¿REÑANDÚMAPA sapyʼánte erekoha heta provléma ha ndaiporiha avave nepytyvõ vaʼerã? Ko tiémpo jaikohápe ‘pe situasión ijetuʼu ha ipeligróso’ (2 Tim. 3:1). Upévare ikatu jaju ndajavyʼái ha ñañeñandu ñaneaño peteĩ. Péro oĩ hína umi ikatúva ñanepytyvõ. La Biblia heʼi umi amígo verdadéro ikatuha oĩ ñande ykére ‘jahasa asy jave’ (Prov. 17:17).

Yma apóstol Pablo oreko vaʼekue algúno iñamígo omoirũva chupe iviáhe misionálpe, ha haʼekuéra oipytyvõ vaʼekue Páblope (Col. 4:​7-11). Oĩrõ guare préso Rómape, iñamigokuéra ojapo vaʼekue umi mbaʼe Pablo ndaikatúiva ojapo. Por ehémplo, Epafrodito omog̃uahẽ vaʼekue Páblope umi mbaʼe orahaka vaʼekue chupe umi ermáno Filiposgua (Filip. 4:18). Tíquico oraha vaʼekue umi kongregasiónpe umi kárta Pablo oskrivíva chupekuéra. Pablo oĩrõ guare préso peteĩ ógape ha upéi kárselpe, lomímonte osegi vaʼekue okumpli iñasignasión iñamigokuéra oipytyvõ rupi chupe. ¿Mbaʼéichapa ikatu oiko ñandehegui peteĩ amígo verdadéro?

Koʼág̃arupi avei oĩ ermáno ha ermána ohechaukáva mbaʼépa ojapo umi amígo verdadéro. Jahechamína la ohasa vaʼekue peteĩ ermána hérava Elisabet. Haʼe ningo prekursóra rregulár ha oiko Espáñape. Elisabet omombeʼu peteĩ ermána oipytyvõ hague chupe ojekuaárõ guare isy orekoha kánser. Pe ermána orahakámi vaʼerã Elisabétpe heta téxto bíblico por mensáhe. Elisabet heʼi: “Umi mensáhe chemombarete vaʼekue aaguanta hag̃ua ha chembovyʼa aikuaa haguére oĩha peteĩ persóna orekóva enkuénta la ahasáva” (Prov. 18:24).

Ikatu ñañemoag̃uive ñane ermanokuérare ñaipytyvõramo chupekuéra opredika ha oho hag̃ua rreunionhápe. Epensamíntena, ¿ndaikatúipa eipytyvõ peteĩ ermáno térã ermána ijedávape osẽ hag̃ua opredika térã oho hag̃ua rreunionhápe? Rejapóramo koʼãicha mbaʼe ikatu peñomokyreʼỹ (Rom. 1:12). Péro oĩ ningo algúno ñane ermáno ndaikatúiva osẽ hógagui. ¿Mbaʼéichapa ikatu ñaipytyvõ chupekuéra?

Oĩ algúno ñane ermáno ha ermána ndaikatúiva oho rreunionhápe hasykatu rupi térã algún ótro provléma káusare. Por ehémplo peteĩ ermáno hérava David oreko kánser ha ojejapo vaʼekue chupe kimioterápia 6 mése aja. Upe tiémpope, David ha hembireko Lidia oñekonektánte vaʼekue umi rreunionrã.

 ¿Mbaʼéichapa oipytyvõ vaʼekue chupekuéra umi iñamigokuéra kongregasionpegua? Opa rire káda rreunión umi ermáno oĩva Salónpe oñehaʼãmbaite oñeʼẽ hag̃ua hendivekuéra por videokonferénsia. Avei káda ke David ha Lidia okomenta, upéi umi ermáno omondo mensáhe heʼi hag̃ua chupekuéra iporãiterei hague ikomentário. David ha Lidia omombeʼu oñandu hague umi ermáno ohayhuha chupekuéra.

¿Ikatúpa japredika peteĩ ermáno térã ermána ndaikatúivandi osẽ hógagui? Sapyʼánte tekotevẽnte ñakambiaʼimi la jajapóva ikatu hag̃uáicha ñamoirũ chupekuéra. Péicha jahechaukáta koʼã ermánope nañanderesarairiha chuguikuéra (Prov. 3:27). Por ehémplo ikatu jaskrivi kárta térã japredika hendivekuéra por teléfono. Umi ermáno ndaikatúiva osẽ hógagui ikatu oñekonekta ohendu hag̃ua pe aty predikasionrã. David ha Lidia omombaʼeterei vaʼekue ikongregasiónpe ojejapo haguére upéicha. David heʼi: “Tuicha oremokyreʼỹ vaʼekue roĩ haguérente ore grúpo de predikasión ndive. Péicha rohendu mbykymi la heʼíva pe ermáno odirihíva ha roñemboʼe hendivekuéra”. Ijáma guive ikatu eporandu pe ermána térã ermáno ndaikatúivape osẽ, ndaikatúipa egueraha hógape peteĩ ne estudiánte de la Biblia pestudia hag̃ua oñondive.

Jahasa jave tiémpo umi ermáno ha ermána ndaikatúivandi osẽ hógagui, jahecha umi kualida porã orekóva ha ñañemoag̃uive hesekuéra. Por ehémplo, ikatu ñahendu mbaʼéichapa oipuru Ñandejára Ñeʼẽ oporomboʼe ha og̃uahẽ hag̃ua umi hénte korasõme. Péicha jave ñamombaʼevéntema koʼã ermánope. Jahechaháicha ikatu hetave ñaneamígo ñaipytyvõramo umi ermánope opredika ha oho hag̃ua rreunionhápe (2 Cor. 6:13).

Apóstol Pablo ohasárõ guare heta mbaʼe ijetuʼúva, iñamígo Tito oho vaʼekue hendápe, ha upéva okonsola Páblope (2 Cor. 7:​5-7). Upéicharõ, iporã añete ñakonsola umi ermánope ohasa asy jave. Péro ndahaʼéi upévante. Tito ehémplo ohechauka ñakonsolataha avei umi ermánope ñaĩrõ hendivekuéra ha jajapórõ ikatúva guive hesehapekuéra (1 Juan 3:18).

Umi ermáno oĩva Rúsiape oñopytyvõ joa ha péicha omoĩ ñandéve ehémplo iporãitereíva. Jahechamína la oikóva Sergey ha hembireko Tatiánare. Umi polisía orrevisapaite vaʼekue la hogakuéra ha upéi oraha chupekuéra komisaríape ointerroga hag̃ua mokõivévape. Upéi opoi raẽve hikuái Tatiánagui. Sergey omombeʼu: “Tatiana og̃uahẽmíre ógape, ohóma hendápe peteĩ ermána ipyʼaguasúva. Upe rire hetave ore amígo oho omopotĩ ore departaménto romoĩ jey hag̃ua hendápe ore kosakuéra”.

Sergey heʼi: “Siémpre chegustáva Proverbios 17:17. Upépe heʼi: ‘Peteĩ amígo verdadéro nderayhúta tódo el tiémpo, haʼe ningo ne ermáno oĩva nde ykére rehasa asy jave’. Ajepersegi tiémpope antende porãvéntema ko téxto, pórke naaguantamoʼãi kuri che amigokuéra nachepytyvõirire. Jehová omeʼẽ chéve amígo verdadéro oĩva che ykére pyʼaguasúpe”.

Jahasa jave umi situasión ijetuʼúva ñaikotevẽ umi ñane amígo ikatúvare ñakonfia. Ha koʼýte ñaikotevẽta peichagua amígore pe jehasa asy guasu aja. Upévare jahechaukákena koʼág̃ama voi ñande haʼeha amígo teete (1 Ped. 4:​7, 8).