1. ¿Mbaʼérepa sapyʼánte ijetuʼu japilla mbaʼe sentídopepa álgien ñaneperdona?

 TUICHAITEREI ningo repyta ndepyʼaguapy peteĩ persóna heʼi jave ndéve: “Trankílo, roperdona”. Koʼytevéntema oimérõ reofende raʼe chupe. ¿Péro mbaʼépa legálmente heʼise hína ndéve upe persóna? Ikatu oime heʼise ndéve pesegitaha oñoamigoite ha mbaʼeve nokambiamoʼãiha, térã ikatu avei heʼise ndéve noñeʼẽseveintemaha pe oiko vaʼekuére. Peteĩ persóna heʼi jave ndéve neperdonaha, heta mbaʼe ikatu ontendekase.

 2. ¿Mbaʼépa heʼi la Biblia Jehová oporoperdona lájare? (Ehecha pe nóta).

² Jehová ningo idiferenteterei. Ndaipóri ni peteĩ persóna ikatúva oporoperdona Jehová ojapohaichaite. Peteĩ salmísta heʼi vaʼekue Jehováre: “Ñandejára, nde ningo reperdonakuaaiterei umi héntepe, péicha rejapo enterovéva nderrespeta hag̃ua” (Sal. 130:4). a Ha siertoite ningo, Ñandejára “oporoperdonakuaaiterei”. Haʼe ningo la ohechaukáva ñandéve mbaʼépa añetehápe heʼise ñaporoperdona. Umi Escrituras Hebréaspe ojeʼe jave Jehová oporoperdonaha, ojepuru jepi peteĩ palávra hese añoite ikatúva ojepuru, ha ndojepurúiva ojeʼe jave peteĩ persóna oporoperdonaha.

 3. ¿Mbaʼérepa jaʼekuaa Jehová operdona jave idiferenteha ñandehegui? (Isaías 55:​6, 7).

 ³ Jehová ñaneperdona jave ñanemopotĩete voi umi ñande pekadokuéragui, upéicha rupi ikatu jey jaiko iñamigoitéramo. Jaagradeseterei ningo Jehovápe operdonambaite haguére ñande pekadokuéra ára ha ára (elee Isaías 55:​6, 7).

 4. ¿Mbaʼépa Jehová ojapo ñantende hag̃ua mbaʼépa heʼise haʼe ñaneperdonáma hague?

⁴ Koʼa peve jahecháma Jehová operdona lája idiferenteha la ñande ñaporoperdona lájagui. ¿Mbaʼéicha upéicharõ ikatúta ñantende mbaʼeichaite pevépa haʼe ñaneperdona? Jehová ningo oheja la Bíbliape hetaiterei ehémplo ñantende porã hag̃ua mbaʼéichapa haʼe ñaneperdona. Ko artíkulope ñaanalisáta unos kuánto umi ehémplo. Umíva ohechaukáta ñandéve ñañarrepenti jave, Jehová oipeʼaiteha ñandehegui ñande pekadokuéra ha upéicha rupi jasegi iñamigoitéramo. Jahechávo umi ehémplo, jahayhuvéta Jehovápe ha jaagradesevéta chupe ñaneperdona haguére.

JEHOVÁ OIPEʼAITE ÑANDEHEGUI UMI PEKÁDO

 5. ¿Mbaʼépa oiko Jehová ñaneperdona jave?

⁵ La Bíbliape pyʼỹinte oñekompara ñande pekadokuéra umi kárga ipohýivare. Rréi David oñeʼẽrõ guare ipekádore heʼi vaʼekue: “Umi mbaʼe vai ajapo vaʼekue haʼete chéve peteĩ kárga ipohýiva araháva che akã ári, ha ndaikatuvéima chepuʼaka hese” (Sal. 38:4). Péro Jehová ikatu operdona umi oñarrepentívape (Sal. 25:18; 32:5). Pe palávra hebrea ojepurúva koʼã téxtope ha ojetradusíva “operdona”, ikatu heʼise “ohupi” térã “ogueraha”. Upéicha rupi ikatu ñañeimahina Jehová ojoguaha peteĩ karai imbaretévape, ohupíva ñande kárga pohýi ha ogueraháva ñandehegui. Upe kárga pohýi haʼe hína ñande pekadokuéra.

 6. ¿Mbaʼépa Jehová ojapo ñane rembiapo vaikuégui?

⁶ Oĩ ótro ehémplo la Bíbliape ohechaukáva mbaʼépa Jehová ojapo ñande pekadokuéragui. Salmo 103:​12-pe heʼi: “Pe kuarahyresẽ ningo mombyryeterei oĩ pe kuarahyreikégui, upéicha Ñandejára omomombyry ñandehegui umi ñane rembiapo vaikue”. Pe kuarahyresẽ ningo kilómetro oĩ pe kuarahyreikégui ha núnka ndojohupytymoʼãi. Upéva ohechauka Jehová ñaneperdona jave mombyryeterei omoĩha ñandehegui umi ñande pekadokuéra. Péicha haʼe oaseguraite voi ñaneperdonambaitemaha.

 7. ¿Mbaʼe ótro ehémplopa ohechauka mbaʼépa Jehová ojapo ñande pekadokuéragui? (Miqueas 7:​18, 19).

⁷ Jehová omoĩramo jepe mombyry ñandehegui umi ñande pekadokuéra, ¿serápa osegi gueteri oreko enkuénta umíva? Nahániri. Rréi Ezequías heʼi vaʼekue Jehovápe: “Entéro umi che pekádo remombo ne renondégui”. Térã heʼiháicha pe nóta: “Remombo nde rapykue gotyo” (Is. 38:​9, 17, nóta). Upéva ningo ohechauka ñandéve Jehová ñaneperdona jave haʼete ku oipeʼáva ñande pekádo hesa renondégui pono orahave enkuénta umíva. Upe téxto ikatu voi ojetradusi péicha: “Nde reperdona che rembiapo vaikue ha opyta voi núnka ndoikoiramoguáicha mbaʼeve”. Oñentende porã hag̃ua upéva, la Biblia omoĩ ótro ehémplo. Upéva jatopa Miqueas 7:​18, 19-pe (elee). Umi versíkulo ohechauka Jehová omomboha ñande pekadokuéra pe mar ruguápe, ha jaikuaaháicha yma umi mbaʼe oñemombóva márpe, ndaikatuvéima núnka ojetopa jey.

 8. ¿Mbaʼépa ñaaprende koʼa peve?

⁸ Koʼã ehémplo rupive jahecha Jehová ñaneperdonambaiteha. Haʼe oipeʼaite ñande pekadokuéra ha upévare natekotevẽvéima ñañeñandu vai ñane rembiapo vaikuére. Pe rréi  David ningo heʼi vaʼekue: “Ovyʼa umi persóna ojeheja reívape hembiapo vai, ha oñeperdonáva chupekuéra ipekádo. Ovyʼa pe persóna opeka vaʼekue péro Jehová ndogueraháiva enkuénta ipekádo” (Rom. 4:​6-8). Péicha ningo jahecha Jehová operdonakuaaitereiha.

JEHOVÁ ÑANEMOPOTĨ ÑANDE PEKÁDOGUI

 9. ¿Mbaʼe ehémplopa ñanepytyvõ ñantende hag̃ua Jehová ñaneperdonaiteha?

⁹ Jesús sakrifísio rupive, Jehová ikatu operdona umi pekadór oñarrepentívape. ¿Mbaʼéichapa haʼe ojapo upéva? La Biblia heʼi Jehová haʼeteha voi omopotĩva térã oipeʼáva pe máncha haʼéva pe pekádo. Upéicha rupi pe opekáva opyta ipotĩ jey Ñandejára renondépe (Sal. 51:7; Is. 4:4; Jer. 33:8). Jehová voi omombeʼu mbaʼéichapa ñanepytyvõ ikatu hag̃uáicha ñanepotĩ. Haʼe heʼi: “Pende pekadokuéra pytãramo jepe tuguýicha, opytáta morotĩ asy pe niéveicha. Pene rembiapo vai pytãitéramo jepe pe yvy pytãicha, opytáta morotĩ asy pe lánaicha” (Is. 1:18). Jaikuaaháicha ningo ijetuʼueterei jaipeʼa peteĩ máncha pytãitéva peteĩ ao morotĩgui. Péro ko ehémplo rupive, Jehová oaseguraite ñandéve ñanemopotĩeteha, ha upéicha ni umi máncha rapykuere ndopytái ñanderehe.

10. ¿Mbaʼe ótro ehémplopa ohechauka ñandéve mbaʼeichaite pevépa Jehová ñaneperdona?

¹⁰ Jahecha haguéicha pe artíkulo ohasa vaʼekuépe, umi ñande pekadokuéra ojogua umi déudape (Mat. 18:​32-35). Upévare, káda ves ke japeka haʼete la ñane kuénta ojupi ha ojupíva, ha amo ipahápe la jadevéva Jehovápe hetaitereíntema. Péro Jehová ñaneperdona jave, haʼete okanseláva la ñane kuénta. Haʼe ñaneperdonáma guive, ndoikói ñanderrekeri. Ñapensamína mbaʼeichaitépa ovyʼa peteĩ persóna oñekanselávape chupe la ikuénta, péicha avei ñande javyʼaiterei Jehová ñaneperdona jave.

11. La Biblia heʼi jave ñande pekádo ojevorraha, ¿mbaʼépa heʼise? (Hechos 3:19).

¹¹ Jehová ñaneperdona jave, ndahaʼéi okanselánteva la jadevéva, síno haʼe ovorraite voi (elee Hechos 3:19). Ko téxtope pe palávra “operdona”, idióma griégope heʼise vaʼekue ojevorraha álgo. Epensamína ko ehémplore: Álgien okansela jave ñandéve la ñane kuénta, ikatu ñañeimahina otachaha pe kuatiápe la jadevéva. Upéicharamo jepe, jasegi gueteri jahecha la ojeskrivi vaʼekue upépe. Péro ojevorráramo ningo idiferenteterei. Ñanemanduʼa vaʼerã yma pe tínta ojepurúva ndahasyiete hague ojevorra hag̃ua. Ejagarráramo peteĩ trápo heʼõ ha evorra, ojeipaitéma voi. Upévare, yma ojevorra jave peteĩ kuénta, odesaparesete voi. Avave ndaikatuvéima ohecha la ojeskrivi vaʼekue ha haʼete núnka noñanotái vaʼekue la redevéva. Upéicha avei Jehová ñaneperdona jave, ovorrapaite ñane rembiapo vaikue ha opyta núnka ndoikoirõguáicha mbaʼevete. ¡Ajépa javyʼaite upévare! (Sal. 51:9).

12. ¿Mbaʼépa ñanemboʼe pe ehémplo oñeʼẽva pe araíre?

¹² Oĩ avei ótro ehémplo la Bíbliape ohechaukáva mbaʼéichapa Jehová ñaneperdonambaite. Haʼe voi heʼi: “Avorráta umi ne rembiapo vaikue ha nde pekadokuéra avei. Ha aipurúta peteĩ arai amoʼã hag̃ua umíva” (Is. 44:22). Jehová ñaneperdona jave haʼete oipurúva peteĩ arai omoʼã hag̃ua umi ñane rembiapo vaikue, péicha haʼe voi ndohechavéima ñande pekádo, ni ñande.

13. Jaikuaávo Jehová ñaneperdonaha, ¿mbaʼéichapa ñañeñandu vaʼerã?

¹³ ¿Mbaʼépa ñanemboʼe umi ehémplo jahecha vaʼekue? Jehová operdona jave ñane rembiapo  vaikue, natekotevẽvéima ñañeñandu vai la jajapo vaʼekuére jaikove aja pukukue. Jesús sakrifísio ningo opaga kompletoite umi ñande pekadokuérare. Upéicha rupi, Jehová ñaneperdonávo haʼete voi núnka ndajajapói vaʼekue mbaʼeve ivaíva. Upévare ikatu ñaĩ segúro ñañarrepentíramo Jehová añetehápe ñaneperdonataha.

JEHOVÁ ÑANDEASEPTA JEY IÑAMIGOITÉRAMO

14. ¿Mbaʼérepa ikatu jarovia Jehová ñaneperdonambaiteha? (Ehecha umi taʼanga).

¹⁴ Jehová ñaneperdona jave, ikatu ñaĩ segúro haʼe ñandeasepta jeyha iñamigorã. Upévare ndovaléi jasegi ñañeñandu kulpávle la jajapo vaʼekuére. Avei natekotevẽi jakyhyje oimérõ g̃uarã haʼe opyta ipyʼaro térã opensárõ g̃uarã mbaʼéichapa ñandekastigáta. Haʼe ningo núnka ndojapomoʼãi upéva. ¿Mbaʼérepa ndajadudái upévagui? Jehová ningo heʼi vaʼekue Jeremíaspe: “Che aperdonáta chupekuéra umi hembiapo vaikue ha nachemanduʼamoʼãvéima ipekadokuérare” (Jer. 31:34). Upéi Pablo imanduʼa ko versíkulore ha heʼi jey la Jehová heʼi vaʼekue: “Che aperdonáta chupekuéra hembiapo vaikue ha nachemanduʼamoʼãvéima ipekadokuérare” (Heb. 8:12). ¿Mbaʼépa la heʼiséva koʼã versíkulo?

15. ¿Mbaʼe sentídopepa Jehová naimanduʼavéi ñande pekádore?

¹⁵ La Biblia heʼi jave peteĩ persóna imanduʼaha álgore, ndeʼiséi opensanteha peteĩ mbaʼe oiko vaʼekuére yma, síno upéva heʼise ojapotaha hína peteĩ mbaʼe. Por ehémplo, pe kriminál oñemosaingo vaʼekue Jesús ykére heʼi vaʼekue chupe: “Jesús, nemanduʼákena cherehe reike vove ne Rréinope” (Luc. 23:​42, 43). Ko kriminál ningo ndahaʼéi ojeruréva Jesúspe opensa hag̃uánte hese, síno haʼe ojerure Jesúspe ojapo hag̃ua álgo hesehápe. Ha la Jesús ombohovái lájare chupe, jahecha haʼe omoingove jeytaha upe kriminálpe. Upéicharõ Jehová heʼi jave naimanduʼaveimaha ñande pekádore, heʼise ndojapomoʼãiha mbaʼeve ñane  kóntrape. Jehová ñaneperdonáma guive, haʼe ni mbaʼevéicharõ nañandekastigamoʼãi amo gotyove umi mbaʼe vai jajapo vaʼekuére.

16. ¿Mávarepa la Biblia ñanekompara?

¹⁶ Jehová ñaneperdona jave, haʼete japytáva lívre. La Bíbliape ojepuru ótro ehémplo ñantende hag̃ua mbaʼéichapa oiko upéva. Ñaneimperfékto rupi jajogua umi esklávope ha oiko ñandehegui pe “pekádo rembiguái”, péro Jehová ñaneperdona rupi ikatu ‘jajei pe pekádo poguýgui’ (Rom. 6:​17, 18; Apoc. 1:5). Eñeimahinamíntena mbaʼéichapa peteĩ esklávo ovyʼa syrýta ojepoíramo chugui. Ha peichaite avei ñande javyʼa jaikuaávo Jehová ñaneperdonaha.

17. ¿Mbaʼe sentídopepa jakuera? (Isaías 53:5).

¹⁷ (Elee Isaías 53:5). La Bíbliape oñekompara pe pekádo peteĩ mbaʼasy ikatúvare ñandejuka. Péro Jesús sakrifísio rupive, Jehová ñanepytyvõ jakuera hag̃ua pe mbaʼasýgui (1 Ped. 2:24). ¿Mbaʼéichapa haʼe ojapo upéva? Ñande japeka jave ñambyai pe amista jaguerekóva Jehovándi, péro pe rreskáte rupive haʼe ñaneperdona ha upéicha rupi ikatu jaiko jey iñamigoitéramo. Epensamíntena mbaʼeichaitépa ovyʼa peteĩ persóna hasy vaʼekue péro upéi ojerrekupera jey ha okuera. Peichaite ningo avei ñande javyʼa jarrekuperávo pe ñane amista Jehovándi ha ñaĩ porã jeývo henondépe.

MBAʼÉPA JAHUPYTY JEHOVÁ ÑANEPERDONA RUPI

18. ¿Mbaʼépa ñaaprende umi ehémplo jahecha vaʼekuégui? (Ehecha pe rrekuádro “¿Mbaʼéichapa Jehová ñaneperdona?”).

¹⁸ ¿Mbaʼépa ñaaprende umi ehémplo ñaanalisa vaʼekuégui? Jahecha kuri Jehová ñaneperdona jave, umi ñane rembiapo vaikue opyta ku núnka ndoikoirõguáicha. Avei ñaaprende Jehová ñaneperdonáma guive, natekotevẽiha jajepyʼapy haʼe ñandekastigátarõ g̃uarã amo gotyove. Upévare ikatu jaguereko peteĩ amista iporãva ñande Ru yvagapeguándi. Péro iporãta ningo ñanemanduʼárõ pe perdón haʼeha peteĩ rregálo oúva Jehovágui. Haʼe ñaneperdona pórke ñanderayhu ha imbaʼeporã ñanendive, ndahaʼéi ñamereségui (Rom. 3:24).

19. a) ¿Mbaʼérepa ñaĩ vaʼerã agradesído Jehovápe? (Romanos 4:8). b) ¿Mbaʼépa jahecháta pe ótro artíkulope?

¹⁹ (Elee Romanos 4:8). ¡Ajépa jaagradesete Jehovápe ‘ñaneperdonakuaaiterei’ haguére! (Sal. 130:4). Péro Jehová ñaneperdona hag̃ua jajapo vaʼerã álgo iñimportantetereíva. Jesús oexplika vaʼekue mbaʼépa upéva. Haʼe heʼi: “Napeperdonáiramo pende rapichápe hembiapo vai, pende Ru oĩva yvágape noperdonamoʼãi avei pene rembiapo vai” (Mat. 6:​14, 15). Upéicharõ, tekotevẽterei jasegi Jehová ehémplo ha ñaperdona ñande rapichápe. Pe artíkulo oúvape jahecháta mbaʼéichapa ikatu jajapo upéva.