetévaicha la naisentidopáiva upe moméntope. Haʼekuéra omoñepyrũ pe Eskuéla Bíblica de Galaad ikatu hag̃uáicha oprepara umi misionérope opredika ha oporomboʼe hag̃ua ko múndo tuichakuére. Pe gérra aja jepe omondo hikuái unos kuánto ermánope opredika hag̃ua diferénte paíspe. Avei pe esklávo de konfiánsa omoñepyrũ pe Curso en el Ministerio Teocrático b oipytyvõ hag̃ua umi puvlikadórpe oporomboʼe porãve hag̃ua. Péicha Jehová oprepara ipuévlope ikatu hag̃uáicha opredika umi lugár oñekotevẽtahápe.

¹³ Ñanemanduʼávo koʼã mbaʼére jahecha porãiterei Jehová ogia hague ipuévlope upe tiémpo ijetuʼuetévape. Opa rire pe segunda gérra mundiál, Jehová siervokuéra ikatu opredika pyʼaguapýpe ha lívremente heta  paíspe. Upéicha rupi, ojepredikáma hína opárupi ko yvy ape ári ha hetáma oĩ la oñepyrũva oikuaa Jehovápe.

14. ¿Mbaʼérepa ikatu ñakonfia Jehová organisasión ha umi ansiáno ñandegia porãha? (Apocalipsis 2:1). (Ehecha pe taʼanga).

¹⁴ Koʼag̃aite peve pe Kuérpo Governánte odepende Jesús gíare. Haʼekuéra omeʼẽ jave umi instruksión oipota ojekuaa porã upéva haʼeha la Jehová ha Jesús oipotáva. Haʼekuéra ojevale umi superintendénte de sirkuíto ha umi ansiánore omog̃uahẽ hag̃ua koʼã instruksión umi kongregasionkuérape. c Umi ansiáno ohótava yvágape oĩ hína Jesús po deréchape (elee Apocalipsis 2:1). Péro jaikuaaháicha, entéro koʼã ansiáno iñimperféktonte avei ha ikatu ojavy oiko haguéicha Moisés, Josué ha umi apóstol rehe (Núm. 20:12; Jos. 9:​14, 15; Rom. 3:23). Upéicharõ jepe jaikuaa porã Jesús ogiaha pe esklávo de konfiánsape ha umi ansiánope. Haʼe osegíta ojapo upéva “káda día, og̃uahẽ meve pe fin” (Mat. 28:20). Upévare ndaipóri jaduda hag̃ua Jesús ñandegiaha hína koʼã ermáno rupive.

UMI MBAʼE PORÃ JAHUPYTÝVA JASEGÍRAMO JEHOVÁ GÍA

15, 16. ¿Mbaʼépa reaprende umi oheja vaʼekuégui Jehová ogia chupekuéra?

¹⁵ Jasegíramo Jehová gía, koʼág̃ama voi ikatúta jahupyty heta mbaʼe porã. Por ehémplo, Andy ha hembireko Robin odesidi kuri oiko sensillovetaha (Heb. 13:5). Upéicha rupi ikatu kuri ombaʼapo hikuái umi konstruksión ojapóvape Jehová organisasión. Pe ermána omombeʼu: “Heta vése roiko kuri umi lugár michĩetereívape ha ni kosina ndoroguerekói. Chéve ningo chegustaiterei aguenohẽ la fóto péro avendémante la che kámara ha la che ekipokuéra. Cheresay che rováre ningo ajapo upéva. Péro che ajedesidíma kuri Abrahán rembireko ojapo haguéicha nambyasymoʼãiha umi mbaʼe aheja vaʼekue, síno avyʼataha umi mbaʼe ikatúvare ajapo koʼág̃a” (Heb. 11:15). ¿Mbaʼépa opensa Andy ha Robin la odesidi vaʼekuére? Robin heʼive: “Rovyʼaiterei ningo roikuaávo roñemeʼẽmbaiteha Jehová rehehápe. Rokumpli jave umi asignasión rorekóva haʼetévaicha voi roñandupámava hína mbaʼéichapa ojeikóta pe múndo pyahúpe”. Andy heʼi avei: “Rovyʼaiterei roipurupaite haguére ore tiémpo ha umi mbaʼe rorekóva Jehová servísiope”.

 ¹⁶ ¿Mbaʼe mbaʼépa ikatu avei jahupyty siémpre jasegíramo Jehová gía? Jahechamína peteĩ ermána hérava Marcia ehémplo. Oterminárõ guare la ikoléhio, odesidi kuri ojaposeha iprekursorádo (Mat. 6:33; Rom. 12:11). Haʼe omombeʼu: “Ojeofrese vaʼekue chéve peteĩ véka aike hag̃ua peteĩ universidápe 4 áñore, ha upépe ndapagamoʼãi kuri mbaʼevete. Péro che ajaposeve kuri Jehová servísiope ha upévare adesidi astudiatanteha peteĩ profesión ikatu hag̃uáicha añemantene ha ajapo la che prekursorádo. Núnka nambyasymoʼãi la adesidi vaʼekue. Koʼág̃a avyʼaiterei ajapo haguére che prekursorádo rregulár ha amaneha rupi la che tiémpo aservi avei de voluntária Betélpe. Upéva rapykuéri ajapo hetave mbaʼe ijojahaʼỹva Jehová servísiope”.

17. ¿Mbaʼéichapa ou porã avei ñandéve jasegíramo Jehová gía? (Isaías 48:​17, 18).

¹⁷ Sapyʼánte Jehová organisasión omeʼẽ ñandéve umi konsého ñanepytyvõva ani hag̃ua ñandeplatarayhu ha pono jajapo umi mbaʼe Jehovápe ndogustáiva. Jasegíramo Jehová gía, ou porã ñandéve voi pórke ikatu ñanekonsiénsia potĩ ha jajehekýi umi mbaʼe ikatúvagui ñanemoakãrasy rei (1 Tim. 6:​9, 10). Upéicha rupi ikatu ñañemeʼẽmbaite Jehová servísiope. Ndaipóri voi ótra kósa ñanembovyʼavéva upévagui ha ikatúva omeʼẽ ñandéve pyʼaguapy (elee Isaías 48:​17, 18).

18. ¿Mbaʼérepa siémpre resegise Jehová gía?

¹⁸ Ndajadudái Jehová osegitaha ojevale unos kuánto kuimbaʼére ñandegia hag̃ua pe jehasa asy guasu aja ha Jesús ogoverna aja mil áñore (Sal. 45:16). Upe tiémpope, ¿jasegítapa pe gía omeʼẽva ñandéve hikuái nañandegustapáirõ jepe? Koʼág̃ama voi ñaneñeʼẽrendúramo, upépe ndahasymoʼãiete ñandéve ñaneñeʼẽrendu hag̃ua avei. Upévare siémprekena jasegi Jehová gía og̃uahẽva avei ñandéve umi kuimbaʼe haʼe oiporavo vaʼekue rupive (Is. 32:​1, 2; Heb. 13:17). Ko múndope ningo oĩ heta mbaʼe ikatúva ñandeapeligra péro ¡ndaipóri jakyhyje hag̃ua! Ñande jajerovia Jehová ñandegia porãtaha ñag̃uahẽ hag̃ua pe múndo pyahúpe ikatutahápe jaiko pára siémpre.